Monday, April 30, 2007

كره، كره! دايي يا دا كره!؟

فیرانسالي كــاناللارین بیـري سی (فيرانسا ايگيرمي دؤرد)، ائرمني لرين سوي قيريمي ناغيلينين گئرچك يا يالان اولماغيندان دانيشیب، توركييه ده كي توركلشميش ائرمني لری گؤستريردي. دوغرودان دا عجيب ایدی! ايستانبول دا كي ائرمني لر اؤ‬ز ائرمني ليك لرينده قالميشديلار، آنجاق آدلاري توركجه يا ايسلامي ايدي! گلديلر توركييه نين ان دوغو بؤلگه لرينده كي بير كؤيه! دئييردي بو كؤيون اهالي سي ايندي يا تورك دورلر يا دا كورد(!)، آنجاق اصلي نوفوسو موسلمانلاشميش و توركلشميش ائرمنيلرديلر! ابونلارين آتا-بابالاري اؤلوم و آرتيق تبعيضين قورخوسوندان اؤزلريني موسلمانليغا و توركلوگه وورموشلار. تورك يا عربجه آدلاري وار ايدي، كليسالاري مچيت اولموشدو، ياشلي قادينلاري باش اؤرتولري وارلاري ايدي و ...

ائله كي گؤردونوز يالان يا دوغرو، توركييه ده ايسه، آسيميلاسيون و يا توركلشديرمه جرياني واردير. و عجيب دير كي اونلار نه قدر ساده توركلرين كولتورونو و ديني ني قبول ائديبلر! منيم بورادا سينيرلار او تايي ايله ايشيم يوخ و تكجه اورادا كي دورومو، اؤز آذربايجانيميزلا موقاييسه ائتمك ايسته ييرم. بيليرسينيز كي توركييه دن داها شيددتلي بير آسيميلاسيون و دئمك فارسلاشديرما پروسه سي ده، ايران دا واردير! اولابيلر ريضاخان آتاتورك دن اؤيرنميش سيياستلري ايسته ييب ايران دا كي توركلره ايشله تسين! البته كي بو آسيميلاسيون، توركلرين اوستونده لاپ گوجلو اولوبدور! آنجاق بو يوز ايل ده توركلرين توركلوكلريندن ذرره جه آزالماميشدير كي هئچ، تورك ادبياتيتين ان اؤنملي شاه اثرلرينين بيري سي، آذربايجان دا يارانميشدير و او دا خوشگنابلي محمدحسين شهريارين حيدربابايا سلام شاه اثري دير. بولوت قارچورلو كيمي آدليملارين اثرلريندن واز گئچيرم.
كسينليكله دئمك اولار دونيادا كي ان گوجلو ميللتچي ليكلرين بيري سي، ايران توركلرينين آراسيندا ياشايير و اوزوجو دور كي بو مسأله بعضي واختلار ايفراطا ساري گئدير و بو طبيعي اولابيلر؛ بونون نه دني، آذربايجان دوشمانلارينين، بو اولوس آراسيندا اولان سونسوز غئيرتيني ا‬ؤز حيسابلاريندا گتيرمه مك دير! دوز دور مينلرجه كؤچري تورك تهران دا، فارسلاشيبلار، آنجاق هئچ تورك آذربايجان ايچينده باشقا بير كولتورو قبول ائتمه يه جك. آذربايجان تورك دور و تورك قالاجاق.

Monday, April 23, 2007

حالوا پايلامايان اينصافسيزلار

سايين تورك اوستادلارين بيريسي، بيلي يورد دا قورولان تورك ديلي كيلاسلاريندا، تورك دوشمانلارينين توركلرين اسكي ساواشلاريندا اولان سالديرما و يوروشلريني، وحشيليك و ييرتيجيليق سانماغي، پيسله ييب و اونلارا دئدي:
«ساواش دا ووروب ا‬‬ؤلدوررلر دا! حالوا كي پايلامازلار!».

آنجاق ايندي ديققت ايله فيكر ائله يه نده، آدام بو سونوجا يئتيشير كي ياخشي اولارميش بير آز دا حالوا پايلانارميش! چونكو بعضي زامانلار دا دامين او باشيندان دوشوب و آرواد اوشاغلارين دا ده ده سي يانديريليرميش.

ايندي ده آوريل آيي دير! بيز اؤزوموزو حاقلي بيليب دئييريك سكسن-دوخسان ايل بوندان اؤنجه آنادولو توركلري بيزيم آتالاريميزين دادينا يئتيشمه سه ييمشلر، حياسيز ائرمنيلرين اليندن، ايندي كي چاغدا، بير دنه ده آذربايجان توركو تاپيلمازميش. باشقا طرفدن، ائرمني لر هارتان پارتان دئييرلر و آوريل آييندا تيمساح گؤز ياشي سي تؤكورلر. دونيا دا لوببيلار و دياسپورالار دونياسي دير، و هر كيمسه نين نوفوذو آمريكا دا و آوروپا دا چوخ اولسا مين دنه اوستونه قويوب، يالانلارين يوكله يه جكدير! سونوج دا، توستو بللي دير هانسي سمته يؤنه له جكدير.
من ايسه بورادا ارمني جينايتلريندن سؤز آپارماغي پيسله مه يرم، آنجاق دونيادا كي سيياستچيلرين اويونو چوخ چيركين دير. گونئي آذربايجان و ايران دا ياشايان توركلر اؤز گوج و انرژيلريني، كسينليك ايله، ا‬ؤز حاقلاريني اؤده مك يولوندا ايشله ديب و بو ايش ده باشاري قازانماقلاري بؤيوك بير هونر دير.

هر حال دا، سيزي بو يازيلاري اوخوماغا دعوت ائديرم:
جولفانين آوريل آيي

Saturday, April 14, 2007

آنایوردوموزون قوتسال آدینی قایتارین


قوجامان آذربایجانین آدینی بو برکتلی تورپاقلاردان پوزماق، فاشیست پهلویــلرین دیلکی ایدی و بو دؤنمه قدر میراث قالمیشدی. قزوین، زنگان، همدان و ... دان سونرا نؤوبت یئتیشمیشدی اردبیللی لر، خالخاللیلار، موغانلیلار و ساوالانین قوجاغیندا یاشایان خییاولیلارا.
یئنی اوستانین یارانماق سؤزو دیللره دوشنده، سبلان(ساوالان) آدی مجلیس طرفیندن سئچیلمیشدی. باشقا طرفدن تبریزین اورمولو اوستانداری عبدالعلی زاده، یئنی اوستانین ساوالان آدلانماغینی اورانین باشقا بؤلگه لرینده کی اینسانلارا جفا بیلیب و شرقی آذربایجانین آدینی "اورتا آذربایجانـ"ـا چئویریلمک و یئنی اوستانین آدینی دا "چیخی آذربایجان" اولماق ایسته دی. آنجاق مجلیس بئله بیر ایشی هزینه لی اولماغینا گؤره رد ائدیب و ساوالان آدینی ایسه اونوتدو!
سون دا ، احمدی نژاد آدلی بیر والی، یئنی اوستانا گلدی و 14 ایلدیر کی آذربایجان آدی، آذربایجانین گون چیخان بؤلگه لرینده، رسمی کاغاذلاردان سیلینمیشدیر.
... آنجاق او آد اورکلردن سیلینمه ییب هله و بو گؤزل یوردلاردا یاشایان تورکلرین آنایوردونون آدی اولو آذربایجان دیر و سونسوز آذربایجان قالاجاقدیر؛ چونکو :

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı