Wednesday, September 29, 2010

شيخ صفي‌نين تذكيـره توركجه ال‌يازماسي


اردبيللي شيخ صفي‌نين توركجه "تذكره" آدلي ال‌يازماسي‌ني، چاليشقان آراشديريجي سايين داوود بوهلولي تصحيح ائديب و كيتاب بازارينا گؤنده‌رميشدير. ‌داوود بوهلولي بوندان قاباق‌دا شيخ صفي‌‌دن باشقا بير اثر، ياني قارا مجموعهني تصحيح ائديب و هم‌ده فارسجايا چئويريب يايمشيدي. و تذكيره‌نين ياييلماسي دا اؤنملي بير كولتورل اولاي دير. بو كيتابين اصلي روسيه‌نين سن پيتئرز بورگ شهري‌نين "سالچيكوو شئچئردين" كيتاب ائوينده ساخلانيلير و ايندي‌يه‌ قه‌در گؤزلر و اللردن اوزاق ايميش. البته كئشگه بو كيتابين دا آدي‌ و يا باشليغي‌ني توركجه يازارديلار: "اردبيللي شيخ صفي‌نين تذكيـره‌سي"

كيتاب "تذكره شيخ صفي‌الدين اردبيلي" آدي ايله  783 صحيفه ده، و 13500 تومن ده‌يه‌رينده اديان يايين ائوي طرفيندن ياييلميش‌دير. كيتابي آلماق ايچين 2802613 (0251) و 09195197043 سايي‌لي تئلفونلار ايله دانيشابيلرسينيز.

اليمه يئتيشميش فارسجا ايمئيلي ده آشاغي‌دا قويورام:


نسخه خطی ترکی تذکره شیخ صفی‌الدین اردبیلی وارد بازار نشر شد

نسخه خطی ترکی تذکره شیخ صفی‌الدین اردبیلی از نوادگان امام موسی کاظم(ع) که توسط داود بهلولی تصحیح شده است، وارد بازار نشر شد. این اثر که متعلق به سده دهم هجری قمری است، حاوی کرامات، حکایات و آرا و اندیشه‌های شیخ‌ صفی‌الدین اردبیلی است که به زبان ترکی توسط محمد بن الحسین الکاتب معروف به نشاطی شیرازی و به دستور شاه طهماسب صفوی تصنیف شده است.

این اثر حاوی دوازده باب و 27 فصل است، نسخه‌های خطی تذکره در روسیه ایران و آمریکا نگه‌داری می شود و بسیاری از حکایات و روایات موجود در اثر از زبان شیخ صدرالدین فرزند شیخ صفی بیان می‌شود. تذکره شیخ صفی به عنوان یکی از ارکان تاریخ ادبیات زبان ترکی محسوب می‌شود اما متأسفانه توجه چندانی بدان نشده است.

شیخ صفی جد اعلای سلاطین صفوی و از نوادگان امام موسی کاظم(ع) است؛ وی از عارفانی است که در دوران حیات خود (قرن هشتم) دایره نفوذ خود را در منطقه‌ای وسیع از خاورمیانه بخصوص ایران، جمهوری آذربایجان و ترکیه گسترش داد و مریدان بی‌شماری در دارالارشاد اردبیل گرد وی جمع آمدند.

مصحح این اثر کوشیده است تا نثری ساده و روان و قابل مطالعه برای عموم مردم فراهم آورد؛ وی در مقدمه اثر به تفصیل درباره زندگی شیخ صفی، نسخه‌های خطی موجود از تذکره، سنت ترجمه در تاریخ زبان ترکی و وضعیت ادبی دوران نگارش اثر سخن گفته است. پیشتر ترجمه فارسی تذکره شیخ صفی‌الدین اردبیلی و قارامجموعه منسوب به شیخ صفی‌الدین اردبیلی نیز توسط همین مصحح ترجمه و از سوی انتشارات ادیان منتشر شده است. این اثر برای نخستین بار در نمایشگاه کتاب تبریز عرضه خواهد شد. این اثر در 783 صفحه و با قیمت 13500 تومان از سوی انتشارات ادیان وارد بازار نشر شده است.

برای اطلاعات بیشتر با شماره تلفنهای 0251-2802613 و یا 09195197043 تماس حاصل فرمایید.


Monday, September 27, 2010

اينيئستا مادريد ده سوسمازدي

بو تابناك سايتي ايمكاني يوخدور توركلره گؤره اؤزلليكله تيراختورا گؤره بير غرض‌سيز يازي يايسين. ظاهير ده ايسته‌سه دوزگون تحليل ائله‌ييب مثلن بيزدن ده بير ديفاع ائده*، سؤزون ترسينه دئييب و بئله بوروشدورار كي بير شئي قازانسين. تحليلين ده آديني قويار آسيب شناسي! و اساس بو اولار كي توركلرين داورانيشلاري يانليش‌دير و لوطف ائله‌سه دئيه‌ر بيز اونلارا چون جوك دئميشيك! هله بو كؤهنه‌لميش جوكلاري بؤيوك نه‌دن بيلديرمك و باشقا طرف‌دن توركلرين اصلي ايستكلرينين اوستونو اؤرتمك قونوسو ايله ايشيم يوخ‌دور. تابناكين علي دايي و كريم باقيري‌نين تبريز ده هويلانيلمالاري‌ني بارسلونون كاتالان اويونجوسو اينيئستانين مادريد ده آلقيشلانماغي ايله يان يانا قويوب و بيزيم كولتوروموزون آشاغي‌ اولماغيني گؤسترمه‌يه چاليشماغي دئديگيم موغاليطه و اولايلاري يانليش موقايسه ائتمك‌دير.

بيرينجي سؤز:
توتاق، كاتالان "اينيئستا" مادريد تيملرينده اويناسايدي و كاتالانلارا مادريد ده يامان دئييليب و اونلاري ائششكلره اوخشاتسايديلار و اينيئستا دا دا مادريدلي‌لره بير سؤز دئمه‌ييب سونرا دا دئسه‌يدي مادريدلي‌لر گوناهسيز ايدي‌لر و تقصير كاتالانلار دا ايدي، كسينليك ايله ايسپانياني دونيادا قهرمانليغا يئتيرن اينيئستا، بارسلونون نيوكمپينده دايي و باقيري‌نين تبريز ده هويلانماغيندان داها پيس دوروم دا يامان ائشيده‌جك ايدي! هامي بيلير كي بارسلون فوتبول كلوبونون كيمليگي و وارليغي برابر دير كاتالانليق كيمليگي و وارليغي‌ايله. آرخايين اولون اينيئستا قارشيسيندا كي نيوكمپ جهنمي، دايي و باقيري قارشي‌سينداكي سهند جهنميندن داها پيس اولاجاق‌ ايدي.

ايكينجي سؤز:
بو موقايسه ده سانكي مادريد، ايسپانيانين تبريزي‌دير؛ و ايرانين توركلري‌ده ايسپانيا دا ياشايان كاتالانلار يوخ، بلكي ايسپانيا ديللي‌لرین یئرینده دیرلر و باشقا كيمليك‌لري دانیرلار! حالبوكي ايران توركلری اؤز آناديللريني باشقالارا تحميل ائتمه‌ييبلر. تحمیل ائتمک ایسته‌سه‌یدیلر پهلویلرین ایش باشینا گلمکلریندن قاباق بو ایشی گؤره‌ردیلر؛ چونکو مین ایله یاخین بوتون حوکومتلر تورک ائللردن ایدیلر.

اوچونجو سؤز:
دايي‌ده تيراختورون سوپئرليگه گلمه‌سيندن قاباق ايرانين باش مورببي‌سي ايدي. آنجاق ايرانين قوتبول تاريخينده ان پارلايان اولدوز اولماغينا باخماياراق، اويونلارينين سون چاغلاريندا پيس اويناماغينا گؤره و هم‌ده ايراني جام جهاني‌يه آپارماغا قادير اولماماغا گؤره، شيددت ايله هويلاندي و بوتون يايينلار و مئديا دا هر گون مسخره اولوندو. آنجاق بليرسيز نه‌دنلره گؤره تيراختورون توركلرين سيمگه‌سي خبرلري ياييلاندان سونرا تئزليكله اولدو تئهرانين ان بؤيوك تيمي‌نين مورببي‌سي.

دؤردونجو سؤز:
گونئي آفريقانين 2010 دونياليق فوتبول ياريشلاريندا ، اسپانيا قهرمان اولاندان سونرا، كارلوس پويول، چابي هئرناندئز و باشقا كاتالان اويونچولار كاتالانلارين بايراغيني دونيا گؤزلري قارشي‌سيندا اؤپوردولر. ايرانين تيمي‌ده بير باشاري‌ ال‌‌ده ائتسه، ائله همن داشلاري‌نيزي دؤشونوزه ووران كريم باقيري و دايي دا ائله‌يه‌بيلردير اللريني بوزقورد ائتسينلر! بايراق اؤپمك سؤزونو دئميرم چونكو قيرميزي سينيرلاري اويانا آشماق آنلاميندا! بو ايشلري ايران كيمي اؤلكه‌ده هئچ كيمسه ايسته‌مير و پئشكئش اولسون! آنجاق دايي و باقيري سكــسن بئشينجي ايلين ياز سونو(خورداد) اولايلاري زاماني، 2006 دونياليق ياريشلارا گئدنده ، ميللي تيمين "فارس اولدوزلار"ي آدلانماغيني اله‌شديره‌بيلرديلرمي؟ بونو دا ايسته‌مه‌ديك! دايي بلديه اويونوندان سونرا آلديغي پيس سونوجا گؤره دوروب ميليونلار آزربايجانلي‌يا شرف‌سيز ، شوعورسوز و آنلاماز دئيه‌بيلمزدي؟

-------------------
خلاصه مطلب به فارسي
ولي اينيستا در مادريد سكوت نمي‌كرد

سايت تابناك امكان ندارد اخبار مربوط به تراختور و آزربايجان را با حسن نيت و بدون غرض منتشر كند. اين بار هم كه خواسته مثلا دفاع و يا به قول خود آسيب شناسي كند* موضوع حقوق و خواسته‌هاي فرهنگي تركها را فقط محدود به  موضوع  عصبانيت به خاطر جوك گويي عليه تركها كرده و، از سوي ديگر  در مقايسه‌اي نادرست و البته ماهرانه جاي ظالم و مظلوم را با هم عوض كرده است تا به نظر برسد تركهاي ايران قابل مقايسه با اسپانيايي‌ها هستند كه در گذشته شوونيست بودند و حالا ديگر نيستند چون فرهنگشان بالا رفته و حتي با وجود باخت تيم خود، بازيكن كاتالان تيم كاتالان را به دليل اينكه با گل خود موجب قهرماني اسپانيا شد، به شدت تشويق مي‌كنند.

فرض كنيد همين اينيستاي كاتالان بازيكن رئال يا آتلتيكو بود و اسپانيايي ها خطاب به كاتالانها مي گفتند صداي عرعر نمياد و اينيستا هم نه تنها سكوت مي كرد، بلكه بعدا در مصاحبه مطبوعاتي مي گفت مادريديها بي گناهند! به نظرتان در بازي برگشت اينيستايي كه با گلش اسپانيا را به قهرماني جهان رساند آيا در نيوكمپ و مقابل تيم اف سي بارسلونا هو نمي شد!!؟ نيوكمپ و بارسايي كه مهمترين دليل شهرتشان همان سمبل هويتي بودن براي كاتالان ها و ايستادگي تاريخي‌شان در برابر آسيميلاسيون بوده‌است. مطمئن باشيد جهنم نيوكمپ براي اينيستا به مراتب بدتر از جهنم سهند تبريز براي دايي و باقري مي شد.

همين سه ماه قبل همه دنيا پس از قهرماني اسپانيا در جام جهاني شاهد بودند كه كارلوس پويول و چابي هرناندز و بقيه كاتالانهاي تيم ملي اسپانيا چه مي كردند؛ ديگر به جزئياتش اشاره نمي كنم؛ انجام دادن اين كارها در تيم ملي ايران پيش‌كش! ولي آيا همين دايي كه تا قبل از ورود تراختور به ليگ برتر هر روز موضوع تمسخر واقع شده ولي امروز سنگشان را به سينه مي زنند،  در جام جهاني 2006 و 1998 مي توانست به لقبهايي همچون "ستارگان پارسي" اعتراض كرده و  مقابل چشم جهانيان به هويت خود ببالد؛ نه اينكه بعدها بيايد و به ميليونها هم زبانهاي خود بي‌سواد، بي‌شرف و بي‌شعور بگويد!

-------------------

* - دشمن‌زاده‌اي كه در اسپانيا تشويق شد و سرداري كه در تبريز فحش خورد!
http://tabnak.ir/fa/pages/?cid=121229

Sunday, September 26, 2010

گون گؤروتلري: خوي گونه‌باخانلاري

بورادا باتي آزربايجانين خوي‌ بؤلگه‌سينده اكينچي‌لرين گونه‌باخان دريب(يوخسا بيچمك!)، دارتماقلاريندان بير گؤرونتو توپلوسو واردير:
برداشت تخم آفتابگردان در شهرستان

گؤروتلري سالانين آدي مجيد حقدوست دور. گؤزل گؤروتلر حاضيرلاييب. آنجاق بئشيني سئچيب، من‌ده بوردا ياييرام:





بو ده بير تيراختور؛ هر يئر ده وار! چيرتداماق ايچين آپارير سهند ايستاديومونا! اؤز آراميزدي خويون گونه باخاني اولماسايدي تيراختور اويونلارينا باخماق اولسايدي دا، هاليوود فيلملرينه اصلن باخماق اولمازدي!

سؤز قونوسو آزربايجان‌؛ تبريزلي اردبيل‌لي يوخوموز

گئچن هفته بلديه - پئرسپوليس ياريشيندا كي اولايلاردا آزربايجان‌دا يارانميش بير ده‌يه‌رلي و داها اؤنملي دوشونجه اورتايا چيخدي و بونون گئرچكله‌شمه‌سي چوخ ياپيشدي؛ آنجاق بو قونو دا چوخ دانيشيلمادي. بيلديگينيز كيمي اوزوم زامان‌دير آزربايجان دا چوخلو بالاجا و بؤيوك كندلر و شهرلر آرالارينداكي يئرسيز اختلافلار آدامي اينجيدير. حتي بو اختلافلار باعيث اولوب يئني اوستانلار و فرماندارليقلار يارانسين. آد دا اولوب امكاناتي ياخشي پايلاماق! بونلارين لاپ تانينميشي اردبيل - تبريز آراسيندا كي سؤزلر ايدي. آنجاق بلديه‌ني آلقيشلايانلار آذربايجانين ايكي بؤيوك اردبيل‌لي و تبريزلي افتخارلاريني سئويب آلقيشلاماق‌دان كئچيجي (موقت) يوخسا داييمي اولاراق واز گئچيب، و ترسينه، اونلاري هويلاماق و غئيرت‌سيز آدلانديرماق ايله ائله‌شيتيريب و بيلينديرديلر كي سؤز قونوسو آزربايجان وارليغي و كيمليگي اولاندا تبريز يوخسا اردبيل يوخوموز.

بو سؤزلري دئمه‌يين نه‌دني تبريزفوتو بيلاغيندا و بير باشقا بيلاق‌دا گؤردويوم سؤز ايدي. سؤزلري قيساجا بو دور كي كريم باقيري اخلاقي داورانيش باخيميندان سابيقه‌سي ياخشي دير و اونون حيسابيني دايي‌دان آييراق. آنجاق ايستاديوم‌داكي اولاي پيس يوخسا ياخشي اولوب گئديب، ايندي گليب بير باشقا تبريز اردبيل تارتيشماسي يولاسالماق اؤنملي يول‌دان ائشيگه چيخماق‌ و ان تهلوكه‌لي ايش و اؤزگه‌نين ده‌ييرمانينا سو تؤكمك دير.  منجه كريمه اولونان سايقيلار، علي دايي ايله برابر گؤستريلميشدير و دئمك و يادا سالماق لازيم دئييل. هم دايي و هم كريم ايكي‌سي‌ده گئچن ايل اويونلاريندا آلقيشلانيبلار. آنجاق نه‌دن كريم‌ده باقيري كيمين هويلاندي؟
کریم ده دایی‌نین ایشلری‌نی نئچه آشامادا گؤروب و گئت گئده اؤز يئري و موقعيتي‌ني آشاغي گتيريب:

1- بو ايلين ياز ايلكينده كي تیراختور - پئرسپوليس و گؤستريس - پئرسپئليس اويونلاريندان اؤنجه آلقيشلانيب آنجاق اويوندان سونرا تاماشاچيلاري دانلاييب و آغيل قويوب كي بير بير سيرا شوعارلاينيز آزربايجانا ياراشان دئييل

2- آزادی ایستادیوموندا کی ايكي دؤنه(حذفي كاپين فينالي و تيراختور ياي اورتاسيندا كي اويونو ) اوز وئرن اهانتلره اعتراض ائله‌مه‌ییب، حالبوكي تيراختورچولاري ائله‌شتيرميشدي

3- تیراختورا قوشولماق سورغوسو قارشي‌سيندا گولمك خبري
و …

او تکجه دایی کیمی میکروفون دالیسیندا آتیلیب دوشمه‌ییب و بو ده طبیعی دیر، چونکو دایی باش مورببی ایدی و او ژورنالیستلر قارشی‌سیندا دانیشمالی ایدی.
منده لومپنیزمه یول وئرمه‌مه‌یین گرکلی اولدوغو ایله راضی‌یام، آنجاق بو دا قالسین کی دایی و باقیری هویلانیبلار، و غئیرت‌سیز دئمک‌ده یامان‌دان چوخ شوعار و ائله‌شتیری(انتقاد) آنلامیندا. هر حال‌دا تکجه کریم باقیری‌نی تبرئه ائتمک و دایی‌دان دیفاع ائتمه‌مه‌ك ايسه منطیقی ایش دئییل. اونلارین قولاقلاري بیرلیک‌ده بورولماق، تبریز ده کی یارانمیش گئرچک کیملیک‌چی‌لیک آنلامیندا و نه یاخشی کی تکجه اردبیل‌لی دایی هویلانمادی و اونون یانیندا باشقا اؤزونو ایتیرن، آنجاق بير تبریزلی تورک‌ده ائله‌شتیریلدی. بو یانداشلارین یوکسک دوشونجه‌لری‌نی گؤستردی و بیلیندیردی کی بو ایستادیوما گئدنلر ساده‌جه بورونلارینین قاباغی یوخ بلکه گله‌جه‌یی ده یاخشی گؤرورلر. کسینلیک ایله تکجه دایی هویلانسایدی اردبیل‌لی‌لر کوسه‌جک‌ایدیلر.

هر حال‌دا تاماشاچیلار ائله‌یه‌بیلردیلر دویغولارینا غلبه ائدیب او بیر ایکی دنه پیس یامانی دا دئمه‌سینلر. و بیر سؤز دا وار من بیلمیرم نه‌دن "گلین گئدک آغلایاق، اورمو گؤلون دولدوراق" کیمی دئییلمیش سؤزلری اوتوروب و یاپیشمیشیق ایکی دنه بخیل و مغرور تورک افتخاری‌نین قولاغی بورولماسیندان! علی دایی‌نین یالان "نئیه آتاتورک آلقیشلاندی" سؤزو ، "من اولان یئرده نئیه دئییرسینیز تورک دیلینده مدرسه و یاشاسین آزربایجان" آنلامیندا ایدی.

بو قونو يا گؤره قاباق‌كي يازيلار:
- يئني نسيل ائله‌شتيرير
- سهندين گؤز ياشي‌سي دا آخدي ( اشك سهند هم جاري شد )
- شئعر گونو و فوتبول ياريشيندا، "تورك ديلينده مدرسه" ايسته‌يي
- آيدين گله‌جك
- بير اصيل آذربايجانلي‌نين راحات‌سيزليغي
- دايي راحات‌سيز اولمامالي‌دير
- دايي‌يا افتخار زيروه‌سينده ال چاتيلماز ديلك

Saturday, September 25, 2010

Barış Sevən Qaliver - باريش سئون قاليوئر

In Mutatione Fortitudo adlı bılağının, "About Tom de Waal - Gulliver of our times" yazısnı bu notla G.Reader də paylaşdım:
Bir millət tikələnib param-parça olsa belə olar! Liliput yoxsa Belfesko adamlarına oxşadarlar sən də bilməsən iftixar edəsən yoxsa hirslənəsən!
Ancaq batılı aracının özünü Qaliver yerinə qoymaq və dünyanın bu bölümündə yaşayanları Liliputlu insanları kimi barmaq boyunda insanlar yerinə qoymaq çox ağır gəldi. Ola bilər onun əsli qərəzi ırqçılıq dəyilmiş, ancaq hər halda onlaın hələ də özlərini üstün görməkləri açıqdır. O özünü üstün və fərqli olduğu nədəni, gəldiyi yurdların kültürndə Barışı sevmək və Savaşı sevməmək dir. O barışı sevən adamları Qaliver kimi böyük və uca baxışlı, ancaq buralarda kı savaşı xoşlayanları balaca və alçaq baxışlı bilir.

Məncə belə sözü danışan heç zaman insaf ilə qəzavət eləyəbilməz və qurduğu barış da keçici və muvəqqət olabilər. Biri yoxdur onlara deyə siz də illər boyu boğuşubsunuz və savaşlarınızda milyonlar adam həlak olub və sizin ölkələr də savaş qurtarıb barış durumunda olsanız da Ortadoğu və Qafqaz da ki çağdaş çatışmalar sizin dünyalıq savaşların sonucu dur. Qaliverlərin ayağı altında basılan yerlər hələ də abad olmayıb və bu tezlikdə isə düzələməyəcək. Ola bilər Qaliverin gözləri Qarabağın nədən işğal olunmasında, balaca və incə şeyləri görməsin. Onun gözü bu incəlikləri görməsədə geçmişdə Azərbaycanda saldığı toz-torpaqları görəbilər! Çünkü bu toz torpaqlar öz boyunda və əlbəttə bu toz - torpaqların altında bizim də canımıza düşənlərin görülməməyi də doğaldır.

باريش سئون قاليوئر

In Mutatione Fortitudo  آدلي بيلاغي‌نين، " تام دئ وال، چاغداش قاليوئره گؤره" يازيسيني بو نوت ايله جي.ريدئر ده پايلاشديم:
بير ميلت تيکله‌نيب پارام-پارچا اولسا بئله اولار! ليلي‌پوت يوخسا بئلفئسکو آداملارينا اوخشادارلار سن‌ده بيلمه‌سه‌ن ايفتيخار ائده‌سن يوخساحيرصلنه‌سن! 
 آنجاق باتي‌ دان گلميش آراجي‌نين اؤزونو قاليوئر يئرينه قويماق و دونيانين بو بؤلومونده ياشايانلاري ليلي‌پوتلو اينسانلاري کيمي بارماق بويوندا اينسانلار يئرينه قويماق چوخ آغير گلدي. اولا بيلر اونون اصلي غرضي ايرقچيليق دييلميش، آنجاق هر حالدا اونلارين هله‌ده اؤزلريني اوستون گؤرمکلري آچيقدير. او اؤزونو اوستون و فرقلي اولدوغو نه‌دنه‌نيني، گلديگي يوردلارين کولتورنده باريشي سئومک و ساواشي سئومه‌مک‌دير. او باريشي سئون آداملاري قاليوئر کيمي بؤيوک و اوجا باخيشلي، آنجاق بورالاردا کي ساواشي خوشلايانلاري بالاجا و آلچاق باخيشلي بيلير.

منجه بئله سؤزو دانيشان هئچ زامان اينصاف ايله قضاوت ائليه‌بيلمز و قوردوغو باريش دا كئچيجي و مووققت اولابيلر. بيري يوخدور اونلارا دئيه، سيز ده ايللر بويو بوغوشوبسونوز و ساواشلارينيزدا ميليونلار آدام هلاک اولوب و سيزين اؤلکه‌لر ده ساواش قورتاريب باريش دوروموندا اولسانيز دا، اورتادوغو و قافقاز دا کي چاغداش چاتيشمالار سيزين دونياليق ساواشلارين سونوجو دور. قاليوئرلرين آياغي آلتيندا باسيلان يئرلر هله ده آباد اولماييب و بو تئزليکده ايسه دوزه‌لمه‌يه‌جک. اولا بيلر قاليوئرين گؤزلري قاراباغين ندن ايشغال اولونماسيندا بالاجا و اينجه گئرچكلري گؤرمه‌سين. اونون گؤزو بو اينجه‌ليکلري گؤرمه‌سه‌ده گئچميشده آذربايجاندا سالديغي توز-تورپاقلاري گؤره‌بيلر! چونکو بو توز تورپاقلار اؤز بؤيوندا و البتته بو توز - تورپاقلارين آلتيندا بيزيم ده جانيميزا دوشنلرين گؤرونمه‌مه‌يي ده دوغالدير.

Thursday, September 23, 2010

الويداع آناديلي

ايگيرمي ايل اولاردي تبريز تيلويزيونونا باخمازديم. اوشاقليق‌دا جومه گونلري تبريز ناهاردان قاباق هر دن توركجه كارتون وئرردي! سونرا بيلديم كي او كارتونلار باكي‌دان ياييلميش روسي چيزگي فيلملر ايميش. گينه آدام دئيير يوز رحمت او زامانلارا! هر دن تيلويزيون‌دا اوشاق اؤز آناديلينده "جيب جيب جوجه‌لريم" گؤرورموش! ايندي ايسه تيراختور اويونلاري‌ني گؤرمك باعيث اولوب گينه‌ده تبريز تيلويزيونونا گؤزلري آيدين اولاق! اردبيل كانالي "گئجه‌لر" وئرنده، تبريز ده "سهنديه" وئرير! يازيقلار اولسون كي بوندان اؤنجه سهنديه دئيه‌نده شهريارين ياراتديغي شاهكار ياديما دوشه‌نده، ايندي ده بو سهنديه‌نين اتي آجي و دوزسوز آپاريجي‌سي ياديما دشور! البته انصاف‌دان دا چيخماياق ائله ده پيس دئييل آذربايجانين گنج ياراديجي و سئچگينلري‌ني گتيرير دانيشديرير. آنجاق نئچه گئجه بوندان قاباق زهله‌مي آپاردي! بير گنج قادين گتيرميشديلر ساغلامليق آراشديريجي‌سي ايدي؛ آنجاق تبريزلي نوخبه‌ميز توركجه دانيشابيلميردي و آپاريجي اونلا فارسجا دانيشيردي. من بيلميرم بئله آدامين هاراسينا نوخبه و سئچگين دئمك اولار؟

سئچگين‌لر سؤزو اولدو 1382 جي ايلين يازيندا كي تئهرانين بهمن كولتور ساراييندا آزربايجان سئچگينلر فئستيوالي ياديما دوشدو. او زامان علي دايي و كريم باقيري ده ايدمان دا سئچيلميشديلر، آنجاق باشقا سئچگينلرين يانيندا اوتورماق افتخاري وئرمه‌ديلر. او زامانلار ايدي كي ياواش ياواش، اولدوزلاريميزين ايشيقلاري آزاليردي. و هامي بو اولدوزلارين سؤندورولمه‌سي‌ني تبريزين سهند ايستاديوموندا گؤردو...

بير باشقا نوخبه‌لر و سئچگين‌لر ده وارديلار كيمليك‌ و وارليقلارينا ساري دؤنورلر، آنجاق تئز تئز اونلارين يادينا سالماسين آلزايمئر توتانلار، يوخسا اويوشدوروجويا دادانانلار كيمي يول‌دان آزيب، و 180 درجه‌‌لي ترسينه دانيشيرلار. بونون نه‌ده‌ني قاييدير يانليش دوزه‌نكلي اؤيره‌تيمه (سيستم غلط آموزشي) يا دا بئيين يووان و آسيميله ائدن اؤيره‌تيم سيستئمينه. نه‌قدر ده ياراديجي و ذكالي آداملاردا اولسالاردا، دوشونجه‌لري بير سايي قاليب‌دن ائشيگه چيخابيلمير. بير اؤرنك دئييم؛ بو گون گوز ايلكي دير؛ مئهر آيي‌نين بيرينجي گونو. هر كيمسه آزربايجان دا بير آز بو وارليق و كيمليك قونوسوندا بيلگي‌سي اولورسا تئز آناديلي‌نين ياساقلانماغي يادينا دوشر؛ آنجاق بير يولداشيميز مئهر آيي‌نين بيرينجي گونونو قوتلو اولسون دئييب هئچ، داليسيجا زرتوشتي‌لره ده مئهرگان گونونو خاطيرلادديب و تبريك ائديب!

بونلارين آناديللري ايله ويداعلاشمالاري بيزيم ويداعلاشماغيميزين تايي‌دئييل سانكي. البته چون هامي آزاد دير نه ايسته‌يير دئسين، آنجاق من‌ باش ساغليغي‌ دئييرم:
"آناديليميز ايله ويداعلاشماق گونو تسليت"!

Tuesday, September 21, 2010

*يئني نسيل اله‌شديرير

من تانيش ياشلي‌لار و قوجالارلا دانيشاندا، چوخ ايسته‌رم اونلارين اوشاقليق و جاوانليق خاطيره‌لريندن و او دؤنملرين توپلوم ياشاميندان بيلگي‌لر اله گتيرم. آنجاق دونيانين بيرينجي و ايكينجي ساواشيندا بؤيويه‌ن ياشلي‌لار او قدر يازيقليق‌دا بؤيوموشلر كي آدام اصلن ايسته‌مير اونلارلا چاغداش زامانلارداكي كيمليك سورونونا دانيشسين. اونلارا آدام حاق وئرير كه نه‌دن ائله بؤيويوب و يئتيشميشلر. ساغلامليغين چوخ پيس اولماغي، آجليق، قحط، بيلگي و ساوادين آزليغي او زامانكي دونياليق ساواشيندا، خالقي مجبور ائديرميش نئچه آغاجليق‌دان اوزاقلاري‌ني گؤرمه‌سينلر. ايران‌دا نفت گليري پايلاشيليب و آسيميلاسيون ايله بيرليك‌ده، ياشام كئيفيتي‌نين ياخشي‌لاشماسي، او نسيلين فيكري قاليبيني آذربايجان مدنيتي‌ني دالا قالميش، آنجاق باشقا بير كولتوره گيرمك ايله ياشامين يوكسك سطحه يئتيشمه‌سينده فورمالاشديريردي. بونلارين يوز ده دوخساني بئله دوشونورلر؛ وارلي‌لاري، يوخسوللاري، ساوادسيزلاري، ساوادلي‌لاري، و حتي بيلي‌يورد اوستادلاري‌دا. بير قوجا قادين 1325 گوزونده كي خالخال-كيوي كيمي بالاجا بير يئر ده موحاكيمه‌سيز اؤلدورولموش آداملارين جسدلريندن قالاقلانماسيندان دانيشير و بونو اوشاقليغينين ان دهشتلي گؤردوغو بيلير، آنجاق دئيير هر حال‌دا ياخشي اولدو، نئچه ايل‌دن سونرا اؤلكه‌نين دورومو دوزه‌لدي. بير باشقا قوجا ساوادلي كيشي ده وار قارداشي‌نين او زامان گنجليك‌ده قوزئيه قاچماسيندان پيس خاطيره‌سي واردير و ايندي گؤره‌نده بير گنج آدام اولوسال ايستكلردن دانيشير دئيير بو تعصصوبلري اؤتورون! بيري‌سي ده واردير دئيير آللاه رحمت ائله‌سين رضاشاهي گلدي قاتار و يول چكدي! ... بونلارين بير سايي‌سي سونرالار سياست ايچينه گيرديلر باش باخانليغا قدر گئتديلر. آنجاق نئجه دوشونمكلري ايچينده وارليق و كيمليك سورونو گؤرونمه‌دي و سانكي گؤرونمه‌يه‌جك! آنجاق ايستيثنالار دا وار ايديلر، آما سيخينتي‌يا گؤروب خطر دوياندا، قاليب اولونموش كيمليك‌دن ده دانيشيرديلار. آنجاق آرتيق دانيشاندا آرازا گئديب اوزمك باشارماييب، بوغولوردولار. خبر و بيلگي پايلاشماغين گئنيش دوروم‌دا اولان دئييلدي.

زامان گئچيردي و ايكي باشقا نسيل‌ده گلدي. بونلار آنا آتالاريندان اؤيره‌نيرديلر كي باشاري‌لي اولماق اوچون گرك وارليق و كيمليك و كولتورون‌دن واز گئچه‌سن. اوشاغي‌نا آناديلي اؤيره‌تمه‌يه‌سن. كارمند اولسون انتقال آلاسان تئهرانا. اكينچي اولسون وار يوخونو ساتاسان گئده‌سن تئهرانا توكانچي اولاسان و بئله بئله ياشاماق اوسلوبو. بونلارين ايچينده هر جوره آدام و هر جوره ايشچي گؤرمك اولور. هامي‌سي بئله‌ديرلر. فيلم دوزه‌لدن، اويونچو، آرتيست، حتي آشيق و موسيقي‌چي!، ايدمانچي، فوتبولچو، اؤيره‌تمن، آراشديريجي، يازار، نقاش، خياط، چؤركچي، و ....! دوغوم ايللريني بؤلسوك بونلار 1330 دان ديرلار 1350 جي ايله‌دك. نئچه ايل‌ده اويان بويان اولابيلر. بونلارين ايچينده قادينلار چوخ چاليشيرلار لهجه‌سيز دانيشسينلار. كيشي‌لري ده انقلاب و ساواش زامانيندا اولماق ايچين، خطر احساس ائليرلر قاييتسينلار آتا-آنا بابالاري زامانينا و گئديب اللريندن گلني‌ده گؤرورلر.

زامان داها ايره‌لي گئدير. ايكي نسيل‌ده گلير. بو ايكي نسيلي رسمي حالت‌ده باشقا بير كولتور ده بؤيوتمك آتا آنالارا گركلي بير ايش كيمي بيلينير. تيلويزيونلار دا هر يئر ده وارديلار و آتا آنالارا يول گؤستريرلر. آنجاق بو نسيل بيلگي‌لرين او يان بو ياندان داها آرتيق گلمه‌سي ايچين داها حد دن آرتيق بيلگي‌لر اله گتيريرلر. 1370 دن 1385 ايللرينه دك بوتون قاليبلري سينديرب و ايپلري قيرديلار. بيلي‌يوردلاردان چاي آخدي خالقين ايچينه. چايلار چوخلو يئرلري سووارديلار. سون نسيل داها بيليجي دير، موحافظه كار دا دئييل. سؤزو آچيق دئمك‌دن قورخوسو يوخ‌دور. اولابيلر قديمكي‌لر بونو دوز داورانيش بيلمه‌سينلر، آنجاق يئني نسيل بو يولا اينامي وار سانكي. رحم ائله‌مير. ايسته‌يير هامي واكسيناسيون اولسونلار. علي دايي‌نين قولاغي‌ني بورور ونگيلله‌دير، كريم باقيري‌يه دئيير هوش باشيني بير يئره‌ييغ هئچ زامان بؤيودنلري‌ني اونوتما! رحيم شهرياري‌يا دئيير نه‌دن اؤزونو بير گئجه‌ده ايتيريب، بي‌بي‌سي تاپشيريغي‌ني اوخودون؟ كمال تبريزي، تهمينه ميلاني و جعفر پناهي‌يا دئيير گؤرونتولرينيز اؤز پايي‌نيز اولسون! دوكتور حسن احمدي و دوكتور انوري و باشقا بيليم آداملارينا دئيير اولمازدي اؤز ديليميزه ده بير آدديم گؤتوره‌يدينيز و ... .

بو اله‌شديري‌لر(تنقيدلر) اولابيلر يئني نسيللرين گئچن نسيللري سورغو آلتينا چكيب، موحاكيمه ائتمك آنلامي‌نا گلسين. آنجاق بئله دئييل. بو ايشلر موحاكيمه دئييل. اؤج آلماق(انتقام)، ايهانت، ساتاشماق و اؤجه‌شمك ده دئييللر. يوخاري دا واكسنياسيون دئمه‌يي بير ده وورغولاييرام. يازيقلار اولسون كي بئله يئته‌نكلي‌لر اينجي‌‌ييرلر. تقصيرلري يوخدور. ائله يئتيشميشلر. پيس كودلار ايله. يئني نسيللر بئله بؤيومه‌مك ايچين يولو ده‌ييشمك ايچين اؤزوموزه پارلامايان اولدوزلاريميزا آلقيشلاماق يئرينه اوياري وئرمك مجبوريتينده ديرلر. يوخسا يئني نسيلين باشينا گله‌جك‌ده لاپ پيس اويون دا گله‌بيلر. يئني نسيلي بو ايشلري گؤرمه‌لي‌دير.

---

* - اله‌شديرمك تنقيد و انتقاد ائتمك آنلاميندا.
بو پوستو يازماغين نه‌دني داش‌قاپي‌نين "تانین‌دیقدا هویلانیر" يازي‌سي‌ني اوخوماق ايدي. اولابيلر ائله‌ده ايليشگي‌لي اولماسينلار!

Sunday, September 19, 2010

اشك سهند هم جاري شد

انگار تلويزيون صدا خفه كن گذاشته بود تا صدا واضح نباشد ولي به محض اينكه دوربين عكس شهريار را نشان داد و گزارشگر هم به روز ملي شعر و ادب اشاره و سالروز درگذشت شهريار اشاره كرد، تماشاگران هم تصوير شهريار را در اسكوربورد ديدند، در يك هماهنگي بي‌نظير، بلافاصله فرياد زدند: "تورك ديلينده مدرسه اولمالي‌دير هر كسه (مدرسه به زبان تركي براي همه)".
البته تلويزيون فرصت كافي را نداشت تا اين صدا را هم پايين بياورد، ولي حتي اگر مفهوم نبود از روي آهنگ هم مي شد تشخيص داد يكي از معروفترين حرفهاي تركها را!

در كنارحرفهاي رايج و صداي هياهويي كه شنيده مي شد، تماشاگران حرف جديدي را مي گفتند. هر چه صداي تلويزيون را بلند كردم، نفهميدم چه مي گويند. به نظر نمي آمد كه به علي دايي و كريم باقري متلك پرانده و بي غيرتي و سكوتشان در استاديوم آزادي تهران را به سرشان مي زنند.

و بالاخره متوجه مي‌شوم آنچه تماشاگران در بازي شهرداري و پرسپوليس مي گفتند چه بود. در حالي متوجه مي شوم كه اشك در چشمانم حلقه زده، چشماني كه به سادگي اشكش در نمي‌آيد. چون كساني كه هفته قبل حتي با وجود باخت در يك بازي خانگي  تيم محبوبشان تراختور براي حفظ روحيه رقصيده و شادي مي كردند، از همگان دعوت مي كردند تا اشك بريزند:

" گلين گئدك آغلاياق، اورمو گؤلون دولدوراق"
(" بياييد برويم گريه كنيم، بلكه درياچه اروميه پر شود ")

و حالا متوجه مي شوم افتخار سابقمان چرا مستحق شماتت بوده است! وی به خاطر حقوقي كه براي شخص خود قائل بوده، ساعتها در تلويزيون ملي صحبت كرده و پيراهن شركت خود را بر تن بازيكنان مي كند و دهها استفاده ابزاری دیگر از جایگاه خود کرده ولی در عين حال اين حق را براي همزبانانش قائل نيست، نگاهي فراتر از فوتبال در ميادين فوتبال داشته و به خاطر درياچه اروميه و زبانشان حتي اشك هم بريزند. او حتی اين كارها را بي‌شرفي و تشويق آتاتورك مي داند!

ديگر نمي توانم تايپ كنم، چشمانم ديگر مانيتور را نمي بيند...

ویدئو زیر را ببینید:


شئعر گونو و فوتبول ياريشيندا، "تورك ديلينده مدرسه" ايسته‌يي

بلديه‌نين تئهرانين پئرسپوليسي ايله اويونو واردير. بلديه جدولين ديبينده و يلخشي سونوج گؤزله‌نيلمير. آنجاق دايي و باقيري‌نين بير آي بوندان اؤنجه كي تيراختور - پئرسپوليس اويونونداكي توركلره اولان سايقي‌سيزليق قاباغيندا لال اولوب سوسماقلارينا گؤره ايسته‌ييرم گؤرم بلديه‌ني آلقيشلايانلارين عكس العملي نه اولاجاق‌دير. گون‌ده رحمتليك شهريارين اؤلوم ايل‌دؤنومو دور اولوسال شئعر و ادب گونودور(البته بيزيم ديل يوخ!) و اولابيلر "تورك ديلينده مدرسه" سؤزو چوخ ائشيديلسين.

اوچونجو كانال (شبكه 3) ده تئهرانين سئوگيلي تيمي‌نين اويناماغينا گؤره گؤسته‌رير، آما ته‌له‌ســيك اؤزومو يئتيريب وورورام سهند كانالينا. اويون باشلانماييب و تبريز تبليغات گؤسته‌رير. تبليغاتين بيري‌سي كولتورل دير! بير ايكي دنه اوشاق گؤسته‌رير ايمه‌كله‌يه ايمه‌كله‌يه دئييرلر "بابا بابا... ماما ماما..."؛ بير قادين دا فارسجا دئيير بير باشقا ديل‌ده اؤيرنين ايكي ديللي اولون و ايكي دونيا دا ياشايين! منظورو اينگيليس ديلي‌دير؛ فارسجا دا دانيشماغينا گؤره من ده اؤزومله دئييرم به نه اولدو بيزيم ديليميز؟ ياني تبريز كاناليندا دا توركجه بير ديل حيسابيندا دئييل؟! بو فيكيرلرده‌يه‌م كي اويون باشلانير!

تاماشاچي اون‌مين نفره ياخين گليب و دايي همه‌شه كيمي دوروب مئيدانين قيراغيندا بير الي‌ده جيبنده. تاماشاچيلار دا سهند ايستاديوم‌دا همه‌شه كي سؤزلري دئييرلر و تيلويزيون‌دا اؤزلليكله سسين آلچاق - اوجا اولونماسي‌دا بيلينير! هر دن ده دايي‌يا غئيرت‌سيز دئييرلر و كريمين آياغينا توپ دوشه‌نده هويلاييرلار! تيليويزيون‌دا اويونو ريپورت ائدن، آرا دا دئيير بو گون فارسجا ادب و شئعر گونو و تورك ديللي شاعيرين اؤلوم ايل دؤنومودور. بو سؤز دئييله‌نده كامئرا شهريارين عكسي اوستونده اولان بير تابلونو گؤسترير و تاماشاچيلار بونو ايسكوربورد دا گؤرنده تئزليكله سسله‌نيرلر: "تورك ديلينده مدرسه ...". ياشاسين بئله بيليجي تاماشاچي.

اويونون سون اون ده‌يقه‌سي دير. بلديه‌‌ ياخشي اويناييب و قاپي‌سيني باغلي ساخلاييب هئچ نئچه دؤنه ده ياخشي سالديريب. آنجاق گينه بير يانليش اؤز وئرير و بلديه قول يئيير! علي دايي‌نين راحات بير نفس چكمه‌سي‌ني گؤسته‌ريرلر؛ اوره‌يينده دئيير آهان به‌تر حالينيزي توتدوم! تاماشاچيلار تيراختورون ياراتديغي كولتورونه گؤره بلديه‌نين سوروملولارينا ايهانت ائتمه‌ييرلر، آنجاق سسلري‌نين آزالماغي بللي‌دير. پئرسپوليس تيمي بير جاوان و تجروبه‌سيز تيم قارشي‌سيندا زامان تلف ائدير. يئددي دقيقه زامان آرتيريلير. 96 جي دقيقه بلديه بيرليك قولو وورور، و اومودسوز تاماشاچيلارين شنليك سسلري يئر گؤيو گؤتورور، من ده تيلويزيون صفحه‌سيني اؤپورم...! 

كيم ايدي 10 ايل جاوانلاشيب تيراختوروچون اويناماق ايسته‌ييردي؟

نئچه ساعات‌دان سونرا گيريرم اينتئرنته. اويون‌دان سونرا كي تارتيشمالي موصاحيبه‌لر و دانيشيقلار اولوب‌دور! علي دايي گؤر نه ‌لر دئييب هله. ديرناق آراسيندا من ده آچيقلاما و يا جاواب وئرميشم:

-" ايهانت ائدنلر اؤزلري غئيرت‌سيز ديرلر. " (بير آي بوندان اؤنجه آزادي ايستاديومونو اونودوب سانكي!)

-" تبريز ده كيمسه فوتبولا گؤره ايستاديوما گلمير" (نه جور اولدو، آلتي آي بوندان قاباق دئييردين كئشگه اون ايل جاوان اولارديم، تيراختور اوچون اوينايارديم؛ بوراني اوخويون: آرزوي دست نيافتني دايي در اوج افتخار*)

-" دونيانين هاراسيندا گؤروبسونوز اؤز همشهري‌لرينه بئله ايهانت ائده‌لر؟" ( و دونيانين هاراسيندا گؤرونوب آدام پولا گؤره اؤز همشهريلرينه توهين اولاندا سسين چيخارتمايا)

- "تبريز ده كيمسه فوتبولا گؤره ايستاديوما گلمير؛ اونلار باشقا سورونلار داليسيجا ديرلار. يادگار امام ايستاديوموندا نه‌دن گرك آتاتورك آلقيشلانا؟" ( البته هامي بونو بيلير فوتبول اذربايجان فوتبول‌دان اوستون دور و بونو دانان يوخدور. آنجاق سورون بو دور كي نه جور اولور غئيرت ايدديعاسي اولا اولا "تورك ديلينده مدرسه" سؤزو، آتاتوركو آلقيشلاماق آدلانير!؟)

- "دونيانين هاراسيندا 7 دقيقه اضافه واخت توتارلار؟" (دايي‌يا بيري دئمير كي دونيانين هاراسيندا قاپيچي اون دقيقه يئره اوزانار!؟)

- "نه‌يه اؤزونوزو وورورسونوز باشقا يولا؟ نه‌دن قبول ائتميرسينيز كي بير اؤلكه‌دنيك؟ باشقا سورونلاري فوتبولا قاتمايين!" (علي دايي موغاليطه‌سينه داوام ائدير! نه‌جور اولور سن جيبينه گؤره اوچ ساعات تيلويزيون‌دا دانيشابيليرسن و فوتبول‌دان سوء استفاده ائديب و اؤز شيركتي‌نين كؤينكلري‌ني تبليغ ائديب ساتيرسان آنجاق سنه اوزلو ائدن آذربايجانليلارين حاققي يوخدور فوتبولا باخيب هر دن ده اؤز ايستكلريندن دانيشسينلار؟ ايستك‌دن دانيشماق ياني بيز باشقا اؤلكه‌ده‌ييك؟ اون‌دا سن ده ناقابيل 600 ميليون داليندا اولاندا گرك سنه دئيه‌ك بؤلوجو؟ اصلن سن كيمسن آذربايجانليلارا آغيل قويورسان؟ قوصور اؤزوموزده كي سني هامي دالين چئويرنده سن‌دن حيمايت ائله‌ديك)

- "ايكي كيلاس ساوادلي بير آدام منه ايهانت ائدير، چونكو من پئرسپوليس مورببي‌سي‌يه‌م!... هامي بئله دوشونسه‌لر بير اهوازلي گرك فولاد قارشي‌سيندا اوينامايا، بير شيرازلي موقاويمت قاباغيندا اوينامايا و ..." (علي دايي دان بير بؤيوك ايستك بودور كي اؤزونو كالليغا وورماسين! بئله دانيشسين سنين شريف بيلي‌يوردوندا درس اوخوماغين هئچ ديپلوم و ابتدايي مدركلرين‌ده گئدر سورغو آلتينا! سنه غئيرت‌سيز دئمك نه‌دني بللي‌دير؛ اؤزونده ياخشي بيليرسن و بونو دا ياخشي بيليرسن هم بلديه و هم تيراختور دا كي اويونچولارين ياريسيندان چوخ تورك دئييللر: كمالوند لور دور، ميثاقيان مشهدلي فارس دير، كرار جاسم عرب دير، ميثم بائو مازندرانلي دير، دقيقي گيلك دير، كياني لور دور، گودرزي شيرازلي فارس دير و ...! سون خبره گؤره ائرمني آندرانيك تئيموريان دا تيراختورا قوشولدو! )

سون سؤز:
يامان دئمك هر حال‌دا دوز ايش دئييل(بو دا قالسين كي دايي‌يا يامان وئريلمه‌ييب و تكجه علئيهينه شوعار دئييليب). آنجاق دايي بونو بيلمه‌لي دير هر نه گؤرور نه‌دني اؤز ايشلري‌نين جاوابي‌دير. اينشاللاه كي ياخين گله‌جك ده آذربايجان خالقيندان باغيشلانماق ايسته‌سين. او بيلير كي توركلر كينه‌لي دئييل‌لر و توركلر ده اونو بير جاييزالخطا آدام بيليرلر. ائله ده تقصيري يوخدور، پول و شؤهرت ايچينده باتيب و بير آز ال آياغيني ايتيريب و چتين ايش‌دير. هر كيم دئسه اونون يئرينده اولسايدي بئله اولماياجاقدي، منطيق ايله دانيشمايير كسينليك ايله! آنجاق هر نه‌يين‌ده بير حددي واردير و خالق دالغاسي قاباغيندا آدام باش اه‌يمه‌لي دير. يوخسا بير گئجه‌ده يوكسك‌لره قالديريلماغين ترسينه اولماغي چوخ راحات‌دير! گؤروسونوز كي!

بو قونو يا گؤره قاباق‌كي يازيلار:
- * دايي‌يا افتخار زيروه‌سينده ال چاتيلماز ديلك
- دايي راحات‌سيز اولمامالي‌دير
- بير اصيل آذربايجانلي‌نين راحات‌سيزليغي
- آيدين گله‌جك

Wednesday, September 15, 2010

باشلاري‌ني يئره‌ سوخان ده‌وه قوشلاري

بيلي‌يورد دا ايكي قوشاچاي‌لي يولداشيم وار ايدي. ايكي‌سي ده بو اؤيره‌نجيسل توپلانتي‌لارا قاتيلاردي‌لار. بيري‌سي گاه ساغ ساز چاليردي هر دن ايسه سول! بيري‌سي‌ نه قدر چوخ قاتيليب ايش دولانديراردي، بو بيري‌سي ده ياواش ياواش ييغينتي‌لاردان اوزاقلاشاردي. ساواش آهنگي دانيشمالار دا اولاردي. او بيزلري ايرقچي‌ بيلردي و دئيه‌ردي سيزلر حددن آرتيق تورك-تورك ائليرسينيز و دونيانين باشقا چتين‌ليكلري ايله ايشينيز يوخدور؛ من بوندان بو يانا توركلر ايچين يوخ بلكه "بشريت" ايچين چاليشاجايام!
من ايسه بئله فيكر ائله‌رديم بو يولداش اؤز خالقيميزين سورونلاري‌ني ياخشي دوشونمه‌دن، آخي هارادان بيله‌جك اؤرنك ايچين لاتين آمئريكا دا كي بوليوي‌لي‌لرين پرابلئم‌لري نه‌دير؟ اصلن بيز اؤزوموزو تانييب و اؤزوموزو باتلاقلاردان چيخاردا بيلمه‌ميش نئجه باشقالاري مينلر آغاجليق‌دان نيجات آغاجي اوزاديب اويادابيله‌جه‌ييك! البته اون اون بئش ايل‌دن سونرا گؤروروك همن آدام ايندي دونيانين گون باتان باشي يوخ بلكي گون چيخان باشيندا بشريتي تكجه اؤزونده خولاصه ائله‌ييب سانكي.

بو گونلر گينه ده بؤيوك لوغمالاري اوتماق ايسته‌ييب و "كل بشريت"ـه فيكر ائدنلر تاپيليرلار. بيز كيمليك‌چي‌لري ايرقچي تانييانلارين بيري‌سي بيزه دئيير: "گلين دونيايايا بير نئچه ديقه يوخاريدان باخين! داها اوجالاردان! او زامان اينسانلارين يئر اوزونده کي پروبلئملري­نين، عيرق، سوي، نژاد، ائتنيک کيمي آنلاييشلارلا باغلي اولماديغيني درحال آيدين ـ آشکار گؤره­‌جکسينيز."

من‌ده نئچه دقيقه يوخ بلكه بئش اون ثانيه يوخاري هئچ سامان يولون‌دان دا ائشيگه چيخيب، بير شئي‌لر "گؤرندن سونرا" بئله بير يوروم قويورام:

دئيه سن چوخ اوچوبسان گؤي‌لره؛ ائله اورادان اينسان - غئير اينسان آراسيندا بئله فرق يوخ. هر نه ياشاماق‌دا اولان يارانميشلار ديرلار! سن ائله سامان يولون‌دان دا چيخ ائشيگه و لاپ اوزاقلاردان باخ بو دونيالارا. بير بالاجا نوقطه ده ياشاييش وار-يوخونو دا تاپابيلمه‌يه‌جكسن!!

گؤرورسونوز كي يئردن باخان بير آدامين، ميليونلار ديلداشين سيستئميك آسيميلاسيون نه‌دنلره گؤره آناديللرينده ياخشي يازيب اوخوماغي‌نين آيدين-آشكار گؤرمه‌يي‌ني اونوتماق، گؤي‌دن يئره باخماق دئييل كي هئچ، بلكي ده‌وه قوشونون قورخولو گئرچك‌لري گؤرمه‌مك ايچين باشي‌ني يئره سوخماغي يادا سالير!


ي. س:
داش‌قاپي‌‌نين دا بو يازي‌سيني اوخويون: "من دونیا سورونلارینین دوشونه‌نین بیری‌یم". چوخ گؤزل‌دير.

Sunday, September 12, 2010

سونوج اؤنملی دئییل

ایلک ده آدام دئییردی بوندان پیس اولماز! ائو یئیه سی اولدوقدا ســکسن مین یانداشین گورولتولو آلقیش قاباغیندا اوتوزماق دان چتین ایش اولمازدی. البته دئییرلر شیددتلی آلقیشلاماق هر دن ترسینه سونوجلانار؛ و اولابیلر تیراختورون سهند ده اوتوزماسی ائله بیر گئرچه یی گؤسترمک ایچین ایدی!
هر حال دا توتساق بئله عجیبه اوتوزماقلاریندا یانداشلارین سووتماسیندان اؤترو بیر توطئه دا اولابیلر، بیز هئچ زامان روحیه میزی ال دن وئرمه مه لی ییک. بو ایشین چتین اولدوغونا و بیر سایی نین دا شاخسئی گئتمه سینه باخمایاراق(!)، ساغ اولسون بو یولداشلار کی بیرینجی اؤنمین یاریش سونوجوندا اولمادیغینی، مئیدانین ائشیگینده شنلیک و رقص ایله گؤستریب، اؤنملی اله گتیردیگیمیزین نه اولدوغونو بیلدیریب و بیز کیمی اوزاق دان گئدنلری شن و شاد یولا سالدیلار:


بو دا تیراختور ایله اصفهانین ذوب آهنی یاریشیندان، گؤرونتو و کلیپ توپلوسو:
Görüntü toplusu Tirəxtur ilə Zobahən yarışından, Səhənd istadiomu - Sep.10,2010


ي. س:
آي آللاه بيز بو مريض و غرض‌لي سايتلارين اليندن نئيله‌يه‌ك؟ نئچه گوندن سونرا يوخاري‌دا شنليك ويدئوسونو iranianuk سايتيندا قويوبلار. آنجاق بو باشليقلا: "رقص آذربايجاني قبل(!!؟) از بازي فوتبال تراكتورسازي و ذوب آهن (باغلانتي)". گؤزوموزون قارشي‌سيندا يالان يازيرلار. ايشيق گونو آلتيندا يالان دانيشماق و قوندارماق ايله خبر يايماق بونلارين تك ايشي دير. فيكر ائليرم  ويدئونو يوتيوب دا قويان ديلداش‌دا ايسه آزجا قصور وار ايميش كي فارسجا آچيقلاما وئرمه‌ييب بو رقص اويون‌دان و اوتوزمادان سونرا دير. باشليق بئله اولمالي‌ ايدي: 
"رقص آذربايجاني بعد از بازي فوتبال تراختور و ذوب آهن با وجود باخت خانگي تراكتورسازي".


ي. س. 2:
كليپي يوتيوبا ‌قويان يولداشا بير قيسسا يوروم گؤنده‌رن‌دن سونرا، تئزليكله باشليغي اصلاح ائديب. اللري آغريماسين:

YouTube : "رقص آذربايجاني بعد از بازي فوتبال تراختور و ذوب آهن با وجود باخت خانگي تراكتورسازي".



Tuesday, September 7, 2010

رسمي و غاليب كولتور بيزيمكي ايميش

دوز دور قرار اولدو ساغ - سول دانيشيقلاردان واز گئچه‌م آنجاق آذربايجان و آذربايجانلي‌لارا گؤره بوراخيلميش يانليش باخيشلار و يازيلارا ائله‌شتيرمه‌يي باجاريغميز اولورسا، اوندان واز گئچمه‌مه‌لي‌ييك. اولابيلر بير يول‌دان گئچن بير بيلگي‌سيز آدام اورالاردان گئچسين، و اونون دوغرو اولدوغونو اينانسين.  بيز ده كي باديمجان شيتيلي دئييليك؛ گرك بيز ده ائله نظر لري خونثا و ائتگي‌سيز ائتمك يولوندا بير آدديم آتاق! بو دا قالسين كي دئييله‌جك ده‌وه گؤزو آلتيندا آتيلان شيللاغي دؤزه‌بيلمه‌دي ...

ايندي بو نئچه خطي اوخويون:
ايران ايسلام ريسبوبليكاسيندا رسمي ديل اگر فارس ديليديرسه، رسمي و غاليب كولتور آذربايجان كولتورودور(!). ايرانين تبليقات آپارديقي سياسي و رسمي داورانيشي ايرانين غربي ميللتلرينه و خوصوصي ايله آذربايجانا عاييددير. يعني بيز ايرانين شرق ميللتلرينه باخيريقسا اونلارين ديني و كولتور موناسيبتلريني طاليباني و بنيادگر گؤروروك، آنجاق ايرانين غربي ميللتلري يوموشاق بير ديني موناسيبتلرده ياشاييرلار. ايران چرچووه سينده آذربايجانليلاردان باشقا ميللتلرين ايچينده چيشيتلي فيرقه لر و باشقا مذهبي اقلييت لر چوخ‌دور. مثلن فارسلارين سوننو لري ، زرتوشتي‌لري ، بهائي‌لري واردير. كوردلرده بئله‌دير ، عربلرده ، توركمن‌لرده ، بلوچلاردا آنجاق آذربايجانلي لار تكجه ميللتديرلر كي بوتؤولوكده شيعه ديلر و مركزي حوكومت اؤزوده آذربايجان شيعه سي موناسيبتينده داورانير و ايراندا رسمي و حوكومتي كولتور آذربايجانين كولتورودور(!) و مركزي حوكومت بو نوع كولتورو و موناسيبتي ركلام ائدير . تهرانين كولتورو آذربايجان و ايرانين غرب بؤلگه سينه چوخ ياخيندير ، حتتا ايرانين دوغو بؤلگه‌سيندن تهرانا داخيل اولان اينسانلار و كولتورلر بو غاليب كولتورون ايچينده اه‌ريييرلر. تهران بوتون كولتورل داورانيشلارا : توي‌لار ، عزاداريلار ، شنليكلري ، ايناملاري ، توتئمي اساطيرلري ، موسيقي‌لري و ... آذربايجان كولتورو گؤزوندن باخير. بونا اساسلاناراق تهران و تبريز زنگين و نئچه لايه‌لي بير رابيطه ده حيات سورورلر. بغداد و سوليمانيه هئچ بير زامان بو قدر بيربيرينه آغير تاثيرات بوراخماميشلار و اگر اونلار بير اوزون موددت بير اؤلكه ده ياشاميشلارسادا هئچ زامان بيربيرلريني تانيماميشديلار و هر بيريسي باشقا بير حيات سورموشدور و هميشه بيريبيرينين باشينا ووروب و اينتيقام آلميشديلار و گله جكلريده ايطمينان تؤره‌دن و ايشيقلي بير گله جك ده دئييلدير ...(قايناق)
قاباق كي يازيلار دا دا دئميشديم(باشقا قاتار دا واردير! يانليش مينمه‌يين) كي بير سايي اؤزلريني وروبلار او يولا، يوخسا دا ائله كيمليك‌چي‌ليك آنلامي‌ني و اونو ايستكلري ايله تانيش اولماميشلار. البته چون‌كو بونلارين هدفلري و باخيشلاريندا كي اوفوق (vision) قودرت و گوج دور، بونا گؤره‌دير كي هر نه‌يه بئله بير آچي‌دان باخيرلار. مثلن بئله بير آچي‌دان تئهران‌دا كي بازارلي‌لار يوخسا اللرينده قودرت اولانلارين آذربايجان‌دا دوغولماقلاري آذربايجان‌لي‌لارين حاقلاريني‌ پوزولماماغا بؤيوك بير نقيض اؤرنك‌دير.
و چوخ ده عجيبه بير حال‌دير كي بيزلر كور تعصصوبلو ميللتچي اولماق و يا ايرقچي‌ليغا محكوم اولوروق. حالبوكي نه‌دن‌سيز و دليل‌سيز "بيز بئله‌ييك"، "بيز ائله‌ييك"، "بيزيم كولتوروموز غاليب‌دير"، "باشقا خالق‌لار هر نه‌يي‌ بيزدن اؤيره‌نميشلر"، "اونلار بيزيم ايچيميز ده اه‌ريميشلر" ، و ... ، نه دئييم آخي، بير منطيق‌سيز اؤزونو اوستون گؤرمه‌يي گؤسته‌رير.
يولداشلارين بير‌ي‌سي دئييردي بونلار بيزدن ده به‌تر ميللتچي‌ ديرلر، اؤرنك ايچين دئييرلر ايران‌دا اوتوز بئش ميليون تورك وار! آنجاق منجه بئله بير سؤز كيمليك‌چي‌ليك ايستكلري ايله اوست اوسته دئييل؛ بئله سؤزلر ايله بونو دئمك ايسته‌ييرلر كي "كيمليك‌چي‌لر چوخ دا دئمه‌سينلر بيزيم حاقلاريميز تاپدالانميش‌دير؛ مه‌يه‌ر ايرانين ياري‌سيندان چوخونون دا حاققيني‌ يئمك اولار"؟! و يوخاري‌دا سؤزلري دوغرو توتساق، كيمليك‌چي‌لر بورجا دا دوشرلر!

هيتلئر، آلمانلي آنتروپولوژيستلرين(اينسان تانيماق بيليم آداملاري) آراشديرمالاريندان اؤز ايرقچي ايشلري ايچين سوء استفاده ائديب و  بئله بير سؤزو واردير: "بير ميللتي آرادان آپارماق ايچين اونلارين ديلي‌ني اللريندن آلين". آمئريكا آنتروپولو‍ژي‌سي‌نين قوروجوسو "فرانز بوآس (Franz Boas)" آلمانلي آنتروپولوژيستلره تاي دئييب كي: "بير توپلومون ان اؤنملي اورتاق كولتورونو داشييان او توپلومون اورتاق ديلي‌دير (قايناق)". فرانز بوآس ايچين بير خالقين آيدين دوشونجه‌لي كولتورو ديل واسيطه‌سي ايله يارانار، گليشه‌ر و پايلاشيلار؛ و بو گئرچك او آنلام‌دا دير كي بير كولتورون دوشونه‌بيلمه‌يي‌ ايچين او كولتورون ديلي‌‌ني قانماق آچار و كيليد دير.
و يوخاري دا بئله گولونج سؤز گؤردوك: "ايران‌دا رسمي ديل فارس ديلي‌ديرسه، آنجاق غاليب كولتور اذربايجان كولتورو دور"! آي كيشي بو سؤزو هارانيزدان چيخارديرسينيز آخي؟ كولتورون تعريفي‌نه گؤره ياري‌سي ديل اولورسا بيز هارادان بونو دئيه‌بيله‌ريك؟! بو ديل‌سيز و اؤزونو تانيتديرابيلمه‌يه‌ن كولتور نئجه غاليب گلدي؟
ائله، بئله سينه دئييلميش سؤزلرين آراسيندا دئييليب آذربايجانلي لار تكجه ميللتديرلر كي بوتؤولوكده شيعه ديلر! واللا ائله بو شيعه‌ليك باشكندي اولان اردبيل-خالخالين آراسيندا گلين اون‌لار آذربايجان توركجه ديللي سونني و علي آللاهي كند سيزه گؤسته‌ريم! ايسته‌مز اورمونون يانيندا كي كوره‌سونني، ايلخي‌چي و قوشاچايين اوچ‌تپه‌سينده كي گؤرانلارين يانينا گئدك. سياسي باخيم‌دان دا سانكي  ايسلامي اينقيلابين ايلكين ايللرينده كي تبريز ده قالخان موسلمان خالقي و اونلارين ديني اؤندري كيم اولسون ساواشي‌ اونودولموش‌دور. سيز هانسي فاكتا گؤره دئييرسينيز كي مركزي حوكومت اؤزوده آذربايجان شيعه سي موناسيبتينده داورانير؟! و باتي‌لي‌لارين ايرانين مذهبي حوكومتي‌نين يوموشاق داورانماسينا اينانماق گولدوروجو قونوسونا توخونماق ايسته‌مه‌ييرم. دوز دور هم مشروطه انقلابي و هم ايسلام انقلابلاري تبريزدن قيايناقلانميشلار، آنجاق هر بير اينقيلاب اؤز بالالاريني يئيه‌ن كيمي، هر بو ايكي اينقيلابين سونوجلاري بيري‌سي مشروعه‌يه ساري گئتمك و باشقاسي‌دا موطله‌قه اولماغا ساري گئتمك‌ده آذربايجانليلارين ايناملاري و كولتورلري ايله اوست اوسته دئييلدي. ايرانين مركزي حوكومتي آذربايجان شيعه‌سي موناسيبتينده داورانيرسا، نئجه اولور قاراباغ‌دان سورگون اولموش آذربايجانلي شيعه‌لر و آذربايجان جومهوريتي‌نين تورپاقلاري اونودولوب، و ائرمني‌لر ايله  ايستي و ياخشي ايلگي‌لر قورولور؟! بئله بير سياست هانسي آذربايجانلي شيعه‌نين ايسته‌يي دير؟ بو هم اولوسال باخيميندان و هم ده مذهبي آچي‌دان آغيلا باتان دئييل.

آرادا اؤنملي قونونون اونودولماغي‌ني ايسته‌ميرم و او دا كيمليك‌چي‌ليك ده اورتايا قويولان "ايستك‌لر" و "حاقلار" قونوسو دور. توتاق دونيادا دئييرلر تئهران‌دا كي توي‌لاردا آذربايجان موسيقي‌سي ايله اويناييرلار! توتاق دونيا دا دئييرلر ايرانين رسمي راديو تيلويزيونو آذربايجانلي مؤذن‌زاده‌نين آذاني‌نين سسي ايله ناماز چاغلاريني بيلديرير! توتاق دونيا دا بيليرلر كي ايرانين ان تانينميش قورماسبزي يئمه‌يي آذربايجان يئمه‌كلريندن ساييلير! توتاق دونيا دا آذربايجان خالچاسينا دئييرلر آذربايجان خالچاسي ، پئرشيه‌ن خالچاسي يوخ! توتاق دونيا دا دئييرلر ايرانين اوتوز بئش ميليونو تورك‌دور، آذري ديللي يوخسا پئرشيه‌ن يوخ! توتاق دونيا دا دئييرلر ايرانين بو گؤزلليكده‌كي كولتورو ائله همن آذربايجان‌لي‌لارين كولتورودور، باشقا كولتور يوخ! توتاق دونيادا بونو دئييرلر ايران‌دا بوتون ايش‌باشيندا‌كيلار آذربايجان‌دا آنادان اولورلار، باشقا يئرلرده يوخ و ... آنجاق نئچه اؤنملي سورغو قالير:

- نه‌دن آذربايجان ساوادلي‌لارين يوز دن بيري‌سي ده توركجه يازيب اوخويا بيلميرلر و اوخوللاريندا نه‌دن اؤز آناديللري‌ني اؤز اوشاقلارينا اؤيره‌ده‌بيلمه‌ييرلر؟
- آذربايجانين اورتاسيندا كي بؤيوك اورمو گؤلونون قوروماغي‌نين قاباغيني كيم آلاجاق؟
- آذربايجان‌دا نه‌دن ايش تاپيلمير و هر كيمسه ايش تاپماق ايچين كولتورونو اؤز ايله گؤتوروب گئدير ايرانين اورتا بؤلگه‌لرينه؟
- كولتورلريني ايرانا غاليب ائدن آذربايجانلي‌لار نه‌دن ايل‌ده بير گون بابك قالاسينا چيخيب شئعر اوخويوب، شنليك تؤره‌ني قورابيلميرلر؟ نه‌دن تكجه تئهران تويلاريندا اوينامالي‌ديرلار!؟
- آذربايجان كولتورونه آسلانميش ايرانليلار، نه دن توركلري داورانيشلارينا گولوب و اونلارا جوك دئييرلر؟
 و ...

سون‌سؤز:
يازي‌نين سونون‌دا دئمه‌لي‌دير كي كيمليك‌چي‌ليك غاليب كولتور اولماق داليسيجا يوخ، بلكي اؤز كولتورونو قوروماق داليسيجا اولماق‌دير؛ و بو آرا دا  كولتورون بير قانادي‌دا "آناديليميز: آذربايجان توركجه‌سي‌" دير و بو يول‌دا بير‌ي‌سي اؤز وارليغي‌ني، يالاندان، يئرسيز و گولدورجو بؤيوتمك ايسته‌مير. آتالاريميز دئييبلر: « حالوا حالوا دئمك ايله آغيز شيرين اولماز ».

ي. س:
آذربايجان شيعه‌ليگي موناسيبتينده داورانماق قونوسوندا ، "قاراباغين ايشغال اولمونماسي" سورونو اونودولموشدو، اونو يوخاري‌دا آرتيرديم.

Monday, September 6, 2010

تيراختور يانداشلاري‌نين ده‌يه‌ري

فوتبول‌دا يانداشلارا اون ‌ايكينجي يار دئييرلر. اون ايكينجي دئيه‌نده آدامين ذئهنينه بئله گلير، اون ايكي نفردن بيري اولماسا، تيم اون‌ايكي‌دن بير گوجونو ال‌دن وئرير؛ سانكي بير اويونچو ايخراج اولوب. بو قونو(موضوع) باشقا معمولي تيم‌لرده دوز اولابيلر، آنجاق تيراختور يانداشلارينا گؤره بونو دئمك اولماز. منجه تيراختور يانداشلاري‌نين ده‌يه‌ري‌ني بئله نيسبت‌لر ايله گؤسترمك اولماز. اويونچولارين ده‌يه‌ري‌ني پول ايله گؤسترمك مومكون‌دور. اويونچولارين اورتا(متوسط) ده‌يه‌ري 250 ميليون تومن اولورسا، تيراختور تاخيمي‌‌نين ده‌يه‌ري دؤرد ميليارد بئش يوز ميليون تومن اولابيلر. بو رقمي روند(round) ائله‌ييب دئيه‌ك تيراختور تيمي 5 ميليارد تومن دير. آنجاق بئله حيساب كيتاب ائدنده آدام بو سورغو ايله قارشيلاشير: « يانداشلارين ده‌يه‌ريني ايسه حيسابلاماق اولار يوخسا يوخ »؟

منجه تيراختور يانداشلاري ايستاديوم‌دا‌ اولماسالار، اويونچولار بونو اونوتماييب و اؤزل بير غرور و معنوي كؤمك آرخالاريندا دويورلار (احساس ائديرلر). آنجاق بونو حيسابلاماق اولماز، و تكجه معنوي ياتيريم(سرمايه معنوس) حيسابينا قويماق اولار. گؤردوغوموز كيمي بير سايي يانداش‌سيز كلوبلار ايستاديوما، پول ايله يانداش گتيريرلر. اؤرنك ايچين تئهرانين ايستيل آذين و راه‌آهن تيملري. اونلار بئش – آلتي يوز تاماشاچي ايستاديوما گتيرمك ايچين، چوخلو گئت-گل وسيله‌سي حاضيرلاييب، ورزشي كؤينك وئريب، يئمك و ايچمه‌لي پايلاييب و باشقا بئله ايشلردن گؤرورلر. بونلار هزينه صرف ائتمك ايسته‌يير. بونلار حيسابا قاتيليرسا، تخمين وورماق اولار هر بير نفر تاماشاچي‌نين بير دؤنه ايستاديوما گتيرمك 10000 تومن اولابيلر. بو دا قالسين كي بئله تاماشاچيلار نئجه آلقيشلاياجاقلار؛ تئهران‌‌دا تيراختور-ايستيل آذين اويونوندا گؤردوك كي تيملري قول‌ يئيه‌ندن سونرا، دوروب گئتديلر!

ايندي بو رقم‌لر ايله تيراختور يانداشلاري‌نين ده‌يه‌ري‌ني حيسابلاياق. البته بوتون يولداشلار مني باغيشلاسين كي ايسته‌ييرم اينسانلارا پول ايله ده‌يه‌ر وئرم.
بيلديگيميز كيمي تيراختور يانداشلارين اورتا سايي‌سي تبريز ده 60000 نفر دير. تيراختور تيمي‌نين سوروملولار ايسته‌سه‌يديلر ايستيل آذين كيمي سهند ايستاديومو دولدورسونلار و هر بير يانداشا اون مين تومن هزينه ائتسه‌يديلر، آلتي يوز ميليون تومن بودجه لازيم ايدي! و دئمك اولار تبريز ده اوينانيلاجاق 17 اويونلاريندا گوجلو آلقيشلانماق ايچين ياخلاشيق (تقريبا) 10 ميليارد، 200 ميليون تومن لازيم دير! البته بو فقط تبريز ايچين ايدي! تئهران ايستاديوملاريندا دا هزينه گئدير يوخاري و هر يانداشين تيمين آرخاسيندا اولماسينا 20000 تومن لازيم اولسا و هر اويون‌دا دا 15000 نفر گلسه، تئهران‌دا كي 7 اويون اوچون ايكي ميليارد لازيم دير! ياني تيراختورون كئيفيتلي، قيزغين و كسينتي‌سيز آلقيشلاماغي ايچين 2 ميليارد يوز ميليون تومنه احتياج واردير. و دئمك بو ليگ‌ده هر تيم ايسته‌يير‌سه تيراختور كيمي هم ائوده و هم قوناق اولاندا تاي‌سيز آلقيشلانسين 12 ميليارد 300 ميليون تومنه احتياجي واردير. و بئله بير پول اويونچولارين ده‌يه‌ريندن ايكي قات ياريم يوخاري‌دير.

سون‌دا بو دا دئمه‌لي دير كي يوخاري‌‌دا كي عدد رقم‌لرين هاميسي تكجه موقايسه ائتمك ايچين ايدي. بونو هامي بيلير كي ايستي، سويوق، قار، ياغيش، گوندوز و گئجه‌ده بوتون چتين‌ليكلر و حؤرمت‌سيزليكلره باخماياراق، اوزاق‌دان ياخين‌دان گليب تيراختورو آلقيشلايانلار، كيمليك و وارليق كيمي ده‌يه‌ري حيسابا گلمز بير گئرچكين قوروماغي ايچين تيراختورو اورك‌دن ايسته‌ييب و فرقلي بير داورانيش(رفتار) گؤسته‌ريرلر. و بئله بير تعصصوبو هئچ بير زامان پول ايله آليب ساتماق اولماز!
ايندي بونو تيراختور و تبريزين ايدمان و باشقا مسؤوللاريندان ايسته‌مك اولار: لوطف ائله‌يين سيز ده توقع‌سوز تيراختور يانداشلارينين آرخاسيندا دورون. تيراختور يانداشلارينا اولونان سايقي‌سيزليقلار(بي احترامي‌ها) بوتون اورلكلري اينجيدير. بونلار اولماسالار تيراختور ايله راه‌آهن و سايپا كيمي تيملرين هئچ بير فرقي اولماز. اينشاللاه كي سيز ده پول ايله آل-وئرچيليك اولونان تعصصوب و غئيرتي سئومه‌ييرسينيز.

ي. س:
بو يازي آذربايجان اسپورت دا

Thursday, September 2, 2010

نه سوء‌ ايستيفاده‌سي؟

رحيم شهرياري 5000 تومنه تالار وحدت اوخويوردو. هر نه‌دن اوخويوردو. دئييردي هر نه اوخوياجاغام، فقط چوخ اؤزونوزدن چيخمايين. سؤزلري و اوخودوقلاريندا كيمليك‌چي‌ليك دالغانيردي! "بير اولاق يومروق اولاق" دا اوخودو "منيم ديليم اؤلن دئييل باشقا ديله دؤنن دئييل" ده دئدي! دئييرديك تانري بيزه چوخ گؤرمه‌سين بئله تعههودلو اوزمانجلاري.

نئچه ايل گئچدي. رحيم شهرياري ياشيل‌لار ايچين توركجه اوخودو! حالبوكي بير خالق اوزمانجي سياسي اويونلارا گيرمه‌يي دوزگون ايش دئييل. هر حال‌دا دئديك او دا بير آدام‌دير و حاقلي‌دير. آما باشقا آچي‌دان، نه جور اولاندان سونرا، اونون كيمليك‌ و وارليق حاق‌دا اوخوماغي كسينليكه سئچيم زاماني درده ده‌يه‌ردي و كيمليك‌چي‌ليگي به‌يه‌نمه‌يه‌‌ن سياستچي‌لر بو قونودان سس ييغماق ايچين موقتي ايستيفاده ائتمك نييتينده ايديلر. يوخسا  تكجه فردي سياسي علاقه‌لر اورتا دا اولسايدي او فارسجا اوخوياردي توركجه يوخ، يا دا كي اونا توركجه اوخوماق ايچين تاپشيريق(سفارش) وئرمزديلر(باغلانتي). آراداكي اؤنملي سؤز تكجه و تكجه "راي" و "اؤي" ييغماق ايدي!

بير ايل گئچير. تيراختور يانداشلاري "منيم ديليم اؤلن دئييل" دالغاسي‌ني سونامي ائديب و بوتون شوونيسم تيكيتنتي‌لري‌ني كؤك‌دن چيخارديرلار. بونلارين توپلانميش سسي‌ني هئچ كيمسه سوسدورابيلمه‌يير. يوز مين‌لر آدسيز بيرليك‌ده آدليم اولوبلار. راسيسم و شوونيسم اوجاقلاري نئيله‌مه‌لي‌ديلر؟ دالغالانديرانلارين يانينا بير-بير گئديب و اونلاري بايكوت ائتمك‌دن قورخوتماق‌‌دان سونرا نه ائده‌بيلرلر كي؟! و بئله اولور كي سئوديگيمز خالق اوزمانجيميزلا رحيم شهرياري‌ ايله، يالان آل-وئرچي‌سي ‌بي‌بي‌سي ده دانيشيرلار(يوتيوب باغلانتي‌سي). دانيشيغيندا دئيير گؤردوم منيم اوخودوقلاريمدان سوءايستيفاده ائديرلر هر ياشاسين آذربايجان دئيه‌ندن سونرا ياشاسين ايران‌دا دئيه‌رم، و قيزي‌ايله بيرليك‌‌ده شاه زامانين مرز پر گهر ماهني‌سي‌ني اوخويورلار.

رحيم اؤزوندن ساوونوب(مودافيعه ائدير) دئيير  تكجه بير دفه حماسي اوخوموشام (و دئمير كي آذربايجان ماهني‌لارينين ياري‌سي حماسي‌ديرلار و نه جور باشقالار روستمين قيرهاقيرلارين دان اوخوياندا افتخار اولور آنجاق آذربايجانلي‌لار حماسي اوخوماقلاريني گيزلتمه‌لي‌ديرلر)! دئيير بيز آذربايجانلي‌لار دا رشت‌لي‌لر نئجه ميرزه كوچوك‌خاني، و بوشئهرلي‌لر تنگيستان‌لي‌لاري  سئوديكلري‌ كيمي ستارخاني سئويريك؛ آنجاق دئمير بو دوغال بير ايش‌دير و بئله بير ايش‌دن هئچ ديفاع لازيم دئييل. بيز نه دن  گرك اؤزوموز  اؤزوموزدن شكلي اولاق؟ سونرا بالاجا قيزي ايله بيرليك ده جيپ جيپ جوجه‌لريمــي اوخويور.
كليپ آراسيندا "منيم ديليم اؤلن دئييل باشقا ديله دؤنن دئييل" سسي گلير. آنجاق رحيم شهرياري به‌ي ياخشي آچیقلامايير كي "منيم ديليم اؤلن دئييل باشقا ديله دؤنن دئييل" سؤزوندن نه "سوء ايستيفاده"‌سي ائتمك اولار؟

...
ياديما دوشور بير ايكي بوندان قاباق رحيم شهرياري ميلاد بورجونون يانيندا اوخوياجاق‌ايدي. اوشاقلار ايله گئتمك ايسته‌ييرديك. آنجاق ائشيتديك بيليت اللي مين تومن اولوب. اونون بيليت‌لري داي بئش-اون مين دئييل!

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı