Hanı açar sözcüklər?

URL adresini buraya qoymayıram az link yesin! Bu da qalsın kı olduqca görəni olub.

Filmi çəkən Farsca danışır: "inja orumiyye! ağa bia invər!". Cəmaatda bişərəf-bişərəf deyirlər! Filmi yayanda bir dənə Azərbaycan açar sözü işlətməyib!
Sonra gəlin deyin nəyə Azərbaycanın işi başqaların kamına olur!

Qərar olsa kötəyin biz yeyək, ama bir yaşıl-maşıl damda "Ağa bia invər - bia invər" eliyə, və filmi yayanda da bir dənə Azərbaycan adına işarə etməyə, elə yaxşıdır yataq, yel düzü savura dilsiz başımıza!

Ən azı bu filmləri özümüz paylaşanda hətmən Türk, Azərbaycan, və Urmu Gölü kimi adları hətmən yazaq.
Bundan belə tarixi İnternet və Google-un robotları yazacaqlar.

Yaşasın Urmu Gölünü Yaşadanlar

تيراختورون 1390جي ايلده‌كي اويونچولار انتقالاتي‌نين ده‌يه‌رلنديرمه‌سي

ياخشي! آللاه دئيه‌ن اولسا تيراختورون انتقالاتي‌دا سونا چاتدي. البته تيراختورا قوشولموش سون اويونچو، رابسون چاوئز سانتانا، دوزدور به‌ته‌ر فوتبوللوق و منچئستئر سطحينده آدي واردير، آنجاق اينتئرنئت‌ده تانینمامیش بیر اویونچو کیمی ایدی، و تیراختورا گیرمه‌میش آدلانمیشدیر! ايستانبول‌ اوردوسوندان دا خبر گلير اونون قراردادي ائله بيل فسخ اولاجاق!

هر حال‌دا انتقالاتدان سونرا، هر كيمسه بير نظر وئرير؛ و اوست-اوسته هامي راضي‌ديرلار! آنجاق منجه، بوتون گئدنلر، گلنلر، و قالانلارا گؤره تك-تك امتياز وئرمه‌لي‌ييك. گئدنلرين امتيازي چوخ اولسا ياني تيراختورون دورومو ياخشي اولماياجاق. البته بونو دا نظر ده آلمالي‌ييق تيراختور همشه كيمي معمولي اويونچودان كرار جاسيم چيخاردير! بير سورغولاما فورمو دوزه‌تديم بورادا. يانداشلاردان اوتوز-قيرخ نفردن چوخ بورادا باخيشلاريني گؤسته‌رسه‌لر سونوج‌دا دئيه‌بيلريك گئنل نظر و ده‌يه‌رلنديرمه نئجه‌دير:






تيراختورون 1390جي ايلده‌كي اويونچولار انتقالاتي‌نين ده‌يه‌رلنديرمه‌سي
ارزيابي نقل و انتقالات تيراختور در سال 1390
http://kwiksurveys.com?u=Tiraxtur1390-TractorTransfers2011

کرار گئتدی تئهرانا؛ بیز هارا گئدک؟

یالان یوخسا دوغروسونو تانری بیلر، بیر ده کرار جاسیم. 
خبرلر ده کرارین دیلیندن یازمیشدیلار، تبریز ده عرب دیللی و یا عیراقلی‌لارین اوخولون اولماماسی، و کرارین اوغلونون مدرسه‌یه گئتمک یاشینا یئتیشمه‌سینه گؤره، تیراختورون پارلاق اولدوزو تبریزدن گئتمک زوروندا. او پولا گؤره تیراختوردان آیریلیب و بونو بهانه ائتسه‌ده، سؤزون دوزو، یاخشی بهانه‌سی واردیر. ایسته‌ییر اؤز اوشاغی‌نی نورمال دوروم‌دا بؤیوتسون. خاطا ائله‌مه‌ییب کی تیراختوردا حد دن آرتیق آلقیشلانیب، و حد دن آرتیق یاخشی اویناییب!

آنادیلینده مکتبه گئتمک کیمی بیر دوغال حاق‌دان(حق طبیعی‌دن) سؤز گلنده، لاپ دوغال دیر کی "آنادیلینده مدرسه ایسته‌یه‌ن" تیراختور یانداشلاری کرار جاسیمین گئتمه‌یینه گؤره اعتراض ائده‌بیلمه‌ییب و سوسسونلار. و ماراقلی‌دیر یوزلر میلیون پول آلان کرار ائلیه‌بیلردی تیراختور سوروملولاریندان ایسته‌سین اوشاقلارینا بیر عرب دیللی اؤیرتمه‌ن ایشه توتسونلار. آنجاق ائله بیر آدام، اؤز اورگینده دئیه‌بیلر: "بونلار اؤز آنادیللرینده اوخوللاری‌ یوخدور، منیم اوشاغیمین آنادیلینده مکتب آچماقلاری پئشکئش!".

کرار جاسیمین تیراختور گئتمه‌سی تیراختور یانداشلارینا، تکجه "ایدمان و فوتبول" باخیمیندان، نئچه ساعات‌دان آرتیق اوزوجو اولابیلمز. چونکو تیراختور دا کرار دان بؤیوک اولدوزلار دا چیخیب و چیخاجاق. آنجاق "فوتبول‌دان اوستون" باخیمیندان یارانان اوزوجولوک بو تئزلیکده اونودولمایاجاق. نئچه یول جزالانان، یاساقلانان و منشورلانان کرار جاسیم ده بو اؤلکه‌ده اؤزونه بیر اوخول تاپابیلیر، آنجاق اونو آدلیم ائدن میلیونلار تورکون، اؤز آنادیللرینده بیر مدرسه تاپماق ایچین، بوتون یوللار باغلی‌دیر سانکی!

کرار گئتدی تئهرانا؛ بیز هارا گئدک؟

ساغ اولسون کمالوند؛ سؤزوموزو دئدی گئتدی

"فراز کمالوند"ین آدی، آزربایجانین تکجه ایدمان تاریخی‌ یوخ، بلکی کولتور و توپلوم ساحه‌سینده ده، بیر اونودولماز آد قالاجاقدیر. اونون یاخشیلیغی، پیسلیگی، باشاری‌لی، و یا باشاری‌سیزلیغی سؤز قونوسو دئییل. سؤزون دوزو، آزربایجان تورکلری‌نین آراسیندا ایندی‌یه کیمی هئچ کیمسه اولماییب، یوخسا اجازه تاپماییب، بیر گئنیش یاییلان تریبون‌دا، قیرمیز سینیرلاری ائشیگینده اولان بیر گرچک‌دن سؤز آچسین. دوز دور بو فورصت، ایللر بویو زامان توتان بیر توپلومسال و اولوسال اویانیشین سونوجو اولدو، آنجاق ائله بیر سؤزو گئنه‌ده بیر تورک دئیه‌بیلمزدی سانکی. او ایشی ده فراز کمالوند گؤردو.

و البته نه قدر یاخشی اولدو کمالوند تیراختوردان گئتدی. منجه اونون آزربایجاندا چالیشماسی‌نین یاساقلاندیغی دوغرو اولسا، فوتبول‌دان اوستون بویوروقلارین یانلیشلیغی اولابیلر. یاخشی اولدو کی تیراختورون قهرمان اولماماغی و یا آسیایا گئده‌بیلمه‌مه‌سی، کمالوند و آزربایجانلی‌لارین آرالارینی بولاندیرمادی. کمالونددن سونرا کی تیراختور یؤنه‌تمه‌نی، قلعه‌نویی بیر اؤنملی سؤز ایله دئییب کی تیراختورا تکجه ایدمان باخیشی اولسایدی، تیراختور آسیایا گئده‌بیلردی. بو او دئمک‌دیر کی کمالوند الیندن گله‌نی گورموش ایمیش؛ آنجاق فوتبول‌دا هر نه مئیدان‌دا باش وئرمیر.

کمالوندین ایکی ایل بوندان اؤنجه‌، ایران تیلویزیونون دوخسان وئرلیشینده کی تاریخی دانیشیغینی، آشاغی‌داکی کلیپ‌ده گؤره‌بیلرسینیز. من کی او زامان گؤزلریمه اینانماییردام. دؤرد-بئش یوزلوک سایی‌لی اؤیرنجیسل درگیلریمیزده‌کی سؤزو بیر تورک اولمایان مورببی تیلویزیونون ان چوخ تاماشاچی‌لی وئرلیشینده دئییر. خالق‌دان آد و سان آلان اؤز قهرمانلاریمیز کی، بئله‌زامانلار هر نه‌یی اونودورلار:

كمالوند دوخسان وئرليشنده ايران دا ياشايان توركلرين چوخلوغونو وورغولايير
کلیپین باغلانتی‌سی:
http://Kemalvend-Doxsan-Tiraxtur.4shared.com

دوغوم گونو ماهنی‌سی

 دئیه‌سن تانیشلار و یولداشلار آراسیندا اؤنمیم بیر آز چوخالیب! چونکو بو گون اوتوز اوچونجو دوغوم گونومون ایل دؤنومونده، داها آرتیق "دوغوم گونو تبریکی" آلدیم(البته فئیس بوک‌دا!). هامی‌دان تشککور ائتمه‌لی‌‌یه‌م.

نئچه آی بوندان اؤنجه من ده یولداشلارین دوغما گونلرینی قوتلو اولسون دئمک ایچین، اینئترنئت‌ده ماهنی‌ آختاردیم، اول‌ده یاخشی بیر شئی تاپمادیم. قوزئی آزربایجانلی‌لار کی "آد گونو" دئییرلر و گونئی‌لی‌لرین چوخو بونو بیلمیرلر. چوخ سایی‌دا ماهنیلاردا اینگیلیسلی‌لرین "هپی بیرس‌دئی تو یو(Happy birthday to you)" سونا اوخشار بیر اوخوماقلار وار ایدی! آخی بیز هارا، هپی مپی هارا!؟ قوقول‌(google)دا آختاریشلارین آراسیندا گؤردوم "یعقوب ظروفچی"دان "تولدت مبارک" آدلی mp3 واردیر!
دئدیم "یاغوب زوروفچو" حتمن تورکجه اوخویوب، آنجاق بیزیم دیلداشلاردا گؤتوروبلر فاسجا باشلیق قویماقلا، او گؤزل‌لیک‌ده ماهنی‌نی هئچه چیخاردیب، و آختاران اینتئرنئت موتورلاری‌نین گؤزلریندن ایتیریبلر.

بو گئجه، ان آزی اؤز دوغوم گونومه گؤره، اونا بیر داها اصلی تورکجه باشلیغی‌ قویوب، و بیر داها یوکله‌دیم اینتئرنئته. ظروفچو و اونونلا اوخویان کور قوروپو، ماهنی‌نین سونوندا بئله بیر ایستکلری واردیر:

بو ماهنی‌نی دوستلار ایله، بیرلیک‌ده دینله‌دک! 

گول‌لر ایله تبریک ائدک، موبارک اولسون دئیه‌ک

سیز ده دینله‌دین؛ و اؤز یولداشلار و تانیشلارینیزین دوغوم گونلرینده تقدیم ائدین:

"Doğum Günün Mübarək" Mahnısı, Yağub Zurufçu / دوغوم گونون موبارک ماهنی‌سی، یعقوب ظروفچی‌دان
4.5MB Mp3 file, Download Link:
http://Doghum-Gunu.4shared.com

تیراختور گؤرونتولری‌نین سئچگینی: بالاجا یانداش

ياواش ياواش تيراختورون سوروملولاري يؤنه‌تيجي(مربي) و ياخشي اويونچولاري گتيرمك‌ده اؤزلريندن عجيبه غريبه چيخار گؤستريب بيزيم خياليميزي راحات ائديرلر. تاخيمين كئيفيتي ياخشي اولسا يانداش‌دا ايستاديوما گليب آلقيشلاماق ايچين داها ماراقلي اولار و اؤز گؤره‌وين ايسه اونوتماز. البته سوروملولار بير باشقا چيخاري‌دا اؤزلريندن گؤسترمه‌لي‌دير. اؤز فيكيرلرين بئله وئريبلر اويونچو سئچمه‌يه‌كي تيراختورون تبريزده ايلك اوچ اويوندا تاماشاچي‌نين محروم اولماغي‌ني اونودوبلار. بير اعتراض مكتوبونو يازماغا نه وار كي!؟

اويونلار بير آي‌دير قورتاريب و ساغليقلا(!)، گلن فصل ده اوچ اويوندان محروم اولموشوق. بونا گؤره ده سهند ايستاديوموندان، بو گؤرونتويه تاي باخمالي گؤرونتولر هله - هله ياييلماياجاق. تانري بئله يانداشلاري تيراختور و آزربايجان ايچين ساخلاسين:

ي.س:
بو خانيم قيزين گؤرونتوسو، مني يولداشلارين دئديگي بيري‌ خاطيره‌سی‌نين يادينا سالدي. او دئييردي كي:

بيلدير تصادوفي اولاراق ايستيقلال كلوبونون تورك باشقاني، حاجي فتوللازاده‌ني بیر یئر ده گؤردوم. اونا دئديم:
"بو قدر استقلالا-زادا يئتيشيرسيز، بير آز دا تيراختور فيكرينده اولون‌ دا".
آما حاجي‌دا جاواب وئردي:
"ايستيقلال-پيروزي‌نین فرقلری وار. بونلار مردمي تاخيملارديلار آخي."!

اولابیلر حاجی فتوللانین باخیشیندا ایسه، بو بالاجا تاماشاچی‌یا تای اون‌مینلر اوشاق، یوخسا دلی قانلی، گنج و قوجا تیراختور یانداشی، خالق ايچين‌دن چيخماييبلار؛ و آزادی ایستادیوموندا تیراختورچولارا قوناق اولان زورناچی‌لار، "مردم" آراسیندان قاینامیشلار!

تیراختورا گؤره نئچه یازی

بو بیر آیین ایچینده، تیراختور و آزربایجان ایدمانی ایله ایلیشکی‌لی نئچه تورکجه و فارسجا یازی‌نی یوللادیم تیراختورفانس دوشرگه‌سینده یایدیلار. اللری آغریماسین؛ آنجاق اؤز آنایوردوم‌دا دا آرشیو ائتمه‌لی‌یه‌م کی فورصت اولماییر :

1- جرم تيراختور: قائل نشدن حق آب و گل براي پيروزي و ستقلال!
2- افسون كرار، توسط دراكولاها
3- كرار چه برود و چه بماند، ما برنده‌ايم
4- کرار گئتسه ده، قالسا دا، قازانان بیزیک
5- بيزي كيم آلا بيلر؟
6- ناصر حجازي‌ و تورك ديلي

من دئییردیم لیگ سونا چاتسا، بیز ده بیر آز دینجه‌لیب و استراحت ائده‌ریک. آما بو گونلر او قدر تیراختور، و دئمک آزربایجان ایدمانی حاشیه‌سینده اولایلار باش وئریر کی آدام گرک یاتمایا و گئجه گوندوز تایپ ائده! قونو چوخ دور، یالان چوخدور، گرچک چوخدور، یوروم چوخدور، یازی چوخدور؛ آنجاق بونلارین هامی‌سیندان بیر دوزگون سونوج چیخارتماق چتین‌دیر. بو دا دوغال(طبیعی) دیر!

ی.س:

بیلدیگینیز کیمی کرار و کمالوند آزربایجان‌دان آزدیریلدیلار! اونلار هر جوره عجیبه-غریبه نه‌دن ایله آزربایجاندان گئتسه‌لر ده، آنجاق اونلار ایله اونودولماز خاطیره‌لریمیز واردیر. اویونچولار گئدیب گلیرلر، آما آزربایجانلیلار یئرلرینده اوتوروبلار و یاراتدیغی کولتورلری آرادان گئتمه‌یه‌جک:

گونون گؤروتو: تيراختور اويونچولاري‌نين آزربايجان رقصي