بيلمه لی لر

بو یازینی، بیر آز ده ییشدیم

بیلمه ییرم قوزئیلیلر دئمیشکن خسته لن میشم، یا دا بو وئبلاقی دؤلدورماق قصدیندن دیر؛ آنجاق هر نه يي اوخوسام و گؤرسم، بير جوره، آنايوردوموزون اولوسال پرابلئملرينه ايرتيباط وئره رم! يولداشلار الي ايله بيربيرلرينه فوروارد اولونموش فارسجا ايمئيللرين بيري سي اليمه يئتيشميشدير؛ ايمئيلين عونواني بو دور: "چئشيدلي بيلمه لي لر، هر نه دن"؛ سؤزلرين چوخو، عجيب و ماراقلی ایدیلر. نئچه سی نی تورکجه یه چئویرندن سونرا آردیجیللیغلا، بئنیمه گلن ایلیشکی لری ده یازدیم؛ اومود کی بو شوخلوق و جیددی سؤزلر هئچ کیمسه ده یه ده یمه سینلر!

• سوسكلار، آلتي آياقلي لارين ايچينده ان يئيين گئدن حئيوانلارديرلار؛ يئيينليكلري هر ثانيه ده بير مئتير دير.
• بو ایل کی ایران گوندلیگین آراسیندان چیخان سوسکون دا، سورعتی چوخ یوخاری ایدی، آنجاق گوندلیک ایله قاریشیق، آذربایجان گنجلرینین آیاغی آلتیندا قالدی.


• دووشانلار لا طوطولار، باشلاريني دؤندرمه یه رک، آرخالاريني گؤره بيليرلر.
• بیر سایی واردیلار، کی دئییرلر هر نه دن خبریمیز وار؛ آنجاق آرخالاریندا کی توز تورپاغا باخماییرلار! بعضی سی لیدئر و اؤندردیلر! بعضی سی ساتقیندیرلار! قالانیندا سیز اوخشادین.


• كرگدنلر، آداملاردان يئيين قاچابيليرلر.
• بعضی آداملار ظاهیر ده، کرگدن کیمی آرامدیرلار و ساده جه، گؤوشک وورماغی باشاریرلار، آنجاق هر دن ده موز گؤتوروب، بتردن توز-تورپاق سالیب آداملاردان يئيين قاچابيليرلر!


• تئلئفونو دوزه لدن آلئکساندر قيراهام بئلين آناسييلا خانيمي، هر ايكي سي ده ، كاريميشلار.
• تورک-تورک ائدنلرین بیر سایی سی نی تانیرام، آنجاق یا خانیملاری فارس دیر، یا دا اوشاقلاری!!


• كانادا، بير هينديجه سؤز دور «بؤيوك كند» آنلاميندا.*
• شوونیستلرین ایشی دیر بو! كانادا، بير هينديجه سؤز یوخ، بلکی تورکجه دیر و «بؤيوك كند» آنلاميندا و یا "قان آدا"(جزیره خون) معناسیندا دیر!


• آدامين بدنينين يوز ده اونو، سو دان باشقا، باكتئري لردن دوزه لميشدير.
• آذربایجان بیر بدنه بنزه ییر و بو بدن ده باکتئری ده چوخ دور! البته باکتئری لر یا بیزلر کیمی یاخشی آدامدیرلار و یئمه یین هضم اولماغینا یاردیم ائدیرلر و یا ساتقینلار کیمی دیش خاراب ائدن دیرلر!


• دونيانين يوز ده اون بيري سول اللي آداملار ديرلار.
• شوونیستلر دئییرلر آذربایجانین تکجه يوز ده اون بيري تورک دور لر!


• دونيا دا هر اون نفردن، بيري سي آدا(جزيره) ياشايير.
• شوونیستلر دئییرلر آذربایجانین تکجه يوز ده اون بيري تورک دور لر! و بونلار رابینسون کروزوئه کیمی هئچ زاتدان خبرلری یوخدور.


• آدام و شامپانزه ده كي ژئنلرينين، يوز ده 98.5 ـی بير دير لر.
• بیر بینابلی، بریتانییانین بیلی یوردلارندا وایکینگ لرین اوستونده چوخلو تحقیق و آراشدیرمالاردان سونرا، دئییب کی "آذری زبانلارین" ژئنی، یوز ده یوز "نژاد پاک آریایی" ایله بیر دیر و تورکلرین "وجود خارجی"ـلری یوخدور!


• اخلاق دان اوزاق فيلملري سانسور ائتمه يه ن يالنيز ا‬ؤلكه، بئلژيكا دير.
• شوونیستلرین بزه دیگی سؤزلره، اؤزونو تانییمیانلاردان سونرا، هئچ کیمسه قولاق آسماییر.


• شامپانزه لر، آينا قارشي سيندا اؤزلريني تانییيرلار آنجاق ، مئيمونلار يوخ!
• شوونیستلر آينا قارشي سيندا اؤزلريني تانیييرلار آنجاق، ساتقینلار يوخ!


• سنجاقكين عؤمرو يالنيز 24 ساعات دير.
• شوونیستلرین یالانلاری 24 ساعات دا بیلینیر؛ آنجاق چیخارتدیقلاری دال با دال یالان-پالانلاری دا، بیر گؤلون اوستونده کی سنجاقکلر کیمی چوخدور.


• مئيقونون(میگو) اورگي، اونون باشيندا دير.
• اوشاغییلا فارسجا دانیشان تورکون دا عاغیلی، دابانیندا دیر!


• آدولف هيتلئر اوت(علف) يئيه ن ايميش.
• بو سؤزو ده ییشمک لازیم دگیل: "آدولف هيتلئر اوتيئيه ن(علفخوار) ايميش"؛ البته اوشاقلیقدا ائله ایمیش، سونرالار قان ایچه رمیش.


• تيمساحلارين عؤمرو 100 ايل دن آرتیق دور.
• شوونیستلر دئییرلر بیز تيمساحلار دان دا چوخ یاشاماق ایسته ییریک، آنجاق بیر سایی قویمورلار!


• ايل ده، 500 فيلم آمئريكادا و 700 فيلم هيندوستان دا دوزه لينير.
• ایرانین قوندارما تاریخینین، 500 ایلی آمئريكادا و 700 ایلی ده ایسراییل و بیریتانییا دا توپلانیب؛ بونو کشف ائدن بیر کیتاب یازمیشدی "اون ایکی یوز ایل سوسماق"(12 قـرن سـکوت) آدیندا.


• بايقوشلار، گؤزلريني گؤز كاسالاريندا ترپه ده بيلمزلر.
• وکیللرین بیر سایی سی نین گؤزلری، بایقوش کیمی، تکجه بیر یئره باخار.


• بيريتانييا دا ياشايان بوتون «قو» قوشلار، ملكه نين ديرلر.
• آسلان بئلینین اوستونده چیخان آریایی گونشین قادینی فرح خانیم، قوقوشو، تبریز دن گتیرمیشدی تئهرانا تکجه فارسجا اوخوسون! آنجاق، نم نئیه آیریلیغی دا اوخودو.


• يونان اؤلكه سينين اولوسال ماهني سي، 150 بئيت دير.
• ایران اؤلكه سينين اؤنجه کی اولوسال-آریایی مرز پرگهر ماهنی سیندا، 150 دفه داش-تورپاق دان دانیشیلیب، آنجاق ایران دا کی میللتلر دن بیر سؤز یوخ.


• دونيا دا كي يوخسوللارين 100 ده يئتميشي قادينلاردير.
• آذربایجانین تاریخه قوشولمامیش کندلرینده، ائو ده قالانلارین 100 ده يئتميشي قادينلاردير! چونکو ارلری تئهراندا ایش گؤرورلر.


• هر ايكي يئدديجه (هفته) ده، دونيا دا بير ديل آرادان گئدير.
• 70-80 ایلدیر، شوونیستلر بوتون ایمکانلاردان فایدالاناراق گئجه گوندوز جان چکیرلر، آذربایجانلیلارین آنادیللرینی آرادان آپارسینلار! آما بئله آنا دیل "اؤلن دگیل، باشقا دیله دؤنن دگیل"، تورک گنجلر دئییرلر!


• ائو پيشيكلری، واختلارينين يوز ده يئتميشي ني يوخو دا اولارلار.
• منیم کیمی تورکجه وئبلاگ یازماق ایددیعاسیندا اولانلارین بیر سایی سی، واختلارينين يوز ده يئتميش دن چوخونو یوخو دا اولارلار!


• آوستوراليا دا كي قهوه ای ايلانلارين سممي، او قدر تهلوكه لي دير كي 0.002 گيرامي بير آدامي اؤلدوره بيلر.
• قاراباغین ایشغالچیلاری، آوستورالیانین قهوه بویالی سملی ايلانلاري کی سهل دیر، گیلانین زهرسیز ایلانلاریندان دا ائتگی سیز دیرلر! آنجاق اوتایداکیلار، هله کی هله دیر، قورخورلار دا.

قالدی سون ایکی جومله!

بو سؤزلرين آراسیندا، «هر ايكي يئدديجه ده، بير ديلين آرا دان گئتمه سي» دن چوخراق، سون ايكي جومله، مني آذربايجانلیلارین، اولوسال حركتينين يادينا سالديلار:

• قوزئي قوطب(قطب شمال) دا هئچ پنگوئن ياشامايير.
• شوونیستلر دئییرلر، قوزئی آذربایجان، آذربایجان دگیل، بلکه آران دیر.


• پيچ دن اؤنجه، پيچي آچان(پيچ گوشتي) اختراع اولدو!**
• آذربایجانین کولتورل چالیشقانلارین ایچینده، چوخ ایتی و رادیکال گئدن آداملار واردیلار! و قورباغانی، 100 درجه لی قاینار سونون، ایچینه آتماق ایسته ییرلر!

-----------

* - سايين سيامك سلام زاده، «كانادا» سؤزجويونه گؤ‬ره بو آچيقلاماني گؤندرميشدير:
كريستوف كلومب آمئريكاني كشف ائتدنده، آمئريكا آدلي يئرين اولدوغوندان خبري يوخ ايدي. او هينديستانا يئتيشديگيني ساندي؛ اونا گؤره ده آمئريكا قيزيل-دريلري اينديان(هيندلي) آدلانديردي. ايندي ده آمئريكادا اينگيليس ديلينده قيزيل-دري و ائسكيمولارا هيندلي دئييرلر.
البته ائسكيمو و قيزيل-دري لي ديللرينين توركجه و آلتاييك ديللرله ياخينليغي واردير.

kristof klomb amerikani kesf etdikde amerika diye beir yerin var oldugundan xeberi yox idi. o hindistan(india)ya yetisdigini sandi. ona gore de amerika qizilderilileri INDIAN adlandirdi. indi de amerikada ingilis dilinde (American Indians) qizilderili ve eskimo lara deyirler.
http://en.wikipedia.org/wiki/American_Indian
elbette eskimo ve qizilderili dillerinin turkic ve altaic dillerle yaxinligi vardir:
http://www.anadilim.org/makaleler/Bir_Eskim_Dilinde_Türkçenin_izleri-I.pdf

** - داشقینین سؤزلوکونده، "پیچ" و "پیچ آچان" ایچین تورکجه سؤز، بورغو و بورغاج یازیلمیشدیر.