Tuesday, June 29, 2010

تيراختور ائتگي‌سي

آشاغي‌دا كي چارت‌دا آنايوردوم بيلاغيندا ياييلميش يازيلارين آيليق سايي‌سي‌ني 2007 جي ايلي‌نين بيرينجي آييندان گؤرورسونوز. البته 2007دن اؤنجه آنايوردوم 20m.com دا ايدي. اورادا آرشيو سيستئمي‌نين اولماديغي‌، و هم ده اؤز ياشام دورومومون فرقلي اولماماغينا باخاراق، اورادا ياييلميش يازيلارين سايي‌سي‌ني بورادا گتيرمه‌ميشم:



گؤردوغونوز كيمي يازيلارين سايي‌سي گئچن ايلين يايينا قه‌در گئت-گئده آزالماق سوره‌جينده‌دير. دئمك اولار يازماق ماراغي، بير ثابيت دوروم‌دا اولان آزربايجانلي بيلاق يازاريندا آزالير. بو سوره‌جي باشقا بيلاقچي‌لار دا ايسه گؤرمك اولوردو.  قوروموش و يا باغلانميش بيلاقلارين قونوسو دا كي هئچ! آنجاق من اؤزوم‌دن و آنايوردوم‌دان دانيشسام، دئيه‌بيله‌رم كي نه‌دن من‌ده يازماق كؤنولو بير داها چوخالدي و يا داها آرتيق چوخالدي. هر آي بير-ايكي و داش چارتداسا يئددي يازي اينتئرنئته آتان آداما نه گلدي كي بير دن هر آي 10-15 دنه يازي ايله بيلاغي‌ني گونجه‌له‌دي؟!

بيلديگينيز كيمي گئچن ايل فارسجا بيلاقلارين ايسه قوروماق ايلي ايدي و اونلارين نه‌دني ياشيللارين دونيادان كوسمه‌له‌رينه گؤره اولابيلردي! آنجاق توركجه ياييلان سايتلار و بيلاقلاري بير ده آليشديران تكجه تيراختورون ايستارتي و موتورون قيزماسي اولابيلردي كي بئله ده اولدو. منيم اؤزومو كي تيراختوردان باشقا بير شئي قيزديرابيلمه‌زدي. سيزي بيلميرم آنجاق سايتلار و بيلاقلارا بير دفه باخماق كيفايت دير كي گؤره‌سينيز نئچه دنه باغلانتي تيراختور قونوسو حاق‌دا واردير! تيراختور هر نه‌يي يئريندن لاخلاتدي. آرخايين اولون بو ته‌رپه‌نتي تكجه اينتئرنئت، موسيقي و ايدمان‌دا دئييل. بير آي‌دان چوخدور تيراختور اوينامايير آنجاق بورا گونجه‌له‌نير؛ بونا دئيه‌رلر:
"تيراختور ائتگي‌سي"!


Thursday, June 24, 2010

بو دا اون‌مين‌ليك


بئش‌مين‌ليك ايسكيناسي‌نين داليندا يازيلميش قوندارما سؤزدن بيلگي چوخدور و اونا گؤره دانيشماق ايسته‌ميرم. آنجاق نئچه آي‌ايدي دئييرديلر اون‌مين‌ليك‌ده يول‌دا. من اؤزومله دئييرديم يئني ايسكيناس‌داكي سؤز ثوره‌يادان‌دا داها اوزاق اولدوزلارداكي بيليم ايله ايليشگي‌سي اولاجاق. و دونن خبر چاتدي كي اون‌مين‌‌تومن‌ليك ده ياييلدي. بو دفه كي ايسكيناس‌دا، خطر آلتيندا اولان(!) فارسجا ديلي‌نين قوشارلارينين بيري‌سينين قبر شكيلي چكيليب و يانيندا ‌قوشمالار‌ي‌نين بيري‌سي يازيليب. همن شئعر كي دئييلير بيرلشميش اولوسلار قورومونون قاپي‌سينا يونولوب(!):
"آداملار بير بيرينين اويه‌سي ديرلر...، كي يارانيش‌دا بير جوهردن ديرلر"!

البته بو قوشما چوخ گؤزل قوشما دير، آنجاق بو قوشمانين اينساني و بشري آنلامي ايله ايش يوخدور! و منظورلاري بودور كي فارس اولمايانلار دا ائله فارسلار جوهريندن‌ديرلر و بس!

بونلار بيزيم بئينيميز ده فيرلانان دوشونجه‌لر و فيكيرلرديرلر. ايندي گؤرون باشقالار نه فيكير ده ديرلر. سانكي بؤيوك موناظيره‌لر گئدير فارس ديلي عاليملرين آراسيندا:
اون‌مين‌ليگين اوستونده يازيلميش قوشما دا "يكديگرند" يئرينه "يك پيكرند" اوتورمالي‌ايميش يوخسا يوخ؟*. البته شيراز بيلي‌يوردوندا اولان آباده‌لي و اولابيلر قاشقايلي "حسنلي" آدلي فارس ديلي ادبيات اوستادي‌ ايسه بونا گؤره نظر وئريب. من اونون نظرلرينه ديققت ائتميرم؛ آما دئييرم گؤره‌سن بو اوستاد اؤز آديندا كي "لي"يه فيكير ائله‌ييب يوخسا يوخ؟!!

* - توضيح كاووس حسنلي درباره‌ي بيت سعدي پشت اسكناس جديد

Tuesday, June 22, 2010

سوسماق بئله دانيشماق‌دان ياخشي‌دير

اردبيل - تبريز راديو تيلويزيونلاريندا چوخ ائشيديلير و گؤرسه‌نير. مثلن بيري شهرداري باشقاني دير، آموزش و پرورش ده سوروملو دور، اوستانداري‌دا ايشله‌يير، جهاد دا اولور يا دا دؤولتي باشقا ايشلره باخير يا دا ايشلرين باشيندا دير. البته تكجه دؤولت آدامي دئييللر و معمولي آداملار دا ايچلرين‌ده وار، آنجاق دانيشماق فورصتي راديو تيلويزيون تريبونوندا دؤولت آداملاري ايچين وار. طرف گلير فارسجا خبر بؤلومون‌ده دانيشاندا ته‌ته-په‌ته يه دوشوب بئله اركك آغيزلا دانيشير آدام دئيير آخي نه‌يه بو يازيقلاري فارسجا دانيشديريرسينيز. بير ديلماج گه‌تيرين دا. مثلن ائله بو تيراختورون اويونلاري‌ني فارسجا قيريللادان اوغول ياخشي‌دير. نه‌مه‌نه دانيشيلير بو اولسون دوبلور. تورك اولمايانلار دا بيز غيري آريايي‌لارا گولمه‌زلر. بو بوندان. ولي ايش او زامان لاپ گولونج اولور كي دانيشان ايسته‌يير توركجه دانيشا. يقين سيز ده من كيمي سيز. آدامين قوسماغي گلير. دئسين فارسجا دانيش، دانيشا بيلمز ايندي توركجه دانيشاندا، جومله‌لرين باشيندان اه‌ته‌يه هر نه‌يي فارسجا قورولوش ايله دئيير:

"از ابتداي سال يك هزار و سيصد و هشتاد و نه، در اداره مربوط به طرح‌هاي عمراني، پروژه‌هايي كه در دست اجرا ديلار..."!!
ايندي دئسين، سن ائله بو بير دنه فئعلي ده فارسجا دئه، قالاجاق! باتيراجاق! قاتيب قاتيشديراجاق!

و بئله اولور آدام تيلويزيونون انگين باسير و گلير گيرير اينتئرنئته. يوخاري دا دئديگيم بويوروق آلتيندا كيلاردان هئچ انتظار يوخدور؛ آنجاق منيم اؤز بيلاغيم دا ايسه بير-ايكي دنه باغلانتي وار. بيلاقلاريندا هر دن آذربايجانا گؤره بير شئي‌لر يازماقلارينا گؤره لينك وئرميشم. هر دن گئديب باخارام. سؤزون دوزو، يازيلاري ادبي فارسجا اولسا اوخويارام. آنجاق هر دن گؤرورسن مثلا گئديب شاهسئون ائلي‌نين آراسينا و تئهران گؤبه‌گي‌نين لهجه‌سينده خاطيره يازير:

"فك كردم چوپون واسه اين ميره اون ور تپه كه ..."

-------

ي. س:

 داش‌قاپي بيلاغيندا بو يازي‌يا گؤره "دانیشا بیلدیم کی دانیشمادیم!" باشليق‌لي ائله‌شتيري ده يازيلميشدير:
او یازیدا نئجه تورکی دانیشماق‌لارا توخونولوب. آذربایجاندا اولانلار دوغرو دوزگون تورکو دانیشا بیلدیلر کی دانیشمادیلار! بو دیلی دوز دانیشماغی هاردان اؤیرنمه‌لی‌دیرلر!؟ نه زامان اؤیرتدیلر اونلار اؤیرنمه‌دیلر؟!
ايسته‌ديم يوروم وئريب، دئيه‌م منيم منظوروم توركجه ادبي دانيشماق دئييل؛ يوخاري‌دا وئرديگيم ميثال‌دا طرف اؤز آناديلينده چوخ  قولاي‌جا دئيه‌بيلر: "بو ايلين اوليندن (هشدات دوكقوزون اوليندن) ايداره امور عمراني‌ بو پوروژه‌لري ايجرا ائله‌يير...  "!
يا ايسته‌ديم دئيه‌م هئچ من ايله سن‌ده، باكي‌ و آنكارا دا بؤيومه‌ميشيك و بيزه‌ده اوخوللاردا اؤيره‌تمه‌ميشلر!
آنجاق "قيريدئر(Google Reader)" ده گؤردوم بير نفر "e s" آدي ايله، منيم منظورومو باشقا جوره دئييب. اونون دئييشينده توركلر ايسته‌ر ايسته‌مز، ميكروفون قاباغيندا رسمي‌له‌شمك دوروموندا قاليرلار و بئله زامان‌لار فارسجا اوسلوبلو دانيشماق يا فارسجا دانيشماق زوروندا قاليرلار؛ او بو يورومو منيم يازيمين آلتيندا قويوب:

بو بیر مرض‌دیر اینانین. یانی منجه اینسانین پسیکولوژی‌سی و آلت‌ بیلینجی ایله باغلی بیر شئی اولابیله‌ر. کامئرانین یا دا میکروفونون قاباغینا کئچه‌رک سانکی رسمی‌له‌شیرلر. بیر سئری سلیم موذن‌زاده‌نی گتیرمیشدیلر اورمونو اوستانی کانالینا. آپاریجی بوندان بیر تورکجه سورو سوروشدو. اؤزوزو تانیتدیریرسیز دئیه مثلا بیر شئی. قاییتدی ایلک اؤنجه بیرآز کیرلی تورکجه ایله جاواب وئردی. سونرا اؤزو ده بیلمزجه‌سینه سیزدی فارسجایا. آغلامالی اولسا دا من او گون قیریلدیم گولمک‌دن.

سوباي‌لار ، ائولي‌لر

داش‌قاپي سوباي‌ليق-ائولي‌ليق، بو توپلومسال بؤيوك سورون‌دان سؤز آپاريب! اورا دا بير يوروم قويدم، آنجاق دئديم اؤز بيلاغيم دا ايسه يازيم! البته اؤنجه بوتون سوبايلار لا ائولي‌لر مني اؤز بؤيوكلوكلري ايله باغيشلايارلار.

بير آتالار سؤزو كي يوخ، سوباي‌لار سؤزو، واردير بو قونو دا:
سوباي سولطان كيمي ياشايار، ايت كيمي اؤلر؛
آنجاق ائولي‌ ايت كيمي ياشايار، سولطان كيمي اؤلر!!
سيزجه بئله دئييل مي؟! من كي اؤزوم ايندي سولطان كيمي ياشاييرام. اؤرنك ايچين گئجه ساعات ايكي‌يه دك اوتوروب جام جهاني‌يه باخيرام. ايگيرمي اوتوز دنه چاي ايچيرم. البته پاپروز چكميرم! جام جهاني‌يه باخا-باخا اينتئرنت‌*ده ايسه فيرلانيرام. البته گئج يوخودان دوروب،ايشه ده گئج يئتيشيرم و ايش باشيندا هامي سولطانا يوخ، سانكي نالبنده باخيرلار و ... خولاصه سوبايليق احوالاتيندا كئفا باخيرام؛  آنجاق اؤز آراميزدا قالسين گله‌جك‌دن به‌تر قوروخورام!


*- منجه بيلاق يازانلارين يوزده سـكـسني سوباي‌ديرلار. البته گرك بو عئلمي شكيل‌ده آراشديريلسين! بئله نظرلر ده وئرمك اولار:
- يئني دؤنم‌ده آيريلماقلارين يوزده نئچه‌سي بيلاق يازماق‌دان قايناقلانير.
- ائوله‌نه‌ندن سونرا بيلاقلار يوزده‌ نئچه‌سي باغلانير.
- آيريلماق‌دان سونرا باغلانميش بيلاقلارين كــيركــيره‌لري بير داها گئدير يوخاري و نئچه دنه يئني بيلاق آچيلير.
- ائولنمك‌دن نئچه آي، يوخسا نئچه ايل سونرا، باغلانميش بيلاقلار بير داها ايشه باشلاييرلار.
- و ...

Sunday, June 20, 2010

بو تاي‌دا كتدي، او تاي‌دا كتي

بو آلمان و ايسوئچره(سويس) فوتبول ييغمالاريندا كي تورك كؤكنلي اويونچولارين آدلاري من ايچين بير باخيش نوقطه‌سيندن چوخ اؤنملي دير. اونلارين آدلاري ده‌ييشيلمه‌ييب: مئسوت اؤزيل، سئردار تاشجي، هاكان ياكين، گؤكهان اينلر، اه‌رن دردي يوك ...! منجه بونلار ايدمانچي‌ليق دان آرتيق ايشلر گؤروب و توركييه‌نين آوروپا و دونيا داكي كولتورل ائلچي‌لري ديرلر. دونيانين هر يئرينده اولور اولسون آنجاق بونلار وارليغي قوروماق سيمگه‌لري ديرلر. بونلار هم اؤز اؤلكه‌لرينده و هم باشقا اؤلكه‌لرينين ايچينده وارليق و كيمليك و يا "هويت" سورونو ايله قارشيلاشماييبلار و بونا گؤره دونيانين هر يئرينده راحات‌ديرلار.

ايندي اؤز اؤلكه‌ميزي نظر ده آلين. چوخلو ايرانلي واردير توركييه‌لي‌لر كيمي دونيانين اويان-بويانيندا اؤز دئديكلرينه گؤره "موفق" و "باشاري"‌لي آداملارديلار و اؤزلريني اصيل آريايي و پئرشيه‌ن دا تانيتديريرلار. آنجاق گؤرورسن طرفين آدي "جئفري" دير! و اول ده "جعفر" ايميش سونرا آديني باتي‌لي‌لار راحات دئمه‌گه گؤره جئفري ائله‌ييب! و بونلارا تاي چوخ تاپماق اولار: كامي (كامران)، ائلي (علي)، مامي (محمود)، مت (مهدي)، كتي (كتايون)، مارادونا (غضنفر) و ...

بونلارين چوخو هئچ فارس‌دا دئييل‌لر. تورك‌دن، لور دان، تات‌دان، وهر اولوس و ائتنيك‌دن ايچلرينده وار. آنجاق بير ساده نه‌دن واردير بئله ايش ايچين. طرف ايرانين ايچينده ايكينجي درجه‌لي كيمليگه صاحيب ايميش دوروب گئديب مثلا تئهرانا، آغيز دوداغين اويان-بويانا اه‌يمه‌ك ايله اؤزونو بيرينجي درجه‌لي ايرانلي گؤسته‌رمك ايسته‌ييرميش. سونرا گؤروب بئله اولمور، دوروب گئديب سينيرلارين اوتايي‌ و يا دونيانين او باشينا. و سون‌دا گؤروب دوروم داها فرقلي‌دير و اورادا بونلاري اورتا دوغولو حيساب ائله‌ييب هئچ آدام تانيميرلار. و بونلار كي بير گئجه‌ده اؤز كؤكلريني اونودوردولار، بير ساعاتين ايچينده بوتون "نه‌‌كي‌وار"لاريني اونودورلار!! البته بئله آداملار اؤله‌نه‌دك تؤره‌لي يئرلره ال تاپميرلار و هر دن گؤرورسن "وي او ائي" يا "بي بي سي" ده گليب "ر"لاري اينگيليس‌لي‌لر كيمي دئيه‌دئيه، 2500 ايل‌ليك تمدن‌دن و كوروش موروش دان دانيشيرلار!


Saturday, June 19, 2010

Azərbaycan Türkcəsində "FootieFox" - آذربايجان توركجه‌سينده فوتي‌فوكس

FootieFox bir balaca popular Add-ons yazılım(software)dır. Bu Add-ons`lar FireFox yazılımının üstünə yüklənəndən sonra, sizə avtomatik və canlı olaraq, dünyanın hər bir bucağında olan Futbol yarışlarının sonuc durumunu Alman da yayılan Kicker futbol gündəliyi saytının vasitəsi ilə deyir. 

FootieFox yazılımı 27 dilə yayılib və mən onun Azərbaycan Türkcəsinə çevirilməyinə qatıldım. FireFox ilə internet`ə girirsinzsə gedin bu səhifədən onu yükləyin və  sonra Azərbaycan Türkcəsini seçin. Əlbəttə Ərəb əlifbasını da göndərmişəm, ancaq hələlik Latin əlifibasını güncələyiblər. 2010 Güney Afriqa dünyalıq küpasının sonuclarını FootieFox`un Azərbaycan Türkcəsi ilə izləyin və yoldaşlarınıza da deyin!

FootieFox Add-ons`unun Firefox`a quraşdırmaq aşamalarını görmək için gedin bura`ya.


آذربايجان توركجه‌سينده فوتي‌فوكس:

فوتي‌فوكس بير بالاجا پوپيولار "اد-آنز" يازيليم‌(نرم افزار) دير. بو "اد-آنز"لار فايرفاكس يازيليمي‌نين اوستونه يوكله‌نه‌ندن سونرا، سيزه اوتوماتيك و جانلي اولاراق، دونيانين هر بير بوجاغيندا اولان فوتبول ياريشلارينين سونوج دورومونو آلمان‌دا ياييلان كيكئر گونده‌ليگي سايتي‌نين واسيطه‌سي‌ ايله دئيير.

فوتي‌فوكس يازيليمي 27 ديل‌ده ياييلميشدير و من‌ده اونون اذربايجان توركجه‌سينه چئويريلمه‌يينه قاتيلديم. فايرفاكس ايله اينتئرنئته گيرسه‌نيزسه گئدين بو صحيفه‌دن اونو يوكله‌يين و سونرا، آپشين بؤلوموندن آذربايجان توركجه‌سيني سئچين. البته عرب اليفباسي‌ني‌دا گؤندرميشم، آنجاق هله‌ليك، لاتين اليفباسيني گونجه‌له‌ييبلر. 2010 گونئي آفريقا دونياليق كوپاسي‌نين سونوجلاري‌ني فوتي‌فوكسون آذربايجان توركجه‌سي ايله ايزله‌يين و يولداشلارينيزا دا دئيين!

آذربايجان توركجه‌سينده "فوتي‌فوكس" "اد-آنز"ي‌نين نصب ائتمك آشامالاري‌ني گؤرمك ايچين گئدين بورايا.

Thursday, June 17, 2010

آنالار


مئهر خبر آژانسي ساوالان اه‌ته‌كلري، سردابه (حتما آدي "سويوق بولاق"‌دان زاددان ايميش ده‌ييشيليب!) ده ياشايان ائل‌دن بو گؤرونتو آلبوملاري‌ني ياييب: 1 ، 2 و 3.

من او گؤزل گؤرونتولرين ايچيندن بو ايكي داها گؤزل گؤرونتونو، بوتون مئهريبان آنالارين يادينا سئچيب بورادا قويورام. شن‌ليك ايله ياشاسينلار هامي‌سي:




ي. س: كيمسه ايسته‌يير بيله آذربايجان قادينلارينين اؤرتوكلري(حيجابلاري) نه ايميش و نه دير، بونلارا باخسين.

Tuesday, June 15, 2010

گونئي آفريقا دا كي توركلر


1-   بير آي اؤنجه يوروويژن موسيقي ياريشلاريندا توركييه ايكينجي و آذربايجان بئشينجي اولدو. بو ياريشلارين خاللاريني  بوتون آوروپالي اؤلكه‌لرين توپلانميش اس ام اس‌لريندن بليرله‌ييرلر. البته آوروپالي‌لار دا توركلرين قاش گؤزونه آشيق دئييللر و بو توركييه‌نين بو ايل كي پئرفورمانسي دا عالي دئييل‌دي. آنجاق سونوجون نه‌ده‌ني آچيقلاماغي‌ني بيلمك ايچين، يوروويژ‌نين رسمي سايتيندا كي اوخوجولارين مينلر يوروملاري‌نين بير‌ني اوخوماق كيفايت‌دير. سونوجلاردان راضي اولمايان آوروپالي اوخوجولارين بير‌ي‌سي بئله يازميشدي:
بو ياريشلار دا، توركلر هر يئرده اولماقلاري‌ني ثوبوت ائتديلر!
2 -   اون - اون بئش ايل بوندان اؤنجه گؤردويوم كومئدي بير فيلمين (آدي‌ني اونوتموشام) سئكانسلاريندان:
اكبر عبدي بير يولداشي‌ايله ژاپونا گئديب ايشله‌مك قرارينا گليبلر. آنجاق بير آز نيگران ديرلار. اكبر عبدي‌نين قوجا آتاسي دئيير ژاپون‌دا ايليشسه‌نيز اورانين توركلريندن يارديم ايسته‌يين سيزه كؤمك ائله‌يه‌رلر. اكبر عبدي‌نين فارس يولداشي دئيير ژاپون دا تورك هارداي‌دي آخي؟! قوجا كيشي ده جاواب دا بئله دئيير:
"سن كي تحصيل ائله‌ميش بير آدام‌سان، بو سؤزلردن دانيشما! دونيانين هر يئرينده تورك وار"!

3-  ته‌زه‌ليك‌ده منيم ماراقلاريما يئيه‌ن توركجه يازيلان بيلاقلار دا چوخالير(ماشاللاه دئيه‌ك گوز ده‌يمه‌سين! ). بونلارين بيري‌سي "داش قاپي" دير و بيري‌سي ده "يولوموز بير". بو گون داش‌قاپي دونياليق فوتبول كوپاسينين ياريشلاريندا هانسي ييغمانين يانداشي اولماق قونوسوندا بير شئي‌لر يازيب. من‌ده يوروم قويدوم:
منیم"یاشاسین بافانا بافانا" پوستومو اوخوسون گونئی آفریقا یانداشی اولارسان!

سونرا گؤردوم يوسوف به‌ي (يولوموز بيرين يازاري) ده گليب بئله يازيب:
اوچ دورد گون اولار بیر سوال بئینیمده وار اودا بودور کی بو اویونلاردا هر میللتدن تیم وار فقط بو آرادا تورکلردن خبر یوخ بیر ده فارسلاردان!!!!
بئله اولدو كي من ده يوخاري دئديگيم فيلم كيمي بير آز حيرصلنديم دئديم:

سن كي تحصيل ائله‌ميش بير آدام‌سان بو سؤزلردن دانيشما! اولارمي بو ييغمالارين بير‌سينده تورك اولمايا؟ اؤرنك ايچين آلمانين ان ياخشي اويونچولاري‌نين بير‌ي‌سي "مئسوت اؤزيل" آلمانلي توركو دور كي هئچ، معمولي اويونچولار آراسيندا ايسه باشقا بير تورك كؤكنلي اويونچو واردير "سردار تاشجي" آديندا! بوگون صاباح دا باشقالاري تاپيلار. بير آز دؤزون!

بيزيم ائل‌سئورليگيميز ايله بازارليق ائدنلر

بو تيراختور خبرلري اؤزلليك ايله اويونچو ترانسفئرلرينه گؤره ايسته‌ميرم بير شئي يازام. دوزون سؤزو بير اونايلانماميش خبره گؤره "جو زده" اولدوم و گلديم بورادا دوز فوتبال آتموسفئريني ياشاتديم. حالبوكي بيزلر فوتبول‌دان "كيمليك" مساله‌سينه‌ گؤره ايستيفاده ائله‌سك، فوتبول پرده‌سينين آرخاسيندا چيركين بازارليقلار و دللال‌ليق واردير و بيزيم اونلار ايله چوخ ايشيميز اولماسا، آرخايين اولون اونلار داش‌قاپي دئديگي كيمي "قارين‌قولو"دورلار كي هئچ، "گؤزو آج" ديرلار و بيزيم "ائل‌سئورليك" دويغولاريميزدان قولاي‌جا سوء استفاده ائله‌ييرلر.

ائله كي اؤنجه ده دئديم بير خبرلر آرادا وار ايميش و بو آرادا "هادي اصغري" آدلي تورك اويونچونون تيراختورا پولسوز گئتمك خبري تكجه بير بهانه ايميش اونون باهالاشماسينا:
تيراختور فوتبول كلوبونون گئنل مودورو، ناصير شفق، دئييب كي:

نمي خواهم اتفاقي كه بين تراكتورسازي و هادي اصغري رخ داد تكرار شود. اين بازيكن با من مذاكره كرد و بعد از اينكه قيمت خود را بالا برد با تيم ديگري با قيمت بيشتري قرارداد امضا كرد(آذربايجان اسپورت).
(ايسته‌ميرم تيراختور و هادي اصغري‌نين آراسيندا اوز وئرن اولاي بير داها تيكرار اولا. بو اويونچو من ايله قونوشدو، و اؤز ده‌يه‌ري‌ني چوخالدان سونرا باشقا بير ييغما ايله-قومون صبا تيمي، داها آرتيق قييمت‌ ايله قرار ايمضالادي.)
و نه ميندار ايش گؤرونموش‌دور. هادي اصغري‌ني هئچ كيمسه تانيميردي. بير خبرين ياييلماسي ايله بيلديك فيلان اويونچو تورك دور و تيراختور اوچون پول‌سوز اويناماغا دا ماراقلي‌دير و بير گئجه‌ده فوتبول‌دان اوستون دوشونجه‌لرده سئير ائدن مينلر تيراختورچو اونو تانيديلار و باشقا ياندان دئمه بازار قيزيشيرميش!! نه قارين‌قولولوغون ايرادي واردير و نه گؤزو توخ اولماماق! هئچ كيمسه‌نين ده انتظاري يوخ‌دور. آنجاق اولوسال دويغولارايله بازارليق ائتمك‌دن داها كثيف ايش اولماز. و البته اولا بيلر شفقين بو سؤزو ايسه يالان اولسون! آنجاق كسينليك ايله بازارليقلار و سوء استفاده‌لر آرا دا چوخدور  و بيزلر آييق اولمالي‌ييق؛‌ دللال‌لار و قارين‌قولو گؤزو آجلار بيلسينلر كي پول و آد باشي اوجاليق گتيرن اولسايدي، اونلار مين نفر تبريز ده، داها وارلي و داها آدليم دايي‌ني، بير ساعات دا زيروه لردن دره‌لره يوللامازديلار.


Monday, June 14, 2010

Qırğız la Özbək Qardaşlar! Barışın Lütfən...

İnsanlar arasında ki savaş və qan tökmək her yerdə olur olsun acıdır. Ancaq bə`zi savaşlar da, fərqli dilli, fərqli soylu, fərqli dinli ellər biri-birinin qarşısında duranda, adam təccüb eləmir. Belə çağlar adam deyir bunlar ortaq qonu tapabilməyib və bir-biriylə danışıb barışa bilməyirlər. Üçüncü yanlar da bir tərəfi dəstəkləyib va aranı daha artıq bulundururlar; Örnək için Azərbaycan Türkləri ilə Ermənilərin arasında ki gərginlik. Dil və dinləri Azərbaycanlılarla fərq eliyən Ermənilər Qarabağı işğal eləyiblər. Azərbaycanlılar onlarla savaşdan başqa yol tapabilməyiblər və arada isə Ermənilər ilə daha artıq dostluğu olan Ruslar Ermənilərin arxasında durublar və 15 ildən çoxdur bu iki qonşu ölkə savaşsız-barışsız durumda`dırlar.
Türk dünyasında başqa örnəklərin birisi də Doğu Türküstan dır. Çinlilərin zülmü altında olan Uyğurlar da bildir bu günlər hakim və başqa soylu Hanlar ilə çatışdılar.
Türk olmayan xalqlardan isə Filstinlilər-İsrayillilər, Kəşmirlilər-Hindlilər, Çeçenlər-Ruslar, Bosnulular-Serblər, Tamillər-Silanlar, Tibetlər-Hanlar  qarşı durmaları örnək gətirmək olar. Yuxarı da dediyim kimi bunların hamısında İnsanlıq və qonşuluqdan sonra başqa ortaqlıq tapmaq çətindir. Bunların çoxu zahir də barışsalar da, zordan istifadə olunub.

Ancaq bu günlər taysız bir olaylar görürük. Qırğızıstan ölkəsində Sünni müsəlman olan Türk dilli Qırğızlar, Sünni müsəlman olan Türk dilli özbək azlığına saldırıb 100 dən artığını öldürüb və 100-lərini isə yaralayıb və 1000-lərini də qaçırdıblar. və lap əcip və şəkli məşkuk xəbər də budur ki barış gətirmək ıçın, Ruslardan yardım istənilib və onlar minnət ilə neçə yüz komando Qırğızıstan`a yollamaq qərarına gəliblər. Ama Qırğızlar la Özbəklər niyə düşüblər bir-birinin canına bəlirsizdir.

Allah xeyr eləsin. Uluslararası və dünyalıq siyasət`də nələr baş verir heç kimsə bilmir! Təkcə bunu bilirik ki Türkləri bir-birinə yaxınlatmaq yolunda çalışan Türkiyə, Ərəblər-İsrayilin savaşının arasına da girəndən sonra, neçə min kilometir oyanda Türk elləri arasında qanlı və çırkın çatışmalar üz verib. Bizim əldən də heç zat gəlmir. Gəlsəydi isə İran da gərgin durumda olan öz anadilimizə bir iş görəbilərdik yoxsa Quzey Azərbaycana yardım edərdik Qarabağı azad eləsin! İndi Təkcə bir İnternet səfhəsində Qırğız qardaşlarımdan istəyirəm bu utandırıcı işlərdən əl çəksinlər. Nədən hər nə olur olsun, qan tökmək və özəlliklə qardaş qanı axdırmaq dan mindar iş yoxdur. Türk ellərin yüksək yerlərə yetişməyindən vaz geçdik! Sadəcə barışın lütfən.

Saturday, June 12, 2010

اوخول‌لاريميزدا آناديليميزين بوش يئري

1- دومان بيلاغي‌نين يازيلارينا گؤره(ديل آدالاري)، تبريز تيليويزيونو قيزاران آيي‌نين اون سكگيزي‌نين ساعات سكگيز  خبرينده دئييب:
"مدرسه‌ی روستای کریم‌خان که به زبان تاتی حرف می‌زنند افتتاح شد!
(تات‌جا قونوشان کریم‌خان کندینین اوخولو آچیلدی!) "
چوخ گؤزل! چوخ ياخشي! خبر دئيه‌نده كاشكي هر‌نه‌يي بئله آيرينتي‌لي دئيه‌لر. آنجاق دومانين يازاري، يوسوف به‌يين ده، من كيمي  مئديا ساري‌سيندان بئله تايسيز "خرق عادتـ"ـلري گؤره‌نده، باشي آغري‌يير كي گؤرسون بو "تات" آزليغي‌نين آزربايجانين اويان بويانيندا گؤره‌نده آيرينتي وئرمك يادينا دوشمه‌يين نه‌دني نه‌دير؛ و سونرا بئله بير آچيقلاما دا آرتيرير:
خبر بیرآز به‌لیرسیز و موبهم‌دیر! ایندی بیلینمیر کی نییه کریم خان کندینین تات اولدوغونا ایشاره اولونوب؟! هم‌ده بیر اوخول آچیلیشی خبرینده!!! یانی اوخول دا تات‌جا‌دا اوخوناجاق‌می یوخسا تات‌جا دا اوخوناجاق‌می؟! اؤیله‌یسه تورک‌لر آراسی تات‌لاری قورویاق، و سونرالارا میللت‌لر آراسی دیل آدالاری بهانه‌سی‌ تورک‌لری آذری‌یه محکوم ائتمه‌یه قالسین!!!

من‌ده شوخلوق اوچون دئييرم آخي هئچ بونلارا مدرسه لازيم دئييل! مدرسه اونوچون‌دور كي توركلره فارسي اؤيره‌ده‌لر! بونلار كي آناديل‌لري فارسجادير. سونرا جيددي اولوب دئييرم تئهران‌ اوستانيندا اون‌لار‌ و بلكه يوزلر تورك كندي واردير! مين‌ايل‌ده دئمزلر: "توركجه قونوشان ساووجبولاغين فيلان كندينين اوخولو آچيلدي".

2- يوخاري دا كي سؤزلره گؤره ايسته‌ييرديم باشقا قونولاري ربط وئريب و بورادا بير داها دومانين سؤزلرينه ايشاره ادم. آنجاق دئييرديم ائله اورادا ياخشي يازيليب داي بير ده سن نه‌ ايسته‌يير‌سن يازاسان؟ گئجه ياري‌سي بو فيكيرلرده ايديم كي شبكه اوچ ده گؤردوم بير اوخول‌دوزه‌لدن خه‌يير كيشي‌يه گؤره دانيشيلير. او "عليپور" آدلي قوجا كيشي اوخوللارين بيري‌سينين آچيليش تؤرنينده گؤردوم اوشاقلارلا توركجه دانيشير. قارداشي ايله دانيشاندا بللي اولدو، "عليپور" يئتميش اوچ دنه مدرسه اردبيل كندلرينده دوزلديب.
يئتميش اوچ دنه! ياني يئتميش اوچ دنه كند ايچين! اؤنجه‌ ائشيتميشديم اردبيل اوستانيندا كي خه‌ييرلر ايران دا رئكورد ووروبلار.  بئله دئمك اولار كي هر يئرده دوؤلت بئيتولمال‌دان خرج ائديب مدرسه دوزه‌تسه، آنجاق آزربايجان‌دا اؤرنك ايچين اردبيلين "ايج‌ويجين" كنديندن "عليپور" كيمي بير آدام چيخيب كي وارلي دير، و تئهران دا تيجارت و بيزينئسه باخير، آنجاق اؤز آنايوردونو اونوتماييب و اورادا مدرسه دوزه‌تمك يولوندا اؤز واريندان باغيشلايير. آجي گئرچك ده بورادا دير كي بو اوخوللارين دوزه‌تمه‌سي‌نين بودجه‌سي خالقين جيبيندن چيخسا دا، خالق ديلينه ده‌يه‌ر وئريلمير و "عليپور"ون اؤزو ايسه بونا گؤره بيلگي‌سي يوخدور. و سانكي بيلمه‌يه-بيلمه‌يه، خالقين بؤيوك آداملارينين پولو، خالق اوشاقلارينين آسيميله اولماغينا خرج اولونور.
و البته بو وئرليشين ياييلماسينين نه‌ده‌ني يازيق "عليپور"ون مريض اولوب و خسته‌خانا تختينده ياتماغي ايدي. سوروملولار اونون تختي‌نين يانيندا صف چكييب و يانيندا يادگاري گؤرونتو ساليرديلار.  و باشقا طرف‌دن اونون دوزه‌تديگي اوخوللار دا اوشاقلار فارسجا دوعا ائديرديلر : "خدايا خدايا عليپور-و نگهدار..." . و نه‌دن او ساغلام اولاندا ايشلريني بؤيوتمه‌ييرديلر؟ نئيه كي بيري تاپيلاردي و اونا كيمليك و وارليق و آناديلينه گؤره بير شئيلر دئيه‌ردي.

من ده دوعا ائديرم عليپور تئزليك ايله شفا تاپسين... آللاه بئله آداملاري چوخ گؤرمه‌سين و البته بونا دا دوعا ائديرم كي عليپور شفا تاپاندان سونرا اؤز اوخوللارينين بيري‌سينده توركجه درسليك‌لرين اؤيره‌ديلمه‌سيني ايسته‌سين. بونون نه‌ده‌نيني آشاغي‌دا اوخوياجاقسينيز. من كيمي يوخسول آداملارين دا كي پولو يوخدور بئله ايشلر گؤرسونلر. دئمه‌لي آللاه تانيديغي ائششه‌گه بوينوز وئرمه‌ييب...

3- اوخودوغونوز كيمي چوخلو خه‌يير آدملار وارديلار كي خالقي سئومك ايچين و تانري يولوندا اؤز وارلاريندان گئچيرلر، آنجاق بيري تاپيلمير اونلارا دئسين كي حواسينيز اولسون بو اوخوللاردا اوشاقلارين آناديلي ده اؤيره‌نيلسين. دؤولت كي بودجه وئرمير! آنجاق آناياسانين اون بئشينجي اصلينه گؤره:

استفاده‏ از زبانهاي‏ محلي‏ و قومي‏ در مطبوعات‏ و رسانه‏ هاي‏ گروهي‏ و تدريس‏ ادبيات‏ آنها در مدارس‏، در كنار زبان‏ فارسي‏ آزاد است‏(يئرلي و ائتنيك ديللرين، يايين و قروپ مئديالار دا ايشه آپاريلماغي، و ادبياتلارينين تدريسي، اوخوللار دا فارس ديلي يانيندا آزاد دير.).
آما بو خبره باخين: "ممنوعیت تدریس یک درس به دو زبان تصویب شد (بير درسي ايكي ديله اؤيرتمه‌يين ياساقلانماغي تصويب اولوندو)"!
سانكي "عليپور"و تيلويزيون‌دا گؤسته‌رنده، شوونيستلر بيزيم فيكريميزي ده اوخويوبلار! آناياسا ايله اوست-اوسته گلمه‌يه‌ن بير "مصوبه" گئچيريليب. تصويب اولونوب كي بير درسين ايكي ديلده اؤيره‌ديلمه‌سي ياساق دير!! بو مصوبه‌يه كيمين گوج ايله تاكيد ائله‌ييب، بارماق باسماغي‌دا چوخ عجيب و اؤنملي‌دير. "سازمان مدارس غير دولتي و توسعه مشاركت‌هاي مردمي(غئيردولتي اوخوللارو خالق پايلاشمالار قالديرماسي قورومو)"نين سوروملوسو بونو دئييب. اولابيلر اونون منظورو تئهرانين يوخاري بؤلمه‌لرينده‌كي اوخوللاردا اينگيليس‌جه رياضي اؤيره‌تمك‌دير. آنجاق اونون سؤزو تئهران‌دان چوخ، اوستانلار و بؤلگه‌لره گؤره دير. او اوستانلارا دانيشير آنجاق هله بونو بيلمير كي آزربايجان‌دا آناديلي فارسجا دئييل و اؤيرتمنلر فيزيك، رياضي و شيمي‌ني توركجه‌ني قيراغا قويسالار نه دانيشابيلرلر و نه اؤيره‌ده‌بيلرلر و نه اوشاقلار قانارلار!! او بونو دا آرتيريب كي: "اون بئشينجي اصل بير درسي ايكي ديله اؤيره‌تمه‌يي ياساقلاييب، چونكو (بو ايشين) ايرانين كولتورو و كولتورل ميراثي ايله موغاييرتي وار."!! و گونش ايشيغي آلتيندا بئله اوزو سوسوزلوق و منطيق سيزليك ايله دانيشماق چوخ حياسيزليق ايستير.
و چوخ عجيب‌دير كي "عليپور" كيمي آداملارين دوزه‌تديگي اوخوللار دا ايسه "آناديلي" تدريس اولماغينا قاداغا قويولور، حالبوكي "عليپور" كيمي آداملارين "آناديلي" فيكرينده اولماق خبري ال‌ده يوخدور. بونو دئمك اولار خالقين اويانماق سوره‌جي شوونيسمي قورخودوب و قانون آدي ايله ايندي‌دن خالقين اؤز آناديلي‌نين فيكرينده اولماق قارشي‌سي‌ني انگل‌له‌مك ايسته‌ييرلر.

ياشاسين بافانا بافانا

گونئي آفريقا دا كي اويونلارا تاماشا ائله‌مك بير آز چتين‌دير! چونكو ايستاديوم‌دان تكجه زورنا يا وو-ووزئلا آدلي يئرلي شئيپورلارين سسي‌دير كي گلير؛ آدام لاپ دنگ اولور. آنجاق من بو سسه عادت ائله‌يبب و اونو سئويرم. بو فيل سسينه اوخشايان گورولتولر من ايچين باشقا معناسي وار:

"دوزدور كي ايگيرمي ايله ياخين‌دير آپارتايدي آرادان قالديريبلار، آنجاق اونلار بو سس ايله دونيا دا بوتون آپارتايدلاري دنگ ائتمك، و باشقا آپارتايد آلتيندا يوخودا قالانلاري اوياتماق ايسته‌ييرلر... يوخودا قالان اولماسا دا، بونلار بير دايانيشما سسي‌دير آپارتايد قارشي‌سيندا موباريزه آپارانلارا. آفريقالي‌لار اؤز ديللرينده دانيشميرلار و سانكي تكجه وو-ووزئلايا پوفله‌ييرلر."

من بوندان اؤنجه‌ده بئله سسلري سئويرديم! تيراختورچولارين "ياشاسين آذربايجان" و "تورك ديلينده مدرسه" دئمك‌لري بير سايي‌ني دنگ ائله‌ميشدي. اونلار بو سسين ده قولاقلارا يئتيشمه‌يي‌نين قاباغي‌ني كسيرديلر.

اومودوم وار گونئي آفريقا ييغماسي يوخاري آشامالارا يول تاپسين.

Wednesday, June 9, 2010

ائورنسل يازماق

"داش‌ قاپي" بيلاغي‌نين "گؤر بيري بيزه باخير" يازي‌سي‌ني يولداشلارين بيري‌سي قوقول‌ريدئر ده پايلاشميش‌ايدي:
... یازیلاریمیز ائورنسل اولمالی‌دیرلار... بیز گرک یازیلاریمیزی ائله یازاق کی اونلار آلا بیلسینلر، آلانماسالار بیز بوشونا یازمیشیق دئیه‌سن! لوکال یازمیشیق!...
پايلاشمانين آلتيندا، من و پايلاشان يولداشين آراسيندا، بو قيسا دانيشيق‌دا اولدو:

من : "هله بيزيم يازيلاريميزي اؤز خالقيميز اوخويابيلمير، باشقا خالقلار پئشكئش!".

او: " اولوسوموزدا سوچ یوخ. بیر اولوس کی 80 ایلدیر اوز آنا دیلینده یازیب اوخوماقا یاساق اولوب سوچلاماق اولماز!"

و من: "منيم منظوروم سوچلاماق دئييلدي و سيز حاقلي‌سينيز. تكجه منظوروم بو ايدي بير خالقين ادبياتي  بير زامان ائورنسل و قلوبال اولابيلر كي ميليونلار يازارين ايچينده مينلر يئتنكلي تاپيلا؛ بو مين‌لر يئتنكلي آدامين‌دا ايچينده بئش-اون نفر نابيغه يازاردا دونياليق اولارلار؛ توركيه‌نين ناظيم حيكمت و اورهان پاموكو كيمي.
بونو ايدمان و فوتبول ايله موقايسه ائتمك اولار. سانكي فوتبول اويونچوسو بئجه‌رتمه‌يه‌ن بير اولوس‌دا، 11 نفره زور ايله دئيه‌رلر سيز برازيل تاخيمي‌ني، يوزمين برازيل‌لي يانداشين قارشي‌سيندا اوتمالي‌سي‌نيز! بئله بير ايشين ايمكاني يوخدور و بيز ايندي  خالقيميزي ساده يازي‌لار ايله اوياتمالي‌ييق. يولداشلاريميزا دئمه‌لي‌ييك، توركجه‌ده يازيب اوخويوب اولماق‌دا اولار. بيرينجي صينيف‌دا كي اوشاقلار عيرفاني شئعر يازسالار، گولمه‌لي قوشمالار چيخار. البته بونو دا دانماق اولماز كي ايستيثنا دا تاپيلار و گوجلو و دونياليق يازماغين‌دا سيرري يازارين سيخينتي‌دا اولماماغي‌دير. آنجاق ايستيثنالار هر زامان تاپيلمازلار!".

Tuesday, June 8, 2010

گيزلي آرا

سايين يولداشيميز يوسوف به‌يين بير سورغوسو واردير:
"بو یاریم فاصیله نی نه جور قوللانیرسیز؟"
 يوسوفون دئديگي "ياريم فاصيله" يا "گيزلي آرا" يا "گؤرونمز آراليغين" نه اولدوغونو آنلاتماق ايچين، ائله اونون اؤز سؤزونده "گيزلي آرا قويوب و بير ده يازيرام:
"بو ياريم فاصيله‌ني نه‌جور قوللانيرسيز؟"

بو "گيزلي آرا" ايسلام يا عرب اليفباسيندا اولان توركجه يازيلاردا اولمايان‌دا من كي دوزگون و روان اوخويابيلميرم. منجه بئله آرانين وئرمه‌يي چوخ لازيم‌دير. البته اصلي نه‌دن ايسه تئكنولوژيك دير و ويندوز دا بو ايشي گؤرمك چوخ قولاي اولسادا ، چوخلار اونلا تانيش دئييللر. بو "گيزلي آرانين" وئرمه‌يي اوچ يولو واردير:

1- بعضي ويندوز 2000 يا xp لاردا "فارسي‌ساز" نصب اولوب، "گيزلي آرا" وئرمك ايچين "shif"ـي توتون، سونرا "space bar" وورون!

2- آما چوخلو ويندوزلاردا بو ايمكان يوخدور، "Microsoft Office Word" دا يازيلارينيزي يازين و اورادا گيزلي فاصيله وئرين. اورادا يازاندا "ctrl"ي ساخلاييب و "-" (دش يا خط تيره) تايپ ائله‌سينيز، "گيزلي آرا" وئريله‌جك.

3- آنجاق من فيكر ائليرم ايكينجي ايش‌ چتين‌دير، و اينتئرنت سايتلاردا گزيب دولاناندا حوصله ايسته‌يير هاي گئده‌سن مايكروسافت ووردا، اورادا يازيب كوپي ائله‌يه‌سن! منجه گئدين بورادان بو بالاجا يازيليمي(software) يوكله‌يين. نصب و اينستول ايسه ايسته‌مير. اونون "شورت‌كاتين" قويون "ايستارت آپا". بئله ليك هر زامان بيلگي‌سايارينيزي روشن ائله‌سينيز، او دا ايجرا اولاجاق. و بيرينجي بؤلمه‌ده بوتون پروقرام‌لار دا "Shift + Space bar" سيز ايچين "گيزلي آرا"لار ياراداجاق.

يوسوف به‌ي اؤز يوروموندا باشقا بير ايسته‌يي ده واردير. دئيير: "کئشکه پوستلارینیزا «ی.س.*» آرتیراندا بیر یئنی پوست بوراخیب و اونو دییه‌سینيز". من ده گؤز اوست‌ده دئمك‌دن سونرا باشقا سؤز دئيه‌بيلمه‌رم!


* - "ي.س." : يازيدان سونرا يا يايماق‌دان سونرا؛ فارس بيلاقلاردا پ.ن. دئييرلر


Sunday, June 6, 2010

ياشاسين بير داها توركلشديرن تيراختور

تيراختورون "نقل و انتقالات" سوره‌جيندن چوخ سؤزلر گئدير و بير سايي راضي دئييللر. بونو گؤزله‌ييرلر كي تيراختور آدليم و باهالي اويونچولار آلسين. آنجاق منجه تيراختورا آدلار اويناماياجاقلار. پول اوچون گلن اويونچو چتين‌ليك ايله ميليونلار آذربايجانلي‌نين دويغوسونو دوشونه‌جكلر، و البته پول گؤره چوخلو اولدوزلار الدن گئديبلر و اولابيلر تقصير زامان‌دا اولوب.

آنجاق بو گون ايكي اويونچونون آذربايجانين فوتبول‌دان دا استون كلوبونا قوشولماغي‌دا پول و فوتبول دان اوستون ايدي. بو تيراختورا قوشولماق‌لار وارليق و كيمليك قوخوسو وئرير. من چوخ اومودلنديم. يوزه يوز دئديكلري دوغرو اولماسا دا آنجاق بونا اينانيرام ائل گوجو بونلاري، بؤيوك اولدوزلارا دؤنده‌ره‌جك. بو ده‌يه‌رلي و اؤنملي سؤزلري هادي اصغري آدلي اويونچو دئييب؛ پاس ييغماسينين اويونچوسو ايدي:

مالي چتين‌ليك‌لر كي هر يئر ده وارديلار. من تيراختور اوچون آغ قرارداد ايمضالاييرام. تيراختورون پولو اولانا قدر، قاباق‌جا‌ پول آلميرام.
من چوخ ايسته‌ييرم تيراختور اوچون اوينايام و بير دفه ده اولورسا، اؤ‍ تورپاغيما بورجومو اؤده‌يه‌م.

بير دؤنه ده قويون پولسوز يوردوما اويناييم، هر نه كي پول دئييل (آذربايجان اسپورت).

تيراختورون باشقا يئني اويونچوسو، مرتضي اسدي، مصطفي اكرامي كيمي تئهران دا بؤيوموش توركلردن دير و اؤز دئديگي كيمي كؤكو "قهرمان بئجه‌ردن" اردبيل‌دن دير. بو "صبا" تاخيمي‌نين كاپيتاني ايدي، آنجاق گئچن ايل تبريزده مينلر تيراختورچونو گؤره‌ندن سونرا، تيراختورا قوشولماق آرزوسوندا ايميش(آذربايجان اسپورت)، يوخسا مرتضي اسدي ايسه، داها وارلي كلوبلارا گئده‌بيلرميش.

هادي اصغري، مرتضي اسدي، و البته تيراختورا ان بؤيوك باشاريلار ديله‌ييريك.

ي. س(يايماقدان سونرا):

دئيه‌سن تيراختور كلوبو "هادي اصغري" ايله ايليشگي قورماق خبري‌ني تكذيب ائله‌ييب. و بئله اولسا منيم ده بو يازيمين سؤزلري ‌نين ياري‌سي بوشا چيخير. البته من ده ايسه تقصير يوخدور و اويان بويان دا اوخودوم. بونلاري گؤز اؤنونه آلاراق اوچ سؤز دئمه‌لي‌يه‌م:

1- خبر شايعه اولماسا و گئرچك اولسا كي منيم سؤزلريم يئرينده دير!

2- فارسلار دئميشكن "تا نباشد چيزكي مردم نگويند چيزها"؛ منجه بئله سؤزلر آرادا واردير و آذربايجانلي‌لار ايسه بئله اولايلاري ياخشي قارشي‌لاييرلار. هر حال‌دا هادي اصغري‌نين خبري يالان اولورسا، بير شئي الدن وئرمه‌ميشيك؛ چونكو ال‌دن وئرميشلريميزي چوخ‌دان دير ال‌دن وئرميشيك! و بيزيم  چاليشديغميزين اصلي هدفي الدن وئرميشلريميزي اله گتيرمك دير! يوخسا تورك اويونچولارين چوخوندا بئله دوشونجه اولسايدي كي نه من بوردا يازارديم و نه سيز بونلاري اوخوياردينيز و من ده باسا-باسا "گؤستريش فولاد" كيمي بير آدسيز فوتبول ييغماسينا گؤره تئهران‌دان تبريزه ساري يولا دوشمزديم و تئهران‌دا دا لات-لوت قارشي‌سيندا "ياشاسين آذربايجان" سسله‌نيب و "...ــدير ، و گؤي ائششك" ياماني ائشيتمزديم! هله بونلاردان ساواي، اؤز آراميزدا قالسين، اؤزوموزو قوياق بير ياخشي فوتبول اويونچوسو يئرينه. اؤرنك ايچين هر اينسان، اردبيل‌لي "كريم انصاري‌فرد"ين يئرينده اولسايدي، "بئش يوز ميليون تومن" قارشي‌سيندا باشقا ده‌يه‌رلري اونوداردي. البته من دئميرم او اونودوب، ولي كسينليكله بئله زامانلار آدام ايچين "كيمليك" مساله‌سي‌نين رنگي آزالير. تعاروفوموز كي يوخدور! بو قالسين كي بيزيم چوخوموز بير تيكه چؤرك ايچين هر نه‌يي اونودوروق.

3- قالدي تيراختور خبرلري‌نين رسمي قايناق(منبع) مساله‌سي! ميليونلار تيراختورچو اولان يئرده هله‌ده "تيراختور كلوبو" بللي دئييل رسمي سايتي هانسي‌دير! ناصير شفق گئچن هفته دئدي فيلان سايت(تراكتورسازي اف سي دات كام) بيزيم گئرچك خبرلري ياياجاق؛ تيراختورو دا بيري tractor يازير، بيري tiraxtur  دئيير، ... و خولاصه يوز جوره ايملاسي وار! شفق دن ايستيريك ديل دوداقلاريني دولاشديرماق يئرينه تيراختورون رسمي سايتينا دا بير فيكر ائله‌سين.

Thursday, June 3, 2010

كيمه ائل قهرماني دئمك اولار؟

بير آذربايجانلي اولاراق، هانسي آذربايجانلي قهرمانين داورانيشلاريني داها آرتيق ده‌يه‌رلنديريب و اونا داها چوخ افتخار ائديرسينيز؟ سیزین نظرینیزه، "خالق قهرمانی" لقبی هانسی قهرمانا اویغون اولابیلر؟


- هادي ساعي:
بو قهرمان اؤز ميداللاريني آذربايجانلیلارا تقديم ائله ييب، تئهرانين شهر شوراسي اويه سي دير و اؤز كيمليگي ني اونوتماماق اؤرنه يي نين بيري اؤز اوغلونون آدي ني "تايماز" قويماق دير.

- رسول خطيبي:
رسول خطيبي اون ايله ياخين اصفهان تاخيملاري، و نئچه دؤنه ده ميللي ییغماسیندا باشاري ايله اويناميشدير. آنجاق بو ايل "گسترش فولاد" تاخيميندا چوخلو غئيرت ايله اويناييب و پولاتچيلارين فينالا يول تاپماسيندا ان چوخ نقشي اولوب. بو گونلر اونون پئرسپوليسه گئتمك شاييعه سيني ديللره ساليبلار؛ آما رسولون قاباغيندا بؤيوك بير تاريخي فورصت واردير. او تيراختورا قوشولوب و اونو قهرمانليق يولوندا يارديم ائتسه، افتخار يوخ، بلكي آذربايجانين اساطيريندن ساييلاجاق.

مصطفي اكرامي:
تيراختورون بو گنج اويونچوسو، تئهراندا آنادان اولوب و اورادا بؤيوموشدور، آنجاق بو ايل تيراختورون پارلاق اولدوزلاريندان ايدي. او هادي ساعي كيمي دير و اؤزونو ايتيرمه ميشدير.

- كريم باقري:
تيراختورون تؤره‌تديگي سوئپر ايستاری تانيتديرماق لازيم دئييل! بوتون افتخارلارا ال تاپميشدير؛ آنجاق حذفي فينالدان سونرا چوخلو سئوينمه يينه گؤره بير آز محبوبيتي ني الدن وئردي. پئشه كارليق سككه سينين او بيري سي اوزو، قديم كي يانداشلار قاباغيندا نئجه داورانماق دير.

- علي دايي:
دايي ني دا تانيتديرماق لازيم دئييل! دونياليق سوئپر ايستار دیر؛ بوتون افتخارلارا ال تاپميشدير، آنجاق حذفي كاپ اويونلارينين فيناليندا كي داورانيشلاري توركلر آراسيندا ياخشي قارشيلانمادي. تبريز ده توركلره "نئجه آذربايجانلي اولماق" اؤيره دن علي دايي، تئهران دا اؤز ييغماسي نين يانداشلاري توركلره اهانت ائدن ده، هئچ اعتراض ائتمه دي.

- حسين رضازاده:
دونياليق قهرمانليقلاردان باشقا، ایکی اولیمپیاد قیزیل میدالی دا قازانميشدير. دونيانين آغيردان چوخ چكيم ده كي رئكوردونو هله ده الينده ساخلاييب؛ آنجاق دئييلير باشقا اردبيللي يئته نكلي گنج هالتئرچي، سعيد علي حسيني‌نين باشاري‌سي قارشی سیندا انگل ياراتميشدير.

*****

يوخاري دا آدلاري گلميش آدليم قهرمانلاری، بو فورم دا اولدوز وئرمك ايله ه‌ده‌يه‌رلنديرین. فورم دا بو آچيقلامادا وئريلميش كي: «بو ايدمانچيلار هر حالت‌ده آذربايجانلي‌لارين افتخارلاري ساييليرلار. آما بو باخيش‌ييغما(نظرسنجي)نين منظورو، ايندي‌كي چاغ‌دا قهرمانلارين خالق آراسيندا محبوبيتلري‌نين آزاليب چوخالماغي‌ني گؤرمك‌دير».

منجه بئله سونوجلار خارجي‌لر دئميشكن بير جوره "فيدبك" ‌اولابيلرلر. قهرمانلار بيلسه‌لر خالقين نظري اونلارا گؤره نه دير، كسينليك ايله اؤز داورانيشلاريندا آرتيق‌راق ديققت ائده‌رلر. ايلكين سونوجلاري دا بورادا گؤره بيلرسينيز.


ي. س: 
يازي‌ني به‌زه‌مك ايچين ايسته‌ييرديم بير گؤرونتو آختاريرديم. سككيز ايل بوندان اؤنجه "مئهران رزق‌ده(بيلي‌يورد يولداشيم)"ين دان‌اولدوزو‌ ايچين يازديغي مقاله‌يه قويدوغوموز گؤرونتو ياديما دوشدو، و بير دفه‌ده اونون "آذربايجان فوتبولو هارايا گئدير (فوتبال آذربايجان به كجا مي رود؟)" اؤرك سؤزونو اوخودوم. بو شوعار من‌ده بير دراماتيك و نوستالژيك بير احساس ياراتدي:

كريم سن الله بيزه بير دانس ائله!
ايستوپ ائله‌ييب، توپو دا سانتر ائله!

و چون دونيا يالان دونيا دي، كريم چوخدان دير هم دانسلاريني و هم ده سانترلاريني بيزدن اسيرگه‌ميش!

Tuesday, June 1, 2010

اردبيل كي آذربايجان دئييل؛ بيزه نه؟

خبرلره گؤره، اردبيل بيلي يوردوندا "آران و آذربايجان" آدلي بير توپلانتي قورولموشدور.

آديندان بللي دير نه‌ قونولار و نه آراشديرمالارا(!) گؤره دانيشيلميشدير. بونا گؤره هئچ زاد يازميرام. آنجاق سؤز بوردا دير كي اردبيل اوستانينا نه دخلي وار بئله قونولار!؟ بيزيم اون سككيز ايلليك اعتراضلاريميزا كي قولاق يوموبسونوز و آذربايجان آديني اونا قايتارغا هئچ ده ماراق گؤسترمه‌ييرسنيز. بو بوندان. ياني سيز دئييرسينيز يوخاري‌لاردان بويورولدوغو كيمي، نه بيزه آذربايجانلي، و نه ايسه تورپاغيميزا آذربايجان دئمك اولماز، و بير گئجه ده توركلوك دن چيخميشيق. بو آذربايجان سورونوندان؛ قالدي آران مساله‌سي.  سيز كي گونده بير قوندارما آد قويماغا جان سينيز! خيالينيز راحات اولماق ايچين يالله ! اردبيل اوستاني‌نين آديني ده‌ييشين آران ائله‌يين! هئچ ده معطل اولمايين.

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı