Wednesday, November 26, 2008

ساري‫ گلين دالغالاندي

دونن گئجه ساري گلين كونسئرتي، دئديگيم كيمي هاريكا ايدي! تكجه بير ايش منه راس گلدي كي آز قالميشدي بورنومدان گلسين! او دا بو ايدي كي شيركتيميزين سئرويس سوروجوسو قانونچو و خيلاف ائتمه‫يه‫ن بير فارس چيخيب، مني فاطيمي كوچه سينين باشيندا انديرمه‌ييب و شوونيستلر كيمي، اليندن گله‫ني ائتدي تا مني لاپ اوزاق يئر ده سالسين. آخيردا ايستيرديم بير دنه وورام انگينين آلتيندان! گرچكدن عوقده‫سي وار ايدي گه‌ده‫نين. آنجاق قاچا-قاچا وليعصر كوچه‌سيني اوزو يوخاري قاچيب اؤزومو يئددي ياريم‌دا يئتيرديم. هر دؤنه ايران دا بئله وئرليشلرين باشلانغيجي گئجيكمه‌يي عاددي بير ايش اولدوغو كيمي، گؤردوم هن، ساعات 19 يوخ، بلكي 20 ده باشلاناجاق!
ايكي ايش ده اولماسايدي دالغا قوروپونون چيخيشلاري يوز ده يوز بيز ايچين ياخشي اولاجاقدي. بيري بو كي آپاريجي خانيمين چوخلو فارسجا دانيشماغي آدامين لاپ زهله‌‫سيني آپاريردي. ايكينجيسي ده اؤز تقصيريميز ايدي: اوجوز اتين شورباسي ياخشي اولماز! اون‫‌بئش‫‌مين تومن دوز دور باها نظره گلير، آنجاق اؤلكه(كشور) تالاريندا، اورتورب باخماق ايچين چوخ پيس يئر ايدي و بوينوموز قورودو! هر حال دا بيز او اوزمانجلارين آلقيشلامالي سسلريني دينله‫مك ايچين گلميشديك.

بيلي يورد يولداشلارين بيري‫سي sms ايله مني اورادا تاپدي. دان اولدوزو درگي‫سينده امكداشليق ائدرديك. من كيمي ال آياقسيز چيخماييب و اؤز حايات يولداشي اولاجاق بير خانيم ايله گلميشدي. دئييرد داي نه‫يه بيزي خبر ائتميرسن بئله چاغلار!؟ ائله بيليرديم داي اصلا كونسئرت-مونسئرته گلميرسن؟ من ده دان‫اولدوزونون ايلك سايي‫سيندا يازديغيميز شئعر ياديما دوشدو و بير آز چئويريب دئديم: داي اودلانيب-يانماق ايسته‫ميريك، آنجاق، من گلمه‫سم، سن گلمه‫سن، بيز گلمه‫سك، هانسي چپيك چالانلار، آلقيشلايار بو اوزمانجلاري!



بالكون دا اوتورموشدوق. اورادان سئني ياخشي گؤره‫بيلمه‫‫سه‫ا‫يديك ايسه، پرده آرخاسيندا و سئن قيراغيندا چاليشانلاري ياخشي گؤرمك اولوردو! اينتئرنت واسيطه‫سي ايله تانيديغيم پئشه‫كار و گنج فوتوقرافچي، روشن به‫يين نئجه چاليشديغي‫‫ني اوزاق دان گؤروردوم. اونا باشاريلار ديله‫ييرم، آنجاق كاشكي او زال دا اوتورانلاردان دا عكس گؤتوره‫يدي! البته اولابيلر گؤتوروب و من گؤرمه‫ديم. من‫ده بو قيريق موبايليم ايله نئچه دنه ايري-اويري گؤروت گؤتوردوم كي گؤره بيلرسينيز! سون چيخيش دا، بير قوجا كيشي‫ اويناماغا باشلاميشدي و اوندان ايسته‫ييرديم بير گؤرونتو سالام كي سالون قوروقچولارينين بيريسي ادب ايله دئدي قوي جيبينه! من ده دئديم ائـــ...! هئچ ياديمدا ده‫ييلدي عكس و فيلم گؤتورمك ياساق ايميش.

بير ياندان دا، توركوك بيز وئبلاقيندا گؤردويوم قيوير بلاقي يازارينين سؤزو،‫ بونو منه وورغولاميشدي كي بئله تؤرنلر و كونسئرتلر يوز ايلده آذربايجان بؤلگه‫لرينده قورولماياجاق! تكجه ايفتيخاري تبليغ ائتمك هدفي ايله، كوپي‫رايت ياساسي‫ني آياق آلتينا قويوب و اورادا ايفا اولونان چيخيشلاردان ايكي سيني بورادان يوكله‫يه‫بيلرسينيز. دوز دور كئيفييتلري چوخ آشاغي دير و اولابيلر ايفالارين گؤزلليكلريني آرادان گئتسين، آنجاق اوزاق دا اوتورانلارين گوناهي نه؟! اؤزو ده، بو ايش ايله، هامي تحريك اولارلار كي اصل CDنين داليسيجا دوشسونلر.

اينشاللا CD سي، بو تئزليكده چيخا، و اونو هاممي آلابيلسين.

5 comments:

mehdi layaghi said...

dan ulduzu dedin... celal can, o gunlerde dedigim sher yadima dushdu:
seyid calal dan ulduzun yazardi
shovonizmin kokun dibden qazardi
herden de duz yolun bir az azardi (bu misra tekce qafie uchun qoshulmushdu!:()
bir eh dedonnen hey deyib sovardi
yavuz dushunceni bashdan qovardi

kichigin mutlu

Aydin.K said...

Yasha Meyti bey, saghol
:D

roshan said...

عزیز دوستوم.
کاش منده سندن یاخیندان تانیش اولماقا نائل اولوردوم.
گروپون سوندا اجرا ائتدیگی "جیرانیم آی جیرانیم" ماهنی سی منی ده سورپرایز ائتدی ! کنسئرت قورتاراندان سونرا چنگیزی بو ماهنی‌نی اجرا ائتدیگی اوچون سیزین طرفدن ده اوپدوم!!
ساغ اولسین چنگیز بو گوزل اجراسیندان و ساغ اولسون آذربایجان بالالاری که تهران کیمی یئرده سالونو بوش قویمادیلار.
سنینله تانیش اولدوغوم اوچون چوخ سئویندیم.
یاشا

Anonymous said...

عزیز امکداش سلاملارلا!!
ساری گلین کنسزتی ایله ماراقلاندیقینیز اوچون، بو کنسرت حقده چوخ حجملی بیر گزارشین آذربایجان سایتیندا یاییلدیغینین خبرینی وئره رک همین سایتین لینکینی سیزه گؤنده ریره م! سیزه ایشلرینیزده اوغورلار دیله ییره م.

Anonymous said...

باغیشللایین آدرس بئله دیر:
www.azer-online.com

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı