Wednesday, August 25, 2010

باشقا قاتار دا واردير! يانليش مينمه‌يين

سون خبرلره گؤره سولچو يولداش روبوتيك* بيلگي‌لري‌ني گونجه‌له‌مه‌ميشدير! چونكو او هه‌له ده بيلمير باشقا بير دمير يولو دا تيكيليب و تكجه بير دمير يولو يوخ‌دور:
تبريز – تهران قاتاري يولا دوشور ، فرمان بيزيم اليميزده اولماليدير.
ميللتچي لر بوتون سياسي حوقوقلاريني ايدمان ايستاديوملاريندا گزيرلر و بيلميرلر كي سياسي ايستك خياباندا اؤزونه معنا باغيشلايير . سياسي اكت ايستاديومدا يوخ بلكه بولواردادير .
ميللتچي لر ندن فلسفي - سياسي ادبياتيندا قونوشماغي باشارميرلار ؟
(باغلانتي)
اولابيلر دئيه‌سينيز نه‌دن بئله دوشونجه‌يه روبوتيك نيسبتي وئريرسن؟ يانيتيم يوخاري‌دا كي ضيد و نقيض سؤزلرده گؤرسه‌نير. روبوتلارين بئيينلرينده انعطاف چوخ آزدير و ائله‌يه بيلميرلر اؤن‌گؤرولردن آرتيق دوشونسونلر. گرك بير يول اونلار ايچين حاضير اولسون و اؤزلري قادير دئييللر بير باشقا يولا فيكر ائتسينلر. يول‌دا كسينليكله دمير يولو اولمالي‌دير! دمير يولو اوستونه داغ اوچسا‌ دا دمير يولو اداره سي گرك بونو دوزه‌تسين و بيز دره تپه ايله آياقلاريميزلا گئده‌بيلمه‌ريك! چون‌كو ماشيني ذئهنيميز باشقا بير حالته فيكر ائده‌بيلمز. گولمه‌لي يئري ده بوردا دير كي ائله بيليرلر قاتارين فرماني اونون يا باشقاسي‌نين الينده اولورسا، سئچمك حاققي (حق انتخاب) ايسه واردير!!

بيلميرم هامي‌يا فلسفي-سياسي ادبياتيندا باشارمايان دئيه‌ن ديلداشيميز اؤزو نه‌دن هر‌نه‌يه گؤره "كسينليكله" نظر وئرير. دئيير ميللتچي‌لر بوتون سياسي حوقوقلاريني ايدمان ايستاديوملاريندا گزيرلر! قاتاري ال‌دن وئرمك‌دن قورخودان يولداش سانكي بو اون-اون بئش ايلين اولاي‌لاريندان خبرسيز دير. خبرلي اولسايدي بو "بوتون" سؤزجويونو هر نه‌ يه قوشمازدي! بونو دا دئييم كي ايلكين حاقلارين داليسيجا اولماق "فلسفي-سياسي" ادبياتي باشارماق ايسته‌مز. بونلار هامي‌سي ايكي ايكي دؤرد ائدر منطيقي دير! بوتون حاقلار بوتون توپلوملار دا برابر اولورسا و نؤوبت يئتيشسه دؤولت و حوكومتين نئجه دولانديرماق سورونونا اون‌دا دير سول-ساغ پارتي‌لار ايدئولوژيك "تاي‌سيز و بدل‌سيز(!) چؤزوملرين" اورتايا قويمالي‌ديرلار!!
سولچو روبوت هر نه‌يه گلنكسل (سنتي) فيكر ائدير. اعتراض ائتمك و ايستك‌دن دانيشماق حتما خيابانلار دا اولمالي‌، و دئيير ايله دئيير سياسي ايستك خيابان‌‌دا اؤزونه معنا باغيشلايير!! ايلك ده بونو آنلاتمالي‌ييق ايستكلرين سياسي اولوب اولماماغي‌ بير سورون‌دور! من‌جه سياسي ايستك ايله بير توپلومسال و مدني ايستك‌ده چوخلو فرق واردير؛ قالسين كي توركلر اؤتن ايل تورك‌لر اؤزلر‌ي‌ني بير قدرت ساواشينا قاتماماق ايله بير سياسي ذكا دا گؤسترمك‌ايله اؤز ائتگي قويماق گوجلري‌ني بيلديرديلر.
و بونو قيراغا قويساق كي توركلر 85 خورداديندا خياوانلار دا (اولابيلر ايندي يانليش نظره گلسين آما او دؤنم‌ده يوخ) اؤز اعتراض‌لاري‌ني بيلينديرديلر، آنجاق توپلوم و خالقين گئنل باخيشي بوندا سونوجلانيب كي ان هزينه‌سيز يول ائله بو ايستاديوم‌لار دا اولابيلر. خالق بو نتيجه‌‌يه يئتيشيب كي الينده قودرت اولانا دئسين بيزيم ايستك "قدرت" و "حكومتـ"ـي اله گتيرمك دئييل و تكجه "وارليق" و "كيمليك" سورونلاري‌ني اورتايا قويماق ايچين خياوان‌دا قان تؤكولمك لازيم دئييل. بو ايش ايچين مدني و كولتورل قارشيلاشما لازيم‌دير. خالق بونو تجروبه ائتدي. باشقا طرف‌دن گوجلو مئديا ال‌ده يوخ‌دور و بو ايستك‌لرين ايستاديوم‌دا مطرح اولونماسي تكجه سؤزو دؤولت قولاغينا چاتديرماق ايچين دئييل. كيمليك‌چي لر باشقالار كيمي گئرچك‌لره گؤز يومماييرلار. اونلار بيليرلر كي هفته‌نين آلتي گونون ايشله‌يه‌ن ايشچي‌لر اينتئرنته گيريب و خبر اوخويا بيلميرلر. اونلار بيليرلر كي چوخلو آداملار ياشام چتين‌ليكلر ايچينده ال آياق وورور و اصلن اونلارا كيتاب‌لار و درگي‌لر ده مدني حاق‌لاردان دانيشماق زامان كورلاماق‌دير. آنجاق خالقين هر جوره اؤزل بير يئرلرده توپلانيرلار و او اؤزل بير يئر بيليريك هارالاردير. ايدمان واسيطه‌سي ايله بيلي‌يوردلارا گئتمه‌يه‌ن‌ خبرسيز و بيلگي‌سيزلره، بيلگي و ساو يئتيشير. چوخلو آداملار هله بوردا بونو بيليرلر كي بير شئي‌لري ايسته‌مه‌لي‌ديرلر!


*- بو قونو دا اؤنجه‌كي يازي: سولچو روبوت خيطابه‌سينه دوام ائدير

ي. س: 
بير ده گئديب قيرميزي خط چكه‌ن بيلاغي‌نين اؤنجه‌كي پوستونداكي يوروملارا باش چكديم. بو ايكي يوروم حئييف‌دير يوروملار آراسيندا ايتسينلر:

خوخان:
فضایی میللتچی‌لری احوالاتین‌دان:
بیرگون ایکی فضایی کارگر میللتچی مارسدا ایکن، ایصلاهاتچی‌لاردان سولچولاردان و ...-دن سس‌لر ائشی‌دیر و یوخودان قالخیرلار...
بوبیری‌سی اؤبیرینه: حقیقت‌لر آشکار اولدو
اؤبیری بوبیرینه: سیرر قالمادی دونیادا
مارسا یئتیشه-ن سس‌لر: تبریزلی سرمایه‌دارلار، تراختور حرکاتینی باشلادیب و آج میللتچی‌لری ده اؤزلرینه قوشدولار، تبریزلی سرمایه‌دارلار بیردن بیره چاشیب اورمییه‌ده ده تاپیلدی‌لار....بو آلچاق سرمایه‌دارلار، تکجه اؤز منفت‌لرین گوده‌رک، میللتین بئینینه پوللا یالان معلومات‌لار دولدورور...
مارس‌دان یئنیر تئهرانا گؤرور کی بعلی
ایتتیلااتچی‌لار و تراختورچولار دا هامی‌سی البیردی، بون‌لار هامی‌سی ایستیر کی آذربایجان‌داکی‌لار، تئهراندا گئدن چوخ-چوخ مدنی حرکت‌دن اوزاق قالا...
بو فضایی-لر آنجاق آذربایجانا یئنیب سسین ائشیده بیلمه‌دی‌لر، چونکی آذربایجانین سسی مارس سهلدی، تئهرانا دا چاتمیر...
اونلارین سسی مارساجان گئدیر..
آذربایجانا باخما کی ایکی دنه قیریق بلوقلا خبرلری یاییلیر، چونکی مشهور خبری کانال و سایت‌لاردا دا بلوک‌لانیر و یاییلمیر چوخ شئی‌لر....(سرمایه دارلاریمیز بللی دئییل هاردا اؤلوبله‌ر)
سرمایه‌دارلیق فیلان باره‌سینده ده چوخ فیلمه باخماق ضررلیدی...
نیه سنین او به-یندیگین شخصیت‌لر، نیه او تیپ‌لی-میپ‌لی جماعت بو حرکرت‌دن خوش‌لانمیر دئیه اؤز ایچینیزده سوروشورسونوزسا؟ بونجا پروپئقان‌دانی تبلیغاتی، تی-وی-لری یاددان چیخاردمایین...
تئهراندا اگر بیری‌نین بورنون‌دان قان گلسه، طبل و زورنا ایله هریئره یایارلار...
مارسدا یاییلان اؤبور خبرلر: تورک دیلینه مدره‌سه دئین‌لری م.ه.پ یول‌لویوب،
صاباحی‌سی، بون‌لار ایططیلاآتین آدامیدی،
داها صاباحی‌سی، بون‌لاری سرمایه‌دارلار آلدلدیب
اوبیری داها صاباحی‌سی، تی-وی-لر داها دوشوبدو تراختورچولارین الینه...

اولو اولوس:
من بوش یئره سیزله دارتیشیب، سیزه بازار قیزدیریب، کولونوزو یئلله ین دئیلم. باخمایاراق کی، یئلله مکله ده سویوق کولونوز آلیشان دئییل. یالنیزجا بو یئللمه کدن منه گؤز دولماسی قالار( ائله بونا گؤره ده بو ایلک یازیم سیزه اولان سون یازیم اولا بیلر).
کاغاذ اوزرینده و سوزده بوتون مکتبلر و البته سیزین کومونیزمیز گؤزلدی سولچو دیلداش. آنجاق ایشده و عمل ده بو گؤزل سوزلر یالنیزجا گؤزل سؤزلر حدینده قالیر. اؤرنک ایسته ییرسینیزسه بویورون سولچولار قیبله سی اولان ساوئتلر بیرلیگی.
اولو اولوسا دئمك ايسته‌رديم بئله دوشونجه‌لر قارشي‌سيندا سوسوب، هئچ‌ده جاواب وئريلمه‌زسه، اؤزلري‌ني حاقلي بيليب و بيزلرين جاوابسيز قالديغيميزي بؤيوده‌جكلر! ائله بونو ايستيرلر. ايكينجي‌ سؤز ده بو يوخاري دا دئديگيم دير. بيز بونلار لا ايدئولوژيك موباحيثه‌ميز يوخ‌دور! ماركسيستلر يوخسا باشقا ....ـيستلرين كيمليك‌چي‌لرين پاچاسي‌ني توتوب ال آياقلارينا دولاشماغين نه‌دني اونلارين بيزي دوزگون تانيماديقلاري‌ و قدرت دالي‌سي‌جا اولان سياسي چاباجيلار (فعال‌لار) ايله ده‌ييشيك سالماق‌دير. دئمك واخت تلف ائديرلر. ايسم‌دن دانيشماق سؤز قونوسو دئييل. چاغداش تاريخيميزده كي  دئوريملر(انقلاب) ده، آذربايجانليلار بونو تجروبه ائتديلر كي اولوسال دوشونجه يارانمادان، دؤولتين مشروطه، سلطنتي، ساغ يوخسا سول اولماغي هئچ ده اؤنملي دئييل!

بو يئرسيز ساغ-سول‌ قونوشمالارينا سون نوقطه قويماق ايچين مئهدي قارداشيميزين دئديگي‌ني بورايا قويورام:
« بو سولچو قارداش دا هازامان دامین ساغیندان توشه‌جک بیلمیرم. »

8 comments:

مهدی said...

سلام
بیر آزی هله باشا توشمه‌ییبلر استادیوم ایندیجه اؤزو ان بؤیوک مئدیادی.
بو سولچو قارداش دا هازامان دامین ساغیندان توشه‌جک بیلمیرم.

Anonymous said...

bu gozal ve dayarli yazilariva gora chox sagh ol ve yasha.bugun istadiomlar dogrudan bir bilimyurdu sayilir biz azarbaycanlilara.3,4 yashinda ushagdan 70 yashina gadar kishi hami birlikda yashasin azarbaycan haygirir ve vatansevarlik darsi alir.bu bir boyuk kultural toplantidir ke halahala ala tushmaz.dogrudanki"azarbaycan yurdumuz tiraxtur bozgurdumuz"

Anonymous said...

bu gozal ve dayarli yazilariva gora chox sagh ol ve yasha.bugun istadiomlar dogrudan bir bilimyurdu sayilir biz azarbaycanlilara.3,4 yashinda ushagdan 70 yashina gadar kishi hami birlikda yashasin azarbaycan haygirir ve vatansevarlik darsi alir.bu bir boyuk kultural toplantidir ke halahala ala tushmaz.dogrudanki"azarbaycan yurdumuz tiraxtur bozgurdumuz"


uzgurinam@gmail.com

داش قاپی said...

آیدین سول‌لارین دونیایا نه وئرجک‌لری ده بللی دئییل. اینسان‌لاری برابر گؤرمک هر بیر دوشونن و اینسان سئونین ایشی‌دیر. اونلار اؤزلری دئدیک‌‌‌لری تملدن قیراقدا(اینسان‌لاری قات-قات دوشونمک ) هئچ نه‌یی گؤره بیلمیرلر. توپلومون داشینی سینه‌لرینه ووروب، توپلومون بیر بؤلومونو ساوونوب، باشقالارینی توپا باغلاماغا دوشونورلر. سئویملی وطنداش‌لارا دئمه‌لی‌ییک سیزین دوشونجه‌نیزده اولان فاشیست‌لیک دونیانین لاپ قورخولو فاشیست‌لی‌یی ایدی. هیتلر فاشیست اولاراق ساواشدا آداملاری قیردی. سیز ساوونان دوشونجه‌نین آداملاری، باریش‌دا آداملاری قیردیلار. اؤزو ده اؤز میللتلریندن. سیزین سؤزونوز دونیادا نه اولدوغونو هر کس دوشونوب، ساوونوزو دا ائشیتدی. سیزده اولان عوصیان دوزلتمک‌ یئرینه داغیدیر. عوصیانین بیر باشی قورال‌لاری پوزماق اولسا باشقا یؤنو ده دوزلتمک‌دیر. سیز داغیتماغی یاخشی بیلسز ده دوزلتمه‌یی باجارمیسیز. بلکه ده باجاریرسیز آنجاق گؤزلریزی باسمیش داغیدیجی عوصیان دوز گؤرمه‌یین قاباغین آلیر.
آیدین بوندان آرتیق بئله‌لری ایله اوغراشما. اونلاری تانیتدیران سعید موغانلی اولدو. اونلار دا سعید موغانلی‌یا اوجور جاواب وئریبلر. دیرلی دوستوموز اؤزو دئمیشکن او اؤز بورجونو ادبیاتا اؤدمیش اولوب. آنجاق اونلار تام ترسینه داورانیرلار. هر حالدا سؤزون ممد قولوسو اونلارلا باش-باشا قویماق بوش‌یئرینه واقت الدن وئرمک دیر.

Unknown said...

ساييت داش قاپي‌نين يازاري،
گؤزل يورومونا گؤره چوخ ساغ‌اول. ائله بو اچ يازي يئترلي دير! بونلارلا چوخ‌دا باش باشا قويماق سنين دئديگين كيمي واختي الدن ائتمك دير.ـ

رامین جهانگیرزاده said...

یاشاسین آذربایجان!
هه بو شوعاری ائشیدنده آدامین قانی جوشور. منجه آدامین قانی جوشماق گرک دئییل. سئودیینی یاشاتماق اوچون تکجه اونا یاشاسین دئییب، هایقیماقلا و سونرا گئدیب، باشینی آتیب یاتماقلا هئچ نه چیخماز. سئودیینی یاشاتماق ایسته¬ییرسن سه بوتون وار گوجونله اونو یاشاتماغا چالیشمالی¬سان. یوخسا ائله او «یاشاسین آذربایجان!» دئمکله هئچ نه دوزلمه¬یه¬جک. سن وارلیغینی، کیملیینی ایستادیومدا یوخ بلکه اؤزونده آختارمالیسان. سن کیمسن؟ نییه بئله اولوبسان؟ نییه ایسته¬دیینی هئچ واخت اله گتیره بیلمیرسن؟
بیر ده کی هئچ نه¬یی هزینه وئرمه¬دن اله گتیرمک اولماز. سن تام یالنیش دوشونوب، یالنیش قرار وئریرسن. دونیانین هانسی یئرینده بیر شئیی هزینه وئرمه¬دن اله گتیریبلر؟!! بو سؤالین جاوابینی آختارما هئچ یئرده تاپا بیلمزسن.
قودرت و حیکومتی اله گتیرمه¬یه چالیشماسان، او دئدییین وارلیق و کیملیی هئچ واخت اله گتیرمه¬یه¬جکسن. من بیلن هئچ سن وارلیغین و کیملییین نه اولدوغونو بیلمیرسن. چونکو وارلیغینی و کیملیینی آنلایان بیر کس، گئجه گوندوز اونا دوشونوب، الندن گله¬نی ائتمه¬لی دیر. آنجاق سنین الیندن یالنیز بو گلیرکی آذربایجانی موقددس بیر شئی کیمی مالیک چیخیب و کیمسه اونون باره¬سینده نقد ائتسه و یا اونا ساتاشسا، اونون ده¬ده¬سینی یاندیراسان. ده¬ده¬سینی یاندیرماقلا بیر شئی چیخماز. بیر آز عاغلین باشیندا اولسا بیلرسن کی نییه بیزیم باشیمیزا بو قدر اویون گلیب؟!! بیزی اوینادانلار چوخ اولوب، هر بیر اویونون قایداسی وار و سن بو قایدانی بیلمه¬سن اونو بیلکی اودوزاجاقسان و اونون بونون الینده ایونجاق اولاجاقسان…!
حؤرمتلی داش قاپی منی هئچ کیم تانیتدیرماییب. هئچ کیمین ده نووچه سی اولمامیشام

رامین جهانگیرزاده said...

«وطنیمیزی ده سئویریک،
دیلیمیزی ده،
میللتیمیزی ده،
حقیقی میللتچی¬میزی ده،
بو سئودیکلریمیزی اؤز خئیرلرینه
قوربان وئرنلری سئومیریک و سئومه¬یه¬جه¬ییک…»

چال زیرنانی چال میللتچی

«آذربایجان میللی آزادلیق حرکتی»…!
آدینی دوه شیللاق آتدی
زوققولداتدی قیچلاریندا اؤزونو
اکدی سنی یئددی مین ایل بوندان قاباق
رنگینی بویادی اوزونه
باغیردی سنی چیی ـ چیی
باغیردی سنی میللتچی
سورودو سنی هر یانا
هئچ یئره چاتدیرا بیمه¬دی
¬وارلیغینی لیغالادی، ییغدی اللرینه
ـ یارامازلارین آغزینی یومماق گرک!ـ دئدی
او یومروغونو توتموش
او فاشیست دوشونجه¬لی
آدینی قویموش میللتچی
جیرنادیب، بو میللتی ایت قوسدویا سالدی
آدام اوغلو آدام اولمادی آدام
ننه¬سینین امجه¬یینی کسه¬جک دانیشانین
بیردن بیری یوخودان کال اویانسا
دایانسا بونلارین بئینینین قیراغیندا
آتسا قیرماغینی
توتاجاقلار اونو سؤز آتشینه
مورتد دئییب
یاندیراجاقلار سؤز بازاریندا
چالدی میللیتچی زیرناسینی
چال دئدی او بئی
چال زیرنانی میللتچی
کامسامولون جانی ایت جانیدی
اینیلتی قوپماز جانیندان
لیللندیرین بو هورن آیی
لول قنبر اولدوزلاری توتوب، سالین توربایا
ایپ اوستونه سرین اودونلاری
یاندیرین ایپینین اوستونه اودون قویمایانلاری
آزادلیغی تورا سالین
تکجه بیزیم اولسون
زیرنانی چالین، چالین یئنه ده
آدام اولماز بو کامسامول
ده¬ده¬سی مارکس
ده¬ده¬م قورقودون قوپوزونو سیندیریبدیر
لاخا چیخمیش زامانیمیز
ایلمانقی¬دیر بوتون گونلر
قالمایاجاق بئله هئچ نه
حرکت، حرکت
اللرینیزی قالخیزین
رینگه گیرین مئیدان بیزیمدیر
ازین آغزینی
کیریخدیرین یومروغونوزلا
اکین قیرمیزی پامادورو
او بیزه قیرمیزی جیز چکن کامسامولون گؤزلرینین آلتینا
باباسی ایستالین چکه بیلمه¬دی
تؤکون گؤزلرینی اووجونا
تؤکون گؤزونو میللتچی
اینیلتی قوپماز کامسامولدان
آدام اولماز بو کامسامول
اژدر عمی بیزیمله¬دیر
چال زیرنانی چال میللتچی
کامسامولون جانی ایت جانیدی

Unknown said...

رامين به‌ي جهانگيرزاده!
سيز اؤز داورانيش و اؤز دوشونجه‌لري نه‌دن باشقالارا نيسبت وئريرسينيز مي!؟

ايستاديوملاردا اولسايدين بيلردين هزينه وئرمك تكجه قان آخماغا دئمزلر! بير توپلوم بئش اون دنه قوچو قاباغا وئريب و اونلاري قوربان وئرمك ايله بير يئره يئتيشمز رامين به‌ي! بو خالقين بئيني اونلار ايل يووولموشدور و كيمليكلريني هله ده بيلميرلر. سوپئر قودرتلي‌لرين دونيا‌سيندا، آرخايين اول گوج اله گتيرمك و قودرت اوستونده ساواشسان اؤزگه‌لرين نؤوچه‌سي اولمالي‌سان، آنجاق بو ساواش كيمليك اوستونده اولورسا يالنيز اؤزون و اؤز خالقي‌نين قوللوغونداسان. چاغداش دونيا‌ بئله‌دير قارداش

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı