Thursday, September 23, 2010

الويداع آناديلي

ايگيرمي ايل اولاردي تبريز تيلويزيونونا باخمازديم. اوشاقليق‌دا جومه گونلري تبريز ناهاردان قاباق هر دن توركجه كارتون وئرردي! سونرا بيلديم كي او كارتونلار باكي‌دان ياييلميش روسي چيزگي فيلملر ايميش. گينه آدام دئيير يوز رحمت او زامانلارا! هر دن تيلويزيون‌دا اوشاق اؤز آناديلينده "جيب جيب جوجه‌لريم" گؤرورموش! ايندي ايسه تيراختور اويونلاري‌ني گؤرمك باعيث اولوب گينه‌ده تبريز تيلويزيونونا گؤزلري آيدين اولاق! اردبيل كانالي "گئجه‌لر" وئرنده، تبريز ده "سهنديه" وئرير! يازيقلار اولسون كي بوندان اؤنجه سهنديه دئيه‌نده شهريارين ياراتديغي شاهكار ياديما دوشه‌نده، ايندي ده بو سهنديه‌نين اتي آجي و دوزسوز آپاريجي‌سي ياديما دشور! البته انصاف‌دان دا چيخماياق ائله ده پيس دئييل آذربايجانين گنج ياراديجي و سئچگينلري‌ني گتيرير دانيشديرير. آنجاق نئچه گئجه بوندان قاباق زهله‌مي آپاردي! بير گنج قادين گتيرميشديلر ساغلامليق آراشديريجي‌سي ايدي؛ آنجاق تبريزلي نوخبه‌ميز توركجه دانيشابيلميردي و آپاريجي اونلا فارسجا دانيشيردي. من بيلميرم بئله آدامين هاراسينا نوخبه و سئچگين دئمك اولار؟

سئچگين‌لر سؤزو اولدو 1382 جي ايلين يازيندا كي تئهرانين بهمن كولتور ساراييندا آزربايجان سئچگينلر فئستيوالي ياديما دوشدو. او زامان علي دايي و كريم باقيري ده ايدمان دا سئچيلميشديلر، آنجاق باشقا سئچگينلرين يانيندا اوتورماق افتخاري وئرمه‌ديلر. او زامانلار ايدي كي ياواش ياواش، اولدوزلاريميزين ايشيقلاري آزاليردي. و هامي بو اولدوزلارين سؤندورولمه‌سي‌ني تبريزين سهند ايستاديوموندا گؤردو...

بير باشقا نوخبه‌لر و سئچگين‌لر ده وارديلار كيمليك‌ و وارليقلارينا ساري دؤنورلر، آنجاق تئز تئز اونلارين يادينا سالماسين آلزايمئر توتانلار، يوخسا اويوشدوروجويا دادانانلار كيمي يول‌دان آزيب، و 180 درجه‌‌لي ترسينه دانيشيرلار. بونون نه‌ده‌ني قاييدير يانليش دوزه‌نكلي اؤيره‌تيمه (سيستم غلط آموزشي) يا دا بئيين يووان و آسيميله ائدن اؤيره‌تيم سيستئمينه. نه‌قدر ده ياراديجي و ذكالي آداملاردا اولسالاردا، دوشونجه‌لري بير سايي قاليب‌دن ائشيگه چيخابيلمير. بير اؤرنك دئييم؛ بو گون گوز ايلكي دير؛ مئهر آيي‌نين بيرينجي گونو. هر كيمسه آزربايجان دا بير آز بو وارليق و كيمليك قونوسوندا بيلگي‌سي اولورسا تئز آناديلي‌نين ياساقلانماغي يادينا دوشر؛ آنجاق بير يولداشيميز مئهر آيي‌نين بيرينجي گونونو قوتلو اولسون دئييب هئچ، داليسيجا زرتوشتي‌لره ده مئهرگان گونونو خاطيرلادديب و تبريك ائديب!

بونلارين آناديللري ايله ويداعلاشمالاري بيزيم ويداعلاشماغيميزين تايي‌دئييل سانكي. البته چون هامي آزاد دير نه ايسته‌يير دئسين، آنجاق من‌ باش ساغليغي‌ دئييرم:
"آناديليميز ايله ويداعلاشماق گونو تسليت"!

3 comments:

سلطانی said...

سایین آیدین بی

تبریز کانالینا گؤره چوخ دوز بویوروسوز
ایندی تبریزین رادیو و تیلویزیونوندا تورکجه گؤزل دانیشابیلن آداملار شاید ایکی یا اوچ نفردن آرتیق اولمیا

آمما تبریز رادیوسو (کی اویدودان دا آلینا بیلیر) نئچه یاخجی برنامه تورکجه دیلینده گئجه چاغلاری یاینلاییر
منجه اونلاریدا آراشدیرماق سیزین کیمی بیر اوزمان توسط ایله یاخجی ایش اولابیلر

اونلارین بیری ساعات 22:30 دا یایینلانان خیال پرده لری آدیندا بیر ادبی برنامه دی کی یکشنبه، سه شنبه و پنجشنبه گونلری یایینلانیر

محفل برنامه سی ده کی هر گئجه ساعات 21 ده یایینا چیخار، شنبه و دوشنبه گونلری ادبی و موسیقیه اختصاص وئریلیب

شنبه دن چارشنبه یه جان هر گئجه ساعات 23 ده عشق فسانه سی آدلی بیر برنامه و پنجشنبه و جمعه گونلری ده قرآن داستانلاری یایینلانیر

منجه اگر بو برنامه لر یاخجی بیر تورکجه ایله اولورسا، گرک اونلارا دستک وئراق

Unknown said...

سلام سلطانی جنابلاری
یازیلاریمی دیققت ایله اوخوماغینیزا گؤره چوخ تشککور ائدیرم

سیزین سؤزلر ایله راضی یام؛ البته او حد ده دئییلیم اونلارین ایشینه اوزمانلیق نظری وئرم. یازدیقلاریم بیر عادی تاماشاچی‌نین باخیشی دیر. من اونلارین یئرینده اولسام ال آیاغیمی ایتیریب هئش بیر دنه دوز عمللی سلام دا دئیه بیلمه‌رم! آنجاق سؤز بوردا دیر کی اونلار دانیشماق دا چوخ یئته‌نکلی و ماهیردیلر و راحاتلیقلا آنادیللرینی تؤره‌لی دانیشابیلرلر و بئله احساس اولونور اونلارین بیر سایی‌سی عمد اوزویله بئله داورانیرلار و نئچه دنه تورکجه جومله دئمک اؤزللیک ایله دیللی باشلی آداملارا (دیلی اوزون آداملارا) چوخ دا چتین دئییل و بو آدامی اینجیدیر .

هر حال‌دا سیز دئیه‌ن رادیویا دا قولاق آسیم گؤروم نئجه دیر

وئردیگینیز بیلگی‌یه گؤره ساغ اولون

داش قاپی said...

سالام
آیدین، درد دردی گتیریر. نه قدر دئییرسن ده قورتولمور. بونلارا یاخشی باخمالی‌ییق. یاخشی گؤرمه‌لی‌ییک، اؤزگه‌لشمیش‌لری، مانقورت‌لاشمیش‌لاری، اؤزگه‌لشه بیله‌جک‌لری.
یاشا

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı