توركجه اوخشاما ال يازمالاري

حساسييتلرين چوخ اولماسي، و باشقا طرفدن بيلگيمين آز اولماغينا گؤره ايسته مه ميشم، مذهب و دين قونوسوندا گؤره بير شئيلر يازام؛ آنجاق محررمليك ده اولاسان، و بو گونلره گؤره بير شئي يازماياسان، اولمور كي اولمور! اينتئرنت واسيطه سي ايله اليمه چاتميش ايكي دنه گؤروت ، باعيث اولدور بو قونو دا نئچه سطير يازام.

ايمام حوسئين اوچون قورولان مراسيملر و آنمالار يقينا آذربايجان توركجه ديلينين قورنماسيندا چوخ بؤيوك و تاريخي بير رول اويناييب و جورءت ايله دئمك اولار محررم ده بو مراسيملر هر ايل ياشانماسايدي، آذربايجان توركجه سينين اصلي سوتونلارينين بير يسي ده اولماياجاق ايدي.
اونوتماميشام اوشاقليقدا كي ائله بيلرديم بوتون يازيلار گرك فارسجا و يا عربجه و يا اينگليزجه اولمالي ديرلار، شبئه چيخاردانلارين توركجه اوخويوب -دانيشماقلاري مني همشه تعججوبلنديرردي! اللرينده كي بالاجا كؤهنه كاغيزلارا گيزلين باخارديم و گؤررديم كي گؤزل خط ايله(ميرزه خطي دئيه رديك!) توركجه يازيليبلار.

عاشورا آخشاملاري دا بير باشقا شئي مني لاپ تعججوبلنديرردي. ايمام حوسئنين جسديني بير تابوتا قويوب و عربه خوزان آدلانان مراسيمده عرب اويونو چيخاردارديلار و تكجه بو مراسيم توركجه اوخوماق آز اولاردي. و مرثيه لرين چوخو فارسجا و عربجه اولاردي. ياني بو مراسيمي بيز يوخ بلكه عربلر اؤزلري ايجرا ائليرلر...

اون-اون بئش ايل او زامانلاردان گئچيب و ايندي مراسيم دوشوب قيشا، و اورانين شاختاسيندا تؤرنلر يقين كي آيري بير شكيل ده دير. بو گؤروتلري ايكي دنه ال يازما و اسكي كيتابدان سالميشلار. بئله سانيرام بو كيتابلار كيمي، مينلر باشقا ال يازما كيتاب، آذربايجانين بوتون يئرلرينده داغينيق ديرلار؛ حالبوكي بونلار تورك ديلي ادبيياتينين تمللريني گوجلنديره بيلرلر؛ آنجاق يازيقلار اولسون كي تئكنولوژي (قوراشديريم) چاغيندا گوجلو بير هيممت يوخدور بونلار ايسكن اولسونلار:




بير باشقا سؤز:

آذربايجانين هر نه يي ني دانان دوشمانلاري، دئييرلر شيعه مذهبي ني شاه ايسماييل قيلينج گوجو ايله، ايران دا ياييب و بئله بير فيكير چوخدان ايدي مني اذييت ائديريدي. آنجاق سيز ده بيليرسينيز كي اربيلين 10-15 كيلومتئيرليگينده هله سوننولر ياشاييرلار و آزادليقلا اؤز مذهبي ايشلريني گؤرورلر. او كندلرين بيريسينين آدي آنباران دير و يئرليلري تاليشديرلار. كيوي و خالخال كندلرينده حتتا تورك ديللي سوننو ده واردير. اؤرنك ايچين كويونون «هئشين» و خالخالين «هئشه يين» بؤلمه سي نين ياري سي سوننودورلر.
شاه ايسماييل اونلاري قولاغي ديبينده گؤرموردو مو؟! يا بير فرض ده اولابيلر: اونلار قورخودان شيعه اولوبلار و سونرا مذهبلريني ده ييشميشلر! ياخشي! باشقالار بو ايشي گؤه بيلمه زديلر مي؟!!
سيز نئجه دوشونورسونوز؟

آزاد دوغولان اینسانا قاندال نه گرک دیر

آزاد دوغولان اینسانا قاندال نه گرک دیر...
(دوکتور زهتابی)

آذربایجانین تاریخی دولودور ظولمون قارشیسیندا دیز چؤکمه یه نلرین آدلارینا؛
بایبک لـر، نسیمی لـر ، ختایی لر، ستارخانلار، باقیرخانلار، ثیقه الاسلاملار، پئسیانلار، خیابانیلار، حیدر عموغلولار، صفرخانلار و بیر چوخ آدسیز آداملار. بو ایلین اولوسال و مدنی قالخیشی دا گؤزوموزون اؤنونده دیر. بیر چوخ سایی وطنداشلاریمیزین باشینا گلن اویونلار، عاشورا گونلرینی یادیمیزا سالیر.
یقین کی ايمام حوسئینین آزادلیق سئورلیگی و فاشیسم قارشیسیندا آیاغا قالخماغی، آذربایجانلیلار ایچین ان بؤیوک سمبوللاردان اولموشدور؛ ائله کی محرم گونلرینده، آذربایجانلیلار دونیانین هر یئرینده اولسالاردا، امام حوسئینین یادینا و عزاسینا قورولان بؤیوک ییغینتیلار و دسته لر قورورلار؛ و البته کی آذربایجانین ایچینده، هر جوره تؤرن و مراسیمین تورکجه دیلینه اولماغی یاساق اولورسا دا، محرم گونلرینده، تورکلر تورک دیلیندن باشقا، هئچ دیلده نوحه و اوخشاما دئمیرلر و بونا گؤره، محرم آیی، آذربایجان دیلینین دیری ساخلاماق سببلریندن اولموشدور.
بو قوتسال گونلر ده، شوونیسم قارشی سیندا قانداللانمیش دیز چؤکمه یه نلرین، بوراخیلیب، آزاد اولماقلارینا دوعا ائدک.

ائشیکدن طبل-مبل سسی گلیر و هاواسیم دا بیر یئر ده دئییل. من ده ماللا اولوب، منبر اوستونه چیخماق ایسته میرم و مذهبی سؤزلری دانیشیب، اوزاتماق دا باشارمیرام! "یالنیز آتیلا"، امام حوسئین عزاسینا گؤره ده یه رلی بیر کیلیپ دوزلدیب و وئبلاقینا قویوب؛ حتما گئدین باخین. اجرینیزی ایمام حوسئین وئرسین.

http://www.yalniz-atila.blogfa.com/post-24.aspx

«همشهري» ده بتر ياشاتدي، اللري آغريماسين!

عاشورا دان، سؤز گئتدي، گئچميش ايل يازديغيم «ياشاسين همشهري»، ياديما دوشدو! تك باشينا بئله هاي سالديم كي ائله بيل ايران توركلرينين موشكوللري بير ايكي گئجه ده چؤزوله جك! بير پارقيراف دا مين دفه دئديم ياشاسين ، قوتلو اولسون! آخي نه قوتلو اولسون! من نه ساده ايميشم! اوتانمازلارا بير سؤز ده دئسين، ميننت ده قويارلار!

بيلديگينيز كيمي، ا‌‬ؤتن ايل همشهري گونده ليكي، محرم گونلرينه خاطير بير توركجه ا‬ؤزل سايي سي يايماقلا، توركجه اؤزل سايي يايماق باشلانماغينين خبريني وئردي. من ده بير دئيه ن يوخ ايدي، بو مملكت ده ايندي يه قدر چوخ سؤزلر دئييليب و عمل اولماييب، دايان اقلا ايكينجي سايي سيندا وورسونلار، سونرا ياشاسين ياشاسين سال! يازيق كئيهانين «يول»ـو و ايطيلاعاتين «سهند»ـي، نئچه ايله قدر داوام تاپدي! آنجاق همشهري نين اؤزل سايي سي هم ايلكين سايي ايدي هم ده سونونجو؛ اولا بيلر، او درگي نين ايلك صحيفه سينده كي كيشي، تكجه محرمه گؤره، آغلاييب سينه سينه وورمورموش و بير نه دني(دليلي) ده، بو ايميش.

البته بو نو دا دئييم، منجه همشهري نين توركجه اؤزل سايي سينين يازارلار قورولوشوندان ياخشي معنوي-مالي يارديم اولماييب. يوخسا ايرانين باشكندينين ياري جماعتي تورك اولدوغو يئر ده، ياني بير يوز مين نفر تاپيلماياجاقدي همشهري نين توركجه درگيسيندن آلسينلار!؟

بو سؤزلر، گؤزو باغلي و موفته سينه آلقيشلاماماق ايچين يازيلدي.