Thursday, July 26, 2007

آدين اسنده

بير آز خورافات گيريب بئينيمه؛ دئديم ايشدير، ژولاي آيي‫نين سونوناجاق باشقا پوست قويابيلمه‫رم!! بو آيين پوستلاري 13 ساييسيندا قالماسين دئيه، آيدين فيرنگي نين شورابيل گؤلونده فارسجا سؤيله ديگي دويغولاري اؤز توركجه‫ميزه چئويريم! بو چئويرمه‫ني خوشلاماسا اؤزو دئسين؛ چونكو سون ايكي سطيري ياخشي دوشونمه‫ديم و البته بورانين ايكيندي چاغينين ايستي چاغيندا، اردبيل ناهاردان سونراسيني تصوور ائتمك چوخ چتيندير(!):

آدين اسنده...

آدين بئينيم‫ده اسير
هئچ گون اسمكدن اسيرگه‫مه‫يه‫ن،
اردبيلين ايكيندي يئللري كيمي
آدينين اسمه‫يي،
سولاردان آلير دينجليغي‫ني
شورابيل ده،
اطراف دا كي سولاري سه‫په‫لنديرن بالاجا پئداللي قاييق كيمي
و سو اورتاسيندا، پئداللارينين سسي بوتون سسلري باتيرير.
غاليب سس، سنين‫دير
كي باخيشيني ، اؤز اوشاغينا چئويرير و سن منيم باخيشيمدا چوخاليرسان.

ائله‫بيل گئجه‫لر ظولم آزالير!

اون-اون بئش گون بوندان اؤنجه، كانال بيرين گئجه ياريسيندا ائكرانا گئدن «گئجه آق آلما'سي(آلماس يوخ آلما؛ تورك ديلينين ضعفلرينين بيريسي! سيب سفيد شب)» جانلي وئرليشينده ايكي دنه گؤرمه‫لي چيخيش گؤردوم. او زامان ايسته‫ييرديم بونا گؤره بير شئي يازام، ولي مئهران باهارلي‫نين يازي‫سي(ظلم مثلث) مني ائتگيلنديردي! بئله سانديم گئجه ياري‫سي خالقين ياري‫سيندان چوخو ياتان چاغ، اللريندن چيخيب! آنجاق دونن گئجه گؤردوم بو وئرليش ده آشيق اليندن يئر يوخدور! ائله‫بيل گئجه‫لر اوچ بوجاقلي ظولمون بير بوجاغي آرادان گئدير.
قاييديرام اون-اون بئش گون بوندان قاباق گؤردويوم ايكي گؤرمه‫لي چيخيشا:
بيريسينده اردبيللي كؤكنلي، آنجاق تئهراندا دوغولوب و بؤيوموش بير گنج اوخوجو گليب توركجه اوخودو. آپاريجي اونون باخيشي‫ني، اينسانلارين اؤز كيمليك و كولتورلريني قوروما گركليگينه گؤره ايسته‫يه‫نده، بير سؤزلر دئدي كي ايلك دؤنه ايدي ايرانين باشاباشيندا ياييلان دؤولتي كاناليندا ائشيديردم! بير-ايكي بئيت معروف شئعري دئدي كي آراز و كور چايلارين بيربيرلرينه قوشولماق و سوندا خزر دنيزينه تؤكولمه‫يي ني دئيير(ايندي اونودموشام او شئعري!) و دئديگي ايكينجي شئعر ده، بو ايدي:

منيم ديليم اؤلن دئييل
باشقا ديله دؤنن دئييل

تعججوب ايله بو كانالين آرمينا بير ده باخديم گؤرم ايران كانالي‫دير يا يوخ!؟ آمما يوخو-موخو گؤرموردوم! ايكينجي چيخيش دا ، فارس اوزمانجي نجفي، فارس اوزمانجلاري داوود رشيدي و اونون خانيمي‫نين قارشي‫سيندا «آپاردي سئللر ساراني» خالق ماهني‫سي‫ني اوخودو! البته او سئللر يوخ بلكه سيللر دئييردي! من ده يوخو گؤزومدن قاچدي، موبايلي‫مي گؤتوروب تيلويزيون صفحه‫سيندن فيلمي‫ني چكديم! 3gp فايللارينا باخابيلسينيز بورادان ويدئوسونا باخابيلرسينيز؛ كئيفييتي‫نين تعريفي يوخدور ، آنجاق گؤرمه يينه ده‫يه‫ر:

Wednesday, July 25, 2007

سامي يوسوف بو تايا دا گله‫جك

موبارك دير!
حيات سايتي نين سؤزونه گؤره، نئچه آيدان سونرا فيطير بايراميندا ايرانا گلمك گؤنلونده اولان، سامي يوسوف عرب دير!
بيلميرم بو سامي به‫ي ايسكندرييه‫نين نه‫ييندن خوشو گليب گئديب ميصر اؤلكه‫سنيده ياشايير! كي بونلار دا دئسينلر آذربايجانلي كؤكنلي و اينگيلستان دا بؤيوموش اوخوجونو عرب تانيسينلار!
سامي يوسوف اينگليسجه، عربجه و ايستانبول توركجه‫سينده ياخشي و گؤزل اوخوماقلاري وار ايدي؛ بير ايكي ايل بوندان اؤنجه اونون آديني و آذربايجانليغي‫ني ائشيدندن سونرا غورورلو اولوب، من ده گئديب اونون سايتيندا يازديم: «سن كي توركجه بيليرسن، نه اولار آذربايجان توركجه سينده ايسه اوخويوسان». البته اونون سايتيندا يوزلر اولوسلار آراسي قوناق يوروم آتميشديلار و من دئديم بير يوروم ايدي يازديم دا! ساويمي بير جوره بيلديرديم.
نئچه آي بوندان اؤنجه ائشيتديم سامي گئديب باكي دا كانسئرت وئريب؛ سئوينديريجي ايدي. دئييرديم كئشگه آذربايجانجا دا اوخوسون و نه قدر سئوينديم كي اونون دويغولو آيريليق اوخوماغي‫ني گؤردوم:

Sami Yusuf Azerbaycan Turkcesinde oxuyur: AYRILIQ
48Kbps, 1.75MB


داها ياخشي كيفييت ايله باخماق ايسته سينيز بورا باخين:

Tuesday, July 24, 2007

قونشونون سئچيمي و بيز

ساچدان اينجه بير ايپ اوستونده يئريريز؛ چونكو هر شئي‫يه گؤره راحاتچيليغلا دانيشماق اولمور! بؤلوجولوك، دينسيزليك، ساتقينليق و ... كيمي ايفتيرالار هر يئردن آداما ساري گله بيلر؛ آنجاق بير سؤزون اولا و اونو دئمه يه سن و يا دئيه بيلمه يه سن، (...)ــت مرضي كيمي دير سانكي!! آنجاق شوخولوق گؤتورمه يه ن كئيهان گونده ليگي توركييه نين سئچيمينه گؤره اؤز نظرلرين آچيقلاياندا، بيز نئيه باخيشي ميزي يازماياق؟! البته بوگونكو يازيم، بئش ايل بوندان اؤنجه يازديغيم كيمي، آتاتوركو حتي ظاهير ده ايسه اؤلدورمه يه جك؛ چونكو او چاغ توركييه دن چوخ بيلگيم يوخ ايدي و گويا كيمي سايتلار توركلردن آجيغلاري اولدوقلاري ايچين منيم يازيمي يايديلار؛ چونكو آتاتوركدن توركلويونه گؤره زهله‫لري گئديري؛ لاييك اولدوغونا گؤره يوخ! كئيهانين باخيشيندا يوز ده قيرخ آلتي، يوز ده اللي دؤرد دن بؤيوك اولماسا دا، آك پارتي كسينليكله قازانيب دير و باشقا طرفدن، توركييه نين لاييكلري اوچ آي بوندان اؤنجه لاييكليك حيمايتينده ائتديكلري گؤستريلر بير آز سورغو آلتينا گئديب! و بورادا اؤز باخيشيمدا عدالت و قالديرما حيزبي و يا آك پارتي‫نين سس آلماق نه‫دنلريني يازاجايام و بو دليللر دن سونرا، ايرانين گله‫جك مجليس سئچيمينه‫ده ايشاره اولوناجاق:

1- اردوغان و اونون يولداشلاري، ظاهيرده و يا باطين‫ده لاييسمه اعتقادلاري اولسادا، ايسلام و اونون ده‫يه‫رلريني اؤز داورانيشلارندا، عمل‫ده ايشه آپاريرلار و بو بئش ايل بوندان اؤنجه قازانديقلاري سسلرين باعيثي‫دير؛ يقين كي همن آداملار بو دؤنه ده سسلري بئله ايدي.
2- آك پارتي بو بئش ايل ده، ائكونوميك(ايقتيصادي) ايشلر و اولوسلارآراسي تيجارت ده چوخ باشاريلي اولوب، تورمو آشاغي گتيرمك ايله، توركييه‫نين گئنل و توپلومسال ريفاهيني يوكسلديبدير و بو سسلرين آرتيميندا چوخ ائتگي‫لي اولوبدور.
3- توركييه ده گئچميش چاغلارين يازيق و محروم آداملاري اؤزلليكله چوخ سايي‫لي اولان علويلر توپلومو، اينانج اؤزگورلوگونه ال تاپيبلار و بو اونلارين آرخايينليغيني آك پارتي‫يه چوخالديبدير و سونوج بئله اولوب كي اونلارين قاتيليمي سئچيم ده چوخاليب و سسلري ايسه كيملره ساري گئديب بللي دير.
4- آك پارتي يا آرخايين‫ليغين چوخالماسي، تورك علويلر كيمي، تورك اولمايان كوردلر ايچين ده اولموشدور و بو باعيث اولوب كي كوردلر ، بو ايللر ده ايش اوستونده اولان دؤولتين محروم بؤلگه‫لره آرتيقراق باخماسينا گؤره، اؤز كورد و باغيمسيز آدايلاريندان چوخ اؤي(راي) وئرسينلر. بو دؤنه توركييه‫ده ياشايان كوردلر، اؤزگورلوك ايله باغيمسيز آدايلاري‫ني كوردلرين حاقلاريندان ديفاع ائتمك ايچين مجليسه يوللاييبلار؛ چوخ عجيب و تايسيز ايش بودور كي بونلارين بير سايي‫سي بؤلوجولوك و تئروريستلرلردن حيمايت ائتمك سوچونا گؤره ، ايللر بويو توركيينه نين دوستاقلاريندا قاليبلار و ايندي ايسه ميللت وكيلي آدي ايله ايسته‫ييرلر ياسا و قانون بيچمك‫ ايچين توركييه‫نين ان اؤنملي يئرينه گئتسينلر؛ منيم كي پاخيلليغيم گلير بئله بير دئموكراسي‫يا!

بونلار دئيه‫بيلديگيم ان اؤنملي دليل‫لر ايديلر و كسينليكله بو آرادا هئچ كيمسه مات اولماييب! ياني دئموكراسي يا ساري گئدن توپلوم دا، هئچ كيم مات اولماز و توپلومسال تصميم هئچ كيمسه‫يه ضرر يئتيرمز. بو سؤزلري يازماقدان ايران ايچين بير اؤرنك گتيرمك قصدي واريم ايدي.
ايران دا بئش-آلتي آيدان سونرا بير سئچيم واردير؛ لوطفن سؤزومه «ياخشي ايسته‫مك باخارليغي(نظارت استصوابي)» سؤزجوكلريني اورتايا آتمايين لوطفن! دوزدور كي ايران دا كي توركلرين مدني حركتي ايلك گونلردن مدني اولاراق، هميشه باريش يولونو سئچميشدير و توركييه كوردلري كيمي هئچ زامان باشقا يانليش يوللارا ساري گئتمه‫ييبلر و هئچ زامان دا گئتمه‫يه‫جكلر، آنجاق ايرانين سئچيم سيستئمي، يقين كي تورك ميللتچيلري، آداي عونواني ايله قبول ائتمه‫يه‫جكدير و يازيقلار اولسون كي بونلار هامي‫سي يانميش مؤهره ديرلر؛ آنجاق اعلمي كيمي ميللت وكيلي بير دنه يوخ، بلكي اون، ايگيرمي و ... نفر اولابيلرلر. سيز ده بيليرسينيز بئله آداملار توركلرين مدني و كولتورل حركتلرينه نه قدر يارديم اولابيلرلر. ايندي بو بيزيم گؤره‫ودير كي دوز سيياست ايله دئديگيم كيمي يئتنكلي قاباغا وئره‫لر.

Saturday, July 21, 2007

گيزلين آلتينلار

Sava, Məzdəqan(Məzəlqan), Mərəğey; Həkim Tilimxanın 4cü Qurultayı, Yay 1386
سايين سييامك دئييردي گئچميش يازي‫نين آديني، «يئتنكلي الدن گئتميشلر»ين يئرينه، «الدن گئتميش يئتنكليلر» قويمالي ايدين! دوز دئييردي ، چونكو بو ياخشي و ياراشيقلي بير تركيب ايدي! آنجاق كئچل حسن ايله حسن كئچلين نه فرقلري واردير! الدن وئرديكلريميزي الدن وئرميشيك و بير داها اله گتيرمه‫يه اومود يوخدور! ولي دونن، ساوانين تيليم خانين دوغوم يوردوندا، توركلرينين بيري‫سي كدر ايله «بيز اؤزوموزو سيزدن بيليريز، آنجاق سيز بيزلري اوگئي بيليردينيز» دئيه‫نده، اينانديم كي الدن گئتميشلرين اؤزلري، ايستر-ايسته‫مز اولوسون قوجاغينا قاييداجاقلار؛ سانكي آذربايجانليلار اوگئي بيلسينلر بو ديلداشلاري و بونلارين آشيقلاري قوپوز، بالابان و تورك ديلي‫ني ساخلاماق دا عورضه و غئيرت گؤستريب، آنجاق اوخوماقلاري فارسلارين دشتي اوخوماغينا اوخشاسين!

تيليم خانين دؤردونجو قورولتاييندا دانيشماقدان ياساق اولموش، سايين بايات شوخلوقلا دئييردي، ائله‫بيل سنين ديلين قلمينه چكمه‫ييب! سييامك به‫ي ده دئدي يوخ؛ آيدين ايندي هر نه‫يي سئيو(save) ائدير سونرا بو گونون اولايلاريني يازاجاق! من ده مرغئي كندينين انيش-يوققوشلاري و توز-تورپاغينا گؤره يورولوب نفسيم كسيلمه‫ميشدير؛ بلكه بو كندلي‫لرين تايسيز يورد و اؤز كولتورلريني سئومك دويغولاريندان شاشقين قاليب و هر نه‫يه يالنيز باخيرديم. من ده سييامكه دئمه‫ديم كي منيم حافيظه‫م يارديم ائده‫بيلمه‫يه‫جك؛ تانري موبايلـلاردا گؤرونتو چكمك تئكنولوژي‫سيني چيخاردانلاري قوروسون! بو گؤرونتولر ايله دونني خاطيرلاييرام:

1- ساعات 9 دا يولا دوشموشدوك؛ حئييفلر اولسون گئج يولا دوشدوك و مسجيد ده كي تؤره‫ني الدن وئره‫جه‫ييك. دوزدور سييامكين يولداشي يئيين سورور و پوليس ده جريمه ائله دي، آنجاق بو بئنزينسيز گونلرده، آللاه اونو ساخلاسين؛ بيزيم ده قارشيميزي قومدان گلنلر كيمي كسديلر، آنجاق سورعت گئتمك ايچين! و بو كسينليك ايله خيلاف دير! ايلك گؤرونتولري بورادا سالديم.
2- آخيردا بيلمه‫ديم بورانين آدي مزلقان‫دير يا مزدقان و يا نوبران؟! آنجاق بورادا بيلديك كي بته‫ر يئره گلميشيك و بؤلگه‫لر اوزاقدا كي ياخينلاريميزديرلار! اردبيل، تبريز و حتي سينيرين او تايلاريندا دا بئله بير ساندويچ ساتماق يئري تاپماق اولماز. بو توكانين شوشه‫سينده يازيليب: «آجلار گلين» ساندويچليغي! ولي بيزلر ايسه يئمك آجي يوخ، بلكي كولتورل سوسوز و آجلار ايديق و سوسوزلوغوموزون بير آزي او يازيني گؤرمك ايله آرادان گئتدي. بو يازينين اصلي آنلامي بو ايدي: «تورك دوشمانلاري! بورادان گئدين!».
3- طبيعت و گؤرونتولر قاباغا گئتديكجه آذربايجان بؤلگه‫لرينه بنزه‫مك ايله بيز دويغولانيريق و «مراغه» آديني «مرغئي» سؤزجويونون يئرينده گؤرنده، ماراغالي يولداشلارا باشقا بير حال تاپيرلار!
4- مرغئي مسجيدينده كي تؤرن قورتارماقدا دير، آنجاق مسجيدين قاپي‫سيندا حكيم تيليم خانين بيرينجي ديواني كيتابي ني ايلك گؤستري و همده ساتماغا قويوبلار. مسجيدين قارشي‫سيندا كي توركجه يازيلميش خوش‫گلدين پلاكاردي چوخ ماراقلي دير! عؤمرومده من ايچين هئچ خوش گلدين بئله ياپيشماسا دا، مسجيد ده وئريلن شوربا دا سييامك ايچين بو بئش-آلتي ايلين ان يئمه‫لي شورباسي‫دير. البته بئله شوربا يئمك ايله مشغولودوق كي گؤرونتو سالماغي اونوتدوم.
5- ناهاردان سونرا قبريستانا ساري يولا دوشوب، حكيم تيليم‫خانين مزاري اوستونده بير فاتيحه اوخودوق؛ مزار داشلارينين چوخو توركجه يازيلميشديلار؛ بير قبير داشيندا بئل يازيلميشدير:

نه‫قدر يول گئديرم ديلده آتا صؤحبتي وار
هاميدان چوخ آتامين بو دونيادا حؤرمتي وار
...

شئعرين ايكينجي بئيتي‫ني يازميرام؛ مني گئرچكدن كدرلنديردي، ايسته سينيز اؤزونوز اوخويون.
6- قبريستاني اؤتورون؛ بو گون شنليك گونويدو! قوناقلار كندين بير ائولرينده اوتوروب بئش-اون دنه شئعر اوخوناندان سونرا بيلديم كي هله ايش چوخدور! ساوا دان، قوم دان، تئهران دان آشيق‫ايدي تؤكولموشدو بو كنده؛ ايسته‫ييرديلر تيليم‫خانين باغيندا شنليك تؤرني ده يولا سالسينلار! آرواد، اوشاق، قوجا، جاوان و دئمك كندين بوتون اهالي‫سي تؤكولدولر بير باغا و بيز ده گئتديك!
7- قولاق آسماق، گؤرمه‫يين يئريني دولدورماز؛ يازيقلار اولسون كي كامئرامين كيفيييتي ايسه راضيلاشديرماياجاق سيزلري! و البته يازيقلار اولسون يولداشلارين دئييشي كيمي تؤرن گئچدي قميشليغه! آخي بئله بير سوخنرانليق يئري دئييل كي! قوناقلارا دئيه‫ن يوخ، نه‫يه خالقي يورورسونوز؛ قويون آشيقلار چالسينلار دا‍!
8- ساعات آلتي‫دا قاش قارالماغا ده‫يمه‫مك ايچين، تئهرانا ساري يولا دوشدوك.
9- قاييداندا، ماراغالي سييامك دئيير: «اؤز آراميزدير، آوز ماراغاميزدا اونلار تيليم‫خان تايي واردير؛ آنجاق بئله آدليم اولماييبلار و ...»؛ من ده كي بير گون ايدي سوسقونلوق مرضي توتموشدوم و خبريم ده يوخ كي بو گونلر ايليشگي‫لي و يا ايليشگي‫سيز اؤرنكلر گتيريرم، دئديم: «تيليم خاني علي دايي ايله موقاييسه ائتمك اولار! اولابيلر برازيل و آوروپا دا علي دايي دان چوخ ياخشي اويونجولار واردير، آنجاق علي دايي بئله يئرلردن چيخيب كي فوتبول سطحي چوخ آشاغي‫دير و بونا گؤره آسييا و دونيادا چوخ شؤهرت قازانيب؛ تيليم‫خان دا بئله دير».
10- بير شئيي اونودوردوم ها! دونن وئبلاق بحثي دوشدو و من او بحث ده ايسه سوسدوم و ايندي بير آز دئيينمه‫لي‫يم!! اوچ-دؤرد نفرين آراسيندا بئله بير دانيشيق اولدو:
  • نئچه ايل دير سندن بير ايش-ميش، شئعر-مئعر گؤرموروك!
  • يوخ داي ايستيرم بوندا سونرا چاليشام، بير دنه وئبلاق ووروب و اوندا شئعرلريمي ياياجايام.
  • وئبلاق!!!؟... وئبلاق دا اولدو ايش!؟ منيم بئش-اون(!) دنه وئبلاق واريم ايدي(!). لاپ ايشي دوز وئبلاقلارا گونده 4-5 نفر باش وورور.
  • ...
آرخايينام كي وئبلاق ووران يولداش، سوستلاشدي! دليلي ايسه، تك باشينا بئش-اون دنه وئبلاق وورانين، وئبلاقين نه اولدوغونو بيلمه‫مك، ايدي. اصلي نه‫دن ايسه من و سن كيمي وئبلاق يازيب-اوخويانلارين تقصيري دير كي وئبلاق كيمي مودئرن ايليشگي تئكنولوژي‫سي نين اؤنملريني تانيتديرماييب و تكجه فيكريميز بو وئبلاقين گونجه‫له‫مه‫يينده اولوبدور؛ البته قارقيش اولسون بيز ايچين گئج و دونيا ايچين يئيين گئچن زمانه‫يه!

