Thursday, July 1, 2010

مخمل توكلولر


ائشيتديك مانا نيستاني‌يا قورخمازليق اؤدولو وئريبلر! واللاه مانا نيستاني‌ايله نه او زامان ايشيميز وار ايدي و نه بو زامان. من‌جه دؤرد ايل بوندان قاباق دا ياز سونونون گرگينلي دورموندا ايسه تبريز ده كوچه‌لر ده دولانسايدي هئچ كيمسه اونونلا ايشي اولمازدي. اونون چكديگي كارتون، تكجه اود آلتينداكي كؤزلري بير داها آليشديردي. هامي بو گئرچه‌يي بيلير و مينلر دؤنه دئييليب و دئمه‌گي لازيم دئييل.

آنجاق اونو او زامان توتدولار باسديلار دوستاغا. آزاد اولاندان سونرا دوردو قاچدي دونيانين او باشينا. فيكر ائليرم ايندي كانادا دا. حالبوكي كانادا دا كي توركلر بيزلردن ده ايتي ديلر، اونا بيري‌سي دئمير كؤپيوغلو او نه ايدي چكميشدين؟ البته توركلر قرار اولسايدي هر هوره‌نه بير باشماق تايي تونازلايالار گرك هميشه آياق يالين يئريه‌لر!! بو بوندان.

دئديك كي قورخماز مانا، بيري اونا بير سؤز دئمه‌دن، قورخمازلي‌غي‌ني ثبوت ائتمك ايچين دوردو گئتدي(يوخسا قاچدي) ديش اؤلكه‌لره. البته بو قورخمارليغي هئچ كيمسه آنلامادي. و بير باشقا لاپ قورخماز كارتونيست وار ايدي مانا دان نئچه ايل اؤنجه قورخمازليغي‌ني گؤسته‌ريب و قاچميشدي ديش كانادايا. آدي دا نيك ‌آهنگ كوثر(سؤوسه‌ر دئسه‌ك داها يارارلي دير) ايدي. البته سؤوسه‌رين‌ده قورخمازليغيني هئچ كيم باشا دوشمه‌ميشدي. فيكر ائليرم بو سؤوسه‌ر عوقده‌لي اولموشدو؛ اؤزو اؤزونه كي قورخمازليق اؤدولو وئره‌بيلمزدي! دئدي قورخمازليق اؤدولونو وئرك يازيق و اويونجاق كارتون چه‌كه‌ن مانا يا! بئله‌ليك ايله هم اؤزومون ده قورخمازليغيمي گؤسته‌ره‌رم، و هم‌ده توركلرين بير داها كئفين پوزارام!

باشقا بير سؤز ده دئييم. بونلارين بير ايشي آدامي به‌تر يانديرير! گؤرورسن دوروب گئديبلر يابانجي اؤلكه‌لره، يابانجي‌لارين كؤگله‌سينده و يابانجيلار ميكروفونو ايله، ايران دا ياشايان خاريجه اؤلكه گؤرمه‌ميش كيمليك‌چي توركلره بؤلوجو و يابانجي عاميلي دئييب، اونلارين ايهانته قارشي قالخيشلاريني قوندارما شكيل‌ده گؤسته‌ريرلر. بيري‌سي ائله بو مانا يا اؤدول وئرمك اولايي. دئييبلر كي او زامان توركلر ايسته‌ييرديلر بو قورخماز كارتونيستي اؤلدوره‌لر. هه‌له‌ ماحال فرض ايله دئيه‌ك ايسته‌ييرديلر اؤلدوره‌لر. بو قورخمازليغين نه‌ده‌ني نه‌ ايميش؟ بير بؤيوك خالقين ديلي‌ني اله سالماق؟ ايرقچي‌ليق؟ شوونيسم؟

دوغرودان كي اوز دئييل، قزوين دابان‌داشي‌سي‌دير. منجه بونلارا يامان دئمه‌يين عئبي يوخ. البته من گينه‌ده "مانا"يا يامان دئميرم، آنجاق اونا اؤدول وئرمك آراجي‌ليق ائدن سؤسه‌ره بونو دئيه‌بيله‌رم. او يابانجيلار كؤلگه‌سينده دورومو ائله دورولوب كي، توكو قودوخ كيمي مخمل چالير! ايسته‌ييرديم بونو آز-دئييم بيلاغينا گؤنده‌رم آنجاق دئديم بو قورخمازليق اؤدولونو وئرن سؤوسه‌ره ائله بوردا ياپيشديراق.

No comments:

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı