اورمو نوغولو

اورمولو امكداشلارين بيري‫سي هر دن اورمو نوغولو گتيرر و بيزه چتينليك يارادار!
اورمو نوغولو چوخ يئمه‫لي دير. بئله كي ديشلريمين ياريسينداني چوخونون خارابليغي و آغري‫ياجاغينا باخماياراق، اؤز قاباغيمي ساخلاياممايب و چاي‫ ايلخ و يا چاي‫سيز اونلاري تئزليك ايله قوتارارام!

هر حال‫دا، اورمولو نوغول دوزلدنلرين بير ايشلريندن زهله‫م گئدير و گؤردوغونوز دوزسوز قوشمالاري او قابلارين اوستونه ياپيشديرماقلاري‫دير. اولماز توركجه‫ده گؤزل شئعرلر ده تاپيب قوتولارينيز اوستونه يازاسينيز؟

فارسجا يازيليب بو نوغول باشقا بير نوغول دور! ائله من ده اونايلاييب، دئييرم نوغولون كي باشقا دير هئچ، سؤز قابين ايسه بام باشقا دير.

چؤزوم

ايسنا نين بو ساليغيني(خبريني) اوخويون:
فرهنگی در جمع دانشجویان دانشگاه تبریز: هیچ ملتی را به زور نمی توان تغییر رفتار داد

البته فرهنگي نين تبريز بيلي يوردوندا كي سؤزلرين چوخو، ايقتيصادا گؤره دير و اونون احمدي نيژادين ايقتيصادي طرحينه توتدوغو ايرادلار ايله ايشيم يوخدور. آنجاق اونون باشليق اولدوغو سؤزونه(هئچ اولوسون داورانيشي ني، زور ايله ده ييشمك اولماز) گؤره، چوخ سؤزلر گتيرمك اولار كي بيريسي هيتلئرين سؤزو دور! او دئميشدي بير ميللتي آرادان آپارماق ايچين او ميللتين ديلين آرادان آپارين!
آنجاق ديلي ياواش-ياواش و يا باريش ايله و يا زور ايله آرادان آپارماق بير جوره مساله اولابيلر؛ بيز داورانيشين ده ييشلمه سيندن يوخ، بلكه آرادان گئتمكدن قورخوروق!

تبريز بيلي يوردونون اؤيرنجي لري، هميشه كي كيمي بير ميللت وكيلي نين ياخاسين توتوب و آناياسانين 15 و 19 جو اصللريندن سوروشوبلار. يوخاري دا كي سؤزو دئيه ن سانكي اؤنجه دئديگي ني اونودوب و بو اصللري اقوام چرچيوه سينده بيلديريب و »تا حدودي» ايجرا اولونماسينا ايناناراق بئله بويورور كي بيز مجليس وكيللري، اؤزلليكده ديل اؤيرتيمينده، بير پارا ايشلرين اولونماسي ني گركلي بيليريك و البته ايشين داليسيجا دوشموشوك و منيم اؤنرديگيم، تبريزين اؤيرتيم و آراشديرما مركزي، سوروملولارين مووافيقتي ايله قارشيلانيب و بونا گؤره، حداد عادل بير آدامي آختارير(!) تا بو مركزين باشچي ليغينا سئچندن سونرا ، اورا دا اؤز ايشلريني باشلاسين.

گؤردوغونوز كيمي فرهنگي نين ائتديگي ايزله مه لر و وئرديگي سؤزلره گؤره، آذربايجانليلارين توركجه اولدوغو آناديللرينين دوگونو حداد عادل، فارس ديلي فرهنگيستان باشقاني نين الي ايله، بو تئزليك ايله آچيلاجاق!

ساري‫ گلين دالغالاندي

دونن گئجه ساري گلين كونسئرتي، دئديگيم كيمي هاريكا ايدي! تكجه بير ايش منه راس گلدي كي آز قالميشدي بورنومدان گلسين! او دا بو ايدي كي شيركتيميزين سئرويس سوروجوسو قانونچو و خيلاف ائتمه‫يه‫ن بير فارس چيخيب، مني فاطيمي كوچه سينين باشيندا انديرمه‌ييب و شوونيستلر كيمي، اليندن گله‫ني ائتدي تا مني لاپ اوزاق يئر ده سالسين. آخيردا ايستيرديم بير دنه وورام انگينين آلتيندان! گرچكدن عوقده‫سي وار ايدي گه‌ده‫نين. آنجاق قاچا-قاچا وليعصر كوچه‌سيني اوزو يوخاري قاچيب اؤزومو يئددي ياريم‌دا يئتيرديم. هر دؤنه ايران دا بئله وئرليشلرين باشلانغيجي گئجيكمه‌يي عاددي بير ايش اولدوغو كيمي، گؤردوم هن، ساعات 19 يوخ، بلكي 20 ده باشلاناجاق!
ايكي ايش ده اولماسايدي دالغا قوروپونون چيخيشلاري يوز ده يوز بيز ايچين ياخشي اولاجاقدي. بيري بو كي آپاريجي خانيمين چوخلو فارسجا دانيشماغي آدامين لاپ زهله‌‫سيني آپاريردي. ايكينجيسي ده اؤز تقصيريميز ايدي: اوجوز اتين شورباسي ياخشي اولماز! اون‫‌بئش‫‌مين تومن دوز دور باها نظره گلير، آنجاق اؤلكه(كشور) تالاريندا، اورتورب باخماق ايچين چوخ پيس يئر ايدي و بوينوموز قورودو! هر حال دا بيز او اوزمانجلارين آلقيشلامالي سسلريني دينله‫مك ايچين گلميشديك.

بيلي يورد يولداشلارين بيري‫سي sms ايله مني اورادا تاپدي. دان اولدوزو درگي‫سينده امكداشليق ائدرديك. من كيمي ال آياقسيز چيخماييب و اؤز حايات يولداشي اولاجاق بير خانيم ايله گلميشدي. دئييرد داي نه‫يه بيزي خبر ائتميرسن بئله چاغلار!؟ ائله بيليرديم داي اصلا كونسئرت-مونسئرته گلميرسن؟ من ده دان‫اولدوزونون ايلك سايي‫سيندا يازديغيميز شئعر ياديما دوشدو و بير آز چئويريب دئديم: داي اودلانيب-يانماق ايسته‫ميريك، آنجاق، من گلمه‫سم، سن گلمه‫سن، بيز گلمه‫سك، هانسي چپيك چالانلار، آلقيشلايار بو اوزمانجلاري!

بالكون دا اوتورموشدوق. اورادان سئني ياخشي گؤره‫بيلمه‫‫سه‫ا‫يديك ايسه، پرده آرخاسيندا و سئن قيراغيندا چاليشانلاري ياخشي گؤرمك اولوردو! اينتئرنت واسيطه‫سي ايله تانيديغيم پئشه‫كار و گنج فوتوقرافچي، روشن به‫يين نئجه چاليشديغي‫‫ني اوزاق دان گؤروردوم. اونا باشاريلار ديله‫ييرم، آنجاق كاشكي او زال دا اوتورانلاردان دا عكس گؤتوره‫يدي! البته اولابيلر گؤتوروب و من گؤرمه‫ديم. من‫ده بو قيريق موبايليم ايله نئچه دنه ايري-اويري گؤروت گؤتوردوم كي گؤره بيلرسينيز! سون چيخيش دا، بير قوجا كيشي‫ اويناماغا باشلاميشدي و اوندان ايسته‫ييرديم بير گؤرونتو سالام كي سالون قوروقچولارينين بيريسي ادب ايله دئدي قوي جيبينه! من ده دئديم ائـــ...! هئچ ياديمدا ده‫ييلدي عكس و فيلم گؤتورمك ياساق ايميش.

بير ياندان دا، توركوك بيز وئبلاقيندا گؤردويوم قيوير بلاقي يازارينين سؤزو،‫ بونو منه وورغولاميشدي كي بئله تؤرنلر و كونسئرتلر يوز ايلده آذربايجان بؤلگه‫لرينده قورولماياجاق! تكجه ايفتيخاري تبليغ ائتمك هدفي ايله، كوپي‫رايت ياساسي‫ني آياق آلتينا قويوب و اورادا ايفا اولونان چيخيشلاردان ايكي سيني بورادان يوكله‫يه‫بيلرسينيز. دوز دور كئيفييتلري چوخ آشاغي دير و اولابيلر ايفالارين گؤزلليكلريني آرادان گئتسين، آنجاق اوزاق دا اوتورانلارين گوناهي نه؟! اؤزو ده، بو ايش ايله، هامي تحريك اولارلار كي اصل CDنين داليسيجا دوشسونلر.

اينشاللا CD سي، بو تئزليكده چيخا، و اونو هاممي آلابيلسين.

بونو دا خارابلاديلار

قاجارلاردان قالميش ياخشي بير آنيتلارين بيريسي، او زامانلار دا يازيليب، چالينيب و اوخونموش، ايران محروسه مماليكينين اولوسال مارشي دير. او تكجه نئچه ايلدير تاپيليب سانكي. او مارش دا ايرانين نئچه اولوسلو و نئچه ديللي اولماغينا ايشاره اولوب و فارس ديلينه اوخونماغي و بير فرانسا موسيقي چي سينين دوزنلمه يينه باخماياراق، موسيقي اوزماني اولماساندا بيلرسن بو موسيقي آذربايجان موسيقي سينه اوخشايير. هر حالدا، تاريخي خاراب ائدنلر ايش سيز قالماييب و بئله بير گؤزل اثرين هئيكلينه ده ايسته ييرلر آفتافا گؤتوروب و بوتون ايرانليلارين آبريسيني دونيا قارشيسيندا آپارسينلار. بونا بير كليپ دوزلديبلر، و شئعر ده كي ايران خالقلارينا گؤره اولان سؤزلره قولاق آسماياراق، گؤتورب آغيلدان اوزاق گؤروتلر باسيبلار:

لاپ گولونج بؤلومو باشلانغيج دا دير! آمئريكاليلارين ايكينجي دونيا ساواشيندا، ژاپونلولارا "ايوو جيما" دا غاليب گليب و بايراقلاريني قالديرماق شكيلينده، ايران بايراغي قويولوب. آمئريكاليلار كي هئچ، دونيا دا تاريخ كيتابلاريني ورقلريني بير آز چئويرميش هر كيمسه، بو عكسين كؤلگه سينه ده باخسا، تشخيص وئرر، بو همن پوليتزئر اؤدولونو آلان «آتالاريميزين بايراغي»ـينا(Flags of our fathers) معروف اولان گؤرونتو دور. بونلار گليبلر اونا اوتوردوبلار جومشود تختينده كي قانادلي آتين آسلان آدامينين قارشيسيندا!

بونلار هر نه يي بئله چئويريب تحريف ائديرلر. اوز دئديكلري ايكي مين بئش يوز ايلليك تاريخ، گلير ايكي يوز ايلليك تاريخينين 60 ايل بوندان قاباغيندان رسيم اوغورلايير! اولمازدي ايران-ايراق ساواشيندان بئله بير گؤروت سئچيله ايدي؟!

ساری گلین؛ آشيق چينگيز ايفا ائدير

توركوك بيز وئبلاقيندا، آشيق چينگيزين اؤلكه تالاريندا وئره جك كانسئرتينين بيلديريسني گؤردوم (باغلانتي). قوهوم-تانيشلارين هر بيريسينه دئييرم، گؤرورم اونلار من دن اؤنجه بيليرميشلر! بئله سانيرام ايگنه آتماغا يئر اولماسين. آشيق سولدوز مئهدي پور، چينگيزين بالاجا قارداشينين چيخيشيني ايكي ايل اؤنجه گؤرموشم(بيز ايله اوزمانجلاريميز)، آنجاق اوندان داها آدليم اولان چينگيزين تكجه تعريفيني ائشيتميشم. بيلي يورد دا كي هر زامان چاغيرارديق واختي اولمازدي گله.
يقين كي توركييه لي لر دئيه ن كيمي هاريكا اولاجاق.

اؤزون سن

يازماغا داي بئله ماراغيم يوخدور؛ چونكو آذربايجانين گوجلو يازارلار و قوشارلار(شاعيرلر)ين بلاقلچيللار آراسينا گيريب و اؤزلليكده بو بير ايكي اوچ ايلين ايچينده، تورك بلاق يايانلارين حئيرتلنديريجي شكيل ده چوخالماسي، بير ياندان من كيمي بير بيلاق يازاني سئوينديرير، آنجاق آلتي ايل بوندان اؤنجه كي كيمي، اوچ- دؤرد دنه توركجه(ايراني دئييرم ها!) بيلاق ايچينده پيس يا ياخشي كئيفييت ده يازماق، بيلاقا باش وورانلارين سايي سيني ائتگيلنميردي. هر حال دا اينگيليسليلر دئديكلري كيمي ائله بيليريم پييس آو جانك(آشقال پاراسي) يازيرام! هر حال دا نئجه ليك(كئيفييت) باخيميندان يوخ، بلكه نئچه ليك(كمييت) باخيميندان حيسابلايين يازيلاريمي! آنجاق ان آزي بو پوست يقين كي آشقال پاراسي دئييل، چونكو قونوسو باشقا بير آدامين آشقال پارا سؤزلرينه گؤره اولاجاقدير.

ايران تيلويزيونوندا، گئجه ساعت دوققوزا اون-اون بئش دقيقه قالاندا، ايكينجي كانال دا، مؤعتضيد آدلي بير قوجا و كؤك كيشي، چاغداش ايلايا گؤره بير اون-اون بئش دقيقه ليك پروقرام آپارير و اوندا گئرچك دن ناققاليق ائدير. بير دؤنه گؤردوم دئيينير و دئيير كي ديش اؤلكه ده كي سلطنتچي لر منيم دوغرو سؤزلريميندن قيزيب و دئييرلر فيلاني تيلويزيون دا تاريخ ساتير! من ايسه بئله دوشوندوم بو كيشي حاقلي دير و شاهچي كؤپك اوشاقلاري بوندان سونرا كي بير سؤز دئيه بيلمزلر، چونكو ريضاه شاه و اونون بالاسي محمدريضانين گؤردوگو ايشلرينين پيس-ياخشي سي بيرليكده يويولونورلار. ايلك ده دئديم هن ساغ اول مؤعتضيد! بير زامان اونلار تاريخي اورتديلر ايندي سنين نؤوبتين دير.

نئچه گون بوندان قاباق گؤردوم او ايسته يير پيشه وري نين بير ايلليك حوكومتينه گؤره دانيشسين. چونكو هميشه او دؤنمه گؤره هر يئرده سوسولور، سؤز آپاريلمير و فارسلار دئميشكن هر نه ماستمالي اولار؛ منه جاليب گلدي، دئديم گؤروم نه دئيير و دقيق قولاق آسديم بلكه يئني و ياخشي بيلگيلر وئريلدي. آنجاق بو ايلايچي هر نه يي بير بيرينه توخودو و هر نه دن دانيشدي، دئديگيميز حوكومتين نئجه يارانماغي، نئجه ايش آپارماغي و نئجه آرادان گئتمه ييندن سونرا! كاشكي او سؤزلري ضبط ائليه رديم! گاه دئدي گورجوستان، اؤنجه ايرانين ايميش(پورتاقال ساتاني تاپين)! گاه دئدي آرازين قوزئيينده كي يوردلار اصلا آذربايجان دئييل و اورانين آدي قوندارما دير و اورانين اصل آدي اران و شيروان و حتي ايروان(!)... ايميش! وئرليشين سونوندا دا دئدي كي اصلا من بونا فخر ائديرم كي آذربايجانليلار ايله قوهوم اولموشام و گلينيم آذربايجانلي دير‍!ائله بونو دئيه ندن سونرا بئله گولدوم كي دئديم هه كيشي سنين ده بو سؤزلرين باعيث اولور تا سن كيمي آداملار بئله سؤزلر دئييرلر بيزيم ده يازماغا هله ليك بهانه ميز وار، آللاه اونون اوزونو گولدورسون!

بونو ايسته ييرم جيددي دئيه م. بيز آذربايجانليلارا بير پيس لقب وئريبلر كي دئيه نلرين اؤزونه اويغون دور؛ بونون نه دني يوخاري دا بللي دير! طرف گلير و دئيير آذربايجانين ياريسيندان چوخ تاريخي بؤلگه لري هئچ زامان آذربايجان آدلانميرميش. دئمه لي، اوتانمازليقلا گولوستان ايله توركمنچاي راضي ليقلاريندان مودافيعه ائدير و باشقا طرفدن، ايسته يير دئديگي كيمي، بونا فخر ائده كي گليني آ‌ذربايجانلي دير! او گلين يقين كي بيلير آذربايجان خالقينين آراسيندا ايكي يوز ايلليك يامان آيريليق دردي نه دئمك دير. او تاريخ چي ايسته يير كيمي ائششك ائتسين؟ بيزلري مي، يا اوزونو مو؟!

راه اندازي تلويزيون سراسري تركي در ايران

آلما يولو وئبلاقيندا ياييلميش خبر، چوخ ياخشي خبر دير، بونا گؤره:

بيرينجي سي، ايرانين باشدان باشاسيندا توركجه ديلينه بير اؤزل تيلويزيون كانالي قورولاجاقدير.

ايكينجي سي، بير ائشيديجي قولاق تاپيليب كه آذربايجانليلارين ايستكلرينين بيريسينه يانيت وئرير.

اوچونجو سو، دينمز-دانيشماز و ضيمني، قبول اولونور كي تورك بؤلگه‫لر تكجه دؤرد-بئش اوستانا سيغيلماميشدير.

دؤردونجو سو، تورك اوشاقلار و دليقانليلار، توركجه دانيشانلاري تكجه ائو ده ائشيكده، يوخ، بلكه تيلويزيوند دا گؤره بيله جكلر!

بئشينجي سي، سوچو اولمايان فارس اوشاقلار و دليقانليلارا بئله ايلقا اولونماياجاق كي، آذربايجان توركجه سينده دانيشماق تيلويزيون دا تكجه كيلاس سيز و گولدورمك ايچين دير.

آلتينجي سي، ايرانين هر بير يئرينده فارس ديليني باشا دوشمه ين ياشلي قادينلار و كيشيلر خبرلر و فيلملري، ديلماج سيز باشا دوشه جكلر، و آز باشقا لاري دنگ ائله يه جكلر كي او نه دئدي؟!

و يئدينجي سي، بو كي ايران توركلري، اؤزلليكده سينير قيراغيندا ياشايانلار، اؤزگه و قونشو كاناللارا باخماغي اؤتوره جكلر كي هئچ، بلكه قونشو اؤلكه لر ده كي توركلر ايسه دئيه جكلر، ايرانين توركجه كانالينا باخاق گؤرك نه وئرير؟


- ترجمه فارسي: -

خبر منتشر شده در وبلاگ آلما يولو، خبر بسيار خوبي است از اين جهات:

اولا، يك شبكه تلويزيوني سراسري به زبان تركي در ايران داير خواهدشد.

ثانيا، بالاخره گوش شنوايي پيدا شده كه به يكي از خواسته هاي آذربايجاني ها واكنشي مثبت نشان دهد.

ثالثا، تلويحا پذيرفته مي شود كه مناطق ترك نشين محدود به چهار-پنج استان نيست.

رابعا، بچه ها و نوجوانان ترك، نه فقط در خانه و كوچه و خيابان، بلكه در تلويزيون هم خواهند ديد.

خامسا، به بچه ها و نوجوانان معصوم فارس، هم چنين القا نخواهدشد كه تركي آذربايجاني زباني بي كلاس بوده و فقط مسخره بازي در فيلمهاي طنز است!

سادسا، در هر نقطه از ايران زنان و مردان مسن و غير مسني كه فارسي را بلد نيستند، اخبار و فيلمها را بدون ديلماج هم متوجه خواهندشد و بقيه بينندگان تلويزيوني را كمتر سؤال پيچ خواهند كرده كه اين چي گفت، آن چي گفت؟!

سابعا، ترك زبانهاي ايران، به ويژه مرزنشينان، كانالهاي بيگانه را تماشا نخواهند كرد كه هيچ، بلكه تركهاي همسايه هم خواهند گفت، به جاي ديدن اين همه برنامه هاي مبتذل خودي، بهتر است نگاهي هم بيندازيم به كانال تركي ايران.