Friday, January 28, 2011

ايسپانلار دا، دیللری‌نی بيزه اؤیره‌تسینلر


بو يازي‌دا ايسته‌مه‌ييرم ايران‌دا كي آزربايجانليلارين دورومونو ايسپانياداكي كاتالانلار، و يا باشقا اؤلكه‌لرده كي كيمليكلريني قوروماغي بيرينجي اولويت‌ده قويان آزليقدا اولمايان آدي آزليق اولان توپلوملار ايله، موقايسه ائدم. چونكو هم كولتورلر و هم‌ده سياسي سيستئم‌لر اولدوقجا فرقلي‌دير. بو دا قالسين كي بوتون سيخينتيلار و محدوديتلره باخماياراق، مدنيتلي و باريش سئون خالقلارين سئچديگي يوللاري تصادوف ايله تايسيز بنزرليكلر تاپيرلار؛ اؤرنك ايچين تيراختور ياريشلاري‌ني دئمك اولار.

بيزيم دونيادا اؤزوموزه اوخشار خالقلاري تانييب، ياخشي يا پيس يوللاريني اله‌شديريب، و يا اونلار ايله ايليشگي قورماساق‌دا هر حالدا اونلاردان بيلگي الده ائتمك ماراقلي نظره گلير. آنجاق بوگون "فارسجا علمی اؤيره‌ديليمير(واوئیلا؛ گرچک موصیبت‌دیر!)/ ايران-ايسپانيانين كولتورل ائتکیله‌شیملری*" باشليقيلي يازي‌ني گؤره‌ندن سونرا بيلديم، بئله ايش بيزيم كيمليگميزه سالديرانلار ايچين‌ده اؤنملي ايميش!

فرض ائدين يئر گزه‌نه‌يينده (سياره‌ زمين) كي اينسانلار، اوزاي‌دا (فضا دا) كي ذكالي مخلوقلاري آختارسا، ائله بير مخلوقلار دا، كسينليكله اؤزلرينه تاي موجودلارين اولوب اولماغينا گؤره ماراقلي‌ديرلار. دئمك اولابيلر نئجه بيز ايسته‌ييريك اؤزوموزه تاي خالقلاري تانيياق اونلار دا حتمن بو فيكيرده اولابيلرلر. ياني بو اونلاريندا آغيللارينا چاتير؛ البته بيزدن دونيادا سس-خبر اولماسادا، كاتالانلار بئله دئييللر و بونون نه‌ده‌ني اونلارين اؤز ديللرينده ساوادلي اولماقلاري‌دير؛ اؤز آزربايجانيميز‌دا خالقين ان آزي يوزده دوخساني، اؤز ديللرينده اوخويوب يازابيلميرلر! بو آرادا، ايراني تك ديللي و تك كولتورلو اولماغي‌ني تبليغ ائدنلر، بو دونياليق "تانيشما"لاردان قورخورلار. ايران‌دا، ايرانين قونشو اؤلكه‌لرينده، آوروپادا، آفريقادا، اوزاق آسيادا، و گونئي و قوزئي آمئريكانين هر بير بوجاغيندا فارسجا اؤيره‌تيمي گليشمه‌سينده خرج ائتمك يئته‌رلي اولدوغونا اينانماييب، و حتي گئديرلر ايسپانيانين كيمليك‌چي كاتالانلارينا دا عؤمر خيامين روباعياتيني كاتالانجايا چئويريرلر؛ چونكو بونو دا بيليرلر كاتالانلار، ايسپانيا ديلينه چئويريلميش فارسجا شاهكاري‌ني اوخوماياجاقلار! و بورادا دير كي بيلينير ايسپانيالي شوونيستلرين الي دال‌دان باغلانير!

سون‌دا بونو دئمك ايسته‌ييرم من "پاخيل" و "حسود" دئييلم. منه نه فارس ديللي‌لر ايسته‌ييرلر كاتالانلارا اؤز گؤره‌ك‌سؤزلريني (ادبياتلاري‌ني) تانيتديرسينلار؟ فقط بئيت المال‌دان خرج ائله‌مه‌سينلر! بيز ده گرك بوندان سونرا اؤزوموزو كاتالانلارا اوخشاتماياق. تكجه ایندی کی اؤیره‌تدی -اؤیره‌تدی‌دیر، ايسپانيا ديللي‌لره (كاتالانلاري دئميرم)، بير اؤنری و پیشنهادیم واردير:
نئجه ايراندان گليب سيزين اؤلكه‌نيزده، کاتالانلارا كاتالان ديلينده، فارس ديللي شاعيرلر و اديبلري تانيتديريرلار، سيزده گلين بيزيم آزربايجان‌ توركجه‌سينده، "فئدئریکو قارسیا لورکا"، و "لوپئه دو وئقا"، و باشقالاری کیمی، ايسپانيا دیللی چاغداش یا اسکی شاعيرلر و ادیبلري‌نيزی تانيتديريب، و حتي ايسپانيا ديلي‌ني اؤيره‌دين!
بيزيم كولتوروموزده، نئچه ديل بيله‌نه نئچه آدام دئيه‌رلر، اولسون كي ايسپانيا ديلي يانيندا اؤز آناديليميزي ايسه اؤيره‌نديك!


تكجه آرادا بير سورون(مسأله) واردیر! او دا، بودور كي ايسپانيالي‌لارين ديلي، لاتين آمئريكادا نئچه يوز ميليون بير دامارلي، يوخسا ايكي و نئچه دامارلي‌نين ديلي اولوبدور! اونلار اوزون سوره‌دير، اؤز ديللريني، زور ايله باشقالارا تانيتديرماق عؤقده‌لري‌ني اه‌ريتميشلر؛ يوخسا بيزدن قاباق، اؤز قولاقلاري ديبينده‌كي كاتالانلار، باسك‌لار، و گاليسيالارين ديللري‌ني كؤكدن چيخاردابيلرديلر!


-----
* - زبان فارسی به صورت علمی آموزش داده نمی‌شود/ نگاهی به تعاملات فرهنگی ایران و اسپانیا (باغلانتی)

Monday, January 24, 2011

تيراختورون وجودو، روحونو اينجيدير

تراختورچي‌ سايتينا اؤزل اولاراق آشاغي‌دا كي يازي‌ني حاضيرلاميشديم؛ قرار ايدي او ايران و ايراق تيملري‌نين دورومو بللي اولاندان سونرا ياييلسين. دونن آخشام منيم حماسي(!) يازيم، ياييلاندان سونرا راديودان ائشيتديم كمالوند استعفا وئريب!
دونن صاباح گؤردوم خبر ورزشي گونده‌ليگي سردار جعفري‌دن تيتر وورولوب كمالوند مديريتي ايشلره قاتيلماسين. كمالوندين روحيه‌سينه گؤره بئله استعفا بيلديره تاي گؤزله‌نيردي! من‌ده اوزاق‌دان باخان باشقا گرچك يانداشلار كيمي، هئچ واخت ايسته‌ميرم تيراختورون ايچينده‌كي اولايلاري آناليز ائديب اله‌شديرم؛ چونكو  او قورومون ايچيندن دوزگون بيلگي‌ميز يوخدور و خبرلرين چوخو شايعه و دئدي قودو اولابيلر؛ باشقا ياندان هئچ صلاح دئييل بئله زامانلار كؤزلري اوزاق‌دان آليشديرماغا قاتيلاسان. نه فايداسي اولابيلر؟ تيراختورون دوشماني آز دئييل. آنجاق تيراختورون  سوروملولارينا يالواريريق بير ايش گؤرمه‌يه‌ك، دوشمانلارين فورصت تاپسينلار خبرلر و تيترلرينده دئيه‌لر تيراختور ايچينده حوسئنقولو چوخ وار!
 تيراختورون ته‌كه‌رلرينين قارشي‌سيندا يولا داش دييغيرلادان چوخ‌دور. بو يولو آريتماق‌دا هامي‌ مسؤول‌دور؛ آنجاق اومودوموز وار تيراختورو سورنلرده يول‌دان ائشيگه چيخماسينلار! قونشو اؤلكه‌‌ده‌كي آدليم كلوبونون باشقاني‌ دئيير: "طرفدار كلوبوموزون روحو، و گئنل قوروم(مجمع عمومي) دا وجودو دور". اؤز اؤلكه‌ميزده تيراختور حاق‌دا دئمك اولار:
"يانداشلار تيراختورون روحو  اولسالار، وجودو دا ايسته‌ر ايسته‌مز سيزلرسينيز. بو وجود به‌رك و انسجام‌لي اولمالي‌دير!"؛ يوخسا آسيا اؤز سؤزوندن واز گئچر:‌

  ---

آسيا: تيراختور دايانما، گؤزلر يولوندا

Traxtorchi.ir- آیدین کسائی: آندرانيك تئيموريان‌دان نئچه ايل خبر يوخ ايدي. او گليب تيراختورون باشاريلاريندا پايلي اولماقلا، اؤز آديني بير داها ديللره سالدي. ايندي ائله پئرفورمانس گؤسترير كي آسيا ياريشلاريندا بير اويوندا دونياليق سطح‌ده قاچابيلير، و باشقا اويون‌دا دا ياريش كيشي‌سي (Man of the match) سئچيلير. اونون يانيندا محمد نصرتي‌ده بئله‌دير و ايرانين ان ياخشي اويونچولارين‌دان ساييلير. ايران دؤردونجو اويون‌دا، موشخص بير استراتژي و يئيينليك ايله اوينايان گونئي كوره (كره جنوبي) قارشي‌سيندا، بير ايش باشارماييب و يئنيلدي. منجه آديني چكديگيميز ايكي اويونچو، ياني آندرانيك و نصرتي، مورببي‌نين تاكتيك‌سيزليگي ايچينده باتلاغا گيرديلر.

باشقا ياندان گؤزلر كرار جاسيم‌ده ايدي. او 2007جي ايلده قهرمان اولموش ايراق(عراق) تاخيميندا آووستوراليايا قول وورسايدي‌دا، باشقا تجروبه‌لي اويونچولار يانيندا كؤلگه‌لر آلتيندا ايدي و بو ايل‌ده مصدوميته گؤره ايكي ايلك ياريش‌دا فورصت تاپمادي. آنجاق اوچونجو اويون، قوزئي كوره‌(كره شمالي) قارشي‌سيندا فيكس اولوب، ياراديجي‌ليق و خلاقيتلريني اورتايا قويماقلا، اؤز ميللي‌سي ايچين تئزليكله بير قول ووروب، و اونلاري ايكينجي آشامايا(مرحله‌يه) آپاردي. اونون نقشي او قدر چوخ ايدي كي وولفقانگ سيدكا، ايراغين آلمانلي مورببي‌سي، اؤزلليكله كراري آلقيشلادي*. آما كوره ياريشينداكي ائتكي‌لي اويناماغا باخماياراق، كرار جاسيم دؤردده بير فينال ياريشي (يك چهارم نهايي) آووستوراليا قارشي‌سيندا اويناديلمادي! بونون سببي دئييلير گئنه‌ده مصدوميته گؤره‌دير. آما اويوندان سونرا كي انتقادلار و اله‌شديرمه‌لرده، ايراقلي‌ يازارلار كرارين اويونا قاتيلماغي‌ني گركلي بيلديريرلر. اؤرنك ايچين دئييرلر: "مصطفي كريمين مئيدان‌دا اويناماغي، مدافع‌لرين باشيني قاتابيله‌ن كرار جاسيمين اويونا گيرمه‌ييني ده واجيب ائديردي**".

يوخاري‌دا آد آپارديغيميز اويونچولارين ايلك دؤنه، يوخسا بير داها يئني‌دن پارلاماقلاري، و اولابيلر آسيا دان اوستون اويناماقلاري، يقين كي تيراختورون ياراتديغي اورتام‌لا(محيط ايله) ايليشكي‌لي‌دير. تيراختوردا اويناييب، باشقا كئيفيت ايله روحيه تاپيب - آلقيشلانماق، ياني اولوسلار آراسي سطح‌ده تجربه قازانماق. يقين كي تيراختورون مرتضي اسدي، مئهدي كياني، مصطفي اكرامي و محمدحسن ابراهيمي كيمي باشقا اويونچولاري‌دا بو ياريشلارا گئتمك ايچين لياقتلي ايديلر. دئمك اولار بوندان سونرا دا تيراختورا اولونان ماراقلار و توجه‌لر آرتاجاقدير. ايندي دئمك اولار تيراختور آسيا كلوبلاري ياريشلاريندا اويناماسادا، ميللي ياريشلارين كئيفيتي‌ني يوكسه‌لديرمك‌ده اؤز "تيمي" نقشيني‌ ده گؤسته‌رير.

تيراختور ايندي، عئيني زاماندا نئچه اويونچونو، باشقا اؤلكه‌لر كؤينه‌كي ايله، مئيدانلارا گؤنده‌رير. قديم زامانلار بئله دئييلدي و بو ائتكي غئيري-موستقيم اولوب و آرادا تيراختورون آدي ايتيردي. اؤرنك(مثال) ايچين كريم باقيري‌ني دئمك اولار. البته تيراختور اؤزونو باشقا شكيل‌ده مطرح ائتمك ايله، و حتي باشقا اولوسلار و اؤلكه‌لرين يئته‌نكلي(استعدادلار) اويونچولاريني آدليم ائتمك ايله، اونودولموش سابيقه‌لرينه ده صاحيب چيخابيلر. بو آزربايجانلي‌لارين مهارتي‌ و باجاريقلاري ساييلابيلر:

تيراختور تكجه يئرلي(بومي) و آزربايجانلي اويونچولاري مطرح ائتمير، و قاپي‌سي بوتون اولدوز اولماق ايسته‌يه‌نلره آچيق‌دير.

بونو دا اونوتمامالي‌ييق، آسيا 2011 ياريشلاريندا اؤز آرزيلارينا چاتابيلمه‌يه‌ن اوچ اولدوزوموز دا تيراختورو آسيايا چاتديرماق ايچين ايكي قاتلي (مضاعف) كؤنول گوجو و روحيه تاپاجاقلار. ايندي بيزيم "تيراختور سالدير، بيز آسيا ايستيريك" دئمه‌ييميز، گرچك‌دن ال‌دن اوزاق ايستك دئييل كي هئچ، ترسينه، آسيا تيراختورو چاغيرمالي‌دير:
"تيراختور دايانما؛ گؤزلر يولوندا".

---

قايناقلار(منبع‌لر):
*: "Doha: Iraq coach Wolfgang Sidka praised a professional performance from his men as Kerrar Jasim's goal midway through the first-half saw them edge out DPR Korea 1-0 at Al Rayyan Stadium and set up a quarter-final clash with Australia."
- I trust my team, says Sidka (view on Google Sidewiki)

**: "اما اشراك مصطفى كريم فلم يكن موفقا بالوقت الذي توجب زج كرار جاسم الذي طالما ظهر بقدرة اكثر على اشغال المدافعين..."
- لم ( تطربنا) ياعبدو ؟!!(kooora.com)

Wednesday, January 19, 2011

دين‌دن اوستون


گله‌جك‌ده يئددي ميلياردين فارسجا اؤيرنمك اؤن گؤروسو ائله‌ده پيس دئييلدي! بيزيمده آللاهيميزدان دير يابانجي - مابانجي گؤرنده اينقيلش هوججه‌له‌مه‌ييب، و تكجه بير آز زور ووروب فارسجا دانيشاق و موتمددين بيلينه‌ك. البته ايسته‌ييرديم جومهور باشقانا دئيه‌م اولورسا ايراندا كي ايگيرمي اوتوز ميليون توركون آناديلي‌نين اؤيره‌تيمي حاق‌دا ايسه بير چاره قيلسينلار؛ آما گؤزوم ساتاشدي ايسفنديارين بو سؤزونه:
"تشيع بدهكار فردوسي‌است." (شيعه‌ليك فئردوسي‌يه بورجلودور! اوخويون نعوذ بالله فيردوسي‌ اهلي‌ بئيتين بوينونا مينت قويوبدور)!!؟؟؟

زامان بئله‌ دئيشيليب، باشينا بوينوزلو بؤرك قويموش بنده‌ده، تانريسينا پئيسر توتور.
بوگونلر، ايرقچيليق نوختاسي‌ني قيريب چاپديرير.

Tuesday, January 18, 2011

گونون گؤروتلري و يوروملاري*: ياشاسين تورك آسلان


علي دايي ايلك دؤنه تبريزده كريم باقيري‌ ايله بيرليكده، غئيرتسيز ائشيديب گيجه‌له‌ندن سونرا دئييردي:
گليب كريم باقيري‌يا و منه دئييرديلر بئغئيرت! كريم باقيري‌نين هاراسي بئغيئيرت‌دير؟ بو قدر آزربايجان فوتبولونا خيدمت ائديب.

او باشقا يالان سؤزلر ده دئدي، آما اونون آزربايجان فوتبولونا بو قدر خيدمت ائتمك سؤزونو آدام بيلميردي نئجه اله‌شديرسين؟ اولابيلر علي دايي‌ و كريم باقيري‌نين آزربايجانلي اولماقلاري بوتون آزربايجانلي گنجلره روحيه وئردي، آنجاق آزربايجانين فوتبولو ان آزي 15 ايل دالا قالماغي‌ني فوتبول‌دان باش چيخارتمايان هركيمسه گؤره‌بيلير و دئيير نه خيدمتي؟! اردبيل‌ده علي دايي آدلي ايستاديوم تيكيلمه‌سيده دؤولت سرمايه‌سيندن قايناقلانير و اولابيلر بو دا چوخ عئيبلي ايدي دونيانين ان چوخ ميللي قول وورانين اؤز شهرينده بير آبيرلي ايستاديوم اولماسين! اولابيلر علي‌دايي‌نين آزربايجان اؤزلليكله اردبيلين فوتبولونا ائتديگي خيدمتي، كريم انصاري‌فرد كيمي بير يئته‌نه‌يي(استعدادي) تاپيب آدليم ائتمك ايدي (يالان دوزونو بيلميرم). آنجاق منجه بئله ايش آزربايجانين فوتبولونا قوللوق ائتمك يوخ، بلكه ائله بير گنجه شخصي يارديم ائتمك دير. بو ايشي او زمان خيدمت آدلانديرماق اولاركي آزربايجاندا ياشاماق حاد و اساسي بير چتينليك اورتادا اولسون. اؤرنك(مثال) ايچين ائله‌بيل جنگ زامانيندا آبادانا حمله اولوب و آبادانين جنگي موهاجيرلري اويان - بويان‌دا آوارا اولاندا بير تئهراندا ياشايان آبادانلي اونلارا تئهراندا كؤمك ائليه "پيشرفت" ائتسينلر! البته يازيقلار اولسون توركلرين سؤنموش اولدوزلاري هله فيكر ائديرلر پارلاماق تكجه تئهران‌دا مومكون اولابيلر. آنجاق تانري‌يا شوكورلر اولسون كي آزربايجان خالقي اويانيب و تيراختورو بير دوروما گتيريب حتي تورك اولمايان اويونچولار دا ايلك دؤنه يا ايكينجي‌ دؤنه ايشيقلانديريب پارلادير: ايلك دؤنه پارلايانلارين اؤرنه‌يي كرار جاسيم، محمدحسن ابراهيمي، مئهدي كياني، و مرتضي اسدي و بير داها پارلايانلارين آراسيندا دا عليزاده‌ني آدلانديرماق اولار.

كريم انصاري‌فردين نئجه دوشونمه‌ييندن خبريميز يوخدور. او بير استثنايي قول وورماقلا اؤز گله‌جه‌يي‌ني آوروپادا گؤسته‌ردي و بو چوخ سئوينديرجي‌ اولاجاق؛ آما حئييف اولسون كي آدام اؤزونو بير گنج اولدوزون يئرينه قوياندا گؤرور آوروپا كلوبلاريندا اويناماق تيراختوردا اويناماقدان چوخ قازانجلي‌دير! آنجاق اونون قول وورماغي و آدي‌نين ديللره دوشمه‌سي توركلره چوخ خئييرلي اولدو. چونكو ايندي‌كي ميللي ييغمادا بللي بير تورك اويونچو تاپماق اولماييردي و باشقا ياندان، اويونچولاري داشييان اوتوبوسون اوستونده "فارس شاهزاده‌لري" يازيلميشدي و تيلويزيونداكي آپاريجيلاردا هاي بو شوعاري تبليغ ائديرديلر. ايكينجي كريم و ايكينجي دايي، ائله پارلادي كي، هم گونون گؤروتو و هم‌ده گونون يوروملاري، شاهزاده‌لر اونودولماسي و بير تورك آسلاني‌نين سالديرماسينا گؤره ايدي:


بو ده بيز يايمايان گونون يوروملاري:

ي. س:
يوخاري‌دا يوروملارا يوروم وئرمك لازيم دئييل! آما بير يورومدا يازيليب :"واللاه آزربايجان بؤيوك فارس تورپاقلارينين‌دير! لوطفن گرگينليك ياراتمايين"!
اينتئرنئتين ياخشيليغي بودور كي ائله يوروملايانلار  جاواب وئريب دئمك اولار: سن اؤزون گرگينليك ياراتماسان، كيمسه گرگيننليگ ياراتماز! سن نئجه اردبيل، اورمو، رنگان و تبريزي وئريرسن شيراز اوستانداري‌سينا!؟

* - يوروم: نظر
گؤروت: عكس

Monday, January 17, 2011

تایتانیک یوخ، تاتانک

دونیانین ان چوخ ساتیشلی و پاپیولار اولان اوزونتولو فیلم، تایتانیک، ائکرانا گلیب ایراندا دا جیزیخلی سی‌دی‌لرده گؤرولندن سونرا، باشقا هونری اولمایان اوستون سویلولار دا تورکلره جوک چیخاتدیلار:
بیر تورک، تایتانیک فیلمی‌نی گؤره‌ندن سونرا دئییر: "آخیر‌دا من بیلمه‌دیم، تایتانیک قیز ایدی، یوخسا اوغلان؟"!
او تکجه بیر ایرقچی جوک ایدی! تورکلر ده همه‌شه کیمی اؤز ایش کسبلریندن واز گئچمه‌دیلر دئدیلر هرنه جوک ایسته‌ییرسینیز چیخاردین! گرچک دونیادا گولونج ایش گؤرنلر بللی‌دیرلر، جوک چیخارتماق لازیم دئییل.
1997 ایلیندن 14 ایل اؤتور. بوگون بیر بلگه‌سل(مستند) جوک گؤردوم قیریلدیم گولمک‌دن! گئدین بورانی اوخویون: "ناغیل می، بلگه‌سل می؟"

ناغیل‌ می بلگه‌سل می یازی‌سی‌ندا بیر یئرده دئییب: "ییرمی -اوتوز ایل سونرا ایرانیکا-میرانیکادا یازسا خییام اؤزو تایتانیکین کاپیتانی ایدی دیسکینمه‌یین!". من‌ده قیریدئرده (قوقول ریدئر)،یازی‌‌نین آلتیندا بیر یوروم قویدوم، دئدیم ائله اونو بورادا دا یازیم:
هله هاراسی‌دیر؟! دئیه‌جکلرتایتانیک سؤزجویونون کؤکو فارسجا دیر: تاتـ+ـانـ+ـک؛ یانی تاتلاری* داشییان بالاجا گمی! بوندان بؤیوک گمی‌لر تختی جمشیدی کؤرفزه قوشان کاناللاردا ایمیش. لامصب ایسکندر گلیب همای‌سی‌نی یاندیریب، کاناللاری‌دا باسدیریب!



* - ی. س:  بورادا، تاتلاردان منظور آزربایجان ایچینده یاشایان حؤرمتلی تات یوردداشلاریمیز دئییل. یازیقلار اولسون بونلاردان آزربایجانلیلاری قوندارما آذ-ری ائلینه منسوب ائتمک ایچین سوء استفاده اولوبدور. منظوروموز کسروی‌نین دئدیگی و اوستون سوی‌لو قوندارما ائلدیر.

Sunday, January 16, 2011

کریم نه‌دن یاریش کیشی‌سی اولمادی؟

ایران و قوزئی کوره یاریشیندا اردبیللی گنج، کریم انصاری‌فرد، ایکی قول ووردو بیری‌سی قبول اولمادی.ایران اونون قولو ایله اوتوب صعودی ایندی‌دن گرچکلشدی. آنجاق اویون سونوندا "Man of the Match" (یاریشین اولدوزو) سئچیلمه‌دی! و اونون یئرینه ایرانین بیر قوروچو اویونچوسو، او لقبه لاییق گؤروندو! بو عجیب اولایین نه‌دنی اولابیلر بو دور:

- کریم انصاری‌فرد ساوالان اتکلرینده بئجه‌رمیش و پارلاییب آدلیم اولماق آردیندا اولان سون درجه‌ده چالیشان بیر جاوان دیر! او نه شاهزاده‌دیر و نه پارس. 

اومودوموز وار گله‌جک‌ده، کریم انصاری‌فرد ده علی دایی کیمی، شاه یوخسا سولطان اولماق، یولوندا آددیم آتماسین و اؤز کیملیگینی اونودماسین. اونا آزربایجانلی بیر وطنداشی کیمی، ان بؤیوک  و ان تايسيز باشاریلار دیله‌ییرم.

---

Why was not 'Karim Ansarifard' be chosen as Man of the Match Iran vs. North Korea in 2011 AFC Asian Cup?

Answer:

- Because he is an aspiring diligent young soccer player from Savalan slopes in Azerbaijan. He is not Prince nor Persian (Referring to inappropriate slogan for Iranian National Soccer team)!
He will be second Ali Daei but with a big difference. He actually is able to characterize himself with his own personality. He has the opportunity of not forgetting his identity!

Best wishes for Karim.

Saturday, January 15, 2011

آشيق غافار: ياشاسين تيراختور تيمي

خاطيريزده اولسا (اؤزوم اونوتموشدوم سيز هارادان يادينيزدا اولاجاق آخي!؟) ياز ايلكينده "بئشينجي آشيقلار بايرامي، تيراختور و دلي‌لر" يازيسيندا دئميشديم آشيق غافار ابراهيمي‌نين "ياشاسين تيراختور تيمي" چيخيش‌ني يايام. البته فيلمي‌ني يولداشيميز گؤتورموشدو و نئچه آي چكدي فايلين اوندان آليب كانوئرت اله‌ييب يونگوللـه‌ديب، اينتئرنئته قويماق ايچين اويغونلاشديرام! بيز توركلرده كي ماشالله هامي‌ميز "واكنش سريعـ‌"ـيك، بو ايش 8 آي چكدي! البته داش‌قاپي‌نين "آشیق‌لارین یارادیجیلیغی" يازي‌سي ياييلماسايدي منيم آلزايمئريم دايانماياجاغيدي! سيزي، آشيق قافارلا ايلگي‌لي اولان پاراگرافي اوخويوب و سونرا كليپه باخماغا دعوت ائديرم:
ائله بو "بايرام" سؤزجويو فيكيرينده ايديم كي گؤردوم آشيق غافار چيخيشي‌ني باشلاييب، دئيير:
"آدام گؤرنده كي تبريزده، تيرختور تيمي يوز اللي‌مين نفري بير يئره ييغير، دئيير كئشگه هامي‌ميز توپجو(فوتباليست) اولارديق! ايكي دنه ايفا واريم كي بيري‌سي‌ني تيرختورون افتخارينا اوخوياجاغام." و هامي آلقيشلادي. من ده يولداشا دئديم تيرختور اوچون اوخويان‌دا حتمن فيلم گؤتور. قرار دير فيلمي اوندان آلام و بورا قويام سيز ده باخاسينيز.

Thursday, January 13, 2011

باسقي‌ آلتيندا

قانديرابيلمه‌ييرلر! اورمودا دوشه‌ن اوچاغا يوز جوره ايقناع ائتمه‌يه‌ن نه‌دن دئييرلر. هامي‌سي بيري بيريندن منطيق‌سيز. بو آرادا لاپ گولونج يوخسا آغلامالي نه‌دني، گئنه يول باخاني دئييب:
" مردم فشار مي آورند كه پرواز مي كنيم! (خالق بيزي اوچماق ايچين باسقي آلتينا قويور)"!
دئمك، سيز خالقين ايستكلرينه سايقي گؤستريرسينيز، آما جانلارينا يوخ! و بو شاشديرير آدامي.

دئييرم ايستكلريميزه جانيميزدان چوخ ده‌يه‌ر وئرن قوللوقچو سوروملولارين ايچينده، كئشگه كولتور و اؤيره‌تيم باخانلاري‌دا بئله اولارديلار. نئچه ايلدير "تورك ديلينده مدرسه" هارايي يئر گؤيو بورويوب، آما بونو كولتورل ايستك بيلمه‌ييب و اونو امنيتي سورون سانديلار!! اولماز بيزه سايغي گؤسته‌رمه‌ييب اوچاقلاردا اوتورتماياسينيز، آنجاق قوياسينيز اوخوللاردا اوشاقلاريميز آناديللرينده درس اوخويالار؟!

Tuesday, January 11, 2011

گونون گؤروتو: تيراختورون اونودولماز يانداشي

كئچميش يازيدا كي "ي.س(يازيدان سونرا)" بؤلومونو، "گونون گؤروتو" باشليقلي باشقا بير پوستدا، يايماق ايسته‌ديم. بو دؤنه، گونون گؤروتو اوزوجودور:

تيراختورون اونودولماز يانداشي

تیراختور یانداشلاری سایتیندا گؤردوم، دونن آخشامین اوزونتولو اولاییندا بیر تیراختورچو دا اوچاق ايچينده ایمیش و آللاهین رحمتینه گئدیب. دوزدور ایندی آزربایجاندا بیری‌سینی تاپماق اولماز تیراختور یانداشی اولماسین، آنجاق "علی خدابخش" سانکی اؤنجه‌دن ایسته‌ییرمیش بو گؤرونتوسو ایله، تیراختورون ان اونودولماز یانداشی اولسون:


آللاه اونا و اوچاق قضاسینا گؤره باشقا بو دونیادان کؤچنلره رحمت ائله‌ییب و تانیشلارینا دؤزوم وئرسین.

---

ي.س: 
سون بيلگي‌لره گؤره "علي خدابخش" شريف تئكنولو‍ژي بيلي‌يوردونون(دانشگاه صنعتي شريف) اؤيرنجي‌سي ايميش...

Monday, January 10, 2011

اورمو... باشین ساغ اولسون

قار - یاغیش یاغماق ایلک باخیش‌دا سئویندیریجی ایدی. چونکو اورمو گؤلو و اورمو داغلاری قار ايله یاغیش ایسته‌ییردی.
آنجاق بو آرادا، اورمونون دومانلی گؤیو بو گئجه، گؤیرچینلرین بیر سایی‌سی‌نین اوچماغی‌نين سونا چاتماسيني ایسته‌مه‌ییرمیش...


اورمو و آزربایجانین باشی ساغ اولسون...

ی. س:
بوگون تیراختور یانداشلاری سایتیندا گؤردوم دونن آخشامین اوزونتولو اولاییندا بیر تیراختورچو دا اوچاقدا ایمیش و آللاهین رحمتینه گئدیب. دوزدور ایندی آزربایجاندا بیری‌سینی تاپماق اولماز تیراختور یانداشی اولماسین، آنجاق "علی خدابخش" سانکی اؤنجه‌دن ایسته‌ییرمیش بو گؤرونتوسو ایله تیراختورون ان اونودولماز یانداشی اولسون:


آللاه اونا و اوچاق قضاسینا گؤره باشقا بو دونیادان کؤچنلره رحمت ائله‌ییب و تانیشلارینا دؤزوم وئرسین.

Saturday, January 8, 2011

اؤلو ايرقچيلارين جانلي دوشونجه‌لري

فيلان شوونيستي دوشونجه‌لر و سياستلري آرخادان يؤنه‌تيجي‌ليك ائدن آدليم بير باشچي‌نين اؤلمه‌يي، خبرلر آراسيندا گلميشدير. ايسته‌ميرم دئيه‌م بونا گؤره يولداشلار سئوينيرلر؛ آنجاق بئله بير خبري اويان بو ياندا يايماق، بيزيم اونلارين فيزيكي اولماماغي‌ني بير باشاري‌ بيلمك آنلاميني داشي‌يير! بير سـكسن نئچه ياشيندا بير مريض قوجانين ايندي كي چاغدا ائتكي گؤستره‌بيلمه‌يي‌ني ثابيت ائله‌مك لازيم دئييل. بونلار جاوانليقدا اؤنملي بير آپاريجي اولوب آغير ضربه‌لر ده وورسالاردا، چوخلاري گليب گئديب و البته اؤزلري ايچين بير ائتكي آلانلاري(حوزه تاثير)  ده وارلاري‌ايميش. آنجاق من اينانميرام، ايرقچيليق و يا باشقا بير خالقي كولتورل ايستكلره حاقلي بيلمه‌مك ائپيدمي‌سي ايرقچيليق اؤندرلري‌نين اؤلوب تومبه‌تين دوشمه‌لري ايله آرادان گئتسين.

گئچن گونلرده ايران فوتبول ميللي تاخيمي‌نا فارس شاهزاده‌لري لقب وئرمه‌يينه اولونان تپكي‌لري گؤردوك.  البته بو اعتراضلاري  تكجه توركلر طرفيندن اولدو. "اسلامي دئوريم(انقلاب)" ائتميش اؤلكه‌ده "شاهزاده"‌يه عكس العمل گؤسته‌رمه‌مك چوخ عجيبه دورومدور. ماراقلي‌ دير چوخلاريدا گلديلر بو لقب‌دن دفاع دا ائتديلر! بو آرادا بير آز سايي دا گلديلر مذهبي ايناملارينا گؤره دئديلر: 
"آخي نه اولسون بو شوعار! ايسلامي ايراندا شاهزاده و پيرنس هاردايدي! اولمازدي شاهزاده يئرينه دلاور سؤزجويوندن قوللانيب دئيه‌رديلر فارس ديلاورلر؟!" *
 ياني ايرقچي و اؤزونو اوستون بيلمك سانكي قانلارينا گئچيب. مذهبي‌لري شاهزاده‌دن خوشلاري گلمه‌سه هله بونو قانميرلار تپكي‌لرين نه‌دني نه ايميش! يوخسا اؤزلريني قانمازليغا ووروبلار. كسينليكله بونلار و باشقا اؤزونو بيرينجي درجه‌لي بيلنلر، شوونيسم دوشونجه‌لرينين اؤندرلريني هئچ‌ده تانيماييرلار؛ حالبوكي زهتابي كيمي كيمليكچيليك دوشونجه‌لريني اؤندرلريني آزربايجانلي‌لارين بوتون كيمليكچيلري تانييرلار! تانيمايانلاردا مانقورد اولماق و آسيميلاسيون خطرينده‌دير و اولابيلر "پئرشين" لقيبنه لاييق گؤرونمه‌ييني غورور دويورلار!!

* - انتقاد هاشمی طبا(رئيس اسبق سازمان تربيت بدني) از شعار تیم ملی / خبرآنلاين:
...من می گویم نباید بچه های مان را جمعی آدم تنبل و خوشگذران و مفت خور تمثیل کنیم. این واژه در کشور ما و برای مردم ما ، همه مردم ما بار منفی داردواقعا بازیکنان ما« شازده» هستند؟ ... مگر تنبل و مفت خور هستند که اسم شان را گذاشتید «شازده» ... چرا نباید یک شعار زیبا تر انتخاب می کردیم؟ چیزی مثل « دلیران پارسی». این ها که خیلی زیبا تر می شدند...

Wednesday, January 5, 2011

صمدين آجي خاطيره‌سينه گولنلر


بوندان ايشيم يوخدور"ايسلامي ارشاد باخانليغيـ"‌ـندا، "فارس ديلي و ادبياتي‌نين گئنيشلنديرمه شوراسي" اولان يئرده، نه‌دن "توركلرين" ديلينه بئله بير قوروم يوخدور؟! بو سؤزلري دئمكدن يورولدوق. آنجاق تصادف ايله دئديگيميز شورانين دوشه‌رگه‌سي(سايتينا) يولوم دوشدو.
آنا يارپاقدا "صمد بهرنگي"‌نين گؤرونتوسو گؤردوم. صمددن "طنز" بؤلومونده بير خاطيره* قويموشدولار، آي منيم قارغادان دا اکسـیک فرض ائدیلمیش ديلداشلاريم!
صمد كسينليكله او خاطيره‌ني توركلرين آناديللرينين يئرينه بير اؤزگه ديلي ياخشي اؤيرنه‌بيلمه‌ديكلرينه گؤره يازيب و قصدي اله ساليب گولدورمك دئييل، بلكه ايسته‌يير بير آجي گرچه‌يي وورغولاسين. آنجاق بيز اؤزوموزه ده‌يه‌ر وئرمه‌سك، آسيميلاسيون آپاريجيلاري اؤز گليشديرمه و اصلينده ايرقچي‌ شورالاريندا، بيزيم تاريخي درين كولتورل - توپلومسال يارالاريميزا گوله‌جكلر.

* - مطلب طنز / از میان رضایت نامه ها/ طنز / صمد بهرنگي
او سايت هايپئر لينك اولماق ايچين ده‌يه‌ري يوخدور. اؤزونوز كوپي ائدين:
http://www.persian-language.org/literature-fun-fulltext-336.html

تيراختور سالديرير يازديرير

بو يازي‌ني تراختورچي سايتينا اؤزل اولاراق يازديم:

تيراختور سالديرير يازديرير

بو يازي‌ني قوقول‌دا آختارديم، گؤرم اينتئرنئت‌ده نئجه ياناشيبلار. اويان بوياندا به‌تر باغلانتي وئريليب سانكي! بير نفر اؤز بولاغيندا اونا فارسجا بئله بير اؤزت(خلاصه و لب كلام) يازيب:
"تراختور باعث شده برخی روزنامه های سراسری مجبور شوند كه به زبان توركی مطلب بنویسند .باید كاری كنیم كه ارزش و اهمیت زبان توركی در همه روزنامه‌ها بیشتر شود و مجبور شوند به زبان توركی مطلب بنویسند".(باغلانتي)

منيم‌ ده منظوروم بو ايدي. تراختورچي سايتيندا مقاله‌نين آلتيندا چوخلو يوروم يازيليب. ياني توركجه يازيلار دا اوخونور و اله‌شديريلير. بو سئوينديريجيدير؛ آنجاق سورون بو دور توركجه يازيلاري اوخويابيلمه‌يه‌ن تورك ديللي‌لري، توركجه‌ني اوخوماغا ماراقلانديرماق ايچين فارسجا اؤزت يازماماقدان سونرا باشقا يوللار نه‌دير؟

Tuesday, January 4, 2011

The Most Popular F.C. in Iran


In the season 2010-2011of Iranian Premier League (IPL), Tractor F.C. is leading again, via attracting about 420,000 spectators up to now(Jan.04 2011). Tractor fans have achieved this record while they could not support their team for two times because of  unfair host deprivation!

The second F.C. is Esteghlal (367,500) and third place goes to Perspolis F.C. (283,500).

in reference to: Tractor Sazi Tabriz FC - Results, fixtures, squad, statistics, photos, videos and news - Soccerway (view on Google Sidewiki)

Monday, January 3, 2011

پاس جاوابي آتمايان توپو قاچيردانلار

اوشاقليقدا توپ اويناياندا بير سايي اويونچولار به‌تر اوزلو اولارديلار! گئديب دورارديلار قاپي يانيندا آفسايد دا. هر كيمسه اونلارا پاس آتماسايدي ساواشيب ديللي ديللي دئيه‌رديلر به منه نئيه پاس آتميسينيز؛ بو دا قالسين كي اؤزلري اصلن پاس آتان بشر دئييلديلر! توپو كورلايارديلار آما تيمه گؤره توپو باشقاسينا تاپشيرمازديلار. بؤيويه‌ندن سونرا فوتبول ياسالاريني آنلاييب بيلديك آفسايد نه‌دير آنجاق بؤيوك تاخيملاردا ايسه گؤردوك بئله بير ايشلر واردير. توپو كورلاييرلار آما باشقاسينا جاواب وئرميرلر. بئله بير اولايين هيجانلي فوتبول مئيدانيندا اوز وئرمه‌سي دوغال و طبيعي‌دير؛ آنجاق كاميلن كولتورل ايشلرده، اؤزلليك‌ده مئديا يا يايين‌دا چوخدا يانليش و عجيبه بير ايشدير. يايين و يازارليق دونياسيندا "كوپي رايتي(Copyright)" رعايت ائتمه‌مك فوتبولون "آفسايدينا" گئچمك يا دا اؤزونو يالاندان يئره آتيب پئنالتي آلماق يا دا حريفه قيرميز كارتي وئرديرمك معناسيندادير.

نئچه هفته بوندان اؤنجه "بونا دئيه‌رلر روحيه‌" يازيسيني قويموشدوم بولاغا. "فوتبولچولار(فوتباليست‌ها)" درگي‌سيندن گليب بير يوروم قويموشدولار و او يازيني يايماق اجازه‌سيني ايسته‌ميشديلر. منده دئديم سيزين منيم يازيمي يايماغينيز من ايچين افتخاردير، تكجه قايناغيندا قويون. اونلار يازيني يايديلار منده تئهراندا اون-اون بئش‌ دنه كيوسكا باش ووردوم "فوتباليست‌ها" تاپابيلمه‌ديم. بير ده ايمئيل ووردوم دئديم اولورسا درگي‌نيزير pdf فايليني منه گؤنده‌رين. خبر چيخمادي. دئديم حتمن باشلاري شولوقدور فورصتلري يوخدور*. منده سئوينيرديم فوتبول قونوسوندا اولان بير درگيده توركجه يازيلار دا يئر تاپير و اؤزومون هم في سبيل الله و هم‌ده آزربايجان يولوندا ايشله‌مه‌ييمدن راضي ايديم.

آما دونن بير اوزوجو اولای ایله قارشیلاندیم.
دئديگيميز درگي‌نين 21جي سايي‌سي‌نين ياييلماق خبريني اينتئرنئتده اوخودوم. بيرينجي صفحه‌سي‌نين عكسينده "كرار: ايراندا تراختوردان باشقا هئچ تيمه گئتمه‌رم" تيتري‌ني گؤروب و نئچه گون بوندان قاباق بير عربي سايتيندان كرار جاسيمله آپاريلميش بير عربجه موصاحيبه‌نين توركجه چئويرمه‌ييم ياديما دوشدو. البته من يايان باشليق بو دئييلدي(كرار جاسيم: تبريزده توركلر ياشاييرلار). گئنه آخشام باشلاديم كيوسكلاردا فوتبولچولاري آختارماغا! بيري‌سي دئدي بو مجله هفته‌ده بير گون گلير، صاباح باش وور. من‌ده بوگون گئديب بو مجله‌ني گؤردوم بلي واردير! 400 وئريب بيريسين آلديم. باخديم گؤردوم هن يازي همن يازي‌دير آما من يازان مقدمه‌ حذف اولوب و نئچه دنه توركجه سوزجو ده‌ييشليب "ؤ" لر ده "و" اولاندان سونرا، ياييليب. آما قايناقدا گؤردوم عربي سايتين آدرئسي وورولوب(اؤزوده ساغدان سولا) و منيم يازيق بولاغيمدان بير خبر يوخدور! ائله‌بيل "ترجمه‌" ائتمك، اؤزو ده عرب ديليندن توركجه‌يه، گؤيدن نازيل اولماق كيمي بير شئي‌دير!! فارسلار دئميش ديزي‌نين باشي آچيقدير آما پيشيگين حاياسي هاردا؟!

ايسته‌ميرم فوتبولچولار درگي‌سينين بوتون چاليشمالاريني بير دنه يانليش ايله سورغو آلتينا آپارام، آما بئله بير ايش كسينليكله دوز ايش دئييل. سيزين درگي‌ني شهرين بو باشيندان او باشينا گئتمك لازيم اولسا اينتئرنئت هر نه تئز ياييلير و  بيلينير كيم كيمه دير. من بير تيراختورچو يانداشي اولاراق "عئيبي يوخ" دئييرم و بوندان چوخ سئوينه‌رم سيزين درگي ان چوخ سايي دا ياييلان درگي اولسون. بو آزربايجان ايچين فايدالي‌دير. توركجه‌ يازيلاريدا يايين، قايناقسيز يايسانيزدا يايين قبول دور ائله‌ده عئيبي يوخ! آما بو ايش ايله دايانيشمايا، امكداشليقلارا و ايش بيرليگي‌نه ضربه وورورسونوز.

* ی.س:
بو یازی‌نین یاییلماغی‌نین آردی گونو pdf فایللار الیمه چاتدی. سانکی فایللار چوخ آغیریمیش راحاتلیقلا گؤندره‌بیلمه‌ییبلر. اومورام یوخاریدا کی یازیلارین قالانی‌دا بوشا چیخسین! اینشاللا کی قایناق یازماماغیندا سهو اولوب.

Sunday, January 2, 2011

آياز اولدوز تانيما ده‌رنه‌يي

آدام هردن بئله ايشلر ايله اوز-اوزه گلير بيلمير نئجه آچيقلاسين! اولدوزلارا ماراق گؤسته‌رمه‌ييمدن داها چوخ، "آياز" آدي مني چكدي تبريزين "آياز اولدوزلار درنه‌يي‌نين(انجمن نجوم آياز)" سايتينا. بو درنه‌ك و سايتين قوروجولارينين بير توركجه آد سئچمه‌لري اونلارين اؤز كيمليكلريني ده‌يه‌رلنديرمه‌لريني گؤسته‌ريب، آدامي سئوينديرير گرچكدن. آما گئديب سايتا باخديم گؤردوم  "نئيشابور"لولارين الي ايله قورولموش پارس ديللي (فارسجا دا يوخ ها!!) وئبگاهلارين (سايتلار دا يوخ ها!!) فئستيواليندا ا ئله بو سايت بيرينجي اولوبدور. ياني "آياز" فارسجا ديللي نوجوم بيليمي دوشه‌رگه‌لرين ايچينده ان ياخشي سايت تانينميشدير.  گؤره‌سن بير زامان گله‌جك  آزربايجانليلار دا مثلن بوجنورد، قوچان يا دا كلاتدا توركجه يازيلان بير سايتا "ان ياخشي توركجه اولدوز بيليمي سايتي" اؤدولو وئره‌لر؟! البته بو دا پئشكئش! آدام قورخور آياز سايتين يئيه‌سينه تبريزده بيري دئسين اوتمانميسان توركجه سئچيبسن اولدوزلار كيمي اؤنملي بيليمه؟!

دوزدور اورادا "اولماز تورک آدلی «آیاز» پارسی زبانلیق جایزه‌سینی اؤتوروب اولدوزلارا گؤره تورکجه‌ده یازا؟" يورومونو قويدوم، آنجاق من او سايتا، ايراندا بيرينجي اولدوزلار بيليمي سايتينين بيرينجي‌ليگيني الده ائتمك باشاريسيني، موتلو اولسون دئييرم.  نئچه ديلده يازماق بير سايتين گوجونو گؤسته‌رر،  آنجاق اؤز ديليميزده يازماق ان واجيب ايش و ياخشي‌دير. اوخوجونون آز اولماغيدا اؤنملي دئييل؛ يازي اولسا اوخوجولاردا تاپيلارلار!

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı