تورك قادينلار و قادين حاقلاري

بيزلر شوونيسم قارشي سيندا موباريزه آپاراندا، طبيعي دير كي تكجه تورك کیملیگیندن دانیشیب و هاراي هاراي من توركم باغيراق. چونكو شرفلي بير اينسان، زور آلتيندا بوتون حاقلاري الدن وئرنده، اليندن گلن و گؤرمه لي ايلك ايشي، وارليغيني قوروماق دير و بو ايش، بونو گؤسترمز كي باشقا آرامانلاري و هدفلريني اونودموشدور. مثلا بير ائو اود توتاندا، و اونون اودونو سؤندورمك ايمكاني اولماسا، گرك باشقا اينسانلارين ائودن ائشيگه قاچماغينا يارديم اولاق و بو ايشين يئرينه، مال و ثيروتيميزين فيكرينده اولماق، شرفسيزليك و يا آخماقليقيميزي گؤسترر.
آنجاق هامي ميز بيليريك شوونيسمينين ائتديگي تبليغلره گؤره، آذربايجانين مدني و توپلومسال حركاتي، اولتراناسيوناليستي و حتي فاشيستي تانينماقدادير و بونا گؤره آذربايجانين دوغرو ايستكلرينين داليسيندا اولانلارا واجيب دير باشقا اينسان حاقلارينا دا گوجله تاكيد ائتسينلر. اؤرنك ايچين بيري سي قادين حاقلاري دير.

بو سؤزلري تورك بير قادينين وئبلاقيندا، باخيش و يوروم اولاراق يازديم:

آذربايجانلي قادينلارين چاليشمالاري لاپ چتين دير منجه، چونكو:
1) هم كيمليكلريني، وارليقلاريني و ديللريني قورومالي ديرلار.
2) هم قادين حاقلاريني ايسته مه لي ديرلر.
3) و بوتونلوكله دوغال اينسان حاقلاريني آلماق و دموكراسي قورولماق يولوندا آدديم آتمالي ديرلار.

يوخاري دا كي ايكينجي و اوچونجو سؤزلر، هئچ بيري سي آذربايجانين گئرچك چاليشقانلارينين ايستكلري قارشيسيندا دئييلدير و البته كي بونلار، آذربايجان دا كي مدني چاليشمالارينين قاباغيندا كي انگللري، ساده جه آرادان آپاراجاقدير.
هر ايكي آذربايجانلي دان بيري سي و هر يوز آذربايجانلي دان 50سي قاديندير. بيز ده هميشه ايران دا كي توركلرين سايي سي ني 30ميليون دان آز بيلميريك! بو 30 ميليونون 15 ميليونو قادين دير. موباريزه نين گوجلو اولماغينا، اونلارين قاتيلماغي چوخ اؤنملي دير و بونو دا بيليريك، دؤولتي سيياستلر دن اؤنجه، آراميز دا بير اسكي و منطيق سيز فيكير واردير و او دا قادينلاري حيسابا قويماماق دير و البته يئرسيز تعصوب و كولتور بونا باعيث دير. بئله دوشونجه موطلق آرادان قالديرمالي دير.
سيز فيكر ائدين بو ايلين يازسونو (خورداد) مدني قالخيشلاريندا، قادينلار دا خيابانلاردا اولسايديلار حركت نه گوجلو اولابيلردي. البته بونو آرتيرمالييام ايران دا آذربايجان دا كولتورل دوشونجه، باشقا يئرلردن داها يوكسك دير ، آنجاق اصلا يئترلي دئييل. ياديمدادير كي بيلي يورد دا، اؤيرنجيسل توپلوملار و تؤرنلر قوراندا، قيزلارين حوضورو هميشه چتينليك ياراداردي! اوزونو روشنفكر و منورالفيكر بيلن(بير سايي) چاليشقانلار، دئيه رديلر قيزلار فقط باخماغا گلسينلر و ايجرائييات دا ال-آياغا دولاشماسينلار! چونكو بير عيدده قيزبازليغا گلير و بو بيزيم قوتسال حركتي خاراب ائدير! حالبوكي قيز-اوغلانين بئله ايليشكي لري دوغال(طبيعي) دير و بئله ساده مسأله لره حساس اولمامالي ييق.

ساواد مسأله سي

آذربايجان دا كي قادينلارين ساوادلي اولماسي دا چوخ اؤنملي دير. تانيديغيم چوخلو توركلر وارديلار كي آنالاري ساوادسيز، قورآن اوخوماق ساوادي و يا ابتدايي ساوادلاري واردير. بونلار ايران راديو-تيلويزيون دا كي وئرليشلريندن بير شئي دوشونمورلر! منجه بير خئيري و بير پيسليكلري واردير. ياخشي ليقلاري بو دور كي فارس كولتوروندن آز خبرلري وار و اوشاقلارينا آذربايجانين ديل و فولكولورونو اؤيرتمك ده ياخشي روللاري وار. آنجاق پيسليك ايسه بو دور، بونلار فارس قادينلاري گؤرنده، اؤزلريني ايكينجي درجه لي ده يوخ، اوچونجو درجه لي بير آدام سانيب و اؤزلرينه ايلقاء ائديبلر هئچ حاققا لاييق دئييللر! و بو دئموكراسي يا و هر نه يه ضربه وورابيلير.
ايكينجي قوروپ دا نيسبي تحصيلات ائدنلردير. بونلار فارسلار دئميشكن ايكي لبه لي قيلينج(شمشير دو لبه) كيمي ديرلر. آذربايجانلي اوشاقلارا فارسي اؤيردنلرين دليلي بونلارديرلار. بونلار، آز بيلگي لره گؤره و اؤزلريني اودوزماق و ايتيرديكلرينه گؤره و ايكينجي درجه لي وطنداشا دؤنمك ايچين فارسي دانيشماغي بير «كيلاس» بيليرلر . ارلري ايله، يولداشلاري ايله و اوشاقلاري ايله ائو ده و ائشيك ده فارسجا دانيشماسا لار دا، ياستي بير لهجه ايله دانيشيرلار‍! اؤزلريني موطلق تاپشيريبلار آسيميلاسيون ماشينلارينا! البته بو طبقه ده چوخ آز آدام گؤرموشم كي آذربايجانين مدني، توپلومسال و كولتورل چتينليكلرينه فيكر ائتسين. منجه بونلارين فارسجا ساوادلاري اولماسايدي، خئيرلري بوندان آرتيق ايدي.
اوچونجو قوروپ كي تانيرام، آذربايجانين آيدين دوشونجه لي قادينلاري ديرلار. بئله آداملاري تكجه بيلي يوردلار دا، آذربايجانا گؤره قورولان كولتورل-توپلومسال تؤرنلرده و يا اينترنت سايتلاردا گؤرموشم.
بو آز سايي ني، نئچه ميليونا چوخاتماق يولونو بيلميرم واللاه. تكجه بئله دوشونورم تورك قادينلارا، «قادين حاقلاري»ـنين اؤده مه يي نه گؤره دانيشماق، باشقا سيياسي – جتماعي چاليشقانلاردان اؤنجه، آذربايجانلي آيدينلاري طرفيندن اولمالي دير. بو يولدا اونلار ايچين دورو و صاف ايشله مه لي ييك. دوز دور يوخاري دا كي سؤزلره گؤره، ميللي دوشونجه قادينلار آراسيندا آز گؤرونور؛ آنجاق آرخايينليق لا دئمك اولار، بو ، همن كولتورل چتينليكلره دير كي قادينلار توپلومسال چاليشمالارا قاتيلابيلميرلر و يقين كي اونلارين دوشونجه سي يوكسلميشدير. بونو بيلمه لي ييك كي آذربايجانين چاغداش ناييلليتلرين دليلي، تكجه اؤيرنجيلر، آيدينلار و تجروبه لي چاليشقانلار يوخ و بو آرادا بوتون قادينلار دا آدديم آتميشلار؛ چونكو بو حركتلر گئنل و توپلومسال حالته چئويريلميشلر، و اؤزل بير قوروپ و طبقه ايله، ايليشكيلري يوخدور.