Sunday, August 25, 2013

بو ایکی صفحه بیر یانا، قالان 300 صفحه ده بیر یانا!

اینترنت ده پایلاشیلان خبرلر واسطه سی ایله، بیر ایکی آی بوندان اؤنجه جواد طباطبایی آدلی بیر انسان، و مهرنامه آدلی بیر درگی، تانیدیم. هامی نیزین دا خبریز وار جریان نه دیر! طباطبایی نین ساچما سؤزلرینه وئریلن جوابلار، و گؤستریلن عکس العمللر، منی کئچمیش زامانلارا قایتاریردی! اوچ-دؤرد ایل بوندان اؤنجه، سون دؤنه اولاراق، اؤز وبلاقیمدا، بو قونو دا بیر سؤزلر یازیب، و جواد طباطبایی کیمین آداملارین کیملیکچیلیگه گؤره گؤستردیگی "دوغال" عکس العمللرینی، اونلاری آسیمیله اولموش قدیم بیر نسیل ده یئتیشمه یه (البته کال یئتیشمک!) باغلادیم
 هر حالدا ، دونن گؤردوم، حیدر بیات جنابلاری خبر وئریب، بونا گؤره مهرنامه یه بیر جوابیه (نقدی بر گفتگوی مهرنامه با سید جواد طباطبائی) یازیب، و اونلار دا یاییبلار. آنجاق بوندان گیلئلی ایدی کی یازیسینی یانلیش ائدیت ائدیبلر؛ و من ده ماراقلی اولدوم ، او جوابیه نی اوخویام.
سون دؤنه بیر درگی آلدیغیم زامان، فیکر ائلیرم 500-600 تومن وئرمیشدیم! دلیل ده بللی دیر؛ کی اینترنت وار دیر و بونا گؤره مجله - یا گونده لیک اوخومورام! بوگون یولدا، بیر درگی ساتان کیوسک قاباغیندا دایاندیم؛ گؤردوم هن! "فوتبالیستها"دان سونرا، تورکجه درگی ساتمایان تورک درگی ساتان، نئچه دنه "مهرنامه"ده دؤشویوب قاباغینا! مهرنامه 300 صفحه لیک ، قالین بیر درگی دیر! یانامیاسیز! چئویردیم گؤردوم حیدر بیاتین الشدیریسی درگی نین اوللرینده. تصمیم توتدوم آلام، و قیمتینه باخدیم! 10000 تومن ایدی!
اؤزومله دئدیم کی تله سمه ییم! بیات جنابلاری، اؤزو مقاله سینی پایلاشار من ده اوخویارام!! نیه بونا 10000 وئریم آخی؟! هئچ من بو نئچه ایلده بئش قیران اؤز دیلیمه یاردیم ائتمه میشم آخی!!؟ نئچه آددیم اوزاقلاشاندان سونرا بئله دوشوندوم: "حئیدر بیاتـین تورک دیلی و آزربایجان کولتوروندن ائتدیگی مودافیعه، مهرنامه نین بو سایی سی، اولدوقجا دَیَرلی ائتمیشدیر". گئری دؤنوب و او درگی نی آلدیم.

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı