Saturday, October 30, 2010

بئش‌جوت بير تكلر اولوبلار مين نفر

اصفهانين اؤنمي من ايچين تكجه بيلي‌يوردومون اورادا اولماغيندا دئييل. من توركجه يازيب اوخوماغي اؤيره‌نمه‌يي اورادا باشلاميشام. اؤيره‌تيم قونوسوندا چكديگيم چتينليكلري قيراغا قويسام، اورا بير جوره نوستالژيك دويغوم واردير. اؤتن يازيلاريمدا دا يازميشام اورادا يئتميشلرين ايكينجي ياريسيندا گئديب تيراختوري آلقيشلاياندا لاپ چوخ اولسايديق بئش جوت بير تك اولارديق. هله ياديمدا بير دؤنه بلديه(شهرادي)‌ني سيپاهان قارشي‌سيندا تكجه اوچ نفره القيشلاييرديق!! سيروس دين محمدي‌ده اويون قورتاراندا، بيزيم ال ساللاماغيميزي گؤره‌نده دئدي اللر آغريماسين؛ بيزي تك قويماديز!

دونن‌ده اصفهان‌دا تيراختور ايله سيپاهان آراسيندا ياريش وار ايدي. گئچن ايل دئييرديلر تيراختورو اصفهاندا نئچه يوز نفر آلقيشلاييب. بو ايل بئنيمه وورموشدو گئدم. آنجاق تاي-تورشلاريم هاميسي آرواد اوشاقلاري وار و هر بيري‌سيني دئييرسن گلين گئدك توپا باخاق اؤزوده اصفهان‌دا، آغيللي آخماغا باخان كيمي باخيرلار! گئجه بئله دوشونوردوم اولابيلر بو دا بير جور مرض‌دير و من شورون چيخارتميشام. بو فيكيرلرده چيميرديم كي اون اوچ ايل بوندان قاباق دئديگيم او اوچ نفرين بيري‌سي‌نين ايمئيلي چاتدي. اونون ايمئيلي فوتبول قونوسوندا دئييلدي. او ايندي ده اصفهان‌دا چاليشير. دئديم كيشي هئچ ياديمدا دئييلدي او اصفهان‌دا. دئديم ايمئيلين يانيتيندا قوي تيراختورون اصفهان‌دا كي اويونون سؤزونو آرايا گتيرديم. او دا جاواب‌دا دئدي هن بابا يارين صاباح يولا دوشسن اؤزونو اصفهانا يئتيره‌رسن. هم تيراختور تك قالماز و هم‌ده جاوانليق دؤنه‌ميني ياد ائده‌ريك! من ده كي آمانا بند ايديم؛ دئديم هن صاباح تئز گه‌له‌رم. گئجه ساعات بير-ايكي ده ياتديم... يوخو دا گؤردويوملر ده ايستاديوم، فوتبول، تيراختور، اصفهان، تبريز، آلا قاپي، دوغان چاي(زاينده رودا دئيه‌رديك!)، اورمو گؤلو، آللاه وئرديخان، شيخ صفي، اصفهانين ائرمني‌لر محلله‌سينده توركلرين سينه و زنجير وورماغي، وانك كليساسي‌نين ناقوسو، آندرانيكين شوتو، بيزيم آلقيشلاماغيميز، ياشاسين آزربايجان و قول يئمك‌دن سونرا عئيبي يوخ - عئيبي يوخ  دئمك، اردبيل، اؤيره‌نجيسل‌ قورلتايلار، يول، بيلي‌يورد، دان‌اولدوزو درگي‌سي و اوتوبوس ايديلر!!

دان چاغي(صاباح) گئج اويانديم. تئز يوخودان دورسايديم اوتوبوس ايله يولا دوشه‌جه‌يديم. آما بيلميرم يوخو و اوياق آراسيندا اولان كيمي دئديم اؤتور سككيز دوققوز دا اؤز ماشينيملا يولا دوشسه‌م ده يئتيشه‌رم كيمدي گئده تئرمينال خزانه‌ده اوتوبوسا مينه!! دوروب حاضيرلاشديم گئتديم. ماشين‌دا بير ايستارت ووردوم. بيلميره‌م نه سسي موتوردان گليردي. قورخدوم يول‌دا قالام. اوتوبوس‌دا كي گئج اولاردي. اصفهان‌دان اس ام اس گلدي يولا دوشدون يوخسا يوخ! من‌ده اوتانا اوتانا جاواب وئرديم ماشين خاراب دير گلمه‌ييم اولماياجاق! سونرا دئديم بير باش ووروم هاوا آلانينا(فرودگاها) گؤروم اوچاقلا گئده‌بيله‌رم. دئديلر ساعات 4 اوچوشوندا بير يئر وار! باشيمي ساليب آشاغي توولانا توولانا قاييتديم! اويونو تيلويزيون‌دان ايزله‌ديم. اصفهانلي آپاريجي دئييردي دؤرد بئش‌مين تاماشاچي‌ گليب؛ تيراختورون يانداشي‌دا چوخ‌دور! سونرا گؤرسه‌تدي اونلاري. ان آزي بئش يوز نفر اولارديلار! سايتلارين بير سايي سي يازيبلار مين نفر و بير ايكي‌سي ده يازيب ايكي‌مين نفر! اويون‌دا تيراختور سيپاهان‌دان چوخ حمله ائديردي و سانكي سيپاهان قوناق ايدي! بير صيفيرا اوتوزدوق. آنجاق اوزون بير سوره‌ج‌ده اوتموشوق يولداشلار. اون بئش ايل‌ بوندان قاباق كي "بئش جوت بير تكـ"ـلر تنبل‌له‌شيب، ايستاديوما گئده‌بيلمه‌سه‌لرده، مين نفر اونلارين يئريني دولدورورلار. ياشاسينلار.

بو گون‌ده دمير اريتمه(ذوب آهن) تبريز ده قوناق‌دير گئده‌جك بلديه قارشي‌سينا! هم آللاه و هم ده تاماشاچيلار بلديه‌نين يارديمچي‌سي اولسونلار!! من بيلميرم نه جور اولوب اصفهان - تبريز تيملري هم گئديش و هم ده گليش اويونلاري بير زامان‌دا اولوب! بونو "شانسا باخ شانسا" يازي‌سي‌نين "ي.س. (يازيدان سونرا)" بؤلومونده يازاجاغديم. اونوتموشام سانكي! ايندي لاپ دئمك اولار: "شانسا باخ شانسا"؟!!!

Wednesday, October 27, 2010

دئيه‌سن حاجي فتوللازاده‌نين‌ده قازانديغي چؤرک حلال‌دير

تيراختور-ايستيقلالين بازار گونو ياريشيندان سونراكي توز تورپاق سانكي ياتماق ايسته‌مير! اويون آراجي(قاضي)‌سي‌نين تیکراری و عَمده اوخشار يانليشليقلار و عدالتسيزليكلري تاماشاچيلارين تپكي‌لري، و سونراكي حاشيه‌لره بير نه‌دن ايديلر. ايش اورا چاتيب كي تيراختورون سس‌سيز باشقاني، سردار جعفری‌ده ديله‌ گلدي و شيددت ايله اعتراض ائتدي کی بو نه اويون‌دور چيخارديرسينيز؟ استقلالي ايندي‌دن قهرمان ائتمك قصدلري واردير سانکی!

و بو تارتيشمالار ياواش ياواش تئهرانين باشقا تيمي، ياني پئرسپوليس-تیراختور و پئرسپولیس-بلدیه آراسیندا اورتايا چيخان حادثه‌لره بنزه‌يير. بو بنزه‌مه‌يي، هم پئرسپوليسين و هم‌ده ايستيقلال‌دا آدليم تورك آداملارين اولماسينا گؤره دئييرم. بو بير-ايكي ايل‌ده چوخ عجيب ايدي كي تيراختورون موتورو قيزيشاندان سونرا آدليم تورك فوتبول آداملاري، فوتبول‌دان قوولموش اولاراق، بيردن بيره تئهرانين قيرميز و گؤي تيم‌لرينده اصلي نقشه صاحيب اولدولار! دايي‌ني ايرانين ميللي تيميندن چيخاتميشديلار و خوي‌لو حاجي فتوللازاده ده چوخ‌دان ايدي ايستيقلالين قاپي‌سينا ياخينلاشابيلميردي! آما ايلك‌ده دايي باغيشلاندي و پئرسپوليسین باش مورببی‌سی سئچيلندن نئچه آي سونرا، حاجي فتوللازاده ده ايستيقلالين باش سوروملوسو اولدو. دايي‌ و تيراختور يانداشلاري‌نين آراسيندا گئچميش سوره‌ج‌دن هامي‌ميزين خبريميز واردير. تبريزه ايلك‌ دؤنه گئده‌نده آلقيشلاندي، آما گئت‌گئده يئرسيز دانيشيقلاري و يانليش داورانيشلارينا گؤره هويلاندي! حاجي‌ فتوللازاده‌نين گؤزلری آلتیندا اداره اولونان ايستيقلال‌‌دا تبريزه گئدنده ايلك‌ده آلقيشلاندي؛ چونكو هم حاجي فتوللازاده تورك ايدي و هم ايستيقلالين مورببي‌سي ياني مظلومي جاوانليقدا تيراختوروچون اويناياردي. دوزدور اويونون سونوجونو آراجي ده‌ییشدي، آما تاماشاچيلار تكجه فئدراسيونون علئيهينه شوعار وئرديلر، و بير داها ايستيقلاين مورببي‌سي‌ني آلقيشلاديلار. آنجاق اويوندان سونرا كي دانيشيقلار ياواش ياواش هر نه‌يي ترسينه ائتمه‌يي آدامي قورخودور. تيراختورون مورببي‌ و سوروملولاري آيدين يانليشليقلاري آچيقلاييب، اعتراض ائتمه‌يه حاقلي اولسالاردا، ايستيقلالين دولانديرانلارين يئرسيز ديفاع ائتمكلري هئچ، اؤزلريني تبريزده مظلوم اولماقلاريندان دانيشماق چوخ گولونج‌دور. ساده‌جه دئسه‌لر بيز واللاه تقصيرسيزيك، و هر نه داورين بوينونا دير آدام يانماز. آما قاباق‌دان گلميشليك ائديب دئييرلر آراجي گرك تيراختورون فيلان اويونچولارين ايخراج ائديب و پئنالتي‌لاري‌ني توتماياردي.

البته تكجه تيراختور يانداشلاري دئميرلر بيزيم قولوموزو داور حيسابا قويمادي. ياريشدان سونرا كي گون، فوتبول3 سايتيندا كي سئچگين گونده‌ليكلر تيراختورون حاققي پوزولماق‌دان دانيشيرديلار(تكجه ايستيقلالین رسمی گونده‌ليگيندن سونرا). البته اونلار تيراختورون آلا گؤزلرينه عاشيق دئييل‌ديلر و بير بهانه تاپميشديلار پئرسپوليس‌دن ديفاع ائتمه‌يه گؤره! ايكي هفته بوندان اؤنجه‌ده گون نم هاردان چيخميشدي، پئرسپوليسين ايستيقلالا ووردوغو قول حيساب اولونمادي و اونلار آللاه آللاه ائديرديلر تيراختورون كيمي چوخلو يانداشلي تيمينده اوخشار حال‌دا حاققي پوزولسون.

ايكي گئجه بوندان اؤنجه دوخسان وئرليشين داورليق اوزماني تيراختورون بير قولو يوخ، بلكه بير باشقا آفسايد تانينميش قولونون دوزگون اولماغيني اونايلادي(تاييد ائله‌دي). سونرا حاجي فتوللازاده‌يه دانيشماق نووبه‌سي يئتيشه‌نده، دوردو باشلادي كي يوخ اصل‌ده بيز گرك اعتراض ائدك؛ فيلان صحنه‌ني نه‌دن گؤسته‌رمه‌ديز؟ دانيشيقلاريندا تعاروف ايچين دئيير تيراختور دا اؤزوموزنكودور و منيم همشهري‌لريمين تيمي‌دير؛ من اؤزوم تيراختورا چوخلو يارديم ائتميشه‌م و بيز لاپ سئوينه‌رديك تيراختور اوتسايدي! آما سؤزون آرديندا بئله تيراختورا سالديرير آدام قالير معطل! آدام دئيير هر كيمسه حاجي فتوللازاده‌نين يئرينه اولسايدي، دئيه‌ردي بابا حاق سيزينله‌دير. يانليش‌دي اولوب گئچيب‌دا! آما اصل‌ده پئرسپوليس‌دن ديفاع ائتمك ايچين بو دؤنه تيراختورون يانداشي اولان فئردوسي‌پور، آخير دا اوز دن گئتدي و حاجي دئيه‌ن صحنه‌ني ائكرانا گتيردي.

دايي تيراختورون علئيهنه‌ دانيشاندا، موغاليطه ايچين بير سؤزو چوخ دئييردي. دئييردي كي "منيم چيخارتديغيم چؤرك حلال اولمالي‌دير"! آما حاجي فتوللازاده علي دايي‌يا گؤره سياستلي و منطيقلي داورانير. دئيه‌سن حاجي فتوللازاده ايسه بونو دئمك ايسته‌يير. بيري‌سي اونا دئسين سن كي آراجي يارديمي‌ ايله آز قالدين اوتاسان و سون‌دا دا موساوي سونوجو آليب تبريزدن اكيلدينيز!! داي نه‌يه دامين او باشيندان دوشورسن!؟ بللي دئييل آزربايجانا آز قوللوق ائتميش توركلر، بئله چاغلار نه‌يه حلال قازانماقلاريني بيلديرمك ايسته‌ييرلر؟!

Tuesday, October 26, 2010

سانازليغين سونوجو

منجه بيز نه چكيريك، بيرينجي‌سي خالقيميزين بؤيوك بؤلومو آناديلينده ساوادسيزليغيندان، و ايكينجي‌ده ساوادلي‌لاريندا بو ديلي بيليمسل باشقالارا اؤيره‌تمه‌مك و اينتئرنئت‌ده بيلگي يايماماغي، و اوچونجو ده اؤزگه‌نين ييرتيجي شكيل‌ده هر نه يي اؤز آدينا يئيه‌ليك ائتمه‌سي‌دير.
اينتئرنئت‌‌ده دولانيرديم بير بيلاق‌لا قارشيلاشديم. اؤزونو تئهران‌دا دوغولموش بيلاق يازان، آديني Sunaz يازميشدي. دئديم حتمن بيلمير بونو Sanaz شكلينده يازمالي‌دير و ايسته‌ديم اونو امر به معروف و نهي از مونكر ائدم! سونرا بيلديم او هئچ تورك  ديلي بيلمير سانكي، و اؤز ساناز آدينين توركجه اولماغيندان‌دان خبري يوخدور هئچ، بلكه هئچ بو باغلاردا دئييل و sun يازماق‌دان دا منظوري اينگيليزجه "گونش"‌دير! دئديم قوي باخيم گؤروم هله اينتئرنئت‌ده ساناز آدينا گؤره نئجه فيكيرلر واردير.
فارسجا ويكي‌پئدياني گؤردوم بؤيوك سس ايله گولدوم. يازيب ساناز فارسجا آددير. معناسي دا ياني بي‌نظير و تايي آز! "بي‌نظير" دئديگي حال‌دا دا سؤزجويو بولوب "سا" و "ناز"ا! "سا"يا كي هئچ زاد يازماييب ، آما نازين فارسجا اولدوغونو وورغولاييب! فيكريم قاتيشدي! گؤردوم سولمازي‌‌دا بير بوجاق‌دا قويوب! قورخا قورخا او صحيفه‌يه ده باش ووردوم. سولمازي نه قدر چاليشميشدي فارسجا ائده بيلمه‌ميشديلر. آما يازميشدي دئمك‌ده اولماز سولماز كسينليكله توركجه‌دير، چونكو به‌تر بو آدلارا بنزه‌يير: ائلنار، گولناز، مهناز، فرناز و ... كيمي آدلار!!!
ويكي‌پئديا‌دا سانازين اينگيليزجه صحيفه‌سي ده وار ايدي، آما گؤردوم اوردا دا ايلك‌ده يازيب بو آد فارسجادير؛ و سونرا يازيب ساناز خالق سئون بير توركجه آد دير و "سان(San)" و "آز(Az)"ين بير بيرلرينه قوشولماغيني آچيقلاييب. نئچه دنه ده اينگليزجه سايت گؤردوم سانازي فارسجا بيلديرميشديلر. باغلانتي وئرميرم ان آزي بورا ايچين قايناق اولماسينلار! يئرينه بورايا بير كليك وورون آللاه سيزه‌ده، هم يازارينا دا بركت وئرسين: "معنی نامهای ترکی".

يوخاري‌دا كي سؤزلر ايله بونو دا دئمك ايسته‌ييرديم كي تورك ديلينه گؤره ايران‌دا چوخ آز بيلگي‌ياييلماق و باشقا طرف‌دن كسينليكله عمدي يانليشلاري ويكي‌پئديا كيمي سايتلارا سوخوشدورولماسينا گؤره، بيزيم دوزگون سؤزلريميزه ده هئچ كيمسه اينانمير و حتي اوسته‌له‌ييب سؤزلريميزه گولورلر. بئله بير اولايين قارشي‌سيني آلماق ايچين بوتون يولداشلار قوللارين چيرمالامالي‌ديرلار. ايش چوخدور و ال چوخ اولماياندا سؤزو ده يئريتمك اولمور. ساناز اولماياق!

Monday, October 25, 2010

گونون گؤروتلري: تيراختور يانداشلاري

ياريش ايچين تعطيل اولمايان گونونون پيس ساعاتي سئچيلمه‌يينه باخماياراق، بير داها تبريزين سهند ايستاديومو يانداش ايله دولدو. گئرچك سونوج، و تيراختورون گؤزل قولونو "توركي" آدلي آراجي(داور!) قبول ائتمه‌سه‌ده، هر حالدا بو يانداشلار همه‌شه قازانيرلار و قازانديريرلار منجه. اللرينه ساغليق؛ ياشاسينلار:




گؤروتلري سالان: فریدپوراحمدنیالی
قايناق:‌ http://www.tractorfc.com

Sunday, October 24, 2010

ايرقچي ديزي‌لرين سيرتيق قاديني

يئني‌گون(نوروز) بايراميندا تيلويزيون دا ايكي دنه سئريال وئريردي؛ هر ايكيسينده ده بير تورك لهجه‌لي قوجا آروادي  اوخشار نقش ايله دلقكليك ائديردي. سؤز قابي‌سي دا بو ايدي : "از اينتئرنئت ياد گرفتم"(اينتئرنئت‌دن اؤيرنميشم). سئرياللارا نئچه ده‌يقه‌دن چوخ باخماديم. باشقالار دا باخاندا دا، ائله او قوجا قادينين ائنتئرنئتدن باش چيخارتماق سسي گليردي. او قدر زهله‌م گئديردي هئچ باخميرديم گؤرم قونو نه ‌دير!

اوروجلوق آييندا دا بير داها بو قادينين سسي‌ني باشقا بير سئريال دا ائشيتديم. گئنه ده اونون سؤز قونوسو ائنتئرنئت باجاريغي ايدي و رولو دا فرعي بير رول ايدي. آما بوتون صحنه‌لر ده دوزسوزلوق ائديردي.

بير ايكي آي اوروجلوق دان اؤتور، و باشقا بير سئريال‌دا ائله همن سيرتيق قادين گينه ده تاپيليب‌دير. عجيبه غريبه‌دير كي گينه‌ده سونسوز بير اتي آجي‌ليقلا اينتئرنئت اينتئرنئت ائدير! بو دا توركلري يئني قایدا دا و مودئرن مئتود ایله اله سالماق‌ديردا. توركلرين اللرينه سوپورگه وئرميرلر، طعنه ايله دئييرلر سوپورگه‌چي دئييل‌سينز حتمن تئكنولوژي‌دان باش چيخارديرسينيز دا!

سانكي او تورك قادين قزوين، همدان يا زنگان توركلريندن دير*. آللاه نئچه تومن پول اله گتيريب و آدليملانماغين اوزونو قارا ائتسين. باشقا توركلر بئله دلقكليك ائدنده آدام بير جوره دئييردي اؤتور**. آما بو يئني كشف اولونموش قوجا قادينين اؤز كيمليگيني و آناديلي‌نين اله سالماغي فرقلي دير رسمن!

بير سورغوم دا وار بو تيلويزيون‌دا اصطلاحن گولونج و كومئدي سئريال دوزه‌لدنلر ايله: بو فيلملرينيزي فارسجا دان سونرا باشقا بير ديله چئويرسه‌نيز گئنه‌ده تاماشاچيلاري گولده‌ره‌جكسينيز يوخسا يوخ؟!!!

تورك ييلماز آدلي يولداشين يازي‌سي‌ني بو قونو دا اوخويون: "خوش‌نشين‌ها".

اونودوردوم ها! بوگون تيراختورون تئهرانين ايستيقلال ييغماسي‌ايله اؤنملي بير ياريشي اولاجاقدير. يازيقلار اولسون تبريزه گئده‌بيلمه‌ديم. ايستاديومون سيخ سيخ دولماغي‌نين احتمالي چوخ‌دور. تيراختورا باشاريلار و اونون بوتون آلقيشلايانلارينا سئوينجلي بير گون ديله‌ييرم.
آزربايجان وار اولسون.
سئريال دوزه‌لدنلره ده آللاه شفا وئرسين.

---
* - جام جم گونده‌ليگينده‌كي بيلگي‌لره گؤره بو قادينين آدي حليمه سعيدي،‌ و قزوين‌لي تورك دور. قوران ساواد دير، آما بئله بير سؤز دييب: "بهتر از باسوادها ديالوگ مي‌گويم(ساوادلي‌لاردان ياخشي ديالوگ دانيشيرام)"! يازيغا بيري دئسين سني توركلري و اصل‌ده اؤزونو ياخشي اله سالماغا گؤره اويونچو سئچيبلر، ديالوگ ياخشي دانيشماغينا گؤره يوخ. ياخشي ديالوگ باشارسايدين بير دنه ده هوشلو باشلي و تؤره‌لي رول وئره‌رديلر سنه، و ده‌يقه باشي دئمه‌زدين از اينتيرنيت ياد گيريفتم!

** -اؤرنك ايچين اخراجي‌ها فيلمينده اكبر عبدي و اونون فيلم‌ده كي آناسي مينا جعفرزاده؛ جعفرزداه‌نين فارسجا فيلملرده لهجه‌لي دانيشماغي بئله آداما ده‌يميردي و اولابيلر اويونچو قصد ايله توركلري مسخره ائتمك كؤنلونده ده‌ييل. بو قادين ايندي تبريز كاناليندا "دوز چؤرك" آدلي توركجه بير سئريال‌دا فيلم اوينايير.

ی. س:
تیلویزیون‌دا ده‌یقه باشی آدینی چکدیگیمیز سئریال رئکلام (تبلیغ) اولونور. رئکلامین یاریسیندان چوخو ائله بو قادینین دانیشماقلارینی گؤسته‌ریر. "خان ننه" دئیه‌نده همه‌شه شهریارین گؤزل، نوستالژی‌لی، و اوره‌گی سیخیب، گؤزو یاشا دولدوران شئعری یادا دوشور؛ آما بو اوتانمازلارین گؤرونتولرینده  آزربایجان "خان ننه"سی اوزدن ایراق، اؤزونون اوزون قولاغ اولدوغوندان شکلی‌دیر و دلقک اولوب:



Sunday, October 17, 2010

گؤزله‌يه‌ك ائنسيز يوللاريميزا داش تؤكولمه‌سين

يولداشلارين بيري‌سي دئيير سن‌ده سايين حئيدر باياتين آلما يولونون كسيلمه‌يينه گؤره بير شئي ياز! من‌ده ده دئييرم آخي نه يازيم؟ بيزيم محكوم ائتمه‌ييميز تكجه بير نه‌دن اولابيلر بیزیمکی‌لر ده باغلانسين. دوزدور آلما يولونون كسيلمه‌يي اوزوجو بير اولاي دير، هر حال‌دا بيلاغين باغلانماغي دا آدامين جانين دينجه‌لدر.  اوزون بير سوره ده، يئني بير قونو تاپماق و اونو بيلاق دا يايماق، و بير بيلاغين نئچه ايل گونجه‌ل ساخلاماغين چتين‌ليگي بير باغچانين ياشيل ساخلاماغي كيمي چتين بير ايش‌دير.

توركجه ياييلان بيلاقلارين ايچينده آلما يولو چوخ اؤزل بير يئره صاحيب اولماق نه‌ده‌ني‌نين بيري‌سي، او بيلاغین يازاري‌‌، ياني حئيدر باياتين، كيمليگي بللي اولماق ايدي. كيمليك تانينميش دورم‌دا اولاندا، بيلاغين يازاري دا سوروملولوق ايله دوشونجه‌لر و سؤزلري‌ني اورتايا قويوب، و هر بئينينه گلن سؤزو و ديلينه گله‌ن ايمكانسيز ايشلردن يازمير. آلما يولو دا بئله بير بيلاق ايدي. من ياديمدا اولانا قدر، يازار چاليشيردي نه دامين بو تاييندان دوشسون و نه او تاييندان. آنجاق منه چوخ ماراقلي‌دير كي بيلم اورتام و مؤعتديل  فيكيرلري يايان آلما يولو بيلاغي‌نین كسيلمك نه‌دني نه اولابيلر. بونو ياخشي آچيقلاساق باشقا بيلاقلارين كسيلمه‌يي‌نين قارشي‌سي‌دا آلينا بيلر. آلما يولونون چوخلو يازي‌سي واردير و منجه آلمايولو سون يازيلارينا گؤره كسيلمه‌يي‌نين احتمالي هر نه دن چوخ‌دور. سون يازيلارين باشليقلاري بونلارديرلار:

  1. قرائت یک بیت شعر ترکی توسط عیسی جعفری نماینده بهار و کؤورنگ(کبودرآهنگ) در صحن مجلس و حواشی مربوطه!
  2. شعر معاصر ترکستان شرقی به روایت رسول یونان
  3. نسخه خطی ترکی تذکره شیخ صفی الدین اردبیلی وارد بازار نشر شد
  4. نوزادان به زبان مادری گریه می‌کنند
  5. وبلاگ تانیتیمی: چوبان ییلدیزی
  6. علی دایی، پرداختن به معلول و غفلت از متغیرها
  7. مسیج مکتبی / توپلاییب اینجه له ین : دوکتور حسن – م. جعفرزاده
  8. ربیعه قدیرین آذربایجان قزئتی ایله دانیشیغی
  9. آنلاین کؤچورگه
  10. آیا مساجد هم تـاوان تـرک ستیزی را می دهند؟!
  11. نقش ارسين بر ديوار
  12. این مرده ریگ چنگی به دل نمی‌زند
  13. اؤزموزدن خبرسیزمیشیک بیز / ایواز طاها
  14. تورکوموز قوتاردی بابا
منجه فارسجا يازيلارين باشليغي‌ني نئجه سئچمك هر نه‌دن اؤنملي‌دير. گؤرورسن هئچ بئله سـانسور اولمالي سؤز آرادا يوخ‌دور آما اويغون باشليق سئچمه‌مك باعيث اولور، ائله او سنين اساس سؤز و دوشونجه‌ن آنلاشيلسين. دوزون سؤزو بو يازيلارين هئچ بيري‌سي تانينميش قيرميز سينيرلاردان ائشيگه چيخماييبلار، آنجاق اونونجو يازي‌نين باشليغي منجه تحريك ائدن بير باشليق دير؛ سانکی بو ايسلامي اؤلكه‌ده توركلرين مچيدلرينه‌ده رحم اولمور. بئله بير باشليق نئجه چوخلو اوخوجولاري اؤزونه ساري چكسه، آنجاق توركلرين علئيهينه ايشله‌يه‌نلري ده اؤزونه ساري چكيب و اونلارين عكس العملي دوغال دير. توجه اولسون كي من دئميرم اونلار بو ايشه حاقلي‌ديرلار؛ من دئييرم نئچه ايلدير بير دوشرگه يوخسا بالاجا بير بيلاق ايله خالقا بيلگي يئتيريريك، دويغو ايله بو قدر امك بيتمه‌ني حئييف ائتمه‌يه‌ك. اؤرنك ايچين دئديگيميز باشليغي باشقا بير فورما دا دا دئمك اولار: "اردكان‌دا آدي توركجه اولان مچيد اوچ‌دو".  بئله يازماق منجه تورك اوخوجولاري اؤزونه ساري چكه‌جك، آما بهانه آختارانلاري يوخ!

البته آلمايولونون باشقا آديزي قيزاران آي‌دا دا كسيلميشدي و اؤتن ايل‌ده كي يازيلارا دا بير باخديم. بو يازيلارين ايچينده موجتهيد شبيستري و مونتظيري‌‌نين ائتنيكلردن ائتديگي دفاعا گؤره بير يازي گؤردوم. اولا بيلر بئله بیر یازی‌دا اينتئرنئت ده كي يولو باغلاماغا آمانا بند اولانلاري، تحريك ائتسين. تکجه كيمليك و وارليغا قونوسوندا يازماق کولتورل-توپلومسال آنلاشیلیب آزجا دؤزولسه‌ده، سياسي ساواشانلارين بو قونويا توخونمالاريني فارسجا بير يازي‌دا مطرح ائتمك، دوزگون ايش دئييل و آرخایین اولون بو دؤزولمه‌یه‌جک. بير سؤزو ده دئييم، اؤز آزربايجانيميز و ايران سينيرلاريندا ياشايان توركلرين سورونلارينا گؤره اولدوقجا قونو چوخ‌دور، چاليشاق بونلارا گؤره داها چوخ يازاق، دئميرم اونلار گؤره هئچ نه يازيلماسين، بلكه اؤزوموزه گؤره او قدر يازاق كي اونلارين سايي‌سي چوخ بيلينمه‌سين.

هر حال‌دا سؤز اؤزگورلوغو اينسانين الهي و دوغال بير حاقلاريندان دير. يوخاري‌دا كي سؤزلردن ده هدفيم تكجه دوشه‌رگه‌لرين كسيلمه‌مه‌يي‌نين قارشي‌سي‌ني آلماغا گؤره اؤز دوشونجه‌مي بيلديرمك ايسته‌ديم. انشاللا كي اينتئرنت‌‌ده آلمايولو كيمي ده‌يه‌رلي سايتلارين يولو بو تئزليكه آچيلسين. البته بيزي قاپي‌دان ايچه‌ري قويماسالار باجا دا ايچه‌ري تپيله‌ريك؛ انشاللا بايات به‌ي يازماغينا دوام وئرسين. آما نه‌جور اولاندان سونرا كسيلميش دوشه‌رگه‌لرين موخاطبي آزالير و بو اوزوجو دور.

سون‌دا بونو دا وورغولاييم بو سؤزلر ايله بونو دئمك ايسته‌ميرم، من اؤز بيلاغيم‌دا كسيلمه‌لي سؤزلر يازميرام و منيم داورانيشيم هر نه‌دن ياخشي‌دير. اولابيلر مينم بيلاغيمين اوخوجوسو و گؤروجوسو آزدير و بوردا كي سؤزلري حيسابا قويماماغا گؤره، كيمسه‌نين بورا ايله ايشي يوخدور. اؤز آراميزدي، سونوج بئله اولور كي  بيلاقلاريميزي او يان- بو يان‌دا چوخ دا تانيتماياق و آز تبليغ ائده‌ك. گوجسوز بيلاق يازانلارين چوخالماسي دا پيس دئييل. حئيدر باياتين يوزده يوز يازي‌سي ياخشي اولسا، مين دنه من كيمي پيس يازان‌دان بئش اون دنه اوخومالي يازي چيخار!!


ي.س:
 آلما يولونون كه‌سيلمه‌يينه گؤره باشقا بيلاقلاردان يازيلار(البته بونلار دا آلما يولو كيمي ياخشي يازيرلار، اوز دن ايراق كه‌سيلمه‌لي‌ديرلر!):

Thursday, October 14, 2010

نووور گؤلو و قيزيل‌آلالار دا خطرده


آي آللاه، من بيلميرم بونلارا نئیله‌میشیک؟! هانسی قوشلارینی قاچیردیب قیسیر ساتميشيق كي ايسته‌ييرلر آزربايجانين حتي ياشام اورتامي‌ و دوغال ان جذاب گؤزلليك‌لري‌ني ده آرادان آپارسينلار؟ اصلن بيز بير ايش گؤرموشوك. نووور(Npvur / Nour) گؤلونون سوچو(گوناهي) نه؟ نووور گؤلونون قيزيل‌آلالاري‌نين سوچو نه‌دير؟ اولمايا اونلارين سوچو توركجه آدلانديريلمالاري‌دير؟ گتيريبلر بو بالاجا گؤله كپور باليغي تؤكوبلر! بو باعيث اولوب قيزيل آلاباليقلاري‌نين ياشاملاري اوردا خطره دوشسون. خبره* گؤره نووور گؤلونده قيزيل آلا باليغي آزاليب و يئرينه بوللو كپور چيخير! قارماغا ايليشن يازيق قيزيل‌آلالار دا بالاجالاشيبلار و قديم كيمي بؤيوك و آغير دئييللر.


توريست و گه‌زيجي جنابلاري! اولماز گله‌سيز او يئيه‌سيز تور، توزاق، و قارماقلاري‌نيزي گؤل ايچينه ساللاماياسينيز؟ بير آز قارنيزين قاباغين آليندا.
ايندي سوروملولار ايله بير سؤز:
اورمو گؤلونو كي قورودوب، آرتئميالاريني پيس گونه سالدينيز. توتاق ياغيش ياغماماق اورانين قوروماغينا بير نه‌دن دير. بورا نه دئيه‌ر؟ بورا نه‌يه كپور تؤكوبسونوز آخي؟ سيمنان شوراكئتلري‌‌ني خزرين شيرينلشديريلميش سويو ايله سووارماق ايچين ميلياردلار تومنينين مين‌دن بيريندن واز گئچديك! اورمو گؤلونو آغلاماقلا دولدوراجاييق؛ اؤزوموز بيله‌ريك اؤز تانريميز. آما بو بالاجا نووور گؤلونه ال وورمايين.

---

* - جام جم گونده‌ليگي: اردبيلين نووور گؤلو ياشام اورتامي فاجيعه‌سي اوزه‌رينده‌دير (درياچه نئور اردبيل در معرض فاجعه‌ زيست‌محيطي)

Monday, October 11, 2010

گونون گؤروتو: تيراختور اويونچولاري‌نين آزربايجان رقصي

تيراختور و بلديه اويونلاري اوست اوسته گلمك ايچين بيلميرديم نئيله‌يه‌م! شهرداري‌يا، پيروزي اويونوندان سونرا كي اولايلارا گؤره گؤره داها آرتيق يارديم گؤسترمه‌يين لازم اولماغي‌ني دوشونوردم. آخيردا گؤردوم گئديرم كرجه‌ ساري! كرج و تئهرانين لاپ او قالين قه‌ييم توركلريندن اوچ يا دؤرد يوز نفر، گلميشديلر بلديه‌نين آلقيشلاماغينا. بونا گؤره دئييرم كي بلديه‌ني آلقيشلاماق، گئرچك‌دن روحيه، اورك، و فوتبول‌دان اوستون دويغولارا صاحيب اولماق ايسته‌يير. هر حالدا ياشاسين بلديه! مايلي كوهنين بيلديركي تيراختورو اوتماقلارينين اؤجونو آلدي؛ تيراختورون اوچ-بيره اوتماق سونوجو دا سئوينجي ايكي قات ائتميشدي. سئوينج ايله ايستاديوم‌دان چيخديق(*.ی. س.).

گئجه ايدمان خبرلرينده تيراختورون بيرينجي قولونو كرار جاسيم ووراندن سونرا باشقا اويونچولار ايله گئتديلر كورنئر بايراغينين يانيندا دوزولدولر. آما بيلمه‌ديم جريان نه ايميش؛ ايندي يولداشلاردان ائشيديرم كي ايراقلي عرب جاسيم كرار، برازيللي پيمئنتا، كيرمانلي عليزاده ، شيرازلي محمد حسن ابراهيمي ، و باشقا اويونچولار تاماشاچيلار قارشي‌سيندا لزگي و يا آزربايجان رقصي ائديبلر. ائله‌بيل ، ياواش ياواش تيراختورون اولوسلار آراسي اويونچولاري‌دا يانداشلارين كولتورل ائتگي‌سي آلتيندا، اولورلار آزربايجانين كولتورل تمثيلچي‌لري!
ياشاسينلار.

ايرنا دا ياييلميش بو گؤروتو ايدمان گونده‌ليكلري ده ياييبلار:


بو دا اويناماغين سونو، و قول وورماغا داوام وئرمك ايچين ياريشا دؤنمك:


ی. س:
تراکتور اف.سی. سایتی، قول‌لار و حساس لحظه‌لردن بیر اوچ ده‌یقه‌لیک فیلم یاییب. ایچینده دئدیگیمیز اویناماق‌دا وار! من‌ده تکجه‌ قوللار و اویناماق آنلارینا لزگی اویناماق موسیقی‌سیندن بیر پارچا آرتیردیم؛ آشاغی دا باخابیلرسینیز(داها کئیفییتلی گؤرمک ایچین بورادان دانلود ائتمه‌لی‌سینیز):


* ) ی. س:

کئچن آی تئهرانین تختی ایستادیوموندا تیراختور - ایستیل آذین اویونوندا تاماشاچیلارا دیجیتال کامئرا اؤزلری ایله ایچه‌ری آپارماق ایچین ایزین وئریلمه‌مه‌یه گؤره(دادلی سونوج)، تئهران دا کامئرا دولاندیرماق‌دان گؤزوم قورخوب! بو دؤنه کامئرا آپارمادیم. آما موبایل ایله نئچه دنه گؤروت و اوینار گؤروت (ویدئو) چکدیم؛ کئیفیت‌سیز دیرلر آما باخماغینا ده‌یرلر.
گؤرمک ایچین سول‌دا کی عکسین اوستونه کلیک ائدین.

Sunday, October 10, 2010

باهار-كوره‌نگ وكيلي توركجه دانيشيب! سسي‌ني چيخارتمايين

اولابيلر سيز ده ايراق(عراق) و افغانيستان مجليسلري و شورالاريندان گؤرونتو گؤروبسونوز. ايراغين نوواب(Novvab) مجليسي‌نين باشقانلاري اوتوران يئرين داليندا عربجه و كوردجه(بالاجا فونت‌‌دا اولور اولسون) و افغانيستان شورالاريندا پشتون، ده‌ري و حتي اؤزبك توركجه‌سينده يازيلار گؤرونور. بونلار بيزيم موسلمان قونشولاريميزديلار و چئشيدلي چتينليك‌لر و سورونلار ايچينده چاپالاسالار دا، اؤز ميليونلار وطنداشلارينين آناديللرينين رسمي اولاراق ايشه آپاريلماسي‌ني چؤزولموش دوروما گتيرميشلر. بو دا قالسين كي آناياسالاريني بو نئچه ايلين ايچينده يازميشلار.

ايندي گلين باش ووراق اؤز مجليسيميزه. ايران ايسلام جومهوروسو آناياساسي اساسينا قورلموش مجليسميزه. بيزيم آناياسانين اون بئشينجي اصلي تكجه فارس ديلي‌ني رسمي تانيييب و فارس اولمايانلار دا آزاد ديرلار اؤز آناديللرينده قونوشسونلار! آدلاريني چكديگيميز چتينليكلره ايليشميش قونشو اؤلكه‌لرين آناياساسي كيمي اصطلاحا غربي مودئللره تاي مترقي و گليشميش دئيييل، آنجا چوخلو شوكور يئري واردير كي وطنداشلار تورك اولسالار، و اتفاق‌دان ميللت وكيلي اولوب و حوكومتين مذهبي سياسيتلرينين آرخاسيندا دوروب بحرئين شيعه‌لريندن(قاراباغ دا يوخ ها!) معنوي ساوونماق وئرمك ايچي بير ايكي توركجه قوشما اوخويا:

بیز بنی‌فاطمه‌ییك، ظولمه‌ اه‌ییلمز باشیمیز
جانیمیزدان گئچريك، تا قالا سالیم دینیمیز

و بئله چاغلار دير كي بيلينير، بير سايي گئجه گوندوز ايسلام داشي‌ني دؤشلرينه وورماق ايچين ايسلامي شورا مجليسينين صندلي‌لرينه يئيه‌ اولان آداملار، مجليس ايچينده ايسلام و تشيع دغدغه‌لري يوخدور؛ حالبوكي بيز كيمي كيمليك‌چي‌ليك احوالات دا اولمايان تورك ديللي وكيلي اؤز دويغولاريني بحرئين شيعه‌لرينه سؤيله‌مك ايچين آناديليني ايشه آپاريب‌دير. آنجاق تئهران ناديران آدلي وكيللرينين بيري‌سي بير نادير اولاي‌دا دوروب اؤز اعتراضي‌ني بئله بيلديريب: "اون بئشينجي اصله گؤره بو ايكي وكيل گرك توركجه دانيشمايارديلار... باشقانلار هئياتي ديققت ائله‌مه‌لي‌دير فارسجادان سونرا باشقا ديله دانيشيلماسين و ان آزي بئله واختلاردا،  چئويري‌سي(ترجومه‌سي) مجليس راپورتلاريندا ثبت اولونماق ايچين وئرسين".

ايشيمزه باخ! تورك ديللي وكيللر گونده گئديب اون بئشينجي اصله گؤره دانيشمادان، بير فارس ديللي وكيل گليب ترسينه داورانيشلا بيزي بوشلو(بورجلو) دا چيخاردير! تورك ديللي وكيللرين آزربايجانليلارين ديل و كولتورل حاقلاريني اونودوب و بحرئين شيعه‌لري فيكرينده اولماق قونوسوندا دانيشماق يئرينه گؤرك تئهران نوماينده‌سي نه‌دن بئله قاباق‌دان گلميشليك ائديب. اولابيلر شئعري تريبون داليندا اوخويان وكيل، اردبيل، زنگان، تبريز و يا باشقا تورك ديل‌ده دانيشماغا تانينميش بؤلگه‌لردن اولسايدي مجليس‌ده اوتوران بوتون ايكي يوز وكيلين هاميسي احسنت احسنت دئييرديلر؛ آما وكيلين بؤلگه‌‌لرينين تورك  ديللي اولماغي گيزلي قالماغا چاليشمالاري اوزون سوره‌دير گؤروروك: همدان اوستاني‌نين قوزئي بؤلومونده يئرله‌شه‌ن باهار(بهار) و كوره‌نگ (كبوتر‌آهنگ) بؤلگه‌لري!

كسينليك ايله ناديران آدلي تئهران وكيلي بيلير كي، باهار و كوره‌ن وكيلي‌نين شئعرينده باشقا سؤزلر و اؤرنك ايچين حوكومتين ضررينه اولان آنلاملار اولسا، اوندان داها انقلابي و حوكومتچي تبريزلي، اورمولو و اردبيللي وكيللري مجليس‌ده دولودورلار و اوندان قاباق توركجه شئعري دئيه‌ن وكيلين ياخاسي‌ني ائله او آن توتارديلار. ناديرانين ايشينه تكجه بير نه‌دن بئيينلره يئتيشير و او دا بو دور كي او دا تورك ديلينه قارشي اولان شوونيستي دوشونجه‌لري ائتگي‌سي آلتيندا اولماق و اونونده سورونو تورك ديلي‌دير. او بير عمومي افكار دا تورك ديللي اولماغا تانينماميش بؤلگه‌ وكيلي‌نين رسمي بير تريبون داليندا توركجه دانيشماغي ايله اؤز كيمليك و ديلي‌ني تانيتديرماغي گؤره‌نده هوركور. او اساس‌دا رسمي تريبون داللاريندا توركجه دانيشماغي بير دب و عورف اولماق‌دان قورخور.

اويان بويان‌دا بو خبره سؤز قونوسو اولوب و تارتيشمالار اولور. بير سايي بيلمزليك و منطيق‌سيزليگه گؤره يوخ، بلكه  اصل‌ده تئهرانلي شوونيسم ائتگي‌سي آلتيندا توركلر و تورك ديلي‌ ايله سورونو اولان وكيل‌ كيمي ديرلر. بئله دئييرلر كي بو حوكومتين اؤز ايشلريندن دير! ايسته‌ييرلر ائتنيكلر آراسيندا اختلاف ياراديب و سونرا باريشديريب(!) و حوكومت ائتسين! آنجاق، جاواب‌دا اونلارا دئمك اولار كيمليك سورونو آزربايجانين قديمي نسيللري (شمسي قيرخينجي اون ايلليك و اوندان اؤنجه*) ايچين ايندي‌كي نسيللر كيمي دئييل و يئني بير قونو دور. چوخلو نه‌دنلره گؤره ماجال و فورصتلري اولماييب چاغداش نسيل كيمي ايران دا كي گئنيش آسيميلاسيونون عاقيبتلري و سونوجلارينا متوجه اولسونلار. و مجليس‌ده توركجه دانيشماغا قارشي دورماق كيمي اولايلار حتي حوكومتين يوخاري سطحلرينده ايسه باعيث اولور، اورادا كي تورك ديللي سورملولار باشلارينا گئچميش بؤركون بويو ايله تانيش اولسونلار. البته ويجدانلي اولسالار اعلمي كيمي حساس اولوب و قضيه‌نين دالينا دوشورلر، ويجدانلاري اولماسا و ميرحوسئين كيمي خيرتده‌يه كيمي آسيملاسيون و كيمليگي‌ني اونوتماق گؤلونده باتسالار اؤزلريني خاتمي كيمي جوك دئيه‌نلرين قارشي‌سيندا كارليغا وورارلار.  بئله بير دورومو ايدمان دا ايسه گؤرمك اولور؛ تبريز ده كريم باقيري و علي‌ دايي‌يه غئيرت‌سيز دئييله‌نده بيري‌سي باشيني ساليب آشاغي آغلايير و ان آزي سوسور و اولابيلر بير شئي‌لري دوشونور، آما باشقاسي اوزوسوسوزلوقلا اؤز خالقي‌نين قارشي‌سيندا دورماق ايسته‌يير آنجاق آياق آلتيندا قالير!

 ---
آچيقلاما:
يوخاري دا كي يازي "قرائت یک بیت شعر ترکی توسط عیسی جعفری نماینده بهار و کؤورنگ(کبودرآهنگ) در صحن مجلس و حواشی مربوطه!" يازي‌سي ايله ايلگي‌لي فئيس‌بوك دا فارسجا يازديغيم "توضیحی در مورد خواندن شعر ترکی نماینده بهار و کبوترآهنگ(كوره‌نگ) در مجلس و اعتراض شوونیستی یک نماینده" مقاله‌سي‌نين توركجه‌ چئويريلمه‌سي ايدي.


---
* - يئني نسيل اله‌شديرير

Wednesday, October 6, 2010

دئه قارداش، دئه! حاققين دير


تبريزده علي‌دايي و باقيري‌نين قولاقلاري بورماق گله‌جك ايچين نه‌قدر ده ياخشي و فايدالي اولسادا ، قيسسا زامان ايچين بير آز ضررلي اولدو. فئدراسيون‌دا كي‌لار ايستاديوما گئدنلري آغير جزالانديرماق ايچين، ايندي‌يه‌دك بير يئته‌رلي بهانه تاپابيلمه‌ميشديلر؛ آما سانكي بيزيم آتالار سؤزونو ائشيتميديلر:" آغاجي ايچيندن يئيه‌ر قورد!" و جانيميزا قورد سالماق ايسته‌ديلر. آزربايجاني‌ دا ايچيندن يئيه‌ر مانقورد!

باشقا يئرلرده لاپ پيس يامانلايانلاري جزالانديرماسالار دا؛ مانقورد اولدوزلاري گتيريب ائله‌ديلر اؤز ميكروفونلاري! او دا آغزيندان گله‌ني آزربايجانا دئدي. سونرا دا ايكي نيشان ووردولار. توركلرين لاپ تانينميش آدامي ايستاديوم‌دا كي سؤزلري و دئمك "ايستكلري" اله‌شديريدي و هم‌ده كي فوتبول سئون آما كيمليك‌چي ايستاديوما گيرنلرين قاباغيني آلماق ايچين پلانلار تؤكولدو. و سون‌دا خبرلر ده گلدي بلديه(شهرداري) نين ائو اويونلاري ايچين تكجه 1500 نفر اونايلانميش و يانداشليق كارتي آلان آداملار ايستاديوما گئده‌بيلرلر! اولابيلر بو اويونو تيراختورون باشينا دا گتيره‌لر، آنجاق تاماشچيلار تكجه و تكجه گرك يامان و حتي هويلاماغي ده قيراغا قويمالي‌ديرلار. منجه دايي و باقيري‌نين هويلانماغي اولدوقجا يئترلي ايدي و بوتون مانقوردلارين حيساب لاري اللرينه گلدي. هامي‌نين دا بئيني وار و هر نه‌يي دوشونور.

بو اولايلار گؤستردي كي يانداشلارين تكجه و تكجه اؤز تيملري‌ني آلقيشلاماق، ياشاسين آزربايجان دئمك، و كيمليك‌ هارايلامالاري آزربايجانين وار اولماغيني ايسته‌مه‌يه‌نلري ركيك يامانلاماق‌دان دا پيس ايميش؛ آما آچيقجا، موستقيم و بيلاواسيطه جزالانماق بهانه‌سي اله وئرميرميش. بيزيم آراميزدا اولان هيجانا خاطير هردن يامان دئيه‌نلر بونو باشا دوشمه‌لي‌ديرلر؛ اونلار گرك بونو بيله‌لر كي ساده‌جه وارليغيميز و كيمليگيميز قونوسوندا سؤزلريميزي دونيايا چاتديرماق اولدوقجا يئترلي‌دير و كيفايت ائدر. بيزه وئريلن يامانلاردا تكجه بيزي يامان وئرمه‌يه ساري تحريك ائتمك و يؤنه‌تمك‌ ايچين‌دير. ائشيتديگيميز يامانلاري اؤتورمه‌لي‌ييك. تيراختورون گوجله قاباغا گئديب و بوتون يئرلري شوخوم وورماسي‌ قارشيسيندا اولان موقاويمت، طبيعي و دوغال‌دير. بونلار تيراختورون بؤيوك ته‌كه‌رلريينين آلتيندا كي سورتوشمه و اصطكاكلارديرلار!

تبريز ده تيراختور - ذوب آهن اويونوندا كي گؤتوردويوم نئچه دقيقه‌ليك فيلملره باخيرديم. بيري‌سي بير داها مني ماراقلانديردي. ايستاديومون او ياني "تورك ديلينده مدرسه" دئيه‌‌نده بيزيم طرف‌‌‌دن "اولمالي‌دير هر كسه" يانيتين سسي گوجسوز ايدي. يانيميزدا كي تاماشچيلارين بيري‌سي هامي‌يا اوجا سس ايله‌ده يوخ، بلكه هيجانلا دئييردي: "دئه قارداش! دئه! حققين‌دي!". البته بونون سسي‌ني تكجه اون-اون بئش نفر ائشيتدي، آما مينلر نفرين سسي بيردن گوجلندي! يقين كي بونا تاي آداملار ايستاديوم كي هئچ، خالق آراسينين هر يئرينده حضورلاري اولاجاق‌دير و دايي‌نين سؤزلرينه ده‌يه‌ر وئرمه‌دن اؤز يانينداكيلارا دئيه‌جكلر:

"دئه قارداش، دئه! حققين‌دي..."


Sunday, October 3, 2010

كندين بولاغيندا توركجه دانيشماق، گولوستان باغيندا فارسجا قيريللاتماق

الوداع آناديلي يازيسيندا كي يوروملار منه دئييرديلر هر نه ياخشي يوخسا پيس گؤرمك اولماز و آزربايجانين اوستان راديو - تيلويزيون كاناللاريندا دا ياخشي وئرليشلر ياييلير و ايچلرينده ايسه ياخشي و دوزگون توركجه دانيشانلار دا تاپيلير. داش قاپي‌نين يازاري دا دئيير دي:
درد دردی گتیریر. نه قدر دئییرسن ده قورتولمور. بونلارا یاخشی باخمالی‌ییق. یاخشی گؤرمه‌لی‌ییک، اؤزگه‌لشمیش‌لری، مانقورت‌لاشمیش‌لاری، اؤزگه‌لشه بیله‌جک‌لری.
من ده دئديم بوندان بئله هر دن پيس گؤروشلو گؤزولويومو جيبه قويوم و ياخشي باخيشلي گؤزلويو تاخيم. دوغروسو ائله ده دئييل هئچ بيري‌سي‌ني سئومه‌يه‌م و بوتون آپاريجيلاري اتي آجي بيله‌م. اؤرنك ايچين آخشاملار دا كندلره باش‌چه‌كه‌ن آپاريجي‌نين كندلي‌لر ايله بير يئر ده اوتوروب دانيشماسي، اونلار ايله شوخلوق ائله‌ييب باش باشا قويماسي، كندلي‌لردن ياشاماق، ايش و ساغلامليق چتينليكلري سوروشماق، و هر دن  ده گؤزل توركجه باياتيلاردان دوزگون ديكلمه‌ ائتمه‌سي منه چوخ ياپيشير. ائله بيل چيخيشين آدي "بيزيم كند" دير. نئچه دنه بئله آپاريجي اردبيل، اورمو و زنگان تيلويزيونلارينا اضافه اولونسا چوخ ياخشي اولار.  البته اينشاللا گؤز ده‌يمه‌سين. بيز هر نه‌يي تعريف ائتسه‌ك گؤره‌رسن هر‌نه‌يي ييغيشديرديلار.

آما اولمور كي اولمور! بو سؤزلري ياياندان اؤنجه، "گونلوكلريم"، "اؤزوده فارس‌دير" يازي‌سي ايله گونجه‌له‌نير!  تبريزين ايسناسيندا كي يازيلميش بو سؤزو حتي ياخشي گؤرن گؤزلوك داليندان دا آدامين حاليني بولانديرير:

اجرای خوب و مسلط مجری مراسم از همان دقایق آغازین مشهود بود.وی در فواصل مختلف ابیاتی از مولانا و قسمتهایی از مقالات شمس را از حفظ و بدون لهجه(!) و تپق قرائت می کرد.
( آپاریجی یامان یاخشی و «مسلط» ایدی؛ لهجه‌سی ده یوخ ایدی!)

قونيا و توركييه دا فارسجا قيريللادان يوخ، بيلن اولورسا دا او اركك لهجه ايله مئولاناني ياخشي بيلمه‌ديكلري ديللرينده دونيا دا ان آدليم شاعير ائتميشلر و بو دا قالسين كي مئولانا عيرفاني قونوسوندا هئچ ديلين اؤنمي يوخدور. آنجاق قوجا تبريز يئرينده اوتوروب آناديلي‌نده بير سطير يازابيلمه‌يه‌سن آنجاق، آپاريجي‌نين لهجه‌سيز فارسجا دانيشماغينا شيشيب افتخار ائده‌سن، سو اولوب اه‌ريييب بئره گيره‌سن اوندان ياخشي دير.

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı