1. مملكتين اينتئرنئتينده گونده بير جوره پيشيك بزهنير. منيم يازيلاريمي اوخويان وارديرسا، مني باغيشلاسينلار. يئني آدرئس ده ( tiraxturum.blog.com ) بولاق آچماق زوروندا قالديم. تيراختورا گؤره يازانلار دا تيراختور كيمي ايش گؤرمهليديرلر! قاباقكي آدريسدن داشينماغين بير نهدهني ده، اوخوجولارين نظر و يوروم وئرمهيي آسانلاشديرماق ايدي.
2. قاييداق تيراختور قونوسونا. كيانينين تيراختور دان قيراغا قويولماق اوستونده، چوخلو يولداشلارلا سؤزوموز چيخدي! آز قالدي آرالار قاتيشسين؛ و هر حالدا گئنه شانسيميز گتيردي بير تههر باغيشلاندي و بوتون قالماقالدا ياتدي. آنجاق آنتاليا اسپور تاخيمينا بئش دنه قول وورماق خبريني بورنوموزدان گتيرن كيانينين آياغينين ازيلمك خبري اولدو. ايلك ده ائله بيلديك آنتاليا قارشيسيندا بئله اولوب؛ آنجاق خبر گلدي يئرلي اويونچوموز، مسعود ابراهيمزاده، دالدان تكل ايله(پيس دوبالاق)، ووروب مئهدي كيانيني شولكوت ائلهييب و سونوجدا كياني بئش هفته اوينايابيلمهيهجك. بيريسي ابراهيمزادهيه دئسين بالامسان؛ مسعود اؤزيل اولماغيني ايستهمهديك ، ان آزي قوي اؤز اويونچولاريميز ايله ايشين اولماسين. اوزوجودور واللا! اومودوموز وار كيانينين آياغي جيددي سورونو اولماسين و بو تئزليكده توختاسين.
3. آزربايجان فوتباليندا بوگونلر ماشاللا حوسئنقولولار آرتير. اؤنجهكي يازيدا بلديهنين يئرلي اويونچولاري و سوروملولارين يئشيچين تيمدن چيخارتماسيندان دانيشديق. بو هفتهده رسول خطيبي بيزي شاشيرتدي. بيرينجي ليگين تيملرينين سهند ايستاديوموندا اويناماقلاري باعيث اولموشدو، اورانين چيمني خطره دوشسون. تيراختور سوروملولارينين بونا گؤره اوياري وئريب، اعتراض ائتمكلري باعيث اولدو ، بالاخره ماشين و گؤستريش فولادين اويونلاريني باغشيمالا سالسينلار. هامي دئييردي بو باعيث اولاجاق بو تاخيملارين دا تاماشاچيلاري چوخالسين. آنجاق ماشين اوتوزدو و رسول خطيبي بو اوتوزماني سالدي چيمنين بوينونا! البته او حاقلي اولابيلر؛ آنجاق آتالار سؤزو ده وار دير گلينين پيس اويناماغينا گؤره. او دا نئچه گون كوسوب تيمدن گئتميشدي دئيهسن! يقين كي رسول خطيبينين بو ايشي اؤزو و يانداشلاريني بير داها چوخالتماق ايستهيهن ماشين ايچين، اصلن ياخشي دئييل و او اؤزونو تيراختور يانداشلارينين قارشيسيندا قويور. بير باشقا سؤز ده بودور، سهندين چيمني خاراب اولسا، بوتون تاخيملارين ضررينه اولاجاق. اقلا تيراختور ياخشي چيمنين اوستونده اويناسين!
4. پيس خبرلر آراسيندا، ياخشي و سئوينديرجي خبر ده واردير و او فردين عابدينينين ياخشيلاشما سورهجينين يئيينلشمهسيدير. اونون ساغ-سول رباطينين پارالانماسي و تيراختوردا اويناماماغي، تيراختورون سونوجلارينا پيس ائتكي بوراخدي. اومودوموز واردير بو تئزليكه فردين تاخيما قوشولوب و تيراختورون ايلك قهرمانايغيندا اؤز غئيرتلي اويونلاري يارديمچي اولسون.
5. ايندي گئدك بير باشقا قونويا! بيلديگينيز كيمي بو گونلر، تيراختورون علئيهنه دانيشانلارين ايكيسي، مايليكهن و دايي قارشي-قارشييا دوروب، و بير-بيرينين جانينا دوشوبلر و آغيزلارينا گلني بير-بيرلرينه دئييرلر. البته دايي ايكي آي بوندان اؤننجه چاليشدي تيراختور يانداشلاري ايله باريشسين، آنجاق هله يئترلي آدديملار آتماييب و بيز ده اونون آرخاسيندا دورماق ايستهميريك. ولي مايليكهن اؤز سؤزلرينده دئييب كي من داييدان 20 ايل تئز شهر گؤرموشم!! ياني، دايي كتدي دير، و بير جوره اردبيلليلري كتدي بيليب. دوزدور مايليكهن اؤزونو ده مدنيت گؤرمهميش بيليب و البته تيراختور - داماش اويونوندا رشتين چؤللرينده اونون مدنيت و كولتور قايناغي اونايلاندي سانكي؛ آنجاق مايليكهن اؤز سؤزلرينه گؤره قولاغي بورولماليدير و بونو بيلمهليدير آزربايجاندا كند - شهر - اوبا يوخوموز و يوكسك كولتورلري واردير، و لازيم دئييل تئهرانا گئديب و اولماميش كولتورل داورانيشلاري اؤيرنسينلر.
---
بو مدتده، تيراختور و آزربايجان ايدمانينا گؤره ياييلميش يازيلار:
