Monday, January 24, 2011

تيراختورون وجودو، روحونو اينجيدير

تراختورچي‌ سايتينا اؤزل اولاراق آشاغي‌دا كي يازي‌ني حاضيرلاميشديم؛ قرار ايدي او ايران و ايراق تيملري‌نين دورومو بللي اولاندان سونرا ياييلسين. دونن آخشام منيم حماسي(!) يازيم، ياييلاندان سونرا راديودان ائشيتديم كمالوند استعفا وئريب!
دونن صاباح گؤردوم خبر ورزشي گونده‌ليگي سردار جعفري‌دن تيتر وورولوب كمالوند مديريتي ايشلره قاتيلماسين. كمالوندين روحيه‌سينه گؤره بئله استعفا بيلديره تاي گؤزله‌نيردي! من‌ده اوزاق‌دان باخان باشقا گرچك يانداشلار كيمي، هئچ واخت ايسته‌ميرم تيراختورون ايچينده‌كي اولايلاري آناليز ائديب اله‌شديرم؛ چونكو  او قورومون ايچيندن دوزگون بيلگي‌ميز يوخدور و خبرلرين چوخو شايعه و دئدي قودو اولابيلر؛ باشقا ياندان هئچ صلاح دئييل بئله زامانلار كؤزلري اوزاق‌دان آليشديرماغا قاتيلاسان. نه فايداسي اولابيلر؟ تيراختورون دوشماني آز دئييل. آنجاق تيراختورون  سوروملولارينا يالواريريق بير ايش گؤرمه‌يه‌ك، دوشمانلارين فورصت تاپسينلار خبرلر و تيترلرينده دئيه‌لر تيراختور ايچينده حوسئنقولو چوخ وار!
 تيراختورون ته‌كه‌رلرينين قارشي‌سيندا يولا داش دييغيرلادان چوخ‌دور. بو يولو آريتماق‌دا هامي‌ مسؤول‌دور؛ آنجاق اومودوموز وار تيراختورو سورنلرده يول‌دان ائشيگه چيخماسينلار! قونشو اؤلكه‌‌ده‌كي آدليم كلوبونون باشقاني‌ دئيير: "طرفدار كلوبوموزون روحو، و گئنل قوروم(مجمع عمومي) دا وجودو دور". اؤز اؤلكه‌ميزده تيراختور حاق‌دا دئمك اولار:
"يانداشلار تيراختورون روحو  اولسالار، وجودو دا ايسته‌ر ايسته‌مز سيزلرسينيز. بو وجود به‌رك و انسجام‌لي اولمالي‌دير!"؛ يوخسا آسيا اؤز سؤزوندن واز گئچر:‌

  ---

آسيا: تيراختور دايانما، گؤزلر يولوندا

Traxtorchi.ir- آیدین کسائی: آندرانيك تئيموريان‌دان نئچه ايل خبر يوخ ايدي. او گليب تيراختورون باشاريلاريندا پايلي اولماقلا، اؤز آديني بير داها ديللره سالدي. ايندي ائله پئرفورمانس گؤسترير كي آسيا ياريشلاريندا بير اويوندا دونياليق سطح‌ده قاچابيلير، و باشقا اويون‌دا دا ياريش كيشي‌سي (Man of the match) سئچيلير. اونون يانيندا محمد نصرتي‌ده بئله‌دير و ايرانين ان ياخشي اويونچولارين‌دان ساييلير. ايران دؤردونجو اويون‌دا، موشخص بير استراتژي و يئيينليك ايله اوينايان گونئي كوره (كره جنوبي) قارشي‌سيندا، بير ايش باشارماييب و يئنيلدي. منجه آديني چكديگيميز ايكي اويونچو، ياني آندرانيك و نصرتي، مورببي‌نين تاكتيك‌سيزليگي ايچينده باتلاغا گيرديلر.

باشقا ياندان گؤزلر كرار جاسيم‌ده ايدي. او 2007جي ايلده قهرمان اولموش ايراق(عراق) تاخيميندا آووستوراليايا قول وورسايدي‌دا، باشقا تجروبه‌لي اويونچولار يانيندا كؤلگه‌لر آلتيندا ايدي و بو ايل‌ده مصدوميته گؤره ايكي ايلك ياريش‌دا فورصت تاپمادي. آنجاق اوچونجو اويون، قوزئي كوره‌(كره شمالي) قارشي‌سيندا فيكس اولوب، ياراديجي‌ليق و خلاقيتلريني اورتايا قويماقلا، اؤز ميللي‌سي ايچين تئزليكله بير قول ووروب، و اونلاري ايكينجي آشامايا(مرحله‌يه) آپاردي. اونون نقشي او قدر چوخ ايدي كي وولفقانگ سيدكا، ايراغين آلمانلي مورببي‌سي، اؤزلليكله كراري آلقيشلادي*. آما كوره ياريشينداكي ائتكي‌لي اويناماغا باخماياراق، كرار جاسيم دؤردده بير فينال ياريشي (يك چهارم نهايي) آووستوراليا قارشي‌سيندا اويناديلمادي! بونون سببي دئييلير گئنه‌ده مصدوميته گؤره‌دير. آما اويوندان سونرا كي انتقادلار و اله‌شديرمه‌لرده، ايراقلي‌ يازارلار كرارين اويونا قاتيلماغي‌ني گركلي بيلديريرلر. اؤرنك ايچين دئييرلر: "مصطفي كريمين مئيدان‌دا اويناماغي، مدافع‌لرين باشيني قاتابيله‌ن كرار جاسيمين اويونا گيرمه‌ييني ده واجيب ائديردي**".

يوخاري‌دا آد آپارديغيميز اويونچولارين ايلك دؤنه، يوخسا بير داها يئني‌دن پارلاماقلاري، و اولابيلر آسيا دان اوستون اويناماقلاري، يقين كي تيراختورون ياراتديغي اورتام‌لا(محيط ايله) ايليشكي‌لي‌دير. تيراختوردا اويناييب، باشقا كئيفيت ايله روحيه تاپيب - آلقيشلانماق، ياني اولوسلار آراسي سطح‌ده تجربه قازانماق. يقين كي تيراختورون مرتضي اسدي، مئهدي كياني، مصطفي اكرامي و محمدحسن ابراهيمي كيمي باشقا اويونچولاري‌دا بو ياريشلارا گئتمك ايچين لياقتلي ايديلر. دئمك اولار بوندان سونرا دا تيراختورا اولونان ماراقلار و توجه‌لر آرتاجاقدير. ايندي دئمك اولار تيراختور آسيا كلوبلاري ياريشلاريندا اويناماسادا، ميللي ياريشلارين كئيفيتي‌ني يوكسه‌لديرمك‌ده اؤز "تيمي" نقشيني‌ ده گؤسته‌رير.

تيراختور ايندي، عئيني زاماندا نئچه اويونچونو، باشقا اؤلكه‌لر كؤينه‌كي ايله، مئيدانلارا گؤنده‌رير. قديم زامانلار بئله دئييلدي و بو ائتكي غئيري-موستقيم اولوب و آرادا تيراختورون آدي ايتيردي. اؤرنك(مثال) ايچين كريم باقيري‌ني دئمك اولار. البته تيراختور اؤزونو باشقا شكيل‌ده مطرح ائتمك ايله، و حتي باشقا اولوسلار و اؤلكه‌لرين يئته‌نكلي(استعدادلار) اويونچولاريني آدليم ائتمك ايله، اونودولموش سابيقه‌لرينه ده صاحيب چيخابيلر. بو آزربايجانلي‌لارين مهارتي‌ و باجاريقلاري ساييلابيلر:

تيراختور تكجه يئرلي(بومي) و آزربايجانلي اويونچولاري مطرح ائتمير، و قاپي‌سي بوتون اولدوز اولماق ايسته‌يه‌نلره آچيق‌دير.

بونو دا اونوتمامالي‌ييق، آسيا 2011 ياريشلاريندا اؤز آرزيلارينا چاتابيلمه‌يه‌ن اوچ اولدوزوموز دا تيراختورو آسيايا چاتديرماق ايچين ايكي قاتلي (مضاعف) كؤنول گوجو و روحيه تاپاجاقلار. ايندي بيزيم "تيراختور سالدير، بيز آسيا ايستيريك" دئمه‌ييميز، گرچك‌دن ال‌دن اوزاق ايستك دئييل كي هئچ، ترسينه، آسيا تيراختورو چاغيرمالي‌دير:
"تيراختور دايانما؛ گؤزلر يولوندا".

---

قايناقلار(منبع‌لر):
*: "Doha: Iraq coach Wolfgang Sidka praised a professional performance from his men as Kerrar Jasim's goal midway through the first-half saw them edge out DPR Korea 1-0 at Al Rayyan Stadium and set up a quarter-final clash with Australia."
- I trust my team, says Sidka (view on Google Sidewiki)

**: "اما اشراك مصطفى كريم فلم يكن موفقا بالوقت الذي توجب زج كرار جاسم الذي طالما ظهر بقدرة اكثر على اشغال المدافعين..."
- لم ( تطربنا) ياعبدو ؟!!(kooora.com)

7 comments:

منجوق said...
This comment has been removed by the author.
منجوق said...

لينك طومار:
http://www.persianpetition.com/sign.aspx?id=b337abd3-5cf5-4831-b85e-4b8d3b1279c8

Aydin Kasaei said...

قاباق‌کی یورومو چون سیلیب‌سیز اونا گؤره بیر نظر وئرمیرم. آنجاق طومار لینکی بورا قویماغینیزا گوره ساغ اولون. البته اورمو گؤلونون فیکرینده اوللانلار بیر باشقا پئتیشن‌ده نئچه دیله حاضیرلاییبلر، لوطفن سیزده بورا بیر امضا آتین:

اورمو گؤلونو قورتارماق اوچون دونیا‌لیق ایمضا کامپانیاسی آوراسیا چئوره قوروبو گیریشیمی
Signature Global Campaign For Saving Urmia Lake
Urmu gölünü qurtarmaq üçün dünyalıq imza kampanyası کمپین جهانی‌ امضا برای نجات دریاچهٔ ارومیه
”Save Lake Urmia” Underskrifts kampanje for å redde innsjø Urmia
Unterschriftsgskampagne zur Rettung des Urmu-Sees:

http://www.ipetitions.com/petition/urmugulu/

منجوق said...

سلام
پتيشن
را ديدم. ممنون از اين كه آن را معرفي كرديد. علي الاصول خيلي متن آن خوب است. اما چند نكته هست:
يك)با آن اولين لينك در پايين صفحه مشكل دارم. مي ترسم دردسر ساز شود. مشكوك است.
دو)متن انگليسي زيادروان نوشته نشده و نياز به ويرايش دارد.
سه) دگمه ي امضا راپيدا نكردم!!

Aydin Kasaei said...

سلام
در مورد نكته يك و دو مي توانيد با كامنت و توضيح به تهيه كنندگان فيدبك بدهيد. چون من آن را تهيه نكرده ام و من هم اخيرا از وجود آن مطلع شده ام. فكر كنم خود شما بيشتر روي اين تاكيد داريد كه لطفا به همه چيز با ديده شك نگاه نكنيم. مهم محتواي تومار است. در توماري كه شما معرفي كرده‌ايد دريغ از يك كلمه آذربايجان؛ هر چند به خاطر درياچه اورمو آنهم امضا شد

در مورد نكته سه هم عرض كنم، كه در پايين صفحه قسمت ساين پتيشن زير باكسهاي نام و ايميل و كامنت و ديسپلي آپشينز دكمه ساين قرار گرفته است.
http://www.ipetitions.com/petition/urmugulu/

منجوق said...

تاپانماديم. البير گؤتوروپلر.

Aydin Kasaei said...

بیلدیم موشگول نه‌دیر! سیز "اینترنت اکسپلورر" ایله اورانی آچیرسینیز. فایرفاکس یا گوگل کروم او صفحه‌نی کامیل آچیرلار

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı