Saturday, April 24, 2010

قيرميز اولماسين، گؤي اولسون

دونن كي اويوندا گسترش فولاد تيمي هئچ توقع اولمادان ياغيشلي و سويوق بير هاوادا اوتوز-قيرخ‌ مين تيراختورچونو ماوي گئيينديريب، اؤز يانداشي ائتدي، آلقيشلاندي و شاشيرديجي بير سونوج الده ائديب و بوتون آذربايجاني سئوينديردي. آرخايينام كي "رسول خطيبي" نئچه ايل بوندان اؤنجه كيمي ده پارلاق اويناماسا، تيراختورچولارين تايسيز آلقيشي ايله، بير داها پارلاييب و "گؤي دميرچيـ‌"ـلري باشاري‌يا ساري اؤندرليك ائده‌جك دير. گؤي دميرچي‌لرين آراسيندا حرفه‌يي و پئشه‌كار اويونجولاين آزليغي‌نين يئريني تاماشچي‌لارين دايانيشماسي دولدورو و ايرانين ان پوللو و ان گوجلو ايكي تاخيمينين بيري‌سي ياني ايصفاهانين ذوب آهنين ال-آياغي باغلانيب بير ايش گؤره بيلمه‌دي. و ائله اولدو كي اونلارين ايصفاهانلي مربي‌سي، منصور ابراهيم‌زاده، اويوندان سونرا گئديب و تاماشاچيلاري آلقيشلادي و باسين توپلانتي‌سيندا آشاغي دا كي سؤزلري دئدي:

وی در پایان گفت: به مردم آذربایجان و مردم تبريز تبریک می گویم که تیمشان توانست به فینال راه پیدا کند.
وی همچنین در پاسخ به سوالی در رابطه بااینکه چرا به تشویق تماشاگران فولاد گستر پرداخت افزود: این تماشاگران بودند که با تشویق های مداوم خود توانستند هم روی بازيکنان تیم حریف هم روی داور بازی تاثیر گذار باشند.
(او سون‌دا دئدي: آذربايجان و تبريز خالقينا، تاخيملارينين فينال گئتمك ايچين، قوتلو اولسون دئييرم . او همي‌ده نه‌دن فولادگستر تاماشاچس‌لاريني آلقيشلادي، يانيتيندا سؤيله‌دي: بو تاماشاچيلاريدلار كي اؤز  كسينتي‌سيز آلقيشلاري ايله، هم حريف اؤيونچولارينا، و هم قاضي‌يا(!) ائتگي گؤسترديلر. قايناق/منبع)

فرهاد كاظمي، پولاتچيلارين، مربي‌سي ده تاماشاچيلارين باشاري‌يا باعيث اولان ائتگي‌يه بارماق قويوب و دئدي:

در هیچ کجای ایران این همه حمایت صورت نمی گیرد همه اعم از رسانه ها تماشاگران و مدیران استانی یکدل و یکصدا تیم های استان را حمایت می کننند واین پتانسیل بالایی است که در هیچ کجای ایران پیدا نمی شود.
(ايرانين هئچ يانيندا بئله يارديم گؤرسنمير، بوتون يايينلار، تماشاچي‌لار و اوستان سورومولولاري، اورك بير و سس‌بير آذربايجان تاخيملاريندان حمايت ائديرلر و بؤيوك بير پوتانسييئل‌دير كي ايرانين هئچ يئرينده تاپيلماز - قايناق/منبع)
حتي اگر تئهران دا كي ايدمان گونده‌ليكلري بئله باشليقلار وورالار و تايسيز و گؤرونمه‌ميش شكيل‌ده پئرسپوليسي ده "تورك" بير تاخيم آدلانديرالار بيزعلي دايي و كريم باقري‌ايله ايشميز يوخدور و سون اويوندا بير تيرختورچو اولاراق، تكجه و تكجه "گؤي دميرچي‌لر"، يا "ماوي پولاتچي‌لار" و يا ائله همن "گسترش فولاد"ي دوز "تيراختور" كيمي هم تئهران دا و هم تبريز ده، دستك‌له‌يه‌ييب و آلقيشلاياجاييق. چونكو:
او اولماسين بو اولسون! قيرميزي تيراختورچو يا گؤي پولاتچي. سورونوموز "آذربايجان" دير و باشقا شئي‌لرين اؤنمي يوخدور. اودوب-اودوزماق فوتبول ياريشلارينين بير گئرچك بؤلومو‌دور و بونا گؤره قول يئييه‌نده، باشقالار كيمي يامان دئمه‌دن، "عئيبي يوخ" دئييريك؛ آنجاق ان اؤنملي و دانيلماز گئرچكلر دونن ايسه گورولتو ايله سسله‌نن "تورك ديلينده مدرسه، اولمالي‌دير هركسه" و "اورمو گؤلو سسلنير، سوسوزام هاراي هاراي" و "آذربايجان وار اولسون، ايسته‌مه‌يه‌ن خار اولسون" و "ياشاسين آذربايجان" ديرلر.

*‌  *  *

يايماقدان سونرا(ي. س): 

يولداشلارين بيري‌سي ايله توركجه يا فارسجا يازماق ايچين بحث ائليرديك. من دئييرديم اؤرنك ايچين دوز دور اويانيش آخيمي يئيينله‌شيب ، آنجاق توركجه اوخويابيلنلرين سايي‌سي ايندي ايسه آزدير و تكجه توركجه يازساق اولابيلر اؤزونه اولدوقجا موخاطب تاپابيلمه‌سين و اؤزلليكله چاليشيرام فارسجا اولسادا اؤز فيكيرلريمي بوتون تيراختورچولار ايله پايلاشام. آنجاق او دئييردي اونلار اؤيره‌نملي‌ديرلر و حتي بير مقاله‌ني فارسجا يازسين جريمه اولاراق گرك بير توركجه يازي دا ياياسان! من ده دئيه بيلميرديم آ كيشي! بير نفر بير ايده بئينينه يئتيشه اونا گؤره واسواس ايله بير شئي‌لر يازا، اونو چتين‌ليك ايله اينتئرنت ده يايا اينساني يورور؛ قالسين كي بو ايشلري ايكي قات گؤرسون. البته او يولداشين سؤزونه ايسته‌ديم باخام، آنجاق دئديم تيراختور و آذربايجان ايدماني‌ حاققيندا كي توركجه باخيشلاريمين سايي‌سيني گرك چوخالدام! اؤنجه دئديگيم كيمي تكجه ياشاسين آذربايجان دئمك يئترلي دئييل و تيراختورچولار توركجه يازيب اوخوماغي دا بير آز مشق ائتمه‌لي ديرلر. يوخاري دا كي يازي‌ني دا توركجه يازيب يايديم و باشقا سايتلار دا ايسه ياييلدي، آنجاق بوگون گؤردوم كرج دن "قافلان" آدلي بير ديلداش، بو يازي‌ني بير آز ده‌ييشيك ايله، فارسجايا چئويريب و "تيراختورفنس" سايتيندا توركجه باشليق ايله ياييب: "او اولماسین بو اولسون؛ قيرميز اولماسين، گؤي اولسون". قافلان بو يورومو دا يازينين آرديجا وئرميشدير:

سلاملار! سایین دوستلار گونوز آیدین اولسون .
عزیز یولداشلار، منیم مقالم اؤزوز گؤردویونوز کیمی چوخلو
اشکالی و هجو واري‌دیر، بونا خاطیر سیزده‌ن عوضور ایستیرم. آیمان بی مقاله نی باش صحیفه یه قویدوغونوز
دان تشکور ائدیره‌م . اما اگر " تورکی یازیسیندا " قویسایدیز چوخ گوزل اولاردي. چونکی مقاله تورکجه‌دن چؤنوب فارسجایا بیر آزجا رسالیغین الدن وئریب . گئنه ده اللریز آغریماسین .
سئوينديم كي بو يازي‌، توركجه اوخويابيلمه‌ينلره ترجمه ائتميشلر؛ آنجاق ياخشي اولاردي قافلانين دئديگي كيمي توركجه يازي‌ني  قايناغينين آدي ايله ايسه يايارديلار.

2 comments:

mehdi said...

سلام
چوخ سئویندیریجی بیر خبریدی
یاشاسین آذربایجان

شظثق said...

بونلار دوز اما او ایبراهیم زادا ایت کیمی یالان دانیشیب. نه دن کی اویون دا چوخ اعتراض ائتمک اوچون داور طرفیندن تذکر وئریلنده تاماشاچی لار دا اونون دالی چکیلمه یینه گؤره شعار وئردیلر و او مسخره اوچون داور و تاماشاچی لاری آلقیشلادی. ائله بونا گؤره ده او زامان دان اویونون سونونا دک تاماشاچی لار بیر سس "منصور باید برقصه" دئدیلر.

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı