Sunday, July 18, 2010

كيتاب، درگي، تئست و پاپروز ساتيرام

دوز اون ايل بوندان اؤنجه‌نين يايين قيزغين گونلري ايدي. ايصفاهان‌دا دان‌اولدوزونون بيرينجي سايي‌سيني 200 جيلد ده چاپ‌دان چيخارتميشديق. ايسته‌ييرديك ايران دا بو ايكي يوز دنه درگي سس سالسين. البته سس ده سالميشدي گئرچكدن. اؤيره‌نجيلرين هر بيري‌سي اون-اون بئش جيلد قولتوقلارينا ووروب اؤز شهرلرينه آپاريرديلار. من ده اوتوز دنه اردبيله ساري آپاريرديم. يئتميش دنه تئهرانين انديشه نو كيتاب ائوينه وئرديم. اردبيل ده بيري‌سيني تانيميرديم. لاپ او گئديش گليشي چوخ اولان چهارراه دا كي كيتاب ائوي‌نه گيرديم دئديم بو اون دنه توركجه اؤيرنجيسل درگي‌ني ايصفهان‌دا يايميشيق. اولورسا بو اون دنه‌ني ده سيز ساتين. اوره‌ييم ده دئييرديم ايندي منه دئيه‌جه‌ك ساغ اول اللر وار. ايصفاهان‌دا سيز توركجه درگي ياييرسينيز مي؟! آما ده‌وه نالبنده‌ باخان كيمي منه دئدي چيخ گئت گؤروم! بيز بورادا دانيشجويي- مانيشجويي مجلله ساتابيلمريك! لاپ آز قالدي دئسين باس باييرا!!

من ده سانكي دونيا باشيما فيرلانيردي بونو بو حيسابا قويدوم اورادا كيتاب ساتانلار سيخينتي آلتينداديرلار! بير درگي ساتان كيوسكا ساري گئديب اونونلا دانيشديم. او دا ائله بيل توركجه درگي ساتماق ايله پاپروز ساتماق آراسيندا فرق بيلميردي. مندن آليب دئدي ساتيش‌دان سونرا يوزده ايگيرمي‌سي منه يئتيشه‌جك. من‌ده سئوينيب دئديم سن تكجه سات يوزده اوتوزون سنين!

* * * * *

10 ايل او گونلردن اؤتور.
"روبو ايكي" بيلاغيبير پوست قويوب "بير كيتاب ائوي‌نين ياسيندا(در سوگ يك كتابفروشي)" باشليغي ايله. اوره‌يي بوندان دولو دور كي اردبيلين بير باشقا دوزگون كيتاب توكاني ايسه كولتورل ايشلردن اوزاقلاشميش‌دير و اورا دا اولوب كونكور كيتابلاري‌‌نين بورسو! آنجاق منجه آذربايجان‌دا كيتاب ساتانلارا چوخدان دير ياس توتمالي‌ييق. اؤز آناديليميزده ده كيتاب ساتمايان و يايمايانلارين اولوب اولماماغي، يوخسا تكجه تئست و كونكور كيتاب ساتماقلاري، و يا كيتاب يانيندا پاپروز و پوفك ساتماقلاري، هئچ ده اؤنملي دئييل!! اولو تانري رحمت ائله‌سين!

3 comments:

مهدی said...

سیید جلال دان اولدوزون یازاردی
شوونیزمین کؤکون دیبدن قازاردی
هردن ده دوز یولون بیر آز آزاردی

بیر اه ده‌دؤننن هئی دئییب سووایدی
یاووز دوشونجه نی باشدان قووایدی

(اوچونجومیصرعده شاعیر قافیه سیخینتیسیندا قالمیشدی)

Aydin Kasaei said...

مئهدي به‌‌ي! سن گليب بورا باش چكمه‌سين گينه‌ده آزارام! يارديم ائت...ـ

یوسوف said...

"آما ده‌وه نالبنده‌ باخان كيمي منه دئدي چيخ گئت گؤروم! بيز بورادا دانيشجويي- مانيشجويي مجلله ساتابيلمريك! لاپ آز قالدي دئسين باس باييرا!!
"

بو یول سئودا یولودور هم قار یاغار هم دولو

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı