مجيد نظري جنابي نين «
چرا حرکت ملی آذربایجان از کمبود روشنفکر رنج می برد؟» (نئيه آذربايجان، اينتلئكچواللارين* آز اولماغيندان چتينليك چكير؟)، يازيسي منيم ده نظريمي اؤزونه ساري چكدي! ايلك سؤزوم بودور كي يازماق ايچين بير قونو اورتايا آتماغينا گؤره اللري آغريماسين. البته من تكجه آيدين آديني، آيدينليق و اينتلئكچوالليغا گؤره يوخ، بلكه «آيدين» آدينين گؤزلليگينه گؤره سئچميشم و اصلا و ابدا آيدين-مايدين دئييلم!
ايندي گئدك مجيد نظري نين سورغوسونون سوراغينا كي چوخ آيدين دا يانيت (جاواب) وئرمك اولار؛ او دا بودور:
بير توپولوم و اولوسون ايچينده «آيدين دوشونجه لر» يارانماغينين ان اؤنملي ايندكس و مئعيارلاري گئنل اؤيرتيم، «ساواد» و البته يوكسك تحصيلات دير و دئمك اولار ساوادسيزليغين فاييزي نه قدر آز اولسا و باشقا طرفدن بيلي يوردلولارين چوخ اولماسي، اينتلئكچوال و آيدينلارين سايي سي ني يوخاري آپاربيلر. ايندي ايسه بو سونوجا يئتيشمك اولار كي آذربايجان دا بو معيار ان آزي ايران دا ان اوستون يئرلر ده دير و تاريخي فاكئتلره باخماق بونو گؤسترير كي بلي، ايرانين ان چوخ آيدينلاري آذربايجانلي ديرلار! آنجاق بير آجي گئرچك ده كي وار بودور: «بو آيدينلار آذربايجان اولوسونون قوللوغوندا اولماميشلار» و بونا گؤره دير كي مجيد نظري دئييب آذربايجان دا آيدينلارين سايي سي آزدير! ايندي باشقا بير سورغو اورتايا گلير: «اولوسال باخيشدان نئيه بونلار آيدين دئييلر و چوخ ايفراطي دا قضيه يه باخساق، بونلار ساتقين آيدين ديرلار؟!». بو سورغونون ساده جاوابي بو دور كي سوچ و گوناه بونلارين اؤزونده دئييل، بلكه اوشاقليق دان، فاشيستي و مركزه يؤنلميش بير سيياسته آسيلي اولوبلار و فيكري جهتدن بوتونلوكله ترسينه تغذيه اولوبلار. اؤرنك گتيرمك ده ايسته ميرم.
عرب تاريخينده اولان «بيلمزليك دؤنمي(دوره جاهليت)»ـني آذربايجانين ايندي كي چاغييلا قارشيلاماق اولار! او زامان حيجاز چؤللرينده 15-20 آراسيندا ساوادلي اولسايدي، آذربايجانين چاغداش زامانيندا و البته 21نجي يوز ايلده، 20-30 ميليون تورك آراسيندا نئچه نفريميز توركجه يازيب اوخويابيلير؟! يوز نفره يئتيشه بيلر بو سايي؟! هامي ميز بيليريك كي يوخ! لوطف ائله يين دئمه يين كي سن ده يالنيز اينتئرنت و سايبئر دونيادان ائشيگه باخمابيرسان! چونكو ايندي بو مجازي فضا دا هر نه خولاصه اولابيلر. بو سايي ني آوانس ايله، مينه قالديراق! بو 1000 نفر ساوادلي نين، 10 نفري آيدين دير. و البته آز يا چوخ اولماق نيسبي دير و موقاييسه و قارشيلاماق سونوجودور. وبيز ده هر شئيي، ايلك اولاراق ايران دا گؤرورك. بللي دير كي بيزيم بو 10 نفر قارشيسيندا، فارسلارين يوزلر و بلكه مينلر وارلاريدير و بونلارين ايچينده آذربايجانين آسيميله اولونموشلاري دا واردير! يازيقلار اولسون تقديم ائتديكلريميزه! زير توركچولر بونلارا مانقورت دئييرلر!
ايندي ايسته ييرم قضيه يه باشقا جوره باخام و مجيد نظري نين سورغوسونا جيدديت و شوخلوق آرسيندا اولاراق، بئله يانيت و يا سورغولو يانيت وئرم: «آذربايجانين آيدين اولمايان ميللتچي لرين سايي سي مگر نه قدر دير كي دئييرسينيز آيدينلار آزديرلار!؟». منجه آذربايجان آيدينلارينين فاييزي دونيانين باشقا مدني جريانلارينا گؤره چوخ دا بؤيوك و يوخاري دير! دئمك اولار آذربايجان دا آيدينلارين چوخلوغو باعيث اولور، چوخلو سليقه لر آرايا گلسين و بيرليكلر ده آزالسين!! آيدينلارين چوخلوغو ياخشي دير، آنجاق هر آيدين و يازار دا قرار دئييل تاكتيك، استراتژي و سيياست گؤسترمك يئته نكي اولسون. بئله انتظارلار منجه يانليشديرلار. آيدينين گؤره وي، آيدين تربيت ائتمك دئييل، ولي بير آيدين و يا بير ميللي چاليشقان، بونا قادير دير كي بير ميللي دوشونجه سي اولمايان اذربايجانلي يا (و يا اويانماميش آذربايجانلي) اويانديرسين، توركجه يازماق ساواديني اؤيره ديب و اونا ميللي كيمليگي ني دوشوندورسون. منجه بو يول ايله، ياخين گلجك ده مينلر اويانميش آذربايجانلي نين، آراسيندان موختليف ساحه لرده يئتنكلي آيدينلار چيخاجاقلار. گوجوموزو بو يول دا ايشله تمه لي ييك و زور ايله دئمك اولماز چون فيلان آدام آيدين دير، فيلان ايشلري اؤيرنيب و گؤرمه لي دير.
ايندي كليات دان، جزئياتا گئچيب، ايسته ييرم دئيه م، بعضي شئيلري كسينليكله اونايلاييب و يا قبول ائتمك اولماز. سؤزو اوزاتماماق ايچين بعضي جومله لر يوروملاناجاق:
• دوزدور كي بو يوز ايلده آذربايجانين ميللي چاليشقانلارين آراسيندا، تاريخي آيريليقلار دوشوب ولي دئمك اولار ان آزي بو اون-اون بئش ايل ده «كيمليكچيليك(هويت طلبي)» قونوسوندا اورتاق باخيشلار يارانميشدير. اؤرنك ايچين ايرانين بوتون بيلي يوردلار آراسيندا، اولوملو(مناسب) ايليشگيلر اولماياراق، بوتون اولوسال كيمليك تعريفلري بير بيرلرينه اوخشاييردي و بو قونو دا، سياسي ساغ يا سول دوشونمك يول وئريلميردي و وئريلمير.
• منجه يازيب-اوخوماق و يا اوخوماق-يازماق بير لوپ تشكيل وئره بيلرلر و عمل و عكس العمل جريانينا اوخشايير.
• بير آتالار سؤزو واردير: «اؤزگه ني بزر، اؤزو لوت گزر!»؛ منجه او آذربايجانلي آيدين كي، ديلداشي اولان آيدينلار و يا چاليشقانلار ايچين، يارقي، اؤنري و تاپشيريغيني توركجه يازمايا، و فارسجا دئيه: «آذربايجانين اينتلئكچوالي آزدير!»، يقين بيلين كي تكجه دوشمانلاري گولدوره جك! بو قدر ايدديعا ائديريك ايشيميز كولتورل، مدني و ... دير و آذربايجان خالقي ني اؤيرنجيسل حركاتينين ائتگي سينده شوونيسم قارشيسيندا قالخيب، سونرا باشقا ديلده دئييريك بو خالقين آيديني آزدير! بئله يازيلار، ائله فارسلار دئميشكن، دووارلاردا كي جيريق آرالارينين دردينه، ده يه ر.
آشاغي دا اوخوياجاغينيز يازيلارين، يوخاري دا كي سؤزلرله، هم ربطي واردير و هم ربطي يوخدور؛ ابطحي، خاتمي نين ان ياخين يولداشي و ان اؤنملي يارديمجي سي ايدي و ايندي ده اصطلاحا ايصلاح طلبلرين ان آيدين آداملاريندان دير؛
وئبلاقين دا بو سؤزلري يازميشدير:
... ايران دا وئبلاق يازماغين آلين يازيسينا فيكر ائديرديم. بوترابي اؤزل مارغينا گؤره بير سايتين مودورلوغونو الينه آلميش كي اوندا 780000 دنه فارسجا وئبلاق واردير و اونلارين 170000 دنه سي چاليشماقداديرلار. يور يئتميش مين ايرانلي نين فارسجا يازيلار توليد ائتمه سي چوخ بؤيوك بير ياتيريم(سرمايه) دير. وئبلاق يازماغين ان بالاجا ايشي، فارسجا ديلينين گئنيشلنمه سي دير...
-----------------------------------
* ) آيدين و يا اينتلئكچوال ايچين، ويكي پئديا سايتيندان آچيقلاما: آيدين او آدام دير كي اؤز دوشونجه و ايدراكيني، اؤز «ايش»، «اوخوماق»، «باشقا آداملارا قايتارماق» و «آنلاييشيندا» ايشه آپارا و يا بيليب - بيلمه ديكلريني باشقا آداملاردان باشقا و چئشيدلي دوشونجه لره سايقي گؤسترمك ايله سوروشوب و جاواب وئره.
گئنل اولاراق، آيدين ايچين اوچ دنه يئني و مودئرن تعريف واردير:
1- بوتون ياشاملاريندا، ايده لر، كيتابلار و دوشونجه لر ايچينده، درينليك ايله باتان آيدينلار.
2- بير آچيقلامالي حيطه سي كيلاسيندا اولان يازارلار، سؤزچولر(ناطيقلر)، اوستادلار، وكيللر، دوكتورلر، بيليمچيلر(عاليملر) و بئله آداملار.
3- كولتورل ساحه سينده اولان آيدينلار كي كولتور و اوزلوق(هونر) دا، سئچكين و يوكسك ايشلري اولموشدور و بو اؤزل ايش اونلارا كولتورل بير گوج و اختيار وئرير و قازانميش اعتبار و اختيار ايله، توپلوم ايچينده باشقا قونولاردا ايسه دانيشابيليرلر.