Thursday, July 19, 2007

يئتنكلي الدن گئتميشلر

شاه زامانينداكي تبريز كؤكنلي سينما و اوخوماق اولدوزو و ايندي يئنگي دونيا دا ياشايان قادين ياديما دوشدو(آديني چكميرم؛ يازيقلار اولسون كي قادين دير و تك باشينا اوخوماغي دوز ايش دئييل سانكي؛ بورادا ائله بيلين بو قادين كيشي دير!)؛ آيريليق ماهني‫سي‫ني اوخوماغا باخماياراق اونون بوتون آلبوملاري فارسجا دير و بونا گؤره، اونا آذربايجان كولتورونه قوللوق ائدن آدام آدي وئرمك اولماز؛ آيريليق ماهني‫سي دا عريضه‫نين بوش اولماماغي ايچين دير.

بير خاطيره ده واريم؛ آلتي ايل بوندان اؤنجه، شريف بيلي‫يوردونون يولداش و ديلداش، آنجاق مغرور اؤيرنجي‫لرينين بيري‫سي نين يانيندا، يوخاري دا دئديگيم اوزمانجين آديني چكديم و دئديم فيلاني توركوموش! بو قوشاچايلي، ولي حال توتماق خوجاسي اولان به‫ي، تئز دئدي: « ياتاق‫خاناميزدا بير اوزلو كورد واردير، بيز هر زامان ايبراهيم تاتليسسين كاسئتلريني دينله‫‫يه‫نده، تاپيليب، دئيه‫ردي: چوخ‫دا شيشمه‫يين؛ تاتليسس كورد دور! من ده دئديم، اصل بونون اوخودوغو ديل‫دير، گل گؤر قانيرسان نه دئيير؟! بو سؤزو دئيه‫ندن سونرا، او كوردون حالي برك توتولدو و او چاغدان بيزه ائله سؤزلردن دئمه‫ز!»

منيم ايسه حاليم او كورد كيمي توتولموشدو؛ چونكو دوغرو سؤز دئييردي! بير-ايكي دفه آتيليب دوشمك ايله كي آدام واليباليست اولماز(بئنيم ده ضرب التاي تاپابيلمه‫ديم!). او قادين دا بير دفه آيريليق اوخوماقلا، هاراي-هاراي من توركم ده باغيرسادا، سونا قدر، فارسلارين موسيقي تمثيلچي‫سي تانيناجاقدير. و ائلشن به‫يين دئديگي ياشار كامال دا سونا قدر تورك ادبيياتي ايچين، احمد كايا دا تورك موسيقي‫سي ايچين و ها بئله خاليد حوسئين ده آمئريكا يا اينگيليس ادبياتي ايچين بير تمثيلچي اولاجاقلار. اصل بونلارين ايزلري دير، آتالار سؤزودور: آدام اؤلور قالير اثري، ائششك اولور قالير ثمري!
البته آللاه براهني‫يه اوزون عؤمور و جان ساغليغي وئرسين، اونون يازديقلارينين موحتواسي، آذربايجان آيدنلاري ايچين گئرچكدن اويانديريجي و يول گؤسترن اولموشدور، آنجاق منيم بير سؤزوم وار: براهني ايسه توركجه يازماسا، به كيم گرك توركجه يازسين؟ اولمايا فارسلارين عممه سي بيزيم ديلده يازيب پوزمالي‫ديرلارمي؟! اوشاقليق‫دان آناديلي بيليمسل و عئلمي اؤيرنمك يالنيز و يالنيز بهانه دير. منجه بوشلوق و ارينمكدن سونرا باشقا بير نه‫دن و دليل گتيرمك اولماز. منيم يازديقلاريم گوجلو دئييللر و اوخوياني ايسه چوخ آزدير؛ آنجاق 20 ياشليقدان توركجه اوخوماغي باشلاميشام و فارسجا دا بوندان چوخ ياخشي يازيرام، آنجاق گؤره‫و(وظيفه) نه دير؟ من كيمي يئتنكسيز آداملاري يازماغا ساري چكن، يورد و اولوس سئورليك و بوندان داها اؤنملي، گونئي آذربايجان ادبيياتي دنيزينين بوش گؤرونمه‫سي دير. بو دنيز دولمالي دير و من كيمي بلاق يازانلار دامجي‫ديرلار؛ آنجاق براهني كيمي بؤيوك چايلارين آخماغي گركلي دير.
يازماق دا سوروجولوك كيمي دير؛ بير-ايكي دؤنه، يا يئتنك آز اولورسا، اللي – آلتميش دؤنه بونا-اونا چيرپارسان(بئله سينه كي ماشين دا ماشينليق قالماز!!؟)، سوندا يقين كي اؤيرنه‫جك‫سن، نئجه ياخشي يازماق اولار؛ چونكو فيلان آداملار ايستيثناديرلار، ياخشي دليل دئييل! شهريارين دا بئله دوشونجه‫سي اولسايدي آناسي‫ ايستكي‫نين قارشي سيندا دويغولانيب و هئچ زامان آذربايجان و بلكه تورك ادبيياتي‫ني تك باشينا سووارماياجاغيميش. ايستيثنالار، ايلك باخيشلار دا، ايستيثنا دئييللر؛ و البته چاغداش دوروم دا، بيز نئجه‫ليك(كيفيت)ـدن داها چوخ اؤنملي، نئچه‫ليك(كميت) داليسيجاييق.

Wednesday, July 18, 2007

رسمي فارسـلاشديرما

ياخشي! بئله سينه هامي دينجه‫لدي.
«هويت بخشي به فرش ايراني» و اؤز ديليميزجه ايران خالچاسينا، دونيا دا كيمليك باغيشلاماق آدي ايله، آذربايجانليلار و ايرانلي توركلرين توخودوغو خالچالارين، كيمليكي‫ني دئييشمك پروسه سيني، فورمال و رسمي ائتديلر و بوندان بئله تكجه تيلويزيون رئكلاملاري و مئديا تبليغلرينده «فارس خالچاسي» ياپيشيق سؤزجوكلريني گؤروب-ائشيدمه‫يه‫جه‫ييك!
ايندي گل ايثبات ائت كي بونلار تورك اوزمانجلارين ال-توخوماسي دير و مئهران باهارلي دا فارسلارين ديلينده خالچا ايچين اؤزل بير سؤزجويون اولماديغيني، ايثبات ائتسين!!

اؤرنكلري(ميثاللاري) ايسه جاليب دير:
توخونماق يئري: فارس (اوستاني)
تيجاري آد: گبه (تورك قاشقاي قادينلارين توخودوغو گه‫به)


ائتيكتين سونوندا يازيلميش made in iran دا چوخ آنلام داشييابيلر! چونكو فارس خالچاسي ايرانين سينيرلارين اوتايلاريندا ايسه توخونور و يا توخويورلار و بو ياني پان فـ... !

گؤرونتو و خبر قايناغي:
http://www.sharghnewspaper.ir/Released/86-04-26/272.htm#11574

Tuesday, July 17, 2007

ان گؤزل سؤزجوك


اؤز كوچه‫ميزه، اؤزوموز سو سپمه‫لي‫ييك!

اؤزوم اؤلوم بونلار اؤزلريني آلمانليلارا ياپيشديرماق ايسته‫مه‫سه‫لرده، اؤزلرينه باشقا بير شئي اوستون چيخاندا، حاللاري دئييشيلير و يالان-پالان چيخارديرلار؛ آنجاق هر دفه ده قوخوسو چيخير!
آخي بيري يوخدور بونلارا دئسين، هر نه يينيز ياخشي؛ نئيه هر خبره اؤز كؤنلونوزله ال آپاريرسينيز؟! آلمانليلارين اصلي بيلديري لرينده يازيلميش هيندي سؤزجوك(khushabu)، آنجاق سيزين فارسينيزدا دا ايشله نن خوشبونون نه عئيب وار ايدي كي گليب ياپيشدينيز توركلرين «كوچه» كلمه سيندن! هيند-آوروپا ديللرينيين بايراغيني قالديراندا نه جور اولور، هيند دن چوخ، گؤيگؤز و ساريشين آوروپاليلارا قوشولماق ايسته ييرسينيز! اولمايا بونلاري قاراشين هيندلي‫لردن يوكسك بيليرسينيز، چونكو ديل اوخشاماغيني اونودوب و به‫نزه‫مه‫يه‫ن قييافه‫دن ياپيشميشسينيز؛ آللاه ائله‫مه‫ميش ايرقچي و يا راسيست اولارسينيز ها!؟ بونلاردان علاوه، بيلميرسينيز هم «كوي» و همده «چه»اكي توركجه ديرلر؟ هانسي فارسجا سؤزجوكده، «چه» وار كي بوندان ياپيشدينيز؟!
مئهر-نيوز سايتيندا دويچه وئله قايناغي ايله بير خبر گؤردوم؛ گؤردوكجه بيلديم، آلمانليلار، يانليش سؤز يازمازلار و اونلارين ايشي دوزدور! آنجاق دويچه وئله نين هم فرانسا ديلي بؤلومونده و هم بو دونياليق ديللر ياريشماسينين رسمي سايتينداكي، دونيا دا ان گؤزل سؤزجوك (The nicest ABC in the world) بيلديري سينده، تكجه بئله سؤزلر يازيلميش و كوچه-موچه دن بير خبر ايدي :

Popo چينلي لرين ديلينده آناليغا دئييلير، آلمان ديلينده اوتورماق يئرينه دئييلير.
هيند ديلينده قوخولو معناسيندا اولان Khushabu و آلمانلي ساحيرليك آنلامينداكي Hexerei ايسه باشقا ديللرده ، باشقا آنلاملاردا ايشله‫نه‫بيلرلر. هر كيمسه‫نين اؤزونه بير ماراقلي سؤزجويو واردير و بو ماراق يا آنلام و يا سلنمه‫ك و تلففوظ دن يارانير. بيز سيزدن ايسته‫ييريك اؤز اولوسال ديلينيزده (آناديلي) به‫‫‫يه‫‫نديگينيز سؤزجويو بيزه دئيه‫سينيز. توپلومسال بيليملر ايلينده، KULTURAUSTAUSCH (كولتورل آل-وئرلر)، ifa نين اوچ آيليق درگي سي ايله بيرليكده، بو ياريشي قورموشوق: دونيا دا ان گؤزل سؤزجوك (The nicest ABC in the world) اؤز ماراغينيزا ياتان سؤزجويو بيزه گؤنده‫رين و قيسسا بير متن ده(ان چوخ 300 سؤزجوكلو) اؤز سئچمه‫يين دليلي‫ني اولوسال ديلينيزه يازين. او سؤزجوك بير آد، بير ائيلم(فئعل) و يا بير صيفت اولابيلر. اؤزل آدلار(خاص آدلار) بو ياريشمايا گيره‫بيلمزلر. بير ژوري(هئيأت مونصيفه) يئتيشميش سؤزجوكلره گؤره قضاوت ائديب و اونلارين آراسيندان اوتان آدامي سئچه‫جك. غاليب گلن ياريشماجي، بئرلين كندينده قورولان تؤرنه گلمك ايچين بير گزمك اؤدولو قازاناجاق. البته ايكينجي و اوچونجو نفرلره ده بو اؤدولدن وئريله‫جك و ان ياخشي متنلر و يازيلار «The nicest ABC in the world »ـدا ياييلاجاقدير.
لوطفن اؤز تاپشيرديغينز سؤزجوكلري اوقوست آيي‫نين 31 نه قدر يوللايين. آدرئس دا بورادادير:
http://cms.ifa.de/en/info/news-press-review/abc/


توركلرين سئچه‫نه‫يي

دئموكراسي و سئچيم اؤزگورلويونه سايقي گؤسترمك ايله، بو ده منيم ايسته ييم‫دير:
هايدي، ديلداشلار!
ايندي بيزيم واختيميز!
منجه هامي‫ميز «ديلداش» سؤزجويونو گؤنده‫رك. بونو دا دئييم كي ايشتيراكچيلارين چوخلوغو، سس بيرليگيندن داها چوخ اؤنملي دير.

Tuesday, July 10, 2007

قارا مجموعه، قارا دنيز كيمي گئنيش


«قارا مجموعه»نين ايلك گؤستري‫‫ قورولتايي و اونون يانيندا دوكتور حسين محمدزاده صديق(دوزگون)ـون آغيرلاما تؤرني قورولدو. دوزدور ايشتيراك ائدنلرين سايي سي آز ايدي و البته چوخراق فارس ديلينده دانيشديلار، و باشقا طرفدن ايسه منيم كيمي آداملارا گؤز يومسانيز، بو قورولتايين كئيفييتي چوخ اوستون و يوخاري ايدي. فارس دانيشانلارين بيري سي : فرانسانين آدلي و سانلي بير ادبي درگي واردير، بو درگي نين باش يازاريندان سوروشدوم سيزين درگي نين تيراژي نئچه دير؟ و او دا دئدي 3000 جيلد! من ده چوخ تعججوب ائله ديم؛ چونكو بيزيم كولتورل كئيهان(كيهان فرهنگي)ـين تيراژي 30000 جيلد ايدي، حالبوكي فرانسا هارا و ايران هارا؟! و بونو او باش يازارا دئديم. او فرانسالي باش يازار دا دئدي كي تيراژ و سايي بيز ايچين اؤنملي دئييل، بيزيم درگي ني اوخويانلار فرانساني خواصي و يا دئمك اؤزل آداملاريديرلار و بو چوخ ده‫يه‫رلي ايش دير.
ائله كي بيلدينيز، او ايسته ييردي بير جوره دئسين بو ييغينتي دا ايشتيراك ائدنلرين آز سايي‫سي‫ ناراحاتليغي يوخدور. البته كي اؤنملي دئييل، آنجاق بو قورولتايين بيلديريلري تئز ياييلسايدي، آداملارين سايي‫سي چوخ اولاردي؛ چونكو بيز تكجه خواص داليسيجا دئييليك و بيزيم خالقين دورومو، فرانسا خالقينين دورمويلا چوخ فرقلي دير و بيزيم ديل و كولتور پيس گونلردن چيخماغين، داوا-درماني بئله قورولتايلار دير.
بو قورولتايين بيلديري‫سي‫ني بو وئبلاقدا ياياندا، دوكتور دوزگونه اولان ايرادتيمه گؤره، «قارا مجموعه»نين اؤنمي‫ني اونودموشدوم. كسينليك ايله دئيه‫بيلرم اردبيللي شئيخ صفي نين «قارا مجموعه»سي، آذربايجان ديل و ادبيياتينا سعدي نين گولوستان كيتابي قدر اؤنملي اولابيلر و باشقا يؤندن، كسروي نين بوتون قوندارما تئوريلريني كؤكدن باطيل و خونثا ائدير؛ بيلديگينيز كيمي، كسروي شيخ صفي نين قارامجموعه كيمي ده‫يه‫رلي اثريندن واز گئچيب و اونون گيلك ديلينده اولان 17 بئيت سئعريني بهانه قويوب و اونون ديليني(و نتيجه ده آذربايجانين اسكي ديليني) اسكي آذري ديلي تانيتديرميشدير. بو كيتابين ياييلماسي گئرچكدن بير يئني دئييشكيليك و تحوول يارادابيلر و البته ياراتميش. بوتون ديلداشلاردان ايسته ييرم بو كيتابدا اولان ايناملار لا اعتقادلاردان خوشلاري گلمه‫سه‫ده، حتما بو كيتابي آليب اوخوسونلار، ائله كي اينگيليسلر، فرانساليلار، عربلر، آلمانليلار و فارسلار و ... ، اؤز اسكي ادبيياتلاريني اوخويورلار. بو كولتوروموز قورماق ايچين واجيب بير ايش دير.

بو قورولتايدا كي وئرليشلر بونلاريديرلار:

  • داوود بهلولي (قارا مجموعه نين چئويرمني)ـنين «بررسي احاديث معصومين و تشيع شيخ صفي(سوچسوزلارين حديثلري و شيخ صفي نين تشييوعو)» مقاله اوخوماغي

  • سيداحسان شكر خدايي «حرمت و خدمت از ديدگاه شيخ صفي الدين اردبيلي(اردبيللي شيخ صفي نين گؤروشوندن سايقي و قوللوق)» مقاله اوخوماغي؛ بو جناب فارس ديللي ايدي و قورولتايين سون بؤلومونده، فارس تاري ايله توركجه چاليب اوخودو
    آشيقلارين چاليب اوخوماقلاري

  • محمدصادق نايبي نين «معرفي يكي ديگر از قسمتهاي قارا مجموعه(قارا مجموعه نين باشقا بير بؤلوملرينين تانيتماسي)» مقاله اوخوماغي (سايين نايبي ايله بير بيلي يورد دا درس اوخويارديق؛ قورولتايين سونوندان اونونلا گؤروشدوق، ايكي ايل بوندان اؤنجه ، خالخاللي ماللا محمدباقيره گؤره، آراميزدا اينتئرنتده سؤزوموز چيخميشدير! نايبي دئميشدي او مييانالي دير و من ده دئييرديم يوخ، او خالخاللي ايميش! و البته دونن باريشديق!)

  • سيد حيدر بياتين «رساله عقايد اولياي سبعه، ستاره درخشان از منظومه قارا مجموعه(يئددي اوليانين ايناملاري ريساله سي، قارا مجموعه دن پارلاق بير اولدوز)» مقاله اوخوماغي؛ حؤرمتلي سييد حيدر بياتلا تكجه آلما يولو وئبلاق ايله تانيش ايدم و دونن ياخشي بير فورصت اله دوشدو كي بو سايقيلي يازاري و البته قوم دا ياشايان، باشقا آذربايجان كولتورو يولوندا چاليشقانلاري ياخيندان گؤروب ، ايرادت گؤسترم.

  • محمدرضا كريمي نين «قارا مجموعه» آدلي مقاله اوخوماغي

  • سون سؤزلري آپارماق و دوكتور دوزگونون دوغوم گونونو قوتلاييب و اونون آغيرلاماسي، او و قارا مجموعه يه گؤره مقاله اوخويانلارا آنيت لئوحه سي وئرمك

    سالديغيم گؤرونتونو ده آخشام بورا قوياجايام! موبايليمين كابلي يانيمدا دئييل(بير گوندن سونرا گونجه لندي).

Monday, July 9, 2007

قورخوردوق

قحط القونو اولان چاغلار، بير گونده ايكي پوست يايماق سفئه‫ليك اولابيلر! آنجاق اولمور كي اولمور! ايسته ييرديم بو يازي ني صاباح يوخ، آردي گون يازام! چونكو تبريز بيلي يوردونون اؤيرنجيلري نين قالخيشينين ايلدؤنومو او گوندور. تبريز اؤيرنجيلري تئهران بيلي يوردونون اؤيرنجيللرينين داليسيندا دورماق ايچين آياغا قالخديلار و تئهران دا كي اؤيرنجيلردن داها پيس وورولوب و كؤتك يئديلر! آنجاق اونلارين داليسيندا دوران، هئچ داياق يوخ ايدي و يازيقلار اولسون كي سسلري بوغولدو. بئله مظلوملوق آذربايجانين تاريخينده چوخ گؤرونموشدور.

بوگون ياي ايليكينين 18 جي گونودور. ائله بيل دونن ايدي. 8 ايل بوندان اؤنجه تئهران بيلي‫يوردوندا كي اؤيرنجيلرين تاپدالانماغي ني اونودماميشيق. كوي دانيشگاه توستو ايچينده بوغولور؛ بوتون اؤيرنجيلر رئفورميستلرين گونده ليگي(سلام) باغلانماق ايچين ناراحات اولوبلار. بو ناراحتچيليقلاردا فارس-تورك يوخدور؛ چونكو سؤز اؤزگورلوگو(آزادي بيان) خطرده‫دير و سوسماق دوز ايش دئييل و البته كي بيلي‫يوردلارين بير سايي‫سي تعطيل ديرلر و تبريز بيلي‫يوردوندان باشقا، تئهران ايچين داياق اولماغا حاضيرليغي يوخدور.

بيزيم خبريميز وار كي تبريز ده نه‫لر اولور! آنجاق ايصلاحاتچيلار تكجه تئهران خبرلريني ياييرلار؛ اولمايا تبريزين خبرلري شاييعه و يالانديرلار!؟ آنجاق تبريزدن دانيشانلارين هئچ بيريسي يالانچي دئييلديلر...

بير ايل گئچدي...
اؤيرنجيسل حركتلر ائتنيك و يا گئرچك آنلامدا اولان اولوسال بؤلوملري گوجلنمكده ايدي. تورك اؤيرنجيلر، اؤزلر نئچه درگي چيخارديبلار و اؤزلري اؤز خبرلريني يايماقدان سونرا ، باشقا يوللاري يوخدور. خبر يايماقدان سونرا، اؤز خالقلاريندان باشقا بير داياق تاپابيلميرلر. و بو خالقين اؤزنو ساوالان و سهند كيمي داياق اولماغي‫ني گؤسترمك ايچين بئش ايل قالميشدير. داها آرتيق دؤزمك لازيم.
زنگاندا چاپ اولونموش اون-اون بئش يارپاقلي اؤيرنجيسل «سس» درگي سي ني اوخويوردوم! اوخودوغوم جومله لر دقيق ياديمدا دئييل. سعيد نعيمي آدلي بير اؤيرنجي، جلايي پور ايله دانيشيب و اوندان سوروشوب: « تبريز بيلي‫يوردونون يئتميش سكگيزينجي ايلين تير آيينداكي اولايلاردان خبر يايماديغينيزين دليلي نه ايدي؟» و او دا بئله يانيتلاميشدير: «بيز تبريزين اؤيرنجيسل حركاتي ، خالق آراسينا گئچمكدن و اورانين اولوسال پرابلئملريندن قورخوردوق! ساده جه بونا گؤره».
و چوخ چكمه‫دي ، ايصلاحات بايراغي ني داشييانلار، اوزو قويلو، ته‫په‫سي اوستده ده‫يديلر يئره!‫

يالنيز قالان عجاييب

گينه ده باشلاديلار زيريللاماغا: آي واي، آي هاراي؛ بيزيم كيمي يازيقلارين حاققيني بير داها دونيادا يئديلر. بيز كيمي باش آشاغي، بيزيم كيمي اوزمانج، بيزيم كيمي شخصييتلي، بيزيم كيمي گؤزل، بيزيم كيمي اوستون، بيزيم كيمي گؤزل دانيشان، بيزيم كيمي بشر ايچين حوقوق منشورو يازان(!) و بيزيم كيمي ... دونيادا هئچ يوخدور؛ آنجاق گينه ده ، كسديلر، بيچديلر، توخويوب تيكديلر و بيز قالديق باخا-باخا!

دونيا دا يئني يئددي عجاييبلري سئچمك جريانين دئييرم. بير ايسوئچره لي كئفي ساز و پوللو آدام نئچه ايلدير، چاليشير دونيانين ان آدليم و تاريخي آبيده لريني سئچسين و دونيانين هر يئريندن آدايليق ده‫يه‫ري اولان ايگيرمي بيراثري سئچه‫ندن سونرا، اونلاري، تئلفون، sms، و اينتئرنت ايله يوزميليون اينسانين سئچيمينين قارشي سينا بوراخيبدير. و سونوج بو اولوبدور:

1- چينين بويوك دووراي
2- هينديستانين آگرا كندينده اولان تاج محل مسجيدي(تورك و هيندي تيكينتي مئعمارچيليغينين قاريشيغي)
3-اوردون دا اولان اسكي دؤنملردن قالميش پئترا كندي
4- ايتالييانين باشكندي، روم دا اولان كلوزيوم
5- برازيلين رييودوژانيرو كندينده اولان مسيح(ع)ـين هئيكلي(اؤزگورلوك باغيشلايان مسيح)
6- مئكزيك ده اولان چيچئن ايتزا هئرمي
7- پئرو اؤلكه سينده اولان ماچوپيچكو كندينين قالميشلاري


بو سونوج بير آز عجيب دير؛ چونكو ميصيرين بؤيوك و كسينليكله عجاييب اولان جيزه هئرمي آدي سيلينميشدير! اولابيلر فئرعونون قبري، اؤنجه كي اسكي عجاييب ليستيندن، يئني ليسته گتيرمه‫يه راضيلاشماييبلار. باشقا طرفدن،
دونيادا داها آرتيق تايسيز اثرلر و ايزلر وارديرلار كي آدامي حئيرته ساليب شاشيرديرلار؛ اؤرنك ايچين قالاپاقوس آداسيندا كي داش هئيكللري، پاريسين ايفئل بورجو، توركلرين ايصفاهان كندينده بوراخديغي ايزلري ياني نقش جهان و آلاقاپي، ايستانبول دا كي آياصوفيا مسجيدي و ...
اؤز آذربايجانيميز دا اولان، سولطانييه گونبزي، سولئيمان تختي و ... كيمي باشقا اثرلري دئميرم؛ چونكو نه بيز دونيادا بو اثرلري تانيتديرا بيلميشيك و ان اؤنملي بو كي بونلارين چوخو آرادان گئدير و ياخشي قورويوب ساخلايابيلمه‫ميشيك؛ تقصير ده هر كيمسه ده اولور اولسون، گئرچه‫يي دانماق اولماز. بونلار قوناق قاباغينا چيخارتمالي دئييرلر كي هئچ، دونياليق يئددي عجاييبين آراسينا سوخماغي اوتورون!

ايندي قاييداق سؤزون باشلانغيجينا، گؤرك بو آرادا كيملر دئيينيرلر؟
بو سؤزلري يازماغين دليلي اعتيماد گونده‫ليگي‫نين «هيچ كس ياد تخت جمشيد نبود»(هئچ كيمسه جومشود تختي نين ياديندا دئييلدي) تيتري ايدي! آخي بيري ده يوخدور بونلارا دئيه، سيز بونلاري ايران دا ياشايانلارين بئنينه، كوروش-كوروش دئيه‫-دئيه سوخوبسونوز، ائله بيليرسينيز دونيا دا ايسه، هاممي گرك تانيسين!؟ اصلا نئيه تكجه جومشود تختيني تئز اورتايا آتيرسينز؟ نه‫دن چوغازنبيل، سيستان دا كي يانيق كند، آذربايجان دا كي ايزلر و يا ايصفاهان دا كي يئرلرين آديني چكمه‫ييرسينيز؟!
قويو قازان اؤزو هاممي دان قاباق قويويا دوشر! سيز ده بير آز جومشود تختي كيمي باشقا ائللرين تاريخي يئرلرينه ديققت ائتسه‫ايدينيز، بو اويون باشينيزا گلمز ايدي! البته جومشود تختي ده چوخ ياخشي و گؤزل و عظمتلي يئردير؛ آنجاق ان-اون بئش دنه ديرك و پيلله دن سونرا بير شئي قالماييب كي! اؤزونوز اؤز بؤركونوزو قاضي ائدين گؤرون نه خبر واردير؟ ائله بيليرسينيز هر نه منه بير تيلويزيوني تيزئر دي كي يايماغينا پول وئرسينيز، سؤزونوزه قولاق آسيب و اونو يايسينلار! منظوروم تورك خالچالار ديرلار كي آذربايجان موسيقي و رقصي ايلر گؤسترندن سونرا، پئرشين كارپئتي آدلانديريرسينيز.


سون دا، گونده‫ليگين سوروملو مودورون آدينا باخيرام؛ ايلياس حضرتي دير! بو گونلر، مجليس وكيلي اولماق ايچين سس آلماغا گؤره اونون ده سوراغي چيخار.

Saturday, July 7, 2007

متن يك نامه فاشيستي

دير و زود داشت، ولي سوخت و سوز نداشت!
بالاخره متن نامه ترك ستيزانه ورجاوند كه به صورت محرمانه به خاتمي نوشته شده بود، ولي خوشبختانه در نشريات دانشجويي آذربايجاني افشا گرديد، در اينترنت هم منتشر شد.
چند هفته قبل كه به مناسبت مرگ ورجاوند، نامه مذكور دوباره مطرح شده و بر سر زبانها افتاد، بعضي ها مي گفتند، اين همه پشت سر يك مرده هياهو راه انداخته ايد، پس كو متن نامه؟! براي ما هم اصل ، محكوم كردن يك عمل باطل بود وگرنه كارهاي بسيار-بسيار مهمتري از حرف زدن پشت سر كسي مثل ورجاوند وجود دارد، يعني اينكه، اصل قضيه، همان نامه و محتويات خطرناك و شيطاني همان نامه بود كه موجب تازه شدن ناراحتي هاي گذشته شده بود و اينكه بعضي از مغرضان و يا ناآگاهان اصلاح طلب و غير اصلاح طلب هم مي خواستند از نگارنده آن نامه فاشيستي يك قهرمان ايران پرست ضدتجزيه طلب دربياورند و نتيجه اينكه همه از همديگر سراغ آن مكتوب را مي گرفتند.
من هم در همين مورد، دو مطلب يكي به تركي (اؤزوندن اؤنجه، دوشونجه سي اولموشدو) و يكي هم به فارسي (آقاي زيدآبادي! سوء تفاهم يا سوء فهم؟) نوشته بودم و نبود متن آن نامه فاشيستي خلائي را بوجود آورده بود.

با خواندن اين مطلب، به جز تركهاي ايران، ديگر اقوام و ملل ايراني هم به سادگي مي توانند مسببين و مروجين اعمال و افكار نژادپرستانه و شوونيستي را در ايران، بشناسند:

Thursday, July 5, 2007

بؤيوك خوجاميزين آغيرلاماسي

آلما يولو وئبلاقيندا، قارا مجموعه كيتابينين ايلك گؤستري سي عونواني ايله بير بيلديري ياييلميشدير. قارا مجموعه يا قارا توپلوسو كيتابينين ايلك گؤستريمي تؤره نيندن داها چوخ اؤنملي، سايقيلي اوستاد دوكتور دوزگونون آغيرلاماسي دير. بو سارسيلماز، يورولماز و بؤيوك كيشي نين آذربايجان ميلتتينه حدسيز و سايي سيز قوللوقلار ائديب و بو جنابين اؤزونه گؤره، گرك بير اؤزل مراسيم قورولسون و بو خالقين گؤره وي دير.


دوزگوندن چوخ خاطيره لر وارديمدير و هامي سي دا بيلي يورد دا اولدوغوم چاغلاردان دير. اؤز ياشاميمدا گئچيرتديگيم اونودولماز اؤيرتيم كيلاسيم ، دوكتور دوزگونون ايصفاهانداكي توركجه ديل و ادبيات كيلاسلاري، و آلديغيم ان ده يه رلي آنيت لئوحه و اؤدوللري ايسه، دوكتور دوزگونون اليندن آلميشام؛ و البته بونا آرخايينام كي مينلر آذربايجانلي اؤيرنجي، آناديللريني ادبي شكيلده يازيب - اوخوماغي سايين دوزگوندن اؤيرنميشلر و يقين كي اونلارين آلبوملاريندا ايسه، بئله گؤرونتولر وارلاريدير:

Tuesday, July 3, 2007

رقصیمیز ده سیزین اولسون

نئچه گون بوندان قاباق مئهران باهارلی نین یازدیغی، فارس دیلینه گئچمیش خالچایا گؤره سؤزجوکلری(در منشا كلمات تركي قالي، گليم، گبه، جاجيم، ورني، پارچه، سوماق، پلاس، زيلو، تشك، خورجين، بغچه، كرك، تور، قنداق، چوال، جل، بته، تغار)، منی دوغرودان دا شاشیرتمیشدی! خاریجی اؤلکه لرده پرشین کارپئت و یا فارس خالچاسی آدی ایله، تورکلرین گؤزل اوزلوق(هونر)ـلرینه یئیه چیخان فارسلار، تورکلرین بو گؤزل توخودوقلارینا هئچ سؤزجوکلری یوخدور، یا فرش دئییرلر کی عربجه دیر و یا بونلاری دئییرلر کی هامی سی تورکجه دیرلر و یا کؤکلری تورکجه دیر.

بونلاری اوخویوب و تورک دیلینین گوجونه گوونه‫ندن سونرا بیر شئی ائشیتدیم! بونلار اوزدن گئدن بشر دئییللر! دئییلیر کی یورو نیوز کانالیندا، بئله بیر تبلیغاتی تیزئر گؤستریلیر:
خالچانین ساچاقلاری چئشیدلی بویالارلا، آذربایجانین شن موسیقی هاواسی ایله، آذربایجان رقصی ائدیرلر، و سونرا آذربایجانین اوزمانج ایشچیلری نین اللری ایله توخونموش گؤزل خالچالارین بیری سی گؤرونور و سوندا یازیلیر: Persian Carpet ! قوتلو اولسون! رقصیمیز ده پرشین اولور یاواش یاواش!

البته تزه لیک دنه ائشیتمیشم آذربایجان خالچاسی باهالاشیب؛ بیزیم خالچانی قدیم دن، اؤز آدلارینا چیخاردیبلار و بو یئنی بیر ایش دئییل! اولابیلر دلیلی آذربایجان رقصی ده پرشین اولماق دیر!؟ بیر آزدان توخوجو تورکجه دانیشاجاق، آوروپالیلارا دئیه جکلر فارسجا دانیشیر، البته فارسی نین آذری گویئشی!
بیز کی یورولموشوق بو ایشلردن! عئیبی یوخ، ان آزی یاخشیلیغی بودور کی تورکلرین خالچاسی یاخشی ساتیلیر؛ اینشاللاه تکجه فارس آل-وئرچیلرین جیبی شیشمه سین!!

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı