یانداشلار

هله ده توركييه‫نين ژاپون-کوره 2002 دونیالیق کوپاسیندا، الده ائتديگي باشاريلاري‫نی اونوتمامیشام... او زامان دئييرديلر توركييه شانس گتيریر! بیلی‫یورد دا دئییردیک اولابیلر ایرانلی تورک قهرمانلاری‫نی به‫یه‫نمه‫یه‫نلرین گؤزلری، کسینلیکله سینیرین او تایینداکی تورکلری، گؤتورمه‫یه‫جک و اینشاللا گله‫جکده بئله اولایلارا عادت ائله‫سینلر.
اؤتن هفته گؤرورم کی گئرچکدن ایران دا ائله پیس دوارانیشلار آرادان گئدیر؛ رادیو دا فوتبول یاریشلاری‫نی گزاریش ائدن بیر ایصفاهانلی، لاتینجه یازیلمیش تورک آدلاری گتیرمیش‫ایدی، کی من اونوچون اونلاری تلففوظ ائدیب، اؤیره‫دم؛ کی بیردن تونجایا تونکای، یا شن‫تورکه سن‫تورک دئمه‫سین! البته او گئجه تورکییه–چئک یاریشی‫نی او گزاریش ائتمه‫دی، و پورتوقال – ایسوئچی بیر آز جانلاندیردی! اونا دئمیشدیلر تورکییه-چئکین اؤنمی چوخدور و اصلی گزاریشچی‫میزه وئره‫جه‫ییک(گزارشگر و گزارشین تورکجه‫سینی بیلیمیرم، بیری منه دئسین)!
گئجه‫ یاری‫سیندا ایسه، تورکییه قول ووراندا، فارس تانیدیغیم قونشو ائولردن، آلقیشلاما سسی ائشیدیب و تعججوب ائدیردیم!

آنجاق بو باغلانتی‫یا باخاندان سونرا، سؤزلریمین قالانی‫نی آشاغی‫دا اوخویون...

توركييه اولوسال فوتبول تیمی‫نين يورو2008ده، آلقيشلامالي باشاريلاريندان جيريليب گؤينه‫يه‫ن شارلاتانلارين بيري‫سي گليب ايرانلي توركلرين بو ظفرلرده دوغال سئوينجي‫نی سورغو آلتينا آپاراركن، اونلاري بؤلوجو آدلانديريب! اولمایا یوخاری‫دا دئدیگیم تورکییه‫نین ظفرلریندن سئوینه‫ن فارسلار دا بؤلوجودورلر می؟!
البته ايندي بئله دئمک ایسته‫مه‫زدیم کی: "بيري‫سي يوخدور كي بونلارا دئسين پس سيز نه‫يه اؤز قونشو و مسلکداش اؤلكه‫نیزي اؤتوروب سیزینله هئچ جوره ایلیشگی‫سی اولمایان آوروپا تیملرینین یانداشی اولورسونوز؟! اولمایا اؤزونو اونودوب و یابانجیلارا وورولموش آداملارا چئویریلمیش‫سینیز؟" دوز دور کی بئله بیر یانیتلار اونلارین پاخیللیقلاری و گیجیکلری قارشیسیندا دئییله‫بیلر، آنجاق بو ده اولار کی اونلارین آرتیق یانیلماسی ایچین، اصلا سایمایاسان! آخی فوتبولو سئون بیر ایرانلی تورکون، یورو 2008 ده اؤز دیلداشلارینین باشاریلاریندان سئوینمه‫مه‫یی عجیبه-غریبه اولار.
قونشو و قارداش اؤلکه‫میز تورکییه‫یه، کرواسی و باشقا تیملرین قارشی‫سیندا، فینال یاریشیناجاق، باشاریلار و اوغورلار دیله‫ییرم.