سانکی، هئچ ایش گؤرمه‫میشلر!

عسگرلیک دؤنمینده، دان چاغلاری فورصت اولسایدی چؤرک دن، یومورتادان، پنیر دن و اولماسایدی بیسکوییت و یا بیسگوئت(!) آلیب یئیه ردیک! یوخسا گون اورتا و یا گئجه یه قدر، آجلیغی دؤزمه‫لی‫ایدیک! او گونو اونودمامیشام کی ایسته دیم کیلاس قویام و یا دا بیلمیرم مرام گؤسترمک ایچین، عسگرلیگین یوخسوللوغونا باخمایاراق کالباس، شور خیار، دئلئستئر(ایسلامی آرپاسویو!) و باگئت چؤرگی آلدیم؛ آنجاق سوس آلماغی اونوتدوم. تئهرانلی اوتاقداش و بیر کورد کؤکنلی اونباشی ایله اونلاری یئمه‫یه باشلادیق. تئهرانلی یولداش تئز-تئز دئییردی: "اللر وار کیشی! مایا قویموسان و ..." آنجاق اونباشی به‫ی، دئدی: بو قدر زحمت چکیب سن و بونلاری آلیبسان؛ آنجاق سانکی هئچ ایش گؤرمه‫میشسن! بو کالباسلار بوغازدان آشاغی گئتمیر کی! "مایونئز سوس" آلماماغین هر نه‫یی آپاریب سورغو آلتینا! و اوزو سوسوز گه‫ده های دئدی!... و من ده الیمی داغلادیم کی اوندان بویانا بیر ده مرام گؤستر‫مه‫یم و بو ایشلردن ایسه گؤرسه‫مسه، او اوزلو یوزباشی‫نی بیرلیکده صوبحانه یئمه‫یه چاغیرمایام.

***

ایکی اوچ یئدیجه(هفته) بوندان اؤنجه یولوم اینقیلاب مئیدانینا دوشموشدو و اولمازدی کی "اندیشه نو" یایین ائوی نه گئدیب و یئنی یاییلمیش تورکجه درگیلر و کیتابلاردان آلمایام. بو ایل اصلا اورایا گئتمه‫میشدیم. البته اورا هر زامان شولوق اولور و فضانین آز اولماغینا گؤره، اورادا چوخ قالیب و چوخلو کیتابلارا باخماق اولمور و تئز گرک فرزانه به‫یین تانیتدیردیغی کیتابلاری و درگیلری به‫یه‫نیب آلاسان! چوخ آداملار دا واردیلار اورانی پاتوق کیمی بیر یئر سانیرلار و اورا تک بیر توکان دیر کی بو سؤز یازیلمامیشدیر: "یئرسیز دایانماق، کاسیبلیغین مانئعی دیر(توقف بیجا مانع کسب است)"! البته اولابیلر بو یازی اورادا وار و من گؤرمه‫میشم؛ کسینلیک ایله دئیه‫بیلمه‫رم. خولاصه دئییم کی کولتورل ایشلر تکجه کسب و پول چیخارتماق ایچین دئییل کی؛ بئله دئییل می؟!
یئنی یاییلان کیتابلاردان بونلاری آلدیم:
رامین جهانگیرزاده نین اوشاقلار ایچین اولدوز شئعر توپلوسو، کی یانیندا بیر CD ده وار ایدی و شئعرلر دیکلمه الونموشدولار. بونو قارداشیم قیزی سئودا یا آلدیم! کمال موردای نین گؤزل تورکجه آدلاری کیتابی، خودافرین درگی سی، حسن راشیدی نین یازدیغی "تورکلر و ایران دا اونلارین تاریخ، دیل و وارلیغی حاقدا تدقیقات"(ترکان و بررسی تاریخ، زبان و هویت آنها در ایران) کیتابی نی، موللا محمد باقیر خالخالی نین ثعلبیه دیوانینی و وارلیق درگی‫سینین 143ونجو سایی‫سینی دا آلدیم. گلنده گؤردوم سـکسـن آلتینجی ایلینین ایل سایارلاری دا واردیلار و چوخ دا گؤزل طراحی اولونموشدولار. دوزدور کی یئنی ایلدن اوچ آی گئچیردی؛ اونلاردان ایکی اوچ جیلد آلدیم کی تانیشلارا وئرم؛ بو تانیشلار دا چوخ دا من وسیز کیمی تورکچو دئییللر.
اولابیلر دئیه‫سینیز سؤزلرینین باش-اته‫کلرینین ایلیشگیلری نه ایدی؟! واللا دوغروسونو ایسته‫سه‫نیز، ایسته میرم او یوزباشی کیمی بو ایل سایارلاری طراحی ائدنلره یورولمایین دئمه‫یه‫م. اؤزللیک ایله، زنگان دا کی بابک یوردی شیرکتی کسینلیک ایله چوخ ده‫یه‫رلی بیر ایش گؤروب و زنگانین اؤزل تورک ایل سایارینا مالی یاردیم یئتیرنلرین بیری سی اولوب و اینصافسیزلیق دیر اونلارین اؤنملی ایشلرینی سورغو آلتینا آپاراسان! ولی بیلیرسینیز نه وار نه یوخ؟! ائوه یئتیشندن سونرا گؤردوم اون دان آرتیق یایین ائوینین ایشتیراکی ایله چاپ اولونان ایل سایارین ایلک و یاز یارپاغیندا، ایکینجی آیا "قیزاران آی" و اوچونجو آیا "گولن آی" آدی یازیلمیشدیر و یئرلری ده‫ییشیک دوشوبدور! زنگانین ایل سایاریندا دا، یایین ایلک آییندا قیشین سون آیینا قدر بوتون یارپاقلار دال-قاباق و ترسینه وورولموشلار!! من ده گئجه یاری‫سینا قدر اوتوروب و اونلاری بیر جوره دوزدوم ولی ترسینه دوزولمه‫لری دوزه‫لمه‫لی ایدی و دا-قاباق اولماقلارینا چاره قیلابیلمه دیم!
واللا، من و سیز کی توققوعوموز آز دیر و البته که بونلاری یایانلارا همیشه یورولمایین و اللروار دئمه‫لی‫ییک؛ ولی بئله سانین کی بونلاری کیلاس قویماق و یا بو جریانا ساری چکمک ایچین، بیر تورک دیللی یولداشا وئره‫سینیز و او دا بو یانلیشلیقلاری بیله! بیلیرسینیز که نه قدر پیس اولار! و یا اونلار اؤزلری بونلاری آلالار و سونرا بیله‫لر کی آذربایجانین یایین قوروملاری، اؤز ایشلرینده، گرکلی دیققتلری ائتمه میشلر.
سایقیلی اوستادلار و اؤيرتمنلریم! اللرینیز آغریماسین؛ بو قدر امک بیتیریرسینیز، بیر آز دا دیققت ائتسه‫نیز لاپ یاخشی اولار.