Wednesday, March 11, 2009

مير حوسئين سؤز وئرسين


دوكتور اعلمي يه مجليس ميللت وكيلي اولماق ايچين صلاحييت وئرمه ديلر؛ جومهور باشقانليغينا آداي اولماق بيانييه سي ده بئله دير، جومهور باشقانليغينا نئجه اونايلاناجاق، ايندي دن بللي دير؛ و البته بو اؤلكه ده هئچ زاد معلوم دئييل! ايشدير گون باتي دان چيخسا و اونون كيمي بير آدام آدايلار ايچينده اولسا آشاغي دا كي سؤزلرين هم يازيلماغي و هم اوخونماغي يئرسيز، و البته يوخاري دا كي باشليق دا ده ييشيلمه لي دير!

باشقا طرف دن مير حوسئين گلير! او بيلير كي مئهرعليزاده، آذربايجان بؤلگله لرينده، تكجه تورك اولماق اوچون باشقا آدايلاردان چوخ سس آلدي. او دا بير آذربايجانلي دير و ايسته يير گلن ايلين ياز سونوندا قورولان سئچيم ايچين آداي اولا. من ايسه بير آذربايجانلي اولاراق، باشقا ميليونلار ايرانلي تورك كيمي اؤز آناديليمي اوخوللاردا اوخوماقدان محروم اولموشام و ان اؤنملي ايسته ييم بللي دير نه دير. مير حوسئين 7-8 ايل دؤولت باشقاني اولموشدور، او زامان بيزيم نسيل اوشاق ايدي و توپلومسال ايشلردن باش چيخاردابيلميردي. اؤزوده ايسلامي دئوريمين ايلك ايللري ايدي و اوندان علاوه عيراق ساواشي وار ايدي. بونلارين چوخو اونا بهانه اولابيلر كي نه دن اؤز ديلداشلارينا قوللوق ائتمه ييب. آنجاق بيزيم نسيل اون بير بوندان اؤنجه، اونون يولداشي خاتمي ني سئچدي و او اؤز دئديكلرينه، اؤزلليكله آذربايجان خالقي نين مدني حاقلارينين اؤده مه يينه گؤره عمل ائتمه دي و مير حوسئين، كولتورل دئوريمي يوكسك شوراسيندا(شوراي عالي انقلاب فرهنگي) اويه اولاراق بوتون اولايلار قارشيسيندا بللي سيز ندنلره گؤره سوسموشدو. اينگليس لرين بير آتالار سؤزو واردير كي دئيير: « بيرينجي دؤنه مني آلداتسان سنه شرم اولسون، ايكينجي دؤنه اؤزومه شرم اولسون!»؛ هر حال دا آذربايجانليلار چوخ دا كينه لي و اؤجالان بير آدام دئييلر.

و بونا گؤره بيزلر، بير شرط ايله اونون داليندا دورمالي ييق؛ و او دا بو دور كي او ميليونلار ديلداشينا رسمي سؤز وئرسين كي اونون ايش اوستونه گلن دؤولتي توركلرين آسيميلاسيونا سون قويولوب و اونون آپارديغي ايشلر ايله، آناياسانين اون بئشينجي اصلينه گؤره:

« توركجه ديل و ادبيياتي بوتون اوخوللار و بيلي يوردلاردا اؤيره نيله جك ».

Tuesday, March 10, 2009

بير اؤزونو ايتيرن آدام


يولداشلارين بيري سي گولمه لي بير خاطيره دئييردي؛ دئديم حئييف دير يازيلماسين:

ســكسن بئشينجي ايلين يازسونوندا كي اولايلاردان چوخ گئچمه ميشدير. بئش آلتي نفر امكداشلارلا اوتوروب او كاريكاتورا گؤره دانيشيرديق. خويــلو يولداشلارين بيريسي چوخ دورو و آيدين دانيشاردي و سؤزونو هئچ واخت گيزلتمزدي.
تئهرانليلارين بيري سي، فارسجا دئدي كي او جريان چوخ دا اؤنملي دئييلدي. اؤز نظرينده ايسته ييردي منطيق ايله قونوشا و سؤزونه بئله دوام وئردي :
«مثلا منيم آتا و آنام توركدورلر، آنجاق اؤزوم فارسام...!»

او گده نين آغزيندان بو سؤز چيخماميشدي، من پيققيلاديم و او خويــلو يولداش دا تئز دئدي:
«بئله بير شئي اولار مي آخي؟‍ اولمايا سن قوناق دان عمله گليبسن؟‍!»

بيز ده اللري قويدوق قارينلارين اوستونه، شاققيلاييب كسيمسيز گولمه يه باشلاديق...

و بئله اولدو كي او وارليغيني اونودان آدام داي بير ده چوخ دانيشمازدي.



Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı