Saturday, June 30, 2007

ايرقچيليغين سونو

گؤره سن بو اؤلكه ني هارايا سورورلر؟ سانكي اؤز دئييشلرينده اولان «ناكجا آبادا»(هاراسيز يوردو) آپاريرلار! نازيلارين فاشيستي و ايرقچي گؤروشلري چاغداش تيلويزيوندا تبليغ اولونماسي آدامي لاپ اوزورب و همده گولدورور. «مدار صفر درجه» آدلي سئريالي نين بير بؤلومونو تصادوف اولاراق گؤردوم و ايكي يئرينده بتر گولمه لي ايدي لر:
  • بير ايرانلي اؤيرنجي، هيتلئرين حاكيمييت چاغيندا، آلمان شهرلرينين بيريسينده، كوچه ده يئري يير. ايكي-اوچ دنه آلمانلي عسگر اونون شرقي قيافه سيني گؤروب قارشي سيني كسيب و اون توتماق ايسته ييرلر. بو ايرانلي اونلارا دئيير: «من ايرانلي و آريايي يام! سونوج دا سيز ايله سويداشام! هايل هيتلئر...» و سونرا او عسگرلر ايله قوجاقلاشير و اونلارلا اوپوشور؛ او عسگرلر ده، گولوب و اونو بوراخيرلار!
  • بو سئريال دا ايران ائلچي سي، بير يهودي و ايران كؤكنلي آل-وئرچي ني، روشوه آلماق ايله، اؤلومدن نيجات وئرير. آلمانليلارا دئيير كي ايران دا كي يهوديلار، نئچه مين ايلدير ايران دا ياشاييرلار و ايرانلي آرياييلارلا قاريشيبلار...! و آلمانليلار دا ايرانلي يهوديلارلا ايشلري اولمور!
بو سئريالين گؤرمه ييني اونوتمدوشدوم كي بوگون امكداشلارين بيريسي، ناهار يئيه نده، بو سئريالي ياديما سالدي. بو بحث اورادان باشلاندي كي اوشاقلارين بيري سي دئدي اينترنت ده بير چئشيدلي اؤلكه لرين اورتاق IQــلاري ياييليب و ايران ضريب-هوشي سي آز اولان سيرالار دا دير! بونا گؤره بير باشقا امكداش عصباني اولدو و دئدي بو ايمكانسيز دير؛ چونكو ايرانليلار آريايي ديرلار و آريايي لار چوخ هوشلودورلار. او يوكسك تحصيلاتلي بير آدام ايدي و بوندان اؤنجه بئله سانيرديم كي او آيدين دوشونجه لي آدامدير و گؤزله ديم گؤرم نه دئيه جك! او دا يوخاري دا دئديگيم سئريالينا ايشاره ائدييب و ايكينجي گولمه لي يئري ني آچيقلادي: «بو سئريال دا، تاريخين بير ياخشي گئرچكلرينه ايشاره اولونور؛ ايرانليلار او زامان چوخ يوكسك يئرده ايميشلر؛ اؤرنك ايچين، آلمانليلار، ايرانلي يهودي لار ايله، آريايي اولماقلارينا گؤره، ايشلري اولماييبدير و ... دونياليق ايكينجي ساواش دا هيتلئر قازانسايدي بيز ده چوخ فايدالاناجايديق و ... ».
... من ده كي اصلا فيكر ائله ميرديم او اوغلان بو قدر ايرقچي اولا، آشاغي دا كي سؤزلري دئديم و البته آز قالدي سؤزوموز چيخا! يوز رحمت يئني تؤرنميش نـيونازيلره؛ چونكو فارسلار دوغرودان دا ائله بيليرلر آريايي و ژئرمن ديرلر! البته بو اوغلان فارس دا دئييلدي، لور ايدي! منيم كي گؤزوم سو ايچمير بونلار بو راحاتليقلا بئله دليللره اينانسينلار:
  • آخي سنين آغلين هارا گئديب! آلمانين صيفير درجه لي عسگرلري هارادان بيليردي ايرانليلار آريا سويوندان ديرلار! هئچ اولار ايران كيمي بير اؤلكه نين يئريني، دونيا خريطه سينده تاپابيلرميشلر؟! او زامان، آلمانليلار ريضاخاني ائششك ائله ميشديلر كي سيز ده آريايي سينيز تا روسيه نين يارديم يولو باغلانسين.
  • اؤزوده نه جور اولوب يهوديلار آلمان دا ياشاماقلا، آريايي اولماييبلار؛ آنجاق ايران دا كي يهوديلار(اؤزوده شرق قيافه سي ايله) آريايي اولوبلار و آلمانليلار دا قارامال كيمي بئله بير منطيق سيز ندنه اينانميشلار!؟ البته اونلارين هوشو چوخ اولسايدي كي او ايفتيضاح لا، موتتفيقلره مغلوب اولمازيميشلار!

1 comment:

Yazar said...

Bizi ki unutmuyubsuz?
artiq burda yazacam:
http://qivir.wordpress.com

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı