Sunday, May 2, 2010

همدان كتديلري

آذربايجان دا بير بؤلگه نين اؤنمي و اهميتي ني ايسته‌سه‌له‌ر گؤسته‌ره‌لر اورانين "كند"ينين سايي‌سنين دئيه‌ر‌لر. اؤرنك ايچين بيزيم خالخال دا كيوي‌ (كويو) كي چوخ كنده صاحيب دير دئيه‌رديلر بورانين 120 دن چوخ كندي واردير، حتي "هيرو" دان دا چوخ. قديم زامانلار كي آقكند ده كي خالخال اوستونده ايدي كندلرينين چوخلوغونا گؤره ادعالي ايميشلر. ايندي كؤچوروم مساله‌سينه گؤره كندلرين ده توپلوم سايي‌سي آزالميشدير. دئمك اولار چوخو امكاناتين چوخالماسينا ائله گليبلر بؤيوك شهرلره. دوزون سؤزو "كند" سؤزجويو توركو ديلده "مدينه و تمدنـ"ـه اشارت ائدن كلمه دير؛ و ايندي ايسه بيز كوچه لره آسفالت اولان يئرلره شهر دئييريك! بو سؤزلري كي دئييرم بير منظوروم وار و او دا ايرانين دولتي و غير دولتي اينتئرنت سايتلاريندا كي تورك ديللي‌لرين سايي‌سيني اؤزلليك ايله آذربايجانين قديم تورپاقلاريندا، گيزلتمك و يا توركلره "كتدي" لقبي وئرمك دير. ائله بيل مثلا كتدي اولماق پيس بير شئي دير! اؤرنك ايچين گئديب ساوه(ساوا) فرمانداري‌سنين سايتينا باخسانيز يازيب ساوه نين اؤزونده كي ياشايانلار فارس ديرلار ولي اطرافيندا كي كندلر ده ياشايان كؤچري(!) آداملار توركلر ديلر. منجه بئله بيلگي وئرمك، توپلومون ياريسيندان چوخ اولان آداملارا اهانت ائتمك آنلاميندا دير. اورتايا گلن بير سورون ايسه بودور  آيا فارسلارين ايچينده كتدي يوخدور و ياني "ده" يا "روستا"لاري يوخدور!؟

بو گون ده همدان اوستانداري‌سي‌‌نين سايتندا عجيبه غريبه يازيلار گؤردوم. ايلك ده بونو دئييم آللاه شوكور كي تورك ديلي نين اولماغي  دانيلمايير. يوخاري دا دئديگيم كيمي، بوردا دا كندلرين سايي‌سي بير بؤلگه ده ياشايانلارين فاييزين گؤسته‌ره‌بيلر. بو سايت دا فارس ديللي كندلرين سايي‌سيني يازيلماييب، آنجاق بير گئرچك گؤسته‌ريلميش و او همدان اوستانيندا 562 كندين ديلي توركجه ديللي اولماغي دير. ياني بيز كي آذربايجانين گؤبه‌گينده شيشيب دئييرديك بيزيم يوز ايگيرمي كنديميز وار، همدانين گونئي و باتي‌سيندا ان آزي دئييرلر 562 تورك ديللي كند واردير. لورلار 255 كند ده(گونئي) و كوردلر ده 159 كند ده(باتي و قوزئي باتي) ياشاييرلار. آنجاق بونلارين يانيندا همدانين دوغوسوندا كي كندلره اشاره اولماييب(بيلديگينيز كيمي همدانين دوغو بؤگله‌لري ساوا و كوميجان ايله قونشودورلار و بونلار هامي سي مركزي اوستانين تورك ديللي بؤلگه‌لري ديرلر)؛ و ضد و نقيض حال‌دا يازيليب كي باتي دا هم توركلر هامي دان چوخدورلار و هم كوردلر! باشقا طرفدن كندسيز(!) فارس ديللي‌لره ده يازيلميش كي اوستانين مركزينده يئرله‌شيبلر و بو دا آرتيريلميش كي بونلار، ياني فارس ديللي‌لر، همدانين "ماد"لار دؤنميندن ايندي‌يه‌دك ان ياشايان اسكي آداملاري‌دير.

اولابيلر من بيلميرم، يوخسا گؤرمه‌ميشم! اولميا شهر ده توركجه دانيشسان دا، فارسجا ائشيديلير. بيري گئتسين ديلمانج ماشينلاري‌ني اونلارين قولاغيندان قوپارتسين!

1 comment:

mehdi mutlu said...

سلام
الله دئییم شوونیستلرین کوکون کسسین.
یاشا عزیز یولداش یاشا

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı