Sunday, September 19, 2010

شئعر گونو و فوتبول ياريشيندا، "تورك ديلينده مدرسه" ايسته‌يي

بلديه‌نين تئهرانين پئرسپوليسي ايله اويونو واردير. بلديه جدولين ديبينده و يلخشي سونوج گؤزله‌نيلمير. آنجاق دايي و باقيري‌نين بير آي بوندان اؤنجه كي تيراختور - پئرسپوليس اويونونداكي توركلره اولان سايقي‌سيزليق قاباغيندا لال اولوب سوسماقلارينا گؤره ايسته‌ييرم گؤرم بلديه‌ني آلقيشلايانلارين عكس العملي نه اولاجاق‌دير. گون‌ده رحمتليك شهريارين اؤلوم ايل‌دؤنومو دور اولوسال شئعر و ادب گونودور(البته بيزيم ديل يوخ!) و اولابيلر "تورك ديلينده مدرسه" سؤزو چوخ ائشيديلسين.

اوچونجو كانال (شبكه 3) ده تئهرانين سئوگيلي تيمي‌نين اويناماغينا گؤره گؤسته‌رير، آما ته‌له‌ســيك اؤزومو يئتيريب وورورام سهند كانالينا. اويون باشلانماييب و تبريز تبليغات گؤسته‌رير. تبليغاتين بيري‌سي كولتورل دير! بير ايكي دنه اوشاق گؤسته‌رير ايمه‌كله‌يه ايمه‌كله‌يه دئييرلر "بابا بابا... ماما ماما..."؛ بير قادين دا فارسجا دئيير بير باشقا ديل‌ده اؤيرنين ايكي ديللي اولون و ايكي دونيا دا ياشايين! منظورو اينگيليس ديلي‌دير؛ فارسجا دا دانيشماغينا گؤره من ده اؤزومله دئييرم به نه اولدو بيزيم ديليميز؟ ياني تبريز كاناليندا دا توركجه بير ديل حيسابيندا دئييل؟! بو فيكيرلرده‌يه‌م كي اويون باشلانير!

تاماشاچي اون‌مين نفره ياخين گليب و دايي همه‌شه كيمي دوروب مئيدانين قيراغيندا بير الي‌ده جيبنده. تاماشاچيلار دا سهند ايستاديوم‌دا همه‌شه كي سؤزلري دئييرلر و تيلويزيون‌دا اؤزلليكله سسين آلچاق - اوجا اولونماسي‌دا بيلينير! هر دن ده دايي‌يا غئيرت‌سيز دئييرلر و كريمين آياغينا توپ دوشه‌نده هويلاييرلار! تيليويزيون‌دا اويونو ريپورت ائدن، آرا دا دئيير بو گون فارسجا ادب و شئعر گونو و تورك ديللي شاعيرين اؤلوم ايل دؤنومودور. بو سؤز دئييله‌نده كامئرا شهريارين عكسي اوستونده اولان بير تابلونو گؤسترير و تاماشاچيلار بونو ايسكوربورد دا گؤرنده تئزليكله سسله‌نيرلر: "تورك ديلينده مدرسه ...". ياشاسين بئله بيليجي تاماشاچي.

اويونون سون اون ده‌يقه‌سي دير. بلديه‌‌ ياخشي اويناييب و قاپي‌سيني باغلي ساخلاييب هئچ نئچه دؤنه ده ياخشي سالديريب. آنجاق گينه بير يانليش اؤز وئرير و بلديه قول يئيير! علي دايي‌نين راحات بير نفس چكمه‌سي‌ني گؤسته‌ريرلر؛ اوره‌يينده دئيير آهان به‌تر حالينيزي توتدوم! تاماشاچيلار تيراختورون ياراتديغي كولتورونه گؤره بلديه‌نين سوروملولارينا ايهانت ائتمه‌ييرلر، آنجاق سسلري‌نين آزالماغي بللي‌دير. پئرسپوليس تيمي بير جاوان و تجروبه‌سيز تيم قارشي‌سيندا زامان تلف ائدير. يئددي دقيقه زامان آرتيريلير. 96 جي دقيقه بلديه بيرليك قولو وورور، و اومودسوز تاماشاچيلارين شنليك سسلري يئر گؤيو گؤتورور، من ده تيلويزيون صفحه‌سيني اؤپورم...! 

كيم ايدي 10 ايل جاوانلاشيب تيراختوروچون اويناماق ايسته‌ييردي؟

نئچه ساعات‌دان سونرا گيريرم اينتئرنته. اويون‌دان سونرا كي تارتيشمالي موصاحيبه‌لر و دانيشيقلار اولوب‌دور! علي دايي گؤر نه ‌لر دئييب هله. ديرناق آراسيندا من ده آچيقلاما و يا جاواب وئرميشم:

-" ايهانت ائدنلر اؤزلري غئيرت‌سيز ديرلر. " (بير آي بوندان اؤنجه آزادي ايستاديومونو اونودوب سانكي!)

-" تبريز ده كيمسه فوتبولا گؤره ايستاديوما گلمير" (نه جور اولدو، آلتي آي بوندان قاباق دئييردين كئشگه اون ايل جاوان اولارديم، تيراختور اوچون اوينايارديم؛ بوراني اوخويون: آرزوي دست نيافتني دايي در اوج افتخار*)

-" دونيانين هاراسيندا گؤروبسونوز اؤز همشهري‌لرينه بئله ايهانت ائده‌لر؟" ( و دونيانين هاراسيندا گؤرونوب آدام پولا گؤره اؤز همشهريلرينه توهين اولاندا سسين چيخارتمايا)

- "تبريز ده كيمسه فوتبولا گؤره ايستاديوما گلمير؛ اونلار باشقا سورونلار داليسيجا ديرلار. يادگار امام ايستاديوموندا نه‌دن گرك آتاتورك آلقيشلانا؟" ( البته هامي بونو بيلير فوتبول اذربايجان فوتبول‌دان اوستون دور و بونو دانان يوخدور. آنجاق سورون بو دور كي نه جور اولور غئيرت ايدديعاسي اولا اولا "تورك ديلينده مدرسه" سؤزو، آتاتوركو آلقيشلاماق آدلانير!؟)

- "دونيانين هاراسيندا 7 دقيقه اضافه واخت توتارلار؟" (دايي‌يا بيري دئمير كي دونيانين هاراسيندا قاپيچي اون دقيقه يئره اوزانار!؟)

- "نه‌يه اؤزونوزو وورورسونوز باشقا يولا؟ نه‌دن قبول ائتميرسينيز كي بير اؤلكه‌دنيك؟ باشقا سورونلاري فوتبولا قاتمايين!" (علي دايي موغاليطه‌سينه داوام ائدير! نه‌جور اولور سن جيبينه گؤره اوچ ساعات تيلويزيون‌دا دانيشابيليرسن و فوتبول‌دان سوء استفاده ائديب و اؤز شيركتي‌نين كؤينكلري‌ني تبليغ ائديب ساتيرسان آنجاق سنه اوزلو ائدن آذربايجانليلارين حاققي يوخدور فوتبولا باخيب هر دن ده اؤز ايستكلريندن دانيشسينلار؟ ايستك‌دن دانيشماق ياني بيز باشقا اؤلكه‌ده‌ييك؟ اون‌دا سن ده ناقابيل 600 ميليون داليندا اولاندا گرك سنه دئيه‌ك بؤلوجو؟ اصلن سن كيمسن آذربايجانليلارا آغيل قويورسان؟ قوصور اؤزوموزده كي سني هامي دالين چئويرنده سن‌دن حيمايت ائله‌ديك)

- "ايكي كيلاس ساوادلي بير آدام منه ايهانت ائدير، چونكو من پئرسپوليس مورببي‌سي‌يه‌م!... هامي بئله دوشونسه‌لر بير اهوازلي گرك فولاد قارشي‌سيندا اوينامايا، بير شيرازلي موقاويمت قاباغيندا اوينامايا و ..." (علي دايي دان بير بؤيوك ايستك بودور كي اؤزونو كالليغا وورماسين! بئله دانيشسين سنين شريف بيلي‌يوردوندا درس اوخوماغين هئچ ديپلوم و ابتدايي مدركلرين‌ده گئدر سورغو آلتينا! سنه غئيرت‌سيز دئمك نه‌دني بللي‌دير؛ اؤزونده ياخشي بيليرسن و بونو دا ياخشي بيليرسن هم بلديه و هم تيراختور دا كي اويونچولارين ياريسيندان چوخ تورك دئييللر: كمالوند لور دور، ميثاقيان مشهدلي فارس دير، كرار جاسم عرب دير، ميثم بائو مازندرانلي دير، دقيقي گيلك دير، كياني لور دور، گودرزي شيرازلي فارس دير و ...! سون خبره گؤره ائرمني آندرانيك تئيموريان دا تيراختورا قوشولدو! )

سون سؤز:
يامان دئمك هر حال‌دا دوز ايش دئييل(بو دا قالسين كي دايي‌يا يامان وئريلمه‌ييب و تكجه علئيهينه شوعار دئييليب). آنجاق دايي بونو بيلمه‌لي دير هر نه گؤرور نه‌دني اؤز ايشلري‌نين جاوابي‌دير. اينشاللاه كي ياخين گله‌جك ده آذربايجان خالقيندان باغيشلانماق ايسته‌سين. او بيلير كي توركلر كينه‌لي دئييل‌لر و توركلر ده اونو بير جاييزالخطا آدام بيليرلر. ائله ده تقصيري يوخدور، پول و شؤهرت ايچينده باتيب و بير آز ال آياغيني ايتيريب و چتين ايش‌دير. هر كيم دئسه اونون يئرينده اولسايدي بئله اولماياجاقدي، منطيق ايله دانيشمايير كسينليك ايله! آنجاق هر نه‌يين‌ده بير حددي واردير و خالق دالغاسي قاباغيندا آدام باش اه‌يمه‌لي دير. يوخسا بير گئجه‌ده يوكسك‌لره قالديريلماغين ترسينه اولماغي چوخ راحات‌دير! گؤروسونوز كي!

بو قونو يا گؤره قاباق‌كي يازيلار:
- * دايي‌يا افتخار زيروه‌سينده ال چاتيلماز ديلك
- دايي راحات‌سيز اولمامالي‌دير
- بير اصيل آذربايجانلي‌نين راحات‌سيزليغي
- آيدين گله‌جك

4 comments:

mehdi said...

سلام
بو سؤزلری داییدان ائشیتمه‌یین آغری‌سی آیریلاریندان ائشیتمکدن چوخدو.

سلطانی said...

من تأسفله ایش محللینده اولماغا گؤره اویونا باخا بیلمه دیم. گئجه ساعات 11 ده ووردوم سهند کانالینا تا فوتبولون خبرینه باخام.

ساعات 11 خبرلری، استاد شهریارین آغیرلاما مراسمینین خبری ایله باشلادی. بو مراسیمین پوسترینده یازیلمیشدی: بزرکداشت روز ملی شعر و ادب فارسی!
ائله اوردان اعصابین خراب اولدی. دیین یوخدی بو گون شعر و ادب گونودور، نه شعر و ادب فارسی!

سونرا دا کی علی دایی نین سؤزلرین ائشیتدیم، اعصابیم لاپ خرابلاشدی.

آیدین بی
چوخ گؤزل یازی یازمیسیز ال قولونوز وار اولسون.

سیزدن ایکی خواهشیم وار:
1- بو یازینی فارسجایا دا چئویره سیز.
2- فکر ائلییرم استادیومداکی قارداشلاریمیزین دا ایراد اشکال لارینا گؤره، گرک بحث اولونسون. اوراداکی ایرادلاریمیزی گرک یاواش یاواش آرادان آپاراخ.

چوخ ساغ اولون

Aydin Kasaei said...

سايين سولطاني

بو يازي‌ني فارسجايا چئويرمه‌يه گؤره، گؤز اوسته، اولسون. آنجاق توركجه يازماق بوتون ائنئرژي‌ني آدامدان آلير! اوزومدن ده گلمير بيريندن كؤمك ايسته‌يه‌م!

ايكينجي سؤزونه گؤره دئييم كي بونا گؤره باشقا يئرلرده ده تارتيشمالي موباحيثه‌لر ائتميشم! آما بير سايي آداملارين هدفي بو يامان دئمك قونوسونو چوخ بؤيودور و بونو بؤيوتمك‌دن سورونو چؤزمك دئييل يقين كي! بو چوخ آيدين دير. منجه آدام اؤزونو اورادا كي كولتورل سؤزلر دئيه‌نلر يانينا قويمالي‌دير. اولابيلر ياريش دا كي آتموسفئر دن ايسه ائتگي له‌نيب بير ايكي دنه يامان دئيه‌ك. هامي‌ميز جايز الخطاييق . تورك ديلينده ماشاللا يامان دا چوخ دور! هر دن ده بو سؤزلر ظرافات ايچين دئييلير كي كسينليك ايله يانليش و محكوم‌دور. من اؤزوم اؤزومه يامان دئمه‌مه‌يي اؤيره‌تمه‌ليه‌م و اطرافيم دا كي ياريشا گؤره ايسه دويغولانيب يامان دئيه‌نلرين ال آياغينا دوشم يامان دئمه‌يه‌لر. غرور ايله و اوزاق‌دان دانيشماق اؤزگه‌لرين ده‌ييرمانينا سو تؤكمك دير. بو يامان دئمكلر جانلي ياييليردي آنجاق كولتورل سؤزلرين سسي بوغولوردو!و بو بهانه‌يه فئدراسيون دا قرار دير محروم ائليه. آذربايجانا ايهانت اولوناندا فئدراسيون بيانيه وئرمه‌دي آما بوگون فئدراسيون كريم و دايي‌يا اولونان ايهانته بيانيه وئريب! لازيم دئييل بيز زحمت چكك و اونلارين تبليغاتي حمله‌سينه قوشولاق. هر حال‌دا چوخدان دير يامان دئمك سورونو قارشي‌سيندا دورولور و بو زامان آپارار

سلطانی said...

آیدین یولداشیم

سیز دوغرو دئییرسیز

البته منیمده منظوروم ایندی دئییلدی. دئییرم گرک بو دا ایشلریمیزین ایچینده اولسون.

چوخ ساغ اولون

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı