دوغوم گونو ماهنی‌سی

 دئیه‌سن تانیشلار و یولداشلار آراسیندا اؤنمیم بیر آز چوخالیب! چونکو بو گون اوتوز اوچونجو دوغوم گونومون ایل دؤنومونده، داها آرتیق "دوغوم گونو تبریکی" آلدیم(البته فئیس بوک‌دا!). هامی‌دان تشککور ائتمه‌لی‌‌یه‌م.

نئچه آی بوندان اؤنجه من ده یولداشلارین دوغما گونلرینی قوتلو اولسون دئمک ایچین، اینئترنئت‌ده ماهنی‌ آختاردیم، اول‌ده یاخشی بیر شئی تاپمادیم. قوزئی آزربایجانلی‌لار کی "آد گونو" دئییرلر و گونئی‌لی‌لرین چوخو بونو بیلمیرلر. چوخ سایی‌دا ماهنیلاردا اینگیلیسلی‌لرین "هپی بیرس‌دئی تو یو(Happy birthday to you)" سونا اوخشار بیر اوخوماقلار وار ایدی! آخی بیز هارا، هپی مپی هارا!؟ قوقول‌(google)دا آختاریشلارین آراسیندا گؤردوم "یعقوب ظروفچی"دان "تولدت مبارک" آدلی mp3 واردیر!
دئدیم "یاغوب زوروفچو" حتمن تورکجه اوخویوب، آنجاق بیزیم دیلداشلاردا گؤتوروبلر فاسجا باشلیق قویماقلا، او گؤزل‌لیک‌ده ماهنی‌نی هئچه چیخاردیب، و آختاران اینتئرنئت موتورلاری‌نین گؤزلریندن ایتیریبلر.

بو گئجه، ان آزی اؤز دوغوم گونومه گؤره، اونا بیر داها اصلی تورکجه باشلیغی‌ قویوب، و بیر داها یوکله‌دیم اینتئرنئته. ظروفچو و اونونلا اوخویان کور قوروپو، ماهنی‌نین سونوندا بئله بیر ایستکلری واردیر:

بو ماهنی‌نی دوستلار ایله، بیرلیک‌ده دینله‌دک! 

گول‌لر ایله تبریک ائدک، موبارک اولسون دئیه‌ک

سیز ده دینله‌دین؛ و اؤز یولداشلار و تانیشلارینیزین دوغوم گونلرینده تقدیم ائدین:

"Doğum Günün Mübarək" Mahnısı, Yağub Zurufçu / دوغوم گونون موبارک ماهنی‌سی، یعقوب ظروفچی‌دان
4.5MB Mp3 file, Download Link:
http://Doghum-Gunu.4shared.com

جانلي آما جاوازسيز موسيقي پايي

1-  آوروپا و آمئريكايا گئدن چوخلو دله‌لر، چمدانلارينا پوسته دولدوروب آپارارلار اورالاردا ساتسینلار؛ البته هاواليمانلاريندا، باتي‌لي گومروكچولر، ايرانلي گؤزو آجلارين پوسته‌لريني يئره تؤكمه‌سه‌لر! ايندي قوزئي آزربايجان‌دا دا، يئني گونون يئتيشمه‌سينه گؤره ، ميللت ايسته‌يير پوسته‌دن، توخوم‌دان،بادامدان آلسين. ايرانين پوسته‌سي‌ده اوجوزدور. گليبلر آستارا سينيريندا پوسته-موسته آلالار. فاشيللار(فاشیست+یاشیل) يئر-گؤيون قولاغيني كار ائديبلر كي قوزئي آزربايجانلي‌لار آجيندان اؤلمه‌یه گؤره، تؤكولوبلر گونئي آستارادان يئمك آلسينلار.

2- همشهري گونده‌ليگي، دوخسانينجي يئني ايلی اؤزل سايي‌‌سیندا، ايرانين كولتور و اسلامي ارشادي‌نین جانلي كونسئرتلره وئرديگي جوازلارين سايي‌سي‌ندان بير پارا بيلگي‌لر وئريب. بو بيلگي‌لره گؤره ايراندا 688 كونسئرته مجوز وئريليب و بو آرادا ايرانين باشي آدلانان آزربايجان‌دا تكجه و تكجه 3 كونسئرته جواز وئريليب. حالبوكي تكجه قيشم آداسي‌نين پايي 32 و گيلانين‌كي 23 و كوردوستانين‌كي 12 دير! چوخلاري‌ كرج و تئهرانين پايي‌دير. اولابيلر تئهرانداكي كونسئرتلرين آراسيندا آزربايجان موسيقي‌سي‌ده چوخ اولسون آنجاق آزربايجان‌دا جانلي كونسئرتلره جاواز وئرمه‌مه‌‌يين آنلاملي‌دير.

3- ايلين سون اودگونو آخشامي‌دير (چرشنبه سوري)! فيكريم ائله گئديب تبريز، اورمو، زنگان و اردبيل‌ده جانلی کونسئرتلره جاواز وئرمه‌مه‌یين يانينا! دئييرم تيراختور يانداشلاري‌نين آلقيشلامالاري اؤزو ائله بؤيوك بير جانلي كونسئرت‌دير!
ائشيكدن‌ده ترقه و بومب پارتلاماق سسلری گلير! آنجاق بيردن "آي بري باخ" ماهني‌سي‌‌ني ائشيتديم! پنجره‌دن باخديم گؤردوم كوچه‌ده‌كي تئهرانلي گنجلر آزربايجان رقصي ائديرلر. سانكي بونلارين قولاغينا صوبح‌دن آخشاما تكجه فارسجا بانلانمايير! چيخديم ائشيگه. باشقا محلله‌لره ده باش ووردوم. چوخلو يئرلرده "آي بري باخ" ايله اويناييرديلار. بير سايي بللي‌ ايدي هئچ تورك دئييلدیلر! بو ماهني‌ني ته‌زه‌ليك‌ده آمئريكادا ياشايان، فارسجا اوخويان منصور آدلي بير موغنني اوخويوب! دئييلير اونون كؤكو ماماغانلي‌دير.
بو سؤزلري پابليش ائدنده، بيري‌سي تئلفون وورور منه! تورك دور. دئيير "بري باخ" ياني نه!؟

بو دا تئهراندا، ترقه‌لر آراسيندا، آي بري باخ ايله اوينايانلاردان بير ويدئو:

باغلانتی

تایتانیک یوخ، تاتانک

دونیانین ان چوخ ساتیشلی و پاپیولار اولان اوزونتولو فیلم، تایتانیک، ائکرانا گلیب ایراندا دا جیزیخلی سی‌دی‌لرده گؤرولندن سونرا، باشقا هونری اولمایان اوستون سویلولار دا تورکلره جوک چیخاتدیلار:

بیر تورک، تایتانیک فیلمی‌نی گؤره‌ندن سونرا دئییر: "آخیر‌دا من بیلمه‌دیم، تایتانیک قیز ایدی، یوخسا اوغلان؟"!

او تکجه بیر ایرقچی جوک ایدی! تورکلر ده همه‌شه کیمی اؤز ایش کسبلریندن واز گئچمه‌دیلر دئدیلر هرنه جوک ایسته‌ییرسینیز چیخاردین! گرچک دونیادا گولونج ایش گؤرنلر بللی‌دیرلر، جوک چیخارتماق لازیم دئییل.
1997 ایلیندن 14 ایل اؤتور. بوگون بیر بلگه‌سل(مستند) جوک گؤردوم قیریلدیم گولمک‌دن! گئدین بورانی اوخویون: "ناغیل می، بلگه‌سل می؟"

ناغیل‌ می بلگه‌سل می یازی‌سی‌ندا بیر یئرده دئییب: "ییرمی -اوتوز ایل سونرا ایرانیکا-میرانیکادا یازسا خییام اؤزو تایتانیکین کاپیتانی ایدی دیسکینمه‌یین!". من‌ده قیریدئرده (قوقول ریدئر)،یازی‌‌نین آلتیندا بیر یوروم قویدوم، دئدیم ائله اونو بورادا دا یازیم:

هله هاراسی‌دیر؟! دئیه‌جکلرتایتانیک سؤزجویونون کؤکو فارسجا دیر: تاتـ+ـانـ+ـک؛ یانی تاتلاری* داشییان بالاجا گمی! بوندان بؤیوک گمی‌لر تختی جمشیدی کؤرفزه قوشان کاناللاردا ایمیش. لامصب ایسکندر گلیب همای‌سی‌نی یاندیریب، کاناللاری‌دا باسدیریب!

* - ی. س:  بورادا، تاتلاردان منظور آزربایجان ایچینده یاشایان حؤرمتلی تات یوردداشلاریمیز دئییل. یازیقلار اولسون بونلاردان آزربایجانلیلاری قوندارما آذ-ری ائلینه منسوب ائتمک ایچین سوء استفاده اولوبدور. منظوروموز کسروی‌نین دئدیگی و اوستون سوی‌لو قوندارما ائلدیر.

آشيق غافار: ياشاسين تيراختور تيمي

خاطيريزده اولسا (اؤزوم اونوتموشدوم سيز هارادان يادينيزدا اولاجاق آخي!؟) ياز ايلكينده "بئشينجي آشيقلار بايرامي، تيراختور و دلي‌لر" يازيسيندا دئميشديم آشيق غافار ابراهيمي‌نين "ياشاسين تيراختور تيمي" چيخيش‌ني يايام. البته فيلمي‌ني يولداشيميز گؤتورموشدو و نئچه آي چكدي فايلين اوندان آليب كانوئرت اله‌ييب يونگوللـه‌ديب، اينتئرنئته قويماق ايچين اويغونلاشديرام! بيز توركلرده كي ماشالله هامي‌ميز "واكنش سريعـ‌"ـيك، بو ايش 8 آي چكدي! البته داش‌قاپي‌نين "آشیق‌لارین یارادیجیلیغی" يازي‌سي ياييلماسايدي منيم آلزايمئريم دايانماياجاغيدي! سيزي، آشيق قافارلا ايلگي‌لي اولان پاراگرافي اوخويوب و سونرا كليپه باخماغا دعوت ائديرم:

ائله بو "بايرام" سؤزجويو فيكيرينده ايديم كي گؤردوم آشيق غافار چيخيشي‌ني باشلاييب، دئيير:
"آدام گؤرنده كي تبريزده، تيرختور تيمي يوز اللي‌مين نفري بير يئره ييغير، دئيير كئشگه هامي‌ميز توپجو(فوتباليست) اولارديق! ايكي دنه ايفا واريم كي بيري‌سي‌ني تيرختورون افتخارينا اوخوياجاغام." و هامي آلقيشلادي. من ده يولداشا دئديم تيرختور اوچون اوخويان‌دا حتمن فيلم گؤتور. قرار دير فيلمي اوندان آلام و بورا قويام سيز ده باخاسينيز.

Ashiq-Qafar-Yashasin-Tiraxtur.4shared.com: wmv file: 10 MB

Ashiq-Qafar-Yashasin-Tiraxtur-7MB.4shared.com: wmv file: 7MB

گیزلی کامئرا

تیلویزیون وئرلیشلری‌نین ایچینده گیزلی کامئرا(دوربین مخفی) لاپ باخمالی و یانداشلی بؤلوملردن ساییلیر. من اؤزوم چوخ سئوه‌رم. تبریزین سهند کانالی‌نین سهندیه‌سینده ایسه گیزلی کامئرا بؤلمه‌سی واردیر. ایلک دؤنه گؤره‌نده چوخ خوشوما گلدی. آنجاق ایکینجی دؤنه دن سونرا یوخ! نه‌ده‌نی ده بودور کی اویونچولاری ثابیت‌دیرلر! ایکی اوچ دؤنه‌دن سونرا بللی‌دیر خالق تانییاردا! دونیانین هاراسیندا گؤروبسونوز گیزلی کامئرانین اویونچوسو ثابیت قالسین؟ اؤزوده بیر یئرلی کانال‌دا!؟

البته بیر عیللته گؤره سهندیه‌نین گیزلی کامئرا بؤلومونده کی ایشلر دوغال‌ اولابیلر:
"تبریز و اورتا آزربایجان‌دا، هئچ کیمسه سهندیه وئرلیشینه باخماییر؛ بونا گؤره هئچ کیمسه‌ده گیزلی کامئرانی آپاران خالقی سارییانلاری تانیماییب، سونوج‌دا طبیعی ائتکیله‌نیر"!

بومي موسيقي

بئله بير سؤزو اوزاق‌دان باخانلار دئسه‌لر، آدامين وئجينه دئييل، آنجاق خالقيميزين بؤيوك اوزمانجي ياني آشيق چنگيز مئهدي‌پور دا بو بؤيوكلوك ده ميللتين موسيقي‌سينه، اوتانا-اوتانا "موسيقي‌ بومي" دئيه‌نده آدام يانيب كول اولور. كيشي هاچان ناظري ، شجريان و باشقالاري اؤز موسيقي‌لرينه يئرلي و بومي موسيقي دئيه‌رلر آخي؟! بؤيوك آدليم آداملاريميز يايينلارلا دانيشاندا اؤزلرينه گووه‌نمه‌يه‌نده بير معمولي آزربايجانلي‌دان نه بكله‌مك‌ اولار؟! سيز قاراداغلي بير آشيق، گليرسينيز تئهران دا اوتوز-قيرخ‌مين‌‌تومن‌ليك موسيقي كونسئرتي قويورسونوز، يئر ده تئز قورتاري؛ بونون هاراسي بومي دير آخي؟
البته آشيق چنگيز سؤزلرينده ايسته‌ييب حوكومتين آز يارديمجي اولماغي و سونوج‌دا آشيقلار اؤز جان‌دان مايا قويماقلارينا ايشاره ائتسين. ولي من بير دؤولتي مقام اولسام دئيه‌رم سيزيني اؤز دئديگينيزه گؤره سيزين موسيقي يئرلي و بومي‌دير و بوتون بومي‌لارا يئته‌رلي بودجه وئرمك ايمكانسيزدير. اولويت ايندي ميللي گه‌لنه‌كسل موسيقي‌ده(اوخويون فارسجا سوننتي موسيقي)! منجه بؤيوك اوزمانجلارينين سؤزلري‌ بير آز سياست ايله قاريشسا چوخ ياخشي اولار.

عاشیق چنگیز مهدی پور گفت : گروه های موسیقی نواحی از کمترین حمایت دولتی برخوردار هستند ولی به دلیل علاقه‌ای که به موسیقی بومی (آذری)[!!!؟؟؟] داریم ، برای تثبیت موسیقی عاشیق ها از جان مایه می گذاریم.
(قايناق: موسيقي ما)

اله‌شديري‌ني يئرينده قالسين؛ كيمسه آشيق چنگيز و دالغا موسيقي قروپونون "كور اوغلو" چيخيشي‌ني گؤرمك ايسته‌ييرسه، بورادان گئديب بيليت رئزئرو ائتسين. اينيشيل ده ساري گلينين دالغالانماسي و آشيق محبوبون سسي منه چوخ خوش ياپيشدي.

ائوین آباد سلیم

خالقین بئله نوحه‌لره احتیاجی وار؛ نه قدر گؤز یاشی دا تؤکولسه آز دیر. هئچ آچیقلاما دا گرکلی دئییل. یاشاسین سلیم؛ ائوین‌ده آباد سلیم:

سلیمین آنادیلینه گؤره نوحه‌سی: چوخ سئویرم آنادیلیمده دانیشام

بورادان MP3 سی‌نی یئندیره‌بیلرسینیز.

گونون سسي: تئز گل

سايين يولداشلارين بيري‌سي رحمتليك "حاج قوربان سولئيماني"يا گؤره دوزه‌لميش بير بلگه‌سل(موستند) فيلمي منه وئردي. اونا باخيب درين ائتكي‌لنديم. بيلديگينيز كيمي خوراسان توركلري‌نين موسيقي دونياسينداكي نابيغه‌لري ياشامي‌نين سون آنلاريندا اؤز دوغما يوردو، قوچانين آلوار كندينده ايدي. دئديگيم فيلم‌ده ائله او كند ده دوزه‌لميش‌دير. حاج قوربان دئيير:

"ايكي‌تئلي (دوتاري) آتام‌دان اؤيره‌نميشم، او اوستا دئييلدي آنجاق اونلار سينه سينه‌يه بيربيرلريندن اؤيرنميشلر؛ قديم‌كي‌لر دئييرلر بير كيشي ياشاميندا اوچ شئيي اولمالي‌دير: بير آت، بير توفنگ، و بير دنه ده ياخشي دوتار!"

البته چاغداش دؤنم‌ده آت و توفنگ لازيم دئييللر و ياشامين گركجه‌لري باشقا شئي‌لر اولوبلار. ياشامين چتين‌ليكلري‌ده او قدر چوخ اولوب كي سس، يير و يا موسيقي‌ دونياسي‌دا ده‌ييشليب‌دير و موسيقي‌ده خالق آراسيندا سئويلمه‌يي داها آرتيق اوزمانليق و داها آرتيق چاليشماق ايسته‌يير. آزربايجان موسيقي‌سي‌ده اوتاي‌دا قورومسال و عئلمي و ياتيريم آرخاسيندا اولاراق گئنيشلنسه‌ده، بوتاي‌دا موسيقي‌ قوروپلاري چوخ چتينليك ايله چاليشيرلار. موسيقي جان يانديرانلار دا ديليميزه جان يانديرانلارين تايي‌ديرلار. يقين كي بئله بير ايش سئوگي‌سيز اولماز.

فئيس‌بوك‌دا باريش قوروپون‌دان گؤزل بير چيخيش گؤردوم "تئز گل" آديندا. چوخ گؤزل اوخويوبلار. من ائله موسيقي‌دن باشيم چيخماز آنجاق او قدر سئوديم كي ياراتديقلاري اثري بورادا سيزينله پايلاشماق ايسته‌ديم. منجه تايسيز سس‌بيرليگي‌ ايله بئله "كور" اوخوماق بو دوروم‌دا آياق اوستونده آلقيشلانمالي‌دير.

اوينار گؤروتو(ويدئونو) بورادا گؤره بيلرسينيز. Mp3 فايلي دا بورادان يئنديرين.

ايرقچي ديزي‌لرين سيرتيق قاديني

يئني‌گون(نوروز) بايراميندا تيلويزيون دا ايكي دنه سئريال وئريردي؛ هر ايكيسينده ده بير تورك لهجه‌لي قوجا آروادي  اوخشار نقش ايله دلقكليك ائديردي. سؤز قابي‌سي دا بو ايدي : "از اينتئرنئت ياد گرفتم"(اينتئرنئت‌دن اؤيرنميشم). سئرياللارا نئچه ده‌يقه‌دن چوخ باخماديم. باشقالار دا باخاندا دا، ائله او قوجا قادينين ائنتئرنئتدن باش چيخارتماق سسي گليردي. او قدر زهله‌م گئديردي هئچ باخميرديم گؤرم قونو نه ‌دير!

اوروجلوق آييندا دا بير داها بو قادينين سسي‌ني باشقا بير سئريال دا ائشيتديم. گئنه ده اونون سؤز قونوسو ائنتئرنئت باجاريغي ايدي و رولو دا فرعي بير رول ايدي. آما بوتون صحنه‌لر ده دوزسوزلوق ائديردي.

بير ايكي آي اوروجلوق دان اؤتور، و باشقا بير سئريال‌دا ائله همن سيرتيق قادين گينه ده تاپيليب‌دير. عجيبه غريبه‌دير كي گينه‌ده سونسوز بير اتي آجي‌ليقلا اينتئرنئت اينتئرنئت ائدير! بو دا توركلري يئني قایدا دا و مودئرن مئتود ایله اله سالماق‌ديردا. توركلرين اللرينه سوپورگه وئرميرلر، طعنه ايله دئييرلر سوپورگه‌چي دئييل‌سينز حتمن تئكنولوژي‌دان باش چيخارديرسينيز دا!

سانكي او تورك قادين قزوين، همدان يا زنگان توركلريندن دير*. آللاه نئچه تومن پول اله گتيريب و آدليملانماغين اوزونو قارا ائتسين. باشقا توركلر بئله دلقكليك ائدنده آدام بير جوره دئييردي اؤتور**. آما بو يئني كشف اولونموش قوجا قادينين اؤز كيمليگيني و آناديلي‌نين اله سالماغي فرقلي دير رسمن!

بير سورغوم دا وار بو تيلويزيون‌دا اصطلاحن گولونج و كومئدي سئريال دوزه‌لدنلر ايله: بو فيلملرينيزي فارسجا دان سونرا باشقا بير ديله چئويرسه‌نيز گئنه‌ده تاماشاچيلاري گولده‌ره‌جكسينيز يوخسا يوخ؟!!!

تورك ييلماز آدلي يولداشين يازي‌سي‌ني بو قونو دا اوخويون: "خوش‌نشين‌ها".

اونودوردوم ها! بوگون تيراختورون تئهرانين ايستيقلال ييغماسي‌ايله اؤنملي بير ياريشي اولاجاقدير. يازيقلار اولسون تبريزه گئده‌بيلمه‌ديم. ايستاديومون سيخ سيخ دولماغي‌نين احتمالي چوخ‌دور. تيراختورا باشاريلار و اونون بوتون آلقيشلايانلارينا سئوينجلي بير گون ديله‌ييرم.
آزربايجان وار اولسون.
سئريال دوزه‌لدنلره ده آللاه شفا وئرسين.

---
* - جام جم گونده‌ليگينده‌كي بيلگي‌لره گؤره بو قادينين آدي حليمه سعيدي،‌ و قزوين‌لي تورك دور. قوران ساواد دير، آما بئله بير سؤز دييب: "بهتر از باسوادها ديالوگ مي‌گويم(ساوادلي‌لاردان ياخشي ديالوگ دانيشيرام)"! يازيغا بيري دئسين سني توركلري و اصل‌ده اؤزونو ياخشي اله سالماغا گؤره اويونچو سئچيبلر، ديالوگ ياخشي دانيشماغينا گؤره يوخ. ياخشي ديالوگ باشارسايدين بير دنه ده هوشلو باشلي و تؤره‌لي رول وئره‌رديلر سنه، و ده‌يقه باشي دئمه‌زدين از اينتيرنيت ياد گيريفتم!

** -اؤرنك ايچين اخراجي‌ها فيلمينده اكبر عبدي و اونون فيلم‌ده كي آناسي مينا جعفرزاده؛ جعفرزداه‌نين فارسجا فيلملرده لهجه‌لي دانيشماغي بئله آداما ده‌يميردي و اولابيلر اويونچو قصد ايله توركلري مسخره ائتمك كؤنلونده ده‌ييل. بو قادين ايندي تبريز كاناليندا "دوز چؤرك" آدلي توركجه بير سئريال‌دا فيلم اوينايير.

ی. س:
تیلویزیون‌دا ده‌یقه باشی آدینی چکدیگیمیز سئریال رئکلام (تبلیغ) اولونور. رئکلامین یاریسیندان چوخو ائله بو قادینین دانیشماقلارینی گؤسته‌ریر. "خان ننه" دئیه‌نده همه‌شه شهریارین گؤزل، نوستالژی‌لی، و اوره‌گی سیخیب، گؤزو یاشا دولدوران شئعری یادا دوشور؛ آما بو اوتانمازلارین گؤرونتولرینده  آزربایجان "خان ننه"سی اوزدن ایراق، اؤزونون اوزون قولاغ اولدوغوندان شکلی‌دیر و دلقک اولوب:

نه سوء‌ ايستيفاده‌سي؟

رحيم شهرياري 5000 تومنه تالار وحدت اوخويوردو. هر نه‌دن اوخويوردو. دئييردي هر نه اوخوياجاغام، فقط چوخ اؤزونوزدن چيخمايين. سؤزلري و اوخودوقلاريندا كيمليك‌چي‌ليك دالغانيردي! "بير اولاق يومروق اولاق" دا اوخودو "منيم ديليم اؤلن دئييل باشقا ديله دؤنن دئييل" ده دئدي! دئييرديك تانري بيزه چوخ گؤرمه‌سين بئله تعههودلو اوزمانجلاري.

نئچه ايل گئچدي. رحيم شهرياري ياشيل‌لار ايچين توركجه اوخودو! حالبوكي بير خالق اوزمانجي سياسي اويونلارا گيرمه‌يي دوزگون ايش دئييل. هر حال‌دا دئديك او دا بير آدام‌دير و حاقلي‌دير. آما باشقا آچي‌دان، نه جور اولاندان سونرا، اونون كيمليك‌ و وارليق حاق‌دا اوخوماغي كسينليكه سئچيم زاماني درده ده‌يه‌ردي و كيمليك‌چي‌ليگي به‌يه‌نمه‌يه‌‌ن سياستچي‌لر بو قونودان سس ييغماق ايچين موقتي ايستيفاده ائتمك نييتينده ايديلر. يوخسا  تكجه فردي سياسي علاقه‌لر اورتا دا اولسايدي او فارسجا اوخوياردي توركجه يوخ، يا دا كي اونا توركجه اوخوماق ايچين تاپشيريق(سفارش) وئرمزديلر(باغلانتي). آراداكي اؤنملي سؤز تكجه و تكجه "راي" و "اؤي" ييغماق ايدي!

بير ايل گئچير. تيراختور يانداشلاري "منيم ديليم اؤلن دئييل" دالغاسي‌ني سونامي ائديب و بوتون شوونيسم تيكيتنتي‌لري‌ني كؤك‌دن چيخارديرلار. بونلارين توپلانميش سسي‌ني هئچ كيمسه سوسدورابيلمه‌يير. يوز مين‌لر آدسيز بيرليك‌ده آدليم اولوبلار. راسيسم و شوونيسم اوجاقلاري نئيله‌مه‌لي‌ديلر؟ دالغالانديرانلارين يانينا بير-بير گئديب و اونلاري بايكوت ائتمك‌دن قورخوتماق‌‌دان سونرا نه ائده‌بيلرلر كي؟! و بئله اولور كي سئوديگيمز خالق اوزمانجيميزلا رحيم شهرياري‌ ايله، يالان آل-وئرچي‌سي ‌بي‌بي‌سي ده دانيشيرلار(يوتيوب باغلانتي‌سي). دانيشيغيندا دئيير گؤردوم منيم اوخودوقلاريمدان سوءايستيفاده ائديرلر هر ياشاسين آذربايجان دئيه‌ندن سونرا ياشاسين ايران‌دا دئيه‌رم، و قيزي‌ايله بيرليك‌‌ده شاه زامانين مرز پر گهر ماهني‌سي‌ني اوخويورلار.

رحيم اؤزوندن ساوونوب(مودافيعه ائدير) دئيير  تكجه بير دفه حماسي اوخوموشام (و دئمير كي آذربايجان ماهني‌لارينين ياري‌سي حماسي‌ديرلار و نه جور باشقالار روستمين قيرهاقيرلارين دان اوخوياندا افتخار اولور آنجاق آذربايجانلي‌لار حماسي اوخوماقلاريني گيزلتمه‌لي‌ديرلر)! دئيير بيز آذربايجانلي‌لار دا رشت‌لي‌لر نئجه ميرزه كوچوك‌خاني، و بوشئهرلي‌لر تنگيستان‌لي‌لاري  سئوديكلري‌ كيمي ستارخاني سئويريك؛ آنجاق دئمير بو دوغال بير ايش‌دير و بئله بير ايش‌دن هئچ ديفاع لازيم دئييل. بيز نه دن  گرك اؤزوموز  اؤزوموزدن شكلي اولاق؟ سونرا بالاجا قيزي ايله بيرليك ده جيپ جيپ جوجه‌لريمــي اوخويور.
كليپ آراسيندا "منيم ديليم اؤلن دئييل باشقا ديله دؤنن دئييل" سسي گلير. آنجاق رحيم شهرياري به‌ي ياخشي آچیقلامايير كي "منيم ديليم اؤلن دئييل باشقا ديله دؤنن دئييل" سؤزوندن نه "سوء ايستيفاده"‌سي ائتمك اولار؟

...
ياديما دوشور بير ايكي بوندان قاباق رحيم شهرياري ميلاد بورجونون يانيندا اوخوياجاق‌ايدي. اوشاقلار ايله گئتمك ايسته‌ييرديك. آنجاق ائشيتديك بيليت اللي مين تومن اولوب. اونون بيليت‌لري داي بئش-اون مين دئييل!

تیراختور دیلئماسی

آذردیکته ده باخدیم آنجاق دیلئمانین تورکجه‌سی یوخدور. Dilemma‌ بیر پیس دورومون قارشی‌سیندا قالماغا دئیه‌رلر. آدام نه دالا چکیله‌بیر و نه قاباغا گئده‌بیلر. هر ایش گؤرونسه بیر ایسته‌نیلمز سونوجو واردیر.

بو تیراختور دا بیر دیلئما دیر، بیز ایچین یوخ "آذربایجانین وار اولسون" ایسته‌مه‌ینلر ایچین:

• تیراختورون قاباغینی آلماسالار گون گونه یانداشی آرتاجاقدیر. 
• حوققابازلیق چیخاردیب و اوچ - دؤرد دنه اویونوندا تاماشاچیلارین ایستادیوما گئتمک‌دن یاساقلاسالار گینه‌ده بونلارا یاخشی اولمایاجاق. من اؤزوم قورخوردوم گئت گئده یانداشلارین هه‌یه‌جانلاری آزالسین آنجاق بو یامانلاییب و یاساقلاندیرمالار تیراختورچولوق کؤزلری‌نی بیر داها آلاوندیراجاق. بوندان آرخایینام. بونا گؤره یاساقلاندیرانلار اؤنریرم اؤزلرینی یورماسینلار‍!

تیراختور اوچون یئنی ماهنی

یاشاسین بیزیم چالیشقان اوزمانجلاریمیز. بو یاساقلاندیرما گونلرینده تیراختور اوچون یئنی اوچ ماهنی یاییلدی:

1- بیری‌سی آذربایجان تورکجه‌سینده رپ ماهنی‌دیر! تایماز و توراتان آدلی گنج رپ اوخوجولار اونو اوخویوبلار.
2- ایکینجی‌سی‌نی سس قروپو و مسعود فلاح آدلی اوزمانجین ایشلری‌دیر. ماهنی‌لاری‌نین باشلیغی "هارای وئردین های آلدین یاشا سنی تیراختور" دور.
3- اوچونجوسونو ده مئهرداد کسانی آدلی گنج موغننی اوخوموش‌دور "بیزیم تیراختور" آدیندا. البته بونون اوخودوغوندان ائله ده خوشوم گلمه‌دی، آنجاق بیر آز دا آرتیق چالیشسا اوخودوغو داها گؤزللـه‌شر.

بو اوچ ماهنی‌نی تیراختور اوچون اوخونموش ماهنی‌لار صحیفه‌سیندن یوکله‌یه‌بیلرسینیز.

Oyan - اويان

بو باشليغي گؤردوم:

"اویان" جایزه بهترین فیلم کوتاه جشنواره «ته رنتو» را دریافت کرد.
("اويان" فيلمي ايتاليا دا قورولان «تئرئنتو» قيسا فيلم فئستيوالي‌نين ان ياخشي اؤدولونو قازاندي)
خبر - ۰۵ خرداد ۱۳۸۹ - منبع : سینمافردا

و تئز خبري اوخودوم:

ايتاليا دا، آغلار گولر(ارديبهشت) آيي‌نين دوققوزوندان اوندوققوزونا قدر قورولان، اللي سكيزينجي طبيعت و داغليق فيلملرينه گؤره،  تئرئنتو فئستيواليندا، اسماعيل منصف يؤنتيمي ايله دوزه‌لميش "اويان" قيسا فيلمي، اولوسلار آراسي ياريش بؤلمه‌سينده، ان ياخشي قيسا فيلم اؤدولونو (جايزه‌سي‌ني)  اله گتيردي.
‍ژوري هئياتينين بيانييه‌سينده دئييلميش كي يؤنتمه‌ن بو فيلم‌ده، باجاريقلي بير روايت ده، ايرانين بوگونو و كندلرينده اولان ياشام فضاسينا باخيب كي گؤزلري نازلاياراق، ايرانلي‌لارين ده‌يه‌رلي گله‌نه‌كلريني(سنت‌لريني) ايسه گؤسترير.

بورايا قدر اؤز آختارديغيمي تاپابيلمه‌ديم. "اويان" سؤزجويو توركجه‌دير. فيلمين آدي توركجه اولسا، ديلي ده توركجه اولمالي‌دير؛ آنجاق آذربايجانا گؤره هئچ زاد گؤرمه‌ديم. باشقا سايتلار همن خبري يازميشديلار. دئديم ائله گئديم فئستيوالين اصلي سايتينا باش ووروم، اورادا دا  آذربايجانا گؤره بير شئي يازماميشدي و فيلمه ايسه باخابيلمه‌ديم(باغلانتيلار: 1 - 2).

فئستيوالين رسمي سايتي ايكي آچيقلاما دا، بئله يازيلميشدير:

Iran Mountains. The everyday-life of a young post-man who delivers mail on both sides of the border.

چئويرمه:"ايران داغلاري. سينيرين ايكي يانينا مكتوب آپاران بير پوستچونون گونده‌ليك ياشامي."

Shot in the isolated mountains of Iran, this short film tells the story of a young postman who takes letters from one side of the border to the other. The house of an old shoemaker is always on his round. The shoemaker’s daughter anxiously awaits letters from her husband, who is a prisoner on the other side of the barbed wire that marks the border. One day the young postman discovers that it is not her husband sending the letters.

چئويرمه: "(فيلم) ايرانين ايزوله اولونموش داغلاريندا چكيلميش. بو قيسا فيلم، سينيرين بو تاييندان او تايينا مكتوب آپاران بير گنج پوستچو حاققيندا دير. بير قوجا باشماقچي‌نين ائوي اونون گونلوك يولوندادير. باشماقچي‌نين قيزي هيجان و راحاتسيزليقلا ، تيكانلي مفتيللي(سيم خاردار) سينيزين او تاييندا توتوقلانميش ارينين مكتوبلاري‌ني گؤزله‌يير. گونلرينين بيرينده گنج پوستچو باشا دوشور كي مكتوبلاري گؤنده‌رن او آروادين اري دئييل... "

خاريج ده ياشايان تانيشلارين بيري‌سيندن ايسته‌ديم، بو فيلمه باخيب گؤرسون جريان نه دير. او دا دئدي وئرديگين ويدئو آدرئسي، فيلمدن بير 36 ثانيه‌ليك كليپ دير؛ آنجاق ايچينده اردبيل-آستارا آغزيندا توركجه دانيشيرلار...

توركجه آدلي و توركجه ديللي آذربايجان گله‌نه‌كلري حاققيندا دوزه‌لينميش فيلميميزه گؤره ده اولوسلار آراسي جايزه آپارديق، آنجاق بيزيم وارليق گيزلي قالدي...
اويان منيم خالقيم...

بير آدديم قاباغا، ايكي آدديم دالا

تئهرانين ستارخان خياوانينا گؤره اولابيلر ائله آدينا گؤره علاقه‌م واردير؛ يوخسا تئهرانين هر يئرينده توركلر چوخدولار. البته بو خياواندان مين اوچ يوز سكـسن اينجي ايلين ياييندان اؤنجه‌‌دن پيس بير خاطيره‌م ده وار. مين اؤيرنجي‌ليگيمين سون ايلينده ايديم و تئهران دا كارآموز ايديم. دان اولدوزونون سون ساييلارينين بير‌سيني فايللارين ايستيرديم تئهران پرينت ائله‌يم كي اصفهان‌دا داي پرينتر داليسيجا اولمادان وئرم چاپخانا دا چاپ اولسون. ستارخان پاركينا ياخين بير "خدمات كامپيوتري" وار ايدي و اوندا بير جاوان اوغلان ايشليردي. بير گون ايش‌دن قاييداندا گيرديم او توكانا، ديسكئتي وئرديم دئديم بو فايل‌لاردان پرينت آل. او چاغدا ايسه ويندوزلار بير-بيرينين وئرسيالاريندان ساپورت ائتميرديلر و خولاصه پرينت آلماق "اعمال شاقه" ايدي. او پرينت باشلاياندا بير باشقا اوغلان الينده بير رمكه(تابلو)ني كاغيز ايچينده بوروب و گيردي ايچه‌ري و الينده نئچه دنه ده كاغاذ لوله‌له‌ميشدي. معلوم ايدي توكان يئيه‌سي ايله يولداش ايدي و دئدي: "گل بو بير‌يسي‌لري ده رمكه‌له" و سونر بيربيرلرينين قولاغينا پيچيلداماغا باشلاديلار و منه ربطي اولان دا دئييلدي ؛ گؤدوردوم دانيشمالاري قورتارا. كي بيردن رمكه دوشدو يئره...

رمكه دوز دوشدو منيم قاباغيما! شوشه‌سي سينمادي؛ تزه گلن اوغلان تله‌سيك اونو يئردن گؤتدو و دئدي خوداحافيط من گئديرم. من او تابلو دا كي شكيلي اؤنجه ده گؤرموشدوم و اولابيلر سيز ده گؤرموشسونوز. او كاريكاتور دا توركلرين تئهرانا يئتيشمك ايله ائششكليك چيخماق‌ و تكميللشمه سوره‌جي ني چكميشلر. بونو تصور ائله‌يين بير توركجه اؤيرنجيسل درگي‌ده چاليشان اؤيرنجي‌يه بو چكيمي گؤسته‌رلر! اؤزوده كي گليب آنتي‌شوونيسم مقاله‌لري چاپ ائله‌يه! آدام ائششه‌گه باخان كيمي توكانچي‌يا باخيب، گئتديم ميزين دالينا ديسكئتي بيلگي‌سايار دان چيخارتديم و دئديم منيم فايللاريمي بورادا پرينت ائله‌مك اولماز! او دا ائله قالدي باخا باخا. من تئز گئتديم باشقا اوغلانين داليسيجا و اونو دالدان توتدوم. دئديم: "اولار او تابلونو ساتاسان منه؟ من ده توركلردن زهله‌م گئدير آخي؟!" او دا تئز بيلدي، منيم منظوروم نه‌دير دئدي اولماز. اونا دئديم كيم چكيب بونلاري؟ او دا دئدي بيلميرم؟ دئديم بو مملكت ده اؤز وطنداشلارينيزي ائششگه اوخشاديرسينيز، اؤزونوز ايسه ائششك اولورسونوز كي!؟ بو خياوانين آديني نه‌دن ائششك آدي قويوبسونوز(ستارخان خياواني)؟ منظورونوز بو ايشلردن نه دير؟ اوتانميسينيز؟ گؤردوم او توكانچي ده جريانا اوزاقدان باخير و اؤزونو يئتيردي. دئديم كي من آرخايينام سيزين كيمي بؤجكلر تايي چوخدور؛ بير – ايكي نفرين ادب اولماغي ايله توركلر كيمي بؤيوك ميللته نه فايدا يئتيشر و نه ضرر! ... و گئتديم!

گوجوم كي يوخدور، كسينليكله كؤتك ده يئيه‌رديم؛ البته تئهران دا يولدان گئچنلرين ياري‌سي توركدولر؛ اولابيلر منه يارديم يئتيره‌يديلر آنجاق توپلومون ياريسيدا تورك دئييل، بؤيوك بير ساواش اولاردي! توتون او ايكي نفري گوج يا بيلگي وئرمك ايله آدام ائله‌يه‌يديم. آنجاق بو اؤلكه‌ده شوونيسم چوخلارين بئينينده سم و زهر كيمي گيريب و قيسا زاماندا آرادان گئدن دئييل و فقط تدريجي و توركلرين اؤزلرينه داها آرتيق گوونمه‌لري هر نه دن آرتيق خئيري اولاجاقدير. بيز گرك اؤزوموزه حيرص وئرمه‌دن مساييل و سورونلارين كؤكونه باخاق. و اؤزوموزو يورميياق و كولتورل سوروملولارا اؤنري و بيلگي وئرك.

---

او چاغ‌دان اون ايله ياخين گئچير و توركلر ده اؤز وارليقلاري قوروماق ايچين چوخلو چاليشميشلار و بؤيوك توپلومسال اولايلار دا اوز وئرميشدير كي هاميسين بيليريك و دئمك اولار توركلرين اويانيش سورجي يئردن گؤيه فرق ائله‌ميش‌دير. بو آرا دا 1000 آدديم دان 999 آدديمي خالق اؤزو آتميشدير و سوروملولار تكجه بير آدديم آتميشلار. اولابيلر دئيه‌سينيز هانكي بير آدديمي دئييرسن؟ من ده دئييرم آي يولداشلار انصافينيز اولسون دا! بيلميرسينيز مي بو نئچه ايل‌ده آذربايجان تاريخي آدليملارينين هئيكلي‌ني تئهرانين چئشيدلي يئرلرينده قويوبلار. اؤرنك ايچين شهريارين مجسمه‌سيني تئاترشهرين قاباغينا، ستارخانين مجسمه‌سيني ستارخان پاركينا و باغيرخاني دا شهرآرا پاركينا و ... . هئچ اولوب بير گئديب باخاسينيز؟!

Empty places of Statues - Səttarxan və Bağırxanın heykəllərinin boş yerləri

هئچ اؤزومونده واختيم اولماييب بير گئديب اونلارا باخام آنجاق ائشيديريك كي شهريارين مجسمه‌سيني اوغورلاديلار چونكو جينسي بورونز دان دير! دئييرم حتما ستارخان و باغيرخان هئيكلي دا قيزيلدان دير، ايتمه‌ميش گئديب بير گؤرونتو سالاق كي ائشيديريك اونلاردا اوغورلانديلار!! من دئييرم دوزدور آلتين ديليميز چوخدان‌دير ايتيرميشيك، آنجاق مجسمه كي دانيشان بير شئي دئييل؛ بو آرادا نه جور اولور،‌ بورونزو سئون اوغورلو به‌ي، مجسمه‌لر ايچينده تكجه "توركجه دانيشارميش" هئيكللردن خوشو گلير؟! بير-ايكي گون گئچير و خبر گلير نوبت يئتيشيب "توركجه دانيشمايارميش" هئيكللره!

ياشيللار دا ايكي گون سس چيخاتماديلار و باشقا مجمسه‌لرين خبري يئتيشندن سونرا اللرينه تئز فورصت دوشدو و دئديلر بو مجسمه‌لري طالبانا اوخشايان سوروملولارين اؤز ايشي‌دير! باشقا طرفدن خبر گلير كي "مداربسته" دوربينلر مجسمه‌لرين بيري‌سينين اوغورلانماسيندان فيلم گؤتورموشلر و ايپ اوجو اله دوشوب و ...

آنجاق من ايسه، "توطئه تئوريـ"ـسي طرزي ايله دوشوندوكجه، تيراختورچولارين ياراتديغي يئني كولتورل اويانيش دالغاسينا فيكر ائديب و دئييرم كي بوتون "عملــ"ـلره "عكس‌العمل" واردير، و ايلك اوغورلانميش اوچ موجسمه‌سي‌نين تورك آدليملارا مربوط اولماغي آنلاملي دير كي بو خبري گؤرورم: "تئهرانين انتظامي باشقاني دئييب، شهريارين مجسمه‌سي‌ني بلديه اؤزو يئر به يئر ائله‌مك ايچين يئر به يئر ائله‌‌ييب (باغلانتی)"! و دئمك بيرينجي ايته‌ن مجسمه‌ يوخ، باشقا مجسمه‌لر اوغورلانيبلار! كي بونلار دا بوگون-يارين تاپيلابيلرلر...

"اوغورلامالی" وارلیق "اوغورلولار" دردینه ده یر

و سون دا بللي اولمادی او آتيلميش آدديم، بير آدديم قاباغایمیش يا ايكي آدديم دالا... اصلا فرض ائله یین منیم شکلی باخماقلاریم کسینلیک ایله یئرسیز دیر و من یانلیش توخونورام؛ و سوروملو(مسؤول)لار بیر داها و بو تئزلیکده آذربایجانلی آدلیملار ایچین یئر-گؤی ده مجسمه یونوب ، قوراجاقلار! نه اولسون کی؟ بئله ایشلر سونرا کی آشاما (مرحله) دا یئرله شیرلر. مجسمه دوزتمک ایله خالقین وارلیغینی قوروماق اولماز کی! اوغورلامالی وارلیق و کیملیک ائله اوغورلولار دردینه ده یر. اوغورلولارین عورضه لری واردیر گلسینلر ایندی کی  گنجلر آراسیندا کی یارانمیش و ده یه رین دئمک اولماز "کولتورل اویانیشی" آپارسینلار!

* * * * *

Briefly in English: Where are the sculptures?

بئشينجي آشيقلار بايرامي، تيراختور و دلي‌لر

بازار گونو(يكشنبه) يولداشلارين بير‌ي‌سي منه دئدي گليسن گئدك زنگان‌دا "آشيقلار بايرامي‌"ـنا؟ من‌ايسه باشيم شولوق اولدوغو، و مرخصيمين اولماماغينا باخماياراق دئديم هن گليرم! اؤنجه ائشيتميشديم بئله بير بايرامين آديني، آنجاق چوخ ماراقلي‌ايديم كي گئدم. "آشيقلار بايرامي‌" سؤزجويونو قوقوللاديم(گوگل ده آختارديم). تكجه بو صحيفه‌ني تاپابيلديم. اول‌ده بئله دوشوندوم 87 جي ايل‌ده ميان-زنگان آراسيندا اولان كندلرينين بيريسينده قورولموشدور. من‌ده دئديم دئيه‌سن اوزاق اولاجاق و گئده‌بيلمه‌يه‌جه‌يم، يولداشا دئديم آرخايين‌سان زنگان دا دير مي؟ او دا دئدي يوخ زنگان دير آرخايين اول. سونرا سايين بايرام بياني‌نين بيلاغيندا 87 يازيندا كي تؤرنين آيرينتيلاري‌ني دا گؤردوم.

دوز گونو(دوشنبه) نون ناهاردان سونراسي اولدو. قرار ايدي يولداشلار منيم سوروجولويوم ايله، يولا دوشك زنگانا ساري. آنجاق تكجه بيري‌سي افتخار وئريب من ايله يولا دوشدو. ئددي ده دئميشديلر فيلان ائو ده اولون؛ آنجاق بيز آلتي‌دا يئتيشميشديك زنگانا و تكجه زنگانين اوستو اؤرتولو بازاريني گؤره بيلديك. زنگان‌دا جاليب شئي بو ايدي كي توركجه آدلي توكانلار آز دئييلديلر.

ايستيرديك آدريس سوروشاق! من بير كيشي‌يه ساري گئتديم. يولداش دئدي او بيلمز، "مودئرن" آداملارا اوخشامير! قولاق آسماديم و سوروشدوم زيباشهر هاردا دير؟ او دا بيلمه‌دي!! يولداش دئدي گؤردون؟!!

يولداش ايسته‌ييردي موبايلينا شارژ آلا گيرديك بير بيلگي‌سايار قوللانيم(خدمات كامپيوتري) توكانينا. بير جاوان اوغلان گؤزلرين جيلله‌ميشدي مانيتورا هر دن برك گؤلوردو. چون مودئرن ايدي سوروشدوق زيبا شهر نه جور گئدك؟ او ايسه تميز دئدي! يولداش گينه دئدي گؤردون؟

توكاندان چيخان‌دا او اوغلانا دئديك نه‌يه باخيرسان‌كي هر دن برك گولورسن؟ او دا دئدي صمد-ممده! من دئديم هانسي‌نا؟ او دا دئدي "اخراجي‌ها"(اخراج اولونموشلار).

گلديك زيباشهر و آدريسي تاپديق. ائوين ايچيندن آشيقلارين اوخوماق سسي گليردي. چوخ سايقي گؤستريب و بيزي ايچري‌يه دعوت ائتديلر. اوتانا اوتانا گيرديك ايچري، چاي ايچيب و شام يييه‌ندن سونرا بيلديك كي تورن ائو ده يوخ بلكي زنگانين ائشيگينده‌كي بير باغ دا اولاجاق. آشيقلار و قوناقلار دال نئچه‌دنه گؤروت(عكس) سالديلار و بير داها يولا دوشدوك. و بؤيوك و يئكه بير باغا يئتيشديك. باغين اورتاسيندا گؤزل بير ائو وار ايدي و اونون ايچينده "آشيقلار بايرامي" باشلاندي. آشيق غافار ابراهيمي‌دن سونرا هئچ كيمسه‌ني تانيميرديم. آشيق غافار يئتميشينجي ايللرده اوغلو حوججت ايله بيزيم بيلي‌يورد دا قورولان توپلوملارا گلردي.

خوي، اورمو، ساوا، ماراغا، زنگان، قزوين و آذربايجانين چوخ بؤلگه‌لريندن آشيق گلميشدي و هامي‌سي اؤز گؤزل ايفالاريني گؤسترديلر. آشيقلارين ايفالاري‌نين آراسيندا بيلديك كي بو بئشينجي "آشيقلار بايرامي‌" دير و ارشاد اداره‌سي آذربايجان آشيقلارينا يوخ، و تكجه "زنگان آشيقلاري بايراميـ"ـنا مجوز وئريب، و او بايرام دا گئنل اولاراق 400-500 نفرين حضورو ايله، باشقا بير تورن‌ده توتولموشدور. و بئشينجي بايرام اؤزل بير مراسيم ده كئچيريلير. هر حال‌دا من مراسيمي قورانلارا اونرديم، چاليشين بو تؤرنلرين خبرلر و كليپلريني اينتئرنت سايتلاريندا قويون. من كي اينتئرنت ده چوخ اويان بويانا باش چكرم كئچن ايللرده كي بايراملاردان تكجه بيرينين ، اؤزوده فقط دؤرد-بئش‌دنه گؤروت گؤره‌بيلديم. بئله اولماز آخي!

تورنين چيخيشلاري آراسيندا يولداش ‌ايله بونا گؤره ده دانيشيرديق كي اويغون اولابيلردي بو مراسيمين آدي "آشيقلار بايرامي‌" يوخ، بلكي "آشيقلار تؤرني يا فئستيوالي" اولايدي. آنجاق من ده دئييرديم آشيقلارين ايشي هونر(اوزلوق) وموسيقي‌دن اوستون‌دور، اونا گؤره "بايرام" آدلانديرميشلار. سونرا يولداش دا دئدي هئچ بيليرسن بايرام فارسجا قايناقلي بير آد دير؟ من ده دئديم يوخ بايرام دا "باي" وار و تانري‌يا بير اشارت دير. او دئدي يوخ بايرام ائله همن پدرامين توركلشميش‌ايدي و من تعجب ائله‌ديم! البته يولداش دئدي كي فارسجا دا دئمك اولماز، چون چوخ اسكي و باستاني دير. من دئديم ائله دئيه‌ك سانسكريت كؤكلو بير سؤزجوكدور!

ائله بو "بايرام" سؤزجويو فيكيرينده ايديم كي گؤردوم آشيق غافار چيخيشي‌ني باشلاييب، دئيير:
"آدام گؤرنده كي تبريزده، تيرختور تيمي يوز اللي‌مين نفري بير يئره ييغير، دئيير كئشگه هامي‌ميز توپجو(فوتباليست) اولارديق! ايكي دنه ايفا واريم كي بيري‌سي‌ني تيرختورون افتخارينا اوخوياجاغام." و هامي آلقيشلادي. من ده يولداشا دئديم تيرختور اوچون اوخويان‌دا حتمن فيلم گؤتور. قرار دير فيلمي اوندان آلام و بورا قويام سيز ده باخاسينيز*.

گئجه ساعات بير ده ايفالار و بايرام سونا چاتدي. ساوالي آشيق رنجبر ده بيز ايله قاييتدي. يوخو و يورغونلوق هامي‌ميزين گؤزوندن ياغيردي. يولون ياري‌سين يولداش و قالانين‌دا من سوردوم. آشيق رنجبر آينيشتاينين بير سؤزونو دئدي: "آداملار ايكي دسته‌ديرلر عادي ايش گؤرنلر و دلي‌لر. بيز اوزمانجلار(هنرمندلر) ده عادي ايش گؤرموروك و دلي‌ييك". بيز ده گولدوك! او دئدي:" ائله سيز ده دلي‌سينيز! گئجه ساعات بير-ياريم دا هامي ايستي يئرينده ياتيب، سيز بورادا نئيله‌ييرسينيز؟!".

*- ي.س:
كليپ سككيز آلتيندان سونرا بورادا ياييلدي:
آشيق غافار: ياشاسين تيراختور تيمي

Urmu Gölü Susuzdur

Ərəb dilindən alınmış Təəhhüd(تعهد) sözcüyünün Türkcəsini bilmirəm. Hər kimsə də onun nə olduğunu bir cürə düşünür. Ancaq bu iki gözəl və olduqca üzücü poster də, gerçək anlamda olan bir təəhhüd görürəm. Bütün Azərbaycanlı və Türk uzmanclar da belə bir təəhüddün olması qoymaz biz kimi adamlar, Urmu Gölünün qurumaq xətərini bir an unutsun:

qaynaq

qaynaq

İki il bundan öncə Marağa ya getmişdim. Orada 17 il bundan öncə görmədiyim bir gözəl yaşıllıq görürdüm. O hədsiz yaşılliq Ələviyan səddindən qaynaqlanırdı. Belə səddlər Urmu gölünün ətrafında çoxdurlar və ola bilər ki belə sədlər aşırı su içməsələr Urmu gölüdə bir az çox su alıb və qurumaz. Umud ki Urmu gölü ilini qorumaq ilində, Urmu Gölü qırağında yaşayan Azərbaycanlılar , su tükətimlərində azca Təəhhüdləri olsun. 

AzMahnı - آزماهنی

بیر خوش خبر:

آزماهنی سایتی(آذربایجان موسیقی‌سی قایناق سایتی/ سایت مرجع موسیقی آذربایجان) ایشه باشلادی.


بوتون آذربایجان موسیقی‌سینه ماراقلی اولانلار گئدیب اورا باش‌ وورسونلار و اؤز یازیلار و نظرلرینی اورایا بیلدیرسینلر. اینشاللا کی بو سایت باشاری‌ایله آذربایجان موسیقی‌سی ایچین بیر گئرچک مرجع سایت اولابیلسین.

يئني تيراختور ماهني سي

تيراختورون باشقا جوره آلقيشلانماسي و يئني بير توپلومسال و كولتورل آخيم ياراتماسي بير يانا ، و اونون آذربايجان موسيقيسينده بير ترپنتي سالماسي دا بير يانا! گونده بير يئني و گؤزل ماهني تراختورا گؤره چيخير، تانري چوخ گؤرمه سين! آشاغي دان گئديب آيتام آدلي اوزمانجين اوخودوغو، و آذريار قوشدوغو «قول، قول، قول! ياشا تراختور!» ماهني سي ني، MP3 فورما دا يوكله يين:

Mahni: Qol Qol Qol! Yasha Traxtur
Oxuyan: Aytam
Yazan: Azeryar

Qaynaq: tractorfans.com

ساري‫ گلين دالغالاندي

دونن گئجه ساري گلين كونسئرتي، دئديگيم كيمي هاريكا ايدي! تكجه بير ايش منه راس گلدي كي آز قالميشدي بورنومدان گلسين! او دا بو ايدي كي شيركتيميزين سئرويس سوروجوسو قانونچو و خيلاف ائتمه‫يه‫ن بير فارس چيخيب، مني فاطيمي كوچه سينين باشيندا انديرمه‌ييب و شوونيستلر كيمي، اليندن گله‫ني ائتدي تا مني لاپ اوزاق يئر ده سالسين. آخيردا ايستيرديم بير دنه وورام انگينين آلتيندان! گرچكدن عوقده‫سي وار ايدي گه‌ده‫نين. آنجاق قاچا-قاچا وليعصر كوچه‌سيني اوزو يوخاري قاچيب اؤزومو يئددي ياريم‌دا يئتيرديم. هر دؤنه ايران دا بئله وئرليشلرين باشلانغيجي گئجيكمه‌يي عاددي بير ايش اولدوغو كيمي، گؤردوم هن، ساعات 19 يوخ، بلكي 20 ده باشلاناجاق!
ايكي ايش ده اولماسايدي دالغا قوروپونون چيخيشلاري يوز ده يوز بيز ايچين ياخشي اولاجاقدي. بيري بو كي آپاريجي خانيمين چوخلو فارسجا دانيشماغي آدامين لاپ زهله‌‫سيني آپاريردي. ايكينجيسي ده اؤز تقصيريميز ايدي: اوجوز اتين شورباسي ياخشي اولماز! اون‫‌بئش‫‌مين تومن دوز دور باها نظره گلير، آنجاق اؤلكه(كشور) تالاريندا، اورتورب باخماق ايچين چوخ پيس يئر ايدي و بوينوموز قورودو! هر حال دا بيز او اوزمانجلارين آلقيشلامالي سسلريني دينله‫مك ايچين گلميشديك.

بيلي يورد يولداشلارين بيري‫سي sms ايله مني اورادا تاپدي. دان اولدوزو درگي‫سينده امكداشليق ائدرديك. من كيمي ال آياقسيز چيخماييب و اؤز حايات يولداشي اولاجاق بير خانيم ايله گلميشدي. دئييرد داي نه‫يه بيزي خبر ائتميرسن بئله چاغلار!؟ ائله بيليرديم داي اصلا كونسئرت-مونسئرته گلميرسن؟ من ده دان‫اولدوزونون ايلك سايي‫سيندا يازديغيميز شئعر ياديما دوشدو و بير آز چئويريب دئديم: داي اودلانيب-يانماق ايسته‫ميريك، آنجاق، من گلمه‫سم، سن گلمه‫سن، بيز گلمه‫سك، هانسي چپيك چالانلار، آلقيشلايار بو اوزمانجلاري!

بالكون دا اوتورموشدوق. اورادان سئني ياخشي گؤره‫بيلمه‫‫سه‫ا‫يديك ايسه، پرده آرخاسيندا و سئن قيراغيندا چاليشانلاري ياخشي گؤرمك اولوردو! اينتئرنت واسيطه‫سي ايله تانيديغيم پئشه‫كار و گنج فوتوقرافچي، روشن به‫يين نئجه چاليشديغي‫‫ني اوزاق دان گؤروردوم. اونا باشاريلار ديله‫ييرم، آنجاق كاشكي او زال دا اوتورانلاردان دا عكس گؤتوره‫يدي! البته اولابيلر گؤتوروب و من گؤرمه‫ديم. من‫ده بو قيريق موبايليم ايله نئچه دنه ايري-اويري گؤروت گؤتوردوم كي گؤره بيلرسينيز! سون چيخيش دا، بير قوجا كيشي‫ اويناماغا باشلاميشدي و اوندان ايسته‫ييرديم بير گؤرونتو سالام كي سالون قوروقچولارينين بيريسي ادب ايله دئدي قوي جيبينه! من ده دئديم ائـــ...! هئچ ياديمدا ده‫ييلدي عكس و فيلم گؤتورمك ياساق ايميش.

بير ياندان دا، توركوك بيز وئبلاقيندا گؤردويوم قيوير بلاقي يازارينين سؤزو،‫ بونو منه وورغولاميشدي كي بئله تؤرنلر و كونسئرتلر يوز ايلده آذربايجان بؤلگه‫لرينده قورولماياجاق! تكجه ايفتيخاري تبليغ ائتمك هدفي ايله، كوپي‫رايت ياساسي‫ني آياق آلتينا قويوب و اورادا ايفا اولونان چيخيشلاردان ايكي سيني بورادان يوكله‫يه‫بيلرسينيز. دوز دور كئيفييتلري چوخ آشاغي دير و اولابيلر ايفالارين گؤزلليكلريني آرادان گئتسين، آنجاق اوزاق دا اوتورانلارين گوناهي نه؟! اؤزو ده، بو ايش ايله، هامي تحريك اولارلار كي اصل CDنين داليسيجا دوشسونلر.

اينشاللا CD سي، بو تئزليكده چيخا، و اونو هاممي آلابيلسين.

بونو دا خارابلاديلار

قاجارلاردان قالميش ياخشي بير آنيتلارين بيريسي، او زامانلار دا يازيليب، چالينيب و اوخونموش، ايران محروسه مماليكينين اولوسال مارشي دير. او تكجه نئچه ايلدير تاپيليب سانكي. او مارش دا ايرانين نئچه اولوسلو و نئچه ديللي اولماغينا ايشاره اولوب و فارس ديلينه اوخونماغي و بير فرانسا موسيقي چي سينين دوزنلمه يينه باخماياراق، موسيقي اوزماني اولماساندا بيلرسن بو موسيقي آذربايجان موسيقي سينه اوخشايير. هر حالدا، تاريخي خاراب ائدنلر ايش سيز قالماييب و بئله بير گؤزل اثرين هئيكلينه ده ايسته ييرلر آفتافا گؤتوروب و بوتون ايرانليلارين آبريسيني دونيا قارشيسيندا آپارسينلار. بونا بير كليپ دوزلديبلر، و شئعر ده كي ايران خالقلارينا گؤره اولان سؤزلره قولاق آسماياراق، گؤتورب آغيلدان اوزاق گؤروتلر باسيبلار:

لاپ گولونج بؤلومو باشلانغيج دا دير! آمئريكاليلارين ايكينجي دونيا ساواشيندا، ژاپونلولارا "ايوو جيما" دا غاليب گليب و بايراقلاريني قالديرماق شكيلينده، ايران بايراغي قويولوب. آمئريكاليلار كي هئچ، دونيا دا تاريخ كيتابلاريني ورقلريني بير آز چئويرميش هر كيمسه، بو عكسين كؤلگه سينه ده باخسا، تشخيص وئرر، بو همن پوليتزئر اؤدولونو آلان «آتالاريميزين بايراغي»ـينا(Flags of our fathers) معروف اولان گؤرونتو دور. بونلار گليبلر اونا اوتوردوبلار جومشود تختينده كي قانادلي آتين آسلان آدامينين قارشيسيندا!

بونلار هر نه يي بئله چئويريب تحريف ائديرلر. اوز دئديكلري ايكي مين بئش يوز ايلليك تاريخ، گلير ايكي يوز ايلليك تاريخينين 60 ايل بوندان قاباغيندان رسيم اوغورلايير! اولمازدي ايران-ايراق ساواشيندان بئله بير گؤروت سئچيله ايدي؟!

Eurovision Song Contest 2008

سوندا بيلينمه‫دي بو قوزئيلي‫لر "eurovision"ـا نه دئييرلر!؟ بيري دئيير ييوريويژين، بيريسي دئيير آوروويژون، بيري ايسه دئيير آوروويژيا و ...!!

هر حالدا، اؤتن ايل توركييه لي كنعان دوغولو، بئشينجي يئره ال تاپاندا، دئديم كئشگه آذربايجان دا بو اولوسلارآراسي ماهني ياريشماسيندا قاتيلايدي، بئله‫ليك هم آذربايجان آدي بو اؤنملي اولايدا اورتايا گلردي و هم توركييه ايسلاو اؤلكه لرينين آراسيندا تك باشينا قالمازدي و 12 پوآن دا آذربايجان آلاردي. آنجاق اينسان و اؤزلليكله توركلر آرتيق تاماح ديرلار و بو ايل آذربايجانين ائلنور و ساميري ايسه آذربايجانين تمثيلجي سي اولدوقجا، دئديك آذربايجان بيرينجي يئري و توركييه ايسه ايكينجي يئره لاييق ديرلر و بو يئرلر اونلارين آراسيندا ده‫ييشيلسه ائله‫ده عئيبي يوخدور!

آنجاق، سانكي بو ايل آذربايجانين ايشتيراكي، ايسلاو اؤلكه‫لريني بيربيرلرينه داها آرتيق قوهوم-قونشوباز و توركلري ايسه داها آرتيق الي‫آچيق ائتدي. فارسلار دئميشكن بامرام(مراملي) ائتدي. ائله كي بو ايل توركييه، ايكينجي يوكسك پواني‫ني ائرمنيستانا وئردي؛ حالبوكي يونان، قيبريس و ائرمنيستان بئله بير ايشه ماراق گؤسترمه‫ميشلر. اولسون كي دئسينلر گؤرون توركلر نه باريش سئور اينسانديرلار و اؤز اوركلريني يئرسيز كينه و دوشمانليقلا دولدورمورلار، و هونر و اوزلوق مئيداني، سيياست و ووروش مئيداني دئييل. البته بو آرادا روسييه ايسه ايكينجي پوآني‫ني ائرمنيستاندان سونرا آذربايجانا وئردي و ائرمنيستاني سيربيستاندان داها اؤنملي بير اؤلكه تانيماغيني بيلديرمكدن سونرا گؤستردي كي روسييه ايسته‫يير آذربايجان ايله ياخشي داورانسين!

هر حالدا بو پوآنلاري آناليز و تحليل ائتمك، چوخ چتين، قارماقاريشيق، پارادوكسلو و اولابيلر واختي تلف ائتمك اولسون! ولي بو سونوج نيسبي اولاراق آيدين‫دير كي هله آوروپالي‫‫ليلار آراسيندا ديني و مذهبي تعصصوب، چوخدور، و بونون اونايلاماسيني گؤرمك ايچين، ائرمنيستانا يوخاري پوآن وئرن اؤلكه‫لرين آدينا باخماق يئتر.