Tuesday, June 22, 2010

سوسماق بئله دانيشماق‌دان ياخشي‌دير

اردبيل - تبريز راديو تيلويزيونلاريندا چوخ ائشيديلير و گؤرسه‌نير. مثلن بيري شهرداري باشقاني دير، آموزش و پرورش ده سوروملو دور، اوستانداري‌دا ايشله‌يير، جهاد دا اولور يا دا دؤولتي باشقا ايشلره باخير يا دا ايشلرين باشيندا دير. البته تكجه دؤولت آدامي دئييللر و معمولي آداملار دا ايچلرين‌ده وار، آنجاق دانيشماق فورصتي راديو تيلويزيون تريبونوندا دؤولت آداملاري ايچين وار. طرف گلير فارسجا خبر بؤلومون‌ده دانيشاندا ته‌ته-په‌ته يه دوشوب بئله اركك آغيزلا دانيشير آدام دئيير آخي نه‌يه بو يازيقلاري فارسجا دانيشديريرسينيز. بير ديلماج گه‌تيرين دا. مثلن ائله بو تيراختورون اويونلاري‌ني فارسجا قيريللادان اوغول ياخشي‌دير. نه‌مه‌نه دانيشيلير بو اولسون دوبلور. تورك اولمايانلار دا بيز غيري آريايي‌لارا گولمه‌زلر. بو بوندان. ولي ايش او زامان لاپ گولونج اولور كي دانيشان ايسته‌يير توركجه دانيشا. يقين سيز ده من كيمي سيز. آدامين قوسماغي گلير. دئسين فارسجا دانيش، دانيشا بيلمز ايندي توركجه دانيشاندا، جومله‌لرين باشيندان اه‌ته‌يه هر نه‌يي فارسجا قورولوش ايله دئيير:

"از ابتداي سال يك هزار و سيصد و هشتاد و نه، در اداره مربوط به طرح‌هاي عمراني، پروژه‌هايي كه در دست اجرا ديلار..."!!
ايندي دئسين، سن ائله بو بير دنه فئعلي ده فارسجا دئه، قالاجاق! باتيراجاق! قاتيب قاتيشديراجاق!

و بئله اولور آدام تيلويزيونون انگين باسير و گلير گيرير اينتئرنئته. يوخاري دا دئديگيم بويوروق آلتيندا كيلاردان هئچ انتظار يوخدور؛ آنجاق منيم اؤز بيلاغيم دا ايسه بير-ايكي دنه باغلانتي وار. بيلاقلاريندا هر دن آذربايجانا گؤره بير شئي‌لر يازماقلارينا گؤره لينك وئرميشم. هر دن گئديب باخارام. سؤزون دوزو، يازيلاري ادبي فارسجا اولسا اوخويارام. آنجاق هر دن گؤرورسن مثلا گئديب شاهسئون ائلي‌نين آراسينا و تئهران گؤبه‌گي‌نين لهجه‌سينده خاطيره يازير:

"فك كردم چوپون واسه اين ميره اون ور تپه كه ..."

-------

ي. س:

 داش‌قاپي بيلاغيندا بو يازي‌يا گؤره "دانیشا بیلدیم کی دانیشمادیم!" باشليق‌لي ائله‌شتيري ده يازيلميشدير:
او یازیدا نئجه تورکی دانیشماق‌لارا توخونولوب. آذربایجاندا اولانلار دوغرو دوزگون تورکو دانیشا بیلدیلر کی دانیشمادیلار! بو دیلی دوز دانیشماغی هاردان اؤیرنمه‌لی‌دیرلر!؟ نه زامان اؤیرتدیلر اونلار اؤیرنمه‌دیلر؟!
ايسته‌ديم يوروم وئريب، دئيه‌م منيم منظوروم توركجه ادبي دانيشماق دئييل؛ يوخاري‌دا وئرديگيم ميثال‌دا طرف اؤز آناديلينده چوخ  قولاي‌جا دئيه‌بيلر: "بو ايلين اوليندن (هشدات دوكقوزون اوليندن) ايداره امور عمراني‌ بو پوروژه‌لري ايجرا ائله‌يير...  "!
يا ايسته‌ديم دئيه‌م هئچ من ايله سن‌ده، باكي‌ و آنكارا دا بؤيومه‌ميشيك و بيزه‌ده اوخوللاردا اؤيره‌تمه‌ميشلر!
آنجاق "قيريدئر(Google Reader)" ده گؤردوم بير نفر "e s" آدي ايله، منيم منظورومو باشقا جوره دئييب. اونون دئييشينده توركلر ايسته‌ر ايسته‌مز، ميكروفون قاباغيندا رسمي‌له‌شمك دوروموندا قاليرلار و بئله زامان‌لار فارسجا اوسلوبلو دانيشماق يا فارسجا دانيشماق زوروندا قاليرلار؛ او بو يورومو منيم يازيمين آلتيندا قويوب:

بو بیر مرض‌دیر اینانین. یانی منجه اینسانین پسیکولوژی‌سی و آلت‌ بیلینجی ایله باغلی بیر شئی اولابیله‌ر. کامئرانین یا دا میکروفونون قاباغینا کئچه‌رک سانکی رسمی‌له‌شیرلر. بیر سئری سلیم موذن‌زاده‌نی گتیرمیشدیلر اورمونو اوستانی کانالینا. آپاریجی بوندان بیر تورکجه سورو سوروشدو. اؤزوزو تانیتدیریرسیز دئیه مثلا بیر شئی. قاییتدی ایلک اؤنجه بیرآز کیرلی تورکجه ایله جاواب وئردی. سونرا اؤزو ده بیلمزجه‌سینه سیزدی فارسجایا. آغلامالی اولسا دا من او گون قیریلدیم گولمک‌دن.

6 comments:

سلطانی said...

چوخ تأسفله دوغرودور!

نئجه کی بیلیرسیز بیز آذربایجانلی لارین چوخو، آنا دیلیمیزی اویرنمه ماق اوچون، اونو دوزگون شکیلده دانیشماقا قادر دئییریق و دولت ایشچی لرینین ده کی بیر بویوک قسمی نی ساوادسیزلار و باشقا بیر سئچه نک لرین یوزوندن سئچیلمیشلر تشکیل وئریرلر، بونلارا سبب اولورلار.

آللاه بیلیر کی بو دیلیمیزی اویره نمه ماق و بیر بیریمیز له ائوده، ایشده، بازاردا و ... دانیشماقلاریمیزا بیر اؤرنک اولماماق، نه قدر بیزلرین آراسیندا اولان سورونلارین نه ده نی دیر.

(منده اؤز آنا دیلیمی چوخ یاخشی بیلمیرم. آمما اونو بیر چوخ یانلیشینان یازماغی، فارسجا یازماغا ترجیح ائدیرم!)

یوسوف said...

سلام آیدین بگ

یاشاسین آیدین بگ
سیزی سئویرممممممممم داااا

منیم آنام دا دیر "فارسی قیریلدادیردیلار"

وارام دا: و بئله اولور آدام تيلويزيونون انگين باسير و گلير گيرير اينتئرنئته


صبر ائله گولوم قیش بیته جکدیر.

mehdi said...

آی دئدین!
دوغوردان دا آدامين قوسماغي گلير بلکه ده آ دامین ...ماغی گلیر.
بیرگون شهرمیزین مجلیسده کی نوماینده لری اؤیرنجی لرینن جلسه توتموشدولار.
گئتدیم تریبون دالینا دئدیم فارسی دانیشساز بو تورکودن یاخجی دی.
او گونلرده شهریمیزین ایکی نوماینده سیندن بیری ساغیدی بیری سول.
سولون کی ایندیجه ایپین ائشیبلر
اوبیری آغزین آچدی ...
دردلریمیزی دئشدین جلال جان

آزدئییم said...

سالام
اصلینده ایلک‌ده قراریم بئله‌یدی. انجاق ایشین چوخ اوزاندیغینی نظرده توتدوق‌دا بیرآز چتین له‌شیر سؤیله‌دییینیز ایش.
هر حال‌دا ساغ‌اولون تؤوصیه‌نیز اوچون.

Unknown said...

مئهدي‌به‌ي: بو جريان‌دا ساغ-سول يوخوموز! منجه احمدي‌نيژاد ميرحوسئن‌دن ياخشي توركجه دانيشير!

و سايين سلطاني يولداش! سيز ايله راضي‌يام. ايران‌دا هئچ تورك اوز آناديليني بيليمسل اؤيره‌نمه‌ييب. و البته سيز من‌دن و چوخلاريندان ياخشي توركجه يازيرسينيز. هامي‌ميز چاليشيب داها آرتيق اؤيره‌نمه‌لي‌ييك. دؤولت كي بير ايش گؤرمور.

و يوسوف به‌يه ده دئييم كي اولمايا بيزيم آناديليميز بيردير!؟ ياشاسين يوسوف. من سنين كيچيگينم

مهدی said...

سلام
خوشوم گلیر سوز بیریک
من ده دئدیم کی ساغ سول نوماینده لریمیز ایکیسی ده آفتافانی گوتورموشدولر ....

هرحالدا
بونو دا گؤر:
http://shbesf.persianblog.ir/post/69/
هایانا گئتسن تورک تاپیلار

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı