Monday, November 12, 2007

دئمک اولمور بو سؤزو

نئچه آی بوندان اؤنجه، ائوین شئه‫وئرن لوله‫لرینی ده‫ییشمک ایچین نئچه لوله‫چکن گلمیشدی. ایکی-اوچ گون‫ده، گون چیخان چاغدان، گئجه آخشاماجاق ایشله‫دیلر؛ هر دن بیرآز میزیلداییب، دانیشیردیلار. اوجا سس ایله بیری بیرلرینی چاغیریب-دانیشاندا فارسجا قونوشمالارینداکی لهجه‫یه گؤره ائله‫بیلیردیم کورتدولر.
آرادا موبایللاری هر دن ده بیر زنگ ووروردو. زنگلرینین بیریسینده گؤردوم کی تورکجه دانیشیرلار! سوروشدوم هارالی‫سینیز؟
تورکوک! کؤکوموز همدانین باهار بؤلگه‫سیندیر، دئدیلر!
...
او گونلر منیم وئبلاق یازماغیمین لاپ قیرقین چاغلاری‫ایدی! من ایسه اونلارین چالیشمالارینا باخارکن، بو فیکره گئتمیشدیم اولوسوموزون یوزه دوخساندان چوخو بئله اولابیلرلر! ائله‫بیلیردیم من کیمی آداملار اولماسالار، بونلار کیمی ، گونلر، بیر تیکه چؤرک دالیسیجا چالیشمادا ، و یا گئجه‫لر، یورقونلوقدان کاسیبین بختی کیمی درین یوخولاردا اولان آداملار، هئچ کیمسه اولماز کی دیلدن، اولوسدان، یورتدان، کیملیکدن، وارلیقدان، حاقدان و ...ـدان دانیشسین!!
من ایسه بیر آیا یاخین‫دیر، او تانری‫نین بنده‫لری، تقصیرسیز باهارلی لوله‫چکن‫لر کیمی باشقا آداملارین من‫ایچین پیلانلادیغی یاشام‫دا بوغولموشام! هر نه یاددان چیخیر و هئچ ایش گؤرمک اولمور. آلتی-یئددی ایل بوندان اؤنجه گؤردویوم بیر اسکی اؤیرنجی، بلیرسیز بیر نه‫دنلره گؤره توتولدو؛ تکجه ائشیتدیک. صفرخانین اؤلومونون بئشینجی ایلد‫‫ؤنومو گئچدی، تکجه یادا دوشدو. بیری‫سی دئدی تورکمن دیلینه گؤره بیر قورولتای وار، گل گئدک اورا! اوره‫ییم‫ده، "اؤز چتینلیکلریمیز چؤزولدو قالدی تورکمنلرینکی"، دئیه‫رک، " بیر ایشیم وار، تأسسوف ایله گله‫بیلمه‫رم" دئدیم! گلن گونلر ده ایسه ستارخانین آنما تؤرنی‫ قورولاجاقدیر و ...
نه قدر بهانه گتیرمک، آسان اولورسا، چاغیرانین بیری‫سی ایسه هئچ تاپیلمازسادا، آدام اؤز وارلیقلارینا ساری بو سؤزو آتابیلمیر: "ال چکین مندن".

1 comment:

Anonymous said...

سیزین یازدیقینیز کاملا دوزدور. چوخ واختلار ایکی تورک بیر بیریله دانیشیر، ال اله سورتور آما آرالیق دیلی فارس توتدوقلاری اؤچون اوبیری آدامین تورک اولدوغونو بیلمیرلر. دوغروسو طهرانداکی اهالینین چوخو تورک اولدوقلاری حالدا اؤز سایلارینین چوخلوقونا واقیف دیللر. یادیمدا انقلابدان قاباق بیر اورمیه لی دوستوم یدالله ایله یای تعطیللرینده طهرانا گئتمیشدیم. یدالله بیر چوخ میرت و زیرنگ بیر اوغلانیدی و لاله زار خیابانیندا گدرکن دانیشیردیق کی بو جماعتین یاریسی بلکه ترکدیلر.. یدالله بیر تومن لیق سکه نی الینه آلدی و گلیب کئچندن تورکجه سوروشوردو "آقا ایکی قرانلیق واریویزدی؟" چوخ گولمه‌لی وضعیدیر، آداملارین چوخو تورکجه نی گوزه‌ل آنلایردیلار و ترکجه جواب وریردیلر، آما آنلایان و فارسجا جواب ورن ده واریدیر. بیر سیرا دا ایله بیر کی غافلگیر اولوب گیزلی هویت لری بللی اولوب دور بیلمیردیلر نه ایلسینلر .

مهرداد
az.wikipedia.org

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı