اؤزوندن اؤنجه، دوشونجه‫سي اؤلموشدو

من ده ايسته‫ييرديم ايلقار مرندلي كيمي پرويز ورجاوندين اؤلومونه گؤره بير شئي يازمايام، آنجاق اولمادي كي اولمادي! و دليلي ده تورك سايتلاردا اولان يازيلار و اؤزلليكله سيدحيدر بايات و ايلقار مرندلي نين يازيلاري اولدو. بو يازيلارين چوخوندا سئوينمك دويغوسو بللي دير و البته ورجاوند چيركين ايشلرينه گؤره بوتون توركلر حاقلي ديرلار. بؤيوك بير ميللتين ديليني و كولتورونو آرادان آپارماق ايچين هر ايشه ال اوزادانين اؤلمه‫يي كي هئچ، فيرانسيزلار دئميشكن، تومبه‫تين دوشمه‫يي، آرخايين اولون كي ميليونلار حاق داليسيجا قاچان اينساني سئوينديره‫جكدير.
آنجاق يولداشلار!(بو يولداش سؤزجويونو كومونيستي آنلام دا دئميرم)
داورانيشلاريميز بير جور اولمالي دير كي «اؤلوم اولسون شوونيسمه» شوعاري، يئريني «اؤلوم اولسون فيلاني يه» وئرمه‫سين! مينلر ديلداشيميز واردير كي ورجاوند دن پيس شوونيست ديرلر؛ اونلار دا اؤلمه‫لي ديرلرمي؟! بيزيم موباريزه و ساواشيميز كولتورل و مدني دير. شوونيستلرين ايناملاري و دوشونجه‫لري بيزيم هدفيميز ديرلر و تكجه اونلاري دوغرو يولا گتيرمك آماجييلا بو يول دا آدديم آتيريق. فيزيكي اولاراق آرادان گئتمك بير اوزلوق(هونر) اولابيلمز. كسروي اولوب ايتگين دوشوبدور؛ آنجاق نئچه ايلدن سونرا اونون تئوريلري و دوشونجه‫لري داها آرتيق جانلاشيب و گوجلندي. منظوروم بودور بيرينين ديري اولوب-اولماماغي اصلا اؤنملي دئييل و يالنيز بو فيكيرلر و دوشونجه‫لرديرلر كي ياشاييرلار، ايشلريني گؤرورلر و يا دا اؤلوب آرادان گئديب و يئرلريني باشقا فيكيرلره وئريرلر.
بيلي يورد دا اولاندا، گزارش كيمي حرفه اي، چوخ تيراژلي، آنجاق شوونيست درگيلري اوخويوردوق و اونلاردا ياييلميش تورك و آذربايجان دوشمانليغيني داشييان سؤزلره گؤره دريندن حيرص يئييرديك. او سؤزلري محكوم ائتمك ايچين گليب بير مقاله يازيرديق و اؤز 400-500 تيراژلي اؤيرنجيسل درگيلريميزده ياييرديق؛ سونرا بير نوسخه او درگيلره يوللاييرديق تا بيزيم يانيتلار و جاوابلاريميزي مطبوعات ياسالارينا گؤره يايسينلار و البته كي اونلار يايميرديرلار! و تاپديغي حاليميزي سيز ده آنلايابيلرسينيز! اونلارين آغير تبليغاتي جيبهه لرينين قارشي سيندا اؤزموزو يازيق و گوجسوز بيليرديك و دئييرديك اؤز درگيلريميز تكجه اؤز خالقيميز آراسيندا ياييليب، يازيلاري يالنيز اولوسوموز ايچينده اوخونسالار يئتر. بونو دا اؤتورون كي اون-اون بئش اؤيرنجيسل چاليشمالارينين سونوجو نئجه خالق آراسينا گيرمه‫ييني بيلدير و بو ايل گؤردوك؛ اونايلاما و ايثبات ائتمك ده لازيم دئييل و ورجاوند كيمي آداملار بوندان بئله نه ايشلر و تاكتيكلر ياپمالي ديرلار! سؤزوم بودور كي ايلقار مرندلي نين سؤزلرينه گؤره، حئرفه اي اولمايان، آز سايي لي و اونلارين آراسيندا اؤنمسيز سانديغيميز اؤيرنجيلرين درگيلر، شوونيسمين آنا-يووالاريندا اوخونوب و آناليز اولونورموش. و تورك اؤيرنجيلر نه ائتگي لي ايشلر گؤرورموشلر و راحات ياتماغي شوونيستلرين اليندن آلميشيمشلار. يازيق بو شوونيستلر ايميشلر كي آذربايجان خالقينين قارشي سيندا قورخوب و عجيز له‫ييب، «مدني توپلوم» و «ايران بوتون ايرانليلار ايچين» و «مدنيتلر دانيشيغي» شوعارلاري ايله ايش اوستونه گلنلره، مكتوب يازيرميشلار:
«بو توركلرين قارشيسيني ايندي آلماسينيز گله‫جك ده هئچ ايش گؤرمك اولماز و بونا گؤره، آغاميز ريضاخانين ايشلريني يئني دن باشلايين! بو خالقين كيمليگيني و ديليني اؤلدورمه‫لي ييك. بئله مدنيت و كولتوره ياشاماق ايزني وئرمه‫مه‫لي ييك و ...»
و يازيقلار اولسون دئديگيميز ايش اوستونده اولانلار، خالقلار آيدينلاري و اؤيرنجيلري قارشي سيندا يوخ، بلكه تكجه بئله مكتوبلار قاباغيندا سوروملو ايديلر!

... آنجاق عمل و گئرچك آنلام دا اولان دونيادا گؤردوك، تورك خالقينين اويانيش مرحله سي سونا چاتيب و «هاراي-هاراي من توركم»، اوجا سسي، آذربايجانين هر بير بوجاغيندان گلير. عيرقچيليق و شوونيسم بوغولوب، اؤلمه‫لي دير و سون نفس لريني چكير. ورجاوندين اؤلمه‫يي ني عاييله سينه و هامييا باش ساغلايغي دئييرم؛ آنجاق اونون، يانداشلاري و فيكيرداشلارينين دوشونجه‫سيني تاريخه قوشولماق حاليندا اولماغيني، سئوينج ايله قوتلو اولسون دئييرم.

گله‫جك، آزاد ياشاماق ايچين چاليشان اولوسلارين دير.