Thursday, February 18, 2010

تکجه "یاشاسین آذربایجان" دئمک یئترلی دئییل

بو ایل یازیلاریمین یوز ده دوخسانی تیراختورا گؤره اولور، یاواش یاواش!

تزه‌لیک‌ده تانیش اولدوغوم تبریزفوتو سایتیندا تیراختور- موقاویمت شیراز اویونو آلبوموندا، بیر جالیب گؤروت ایله قارشیلاشدیم.  خبرلره گؤره او  اویون گونونده یوز میندن آرتیق ایستادیوما گئدیبلر و حتی اونلارین ایچینده قادینلاردان واریمیشلار و ایستادیوم ایچینه قادینلارین گیرمه‌سی یاساق اولدوغونا گؤره، قیراق‌داکی تپه‌لرین اوستونه چیخیب و اوزاقدان آلقیشلاییبلار.  و تبریزفوتو دا یاییلمیش گؤروتلر بونو اونایلاییر. بئله بیر اولای تایسیز دیر ایران دا.

بو عکس او حؤرمتلی خانیملارین ایشینه گؤره چوخ ماراقلی ایدی. آنجاق بو گؤروت ده پیس و اوزونتولو بیر گؤرونوم ده وار. و او یئره تؤکولموش آت-آشغال دیر. بئله بیر ایش کولتورلو تورکلردن ایراق دیر. تیراختورون مینلر شوعورلو و آنلاقلی یانداشلاری باشقا بیر گؤزل و آلقیشلامالی یوروش ده ائلیه‌بیلر او نایلونلاری یئردن ییغسینلار. "یاشاسین آذربایجان" دئیه دئیه، آذربایجانین طبیعتینی باتیرماق دوز ایش دئییل.

یارین تیراختور گله‌جک کرجه و قرار دیر کرج، شهریار و تئهرانلی یانداشلار آلقیشلاماق ایچین کرجین ایگیرمی مین نفرلیک انقلاب ایستادیومونا گئده‌لر. آرخایینام ایگنه آتماغا یئر اولمایاجاق و چوخ آدام ائشیک ده قالاجاق. یاخین‌لیق دا ایسه تیکینتی‌دن سونرا هئچ نه یوخدور. خانیملار بو دفه باخابیلمه‌یه‌جکلر. البته اولابیلر گوهردشت‌ ده کی ائولردن باخابیلسینلر! کرجی تانیماسینیز ویکی‌مپیا گؤستردیغی‌ بو یول‌لا گله‌بیلرسینیز.

پ. ن:
این را به فارسی هم بنویسم برای کسانی که به سادگی نمی توانند ترکی بخوانند: بازی تراختور و سایپا فردا جمعه (سی ام بهمن) ساعت سه و پانزده دقیقه بعد از ظهر در ورزشگاه انقلاب کرج آغاز خواهدشد. این هم محل و یکی از مسیرهای رسیدن به ورزشگاه در ویکی مپیا.

No comments:

Yazıları Latin əlifbasında görmək için, mətni kopi eləyib gedin Köçürgə`yə:

köçürgə yazılımı