ياشيل بي‌بي آناديلي گونونو آنير

تيراختور اويونونا باخيرديم. ياشاسين آزربايجان، يئل ياتار توفان ياتار، توركلرين افتخاري و ... كيمي سسلر، ساعي‌نين سسي‌نين آرخاسیندان افكت اولوردو. چوخ لذتلي‌ايدي. بیر ایکی ایل اولوب ديلخوشلوغوموز!

تیراختور دال با دال قول وورماغین باشلایاندا، يولداشلار دئديلر بي بي سـبز (ياشيل بي‌بي)، همن آناديلي حاق‌دا اولان پرگار آدلي وئرليشيني گؤسته‌رير.  ائشيتميشديم كي او وئرليشد‌ه خورسند كيمي بير ده‌به‌ك توركلره آغيل قويوب دئييرميش توركلر اؤز دؤزوملري‌ني چوخالتمالي‌ديرلار و بيز اونلارا جؤك دئمه‌يه حاقلي‌ييق! قورخوردوم یاواش یاواش حقوق بشره آجیقلانا دئیه بو تورکلره نه‌یه جوک دئمه‌یین عاقیبتی خوش دئییل؟!! بیر-ایکی بئش ثانيه باخديم گؤره‌م نه خبردير. مني بير شئي شاشيرتدي! اونلارين ايچينده بيري‌سي بريتانيالي ايدي! آما اؤز لهجه‌سي ايله سينيق سالخاق فارسجا دانيشيردي. او دا توركلره دئييردي تحملونوزو چوخالدين!

البته من دئميرم او وئرليشي بوتونلوكله اينگليس ايشي‌دير؛ چونكو اوراني دولانديرماق‌دا شوونيستلرين ائتكي‌سي چوخ‌دور. دئمك اولار بريتانيا و شوونيستلر ياري-ياري پايلي‌ديرلار. شوونيستلرين آناديلي گونونده بير فارسجا دانيشان اينگليسلي‌ني تيلويزيونا گتيرمه‌يين توركلره بو ساوي واردير:

فارسجانين اولوسلار آراسي اؤنمي او قدر چوخاليب كي بير اينگيليس‌ ديللي فارسجا اؤيره‌نيب دانيشير؛ ايندي بللي دئييل توركلر نه‌يه اؤز آناديللريندن ال چكمه‌ييرلر؟!

Kimliksizlik Yetənəyi

Güney Azərbaycanın hər bir bucağında, biliyurd masalarından tutun istadion oturacaqlarınacaq, Dünyalıq Anadilini Günü qutlayanılan anlarda, internetdə bir şaşırdıcı video gördüm. Məni, və ola bilər, başqa Azərbaycanlı Türkləri şaşırdan işlər təkcə Arif Ğəfurunun doğallıqdan üstün etdiklər və şö`bədələri dəyildir. Bizim yetənəkli Urmulu dildaşımız Türkiyə Türkcəsini çox yaxşı qonuşduqca, Anası ilə Telefon bağlantısında Anadili, yani Azərbaycan Türkcəsində danışmayıb, və başqa Azərbaycanlıların Farsca danışanda bəlli olan bir ərkək ləhcə ilə, Farsca qonuşdu!! Facebookda buna görə çoxlu analizlər və yorumlar yazılır. Ancaq məncə, Arifin nəyə öz anadilində danışmayıb için belə ehtimallar vardır:

- O öz kimliyini itirməsədə, İran sözü ortaya gələndə əl-ayaq itib, və kameralar qarşısında Farsca danışmaq zorunda qalmaq acı bir gərçək sayılır.

- Show TVnin "Yetenek Sizsiniz" verlişindəki aparıcılar da ARİF yox, bəlki AREFdən, onun Anadilində qonuşmamasının nədənini soruşmadılar. Ola bilər onlar da bilirlər Anadili unudub başqa dildə danışmaq hətta Türk bir ölkədə isə üstün bir yetənək sayılır! Əlbəttə belə açıqlamaq da olar: Arif öz anadilini Fars dilli tanıtdırmaq ilə, istəyib özünü daha yetənəkli bilindirib, yoxsa bir Azərbaycan Türkünün Türkiyə Türkcəsində danışmaq elə də çətin iş dəyil.

- Yuxarıdakı sözlər yanlış yoxsa şuxluq olsalar, Arifin işinin nədəni nə olabilər? Azərbaycan Türkcəsində danışmaq Türkiyə də, Əfqanistan Farscasının İran Farslarına gülünc olduğu kimi, utandırıcı olursa, biz gərək öz fatihəmizi oxuyaq! Əlbəttə biz bir sıra gərçəklərə göz yummamalıyıq; yoxsa bu arada çox şeyləri əldən verəcəyik. Biz də öz dilimizi, Türkiyənin etdiyi kimi, yeni nəsilləriçin bir az incələyib incəltməliyik.

كرار جاسيمين قاباغيندا كي دراكولالار

كئچن هفته ميلان و تاتئنهام ياريشيندا بير عجيبه غريبه اولاي باش وئردي. "جئنارو گتوسو"(Gennaro Gattuso) چيلغينلار (دلي‌لر) كيمي بيردن گؤتورولدو، تاتئنهامين موررببي‌لريني بيري‌سي، "جو جوردن" ( Joe Jordan) ين اوستونه! گتوسو اؤز ياشيندان ايكي قات بؤيوك اولان جوردنه بير شاپالاق گئيديردي و سونرا دا اؤكوز كيمي بير كله ووردو! دوز زئيدان كيمي! البته زيئدان ماتاراتزي كيمي بير لات و شولوق اويونچويا كله ووردو. بورادا گتوسونون ايشي چوخ چوخ پيس نظره گلير. دئيلير يوفا بو ايش ايچين گتوسونو آغير جزالانديرسين.

و البته ايندي بيري‌سي‌ني تاپماق اولماز گتوسونون ايشي‌ندن دفاع ائله‌سين. اونون ايشي‌ني هامي محكوم ائدير. آنجاق ايرلند سايتلاري‌نين بيري‌سينده ماراقلي و طنز بير يازي* اوخودوم. ايرلندلي يازار، گتوسونون چيلغين‌ليغي‌‌ني باتي‌لي‌لارين(غربلي‌لرين) ايناملارينا گؤره، آي بوتوو اولاندا(بدر) كي مجنون و دلي اولماق‌ ايله، موقاييسه ائديب.

اونون سؤزلرينه گؤره، گتوسو بير گنج(جاوان) آدام‌دير و بير حساس اويوندا، اويونچو دا آرتيق هيجانلانيب، دلي اولابيلر! آنجاق بير جاواني تحريك ائتمك، بير آلتميش ياشلي و تجروبه‌لي آدام‌ طرفيندن آغيل‌دان اوزاق دير. البته اونلارين ناغيليندا، آي بوتووله‌شنده دراكولانين(قان ايچه‌ن موجود) روحو گيرير آداملارين ايچينه! بورادا دا "جو جوردن"، دراكولاني يادا سالير! يازار دئيير "جو جوردن" ايتاليا ديلي‌ني بيلير و اونون چيلغين گتوسويا ايتاليا ديلينده بير سؤز دئمه‌يي هئچ‌ده واجيب دئييلميش.

* * *

ايندي آوروپا فوتبولونو اؤتوروب، گه‌له‌ك ايران فوتبولون‌دا آيين بوتوله‌شمه‌سيندن دانيشاق.

تيراختوروموز سوپئرليگي آلت اوست ائدن‌دن سونرا، سانكي ايرقچيلار(نژادپرست‌لر)دا ايسته‌ييرلر دراكولا اويونو چيخارتسينلار! البته دراكولالار بوندان اؤنجه، تيراختور يانداشلاريني جزالانديرماق ايچين اللريندن گلني گؤروردولر، آنجاق تيراختورون يانداشلاري او قدر چوخ ايديلر كي دراكولالاري آياق آلتيندا قويدولار. دراكولالار دا سونرا گئتديلر تاكتيكلريني ده‌ييشديلر! ايندي گليب ياپيشيبلار تيراختورون ائتكي‌لي اولدوزو "كرار جاسيمـ"ـين ياخاسيندان. اؤتورمورلر ده! كرارين اويناماغي تيمين نتيجه‌ آلماغيندا اولدوقجا خئيرلي‌دير و كيمسه دانا بيلمز. آنجاق اونون اويونلاردا اولماغي هر دن ترسينه سونوجلانير، و البته بونون نه‌دني(دليلي) واردير.

كرارين، پيروزي – تيراختور ياريشينداكي اولاي‌لارا(اتفاق‌لارا) گؤره محروم اولماغيندان قاباق، كمالوند دئميشدي كي حريف اويونچولاري اونا عربجه يامانلار وئريب، عصبلشديريرلر. و بونا گؤره اؤز اعتراضي‌ني بيلديرميشدي. آنجاق تيلويزيونون دوخسان(نود) وئرليشي بو قونويا توخونمادان، كرار جاسيمي يوز ده يوز محكوم بيليب، آراجيلارين يانليشليقلاري(اشتباهات داوري)نين اوستونو اؤرتوردو. هر حال‌دا كرار آلتي جلسه‌ليك محروميتين ايكي جلسه‌سي باغيشلاناندان سونرا، بوشئهر شاهيني قارشي‌سيندا توفان قوپارديب هامي‌ني سئوينديردي.

او باغيشلاناندان سونرا دئميشدي بوندان سونرا تيراختورون لاپ ادب‌لي و باشي آشاغي اويونچوسو اولاجايام. بيز بونا گؤره چوخ سئوينديك. آما بونا ديققت ائتمه‌ديك كي تكجه "كرار جاسيم"ين اؤزونو كونترول ائتمه‌يه تصميم توتماسي يئته‌رلي‌ دئييل، و "آي هيلالي‌نين كاميل" اولماغي‌نين قارشي‌سي‌‌ني‌دا آلمالي‌ييق. بو آرادا تكجه كرار جاسيم جزالانيب، و اونا ايهانت ائدنلر و يانليش توته‌ك چالان قاضيلار، ايسته‌مه‌ييرلر اؤز ايشلرينده تجديد نظر ائتسينلر كي هئچ، ايسته‌ييرلر بير داها آيين هيلالي‌ني بوتؤولشديرسينلر. تيراختور سوروملولاري(مسؤوللاري)نين اشتباهلاري بوردايدي كي كرارا كسيلميش جزايا اعتراض ائتمه‌ديلر، و دئمه‌ديلر كي او ايش باشارمايان و تحريك ائدن داورلره، نه‌دن جزا يازماييرسينيز؟

تيراختور - شاهين ياريشيندا دا، كرار جاسيمين اوستونه، چوخلو خطالار اولدو؛ آنجاق يانداشلارين آلقيشلاماغي و اويونون تبريز ده اولماغي‌ايچين، بوشئهرلي اويونچولارين آيين بوتون هيلالي‌ني اونا گؤسته‌رمكلري ائتكي‌سيز(غير مؤثر) اولدو. آنجاق دونن ربيع الاول آيي‌نين اون دؤردونجو گونو ايدي!! انزلي باتلاغي‌نين قيراغيندا دا ميغ‌ميغ چوخ اولسادا، قيش اولماغا گؤره، انزلي‌لي‌لر ميغ‌ميغ ايشي‌ني گؤرمه‌لي ايديلر. ميغ‌ميغلارا گيلكلرين اؤزلري "دراكولا" دئيه‌رلر سانكي! تيراختور-ملوان اويونوندا، ملوان يانداشلاري‌نين يئر-گؤيه ائتديگي اهانتلري، سانكي آي هيلالي‌ني، كرار جاسيم ايچين بوتوولشديريردي. نجف شيعه‌سي اولان كرارا، شيعه دوشماني اولان صدام حوسئين لقبي وئريرديلر! بيردن گؤردوك كراري زور ايله آپاريرلار ائشيگه. كرار آراجي‌ و ملوان يانداشلارينا ال چاليب، بير ساري كارت دا آلدي. تيراختور يانداشلاري‌دا كراري مئيداندان ائشيگه چيخاندا گئنه‌ده آلقيشلاديلار.

ياريشدان سونرا خبرلر آراسيندا گؤروروك، گئنه‌ده كرار جاسيمه سالديريليب. دئييرلر اونون باغيشلانماغي‌ يئرسيز ايميش؛ چونكو او ادب اولان دئييل! ائله‌ بيليرلر ياخشي بهانه تاپيبلار. اونلار بيليرلر كي تيراختور دوققوز اويوندان سونرا تكجه بو اويون‌دا اودوزوب، و تيراختورون قهرمانليغا، و هم‌ده آسيايا گئتمه‌يه اومودو چوخ‌دور. اونلار ايسته‌ييرلر، تيراختور يانداشلاري‌دا، كرار جاسيم كيمي اولدوزو، باشلارينا بلا بير اويونچو بيليب، و اونون خئيريندن واز كئچسينلر. آما يانداشلار گؤسته‌ريبلر كي بئله بير توزاقلارا (تله‌لره) دوشه‌ن دئييللر!

قالير تيراختور سوروملولاري. مسؤوللار بو دؤنه(دفعه) سانكي دوز ايش گؤرورلر. دئييبلر ملوان يانداشلاري‌نين داورانيشلاري‌نين فيلمي‌ني انضباطي كوميته‌يه وئريب شيكايت ائده‌جكلر. باشقا طرف‌دن، كمالوندين، كرار جاسيمين باغيشلانماسينا اعتراض ائدن فئردوسي‌پوردان اله‌شديرمه‌يي(انتقادي)، ائله‌ ده اودوزماق سورونو گيزلتمك ايچين دئييلدي. منجه او دوخسان(90) دراكولاسينا دا كسينتي‌لي(قاطع) بير اولتيماتوم وئرمه‌لي ايدي. و بو اويغون ايشي ده گؤردو. البته بو ايشي بير آز سياست ايله گؤروب و اودوزماغي بو قونويا ارتباط وئرمه‌سه ايدي لاپ ياخشي اولاردي. بو دؤنه كي اعتراضلارلا، كرار جاسيم و باشقا اويونچولاريميزي، بوتون دراكولالارين اليندن قورويا بيليب، و لازيم دا اولماز اونلاري آيين قارانليق اوزونده گيزله‌دك!

تيراختورون قهرمانليغي، و آسيايا گئتمك اومودو ايله

آيدين كسائي

سـكسن دوققوزونجو ايل، قيش اورتاسي‌‌نين اوتوزو
Traxtorchi.ir

* - Living on dark side of the moon , Billy Keane, Irish Independent
http://www.independent.ie/sport/soccer/living-on-dark-side-of-the-moon-2547420.html

گون گؤروتلری: اودان اودوزانلار و اودوزان اودانلار

آنادیلی گونو ایله اوست اوسته گلن، یوخسا اونون یاخینلیغینا دوشن اویونلار، تیراختور اوچون ائله ده باشاریلی اولماییر!
کئچن ایل‌ده کرج‌ده کی اویون‌دا، خاطیره‌لی بیر گونده، توفان قوپدی و تیراختور اوتوزدو، آما بونا سئوینیردیک کی آنادیلی اولدوقجا یئترلی قوتلاندی. بو ایل‌ده انزلی ده ملوان یانداشلاریندان دوخسان دقیقه یامان ائشیتدیک! البته جاوابلاریندا ائله او آن آلیردیلار! سونوج چوخ یاخشی اولمادی آنجاق اشاغی‌دا کی سئچیلمیش گؤروتلری گؤرمک ایله بیلرسینیز کی انزلی‌نین سویوق و یاش ایستادیوموندا آزربایجانلی‌لارین بوتون بؤلگه‌لری گئنه ده تایسیز دایانیشما(انسجام)لارینی گؤستردیلر؛ دئیه‌سن بو ایلین آنادیلی گونو، انزلی‌دن باشلانیب و بیر یئددیجه(هفته) دن سونرا تبریز‌ده سونا چاتاجاق:

album link

گؤرونتولر آلبومو بوردا دیر: باغلانتی .
قالانی‌نی یارین آپلود ائده‌جه‌یم.


بو اون ایکی ساعاتلیق یول گئدیب گلمک‌ده، چئشیدلی سوروجولر و یولجولارلا یول بیرلیک ائتدیم. ماراقلی ایدی گئدن باش انزلی‌لی سوروجو، گؤردوم قزوینین آغابابا کندینده رئستورانچی‌لارلا تورکجه دانیشیردی! انزلی‌ده ایسه تئرمینالدان منی ایستادیوما آپاران سوروجو تورک ایدی! دئییردی ایکی اوچ آی‌دیر ات آلا بیلمیرم!
قاییدان باش تورک-گیلک کؤکنلی سوروجوده باشلامیشدی انزلی‌لی‌لرین دالیسیجا دئییردی. من‌ده یولون سونوندا دئدیم هن بوگون بیزه ده به‌تر یامانلار دئدیلر!

یازیق لئخلر

بیر تیکه کاغاذ دسمال‌دان زاتدان حاضیرلایین. چونکو بو یازیلاری اوخویاندا گؤزلرینیز دولوب سیزیلدایاجاقسینیز:

"تورک تانیماق اؤیرتیمی قونوسوندا، تورکیه دؤولتی، تورکیه‌لی اوستادلاردان بو بیلی‌یوردا یوللاییر. تورکیه‌ بیلی‌یوردو و دؤولتی‌ بیرله‌شیک پایلاشمادا بو اوستادلارین حقوقونو یئتیریرلر. آنجاق ایران(سیز اوخویون فارس) تانیماق اوستادلارینین دایاقلاری یوخدور و اؤز(!) هزینه‌لری‌ایله لئخ‌یوردونا(لهستان) گئتمیشلر. بیزیم حقوقوموزو دا بیلی‌یورد تک باشینا وئریر. بیز کیتاب و قایناق چاتدیرماغیندا، نئچه یول اسلامی تبلیغاتی قورومو و اسلامی کولتور و ارشادی باخانلیغی‌یا باغلی قوروملار ایله موکاتیبه ائتمیشیک، آنجاق هئچ یانیت(جاواب) آلمامیشیق.
نئچه ایل بوندان قاباغاجاق ایران تانیما اؤیرنجیلری راحاتلیقلا ایرانین دؤولتی‌نین وئردیگی بورسلارلا، بیر ایللیک ویزا آلیب ایرانی گؤرمک ایله، دیللرینی(فارسجالارینی) گوجلندیریردیلر. بو بورس آلقیشلاماق ایچین، و ایران تانیماق اؤیرنجیلرینه، اوسته‌لیک بیر امتیاز ایدی. بو نئچه ایل‌ده بوتون اؤیرنجیلره وئریلن بو بورس کسیلیب، و یاقلونی و ورشو بیلی‌یوردلارینا ایسه ایلده تکجه دؤرد دنه قیسا موددتلی بورس وئریلیر. اومودوم وار، بو بورسلار احیا اولمورلارسا، دؤولت ان آزی ایران تانیماق اؤیرنجیلره ویزا وئرمک قونوسونداکی امکداشلیغین چوخاتسین؛ چونکو اؤیرنجیلریمیزییزن بیر چتینلیگی ده اوزون موددتلی ایراندا قالماق ویزاسی الده ائدیب، دیللرینی تقویت ائتمک‌دیر. آز سایی‌یا وئریلن قیسسا موددتلی بورسلار دا، اصلا اؤیرنجی‌نین احتیاجینین جاوابی دئییل. ایران‌دا یاییلمیش یئنی کیتابلاردا الیمیزه یئتیشمیر. اؤیرنجیلریم اوزون بیر کیتاب لیستی منه وئریبلر، ایراندان قاییداندا اونلار آپارام.
(قایناق: آیدین فیرنگی‌نین بولاغی: "زبان‌آموزی تدریس ادبیات نیست/ گفت‌وگویی با ثریا موسوی، مدرس زبان فارسی در دانشگاه یاگلونی لهستان" / سون پاراگرافین تورکجه‌سی)

ایندی ایسلانمیشین کاغاذی آتین آشقال قابینا، باشقا بیر کیلینئکس قوپاردین؛ چونکو آشاغی‌دا کی خبری اوخوسانیز، بیر داها آغلایاجاقسینیز؛ آخی اینصاف‌دیر لئخ‌لر  100 قات آرتیق مظلوم اولسونلار:
مهر خبر یایما آگئنتی: "ایران 400 هیندوستانلی فارس دیلی اؤیرنجی‌سینه بورس وئریر"!
(خبرگزاری مهر: ایران به 400 دانشجوی هندی زبان فارسی بورسیه می‌دهد )

* * *

بو اوزوجو اوخشامانین سونون‌دا، سیز اوخوجولارا دا دئییم بئش - اون گوندن سونرا کی آنادیلی گونوندن دانیشمایین!
بو ایل عاییب‌دیر، لئخلرین چتین‌لیکلرینی گؤروب اؤز فیکریمیزده اولاق! بیز اومانیست آزربایجانلیلار(داش فاپی‌نین اصطلاحی‌ ایله) بوتون دونیانین دؤرد بوجاغینداکی اؤزگه‌لرین عدالت ایله فارسجا اؤیرندیکلریندن سونرا، گؤرک نه وار نه یوخ؛ سونرا بیر کول ساووراریق باشیمیزا!

بلديه‌نين شاختاداكي يارديمي

- تيراختور و پاس ياريشينا چوخ كؤنلوم وار ايدي ايلك دؤنه همدانا گئدم! آنجاق بوتون هاوا اؤن‌گؤرو(پيش‌بيني)لره گؤره، موسابيقه گئجه‌سي قار ياغيب و سونرا كي شاختاسي‌نين دده يانديرماغي دا بللي ايدي. بير ياندان‌دا كمالوند دئميشدي احتمالي وار ياريش لغو اولا. بو احتماللاري بير-بيرينه ضرب ائدنده گؤروردون گئتمه‌يين فايداسي يوخدور! منده قالديم و البته شانس گتيرديك تيراختور قوناق ائوينده بير امتياز قازاندي. البته  تيراختور همدان‌دا گرك قوناق اولمايا؛ اكسيكليك بيزلردن دير! هر زامان شاختاني ديزه چؤكدورسوك، همدان‌دا ايسه تيراختور ائو صاحيبليگي ائده‌بيلر.خبرلره گؤره تيراختورو 40 - 50 نفر و پاسي 200 نفر آلقيشلاييرميش.

- هر بير تيراختورون اوشاق يانداشيندان دا سوروشسانيز، ياخشي آچيقلايار كي بلديه‌نين(شهرداري‌نين) كيرمان ميسي‌ني اوتماق، تيراختورون ميسي اوتماق دئمك‌دير(بلديه، تكجه ميسي يوخ، باشقا تيملري‌ده اوتمالي‌دير). و بئله بير نه‌ده‌نه گؤره، سهند ايستاديومونا تيراختورچولار ايله دولماق بكله‌نيردي. آنجاق تبريزين شاختاسي(تبريز آغيزي ايله شه‌خده!) سانكي همدان شاختاسيندان‌ دا پيس كسيرميش، و تكجه 2000 نفر ايستاديوما گئديبلر.
البته خبرلره گؤره، اويون باشلانا قدر مئيدان‌دا قار وار ايميش و ياريم ساعات چكيب قارلاري كوروسونلر. تاماشاچي اوتوراجاقلاريندا دا دونموش قار وار ايميش، و تاماشاچيلار قار-بوز ايچينده گليب ايسته‌ييرميشلر آلقيشلاماقلا اؤزلريني قيزيشديرسينلار. آنجاق بلديه‌نين برازيللي ائدواردوسو تئزليكله بير قول ووروب بلديه‌ني قاباغا سالماغي، يقينكي تاماشاچيلارين آرتيق اوشومكلرينين قاباغيني آليب.‌

- بلديه ايكينجي ياري‌دا بير قول يئييب، آنجاق تبريزلي گنج "رسول عليزاده" ايكي دقيقه‌‌دن چوخ قويماييب گئچه و بلديه‌نين اوتماق ظفر قولونو ووروب. بو اوتماقلا هم بلديه دؤرد سيرا گئتدي يوخاري و هم ميس تيراختوردان دالا دوشدو. رسول عليزاده‌نين قولونون اؤنمي بوردادير.

- بو بير قول و بلديه‌نين اوتماغي،  ايستاديوملاردان قاچقين دوشه‌ن بلديه‌چي‌لرين بير داها قاييتماغينا بير نه‌دن اولوب، باعيث اولاجاق اونلار هم اؤز جدول‌ده‌كي دوروملاري‌ني دوزه‌تسينلر و هم‌ده تيراختورو آسيايا گئتمك يولوندا يارديم ائتسينلر.
رسول عليزاده‌نين قولونون اؤنمي چوخدور؛ آنجاق بير سايي سانكي چوخدان ايميش تكجه بو قولو گودورموشلر.  تيراختور 4 دنه آرديجيل اوتماغيندان سونراكي همدان‌داكي موساوي ائتمه‌يي‌ني بؤيوك فاجيعه گؤسته‌ريب، و بير-ايكي ساعات ايچينده "تحليلي(!)" مقاله يازيب دئييبلر: "گؤردونوز بلديه‌نين بومي(يئرلي) اويونچولاري نه كئيفيته صاحيب ايميشلر؛ حالبوكي غئير بومي ترشيز و اكرامي هئچ سانتر باشارميرلار؟"!
البته لازيم دئييل بيري‌سي اونلارا  دئسين آخي ائله بو اكرامي اؤزو توركدور كي!! بلكه بونون دئمه‌يي لازيم دير سيز كي ايستاديومدا دويغو و هه‌يه‌جانلا آلقيشلاميرسينيز؟ سيز يازماق حاليندا احساسات ايله دانيشماغينيز دوز ايش دئييل. آناليز ائدنده، سايي، آمار، سونوجلارين ثباتي، استقامت، آخيم و سوره‌جه(رونده)ده دقت ائدرلر.
تراختور ليگ‌ده ان گوجلو دفاعي واردير، حالبوكي بلديه‌نين ساوونما(دفاع) باخيميندان لاپ چوخ قول يئيه‌ن تيملردن ساييلير و اؤزونو بو ياريم فصل ايسته‌يير دوزه‌تسين. سؤزسوز گه‌له‌جكلري آيدين‌دير؛ بيز ده اونلاري ليگده يوخاري سيرالارا گئتمك ايچين آلقيشلامالي‌ليق آنجاق تيراختورون تجروبه قازانميش اويونچولاري‌ني، بلديه اويونچولاري ايله، قارشي‌ قارشي‌يا قويماق كسينليكله هر ايكي تاخيما ضربه وورابيلر.
انتقاد و اله‌شديرمه همشه اولمالي‌دير، آما ايندي‌كي دورومدا دوز ايش دئييل. يقين كي بلديه و هر هانكي تيملرده پارلايان آزربايجانلي اويونلارين تيراختورا گلمه‌يي هامي‌نين ديله‌يي‌دير، آنجاق بئله ايستكلر گئت-گل و انتقالات زاماني اورتايا قويولمالي‌دير.
بونوندا دئمه‌يي لازيم دئييل كي كرار جاسيم، آندرانيك و كياني كيمي اولدوزلار تيراختورون اولوسلار آراسي آدليم اولماغيندا داها فايدالي‌ديرلار.

خمسه‌دن گؤسته‌ریلن سیمگه‌

پالانلی دده‌-بالانین حوکومتلری‌‌نین ان بؤیوک ووردوغو ضربه، آزربایجان تورکلرینه اولوبدور. اونلارین تورکلرین کولتورونه ائتدیگی سالدیریلاری اوزوجو نتیجه‌سی‌نی، ایندی ده گؤره‌بیلیریک. تورکلرین یوزده دوخسان دوققوزو، آنادیللرینه ساوادسیزدیرلار و نئچه نسیل آسیمیله اولوب، کیملیکسیز و وارلیق‌سیزلیق یوردوندا چیلپاق‌جا دولانیرلار.

دئدیگیمیز حوکومتین قورولوشونون ایلک چاغیندان، قالخیشلار(قیاملار) و دئوریمین(انقلابین) اصلی گوجو، تورکلر اولسایدیلاردا، بوگون انقلابین 32 یاشلیغی‌ تؤرنلرینده، تیلویزیونون اؤزل سئریالیندا، بیر عسگر اؤیره‌تمه‌نی شاه عکسی‌ آلتیندا غلیظ تورک لهجه‌سی آنقیریر و شاها قوللوق ائتمه‌یه افتخار ائدیر‍! ائله بیر نقش اوینایانین آدی دا "علیرضا خمسه‌"‌دیر. "خمسه" سوی آدی، زنگان ماحالی؛ یوخسا قاشقای ائللری ایله ایلگی‌لی اولسا دا، بیر آسیمیله اولونموش آدلیم کومئدینین کؤکونون تورک اولدوغونو دا اونایلایابیلر. "علیرضا خمسه" اؤز وارلیغیندان تکجه بیر قورو آدا صاحیب اولماییب؛ بونو ایسه بیلیب کی نئجه آتا - بابالاری‌نین دیلی‌نی مسخره ائده‌بیلر.

تیلویزیونون ایسته‌ییر شاهلیق زامانینی اله سالسین! آنجاق ایلک باخیش‌دا، تورکلرین کولتورونه توخونماق ایله، پالانلیلارین شوونیستی دوشونجه‌سی‌نی یاشاتماق‌ یولوندا چالشیر...
وورورام باشقا کانالا؛ دربار چؤره‌یی‌‌نی یولچولوق ائدن بیر تاریخ‌چی، انقلاب اولایلاری‌نی آچیقلاییر!

درگی چیخاردان‌دان درگی ساتانا

یئددی سککیز ایل بوندان اؤنجه تئهرانین درگی ساتان کیوسکلاریندا، نوید آذربایجان هفته‌لیگی ده تاپیلاردی. گؤز دولاندیرسایدین بوجاق-موجاق‌دا اونو گؤرردین. بو گونلر نوید آذربایجان‌دان خبر یوخدور. یئرینه "فوتبالیسیت‌ها" درگی‌سی‌نی آختارمتالی‌ییق! دوز دور ایش پئشه‌میز اولوب فوتبال و تیراختور آنا بو دا اولدو آد!؟  دوزون سؤزو آدام اوتانیر دئیه‌ "فوتبالیست‌ها" مجله‌سی وارینیز یوخسا یوخ؟!
گئچه‌ن یئددیجه شهرآرا دا بیر کیوسک گؤردوم پیاده‌رو دا مجلله‌لری دوزوب ایسته‌ییر ساتیملایان درگیلری سئچیب "برگشت" وئره. من‌ده اونون یانیندا دوروب دئدیم به سیز "فوتبالیستها" درگی‌‌سی نه‌یه ساتمسینیز آخی؟! بو قدر فارسجا درگی‌نین آراسینا آذربایجان حاقیندا اولان درگی‌ده قویوندا! ماشاللا بوتون روزنامه ساتانلارین هامیسی تورک! بیر دن گؤتورولدو گئتدی دخیلین آلتیندا بورمه‌له‌نمیش اوچ جیلد گتیردی. دئدیم قویون گؤز قاباغینا آلینسین‌دا! دئدی یاخشی بو ایشی گؤره‌ریک!

دونن گئنه او کیوسکون قاباغیندان گئچه‌نده گئتدیم گؤره‌م فوتبالیکستها گلیب یا یوخ(اون بئش ایل بوندان قاباق، کونکور وئرن زامان ، اردبیل‌ده بیر کیتاب ساتیشی توکانیندا دورموشدم. بیر اوشاق گلدی سوروشدو فوتبالیستها عکس‌برگردانی وارینیز؟ کیتاب ساتان‌دا دئدی هن، "فوتبالیکستـ"ـها واریمیز)!
گئنه گؤردوم گونده‌لیکلر آراسیندا فوتبالیستها یوخدور. گئچن هفته‌کی کیشی‌نین یئرینه، بیر جاوان اوتوموشدو. ساققیز و سیگار دوزوردو!
دئدیم: "فوتبالیستها گلیب یا یوخ؟".
باشینی سوخدو میزین آلتینا، بیر آز قورتدالاندی. سونرا دئدی: "آخشام باشی بیر باش وور، بیلمیرم هارا قویموشام".
دئدیم: "بابا قویون گؤز قاباغینا میللت آلسین!".
دئدی: "یاخشی".
اوزاقلاشاندا گوردوم بیر سؤز دئدی ائشیتمه‌دیم. قاییتدیم دئدیم: "بیلمه‌دیم نه دئدین؟".
دئدی: "مجلله سیزین‌کی دیر؟".
دئدیم: "یوخ!".
باغیشلایین بورانی‌دا یازیرام؛ دئدی: "ساتیلیر ساتیلسین ساتیلمیر ساتیلماسین، ...ــیما کی! برگشت وئریریک گئدیر. سن‌ده ساتیلماعیندان نیاران اولما همشهری!".
من‌ده دئدیم: "بابا بو مجله تیراختورا گؤره‌دیر. تورکلرین تیملرینه گؤره یازیلیر! نه ...ـیما کی دئییرسن!"؟
دئدی: "سن آللاه؟؟؟! تیراختورا گؤره اولسا حتمن ساتارام!".
سونرا سوروشدو: "تبریزلی‌سن؟!".
من‌ده دئدیم: "هن، ائله بیل تبریزلی‌یم!".