Wednesday, December 29, 2010

كرار جاسيم: تبريزده توركلر ياشاييرلار


خبرلره گؤره كرار جاسيم بئش اويوندان محروم اولوندو. البته دئييلن آلتي آيليق محروملوق شايعه‌سينه گؤره پيس دئييل. اوچ اويون كي محروم ايدي قالدي ايكي اويون. قيرميز كارتي‌نين جزاسي آيري حيسابلانسا قالار دؤرد اويون. آما فيكير ائليرم بو اويونلاري كرارسيز دا اوتماق اولسون. هر حال‌دا كرار جاسيمين جزالانماسيندا هئچ شك و شوبهه يوخدور، آما بو آرادا نه‌دن آراجي‌نين(داورين) يانليشي و پيروزونون اويونچوسونون آتديغي يومروغو و سونرا اؤزونو يالاندان يئره آتماغي گؤزلردن قاچيريلير چوخ تعججوبلودور. من بيلميرم تيراختور سوروملولاري دئييرلر بيز اعتراض ائتمه‌يه‌جه‌ييك.

فوتبول فئدراسيونو كسينليكله عدالت و انصاف ايله بو قونويا توخونمايير و تيراختورون يانداشلارينين قارشي‌سيندا دورابيلمه‌مك ايچين گلير تيراختورون اولدوزون جزالانديرير. بو اولايلار گون گونه باعيث اولور كرار جاسيمين محبوبيتي آزربايجان‌دا آرتسين. ائله اولور كي كرار اوينامايان ياريشلاردا، تاماشاچيلار اونو شيددت ايله آلقيشلاسينلار. بو دا قالسين كي تيراختورون سوروملولاري يانداشلارين كرار جاسيمين قوجاقلاماسي‌ني تبليغ ائتمك يئرينه ناشي‌ليق گؤسته‌ريب، ليدئرلرين الينه صندلي و گول وئرير دئيير گئدين مئيدان قيراغيندا "كرار كرار" سسله‌يين. تيراختورون فورصت آختاران دوشمانلاري‌دا(90 كيمي وئرليشلر) بو ايشي تيراختور يانداشلاري‌نين آراسيندان قاينايان(خودجوش) بير ايش بيلمه‌ييب، اله‌ ساليرلار! حالبوكي بيز كيمي هئچ يانا باغلي اولمايان يانداشلار، صندلي  سينديرماغين گوناهي‌ني كرارين يئرينه بوينوموزا آلميشديق و اونون عوضينه خيسارت وئرمك اؤنري‌سي‌ني(پيشنهاد) وئرميشديك (گوناه بيزده، كرار دا يوخ).

كرار تيراختور - پيروزي اويونوندان اخراج اولوندان سونرا سويونما تونئلي‌نين آغزيندا دوروب اويونا باخيردي. پوليسلر اونا  دئيه‌ند گئت ايچه‌ريدن باخ و اونون اوردان بويلايا-بويلايا باخماغي اصرار ائتمك فيلمينده او چتینلیک ايله "فارسجا" دانيشيردي. او فارسجا دانيشاندا بئله فيكر ائديرديم كسينليكله كرار و تيراختورون باشقا اويونچولاري تيراختورون ديل و كيمليك قونوسوندان خبرلري واردير؛ ائله بير ايكي آی بوندان قاباق، کرار قول ووراندان سونرا گليب آزربايجان رقصي ائتمه‌يي بونو اونايلايير(تایید ائلیر). هر حال‌دا تاخیمین مورببي‌سي و چوخلو اويونچولاري فارس‌ديللي‌ديرلر يا دا تورك دئييللر و ايليشكي قورماق ديلي‌ده اونلار ايچين فارسجادير. آما چوخ كؤنلوم وار ايدي بو قونودا كرار جاسيم‌دن بير سؤز گؤرم. آما خوب نه بيز اونونلار گئديب موصاحيبه ائده بيليريك و نه حرفه‌اي ژورناليستلر و مئديادا چاليشانلار بو ايشلرين داليسيجاديرلار. بوگون بئينيمه ووردو گئديب عرب وعيراق سايتلاريني آختارام. البته بوندان قاباق آختارميشديم آما كرار جاسيمين تراكتورسازي نادي‌سينده اويناماق‌دان سونرا ده‌يه‌رلي بير خبر گؤرمه‌ميشديم. عيراقين الفرات شبكه‌سي‌ده تكجه كرار جاسيم قول ووروب وورماماغيندان دانشيردي. بير دنه عربجه دانيشيغين گؤردوم آما باش چيخارتماديم. آما بوگون چوخ جاليب بير موصاحيبه تاپديم! ائله اؤزوم ايسته‌يه‌ن ايدي. سانكي 2011 آسيا ميللتري ياريشلارينا آماده اولماق ايچين اوردو وورماق و باشقا ياندان كرار جاسيمين تراختور دا پارلاماغي و يوخاري‌دا يازديغميز يارانميش حاشيه‌لر بو فورصتي ياراتميشدير. موصاحيبه‌ني قوقولون ديلمانجي‌نين يارديمي ايله عرب ديليندن توركجه‌يه چئويرديم:


كرار اؤز قلبي‌ني ايرانلي تاخيمين يانداشلارينا آچدي *

-كلامكم نور:  كرار دئه گؤرك ايران ليگينده اويناماق نئجه دير؟ اورادا راحات‌سان؟
-كرار: واللا چوخ راضي و راحاتام؛ چون بيزيم يانداشلار فوتبولو چوخ سئويرلر(حتي دئمك اولار فوتبول چیلغینی‌دیرلار)!

-كلامكم نور:  تراختوردان باشقا تيمه فيكر ائديرسن يوخسا يوخ؟
-كرار: من آچيقجا دئميشه‌م ايران‌دا تراختوردان باشقا هئچ تاخیما گئتمه‌رم، آنجاق شرايط ده‌ييشيله‌بيلر...

-كلامكم نور: سوناجاق بئله اولاجاق؟ پول نظري‌ني ده‌ييشه‌بيلر؟
-كرار: يوخ! ترسينه. كلوب حاضيردير نه‌قدر ايسته‌سم وئرسين؛ عربيستان و اماراتا گئتمه‌يه‌ده ماراقلانا بيله‌رم.

-كلامكم نور: بيزه سون اويون‌دا كي عصبي اولماق و اخراجيندان دانيش.
-كرار: واللاه منه ظولم اولدو. من انضباطي كميته‌يه‌ده گئديب و ويدئو ايله دئديم كي منيم تقصيريم يوخ‌ايدي. حتي دوخسان وئرليشينده ايسه بيليندي گوناهسيزام. آما ايسته‌ييرديلر مني بير ايل يا دا بو اوران‌دا(بو نيسبت‌ده) اويناماق‌دان محروم ائتسينلر. آما اونلارلا آنلاتديم كي آرالاشديران اويونچولارين بيري‌سي‌نين الي اونا ده‌يدي و بونا گؤره قرار وئرديلر لاپ چوخ مني ايكي آي آسيا ياريشلاري‌نين سونا قدر جزالانديرالار.

-كلامكم نور: فارسجا اؤيرنمه‌يه چاليشيرسان؟
-كرار:  واللا تبريز منطقه‌سينده توركلر چوخونلوق‌دا(اكثريت‌ده) ديرلار و ديللري‌ده اولدوقجا چتين‌دير و هله ياخشي منيمسه‌مه‌ميشم(مسلط دئييلم)!

-كلامكم نور: بو اوزون ساچلارین ناغیلی نه‌دیر؟
-كرار(گولومسه‌ییر دئییر): واللا اوزون ساچ یانی (اؤزوده اؤز سؤزونه اینامی یوخ!) ... من، ائویمیزده‌کی‌لر و اوغلوم حیدووری‌نین(حئیدرین) ساچی منینکیندن ده اوزون، و من اوزون ساچی سئویرم!

-کلامکم نور: قروپونوزدان(آسیا یاریشلاری) هانکی تاخیملار ایکینجی تورا یول تاپاجاقلار؟
-کرار: آرخایینام اؤلکه‌م(عیراق) و ... امارات...!

-کلامکم نور: سن اماراتی ایره‌لی سوردون؛ آما من دئدیم بکلنتی‌لر(توقعات) نه‌دیر، دیلکلر(آرزیلار) یوخ!
-کرار: واللا گرچک آدایلار عیراق و ایران‌دیرلار.

-کلامکم نور: ایرانین اؤندر اویونچولاری کیم‌لردیلر؟
-کرار: اسپانیا لیگیندن اویونچولاری وار.. نئکونام و شجاعی؛ بو ایکی اویونچو ائتکی‌لی‌لریدیر و تاخیما آرتیریلاجاقلار. بیرچوخونون آدلارینی بیلمیرم؛ تانیدیقلاریمین آراسیندا ایستیل آذینین 9 سایی‌لی فوراوردی، استقلالین قوروجوسو، و سیپاهانین قاپی‌چی‌سی رحمتی واردیلار. نوصرتی‌نی لاپ یاخشی تانیرام و تیموریان‌دا آزاد اولان زامان اؤنملی اویونچودور.

-کلامکم نور: هانسی یئر ده اوینایاجاسان؟
-کرار: واللا هر یئرده اوینایابیله‌رم.

-کلامکم نور: عیراق‌دا هارالی‌سان؟
-کرار: نجف اشرف.

-کلامکم نور: کاپتان کرار‌ین سینه گئنیشلیگیندن(سعه صدر)، و نئچه دقیقه واختیندان بیزه وئرمه‌یه گؤره تشککور ائدیریک.
-کرار: سیزده ساغ اولون.


*-مصاحبه ائدن سايتين آدي "منتديات النادي الايراني(ايرانلي تاخيم يانداشلاري)"‌دير. قايناق: اللاعب العراقي كرار جاسم يفتح قلبه لمنتديات النادي الإيراني

---
ي. س:
فوتباليست‌ها درگي‌سينين يوخاريداكي موصاحيبه‌ني ياييبدير؛ اللري آغريماسين آما تاسف ايله قايناقسيز ياييبلار و ترجمه‌ني ائدن منبعين آديني آپارماييبلار! توركجه‌ يازين قايناقسيز يازسانيزدا يازين؛ آما بو ايش ايله امكداشليقلار و بيرليكلره ضربه وورورسونوز: پاس جاوابي آتمايان توپو قاچيردانلار.

Tuesday, December 28, 2010

خان‌ننه‌ميزين تايي تاپيلماز

سايين يولداشيم مئهدي بؤيوك آتاسي‌نين بو دونيادان كؤچمه‌سينه گؤره بير اوزونتولو يازي قويوب بولاغينا، شهريارين خان‌ننه‌ شئعرينه‌ ايسه اشاره ائديب. من‌ده مئهدي‌يه باش ساغليغي دئييرم. آلله اونون بؤيوك آتاسينا رحمت ائله‌ييب و مئهدي‌نين حؤرمتلي عاييله‌سينه‌ده صبر وئرسين.

فيكر ائليرم بوندان اؤنجه‌ده شهريارين دويغوسال شئعرلرينين تايسيزليغينا گؤره يازميشام(شهريارين آناسي و گرچك شاعير). خان‌ننه شئعري بوتون آزربايجانلي‌لارين اورتاق دويغوسودور. من ائله‌ده احساس‌لي آدام دئييلم، آدام اؤزونو شاعير يئرينه قويوب گؤز ياشي تؤكور. شهريارين اوركلنمه‌يي‌ني گؤروب دينله‌مه‌يي كي‌ مني لاپ اوزور:


ي.س: شهريارين اؤز ديلي‌ايله "خان‌ننه" شئعري يوتيوب‌‌دا: باغلانتي
يوتيوبا گئده‌بيلمه‌سينيز كانوئرت اولونموش فايلي‌ني، بورادان دانلود ائدين: باغلانتي
كانوئرت اولونموش فايل سيلينسه، يوتيوب آدرئسي‌ني كوپي ائله‌يين بورادا كانوئرت ائله‌يين: clipconverter.com

بلديه! سن‌ده سالدير

بو يازي‌ني تراختورچي سايتينا اؤزل اولاراق يازديم:

شهرداري حمله ائله، تيراختور قول ووروب

دئمه‌لي‌يه‌م بو يازي‌‌نين يازماغي بير يانا، باشليق سئچمه‌يي ايسه بير يانا! باشليغي ايلك اؤنجه "آزربايجان ياتماييب، بلديه‌ني ساتماييب" سئچميشديم، سونرا نظريم ده‌ييشيلدي "آزربايجان اوياخدير، شهرداري‌يا دا داياخدير"ي به‌يه‌نديم! فيكر ائليرم تراختورچي بو قونودا من‌دن ياخشي فيكيرله‌شيب و يازي‌نين ايچينده كي "شهرداري حمله ائله، تيراختور قول ووروبـ"ـو سئچيب.

Monday, December 27, 2010

اوستو اؤرتولو آناديليميز

بير آي اولار اوتاي‌دا باش اورتو و حيجابا گؤره اولان اعتراض‌لار قونوسوندا ايران يايينلاريندا خبرلر گؤسته‌ريلير و يازيلير. اوردا تپكي گؤسته‌رنلرين ايسته‌يي اوخوللار و بيلي‌يوردلاردا باش اورتونون ياساقلانماسي‌ني قالديرماق‌دير. من بيلميرم اورادا بو قونو دا تپكي ائدنلرين سايي‌سي يوزده نئچه اولابيلر؛ آنجاق بو آيدين‌دير هر كيمسه حاقلي‌دير نئجه ايسته‌يير گئيينسين. حاقلي اولماق‌دا آز يوخسا چوخ اولماغا باغلي‌دئييل. آزربايجان حوكومتي اؤز خالقي‌نين ايستكلرينه باش اه‌يمه‌لي‌دير.
آما ايران‌ ايچينده مئديالارين ده‌يقه باشي بو قونويا توخونماغي بير آز عجيب نظره گلير. اوتايداكيلار كي فارسجا بيلميرلر بو خبرلره قولاق آسالار! اولابيلر پاييزين سونوندا ايران آزربايجانلي‌لاري‌نين قولاغينا بير شئي‌لر‌ چاتديرماق‌دير! آما گونئي‌لي توركلره حيجاب نه قدر ده اؤنملي اولسادا، كيمليك قونوسودا اؤنملي‌دير. اونلار آرازين قوزئيينده كي ديلداشلاري‌نين كولتورل دورومونو ياخشي گؤرورلر و البته بو تايين اوخوللارينداكي دورومو دا گؤزدن قاچيرتماييرلار. اينسانين بئيني بئله گرچكلري موقايسه ائتمك ايچين‌ يارانميشدير! اونلار گؤرورلر بوتون قيز اوشاقلار و اؤيره‌نجيلر مدرسه‌لره اؤرتوك و حيجابلي گئديرلر. آنجاق بورادا تكجه ساچلار و بدن اؤرتولمور. بورادا آناديلي‌ده اوخوللاردا اؤرتولوب و ياساقلانير. بورادا آناياسا يا گؤره، آناديلين اوخونماسي مدرسه‌لرده  آزاد اولسا، هئچ مدرسه مودورو يا اؤيرتمه‌ني آزاد دئييل بير مدرسه‌ده توركجه درس‌ليكلر قورسون! بو ايشين هاراسي ايسلامي ايش‌دير؟
قوران‌دا دئمه‌ييب ديلينيزي‌ده گيزله‌تمه‌لي‌سيز! آما دئييب : "انا خلقناکم من ذکر و انثی و جعلناکم شعوباً و قبائل لتعارفوا ان اکرمکم عندالله اتقیکم". كسينليكله ائللر آراسيندا كي تانيشمادا، آللاه يارادان "آناديلي"‌ني اوستو اؤرتولو ساخلاماق قورآنين قارشي‌سيندا دورماق‌دير.


Thursday, December 23, 2010

تیراختور! سالدیر! بیز آسیا ایستیریک

آزربایجان تیملری فرق ائله‌مز ره‌لری
بلدیه (شهرداری) یاریم فصلین اوچ اویوندان بیرینجی‌سینی قوناق ائوینده موساوی ائدیب، ایکینجی‌سی‌نی ائوده اوتوب؛ اوچونجوسونو آزربایجان دئربی‌سینده آز قالیردی بیر باشقا موساوی آلسین. گیرمیشدی دیفاعا. تیراختورون فورواردلاری‌دا بوتون توپلاری کؤرلاییردیلار. باشقا یاندان عصبی اولوب حیرصله‌نیردیم تیراختور، لیگین لاپ گوجسوز دیفاعینا قول وورابیلمیر. بو دا تیراختورون شانسی‌دیر! بلدیه بئله یاخشی اویونلارلا کسینلیک ایله اوستون لیگ‌ده(لیگ برترده) قالاجاق. آما آزربایجانا اوچ امتیاز گئتمک، ایکی تیمه درده ده‌یمه‌یه‌ن ایکی دنه بیر امتیازدان چوخ چوخ چوخ اؤنملی ایدی. البته آللاه اوزوموزه باخدی سون دیقه‌ده ابراهیمی‌یا پئنالتی اولدو و نوصرتی ده بیر گؤزل قول ووردو. بو اوچ امتیار تاریخ‌ده ایلک دؤنه اولاراق، تیراختورو تئهرانین ایکی سئوگیلی تیمیندن یوخاری سیرایا آپاراردی. بو یوخاری گئتمک‌ده یقین کی بلدیه‌نین ائتکی‌سی(تاثیری) اولوبدور. دوزدور دؤرد آی بوندان قاباق ائوده استقلال اوچ امتیاز وئردی آما کئچن هفته استقلالا تئهران‌دا اوتوزماییب و بو هفته تیراختورا یئنیلیدی. یاشاسین بلدیه. بلدیه‌ هئچ‌ده نیاران اولماسین کی بو گؤزل اویونلارینا گؤره بوندان سونرا تک قالمایاجاق.

تیراختور یانداشلاری تیراختوردان، حمله ائدیب قول وورماق ایسته‌یه‌نده، معمولن دئییرلر :"تیراختور حمله ائله جیریخ یئرین تاپمیسان"؛ ایکینجی میصرع ائله ده یاخشی دئییل. آما بو گونکو ائل یاریشیندا آزربایجان تیملری‌نین فرقلی اولماماقلارینا گؤره اونو بئله دئدیلر: تیراختور حمله ائله، بیز آسیا ایستیریک
بو اولدوقجا گؤزل، ماراقلی و دوشونجه‌لی بیر شوعار ایدی؛ یارادانی و دئیه‌نلری‌نین اللری آغریماسین.

و تیراختور او ایکی تیمی اوسته‌له‌دی!
تیراختور ایکی دنه ده آرتیق قول وورسایدی قول تفاضولونا گؤره کـیرمانین میسینده کئچمیشدی. البته امتیازلار بیر دیر و من گله‌جه‌یه اومودوم وار. آنجاق لاپ اؤنملی بو دور کی استقلال تئهران‌دا ذوب‌آهنه اوتوزدو تیراختور پیروزو‌دان سونرا استقلالی‌دا قاباقلادی! بو چوخ سئویندیریجی‌دیر. شبکه اوچون فوتبال برتر" وئرلیشینین آپاریجی‌لاری منجه بونا گؤره راحاتسیز ایدیلر. بو راحاتسیزلیغین نه‌ده‌نی اونلارین بیر گولونج ایشلری ایدی. ائله‌بیلمه‌یین تکجه تیراختور یانداشلاری‌نین عکس العملی تئز دیر و تمیز اویغون شوعارلار چیخاردیب دئییرلر. تیلویزیون‌دا کی پاخیللار ایشلرینی چوخ یاخشی باشاریرلار. زامان قورتارماق باهاناسینا دئدیلر سؤال-جوابا واخت یوخدور آنجاق فقط بیر قوناغا اجازه وئریریک سورغوسونو سوروشسون. سؤال سوروشان‌دا زیر تورک لهجه‌سینده فارسجا دئدی: "صدر جنابی! بو پئرسپولیس و استقلال تاخیملاری 60 و 70 جی ایللرده به‌تر فوتبول اویناردیلار آخی! محبوب تیملریمیزین باشینا نه گلیب بس؟!" البته صدر پیس یانیت(جواب) وئرمه‌دی دئدی ایران‌دا چوخ‌دان‌دیر فوتبول نئچه قوطب‌لو اولوب و بو فوتبول ایچین یاخشی‌دیر. آما "فوتبال برتر" وئرلیشی‌نین لاپ به‌تر(!) و گولدورجو بؤلومو ته‌له‌سمک‌ایله جایزه وئرمکلرینده ایدی. ایکی دنه کامئرا جایزه‌سی ایچین پوشک آتیلاندان سونرا، همن تیراختوردان خبرسیز اولان، آما پیروزی و استقلالین نوستالژی‌سینی چه‌که‌ن تورکون آدی چیخدی!!
بئله واختلاردیر آدام دئمه‌لی‌دیر: "شانسا باخ شانسا! ماشاللا دئیه‌ک گؤز ده‌یمه‌سین". اولابیلر بئله بیر اؤنملی(مهم) سوال سوروشاق و جایزه آلماق باعیث اولا کی تیراختورون دؤردونجو دال با دال اوتماغی،‌ او ایکی تیم‌دن قاباغا دوشمه‌سی، و قهرمانلیق و آسیا سهمیه‌سینه یاخینلاشماسی، آزربایجانین بوتون کؤی‌لری، کندلری، شهرلری و بؤلگه‌لرینده یادلاردان چیخیب و ده‌یه‌رلی بیلینمه‌سین!!

ی. س:
یوخاری‌دا کی یازی‌نین انتشاری، تکجه traxtorchi.ir و tiraxtorfans.com سایتلاری ایچین اؤزل(مخصوص) دیر.

خلاصه به فارسی:

شعار "آذربایجان تیملری فرق ائله‌مز ره‌لری" گویا بیشتر مخصوص آنهایی است که جهت تشویق یکی از دو تیم خودی تراختور و شهرداری به استادیوم نمی روند. کنار گذاشتن شعار سطح پایین "جیریخ یئرین تاپمیسان" و گفتن شعار "بیز آسیا ایستیروخ" به اندازه کافی گویای هدف اصلی تشویق تراختور بود. یک امتیاز نه باعث می شد شهرداری از خطر سقوط بگریزد و نه باعث تکان تراختور در بالای جدول می شد. سه امتیاز این بازی باعث شد تراختور استقلال را هم پشت سر بگذارد و اگر گلهای زیادی داشت مس را هم پشت سر می گذاشتیم...

Monday, December 20, 2010

گونون گؤروتلری: تیراختور سئون دمیریولچولار

دوز دور تختی ایستادیومونا گئتمک چتین‌دیر؛ اوزاقلیغینا گؤره تاماشاچیلارین سایی‌سی آزالیر و اورادا آز-چوخ آدامی اینجیدیرلر، آما... آما اورانین یاخشی‌لیغی بودور کی بو ایلین لیگینده، هر ایکی دؤنه تیراختور یاریشی قازانیب. احتمالن ایستادیومون آدی  همدان تورکو اولان آدلیم قهرمان گولشچی‌ ایله ایلیشگی‌لی اولماغا گؤره اولسون!! بوغاز-موغازدا دا کی کار قالمادی؛ آما تیراختورون ملوانا اوتوزماغین کسینلیک ایله اونودوب ائوه دؤندوک.
بیر ماراقلی اولای دا بو ایدی دمیر یولونو آلقیشلاماق ایچین تئهرانین گونئی بؤلگه‌لریندن گتیریلمیش راهنمایی یوخسول اوشاقلار، اویون‌دان سونرا "یاشاسین تیراختور" دئییردیلر و چوخو دا تورکجه دانیشماق باشاریردیلار. اؤزلری تیراختور بایراغینی الیمدن قاپیب گؤرونتولر ده اولماق ایسته‌ییردیلر. بو دؤنه کامئرالارا یول وئریلیردی، آما گؤرونتو سالماق چتین ایدی. بئشینی سئچیب قالان گؤروتلر و کلیپلره بورادا باخابیلرسینیز.
بیرینجی گؤرونتو آتالاری ایله گلن اوچ بالاجا باجی قارداشلاردیرلار:



منجه عیراقلی اؤیونچوموز "کرار جاسیم" آزربایجان‌دا ان محبوب و ان چوخ سئویلن آدام دیر. او محروم اولا-اولا شیددت ایله آلقیشلانیردی. نئچه ثانیه‌دن سونرا یانداشلارین ایچینده یئریه‌بیلمیردی

تیراختور یانداشلاری‌نین ماشینلاری‌نین پلاک سایی‌سی تئهران، و اطراف بؤلگه‌لردن ایدیلر:


بوتون گؤروتلری گؤرمک ایچین کلیک ائدین

Tuesday, December 14, 2010

گوناه بيزده، كرار دا يوخ

تيراختورون حذف اولماغي اوزوجو دئييل

تيراختورون 120ده‌يقه سالديرماغي، آما پئنالتي ووروشلاريندا اله‌نمه‌يي ائله‌ده اوزوجو دئييلدي. منجه‌ چوخ‌دا ياخشي اولدو حذف اولدو؛ تكجه بو حذفي اويونلارين ايپینه اودون دوزمك يانليش‌دير. اومودلرين باغلاياجاقديلار فينالي آلتي آي‌دان سونرا قورولان حذفي اويونلارا. دوزدور گئنه‌ده تئهران‌دا بؤيوك تاريخي بير ياريش‌دا استقلال، يوخسا پيروزي، اولاجاقديرلار تيراختورون قوناغي، آما بو فئدراسيون‌دان هر ايش دئسه‌ن چيخار؛ فينال اويونوندا گئچن ايل كيمي ايشيقلاري سؤندوروب و باشقا پيشيكلر ده به‌زه‌يه‌رديلر. هله بو آرادا لاپ اوزوجو اولاي تبريز تيلويزيونون شبئه چيخارتماغي ايدي. سـكسن دوخسان ده‌يقه‌دن سونرا پارازيتلر بيتندن سونرا آرتيريلميش ياريم ساعات‌دا بو صفر تبريزين اؤزوندن صحنه‌لر كسيليردي! من‌ده تئز ووروردوم تبريز راديوسونا آما تبريزين راديوسوندان دا سس گلميردي. جاليب بو ايدي كي لاپ حساس بؤلوم ياني پئنالتي ووروالان چاغ خبر دئيه‌ن چكيشديريب باشلادي باشقا قونولاردا خبر وئرمه‌يه؛ حالبوكي شبكه اوچ خارجي اويونلاردا بو ايشي گؤرمور! گؤردوم بئله‌دير ايسته‌ديم تيلويزيونو سؤندوروب گئده‌م اينتئرنئت سوراغينا. دوزون سؤزو پئنالتي وورماق‌‌دا ضعيف تيمين روحيه‌سي گوجلو تيم‌دن چوخ اولار. حدس وروردوم تيراختور اوتوزاجاق. تيلويزيونو سؤندوره‌نده گؤردوم خبر كـسيلدي پئنالتي‌لاري گؤسته‌رير! سانكي ترشيز پئنالتي‌ني تونازلادي ملوانين تبريزده كي يوخ، بلكي انزلي‌ده كي قاپي‌سينا! ملوانلار تؤكولدولر مئيدانا ايگيرمي‌مين تيراختورچو قارشي‌سيندا شنليك ائدنده، من‌ده تيلويزيونون انگين باسديم.
او آنلاردا يولداشلارين بيري‌سي ايله اس‌ام‌اس‌له‌شيرديم بو اوزوجو اولايا گؤره! سؤز قونوسو دا كرارين اولماماغي‌نين ضربه‌سينه گؤره اه‌له‌نمك، كمالوندين هم بئيني و هم‌ده نيمكتي‌نين بوش اولماسي و ... ايدي! او دئييردي من بيليرم تيراختورون داشي آتيليب! من‌ده دئييرديم يوخ بابا گؤردويوموز اويون چيخارتمالار، پاخيلليق‌لار، يئرسيز محروم ائتمكلر و اؤجه‌شمه‌لر اونلارين داشي‌نين آتيلماسي‌ني گؤسته‌رير. منجه بو باشاري‌دير: "تيراختورون اؤزونو محروم ائده‌بيلميرلر؛ ياپيشيبلار عيراقلي اؤيونجوموزون خيرتده‌ييندن اؤتورمورلر. حالبوكي دونن‌كي اويون‌دا گؤردوك كرارسيز تيراختور 120 ده‌يقه سالديردي تكجه قول وورمادي"!

سايتلاردا گؤرورم دونن‌كي اويونو ريپورت ائدنين معصومي اولدوغونا اعتراض واردير؛ دئييرلر نئيه او گزارش ائديردي!؟ آما منيم ايشيم يوخدور كيم اويونو آچيقلادي. من دئييرم آغا مه‌يه‌ر دئميرلر بو اويون "اوستاني" ياريش‌ اولدوغونا گؤره شبكه 3 دن يايماق اولماز؟ بس نئجه اولور اويونو آچيقلايان فارسجا راپورت ائدير؟ او ائله توركجه دئسين ، قوناق تيمين‌ اوستاني دا اؤز ديللرينه دئسينلرده! مثلن گيلانلي آپاريجي دا گيلك يوخسا هر سئوديگي ديله گوزاريش ائله‌سين!

كرار جاسيم سوچلو دور؛ آما...

ملوان اويونون فيكريندن چيخماميشديم، ايدمان خبرلرينه قولاق آساندا، ائشيتديم يازيق كرار جاسيمه بير باشقا جزا يازيبلار. دئييبلر سهند ايستاديومونون ايكي-اوچ مين صندلي‌سي‌‌نين سينديرلماغي‌نين نه‌ده‌ني كرار جاسيمين تحريك ائدن ايشلري‌دير و او گرك بونون خسارتين‌‌ده وئرسين! په هووووو! بس بونلار چوخ دوزگون و سيستئمي فيكيرله‌شيرسه‌لر نه‌دن اصل تحريك ائدن پيروزونون لات اويونجوسو، و داورلري‌نين ثابيت اولونموش يانليشليقلاري‌ني نه‌يه جزالانديرميرلار؟ منجه بو يئني جزا تاماشيچلار و اونلارين سئوديكلري اويونچونون آراسينا بولانديرماق قصدي ايله اولوبدور. كرار جاسيم دوزدور بير يانليش ايش گؤروب و اؤز هه‌يه‌جاني‌ني كونترول ائده‌بيلمه‌ييب آما اونو هامي سئوير. او قدر جمعيت قارشي‌سيندا چوخ چتين‌دير حاقسيزليق و عدالتسيزليگي دؤزه‌سن. بيز ده مئيدان قيراغيندا دوروب راحاتليقلا قضاوت ائده‌بيلمه‌ريك. تكجه دئيه‌بيله‌ريك ياخشي ايش گؤرمه‌ييب و بوندان سونرا گرك داور سؤزونه قولاق آسا و تيمه ضربه وورمايا.
بو آرادا ايسته‌ييرم لاپ اصلي موقصصيرلري سيزه تانيتديرام. صندلي سينديرماغين عاميللري نه پيروزونون لات اويونچولاري، نه ياريشين يانداش آراجي‌لاري(غیر بی‌طرف داورلر)، نه پوليس‌لر، و نه صندلي سينديران هوشو باش‌دان چيخان تاماشاچيلار ايديلر. موقصصيرلر صندلی سينديرانلارين يانيندا اوتوران صندلی سینديرانلارا ديلله‌نمه‌يه‌نلر ايسه دئييلديلر! قوصور من كيمي تاماشاچيلاردا! "سينديرمايين" سس‌لري‌ني چوخ اوجا چيخاردابيلميرلر؛ يا ايستاديوما گئج يئتيشيب يوخاري طبقه‌‌ده اوتوروبلار او هاي‌كوي‌ده بئله عيللتلي ونداليسمين پيسليگيني قانديريب، قاباغيني آلابيلميرلر يوخسا ائو ده اوتوروبلار تيلويزيون يا اينتئرنئت‌دن ايزله‌ييب هر نه‌يي اله‌شديريرلر. من‌جه سينيق صندلي‌لرين سايي‌سي 2000 اولورسا 10000 نفر ده من كيمي دوشونسه بيزلر بو خسارتي اؤده‌مه‌لي‌ييك. صندلي‌نين بيري‌سي 5000 تومن اولسا هره‌ميز مين تومن خسارت وئرمه‌لي‌ييك! كرار جاسيم ده لوطف ائله‌سين شوماره حيسابين دئسين هره‌ميز 1000 تومن تؤكه‌ك حيسابينا. او بیر ایکی-اويون محروم اولسا يئتر. مالي خيسارتي‌ده وئرمك‌ده بيزيم بوينوموزا. وارلي-دؤولتلي اولسايديم بوتون اون ميليونو اؤزوم وئره‌رديم. آنجاق ايستاديومون سوروملولاريندان دا بير ايستك واريم. لوطف ائله‌سينلر "فهيم" آدلانديرديقلاري تاماشاچيلارين صندلي‌لرينه اويونلاردان اؤنجه بير كؤهنه‌دن دسمال‌دان چكيب تؤز-تورپاغي‌ني سيلسينلر. يوخسا بو بيليت پوللاري حلال خوشوز اولماسين اينشاللا.

Sunday, December 12, 2010

بونا دئیه‌رلر روحیه‌

جومه‌نین ایکیندی چاغی(ناهاردان سونراسی)، باشیم بو قیریق بیلگی‌سایارلا قاریشمیش ایدی تبریز ده چکدیگیم گؤروتلری ائدیت ائدیردیم. جی‌مئیل صفحه‌سی بیر بوجاق دا آچیق ایدی گؤردوم ایکی اوچ ایل بوندان اؤنجه سون گؤروشدویوم دوستلارین بیری‌سی ایسته‌ییر چت ائده منیمله. بیر آز کئف احوال‌دان سونرا دئدی: "نه خبر؟ من جومه‌‌لرده گلیرم ایشه"!
من ده دئدیم: "په هووو...!! کیشی بو بولانیق هاوا دا اضافه‌کارداسان؟ سن تعطیل گونو ایشه گئدیرسن آما من‌ده ایش گونو گئدیرم توپا باخام"! سونرا دئدیم سن ده ایش - پولو اؤتور هر دن گل گئدک ایستادیوما خوش گئچیر آداما بیر آز آدام اؤزونو بوشالدیر!
دئدی هن گؤرک واخت ائله‌سم گه‌له‌رم.
دئدیم بوگونکو بلدیه ‌اویونو قالدی صاباحا، گه‌له بیلسن گل. بونلار اویونلاری پیس زامانا سالیرلار آز آدام گئتسین!
او بیر جاواب وئردی پئشمان اولدوم اونو دعوت ائتمک‌دن! دئدی: "به تورک‌لر کی دونن تبریز تؤکولوب گلمیشدیلر ایستادیوما..."
گؤردوم کؤنلو یوخدو و بالا بالا ایسته‌ییر ده‌ببه‌‌له‌یه! اؤزومله دئدیم واللا حالیم یوخدور بو عزیز یولداشا دا ایکی ساعات چوخ ساده و آچیق شئی‌لر اوستونده دانیشام. دئدیم ائله قوی باشی "تخصص"‌ی ایله قاتیشیق اولسون و گئنل(عمومی) قونولارا فیکیر وئرمه‌سین؛ بلکه اؤرنک ایچین اقتصادی سورونلاریمیزی دا بئله یولداشلار چؤزدولر.

نئچه دفه آزربایجان ییغمالاری‌ني آلقیشلاماق ایچین قدیم یولداشلاری چاغیرمیشدیم؛ بیر هدفیم‌ده اونلارلا هر دن بیر یئر ده بولوشماق ایدی! گؤروردوم بیر سایی‌ آرواد-اوشاغا گؤره(بو دا قالسين كي ايستاديوم‌دا ائشيديلن سؤزلرين ايكي‌سي دقيقن اوشاقلار و عاييله‌لرين گله‌جه‌يي‌نه گؤره‌دير)، بیر سایی‌ ایشه گؤره، بیر سایی‌ یاخشی سونوج آلابیلمه‌مه‌یه گؤره، بیر سایی ایستادیوم آتموسفئری‌نی به‌یه‌نمه‌مه‌یه گؤره(سانكي كوچه-خياوان‌دا اصلن يامان ائشيتميرلر!)، و بئله بئله نه‌دنلره گؤره دئییردیلر کؤنلوموز ایسته‌ییر گله‌ک آنجاق هه‌له گؤرک نه‌ اولور. من‌ده بو سونوجا یئتیشدیم کیشی سن بیر الی‌بوش و کئفی‌ساز(!) بابا؛ نه‌یه اونا بونا دئییرسن آخی؛ بیری‌نین کونولو اولماسادا گلیب اورادا سوسقون اوتوراجاق، یاخشی سونوج‌دا اله گلمه‌سه دای بیر ده اورالارا دولانمایاجاق. بوگون بلدیه-استقلال یاریشیندا بیلدیم دوز سونوجا چاتمیشام سانکی. بیلدیگینیز کیمی بلدیه تیمی‌نی گئدیب آلقیشلاماق دوغرودان "کؤنول گوجو" (روحیه) ایسته‌ییر. هر آدامین ایشی دئییل. ایسته‌میرم دئیه‌م من اؤزوم بئله روحیه‌یه صاحیبم، منیم گئتمه‌ییم بیر آز نوستالژی‌دان‌دیر و تیم اوتوزاندا آز-چوخ راحاتسیز اولورام؛ آنجاق بوگون اوچ-دؤرد مین ایستیقلال‌ یانداشی قارشی‌سیندا سایی‌سی چتین‌لیک ایله یوزه چاتان بلدیه‌نی آلقیشلایانلار کسینلیک ایله بیر تایسیز کؤنول گوجونه صاحیب‌دیرلر. منجه هر کیمسه اؤزونه گووه‌نه‌بیلمیر و دئمه‌لی "اعتماد به نفس"ی آزالیب بئله آداملاری یاخین‌دان گؤرمه‌لی‌دیر. من اؤزوم بئله زامانلار روحيه‌م شارژ اولور. منجه بئله آداملاري توپلومسال بيليم آداملاري و پسيخولوقلار(روانشناسلار) باشقا آداملارا اؤرنك اولاراق تانيتديرمالي‌ديرلار. خالقين شن ياشاميندا و گله‌جه‌يه اومود ايله باخماق‌دا بؤيوك يارديم گؤسته‌ره‌بيلرلر. يازيقلار اولسون بونلارلا ياخشي سايقي‌دا گؤسته‌ريلمير و البته بونلار پيس داورانيشلاري گؤره-گؤره گئنه اوزدن گئدن دئييللر. منجه بو اؤزلليگه صاحيب اولماق ايچين يولداشلارا اصرار ائتمك دوزگون ايش دئييل؛ بئله بير كولتورون گئنيش ياييلماغي ايللر بويو زامان ايسته‌يير.
بونلار لاپ ياخشي بیلیرلر بلدیه تیمی‌ اوتوزاندا پیس اوتوزور! اؤتن هفته اهواز دا اون دقیقه‌ ايچينده اوچون یئدی. ائله بو ایستیقلال‌دان تبریز‌ده 50 مین یانداش قارشی‌سیندا 3-2 اوتوزدو. یانی بو ییغمانین ایپینه اودون ییغماق اولماز. آنجاق گئنه‌ده گلمیشدیلر اورک‌دن آلقیشلاییردیلار. گئدیب دوردوم آلقیشلایان ایکی دسته‌نین آراسیندا. اینانین بو یوز نفرین سسی‌، اوچ دؤرد مین ایستیقلال یانداشیندان گورولتولو ایدی. بلدیه بوگون ایستقلالی یوز یانداشلا  آز قالیردی اوتسون. بئله اولموشدو موساوی سونوجونا گؤره دئییردیلر "عئیبی یوخ"! حالبوکی ائو صاحیبلیگی ائدن جدولین ایکینجی تیمی، یانی ایستیقلال ییغماسی ایدی. اؤتن ایل تیراختور اللی مین تاماشاچی ایله ایستیقلال ایله ایکی-ایکی ائتمیشدی!

سون‌دا بونو دا دئییم کی بلدیه‌‌ و تیراختور گئدیش اویونلاری‌نین اؤجونو آلدیلار. من‌جه بلدیه‌نین موساوی ائتمه‌یی تیراختورون ائوده اوتماغیندان داها ده‌یه‌رلی اولماسادا، اؤنمی اوندان آز دئییل. بلدیه‌ قویمادی ایستیقلال‌ تیراختوردان داها اوزاقلاشا.
بلدیه - استقلال یاریشیندان نئچه گؤرونتونو گؤرمک ایچین بورایا کلیک ائدین. بو دا شهرداری‌نی کسینتی‌سیز آلقیشلایانلاردان بیر ویدئو:


ي.س: يالان ورزشي

اين قسمت را فارسي مي نويسم:
اين هم دروغ "خبر ورزشي" در روز روشن!
هوا آلوده بود ولي نه اينقدر كه صداي تشويق بيش از صد نفر هوادار شهرداري را كه غرش آن بيش تر از دو سه هزار طرفدار استقلال بود، نشنويد. ضمنا حتي اگر كسي از يك تيم ميهمان ته جدولي حمايت نكند نبايد  تعجب كرد؛ آنچه مايه تعجب است آن است كه تيم به اصطلاح پرهوادار استقلال در آستانه صعود به رتبه اول(كه با سدي محكم به اسم شهرداري مواجه شد!) نمي تواند در  ابرشهر تهران بيش از دو-سه هزار نفر به ورزشگاه بكشاند.
ضمنا در بازي رفت شهرداري با استقلال كه در مرداد ماه برگزار شد و متاسفانه شهرداري در خانه باخت(به دليل كم تجربگي و اشتباهات داوري)، نزديك به پنجاه هزار نفر در تبريز شهرداري را تشويق مي كردند. خدا را شكر كه براي اين مورد هم چند تا عكس و فيلم موجود است: لينك!

ي.س.2: 
"فوتباليستلر" درگي‌سي بير يوروم(كامئنت) ايله، بو يازي‌ني يايماغا گؤره اجازه ايسته‌ميشدي. من‌ده دئديم من‌ايچين افتخارذير! دئيه‌سن بوگون(قيشين بيرينجي گونو) ياييبلار. "بونا دئيه‌رلر روحيه"‌ني ده ياپيشديريبلار چيلغين يانداشلاري داشييان بير وانئتين قاباغينا. حتمن سيز ده آلين؛ بو درگي‌لر ده توركجه يازيلارين سايي‌سي چوخالمالي‌دير:

Friday, December 10, 2010

گونون گؤروتلری: شن یانداشلار

تیراختورون دونن کی یاریشیندا اوچ طیلیسیم سیندی؛ بیری‌‌سی تیراختورون پیروزو تیمی‌نی 17 ایل اوتابیلمه‌مه‌یی ایدی. تیراختور او قدر گوجلو اوینادی و یانداشلار دا او قدر گوجلو و کسینتی سیز آلقیشلادیلار کی آراجی‌‌نین(داورین) یاردیمی ایسه پیروزونون دردینه ده‌یمه‌دی.
ایکینجی طیلیسیم ده منیم آیاغیمین سهند ایستادیومونا دوشمه‌مه‌سی ایدی! عربلرین اوچه دئمه‌یی یانلیش ایمیش؛ دؤرده دئمکلری من ایچین دوز ایمیش سانکی!
اوچونجو سینان طیلیسیم ده یانداشلارین بیر یانلیش احساسی ایشلریندن قایناقلاندی. کرار جاسیم یئتمیش جونت گؤزون قاباغیندا هه‌یه‌جانلانیب و یانلیش بیر ایش ایله اخراج اولماغی ائله ده عئیبی یوخدور، آنجاق بیر سیرا یانداشلارین صندلی سیندیریب مئیدان قیراغینا آتماسی چوخ پیس ایش ایدی. بئله بیر ایش ایلک دؤنه ایدی تبریز ده گؤروندو. بیز همشه و هر دوروم‌دا گرک باشقالارلا فرق ائدک.

هر حال‌دا اویونون سونوجو ده‌یه‌رلی ایدی و پیروزودان یاخشی بیر اؤج(انتقام) آلیندی. جماعات دا ایستادیوم‌دان شنلیک ایله ائشیگه چیخاندا. سالدیغیم گؤروتلردن دؤردونو سئچیب آشاغی‌دا قویورام. قالانین سونرا بورایا آپلود اولاجاقلار. بلدیه‌نین اویونو کنسئل اولماسا گئدیرم آزادی ایستادیومونا. بلدیه‌یه‌ده اوغورلار دیله‌ییرم. استقلال ایله چتین بیر یاریشی واردیر.

تیراختورون پیروزونو اوتاندان سونرا شنلیک ایله قاییدان تاماشاچیلار:

Wednesday, December 8, 2010

يازيلاريميزي يوروملامالي‌لاداق

داش‌قاپي بولاغي،‌ بولاقلاريميزدا يوروملارين آزليغي و وار-يوخ يوروملاريندا تعاروف اولدوقلاريندان گيلئي‌لي‌دير(به‌به دئمك‌دن هر يئر به‌به قوخويور). منيم بولاغيم‌دا آز يوروملار توپلايير و بو اصلن سئوينديريجي‌ دوروم دئييل. آنجاق گرچك بو دور كي توركجه يازابيلن و اوندان‌ داها اؤنملي، توركجه اوخويابيلن مثلا فارس ديللي بولاقلارا گؤره چوخ آز دير. منجه هر 10 دنه فارسجا بولاغا گؤره 100 اوخوجو اولسا هر بير توركجه بولاغا گؤره بير -ايكي اوخوجودان آرتيق تاپيلمايير. بير باشقا سورون‌دا بودور كي توركجه بولاقلار گونده‌ليك قونولاردان يازماييرلار. ائله بيليرلر حتمن گرك بير اوستونده چوخ ايشله‌نميش اوزون بير آراشديرما يايسينلار! منيم قيريئدئريم‌ده 150 دنه توركجه بولاق وار، آنجاق گون‌ده بئش-آلتي‌سي گونجه‌له‌نير. گونجه‌له‌نن‌لر ده ادبيات، و شئعر چرچيوه‌سينده ديرلر. يوروم قويان‌دا مجبوردور دئسين به‌به؛ احسن، ماشاللا، يوخسا طرفين آجيغينا گلر. البته سؤزلرين چوخو دا "كيمليك" دير و هامي‌نين دا سؤزو بير بيرينه اوخشايير.

داش‌قاپي‌نين بير اؤنري‌سي‌ده واردير: "بير آز يوروملاريميزي يوروملاداق"! من‌ده قاتيليرام. آنجاق بو اؤنري‌دن اؤنجه، منيم بولاق يازانلارا بير باشقا اؤنريم واردير: "بير آز يازيلاريميزي يوروملامالي‌لاداق"! يوخسا تكجه داش‌قاپي‌نين اؤنري‌سي‌ني ايشله‌تمه‌يي‌ ايله ساده‌جه املايي يانليشليقلار توتماق زوروندا قالاجاييق، يا دا ميستير بينين(Mr Bean) اؤزو اؤزونه مكتوب يازيب اؤزونو سورپرايز ائتمه‌يي كيمي ايشلر گؤره‌جه‌ييك! بونو دا بير داها وورغولاييم كي منظوروم يوروملامالي يازي‌دان بيله‌بيله يانليش سؤزلر دئمك دئييل(رحمتليك ساوئتلر بيرليگي‌ني سئون بير بولاق بو ايشي گؤرور)!

Sunday, December 5, 2010

گونون گؤروتو: اصيل يانداش

تئهرانين هاواسيندان قاچميشديم خالخالا. گئنه بئينيمه وورموشدو گئدم تبريزه. آنجاق تجروبه گؤسته‌ريب منيم آياغيم سهند ايستاديومونا دوشمور كي دوشمور. دئديم گئتمه‌ييم، تيراختور اوتسون! راديو دان اويونو ايزله‌ييرديم. قيزيل اوزن ده‌ره‌لرينين بوروق بوروق ائنيشلرينده بيرينجي ياري قول‌سوز قورتاردي. آنجاق قيزيل اوزنين بوروق بوروق يوققوشلاريني چيخاندا تيراختور اوچونو ووردو بيريني ده يئدي! شانسيم گتيردي هله او يول تكميل اولوب شولوقلاشماييب، يوخسا تيراختور ان آزي بير يانداشي‌ني الدن وئره‌جك‌ايدي!!

دونن كي اويونون گؤرونتولرين ايچينده بو گؤرونتونو چوخ سئوديم! يانداشلارين هامي‌سي‌نين حاواسي اويان بوياندا تكجه بو بالاجا يانداشدان سونرا! گله‌جك‌ده بؤيوك بير آناليزور اولاجاق:



Tuesday, November 30, 2010

کرج‌ده اورمو گؤلو ایچین گؤز یاشی تؤکدو

بیر قول وورموشدوق و هامی سئوینیردی. یانیمدا بیری‌سی اوتورموشدو دئییردی نه اولسون بو تورک دیلینده مدرسه دئمک؟ بو ایشلر یاعیث اولوب تاماشاچی‌لار آزالیبلار! دئدیم ائله بو سؤزلری دئیه‌نلر اولماسایدیلار سن بورادا تک باشینا اوتوموشدون! دئییر تورکونون ادبیاتی یوخدور(!) مدرسه‌نی نئجه قوراجاییق؟ اونا دئییرم مدرسه‌ ایسیتیریک ادبیاتیمیز دا اولسون دا. ادبیات گؤی‌دن گلمز کی! بیر آز دا دانیشدیم گؤردوم، یوخ قبول ائدن دئییل. دئییرم مئکزیک دالغاسی‌ گه‌له‌نده نه‌دن باشقالار کیمی قالخماییرسان؟ بو کی بوتون فوتبوللا ایلیشکی‌لی دیر؟! دئدی یوخ دای اولماز! کیم قالخیر کی من‌ده دورام! گؤردوم هر نه دئییرم دوز ترسینه دانیشیر، اؤزومله دئدیم عئیبی یوخ، دئیینسه‌ده تاماشاچیلارین سایی‌سی‌نی بیر نفر چوخالدیب و بو اولدوقجا یئته‌ر.

دوروب گئتدیم او باشا! کرج‌ تورکلری سایپا دان بیر قاباق اولماغا گؤره سئوینج ایچینده ایدیلر. آنجاق اورمو گؤلونه گؤز یاشی تؤکمه‌یی اونوتمادیلار. بو منیم تیراختورچولاردان گؤتوردویوم سون کلیپ اولاجاق‌دیر. اوستون کولتورو و توپلومسال گؤره‌وی یئرینه یئتیرمه‌یین نئجه اولدوغونو آنلاماق ایچین، بو اوینار گؤروتو گؤرمک یئته‌رلی دیر:

ي.س:
"ايرنا" يانداشلاردان عكس سالماييب! آما گؤرمه‌دييميز گؤرنتونو ياييب! گؤرمه‌لي‌دير:


Monday, November 29, 2010

گون گؤروتلري: بلديه‌نين يئني پارلاماسي

دونن بلديه‌نين بيرينجي ياري‌سي سونا چاتاندا ته‌زه بيلديم اويون ائله دونن ايميش. قاچا قاچا اؤزومو ائوه يئتيرديم! گئنه تبريز كانالي پارازيت ايله توتوردو! بئش ثانيه توتوردو بئش ثانيه يوخ! او بئش ثانيه‌لرين بيري‌سينده بلديه ايكي قول وورودو!! دئديم ياشا! بو ديرخشان نه دوزه‌لديب بو تيمي! قول ووراندان سونرا او بوي‌دا ايستاديومون گون توتان يئرينده اوشويه‌ن بير ايكي مين يانداشين بدنلري قيزيش‌دي سانكي! ايستاديوم پوليسلري‌ني ده هر دن گؤستريردي. سايي‌لاري يانداشدان چوخ اولماسايدي آز دا اولمازدي!

بلديه و بلديه‌ني آلقيشلايانلار دئمك هم پارلاديلار هم پاتلاتديلار! بو دؤنه سونوجو سونا قدر قورويوب اوچ صيفيرلا اوتدولار. اؤز آراميزدا بلديه آز قالير تيراختورو دالدان يئتيره! تيراختور دا كرج‌ده بلديه‌ اوتموش تاخيمي اوتماسا، بيلميرم نه سؤز دئمك اولار! بلديه 200-300 آزربايجانلي يانداشين آلقيشي ايله پيس زامانيندا سايپاني اوتدو ، كسينليكله تيراختورو آلقيشلايانين سايي‌سي اؤتن ايل كيمي ده اولماسا آزي اون مين گله‌جه‌ك!

بو دا گونون گؤروتلري ايرنا سايتيندان:

بو ده‌يه‌رلي يانداشلارين هئچ ايشينه ايراد چيخارتماق اولماز، آنجاق كئشكه "تئهران بونو اونوتما، تبريز سنين سرورين" سؤزونو دئمه‌يديلر؛ گرچك بئله دئييل!

بو پوليس عسكري دئيه‌سن بلديه‌نين پارلاييب پاتلاتماغي‌ني گؤروب گؤره‌وي‌ني اونودوب تكجه اويونو ديققت ايله ايزله‌يير! چونكو توپلانميش‌ سيراسيندان چيخيب تك باشينا ياريش مئيدانينا باخير. بو اوتورماق يئرلري‌نين بوم بوش اولماسي‌ و پوليسين اوردا چكيشديرمه‌يي ايسه باشقا بير آنلام داشي‌يير!


Sunday, November 28, 2010

پئشمان اولان يوخ‌دور

ي. س:
پئشمان اولان يوخ‌دور

"کریم! گل تیراختور دا ویداع‌لاش" يازيسيندا كي سؤزلر كريم ايله بير اورك سؤزو ايدي. بو يازي نئچه باشقا سايت‌دا دا ياييلدي و اوخوجولارين چوخو دا به‌يه‌نديلر. اوخوجولار دا يازار كيمي كريم ايچين باغيشلانماق يولونون آچيق اولدوغونا ايناناراق، كريمين كئچميش داورانيشلارينا اعتراض ائتمه‌يي يانليش بيلمه‌ييبلر. كسينليكله بير ده تورك اولدوزلار آزربايجان وارليغي‌ني قوروماق‌دا اسكيك‌ليك گؤسته‌رسه‌لر، بير داها و داها آرتيق اه‌له‌شتيرمك و انتقادلار ايله اوز اوزه اولاجاقلار.

آنجاق  بوگون "گل(Goal)" سايتيندا ياييملانميش "آقا كريم به خانه بازگرد(آغا كريم ائوه قاييت)" يازيسيندا آزربايجانلي يانداشلارين اؤز ايشلريندن پئشمان اولدوقلارينا بارماق قويولموشدور!!! حالبوكي بو آرادا پئشمان اولان يوخدور. بير ائو ده ده ، آتا-آنا اؤز  شولوق و ادب‌سيز اوشاقلاريني ادب ائليه‌ندن سونرا اونو باغيشلاماق ايسته‌سه‌لر، آتا-آنانين پئشمانليغي‌ني گؤسته‌رمز. آتا-آنا اوشاغا آجيقلانماسالار اوشاغ گئت گئده آزيب يولدان چيخار. 


Friday, November 26, 2010

گیزلی کامئرا

تیلویزیون وئرلیشلری‌نین ایچینده گیزلی کامئرا(دوربین مخفی) لاپ باخمالی و یانداشلی بؤلوملردن ساییلیر. من اؤزوم چوخ سئوه‌رم. تبریزین سهند کانالی‌نین سهندیه‌سینده ایسه گیزلی کامئرا بؤلمه‌سی واردیر. ایلک دؤنه گؤره‌نده چوخ خوشوما گلدی. آنجاق ایکینجی دؤنه دن سونرا یوخ! نه‌ده‌نی ده بودور کی اویونچولاری ثابیت‌دیرلر! ایکی اوچ دؤنه‌دن سونرا بللی‌دیر خالق تانییاردا! دونیانین هاراسیندا گؤروبسونوز گیزلی کامئرانین اویونچوسو ثابیت قالسین؟ اؤزوده بیر یئرلی کانال‌دا!؟

البته بیر عیللته گؤره سهندیه‌نین گیزلی کامئرا بؤلومونده کی ایشلر دوغال‌ اولابیلر:
"تبریز و اورتا آزربایجان‌دا، هئچ کیمسه سهندیه وئرلیشینه باخماییر؛ بونا گؤره هئچ کیمسه‌ده گیزلی کامئرانی آپاران خالقی سارییانلاری تانیماییب، سونوج‌دا طبیعی ائتکیله‌نیر"!

Wednesday, November 24, 2010

کریم! گل تیراختور دا ویداع‌لاش

خبرلره گؤره کریم باقیری تئهرانین پیروزی تیمیندن کـوسوبدور. نه‌دنی ایسه اونون جاوانلیغی‌نین سونا چاتماسی‌دیر! سانکی کریم کئچمیش‌لر کیمی ائتکی‌لی و یاخشی اوینایابیلیمر. ائله کی اونا زورلاما اولاراق بیر ویدالاشما یاریشی قویماق ایسته‌ییردیلر! آنجاق کریم بونو قوبل ائتمه‌ییب و خبری اولمادان بئله بیر ویدالاشماغی ایسته‌مه‌ییب. و سونوج دا کریمین پیروزی تیمیندن کـوسمه‌سی اولموشدور!

تیراختور یانداشلاری‌ دا نئچه آی‌دیر کریم‌دن آجیقلی‌دیرلار. آنجاق نه‌ده‌نی هامی‌یا بللی‌دیر. منجه ایندی یاخشی فورصت دیر کریم ایچین. کریمین فوتبول دونیاسیندان بیر افتخارلی ویدالاشماق یاریشی تبریز ده اولمالی‌دیر؛ اؤزگه دوبئی، و تکجه پول و اوتماغا اؤنم وئرن تئهران یوخ!
کریم بونو هامی‌دان یاخشی بیلیر آزربایجانلیلار کولتورونده "عئیبی یوخ" هر نه دن اوستون‌دور و اورانین فوتبولونددا فوتبول‌دان اوستون آنلاملار واردیر.

کریم فوتبولونو تیراختوردان باشلاییب، و تیراختور دا دا قورتارمالی‌دیر. کریمین سون اویونو تیراختور اولورسا، اوتساق‌دا اوتوزساق‌دا، آزربایجانلی کینه‌سیز یانداشلار ایچین کسینلیکله اونودولماز بیر یاریش اولاجاقدیر.

تیراختور ایله کریمین آراسیندا بیر تاریخی "گوله گوله" دئییلمک ایچین، بو سون فورصت‌دیر...

ي. س:
پئشمان اولان يوخ‌دور

يوخاري‌دا كي سؤزلر كريم ايله بير اورك سؤزو ايدي. بو يازي نئچه باشقا سايت‌دا دا ياييلدي و اوخوجولار به‌يه‌نديلر. اوخوجولار دا يازار كيمي كريم ايچين باغيشلانماق يولونون آچيق اولدوغونا ايناناراق، كريمين كئچميش داورانيشلارينا اعتراض ائتمه‌يي يانليش بيلمه‌ييبلر. كسينليكله بير ده تورك اولدوزلار آزربايجان وارليغي‌ني قوروماق‌دا اسكيك‌ليك گؤسته‌رسه‌لر، بير داها و داها آرتيق ائله‌شتيرمك و انتقادلار ايله اوز اوزه اولاجاقلار.

آنجاق  بوگون "گل(Goal)" سايتيندا ياييملانميش "آقا كريم به خانه بازگرد(آغا كريم ائوه قاييت)" يازيسيندا آزربايجانلي يانداشلارين اؤز ايشلريندن پئشمان اولدوقلارينا بارماق قويولموشدور!!! حال‌بوكي بو آرادا پئشمان اولان يوخدور. بير ائو ده ده ، آتا-آنا اؤز  شولوق و ادب‌سيز اوشاقلاريني ادب ائليه‌ندن سونرا اونو باغيشلاماق ايسته‌سه‌لر، آتا-آنانين پئشمانليغي‌ني گؤسته‌رمز. آتا-آنا اوشاغا آجيقلانماسالار اوشاغ گئت گئده آزيب يولدان چيخار.


Monday, November 22, 2010

بير باشقا قوندارما هولوكاست

البته بو سوي‌قيريم دوز اولسا دا ايران توركلري‌ ايله ايليشكي‌سي يوخدور. آنجاق ايران دا ياييلان بوتون تاريخي بلگه‌لرده موغوللارين اورتادوغو دا اؤلدوردوغو سايي‌سيز اينسانلارا ايشاره ائديرلر و بونلاري گتيريب بير جوره ياپيشديريرلار توركلرين مدنيت‌سيزليگينه! بونا گؤره ده اولور اولسون آدام دئيير اولابيلر بو آرادا يالان سؤزلر ده دئييلسين. گؤز اؤنوموزده گرچكلر ترسينه گؤسته‌ريله‌نده، 700 ايل بوندان اؤنجه‌ كي دوروم باشقا جوره يازيلماز مي!؟ موغوللار آسيانين او باشيندا سس‌سيز ياشاملارينا مشغول‌دورلار، آنجاق ايران‌داكي توركلر بير آز اؤز كيمليك‌لري و تاريخلريندن دانيشاندا، شوونيستلر تئز موغوللارين ايران‌دا ائتديكلري‌ جينايتي عوثمان كؤينه‌گي كيمي قالخيزديريرلار.

سايين يولداشلارين بيري‌سي ايله او يان بويان‌دان دانيشيرديق گلديك چاتديق موغوللارين ايرانا ائتديكلري سالديري‌يا. او بير ماراقلي قونويا ايشاره ائتدي؛ دئدي بو دا بير جوره "قوندارما هولوكاست" دير! او چوخ ياخشي آدلانديردي. بو دا بير قوندارما هولوكاست‌دير. نئچه گون بوندان اؤنجه‌ده آخشاملار تيلويزيونون ايكينجي كاناليندا چاغداش تاريخه گؤره دانيشان مؤعتضيد گينه‌ده بو خول‌دان او خولا آتيليردي. بير دفه بيلميرم نه اولدو آتيلدي باشقا باغين خول بوداغينا! دئدي: "يولداشلارين بيري‌سي تعريفله‌ييردي اوشاقليق‌دا اؤز كندي كاشمرين بير آب انباريندا اونلار مين دنه آدام باشي جومجومه‌سي گؤروبدور. او تكجه بير انبار دا توپلانميش  اونلار مين  جومجومه؛ موغوللارين تكجه كاشمر ده اؤلدوردوكلريندن قالميشدير"!! اونون سؤزونه گؤره هر بير بالاجا شهر ده موغوللار اونلار مين آدام اولدورورموشلر!! و بيري‌سي ده يوخ‌دور دئسين بئله بير يئر اولسايدي اوراني زيارتخانا ائتميشدينيز ايندي‌يه كيمي!!

هله بير سؤز ده واردير. من بيلميرم بو وحشي موغوللارين بالالاري نه جور اولوب نئچه ايلدن سونرا كولتورل ايشلر گؤروبلر: ماراغا رصدخاناسي‌، فغفور آلاني(سولطانييه گونبزي) و باشقا ايشلر. اونلار ايران‌دا ياشايان فارسلاري آرادان آپارماق ايسته‌سه‌يديلر نئجه گليب خوجا نصيري اؤز دانيشمانلاري ائديرديلر؟ البته بونلار دا يانيتلاري واردير. دئييرلر بونلار وحشي موغوللاري رام و اهلي ائتديلر! آنجاق بو دا بللي دئييل هامي‌ اؤلدورولن يئر ده، بيليم آداملار ديري قاليرميشلار! اولا بيلر وحشي موغوللار آي كيو(IQ) تئستي آلاندان سونرا اينسانلاري اؤلدوروب جومجومه‌لري‌ني يوللاييرميشلار آب انبارلارا!

بونو دا سون‌دا دئييم بيري‌سي دئمير او زامانلار دا كي ساواشلار دا جينايت اولماييب، آنجاق قارين‌دان تاريخي سؤز چيخارتماق و بير باشقا خالقي سون‌سوز توحش و جينايته محكوم ائتمك، اؤزو بير جينايت‌دير.

Sunday, November 21, 2010

بو دربی‌ ائل یاریشی‌دیر

قاباقکی یازیلارین بیریسینده دئربی(دربی)نین تورکجه قارشی‌لیغی‌نا گؤره دانیشیب و ته‌له‌سمک ایله و ابلته قورخا-قورخا "کت یاریشی‌" سؤزجویو اؤنه‌ردیم! آما ایستیرم بو اؤنری‌نی گئری آلیب و یئرینه باشقا بیر سؤزجوک دئیه‌م! بیر آز دیققت ائتسک آزربایجان ییغمالاری‌نین آراسیندا سؤزون دوزو بئله بیر فرق یوخ‌دور؛ و بوتون تیملری ائل تمثیل‌جی‌لری دیرلر. یانی بیر کند ایچینده کی اویون‌دان اوستون آنلام‌دا دیرلار. نئجه‌دیر دئربی‌یه "ائل‌ یاریشی" دئیه‌ک؟ بو یاخشی دئییل؟!

بوگون ایکیندی چاغی آزربایجان دربی‌سی یوخسا "ائل یاریشی"، تیراختور و بلدیه آراسیندا اوینانیلاجاق‌دیر. ایلک باخیش‌دا گینه‌ده دئمک اولار فرقی یوخدور هانسی ییغما اله‌نسین. هر تیم یاخشی اویناسا قوی فینالا یاخینلاشسین. آنجاق سونرا کی آشامالار دا گرچک بیر آز فرق ائدیر! 88-89 اه‌له‌نمه جامیندا(جام حذفی) گؤی‌پولاتچیلارین فینالاجاق یوخاری گئتمه‌سی(و هم‌ده بلدیه‌نین تئهران‌دا کی اویونلاری)، بونو گؤسته‌ردی کی نه‌جور اولاندان سونرا، تیراختورون دورومو فرقلی‌دیر؛ و اؤزللیکله تئهران‌دا، یانداشی هر بیر بوجاق‌دان چکیر گتیریر ایستادیوما. هامی کی بیز کیمی ایش گوج‌سوز(!) دئییل پئشه‌سینی اؤتوروب تیمین آراخاسیندا دوروب اونو تک قویماسین! یاخشی‌دیر بوگون ائله تیراختور یوکسه‌لسین.

 سون‌دا اومورام بوگونکو ائل‌یاریشیندا باشقا بیر تایسیز دایانیشلی آلقیشلار گؤره‌ک. یازیقلار اولسون ائل‌یاریشی‌نی یاخین‌دان ایزله‌یه‌بیلمه‌یه‌جه‌ییک.

Saturday, November 20, 2010

ابن‌خلدون چاغينداكي تيراختور

سايين آراشديريجي مئهران باهارلي بو گونلر، سينيرلارين اوتايينداكي توركلر دئديگي كيمي، بير شوك يازي بولاغينا قويمشدور. اونون يئني يازي‌سي مني ايكي يؤن‌دن ته‌رپه‌دي. اونون يازي‌سينا گؤره ابن خلدون 688 ايل بوندان اؤنجه اؤز توپلاديغي كيتاب‌دا يازيب:
"و في الكتب ان ارض ايران هي ارض الترك..... فاما علماء الفرس و نسابتهم فيابون من هذا كله.
پيتيكله‌رده(كيتابلاردا) ايرانين تورك تورپاغي اولدوغو يازيلير.... آنجاق فارس بيلگين و سوي بيليمچيله‌ري بو ساو(ي تابلاماق)دان بوتونويله بويون قاچيريرلار." - تاريخ اب خلدون (ق١، ج ٢، ص ١٥٤)
يوخاري‌دا دئديگيم ايكي جهت بونلارديرلار:

- بو تاريخي بلگه، چاغداش قوندارما آراشديرماليلارين يالان اولدوقلاري‌ني اونايلايير.
- چاغداش دوروم مين ايل بوندان اؤنجه‌كي دوروم آراسيندا اوخشارليق اولسا بئله سونوج آلماق اولماز مي، مين ايل دن سونرا دا دوروم بئله قالاجاق؟! بيزيم سانديغيميزا توركلرين قارشيسيندا اولان سورون 80-90 ايل‌دير واردير آنجاق ابن خلدونون سؤيله‌ديگينه گؤره تورك وارليغي‌ني دانماق اسكي بير گرچك ايميش دئيه‌سن! و بو تكجه فئردوسي‌ نين شاهنامه‌سينده كي افسانه‌لره سينيرلانماييرميش!

بير قوشاچايلي يولداش و امكداشيم واردير، بير چؤزولمه‌ز سورونا گؤره دانيشيق داوام تاپسايدي ، اؤز اوزونتو و اومودسوزلوغونو گؤسته‌ريب، سؤزو قورتارماق ايچين دئيه‌ردي: "هــــــــــه‌لــــــه... (Həəəələəəə)" (ياني هه‌له هاراسي‌دير بو سورون داوام تاپاجاق و بو تئزليك‌ده چؤزولمه‌يه‌جك)!! من‌ده اين خلدونون يازي‌سيني بير داها اوخوياندا ايستيره‌م دئيه‌م : "هــــه‌لــــــه...!!!" فئيس‌بوك‌دا شوخلوق ايچين بئله بير يوروم آتديم:

مين ايل‌دن سونرا بوگون
مئهران باهارلي‌نين اوتوزونجو نه‌وه‌سي ابن خلدونون قيرخينجي تورونون ايمئيلي‌ني تاپيب نئت‌ده بير داها پايلاشدي:
" و في ايران انما فريق التراختور آذربيجان هي الأكثر شعبيه في رياضة كرة القدم... فاما برنامج تسعون الفردوسي‌بور و اصحابه الشوونيست فيابون من هذا كله. "

Thursday, November 18, 2010

آنایوردوم بولاغی، سککیز یاشیندا

سککیز ایل بوندان اؤنجه بیلی‌یورددان تسویه حیساب ائدرکن بیلی یورد-ایش- عسگرلیک آراسینداکی بزرخ‌ده ایدیم. فارس بولاقلار گؤبه‌له‌ک کیمی چوخالان گونلرده تورک بولاغی تاپماق اولدوقجا چتین ایدی. بو گونلر کسیلمیش اولان سؤزوموز بولاغیندان سونرا آزربایجان و تورک کیملیکچی‌لیگی حاققیندا باشقا بیر بولاق تاپماق اولموردو. من ده تؤره‌لی اینتئرنئت اولماماغا باخمایاراق دئدیم بئینیمه گه‌له‌ن فیکیرلری بیر بولاق‌دا یازیم. اولابیلر بیر باشقا بولاق دا یارانار. سویو بولانیق(خه‌رله) اولسا دا عئیبی یوخ! فیکر ائدیرم بولاغین سویو گئت گئده بیر آز دورولوب! بئله دئییل؟ ماشاللاه دئیه‌ک گؤز ده‌یمه‌سین و سویو بولانیق(خه‌رله) قالسا دا قوروماسین!

بولاغین آدینی‌دا ایصفهان یاتاقلارینین داریخمالی آخشاملاریندا، اورمولو یولداشیمین کاسئتیندن دینله‌دیگیم ایززه‌ت ییلدیزهانین "آنایوردوم" ماهنی‌سی‌نین باشلیغی‌نی سئچدیم. بو تورکونو عجیبه سئویردیم. آزربایجانا گؤره دویدوغوم نوستالژی‌یه سئویردیم اونو. دئدیگیم کیمی، او کاسئت قالدی یولداشیمدا. او زامانلار مود ایدی بولاقلارا بیر mid سس ده قویاردیلار! من‌ده ایسته‌ییردیم ییلدیزهانین تورکوسونو قویام، آنجاق اینتئرنئت‌ده آختاردیم، تاپمابیلمه‌یم. ایللردن سونرا بوگون تصادوفی اولاراق mp3-سی‌نی تاپدیم. سککیز ایلدن سونرا بو گئجه ایززت ییلدیزهانین آنایوردوم تورکوسو، نوستالژی ایچینده بیر باشقا نوستالژیک دویغو یارادیر.

سیز ده بورادان یئندیریب دینله‌یین: "İzzet Yıldızhan, AnaYurdum"؛ اوچ یاریم مئقابایت‌دیر ...

Wednesday, November 17, 2010

تراختور بوتون آزربايجانين‌دير

تبریزین سهند ایستادیومونا گیرمک ایچین کارت آلماق منیم کی ذوب‌آهن اویونونا گئده‌نده ده‌ده‌می یاندیرمیشدی. و ائله‌بیل گئت‌گئده بؤیوک بیر چتینلیگه چئویریلیر و تاماشچیلارینم آزالماغینا بیر نه‌دن اولموشدور. دئییلیر بو تبریزین ائلئکترونیک کند اولماغی ایچین دیر!! من بیلمیرم بو نئجه مئکانیزه ائتمک دیرکی دئییرلر هر کیمسه کارتین شارژ ائلیر، بیر دنه ده A4 کاغاذ پرینت آلیب قویوب قولتوغونا گلسین. آخی قرار دیرسا کاغاذ پرینت آلینا اؤزونوزو سارییب‌سیز یوخسا خالقی!؟ ایستادیوم قاپی‌سیندا بیر دفه‌لیک ائله بالاجا بیلیتلردن ساتیندا! آرتیق کاغاذ دا کورلانماز.

بو یئددیجه(هفته)نین دوخسان وئرلیشینده بونا گؤره نئچه دانیشیق گؤرسه‌تدیلر. بو دانیشیقلارین ایچینده بیر گنج اوغلان چوخ هوشلو باشلی و ده‌یه‌رلی دانیشدی. دئدی بو کارت باعیث اولور باشقا بؤلگه‌لردن گله‌بیلمه‌یه‌لر حالبوکی تیراختور ایله بلدیه بوتون آزربایجانین تیملری دیر. بو کارتی ییغیشیدیرمالی‌سیز! دالیسیجا دا باشقا بیر یانداش یاوا و یئرسیز دانیشدی. او دئییردی بو کارتی ییغیشدیرماسالار من دای ایستادیوما گلمه‌یه‌جه‌یه‌م!! بیری اونا و اونا تایلارا دئسین، بو ایشلر اونوچون‌دور تاماشاچی آزالسین‌دا؛ ائله دوخسانچیلار بونو ایستیرلر دا! اومودوم وار هامی ایلک ده دانیشان اوغلان کیمی همه‌شه بئله دانیشماقلارا حاضیر اولسونلار.

تیراختور اف.سی. سایتینین مولتی مئدیاسی دئدیگیمیز دانیشمالاری‌نین فیلمی‌نی‌ یوکله‌میشدیر. من اؤز باخیشیملا لاپ اؤنملی بؤلومونو کسیب آلت یازی‌دا قویدوم:

Monday, November 15, 2010

بومي موسيقي

بئله بير سؤزو اوزاق‌دان باخانلار دئسه‌لر، آدامين وئجينه دئييل، آنجاق خالقيميزين بؤيوك اوزمانجي ياني آشيق چنگيز مئهدي‌پور دا بو بؤيوكلوك ده ميللتين موسيقي‌سينه، اوتانا-اوتانا "موسيقي‌ بومي" دئيه‌نده آدام يانيب كول اولور. كيشي هاچان ناظري ، شجريان و باشقالاري اؤز موسيقي‌لرينه يئرلي و بومي موسيقي دئيه‌رلر آخي؟! بؤيوك آدليم آداملاريميز يايينلارلا دانيشاندا اؤزلرينه گووه‌نمه‌يه‌نده بير معمولي آزربايجانلي‌دان نه بكله‌مك‌ اولار؟! سيز قاراداغلي بير آشيق، گليرسينيز تئهران دا اوتوز-قيرخ‌مين‌‌تومن‌ليك موسيقي كونسئرتي قويورسونوز، يئر ده تئز قورتاري؛ بونون هاراسي بومي دير آخي؟
البته آشيق چنگيز سؤزلرينده ايسته‌ييب حوكومتين آز يارديمجي اولماغي و سونوج‌دا آشيقلار اؤز جان‌دان مايا قويماقلارينا ايشاره ائتسين. ولي من بير دؤولتي مقام اولسام دئيه‌رم سيزيني اؤز دئديگينيزه گؤره سيزين موسيقي يئرلي و بومي‌دير و بوتون بومي‌لارا يئته‌رلي بودجه وئرمك ايمكانسيزدير. اولويت ايندي ميللي گه‌لنه‌كسل موسيقي‌ده(اوخويون فارسجا سوننتي موسيقي)! منجه بؤيوك اوزمانجلارينين سؤزلري‌ بير آز سياست ايله قاريشسا چوخ ياخشي اولار.
عاشیق چنگیز مهدی پور گفت : گروه های موسیقی نواحی از کمترین حمایت دولتی برخوردار هستند ولی به دلیل علاقه‌ای که به موسیقی بومی (آذری)[!!!؟؟؟] داریم ، برای تثبیت موسیقی عاشیق ها از جان مایه می گذاریم.
(قايناق: موسيقي ما)

اله‌شديري‌ني يئرينده قالسين؛ كيمسه آشيق چنگيز و دالغا موسيقي قروپونون "كور اوغلو" چيخيشي‌ني گؤرمك ايسته‌ييرسه، بورادان گئديب بيليت رئزئرو ائتسين. اينيشيل ده ساري گلينين دالغالانماسي و آشيق محبوبون سسي منه چوخ خوش ياپيشدي.

Sunday, November 14, 2010

تيكينتي بيزدن، آد سيزدن

نئچه گون بوندان قاباق بيزيم كند وئرليشي باش وورموش‌دو ميانا-كويو-خالخال سينيري، مشگول دربندينه ياخين، قيزيل اوزن يانيندا يئرله‌شن بير كنده. او كندين آدي "كوبلان(Koblan)" دير. ائولري قايالارين اوستو و بؤيرونده تيكيليب و بير آز كندووانا اوخشارليغي واردير. يئرلي‌لري ده ياري-ياري شيعه سوننو دورلر و باريشلا بيرجه ياشاييرلار. او كندين آدي‌ني چوخدان ايدي ائشيتميشديم. كوبلان و اورانين ياخينليغيندا ‌صفي‌لي‌لر(صفوي‌لر) زاماني قيزيل اوزن و ايپك يولوندا تيكيلميش "په‌رده‌ليس" كؤروپوسونو ده گؤرمك ايسته‌رديم. آنجاق يازيقلار اولسون يولو يوخدو! صفي‌لي‌لر 500 ايل بوندان اؤنجه اورادا بؤيوك بير كؤرپو دوزه‌لده‌بيليبلر آنجاق  تئكنولوژي چاغيندا اورالاردا بير سد وورولماسايدي، تبريز كانالي‌نين كامئراچيلاري‌نين 4wd ماشيني اورا يا بير يول تاپماياجاقدي. يوللارين پيس دورومونو دئديم، احمدي‌نيژادين نئچه يئدديجه(هفته) بوندان قاباق ساوالان كاناليندا جانلي دانيشماغي ياديما دوشدو. خالخاللي‌لار زنگ ووروب دئميشديلر بيزيم بو اردبيل - زنگان يولو بس نه زامان قورتاراجاق؟ او دا بير شيني‌ييب دئدي: "خالخال‌دا چوخلو يولو وار، آنجاق يولو دا يوخ‌دور."! او يقين كي اؤزو اوستاندارليق ائدن يئرلرده سونا چاتماميش طرح‌لرده سوروملولوق سابيقه‌سي داها آرتيق دير. خالقين چتينليكلري بو يئرسيز ظرافات ائتمكلره چؤزولمه‌يه‌جك.

سؤز گئتدي چيخدي يوللارا، قاييداق "كوبلان" و "په‌رده‌ليس" آدينا. بيزيم كندين آپاريجي‌سي "كوبلانـ"ـي ديرناق آراسي دئييب و دئييردي بورانين رسمي آدي "كوه‌بنان" دير و "په‌رده‌ليس" كؤرپوسونه ده دئييردي پرديسان كؤرپوسو!! اونا كوبلاني اؤيره‌دن بيلميرم نه‌دن "په‌رده‌ليسين" دوغرو آديني دئمه‌ميشدي. يازيقلار اولسون اورالاردا چتينليك‌ ايله آتابابالاريميز قايالار اوستونده ائو تيكيب، قيزيل اوزن اوستونده كؤرپو تيكيرميشلر بيز اونلارين آدي‌ني ساخلايابيلميريك، و اوراني گؤرمه‌يه‌نلر بيز بيلمه‌دن اورايا اوزاق‌دان اؤز ديللرينه آد قويورلار. يول چه‌كه‌نده ايزلري يوخ، آنجاق آد قوياندا تاپيليرلار!

Saturday, November 13, 2010

بو اوستون كولتوردن سوء ايستيفاده‌ ياساق‌دیر، حتي كمالوند ایچین


قوم‌لو تيراختورچولار كمالوندي آلقيشلاييرلار.
بو اويون موساوي اولدو،
آما راحاتليقلا اوتماق اولاردي.
بو ايكي ايل ده، بيز تيراختور يانداشلاري‌، تيراختور سوروملولاري‌ني ال‌ده ائتديگي سونوجلارا گؤره جيددي اله شديرمه‌ييب(انتقاد ائتمه‌ييب)، همه‌شه "عئيبي‌ ‌يوخ" ايله اونلارا روحيه وئريب و حاشيه‌يه سالماق ايسته‌مه‌ميشيك. سايتلار دا گؤردوم كمالوند(تيراختورون باش مورببي‌سي) يايينلار كونفرانسيندا بو دؤنه غئير عادي بير سؤزلر دئييب. فارسجا بير اوزون يوروم(نظر) قويدوم و گؤردوم باشقا اوخوجولار بو يورومو به‌يه‌نيبلر و حتي بير سايت‌دا مقاله كيمي ياييليب. اونون توركجه‌سيني بير پارا ده‌ييشيكلر ايله بورادا دا ياييرام:


بو دؤنه‌نين بهانه‌سي: قومون يادگار چيمني

سايين فراز كمالوند صبا ياريشيندان سونرا كي مطبوعاتي كونفرانس دا دئييب سورون و چتين‌ليك قوم ايستاديومونون چيمني‌ ايدي! و بيري‌سي يوخدور اونا دئسين تبريزين سهند ايستاديومو دا پيس‌دير كي بئله چوخلو قول دوروملاري‌ني ال‌دن وئريرسينيز؟
اونون چمنه ايراد توتماسي و باشقا موغاليطه‌لري بير جوره تيراختورون علئيهينه يازان يايينلارا تبليغ ائتمك اولسادا، ايكينجي سؤزوندن كئچمك اولمور. سانكي ته‌زه‌ليك‌ده ايسته‌يير تيراختور يانداشلاريني دا سؤزلري ايله ساريسين. او تيراختورو ايستيل آذين و بوشئهرين شاهين تاخيمي ايله موقاييسه ائدير و دئيير اونلارين دورومو بيزدن قولاي‌دير؛ و گينه‌ده بير يوخدور دئسين آ كيشي، بو ايكي تيم ده تيراختور كيمي ميليونلار يانداشلاري واردير مي؟! ايرانين هاراسيندا تبريز دن سونرا ايستيقلال و پئرسپوليس تاخيملاري كسينليكله كيمسه‌سيز وغريبه قاليرلار؟ ايران دا هانسي تاخيم تيراختوردان سونرا تئهرانين آزادي‌ ايستاديوموندا، ياري سكي‌لري دولدوروب؟ كرج‌ده، قوم‌دا، قزوين‌ده كي تيراختور موطلق ائو صاحيب‌ليگي ائدير.

منجه رسول خطيبي‌ گؤستريش فولادا گئتمه‌نين يئرينه، ياخشي ايدي كمالوند گئديب او تاخيمي گتيره‌ايدي اوستون ليگه. كيمسه‌ بير ايش ايچين دوزه‌لميش و اونون دا ايشي تاخيملاري بيرينجي ليگ‌دن برتر ليگه گتيرمك‌دير. البته گؤستريش تاخيمي‌نين تيراختور كيمي يانداشي اولمازسا باشقا بيرينجي ليگ‌ده كي تاخيملاردان آز يانداشي يوخدور! تيراختور اوچون گئج اولمادان گرك بير ايلين تيكرار اولماسي‌نين قارشي‌سي آلينسين. بير بؤيوك و سابيقه‌لي مورببي تيراختورو آسيايا آپارابيلر. دئميرم او ده‌ييشلسن، او اؤر داورانيشي‌ني ده‌ييشمه‌لي‌دير.

بونو دا دئييم كي تيراختورون اوستون ليگه گلمه‌سي 85نجي ايلين يازيندا ايسه گرچكلشميشدي. آنجاق اولابيلر بير نئچه توپلومسال يوخسا سياسي عجيبه-غريبه نه‌ده‌نه گؤره اله‌نمه (پلئي آف) ياريشي نم هارادان گووه‌ردي، تا تيراختور ائله بو كمالوندين اؤندرليگي آلتيندا اولان كرمانشاهين شيرين فراز تاخيمي‌نا، اوتوزدورولسون!

تيراختورون يئري بو سايي‌دا گرچك يانداشلا ايرانين اوستون ليگي ده ده‌ييل، قالسين كي جنابلار افتخارلا دئييرلر بيز بو تاخيمي اوستون ليگه گتيريب ساخلاميشيق! ائله بيل آزربايجانلي‌لارين آلزايمئرلري وار كي دؤرد-بئش آييندان قاباق كي تيراختور بيرينجي اولاجاق باشقالار ايكينجي يئر ايچين ساواشسينلار سؤزونو اونوتسونلار! آللاه سيزي ساخلاييب و بيزه چوخ گؤرمه‌سين، آنجاق تيراختور سيزين يانليش ائستراتئژي‌نيزه يوخسا فوتبول‌دان اوستون نه‌دنلره گؤره موساوي ائدير، اوتوزور يوخسا اوتوزدورولور(!)، سيز ده گرچكلري دئيين يوخسا سوسون! موغاليطه ائديب و خالقي شوعورسوز بيلمه‌يين. هامي‌دان ياخشي سيز بيليرسينيز كي هارادا چاليشيرسينيز. آزربايجانلي تاماشاچيلارين دؤزوملولوك‌ده تايسيزيليقلاري آيدين‌دير؛ ائله كي قاپيچي ثابيتي ائو اويون‌دا ان گوجسوز تاخيم قارشي‌سيندا بئشينجي دقيقه‌ده اوشاق كيمي يانليش ائديب قول يئيه‌نده، يانداشلار گينه ده "عئيبي يوخ" دئييب و آلقيشلاماقلا اونا روحيه وئريرلر. بيز ده بيليريك تاماشاچيلاري ايستاديوما يول وئرمه‌مك، اويونو پيس زامانلارا سالماق، داورلرين عمدي يانليشليقلاري كيمي نه‌دنلره گؤره آسيايا گئتمك‌دن واز كئچمه‌لي‌ييك، آنجاق توركلرين آرتيق دؤزوم و صبر گؤسترمك‌لريني ساده‌ليك بيلمك كسينليك ايله كمالوندين اؤز گله‌جه‌يينه ياخشي دئييل. آزربايجان‌دا كي اوستون كولتوردن سوء ايستيفاده ائتمك ايجازه‌سي هئچ كيمسه‌يه يوخدور.

Friday, November 12, 2010

گونون گؤروتلری: قوم تیراختورچولاری

ماشاللا توقعلاریمیز گؤی‌لره قالخیب. بیر قوملو دیلداش قولاغیما بیر شئی‌لر دئمه‌سه‌یدی یاواش یاواش آزاجاغدیم! قوم‌د یئرین‌ده قوملو تیراختورچولارین یاردیمی ایله صبا تاخیمی‌نی قوناق ائدیب و اوتماق‌دا سونرا باشقا سونوج ایسته‌میردیک. بیز چوخ راضی دئییلدیک، آنجاق اویوندان سونرا قاییداندا قوملولار سانکی تیراختور اودوب؛ شنلیک کارناوالی یولاسالدیلار و بیز ده اونلارا قوشولدوق! اؤز آرامیزدا قالسین اینانمیردیم قوملولار میرت یوخسا فارسلار دئمیش "باحال" اولسونلار. سالدیغیم گؤروتلرین ایچیندن بئشی‌نی آشاغی‌دا قویورام قالانی‌نا بو لینک‌ده باخین.

بو ماشینین پلاک سایی‌سی هورموزقان اوستانی‌نین دیر




ایتیردیکلریم و تاپدیقلاریم

 بو گون او قدر منه قوم دا خوش کئچدی کی ماشینین بلگه‌لرینی ایستادیوم یا رئستوران‌دا ایتیرمه‌ییم چوخ‌دا حالیمی پوزمادی. تئهرانین یاخینلیغیندا بئنزین ووراندا بیلدیم هر نه‌یی ایتیرمیشم! موبایلیم‌دا گؤردوم 0251 ایله باشلانمیش بیر قوم تئلفون سایی‌سی دوشوب. دئدیم حتمن بیر قوملو اونلاری تاپیب منه خبر وئرمک ایسته‌ییر؛ نه ده چوخ سئویندیم. زنگ ووردوم فارسجا-تورکجه قاریشیق دئدیم سیز منیم مدارکیمی تاپیبسینیز؟ دانیشان دا تعججوب ائله‌ییب دئدی کیشی نه مدارکی؟ ائشیتدیم قوم‌دا سان دئدیم توپ‌دان سونرا گل بیر گؤروشک! لاپ اوزولدوم؛ چونکو هم مدارکی ایتیرمیشدیم، هم ده تانینمیش بیر سایین اوستادی گؤرمه‌یین افتخاری ال‌دن چیخمیشدی!

بو فیکیرلر ایله اؤزومله دئییردیم عئیبی یوخ! بلگه‌لرده کی کیملیک و وارلیقلارین، ائله ده ده‌یه‌ری یوخدور؛ چونکو راحاتلیقلا ایتیرلر. اصل کیملیک‌لر ایتن دئییل‌لر. ایتن اولسایدیلار قوملو تورکلر چوخ دان ایدی کیملیکلرینی اونوتموشدولار.
بوگون قوم‌دا چوخلو تاپینتیلاریم اولدو. کسینلیکله!

تیراختور لیدئرلری

تیراختور باشقا تیملر کیمی آلقیشلاماق و شوعار دئمک ایچین لیدئر و اؤندر ایسته‌میر. عیللتی ده بللی‌دیر. آنجاق تزه‌لیکده چوخ چالیشیرلار و اوزدن‌ده گئتمیرلر. بوگون تیراختورون قوما یوللانمیش لیدئرلرین ایشلریندن باش چیخاردا بیلمه‌دیم! "تورک دیلینده مدرسه" دئمه‌یین قارشی‌سینی آلیب دئییردیلر، بو آموزش-پرورشه مربوط دور! حالبوکی دئییر دیلر بونو تیکرار ائله‌یین: "آزربایجان وار اولسون، ایسته‌مه‌یه‌ن کور اولسون"!!

ي.س:
اوزون يازي اولماسين دئيه، بو يازي‌ني باشقا بير پوست‌دا يازديم:
بو اوستون كولتوردن سوء ايستيفاده‌ ياساق؛ حتي سيزه، سايين كمالوند!

Sunday, November 7, 2010

ده‌ييرمانچي اؤزو ده‌ن تاپمالي؛ كور اوغلو دا اؤزو دارتسين

داش‌قاپي‌نين "آديني قويدون ده‌ييرمانچي چاغير گلسين ده‌ن كور اوغلو" باشليقلا يايديغي يازي‌سي‌ مني اون‌ ايل بوندان اؤنجه‌نين يازي‌نا آپاردي.

دوكتور دوزگون بئش-اون دؤنه گليب جوما گونلري توركجه يازيب اوخوماغي بيزلره اؤيره‌تميشدي. بيز ده ائله‌بيليرديك اولموشوق تورك ديلي‌نين پروفوسورو! عؤمور بويو بير توركجه انشا يازماميشديق آنجاق بيلميرم كيم دئدي گلين درگي ووراق؛ پيس-پيس‌ده آيليق!! هدفيميز بو ايدي اصفهان كيمي يئرده بير دنه توركجه اؤيره‌نجيسل درگي وورولسا تبريز كيمي يئرلرده غئيرته گليب يوزون وورارلار. خولاصه اؤزلرينده يازماق گوجو احساسي‌ ائدنلر اوتاقلارين بيرينه ييغيشيب يازارلار هئيءه‌تي و سوروملو مودور و درگي‌يه ده بير آد سئچيب(دان‌اولدوزو) بيرينجي سايي‌ني حاضيرلاماغا باشلاديلار. يازماق بير يانا نئجه صفحه به‌زه‌مك، نئجه قيرافيك، نئجه چاپا يئترمك، نئجه ساتماق، نئجه پايلاماق و ... دا قالسين! هر كيمسه قرار ايدي بير شئي يازسين و تئزليكله اؤزو تايپ ائديب ديسكئت‌ده وئرسين. واي-واي-واي ياديما دوشدو او زامان يوز جوره ويندوز و وورد وار ايدي؛ ده‌ده‌ميز يانيردي بونلاري بير بيرينه قوشوپ پيرينت ائده‌ك! ياواش ياواش اولوردوق بيلگي سايار اوزماني! پيرينتلر ده هر صفحه بير يئرده آلينميشدي. بيري‌سي اؤز دانيشكده‌سينده آلميشدي! بيري جوهر افشان ايدي! بيري‌سي اؤيره‌نجيسل ياتاقلاردا لئيزري آلميشدي و... خولاصه مين موصيبت ايله ميللت امتحانا حاضيرلاشاندا بيز ده او يان بو يانا قاچيرديق، اصفهانين ايلك توركجه درگي‌سي‌نين بيرينجي سايي‌سي‌ني چاپ آلتينا آپاراق! اؤزوم آراميزدي هر بير سايي‌نين حاضيرلاماغي بير تئرم درس اوخوماق‌دان چوخ ايش آپاريردي. آما هر بير سايي ياييلاندا نه كئف چكمه‌لي ايام اولوردي آچيقلاماق اولماز!

او زامان ياديمدا دئييل بيرينجي سايي ايدي ايكينجي سايي؛ مقاله‌لر آز ايدي. تبريز دن ده‌يه‌رلي تجروبه‌لره صاحيب اولان يوكسك ليسانس يولداشلارين بيري‌سي منه دئدي بس نه اولدو، دئيه‌سن دان‌اولدوزو چيخماق ايسته‌مه‌يير؟! من‌ده دئديم يولداشلار وفاسيز اولوبلار مقاله وئرميرلر. دئدي: "آديني قويدون ده‌ييرمانچي، چاغير گلسين ده‌ن كور اوغلو"! اؤزومله دئديم دوز دئيير دا، من‌ده چوخ آز ايشين داليسينا دوشورم. البته من‌ده اوتانجاق بير ده‌ييرمانچي ايديم؛ سوچوم يوخ‌ايدي!

تصميم توتدوم بوتون كور اوغلولاردان ده‌ن ايسته‌يه‌م، آنجاق دامين او باشيندان دوشدوم! بير باشقا بيلي‌يورد دان تورك اؤيره‌نجيلر گلميشديلردئديم سيز كي بيزدن ياخشي باشاريرسينيز يازماغي. سيزين بيلي‌يورد دا سيخينتي چوخ وار اورك سؤزلري‌نيزي وئرين بيز يازاق؛ دئديلر بيز ده اليميزدن گلن كؤمه‌يه حاضيريق. من ده دئديم آي ساغ اولون. دئديرلر قيرميز چيزگي وارينيز يوخسا يوخ؟ تكجه يازي ييغماق فيكرينده اولان "من"‌ بؤيوك بير يانليش ائديب دئديم هن نه كؤنلونوز ايسته‌يير يازين. بير ايكي هفته‌دن سونرا ايكي – اوچ دنه يازي يئتيشدي! ياخشي ايديلر. آنجاق بيري‌سي قوزئي ايرلندين آزادليق عسكرينه گؤره ايدي! بونو يايماق بيزيم درگي‌ني ايكي‌نجي سايي‌سي‌ني سون سايي ائتمه‌سه‌ايدي ايسه، قونوسو آزربايجان‌دا كولتورل حركتلره اوخشاماييردي! بو منيم باخيشيم ايدي البته، انجاق ايندي فيكر ائدنده گؤرورم "چاغير گلسين دن كور اوغلو" دئيه‌نده گرك بونو دا دئييرميشم بيزيم ده‌ييرمانين داشي نئجه داش‌دير و هر ده‌ني دارتا بيلمه‌ز!!

سونرا دا او بيلي‌يوردون يولداشلاري لوطفلري‌ني آزالديب "ده‌ن" يوللاماديلار. بيزيم ده‌ييرمان‌دا ده‌ن تاپماق‌دا بير آز چتين‌ليگه دوشدو. آنجاق لوبنانلي جوبران خليل جوبرانين بير ياخشي سؤزو واردير: "ده‌ييرمان داشي سينا بيلر، آنجاق چايين سويو ده‌نيزه ساري آخاجاق‌دير"!

گينه او چاغين يادينا دوشدوم، سؤز دور كي گلير! اونودوردوم نه ايستيرديم دئيه‌م. سؤزوم بو دور كي ايندي تئكنولوژي باعيث اولوب بيزيم زامان‌كيمي درگي يايماق يئرسيز و واخت تلف ائتمك اولسون. ايندي هر كيمسه چوخ راحاتليقلا ائده‌بيلر اينتئرنئت‌ده بير "بولاق" آچسين. گيزلي يا آچيق آد ايله نه كؤنلو ايسته‌يير يازسين. البته تكجه يازماق دئييل و ايش مولتي‌ مئديا دا اولابيلر؛ هامي‌نين جيبينده بير ديجيتال كامئرا دا واردير! بوتون كور اوغلولار اؤزلري ده‌‌ييرمانچي‌ اولمالي‌ديلار. ده‌ييرمانچيلاردا دئيه‌بيلمزلر سنين ده‌نين بيزيم ده‌ييرماندا دارتيلماز!! تكجه اون(آرد) ايسته‌يه‌نلر (يوروم وئرنلر) اؤز باخيشلاري‌ني بيلديره‌بيلرلر. ده‌ييرمانچيلار دا دئمه‌سينلر ده‌نيميز يوخدور و بيزه ده‌ن گتيرين! انتئرنئت‌ده كي "پايلاشما" و "قوقول ريدئر"(قيريدئر، قورودور، قورود!) و "توپلومسال شبكه‌لر" اؤز باشينا هر جوره ده‌نلري دارتماغا باشلاميش‌دير. بو آرادا ده‌ييرمانچي اؤزو ده‌ن تاپمالي؛ كور اوغلو دا اؤزو دارتسين! چاي آخير دنيزه ساري تله‌سين يولداشلار...


Saturday, November 6, 2010

ائوین آباد سلیم

خالقین بئله نوحه‌لره احتیاجی وار؛ نه قدر گؤز یاشی دا تؤکولسه آز دیر. هئچ آچیقلاما دا گرکلی دئییل. یاشاسین سلیم؛ ائوین‌ده آباد سلیم:

سلیمین آنادیلینه گؤره نوحه‌سی: چوخ سئویرم آنادیلیمده دانیشام

بورادان MP3 سی‌نی یئندیره‌بیلرسینیز.

Friday, November 5, 2010

گونون گؤروتلری: سجده ائدن ائرمنی

آدلیم ائرمنی اویونجو، آندرانیک تئیموریانین تیراختورا قوشولماغی چوخ اؤنملی و عجیب ایدی. تیراختور بئله باهالی اویونچونو نئجه آلابیلمه‌یی، و او تئهران - اصفهانین وارلی تیملریندن واز گئچیب، تیراختورون کیملیک‌چی(هر آد ایسته‌سینیز وئرین!) یانداشلاری‌نین قارشی‌سیندا اویناماغی فیکیرلری اؤزونه مشغول ائدیردی. بونو دا هامی‌میز بیلیریک کی تئهرانلی ائرمنی‌لر تبریز و آزربایجان‌دا کی توپلومسال اولایلاری هامی دان یاخشی دوشونه‌بیلرلر.

نئچه اویون ایدی کی آندرانیک تیراختور دا فیکس اوینامیشدی. غئیرت ایله یاخشی دا اوینامیشدی آنجاق بیر اویونچونون اصل دویغو و هه‌یه‌جانی قول ووراندان سونرا بیلینه‌ر. دونن‌ده تیراختور قزوینین پئیکان تیمی قارشی‌سیندا گؤزله‌نیلمز بیر قول یئیه‌ندن سونرا، چوخ تئزلیک‌ایله بیر قول ووروب سونوجو اوچ دقیقه‌نین ایچینده بیر-بیر ائله‌دی. قولو ووران‌دا آندارنیک ایدی. او قول ووراندان سونرا یانداشلارین گورولتولو آلقیشی قارشی‌سیندا دؤشونده بیر صلیب چکیب، و سونرا موسلمانلار کیمی سجده ائتدی. بو چوخ گؤزل بیر اولای ایدی. بو بونو گؤسته‌ریر کی حتی بیر ائرمنی‌ده آزربایجانلی یانداشلارین قاباغیندا افتخار ایله اویناییر. حالبوکی انگ یاپیشدیران(دامغا ووران) یایینلار چالیشیردیلار دئسینلر کی سهند ایستادیومونا گئدنلر ایرقچی‌دیلار.

بوندان قاباق کی اویونلارین بیریسینده ده تیراختورون باشقا تورک اولمایان اویونچولاری قول ووراندان سونرا آزربایجان رقصی ائتدیلر(باغلانتی). آندرانیک ده، اولابیلر تورکلره اؤز سایغی‌سی‌نی گؤسترمک ایچین اونلارین دینینده سجده ائدیبدیر. ائرمنی‌لرین رقصلری آزربایجان رقصینه اوخشاییر؛ ائله سجده ائتمه‌یی هر نه‌دن یاخشی ایدی!

آندارنیکین ایشیندن ایکی گؤروت:



ي.س:

بو يازي‌ني ياياندا بيليرديم بير سايي يولداشلار ياخشي قارشيلاماياجاقلار. دوز دور قيريدئر(Google Reader) ده كي يولداش سئويبلر، آنجاق آشاغي‌دا كي يورمو گؤره‌نده بيلديم اؤن‌گؤروم(پيش‌بينيم) ده دوز ايميش:
جیناب هئچ بیلیرسن نه یازیرسان؟ بو هارتان پارتان نه‌دیر بو پوست دا یازیبسان؟ الله بیزیم میلتیمیزده نه قدر ساده اینسان وار؟ ایستمه دیک بو سایغینی!
ياخشي اولدو بئله بير يوروم يازيلدي. چونكو من ده آرتيق آچيقلاما يازابيله‌رم. كسينليكله بئله بير يوروم چوخ آداملارين دوشونجه‌سي‌ اولابيلر. اونا بير قيسا يانيت‌دا "سن ده اؤز تحلیلی‌نی هارتان پارتانسیز یاز و بیزی ساده‌لیک‌دن چیخارت سایین یولداش" دئديم. منجه ساده‌ليك پيشمه‌ميش داورانماق‌دان ياخشي‌دير؛ آنجاق:


اويونچو سئچمه‌ك و تيمي اداره ائتمك گوجو و ايمكاني بيز يانداشلارا يوخدور! تورك كؤكنلي اولدوزلار دا بيزه يئتيشه‌نده پارلاماق يئرينه "قارا چولا(black hole)"يا چئويريرلر! تيراختوروچون اوينايان اويونچولاري دا هر كيمسه اولورلار اولسونلار، بوتون داورانيشلاري‌‌ني گؤز آلتينا آليب "تهديد" يئرينه اؤز خالقيميزا اله گلميش "فورصت" سايمالي‌ييق. تيراختورون كـيرمانلي هوجومچوسو، عليزاده‌ ايندي اولوب آزربايجان كولتورونو تبليغ ائدن بير آدام. عليزاده نئچه ايل ايدي باشقا تيملر ده ياخشي اوينايابيلميردي، آما تيراختور دا گينه ده اولوب بير پارلاق اولدوز. اونون سؤزونه گؤره بو تيراختور يانداشلارينين ائتكي‌سي دير. او دئيير "(توركلرين)عئيبي يوخ دئمه‌كلري بيزه روحيه وئرير (عليزاده: از «عيبي يوخ» روحيه مي‌گيريم!)". بيز اؤزوموز اؤزوموزو تبليغ ائتمك يئرينه گرك اؤزگه‌ني سايقي گؤسته‌رمه‌يه مجبور ائدك.  آندرانيكين قول‌دان سونراكي كيمي اؤزل ايشلر و شنليكلره گؤره، بيز ده اوچ ايش گؤرمه‌لي‌ييك:

1- مايماقليقلا سوساق، يوخسا بير آز آلقيشلاياق! بيزيم سوسماغيميز باعيث اولار اؤزگه‌نين الينه فورصت دوشسون. تئزليكله اؤز قازانمالارينا تعبير و تفسير ائديب، سونرا دئييلر توركلر تكجه گودورلر اؤز ديلداشلاري قول وورسون!

2- دوروب هويلاياق و يامان دئيه‌ك! بوندان منطيق‌سيز و آغيل‌سيز ايش اولابيلمه‌ز. اختيار اؤز اليميزده. سايغي ايسته‌مه‌يه‌ك. سايغي گؤي‌دن گه‌له‌ن اولسايدي چوخ‌دان گلميشدي!!

3- يوخاري‌دا يازديغيم كيمي، بو ايشي بير سايغي گؤسترمه‌ك بيليب و تشككوره لاييق بيله‌ك. هئچ كيمسه‌نين بئيني و اوره‌ييندن خبريميز يوخدور. آما اونون گرچك و گؤز قاباغيندا كي داورانيشي بلگه‌سل و موستند بيلمه‌لي‌ييك؛ دايي و باقيري‌نين ايشلري كيمي. اولابيلر دايي و باقيري تئهران‌دا توركلره اولونان ايهانتلردن اورك‌ده راحاتسيزيميشلار، آنجاق قورخودان سسلريني چيخارتماييبلار. اؤنملي ده ظاهير ده كي ايشلر دير. هر نه دورولاندا فايدا و قازانما دا چوخ اولار. دئديگيم كيمي سونرا كي آلقيشلاماقلاردا بوتون انگلر و يارامايان دامغالاري سيله‌بيلر.

Tuesday, November 2, 2010

گونون سسي: تئز گل

سايين يولداشلارين بيري‌سي رحمتليك "حاج قوربان سولئيماني"يا گؤره دوزه‌لميش بير بلگه‌سل(موستند) فيلمي منه وئردي. اونا باخيب درين ائتكي‌لنديم. بيلديگينيز كيمي خوراسان توركلري‌نين موسيقي دونياسينداكي نابيغه‌لري ياشامي‌نين سون آنلاريندا اؤز دوغما يوردو، قوچانين آلوار كندينده ايدي. دئديگيم فيلم‌ده ائله او كند ده دوزه‌لميش‌دير. حاج قوربان دئيير:
"ايكي‌تئلي (دوتاري) آتام‌دان اؤيره‌نميشم، او اوستا دئييلدي آنجاق اونلار سينه سينه‌يه بيربيرلريندن اؤيرنميشلر؛ قديم‌كي‌لر دئييرلر بير كيشي ياشاميندا اوچ شئيي اولمالي‌دير: بير آت، بير توفنگ، و بير دنه ده ياخشي دوتار!"

البته چاغداش دؤنم‌ده آت و توفنگ لازيم دئييللر و ياشامين گركجه‌لري باشقا شئي‌لر اولوبلار. ياشامين چتين‌ليكلري‌ده او قدر چوخ اولوب كي سس، يير و يا موسيقي‌ دونياسي‌دا ده‌ييشليب‌دير و موسيقي‌ده خالق آراسيندا سئويلمه‌يي داها آرتيق اوزمانليق و داها آرتيق چاليشماق ايسته‌يير. آزربايجان موسيقي‌سي‌ده اوتاي‌دا قورومسال و عئلمي و ياتيريم آرخاسيندا اولاراق گئنيشلنسه‌ده، بوتاي‌دا موسيقي‌ قوروپلاري چوخ چتينليك ايله چاليشيرلار. موسيقي جان يانديرانلار دا ديليميزه جان يانديرانلارين تايي‌ديرلار. يقين كي بئله بير ايش سئوگي‌سيز اولماز.

فئيس‌بوك‌دا باريش قوروپون‌دان گؤزل بير چيخيش گؤردوم "تئز گل" آديندا. چوخ گؤزل اوخويوبلار. من ائله موسيقي‌دن باشيم چيخماز آنجاق او قدر سئوديم كي ياراتديقلاري اثري بورادا سيزينله پايلاشماق ايسته‌ديم. منجه تايسيز سس‌بيرليگي‌ ايله بئله "كور" اوخوماق بو دوروم‌دا آياق اوستونده آلقيشلانمالي‌دير.

اوينار گؤروتو(ويدئونو) بورادا گؤره بيلرسينيز. Mp3 فايلي دا بورادان يئنديرين.

Monday, November 1, 2010

دئربی، یوخسا کت‌یاریشی؟

قیریدئر ده(قوقول ریدئر ده) منیم یازیلاریمی داش چارتلاسا 5-6 نفر سئویر. قورخورام بو یازیمی اؤزومدن سونرا هئچ کیمسه به‌یه‌نمه‌سین؛ آنجاق بورانین یازاری گئجه یاریسی اویاخدی ، هئش کیمه‌ده ربطی یوخدی! قویون بو دؤنه‌ کتدی‌ اویونو چیخارداق‌دا!

تراكتور‌اف‌سي سايتيندا بير دانيشما صفحه‌سي واردير "اؤزگه سؤزجوكلري آناديليميزدن آريداق" آديندا. من‌ده هر دن اورايا بير باش وورارام. بير سايي دوغرودان گلير فوتبول، يوخسا باشقا قونولارلا ايليشگي‌لي سورويور فيلان شئيين توركجه‌سي نه اولور. بير سايي‌دا دوزگون-يانليش تئز يانيت وئريرلر. بو آدامي سئوينديرير. آنجاق بير سايي‌دا وارديلار نم هارالاريندان عجيببه-غريبه اؤزگه سؤزجوكلر چيخارديلار و بيله-بيله دئييرلر كي ياني اؤزونوزو ساريمايين، توركجه‌‌ گوجلو دئييل و يئنيلشه بيلمز. اؤزنك ايچين بيري‌سي گليب دئميشدي، "داربي" يوخسا "دئربي(Derby)"‌نين توركجه‌سي نه اولار؟! و هامي قالميشدي معطل! بو تئرمين ايچين، هر نه‌يه بير توركجه سؤزجوك ياراتميش توركيه‌لي‌لر ده سؤزجوك چيخارتماييبلار. البته فارسجا فرهنگيستاني  نئچه ايل‌دير "شهرآورد"ي اختراع ائله‌ييب. تيلويزيون و رسمي يايينلاردا چاليشيرلار بيردن بيره شهرآورد يئرينه داربي دئييلمه‌سين!

البته منجه بئله سؤزجوكلري ده‌ييشمك دوزگون ايش دئييل و ائله بونا دئربي دئمك چوخ دا ياخشي دير؛ آنجاق دؤندو يوخ(!)، و توركجه‌‌نين گوجونو گؤسته‌رمك ايچين من تئز اورادا يازديم "دئربي"نين توركجه‌سي اولار "كت‌ياريشي"! بير ايكي ساعات‌دان سونرا گؤردوم بيري شوخلوق اوچون يازيب: "يوخ ائله بير دفه‌ليك دئيه‌ك كت‌داواسي"! بللي ايدي هله ده توركلر "كند" و "كت" سؤزو آرايا گله‌نده اونو كيلاس‌‌سيزليق و دئمه‌لي ائله "كتدي‌ليك" بيليب به‌يه‌نه‌بيلميرلر. نه‌جور اولاندان سونرا بو اؤلكه‌ده هامي "كتدي"‌ليك قاچير "شهر‌لي"ليگه. البته بو اولايي ائله بير سايت دا گؤرمك منه آغير گلمه‌دي چونكو همن دويغو و حيسسي ائله كيمليك‌چي يولداشلارين آراسيندا دا گؤرونور. دوزون سؤزو اؤزوم‌ده بئله بير حيسسيم واردير؛ آنجاق بونو ترك ائتمه‌لي‌ييك. چوخلاريندان ايندي ده سوروشسانيز كند ايله شهرين فرقي نه دير دئيه‌جكلر كندين يوللاري آسفالت دئييل! ايران دا "شهر"ي "كند"ين يئرينه قويماق و كندي مدنيت‌سيزليك آنلاميندا بيلمه‌يين سونو، آخير دا گئديب چاتير آناديليميزي بوكوب قيراغا قويوب و فارسجا دانيشماغا.

يولداشلارين بيري‌سي دئدي ته‌له‌سمه، ياخشي سؤزجوك‌ده تاپماق اولار. او "كند" سؤزجويونو توركجه بيلمه‌ييب و اونو اسكي "سوغد" ديليندن آلينميش بير سؤزجوك بيليردي. آنجاق بو دا بير بهانه‌دير. چونكو ايندي بير سوغد ياشامير و "كند" كسينليكله توركلشميس بير سؤزجوك‌دور. خالقين دوغرودان "كند" سؤزوندان قاچماغيميز، آزربايجانين كندلريني بوشالتماق‌دا گؤسته‌ريب‌دير.
قاييداق دئربي سؤزجويونه. دئربي اسكاتلند ديليندن گئچيب‌دير اينگيليزجه‌يه. اسكاتلند ديلينده "ديير" مارال و "بي" دا بالاجا كند(توركييه ده كؤي دئييلير) آنلاميندا. نئچه يوز ايل بوندان اؤنجه بو كندلرده ماراللاري بيربيرلري ايله بوغوشدورماق ياريشي قورارميشلار و بو آرادا ماراللارين بيري‌سي بيرنجي اولارميش. توركجه‌سي ائله اولور كندين مارالي! ايندي‌ده مارال يئرينه قوتبول ياريشي قورولور. بيز ده ايسته‌سك دئربي دئمه‌يه‌ك ائله ياخشي دير دئيه‌ك "كندين ياريشي". بونون دا دئمه‌يي چوخ چكير. دئيه‌ك "كت ياريشي"!

بونو دا دئييم؛ بو يازي‌نين یازیلماغی‌نین نه‌دني ده بو ايدي:
بو آيين سونوندا "تيراختور" و "بلديه" حذفي جاميندا بيربيرلري ايله قارشي قارشي‌يا دوراجاقلار. بو كت‌ياريشي‌نين پيس‌ليغي بونلارين بيري‌سي‌نين اله‌نمه‌يي اولابيلر! آنجاق ياخشي‌ليغي دا سككيز تيمين آراسيندا كسينليك ايله بير آزربايجان‌ ييغماسي‌نين اولماسي‌دير.

ی. س:

حمید درخشان دا تورک چیخدی؛
بیر داها تورکلشدیرن بلدیه‌یه‌ ده یاشاسین

یادینیز دا دیر بیر یازی یازمیشدیم یاشاسین بیر داها تورکلشدیرن تیراختور باشلیغی ایله! بو گئجه سهند کانالیندا بلدیه‌نین یئنی مورببی‌سی، حمید درخشانی گتیرمیشدیلر. دئدی اصلی سارابلی دیر. بولبول کیمی ده تورکجه دانیشیردی. البته آغزیندان معلوم اولوردو کی تئهران‌دا بؤیویوب، آما "بازیکن" یئرینه "اویونجو" دئمه‌یی چوخ ماراقلی ایدی. بئله لیکله بوندان بئله، بیر داها تورکلشدیرن بلدیه‌یه‌ ده یاشاسین! من کی تبریز ده اولسام، کت یاریشیندا تکجه حمید درخشانی آلقیشلایارام!

Saturday, October 30, 2010

بئش‌جوت بير تكلر اولوبلار مين نفر

اصفهانين اؤنمي من ايچين تكجه بيلي‌يوردومون اورادا اولماغيندا دئييل. من توركجه يازيب اوخوماغي اؤيره‌نمه‌يي اورادا باشلاميشام. اؤيره‌تيم قونوسوندا چكديگيم چتينليكلري قيراغا قويسام، اورا بير جوره نوستالژيك دويغوم واردير. اؤتن يازيلاريمدا دا يازميشام اورادا يئتميشلرين ايكينجي ياريسيندا گئديب تيراختوري آلقيشلاياندا لاپ چوخ اولسايديق بئش جوت بير تك اولارديق. هله ياديمدا بير دؤنه بلديه(شهرادي)‌ني سيپاهان قارشي‌سيندا تكجه اوچ نفره القيشلاييرديق!! سيروس دين محمدي‌ده اويون قورتاراندا، بيزيم ال ساللاماغيميزي گؤره‌نده دئدي اللر آغريماسين؛ بيزي تك قويماديز!

دونن‌ده اصفهان‌دا تيراختور ايله سيپاهان آراسيندا ياريش وار ايدي. گئچن ايل دئييرديلر تيراختورو اصفهاندا نئچه يوز نفر آلقيشلاييب. بو ايل بئنيمه وورموشدو گئدم. آنجاق تاي-تورشلاريم هاميسي آرواد اوشاقلاري وار و هر بيري‌سيني دئييرسن گلين گئدك توپا باخاق اؤزوده اصفهان‌دا، آغيللي آخماغا باخان كيمي باخيرلار! گئجه بئله دوشونوردوم اولابيلر بو دا بير جور مرض‌دير و من شورون چيخارتميشام. بو فيكيرلرده چيميرديم كي اون اوچ ايل بوندان قاباق دئديگيم او اوچ نفرين بيري‌سي‌نين ايمئيلي چاتدي. اونون ايمئيلي فوتبول قونوسوندا دئييلدي. او ايندي ده اصفهان‌دا چاليشير. دئديم كيشي هئچ ياديمدا دئييلدي او اصفهان‌دا. دئديم ايمئيلين يانيتيندا قوي تيراختورون اصفهان‌دا كي اويونون سؤزونو آرايا گتيرديم. او دا جاواب‌دا دئدي هن بابا يارين صاباح يولا دوشسن اؤزونو اصفهانا يئتيره‌رسن. هم تيراختور تك قالماز و هم‌ده جاوانليق دؤنه‌ميني ياد ائده‌ريك! من ده كي آمانا بند ايديم؛ دئديم هن صاباح تئز گه‌له‌رم. گئجه ساعات بير-ايكي ده ياتديم... يوخو دا گؤردويوملر ده ايستاديوم، فوتبول، تيراختور، اصفهان، تبريز، آلا قاپي، دوغان چاي(زاينده رودا دئيه‌رديك!)، اورمو گؤلو، آللاه وئرديخان، شيخ صفي، اصفهانين ائرمني‌لر محلله‌سينده توركلرين سينه و زنجير وورماغي، وانك كليساسي‌نين ناقوسو، آندرانيكين شوتو، بيزيم آلقيشلاماغيميز، ياشاسين آزربايجان و قول يئمك‌دن سونرا عئيبي يوخ - عئيبي يوخ  دئمك، اردبيل، اؤيره‌نجيسل‌ قورلتايلار، يول، بيلي‌يورد، دان‌اولدوزو درگي‌سي و اوتوبوس ايديلر!!

دان چاغي(صاباح) گئج اويانديم. تئز يوخودان دورسايديم اوتوبوس ايله يولا دوشه‌جه‌يديم. آما بيلميرم يوخو و اوياق آراسيندا اولان كيمي دئديم اؤتور سككيز دوققوز دا اؤز ماشينيملا يولا دوشسه‌م ده يئتيشه‌رم كيمدي گئده تئرمينال خزانه‌ده اوتوبوسا مينه!! دوروب حاضيرلاشديم گئتديم. ماشين‌دا بير ايستارت ووردوم. بيلميره‌م نه سسي موتوردان گليردي. قورخدوم يول‌دا قالام. اوتوبوس‌دا كي گئج اولاردي. اصفهان‌دان اس ام اس گلدي يولا دوشدون يوخسا يوخ! من‌ده اوتانا اوتانا جاواب وئرديم ماشين خاراب دير گلمه‌ييم اولماياجاق! سونرا دئديم بير باش ووروم هاوا آلانينا(فرودگاها) گؤروم اوچاقلا گئده‌بيله‌رم. دئديلر ساعات 4 اوچوشوندا بير يئر وار! باشيمي ساليب آشاغي توولانا توولانا قاييتديم! اويونو تيلويزيون‌دان ايزله‌ديم. اصفهانلي آپاريجي دئييردي دؤرد بئش‌مين تاماشاچي‌ گليب؛ تيراختورون يانداشي‌دا چوخ‌دور! سونرا گؤرسه‌تدي اونلاري. ان آزي بئش يوز نفر اولارديلار! سايتلارين بير سايي سي يازيبلار مين نفر و بير ايكي‌سي ده يازيب ايكي‌مين نفر! اويون‌دا تيراختور سيپاهان‌دان چوخ حمله ائديردي و سانكي سيپاهان قوناق ايدي! بير صيفيرا اوتوزدوق. آنجاق اوزون بير سوره‌ج‌ده اوتموشوق يولداشلار. اون بئش ايل‌ بوندان قاباق كي "بئش جوت بير تكـ"ـلر تنبل‌له‌شيب، ايستاديوما گئده‌بيلمه‌سه‌لرده، مين نفر اونلارين يئريني دولدورورلار. ياشاسينلار.

بو گون‌ده دمير اريتمه(ذوب آهن) تبريز ده قوناق‌دير گئده‌جك بلديه قارشي‌سينا! هم آللاه و هم ده تاماشاچيلار بلديه‌نين يارديمچي‌سي اولسونلار!! من بيلميرم نه جور اولوب اصفهان - تبريز تيملري هم گئديش و هم ده گليش اويونلاري بير زامان‌دا اولوب! بونو "شانسا باخ شانسا" يازي‌سي‌نين "ي.س. (يازيدان سونرا)" بؤلومونده يازاجاغديم. اونوتموشام سانكي! ايندي لاپ دئمك اولار: "شانسا باخ شانسا"؟!!!

Wednesday, October 27, 2010

دئيه‌سن حاجي فتوللازاده‌نين‌ده قازانديغي چؤرک حلال‌دير

تيراختور-ايستيقلالين بازار گونو ياريشيندان سونراكي توز تورپاق سانكي ياتماق ايسته‌مير! اويون آراجي(قاضي)‌سي‌نين تیکراری و عَمده اوخشار يانليشليقلار و عدالتسيزليكلري تاماشاچيلارين تپكي‌لري، و سونراكي حاشيه‌لره بير نه‌دن ايديلر. ايش اورا چاتيب كي تيراختورون سس‌سيز باشقاني، سردار جعفری‌ده ديله‌ گلدي و شيددت ايله اعتراض ائتدي کی بو نه اويون‌دور چيخارديرسينيز؟ استقلالي ايندي‌دن قهرمان ائتمك قصدلري واردير سانکی!

و بو تارتيشمالار ياواش ياواش تئهرانين باشقا تيمي، ياني پئرسپوليس-تیراختور و پئرسپولیس-بلدیه آراسیندا اورتايا چيخان حادثه‌لره بنزه‌يير. بو بنزه‌مه‌يي، هم پئرسپوليسين و هم‌ده ايستيقلال‌دا آدليم تورك آداملارين اولماسينا گؤره دئييرم. بو بير-ايكي ايل‌ده چوخ عجيب ايدي كي تيراختورون موتورو قيزيشاندان سونرا آدليم تورك فوتبول آداملاري، فوتبول‌دان قوولموش اولاراق، بيردن بيره تئهرانين قيرميز و گؤي تيم‌لرينده اصلي نقشه صاحيب اولدولار! دايي‌ني ايرانين ميللي تيميندن چيخاتميشديلار و خوي‌لو حاجي فتوللازاده ده چوخ‌دان ايدي ايستيقلالين قاپي‌سينا ياخينلاشابيلميردي! آما ايلك‌ده دايي باغيشلاندي و پئرسپوليسین باش مورببی‌سی سئچيلندن نئچه آي سونرا، حاجي فتوللازاده ده ايستيقلالين باش سوروملوسو اولدو. دايي‌ و تيراختور يانداشلاري‌نين آراسيندا گئچميش سوره‌ج‌دن هامي‌ميزين خبريميز واردير. تبريزه ايلك‌ دؤنه گئده‌نده آلقيشلاندي، آما گئت‌گئده يئرسيز دانيشيقلاري و يانليش داورانيشلارينا گؤره هويلاندي! حاجي‌ فتوللازاده‌نين گؤزلری آلتیندا اداره اولونان ايستيقلال‌‌دا تبريزه گئدنده ايلك‌ده آلقيشلاندي؛ چونكو هم حاجي فتوللازاده تورك ايدي و هم ايستيقلالين مورببي‌سي ياني مظلومي جاوانليقدا تيراختوروچون اويناياردي. دوزدور اويونون سونوجونو آراجي ده‌ییشدي، آما تاماشاچيلار تكجه فئدراسيونون علئيهينه شوعار وئرديلر، و بير داها ايستيقلاين مورببي‌سي‌ني آلقيشلاديلار. آنجاق اويوندان سونرا كي دانيشيقلار ياواش ياواش هر نه‌يي ترسينه ائتمه‌يي آدامي قورخودور. تيراختورون مورببي‌ و سوروملولاري آيدين يانليشليقلاري آچيقلاييب، اعتراض ائتمه‌يه حاقلي اولسالاردا، ايستيقلالين دولانديرانلارين يئرسيز ديفاع ائتمكلري هئچ، اؤزلريني تبريزده مظلوم اولماقلاريندان دانيشماق چوخ گولونج‌دور. ساده‌جه دئسه‌لر بيز واللاه تقصيرسيزيك، و هر نه داورين بوينونا دير آدام يانماز. آما قاباق‌دان گلميشليك ائديب دئييرلر آراجي گرك تيراختورون فيلان اويونچولارين ايخراج ائديب و پئنالتي‌لاري‌ني توتماياردي.

البته تكجه تيراختور يانداشلاري دئميرلر بيزيم قولوموزو داور حيسابا قويمادي. ياريشدان سونرا كي گون، فوتبول3 سايتيندا كي سئچگين گونده‌ليكلر تيراختورون حاققي پوزولماق‌دان دانيشيرديلار(تكجه ايستيقلالین رسمی گونده‌ليگيندن سونرا). البته اونلار تيراختورون آلا گؤزلرينه عاشيق دئييل‌ديلر و بير بهانه تاپميشديلار پئرسپوليس‌دن ديفاع ائتمه‌يه گؤره! ايكي هفته بوندان اؤنجه‌ده گون نم هاردان چيخميشدي، پئرسپوليسين ايستيقلالا ووردوغو قول حيساب اولونمادي و اونلار آللاه آللاه ائديرديلر تيراختورون كيمي چوخلو يانداشلي تيمينده اوخشار حال‌دا حاققي پوزولسون.

ايكي گئجه بوندان اؤنجه دوخسان وئرليشين داورليق اوزماني تيراختورون بير قولو يوخ، بلكه بير باشقا آفسايد تانينميش قولونون دوزگون اولماغيني اونايلادي(تاييد ائله‌دي). سونرا حاجي فتوللازاده‌يه دانيشماق نووبه‌سي يئتيشه‌نده، دوردو باشلادي كي يوخ اصل‌ده بيز گرك اعتراض ائدك؛ فيلان صحنه‌ني نه‌دن گؤسته‌رمه‌ديز؟ دانيشيقلاريندا تعاروف ايچين دئيير تيراختور دا اؤزوموزنكودور و منيم همشهري‌لريمين تيمي‌دير؛ من اؤزوم تيراختورا چوخلو يارديم ائتميشه‌م و بيز لاپ سئوينه‌رديك تيراختور اوتسايدي! آما سؤزون آرديندا بئله تيراختورا سالديرير آدام قالير معطل! آدام دئيير هر كيمسه حاجي فتوللازاده‌نين يئرينه اولسايدي، دئيه‌ردي بابا حاق سيزينله‌دير. يانليش‌دي اولوب گئچيب‌دا! آما اصل‌ده پئرسپوليس‌دن ديفاع ائتمك ايچين بو دؤنه تيراختورون يانداشي اولان فئردوسي‌پور، آخير دا اوز دن گئتدي و حاجي دئيه‌ن صحنه‌ني ائكرانا گتيردي.

دايي تيراختورون علئيهنه‌ دانيشاندا، موغاليطه ايچين بير سؤزو چوخ دئييردي. دئييردي كي "منيم چيخارتديغيم چؤرك حلال اولمالي‌دير"! آما حاجي فتوللازاده علي دايي‌يا گؤره سياستلي و منطيقلي داورانير. دئيه‌سن حاجي فتوللازاده ايسه بونو دئمك ايسته‌يير. بيري‌سي اونا دئسين سن كي آراجي يارديمي‌ ايله آز قالدين اوتاسان و سون‌دا دا موساوي سونوجو آليب تبريزدن اكيلدينيز!! داي نه‌يه دامين او باشيندان دوشورسن!؟ بللي دئييل آزربايجانا آز قوللوق ائتميش توركلر، بئله چاغلار نه‌يه حلال قازانماقلاريني بيلديرمك ايسته‌ييرلر؟!

Tuesday, October 26, 2010

سانازليغين سونوجو

منجه بيز نه چكيريك، بيرينجي‌سي خالقيميزين بؤيوك بؤلومو آناديلينده ساوادسيزليغيندان، و ايكينجي‌ده ساوادلي‌لاريندا بو ديلي بيليمسل باشقالارا اؤيره‌تمه‌مك و اينتئرنئت‌ده بيلگي يايماماغي، و اوچونجو ده اؤزگه‌نين ييرتيجي شكيل‌ده هر نه يي اؤز آدينا يئيه‌ليك ائتمه‌سي‌دير.
اينتئرنئت‌‌ده دولانيرديم بير بيلاق‌لا قارشيلاشديم. اؤزونو تئهران‌دا دوغولموش بيلاق يازان، آديني Sunaz يازميشدي. دئديم حتمن بيلمير بونو Sanaz شكلينده يازمالي‌دير و ايسته‌ديم اونو امر به معروف و نهي از مونكر ائدم! سونرا بيلديم او هئچ تورك  ديلي بيلمير سانكي، و اؤز ساناز آدينين توركجه اولماغيندان‌دان خبري يوخدور هئچ، بلكه هئچ بو باغلاردا دئييل و sun يازماق‌دان دا منظوري اينگيليزجه "گونش"‌دير! دئديم قوي باخيم گؤروم هله اينتئرنئت‌ده ساناز آدينا گؤره نئجه فيكيرلر واردير.
فارسجا ويكي‌پئدياني گؤردوم بؤيوك سس ايله گولدوم. يازيب ساناز فارسجا آددير. معناسي دا ياني بي‌نظير و تايي آز! "بي‌نظير" دئديگي حال‌دا دا سؤزجويو بولوب "سا" و "ناز"ا! "سا"يا كي هئچ زاد يازماييب ، آما نازين فارسجا اولدوغونو وورغولاييب! فيكريم قاتيشدي! گؤردوم سولمازي‌‌دا بير بوجاق‌دا قويوب! قورخا قورخا او صحيفه‌يه ده باش ووردوم. سولمازي نه قدر چاليشميشدي فارسجا ائده بيلمه‌ميشديلر. آما يازميشدي دئمك‌ده اولماز سولماز كسينليكله توركجه‌دير، چونكو به‌تر بو آدلارا بنزه‌يير: ائلنار، گولناز، مهناز، فرناز و ... كيمي آدلار!!!
ويكي‌پئديا‌دا سانازين اينگيليزجه صحيفه‌سي ده وار ايدي، آما گؤردوم اوردا دا ايلك‌ده يازيب بو آد فارسجادير؛ و سونرا يازيب ساناز خالق سئون بير توركجه آد دير و "سان(San)" و "آز(Az)"ين بير بيرلرينه قوشولماغيني آچيقلاييب. نئچه دنه ده اينگليزجه سايت گؤردوم سانازي فارسجا بيلديرميشديلر. باغلانتي وئرميرم ان آزي بورا ايچين قايناق اولماسينلار! يئرينه بورايا بير كليك وورون آللاه سيزه‌ده، هم يازارينا دا بركت وئرسين: "معنی نامهای ترکی".

يوخاري‌دا كي سؤزلر ايله بونو دا دئمك ايسته‌ييرديم كي تورك ديلينه گؤره ايران‌دا چوخ آز بيلگي‌ياييلماق و باشقا طرف‌دن كسينليكله عمدي يانليشلاري ويكي‌پئديا كيمي سايتلارا سوخوشدورولماسينا گؤره، بيزيم دوزگون سؤزلريميزه ده هئچ كيمسه اينانمير و حتي اوسته‌له‌ييب سؤزلريميزه گولورلر. بئله بير اولايين قارشي‌سيني آلماق ايچين بوتون يولداشلار قوللارين چيرمالامالي‌ديرلار. ايش چوخدور و ال چوخ اولماياندا سؤزو ده يئريتمك اولمور. ساناز اولماياق!

Monday, October 25, 2010

گونون گؤروتلري: تيراختور يانداشلاري

ياريش ايچين تعطيل اولمايان گونونون پيس ساعاتي سئچيلمه‌يينه باخماياراق، بير داها تبريزين سهند ايستاديومو يانداش ايله دولدو. گئرچك سونوج، و تيراختورون گؤزل قولونو "توركي" آدلي آراجي(داور!) قبول ائتمه‌سه‌ده، هر حالدا بو يانداشلار همه‌شه قازانيرلار و قازانديريرلار منجه. اللرينه ساغليق؛ ياشاسينلار:




گؤروتلري سالان: فریدپوراحمدنیالی
قايناق:‌ http://www.tractorfc.com

Sunday, October 24, 2010

ايرقچي ديزي‌لرين سيرتيق قاديني

يئني‌گون(نوروز) بايراميندا تيلويزيون دا ايكي دنه سئريال وئريردي؛ هر ايكيسينده ده بير تورك لهجه‌لي قوجا آروادي  اوخشار نقش ايله دلقكليك ائديردي. سؤز قابي‌سي دا بو ايدي : "از اينتئرنئت ياد گرفتم"(اينتئرنئت‌دن اؤيرنميشم). سئرياللارا نئچه ده‌يقه‌دن چوخ باخماديم. باشقالار دا باخاندا دا، ائله او قوجا قادينين ائنتئرنئتدن باش چيخارتماق سسي گليردي. او قدر زهله‌م گئديردي هئچ باخميرديم گؤرم قونو نه ‌دير!

اوروجلوق آييندا دا بير داها بو قادينين سسي‌ني باشقا بير سئريال دا ائشيتديم. گئنه ده اونون سؤز قونوسو ائنتئرنئت باجاريغي ايدي و رولو دا فرعي بير رول ايدي. آما بوتون صحنه‌لر ده دوزسوزلوق ائديردي.

بير ايكي آي اوروجلوق دان اؤتور، و باشقا بير سئريال‌دا ائله همن سيرتيق قادين گينه ده تاپيليب‌دير. عجيبه غريبه‌دير كي گينه‌ده سونسوز بير اتي آجي‌ليقلا اينتئرنئت اينتئرنئت ائدير! بو دا توركلري يئني قایدا دا و مودئرن مئتود ایله اله سالماق‌ديردا. توركلرين اللرينه سوپورگه وئرميرلر، طعنه ايله دئييرلر سوپورگه‌چي دئييل‌سينز حتمن تئكنولوژي‌دان باش چيخارديرسينيز دا!

سانكي او تورك قادين قزوين، همدان يا زنگان توركلريندن دير*. آللاه نئچه تومن پول اله گتيريب و آدليملانماغين اوزونو قارا ائتسين. باشقا توركلر بئله دلقكليك ائدنده آدام بير جوره دئييردي اؤتور**. آما بو يئني كشف اولونموش قوجا قادينين اؤز كيمليگيني و آناديلي‌نين اله سالماغي فرقلي دير رسمن!

بير سورغوم دا وار بو تيلويزيون‌دا اصطلاحن گولونج و كومئدي سئريال دوزه‌لدنلر ايله: بو فيلملرينيزي فارسجا دان سونرا باشقا بير ديله چئويرسه‌نيز گئنه‌ده تاماشاچيلاري گولده‌ره‌جكسينيز يوخسا يوخ؟!!!

تورك ييلماز آدلي يولداشين يازي‌سي‌ني بو قونو دا اوخويون: "خوش‌نشين‌ها".

اونودوردوم ها! بوگون تيراختورون تئهرانين ايستيقلال ييغماسي‌ايله اؤنملي بير ياريشي اولاجاقدير. يازيقلار اولسون تبريزه گئده‌بيلمه‌ديم. ايستاديومون سيخ سيخ دولماغي‌نين احتمالي چوخ‌دور. تيراختورا باشاريلار و اونون بوتون آلقيشلايانلارينا سئوينجلي بير گون ديله‌ييرم.
آزربايجان وار اولسون.
سئريال دوزه‌لدنلره ده آللاه شفا وئرسين.

---
* - جام جم گونده‌ليگينده‌كي بيلگي‌لره گؤره بو قادينين آدي حليمه سعيدي،‌ و قزوين‌لي تورك دور. قوران ساواد دير، آما بئله بير سؤز دييب: "بهتر از باسوادها ديالوگ مي‌گويم(ساوادلي‌لاردان ياخشي ديالوگ دانيشيرام)"! يازيغا بيري دئسين سني توركلري و اصل‌ده اؤزونو ياخشي اله سالماغا گؤره اويونچو سئچيبلر، ديالوگ ياخشي دانيشماغينا گؤره يوخ. ياخشي ديالوگ باشارسايدين بير دنه ده هوشلو باشلي و تؤره‌لي رول وئره‌رديلر سنه، و ده‌يقه باشي دئمه‌زدين از اينتيرنيت ياد گيريفتم!

** -اؤرنك ايچين اخراجي‌ها فيلمينده اكبر عبدي و اونون فيلم‌ده كي آناسي مينا جعفرزاده؛ جعفرزداه‌نين فارسجا فيلملرده لهجه‌لي دانيشماغي بئله آداما ده‌يميردي و اولابيلر اويونچو قصد ايله توركلري مسخره ائتمك كؤنلونده ده‌ييل. بو قادين ايندي تبريز كاناليندا "دوز چؤرك" آدلي توركجه بير سئريال‌دا فيلم اوينايير.

ی. س:
تیلویزیون‌دا ده‌یقه باشی آدینی چکدیگیمیز سئریال رئکلام (تبلیغ) اولونور. رئکلامین یاریسیندان چوخو ائله بو قادینین دانیشماقلارینی گؤسته‌ریر. "خان ننه" دئیه‌نده همه‌شه شهریارین گؤزل، نوستالژی‌لی، و اوره‌گی سیخیب، گؤزو یاشا دولدوران شئعری یادا دوشور؛ آما بو اوتانمازلارین گؤرونتولرینده  آزربایجان "خان ننه"سی اوزدن ایراق، اؤزونون اوزون قولاغ اولدوغوندان شکلی‌دیر و دلقک اولوب:



Sunday, October 17, 2010

گؤزله‌يه‌ك ائنسيز يوللاريميزا داش تؤكولمه‌سين

يولداشلارين بيري‌سي دئيير سن‌ده سايين حئيدر باياتين آلما يولونون كسيلمه‌يينه گؤره بير شئي ياز! من‌ده ده دئييرم آخي نه يازيم؟ بيزيم محكوم ائتمه‌ييميز تكجه بير نه‌دن اولابيلر بیزیمکی‌لر ده باغلانسين. دوزدور آلما يولونون كسيلمه‌يي اوزوجو بير اولاي دير، هر حال‌دا بيلاغين باغلانماغي دا آدامين جانين دينجه‌لدر.  اوزون بير سوره ده، يئني بير قونو تاپماق و اونو بيلاق دا يايماق، و بير بيلاغين نئچه ايل گونجه‌ل ساخلاماغين چتين‌ليگي بير باغچانين ياشيل ساخلاماغي كيمي چتين بير ايش‌دير.

توركجه ياييلان بيلاقلارين ايچينده آلما يولو چوخ اؤزل بير يئره صاحيب اولماق نه‌ده‌ني‌نين بيري‌سي، او بيلاغین يازاري‌‌، ياني حئيدر باياتين، كيمليگي بللي اولماق ايدي. كيمليك تانينميش دورم‌دا اولاندا، بيلاغين يازاري دا سوروملولوق ايله دوشونجه‌لر و سؤزلري‌ني اورتايا قويوب، و هر بئينينه گلن سؤزو و ديلينه گله‌ن ايمكانسيز ايشلردن يازمير. آلما يولو دا بئله بير بيلاق ايدي. من ياديمدا اولانا قدر، يازار چاليشيردي نه دامين بو تاييندان دوشسون و نه او تاييندان. آنجاق منه چوخ ماراقلي‌دير كي بيلم اورتام و مؤعتديل  فيكيرلري يايان آلما يولو بيلاغي‌نین كسيلمك نه‌دني نه اولابيلر. بونو ياخشي آچيقلاساق باشقا بيلاقلارين كسيلمه‌يي‌نين قارشي‌سي‌دا آلينا بيلر. آلما يولونون چوخلو يازي‌سي واردير و منجه آلمايولو سون يازيلارينا گؤره كسيلمه‌يي‌نين احتمالي هر نه دن چوخ‌دور. سون يازيلارين باشليقلاري بونلارديرلار:

  1. قرائت یک بیت شعر ترکی توسط عیسی جعفری نماینده بهار و کؤورنگ(کبودرآهنگ) در صحن مجلس و حواشی مربوطه!
  2. شعر معاصر ترکستان شرقی به روایت رسول یونان
  3. نسخه خطی ترکی تذکره شیخ صفی الدین اردبیلی وارد بازار نشر شد
  4. نوزادان به زبان مادری گریه می‌کنند
  5. وبلاگ تانیتیمی: چوبان ییلدیزی
  6. علی دایی، پرداختن به معلول و غفلت از متغیرها
  7. مسیج مکتبی / توپلاییب اینجه له ین : دوکتور حسن – م. جعفرزاده
  8. ربیعه قدیرین آذربایجان قزئتی ایله دانیشیغی
  9. آنلاین کؤچورگه
  10. آیا مساجد هم تـاوان تـرک ستیزی را می دهند؟!
  11. نقش ارسين بر ديوار
  12. این مرده ریگ چنگی به دل نمی‌زند
  13. اؤزموزدن خبرسیزمیشیک بیز / ایواز طاها
  14. تورکوموز قوتاردی بابا
منجه فارسجا يازيلارين باشليغي‌ني نئجه سئچمك هر نه‌دن اؤنملي‌دير. گؤرورسن هئچ بئله سـانسور اولمالي سؤز آرادا يوخ‌دور آما اويغون باشليق سئچمه‌مك باعيث اولور، ائله او سنين اساس سؤز و دوشونجه‌ن آنلاشيلسين. دوزون سؤزو بو يازيلارين هئچ بيري‌سي تانينميش قيرميز سينيرلاردان ائشيگه چيخماييبلار، آنجاق اونونجو يازي‌نين باشليغي منجه تحريك ائدن بير باشليق دير؛ سانکی بو ايسلامي اؤلكه‌ده توركلرين مچيدلرينه‌ده رحم اولمور. بئله بير باشليق نئجه چوخلو اوخوجولاري اؤزونه ساري چكسه، آنجاق توركلرين علئيهينه ايشله‌يه‌نلري ده اؤزونه ساري چكيب و اونلارين عكس العملي دوغال دير. توجه اولسون كي من دئميرم اونلار بو ايشه حاقلي‌ديرلار؛ من دئييرم نئچه ايلدير بير دوشرگه يوخسا بالاجا بير بيلاق ايله خالقا بيلگي يئتيريريك، دويغو ايله بو قدر امك بيتمه‌ني حئييف ائتمه‌يه‌ك. اؤرنك ايچين دئديگيميز باشليغي باشقا بير فورما دا دا دئمك اولار: "اردكان‌دا آدي توركجه اولان مچيد اوچ‌دو".  بئله يازماق منجه تورك اوخوجولاري اؤزونه ساري چكه‌جك، آما بهانه آختارانلاري يوخ!

البته آلمايولونون باشقا آديزي قيزاران آي‌دا دا كسيلميشدي و اؤتن ايل‌ده كي يازيلارا دا بير باخديم. بو يازيلارين ايچينده موجتهيد شبيستري و مونتظيري‌‌نين ائتنيكلردن ائتديگي دفاعا گؤره بير يازي گؤردوم. اولا بيلر بئله بیر یازی‌دا اينتئرنئت ده كي يولو باغلاماغا آمانا بند اولانلاري، تحريك ائتسين. تکجه كيمليك و وارليغا قونوسوندا يازماق کولتورل-توپلومسال آنلاشیلیب آزجا دؤزولسه‌ده، سياسي ساواشانلارين بو قونويا توخونمالاريني فارسجا بير يازي‌دا مطرح ائتمك، دوزگون ايش دئييل و آرخایین اولون بو دؤزولمه‌یه‌جک. بير سؤزو ده دئييم، اؤز آزربايجانيميز و ايران سينيرلاريندا ياشايان توركلرين سورونلارينا گؤره اولدوقجا قونو چوخ‌دور، چاليشاق بونلارا گؤره داها چوخ يازاق، دئميرم اونلار گؤره هئچ نه يازيلماسين، بلكه اؤزوموزه گؤره او قدر يازاق كي اونلارين سايي‌سي چوخ بيلينمه‌سين.

هر حال‌دا سؤز اؤزگورلوغو اينسانين الهي و دوغال بير حاقلاريندان دير. يوخاري‌دا كي سؤزلردن ده هدفيم تكجه دوشه‌رگه‌لرين كسيلمه‌مه‌يي‌نين قارشي‌سي‌ني آلماغا گؤره اؤز دوشونجه‌مي بيلديرمك ايسته‌ديم. انشاللا كي اينتئرنت‌‌ده آلمايولو كيمي ده‌يه‌رلي سايتلارين يولو بو تئزليكه آچيلسين. البته بيزي قاپي‌دان ايچه‌ري قويماسالار باجا دا ايچه‌ري تپيله‌ريك؛ انشاللا بايات به‌ي يازماغينا دوام وئرسين. آما نه‌جور اولاندان سونرا كسيلميش دوشه‌رگه‌لرين موخاطبي آزالير و بو اوزوجو دور.

سون‌دا بونو دا وورغولاييم بو سؤزلر ايله بونو دئمك ايسته‌ميرم، من اؤز بيلاغيم‌دا كسيلمه‌لي سؤزلر يازميرام و منيم داورانيشيم هر نه‌دن ياخشي‌دير. اولابيلر مينم بيلاغيمين اوخوجوسو و گؤروجوسو آزدير و بوردا كي سؤزلري حيسابا قويماماغا گؤره، كيمسه‌نين بورا ايله ايشي يوخدور. اؤز آراميزدي، سونوج بئله اولور كي  بيلاقلاريميزي او يان- بو يان‌دا چوخ دا تانيتماياق و آز تبليغ ائده‌ك. گوجسوز بيلاق يازانلارين چوخالماسي دا پيس دئييل. حئيدر باياتين يوزده يوز يازي‌سي ياخشي اولسا، مين دنه من كيمي پيس يازان‌دان بئش اون دنه اوخومالي يازي چيخار!!


ي.س:
 آلما يولونون كه‌سيلمه‌يينه گؤره باشقا بيلاقلاردان يازيلار(البته بونلار دا آلما يولو كيمي ياخشي يازيرلار، اوز دن ايراق كه‌سيلمه‌لي‌ديرلر!):

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı