بو اینگیلیس‌لی‌لرین دیلیندن گلمیش "وئبلاگ(Weblog)" یا "بلاگ(Blog)" سوزجویونه هله ده بیر یاخشی و اروتاق سؤزجوک تاپابیلمه‌میشیک. من اؤزوم بیر گون یازیرام وئبلاگ، بیری‌سی گون دئییرم بیلاق، باشقا گون یاییرام بیلوق و ... . باشقالار دا بئله یازیرلار. خالقیمیزین‌دا غئیرتینه یوز رحمت کی اؤز دیلینه بیر کولتور ائوی آچماییب . البته فارسلارین کی بو قدر ایمکانلاری وار اونلار دا گیجه‌لمیشلر. آنجاق اونلار بونو بیلمیشلر کی "وئبلاگ" دئمک اونلارین دیلینه داها اویغون دور و فارسجا دا اینجه "ی" اولماماغا گؤره، "بلاگ" دئمک مومکون دئییل.
البته بو سؤزلر ایله بونو دئمک ایسته‌میرم کی اؤزگه دیللردن گلن سؤزجوکلره یول وئرمه‌یه‌ک. بلکه بونون دالیسیجایام کی ایسته‌دیگیمیز اورتاق سؤزجوک هامی‌میزین دیلینه یاخشی اوتورسون! اؤرنک ایچین تورکییه‌لی‌لر "اوکول" کلمه‌سینی فیرانسالی‌لارین دیلیندن چوخ یاخشی آلیبلار. "اوخوماق" کی تورکجه دیر و "اوخول" دا یانی اوخوماق یئری. بیر فیرانسالی بونو بیلسه، بئله دوشونر کی اونلار اوکولو تورک دیلیندن آلیبلار، ترسینه یوخ!
من ده ایسته‌يیرم بو Weblog یا Blog سؤزجوکلری ایچین، "اوخول" یا "اوکول" حاققیندا اولونموش کیمی بیر ایش گؤرم!
بیلدیگینیز کیمی دیلیمیزده سو قایناقلانان یئره "بولاق" دئییه‌ریک. بو وئبلاگلار ایسه، یازیلارین جوشماق(آمان کوپی الیندن!) یئری دیر و گئت-گئده کیتاب و درگی‌لرین یئرین توتور. یاخشی دئییل می بیز بوندان سونرا وئبلاگ-مئبلاگ یئرینه تکجه دئیه‌ک : "بولاق" یا "یازی بولاغی"؟ هم Blog و Weblog دان اوزاقلاشمامیشیق و همده اؤز دیلیمیز ایچیندن چیخان بیر سؤزجوک دور.
بو دا بئش گوندن سونرا گله‌جک دونیالیق آنادیلی گونونه گؤره اؤنریلمیش بیر سؤزجوک!
No comments:
Post a Comment