Sunday, June 6, 2010

ياشاسين بير داها توركلشديرن تيراختور

تيراختورون "نقل و انتقالات" سوره‌جيندن چوخ سؤزلر گئدير و بير سايي راضي دئييللر. بونو گؤزله‌ييرلر كي تيراختور آدليم و باهالي اويونچولار آلسين. آنجاق منجه تيراختورا آدلار اويناماياجاقلار. پول اوچون گلن اويونچو چتين‌ليك ايله ميليونلار آذربايجانلي‌نين دويغوسونو دوشونه‌جكلر، و البته پول گؤره چوخلو اولدوزلار الدن گئديبلر و اولابيلر تقصير زامان‌دا اولوب.

آنجاق بو گون ايكي اويونچونون آذربايجانين فوتبول‌دان دا استون كلوبونا قوشولماغي‌دا پول و فوتبول دان اوستون ايدي. بو تيراختورا قوشولماق‌لار وارليق و كيمليك قوخوسو وئرير. من چوخ اومودلنديم. يوزه يوز دئديكلري دوغرو اولماسا دا آنجاق بونا اينانيرام ائل گوجو بونلاري، بؤيوك اولدوزلارا دؤنده‌ره‌جك. بو ده‌يه‌رلي و اؤنملي سؤزلري هادي اصغري آدلي اويونچو دئييب؛ پاس ييغماسينين اويونچوسو ايدي:

مالي چتين‌ليك‌لر كي هر يئر ده وارديلار. من تيراختور اوچون آغ قرارداد ايمضالاييرام. تيراختورون پولو اولانا قدر، قاباق‌جا‌ پول آلميرام.
من چوخ ايسته‌ييرم تيراختور اوچون اوينايام و بير دفه ده اولورسا، اؤ‍ تورپاغيما بورجومو اؤده‌يه‌م.

بير دؤنه ده قويون پولسوز يوردوما اويناييم، هر نه كي پول دئييل (آذربايجان اسپورت).

تيراختورون باشقا يئني اويونچوسو، مرتضي اسدي، مصطفي اكرامي كيمي تئهران دا بؤيوموش توركلردن دير و اؤز دئديگي كيمي كؤكو "قهرمان بئجه‌ردن" اردبيل‌دن دير. بو "صبا" تاخيمي‌نين كاپيتاني ايدي، آنجاق گئچن ايل تبريزده مينلر تيراختورچونو گؤره‌ندن سونرا، تيراختورا قوشولماق آرزوسوندا ايميش(آذربايجان اسپورت)، يوخسا مرتضي اسدي ايسه، داها وارلي كلوبلارا گئده‌بيلرميش.

هادي اصغري، مرتضي اسدي، و البته تيراختورا ان بؤيوك باشاريلار ديله‌ييريك.

ي. س(يايماقدان سونرا):

دئيه‌سن تيراختور كلوبو "هادي اصغري" ايله ايليشگي قورماق خبري‌ني تكذيب ائله‌ييب. و بئله اولسا منيم ده بو يازيمين سؤزلري ‌نين ياري‌سي بوشا چيخير. البته من ده ايسه تقصير يوخدور و اويان بويان دا اوخودوم. بونلاري گؤز اؤنونه آلاراق اوچ سؤز دئمه‌لي‌يه‌م:

1- خبر شايعه اولماسا و گئرچك اولسا كي منيم سؤزلريم يئرينده دير!

2- فارسلار دئميشكن "تا نباشد چيزكي مردم نگويند چيزها"؛ منجه بئله سؤزلر آرادا واردير و آذربايجانلي‌لار ايسه بئله اولايلاري ياخشي قارشي‌لاييرلار. هر حال‌دا هادي اصغري‌نين خبري يالان اولورسا، بير شئي الدن وئرمه‌ميشيك؛ چونكو ال‌دن وئرميشلريميزي چوخ‌دان دير ال‌دن وئرميشيك! و بيزيم  چاليشديغميزين اصلي هدفي الدن وئرميشلريميزي اله گتيرمك دير! يوخسا تورك اويونچولارين چوخوندا بئله دوشونجه اولسايدي كي نه من بوردا يازارديم و نه سيز بونلاري اوخوياردينيز و من ده باسا-باسا "گؤستريش فولاد" كيمي بير آدسيز فوتبول ييغماسينا گؤره تئهران‌دان تبريزه ساري يولا دوشمزديم و تئهران‌دا دا لات-لوت قارشي‌سيندا "ياشاسين آذربايجان" سسله‌نيب و "...ــدير ، و گؤي ائششك" ياماني ائشيتمزديم! هله بونلاردان ساواي، اؤز آراميزدا قالسين، اؤزوموزو قوياق بير ياخشي فوتبول اويونچوسو يئرينه. اؤرنك ايچين هر اينسان، اردبيل‌لي "كريم انصاري‌فرد"ين يئرينده اولسايدي، "بئش يوز ميليون تومن" قارشي‌سيندا باشقا ده‌يه‌رلري اونوداردي. البته من دئميرم او اونودوب، ولي كسينليكله بئله زامانلار آدام ايچين "كيمليك" مساله‌سي‌نين رنگي آزالير. تعاروفوموز كي يوخدور! بو قالسين كي بيزيم چوخوموز بير تيكه چؤرك ايچين هر نه‌يي اونودوروق.

3- قالدي تيراختور خبرلري‌نين رسمي قايناق(منبع) مساله‌سي! ميليونلار تيراختورچو اولان يئرده هله‌ده "تيراختور كلوبو" بللي دئييل رسمي سايتي هانسي‌دير! ناصير شفق گئچن هفته دئدي فيلان سايت(تراكتورسازي اف سي دات كام) بيزيم گئرچك خبرلري ياياجاق؛ تيراختورو دا بيري tractor يازير، بيري tiraxtur  دئيير، ... و خولاصه يوز جوره ايملاسي وار! شفق دن ايستيريك ديل دوداقلاريني دولاشديرماق يئرينه تيراختورون رسمي سايتينا دا بير فيكر ائله‌سين.

3 comments:

یوسوف said...

سلام آیدین بگ
1. بیر سوروم وار: بو یاریم فاصیله نی نه جور قوللانیرسیز؟

2. کئشکه پوستلارینیزا ی.س. ی آرتیراندا بیر یئنی پوست بیراخیب و اونو دییه سیز.

یاشاسین.

Aydin Kasaei said...

سلاملار يوسوف به‌ي، جاوابي‌ني بوردا يازيدم:ـ

http://anayurdumla.blogspot.com/2010/06/gizli-ara.html

ائلمان توران said...

سلام
منه باش جكديگينه گؤره ساغ اول.
چوخ گؤزل يازيدي.ياشا.
ايسترسن لينك - لينكه ائده ريك
راضي اولسان منه خبر وئر
آذربايجان وار اولسون

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı