61 ايل بوندان اؤنجه:
گوز سونونون سؤيوخ گونلري دير. چيلله نين سويوغو اؤزوندن قاباق گلميشدير. شاختايا گؤره، ائشيگه چيخماق اولمور. دئييلير تندير واختي دير. هامي ائو ايچين ده كورسولره گيريبلر. اوشاقلار، بؤيوك آتالار و آنالارين دئديگي ناغيللارييلا، گئجه لري دانا(صاباحا) چاتديريب، آذربايجانين اوزون قيشي نين سونا چاتماغيني گؤزله ييرلر.
¯ ¯ ¯
دونيا ايكينجي ساواشي قورتاريب دير، آنجاق آذربايجانين ساواش دا دخالتي اولمايان خالقي دا بو دونيانين ايچينده اولاراق، آماني كسيلميشدير؛ پيشه وري و اونون يولداشلاري نا، تهرانين ميللي شورا مجليسينده اعتبار وئرمه ييبلر و دئييرلر، سيز تبريز ده اوتوروب آذربايجان چتينليكلريني چؤزه بيلمزسينيز، بيز اؤزوموز ، كي اليميز اوزاقدان اود اوستونده دير و اينگيليس تؤرمه سي اولان آريامهر شاهنشاهين كؤلگه سينده، آذربايجان يوخ، بلكه بوتون ايالتلرين آجليق، ساوادسيزليق، ايش سيزليك و باشقا بوتون فلاكتلريني حل ائده جه ييك!تبريز ده دموكرات فيرقه سي، ميللي آدلانميش حكومتي قورماق و آياق اوستونده ساخلاماق زوروندادير.
آنجاق خالخالليلار هله ده، دوز بيلمه ييرلر هميئرلي باش وزير نه جور آدام دير؟ كيمه باغلي دير؟ نه ايسته يير؟ آراماني نه دير؟ مسلكي نه دير؟ سؤزو نه دير؟ رضاخان طرفيندن، باشينا نه اويونلار گتيريب؟ اونلار خبرسيز ديرلر بوندان كي فدرال سيتمي ايسته ين دموكراتچي لار ان قيسا زامان دا آذربايجان ايچين نه ايشلر گؤره جكدير؟ آناديللي لريني رسمي ائده جك و اوخوللاردا بير داها تدريس اولوناجاق و اوشاقلار اؤيرتمنلردن قورخوب قاچماياجاقلار. آذربايجانين ايلك بيلي يوردو تبريز ده دوزله جكدير. يئني اكينچيليك سيستملري ياراناجاقدير. خالقين ساغليقي يوكسله جكدير. آنجاق اونلار ائشيديبلر كي پيشه وري باكي دا درس اوخويوب و كومونيست دير و اسلام دوشماني دير، ايمانسيز ايستاليندن يارديم آلير. كيمسه اونلا اولورسا، كافر دير. بير بهانه گؤرسنيرسه يئتر؛ بونون ده عئيبي يوخ كي شاه و قوام السلطنه ده اينگليسلردن كؤمك آليرلار!
بهانه دئديم! بير ياندان دا دموكرات فيرقه سينين اوزاق بؤلگه ده كي عسگرلر و مامورلارينين بير سايي سي، اؤز گؤرولريني دوغرو گؤرمه دن، بير ايشلر گؤرورلر كي دئييلسين بورا دا كي عسگر بئله اولسا، گؤره سن تبريز ده كي ناسيل دير؟!
¯ ¯ ¯
قاپي اوجا سس ايله دؤيولور.آتا قاپي ني آچير؛ قاپي نين داليسيندا اوجا بويلو بير كيشي، اسلحه الده دورموشدور. رضاخان زامانيندا ائتديگي عسگرليك ، يادينا دوشور؛ آرواد اوشاق و آتا آناسيندان اوزاق اولاراق، نئچه ايل رضاخان قوشونوندا خيدمت ائتميشدير. خاطيره لر و نفرتلري ديريلير. عسگر، عسگر دير! شاه عسگري اولورسا اولسون، يوخسا پيشه وري عسگري!
جاوان كيشي يوغون سس ايله كي كولك ده، ياخشي بيلينمير، دئيير: من يئني حكومتين عسگرلريندنم و خلفلي كندينه(كيوي/خالخال كندلريندن) گئتمك ايسته ييرم. اورادان يولداشلاريملا، اردبيله ساري يولا دوشه جه يم. ائشيتديم سيزين بير آت وارينيز. آتينيزا خلفلي يه قدر احتياجيم واردير. اؤزونوز گليب اورادان آپارارسينيز.
آتا اوزگونلوكله دئيير: بو آت اولماسا بيزيم ياشاييميز فلج اولار. سن كي حكومت عسگري سن، دؤولتدن آت آلمالي سان، كندلي لردن يوخ...
¯ ¯ ¯
بو قيسسا خاطيره لري بونا گؤره يازديم بير دليل دئيه م كي نئيه او زامان دموكراتلارين خالق آراسيندا ياخشي نفوذو يوخوموش. بو گونلر چوخلو قيسسا ساو و ايميل گلير و آذربايجان سايتلاريندا يازيلار ياييلير و البته هاميسي بيريجي 21-آذري قوتلاييرلار. هئچ بيري سي ايكينجي 21-آذر ايله ايشلري يوخدور. هئچ كيمسه شاهنشاهي قوشونلاري ائتديگي جينايتلردن و سوي قيريملاردان دانيشمير.
60 ايل بوندان اؤنجه:
دونياساواشي باشلانانداكي، دونيانين ان غئيرتسيز عسگري اولان شاهنشاه قوشونو، 1325جي ايلين آذر آيينين 21 ده، آذربايجان دا آصلانا دؤنموش چاققال اولموشدو. پس او آصلانلارين باشينا نه گلميشدي؟! بوندان دا كيمسه سؤز آچمايير.
آدلاري كومونيست اولمايان تهران دان گلن شاهين آدي موسلمان عسگرلري، تبريزده چوخلو قان توكورلر؛ دئييرلر آذربايجاني، يابانجيلارين اليندن قورتاراندان سونرا، آذربايجان خالقي نين ديلي، گئنه ده رسمي قالاجاقدير! تبريزليلردن ايسته ييريك ائولرينده كي بوتون توركجه كيتابلاري گتيرسينلر تا اونلاري قايناق توتاراق، يئني دن اوخوللار و مكتبلر ايچين، درسليك كيتابلاري يازاق!آنجاق تبريزلي اوشاقلارين آغلار گؤزلرينين قارشي سيندا، قالانميش كيتابلارين آلاولاري گؤيه قالخيرميش! تاريخ بئله بير جينايت گؤرمه ميشدير. بئله شرفسيزليك تايسيز دير. بير ميللتين آناديلينه يازيلميش كيتابلاري، آناديللريني دئييشمك ايچين يانديراسان. آلمان فاشيستلري بئله بير ايش گؤرمه ميشلر كي آريامهرين مواجيب آلانلاري ائتديلر.
ولي گون بولوت داليسيندا قالماياجاقدير؛ نه گؤزل دئميشلر بو سؤزو، بيزيم ساده و دوروست آتالار.
قوي تاريخين درسليك كيتابلاريندا، هر نه يي گيزلتسينلر! قوي تكجه مشروطه نين قوندارما تاريخيندن، تنبكي قياميندان، جنگلي ميرزا كوچك خانين بؤلوجولوكوندن، بست نشيني لردن، نفت صنعتينين ميللي اولماغيندان و ... بوتون باشقا ديه رسيز سؤزلري اوزاتسينلار و اؤزلري دئديكلري ايرانين باشي اولان آذربايجانا نوبت يئتيشنده سوسماق مرضي توتسونلار!
اؤزلري ده بيليرلر كي تكجه، دوشونجه و اويانيش دير كي اؤز ايشيني گؤروب و گؤره جكدير.
آيدين . ك
آذر آيي نين 21 نجي گونو - 1385
