Hanı açar sözcüklər?

URL adresini buraya qoymayıram az link yesin! Bu da qalsın kı olduqca görəni olub.

Filmi çəkən Farsca danışır: "inja orumiyye! ağa bia invər!". Cəmaatda bişərəf-bişərəf deyirlər! Filmi yayanda bir dənə Azərbaycan açar sözü işlətməyib!
Sonra gəlin deyin nəyə Azərbaycanın işi başqaların kamına olur!

Qərar olsa kötəyin biz yeyək, ama bir yaşıl-maşıl damda "Ağa bia invər - bia invər" eliyə, və filmi yayanda da bir dənə Azərbaycan adına işarə etməyə, elə yaxşıdır yataq, yel düzü savura dilsiz başımıza!

Ən azı bu filmləri özümüz paylaşanda hətmən Türk, Azərbaycan, və Urmu Gölü kimi adları hətmən yazaq.
Bundan belə tarixi İnternet və Google-un robotları yazacaqlar.

Yaşasın Urmu Gölünü Yaşadanlar

باسقي‌ آلتيندا

قانديرابيلمه‌ييرلر! اورمودا دوشه‌ن اوچاغا يوز جوره ايقناع ائتمه‌يه‌ن نه‌دن دئييرلر. هامي‌سي بيري بيريندن منطيق‌سيز. بو آرادا لاپ گولونج يوخسا آغلامالي نه‌دني، گئنه يول باخاني دئييب:

" مردم فشار مي آورند كه پرواز مي كنيم! (خالق بيزي اوچماق ايچين باسقي آلتينا قويور)"!

دئمك، سيز خالقين ايستكلرينه سايقي گؤستريرسينيز، آما جانلارينا يوخ! و بو شاشديرير آدامي.

دئييرم ايستكلريميزه جانيميزدان چوخ ده‌يه‌ر وئرن قوللوقچو سوروملولارين ايچينده، كئشگه كولتور و اؤيره‌تيم باخانلاري‌دا بئله اولارديلار. نئچه ايلدير "تورك ديلينده مدرسه" هارايي يئر گؤيو بورويوب، آما بونو كولتورل ايستك بيلمه‌ييب و اونو امنيتي سورون سانديلار!! اولماز بيزه سايغي گؤسته‌رمه‌ييب اوچاقلاردا اوتورتماياسينيز، آنجاق قوياسينيز اوخوللاردا اوشاقلاريميز آناديللرينده درس اوخويالار؟!

گونون گؤروتو: تيراختورون اونودولماز يانداشي

كئچميش يازيدا كي "ي.س(يازيدان سونرا)" بؤلومونو، "گونون گؤروتو" باشليقلي باشقا بير پوستدا، يايماق ايسته‌ديم. بو دؤنه، گونون گؤروتو اوزوجودور:

تيراختورون اونودولماز يانداشي

تیراختور یانداشلاری سایتیندا گؤردوم، دونن آخشامین اوزونتولو اولاییندا بیر تیراختورچو دا اوچاق ايچينده ایمیش و آللاهین رحمتینه گئدیب. دوزدور ایندی آزربایجاندا بیری‌سینی تاپماق اولماز تیراختور یانداشی اولماسین، آنجاق "علی خدابخش" سانکی اؤنجه‌دن ایسته‌ییرمیش بو گؤرونتوسو ایله، تیراختورون ان اونودولماز یانداشی اولسون:

آللاه اونا و اوچاق قضاسینا گؤره باشقا بو دونیادان کؤچنلره رحمت ائله‌ییب و تانیشلارینا دؤزوم وئرسین.

---

ي.س: 
سون بيلگي‌لره گؤره "علي خدابخش" شريف تئكنولو‍ژي بيلي‌يوردونون(دانشگاه صنعتي شريف) اؤيرنجي‌سي ايميش...

اورمو... باشین ساغ اولسون

قار - یاغیش یاغماق ایلک باخیش‌دا سئویندیریجی ایدی. چونکو اورمو گؤلو و اورمو داغلاری قار ايله یاغیش ایسته‌ییردی.
آنجاق بو آرادا، اورمونون دومانلی گؤیو بو گئجه، گؤیرچینلرین بیر سایی‌سی‌نین اوچماغی‌نين سونا چاتماسيني ایسته‌مه‌ییرمیش...

اورمو و آزربایجانین باشی ساغ اولسون...

ی. س:
بوگون تیراختور یانداشلاری سایتیندا گؤردوم دونن آخشامین اوزونتولو اولاییندا بیر تیراختورچو دا اوچاقدا ایمیش و آللاهین رحمتینه گئدیب. دوزدور ایندی آزربایجاندا بیری‌سینی تاپماق اولماز تیراختور یانداشی اولماسین، آنجاق "علی خدابخش" سانکی اؤنجه‌دن ایسته‌ییرمیش بو گؤرونتوسو ایله تیراختورون ان اونودولماز یانداشی اولسون:

آللاه اونا و اوچاق قضاسینا گؤره باشقا بو دونیادان کؤچنلره رحمت ائله‌ییب و تانیشلارینا دؤزوم وئرسین.

اورومچودان اورمو يا

چين‌لي‌لر بئله آلقيشلارين نه‌ده‌نين بيلميرديلر؛ چونكو بيلميرديلر تيراختور نه دير!
بيلميرم اونلار "اورمو" نو "اورومچو"يا بنزه‌ديرديلر يوخسا يوخ؟ اورومچولار نه قدر ده باسقي آلتيندا اولسالار اؤز آناديللري‌ني اوخوللار دا اؤيره‌نيرلر آنجاق اورمولولار يوخ! آما فيكر ائله‌ميرم اورومچولار اورمولولار كيمي بئله ذكالي ايشلر گؤره‌بيلسينلر؛ بو ايشلردن گؤره بيلسه‌لرده اينانميرام چين‌ده كي باسقي‌دا باشارابيلسينلر.
آنجاق تبريزين ايستاديومو سوسدورولان گونلرده، اورمونون آيدين و آييق مين‌لر گنجلري‌نين "آذربايجان وار اولسون" سسي‌ني آسيا يوخ بلكي دونيا دا ائشيتدي...

ياشاسين اورمو
ياشاسين آذربايجان...

ي. س:
باتي آذربايجانلي بير يولداشيما هه‌يه‌جانلا دونن آخشام‌كي اولايلاري تعريفليرم. دونن‌كي اويونو او گؤره‌بيلمه‌‌ييب. دئييرم هينديستان ييغماسي‌نين ميداللاريني پايلاياندا، اورمولولار اونلاري تيراختور تيراختور دئيه‌رك آلقيشلاييرديلار! او "آما هينديستان چين‌دن ياخشي اويناييردي" دئيه‌نده، دانيشيغي داوام وئرمه‌ديم... ايكي قيرانليغين اه‌يري اولماماغي ايسه ياخشي دير!

اورمو نوغولو

اورمولو امكداشلارين بيري‫سي هر دن اورمو نوغولو گتيرر و بيزه چتينليك يارادار!
اورمو نوغولو چوخ يئمه‫لي دير. بئله كي ديشلريمين ياريسينداني چوخونون خارابليغي و آغري‫ياجاغينا باخماياراق، اؤز قاباغيمي ساخلاياممايب و چاي‫ ايلخ و يا چاي‫سيز اونلاري تئزليك ايله قوتارارام!

هر حال‫دا، اورمولو نوغول دوزلدنلرين بير ايشلريندن زهله‫م گئدير و گؤردوغونوز دوزسوز قوشمالاري او قابلارين اوستونه ياپيشديرماقلاري‫دير. اولماز توركجه‫ده گؤزل شئعرلر ده تاپيب قوتولارينيز اوستونه يازاسينيز؟

فارسجا يازيليب بو نوغول باشقا بير نوغول دور! ائله من ده اونايلاييب، دئييرم نوغولون كي باشقا دير هئچ، سؤز قابين ايسه بام باشقا دير.

اصلاح طلبـليگين ييرتيق توماني

«اورمو»نون اؤنجه كي ميللت وكيلينين بو گونلر دئميش، آنجاق كؤهنه‫له‫نميش سؤزلريني گؤردوم و بير داها اسكي دردلريم، يئني‫لندي:

بو يازي نين عونوانيندا ايلك ده ايسته ديم، «رئفورميستليگين ييرتيق توماني» يازام، آنجاق گئنل اولاراق رئفورميسم ياخشي ايش دير و بئله آد قويماق دوز دئييل، ايران دا «اصلاح طلبليك» بايراغي ني قالديرانلار، بو پوروسه نين آبريني آپارميشلار.

تانيديغيميز رئفورميستلر و 76 نجي ايلين خورداد آيي نين 2 نجي گونونده اولان سئچيمدن، خاتمي نين يانچيلاري(طرفدارلاري) سوء استفاده ائديب و اؤزلرينه «اصلاح طلب» آدي قويدولار و 8 ايل بوگون – صاباح ائديب و تكجه قارينلاريني و اؤز ائولريني آباد ائتديلر. بونلار، «ايران بوتون ايرانليلار ايچين» كيمي شوعارلار ايله بوتون ميللتلر و ائللرين باشيني آللاديب و اونلاري اؤزلرينه بير پيلله ائتديب و تكجه «مدنيتلر دانيشيغي ني» ايشده يوخ، بلكه سؤز ده، تبليغ ائتديلر. 1384 جو ايلين جومهور باشقانليغينين سئچيمينده، آذربايجان اولوسو بونلارا بؤيوك و كسگين بير «يوخ» دئدي و 76نجي ايلي خوردادينين 9 نجو ايل دؤنومونده، بوتون يالانچي و ايكي اوزلو ايصلاح طلبلره، گؤستردي كي «يوخاري ده چنه وورماق(چانه زني در بالا)» يالنيز اؤز دردلرينه ده يه ر و نه گؤزل بيلديردي «آشاغي دان سيخينتي» نه جور يوخاري دا چنه ووروب – وورمايانلاري ال-آياغا سالار.
و يازيقلار اولسون! بونلارين اوزو او قدر چوخدور كي هله ده اؤز اولوسلارين ايستكلريني قانماييبلار. نه بورادا داياقلاري واردير و نه اورادا.
بونلار آناياسا دا كي بير اصلين سؤزونو، باشقا اصللردن چوخ جيددي توتموشدولار! و البته آيدين دير كي اؤزلريني بو يولا وورموشلار؛ بو اصل دئييردي كي «ايسلامي شورا مجليسينده كي ميللت وكيللري، يالنيز اؤز بؤلگه لرينين يوخ، بلكه بوتون ميللتين قارشيسيندا سوروملو و مسؤول دورلار».
بو اصل چوخ ياخشي دير؛ آنجاق آذربايجان ميللت وكيللري، ايرانين باشقا بؤلگه لرينين داشيني سينه لرينه ووراندا، باشقا ميللت وكيللر نئيه آذربايجانليلارين تاپدالانميش حاقلاريندان دانيشميرلار؟
باشقا آداملار و حتي بونلاردان دا هئچ گؤزله‫‫مه(انتظار) يوخ ايدي اؤتن ايلين ياز سونوندا كي اولايلار دا، جانا گلميش آذربايجان ميللتينين يارديمينا گلسينلر، آنجاق بونلار هاميسي خالقين قوجاغينا قاييتماغين سون فورصتي ني الدن وئرديلر و ايندي ده تاريخين آشقال قابيسينا قووشماقداديرلار و اؤز خالقلاري ني يوخ، بلكه خاتمي ني اؤز پوتانسييئللري بيلمك ايله(!)، بير ده اؤزلرينين سئچيلمه يينه اومود باغلاماقلاري، پيشميش تويوخلاري دا گولدورور.
بو سؤزو هامي بيلير كي: «جيريلميش پارچا، ياماق گؤتورمز»

ایسکندر "اورمو"لویموش

آغا دئیه سن بو یازیق اورمودان ال چکن دئییللر! ایرانین رادیو تیلویزیونون دئییرم؛
اورمو بیلی یوردوندان فارغ التحصیل اولان مئهدی بی، بئله تعریف ائدیر:
بوگون، ایرانین دؤردونجو کانالیندا، "اولیوئر ائستون"ـون 2005 ایل ده دوزه تدیگی فیلم، "بؤیوک ایسکندر" (Alexander The Greate) ـــه گؤره آنالیز، بحث و قونوشما وارایمیش و اوندا عجیب-غریب دانیشیقلار اولونموشدور!
دوکتور عالمی آدیندا بیر اوزمان(کارشیناس!) بوتونلوکله ایسکندرین ایرانا ائتدیگی سالدیریسینی (حمله سی نی)، تاریخین ان بؤیوک یالانی بیلیب و حتی فئردوسونون شاهنامه سی نی بیر سند تانیتدیراندان سونرا، اوندا کی سؤزلری گئرچک آدلاندیرمیش! دئدیگیمیز اوزمان، ایسته دیگی قدر ده دوشنام و هر آغزیندان گلنی وئررکن، کوروش و هخامنیشی، سیویل و متمدن آداملار کیمی، اولدوقجا تعریفله ییب. البته بو دوکتورون سؤزلری ایله بورایاجاق ایشیمیز یوخ، بئله یالانلاردان چوخ دئییبلر و بیز ده بو سؤزلردن چوخ ائشیتمیشیک! آنجاق بیر سؤز ده دئییلیبدیر کی بیر آز آغیر گلیر منجه!
چونکو او دئییب: "حتی ایسکندر آدلی بیر آدام دا اولسایمیش، اورمولو(ارومیه لی) ایمیش! و زردوشتون کیتابی ایله تخت-جمشیدی یاندیرماق ایچین، ایرانین شاهینا حمله ائتمیشدیر!"
آذربایجانین اورمو شهری نی مقدونییه ده یئرلشدیرن و یا، ایسکندری آذربایجانلی بیلن تیلویزیون دا کی سایقیلی تفسیرچی، اولیوئر ائستونا، تکجه ناموسی سؤیوش وئرمه میشدیر!

اورمونون ونك مئيداني - 2

ايكينجي گئجه

بيرينجي گئجه خبرينيز اولدو دا، نه لر اولدو؟! بيلديك «اورمو» دا ونك مئيداني واردير و «اورمو» دولو دور فداكار پئتروس كيمي قارداشلارا! و بو آرزي ني ائتديك، آذربايجانين باشقا شهرلر و كندلرينده ده تئهران كيمي بير «ونك» مئيدانلاري اولسون! ولي تك بير گئجه كئچمه دن، بير اولاي اوز وئردي كي داي من بو ديلكي ائتميرم! چون بيليجي قايناقلاردان بئله خبر يئتيشدي كي اؤز آذربايجانيميزداكي بوتون كولتورل(فرهنگي) پوروژه لر سون آدديما يئتيشيب و كاميل ايجرا اولونموشلار كي هئچ، «اشباع» سطحينه يئتيشميشيك! و بو ايشلري چوخ داوام وئرسك، دؤولت و كولتورل اورقانلار قورخورلار آذربايجان خالقي، بير داها دئپرس اولا و بونا گؤره آمئريكانين اكينچيليك مودئليندن ايستيفاده اولاجاق!

يادينيز دا اولسا آمئريكانين بوغداسي چوخ گلنده، دونياليق بوغدا ده يه رلري(قييمتلري) سينماماغي ايچين، او اؤلكه نين آرتيق بوغداسي ني دنيزه بوشالديرديلار. و ائله كي من دئديم و اوجور كي سيز بيليرسينيز، ايرانين توركلري ده او قدر توركجه فيلمه، كيتابا و موسيقي يه قولاق آسيبلار كي دا دويوبلار؛ همن اشباع قضيه سي! بو پرابلئم و چتينليگين چؤزولمه يينه گؤره، صدا و سيما باشقاني نين(عيزت الله ضرغامي جنابلاري) باكي يا ائتديگي موسافيرت دن حوسني-ايستيفاده اولونوب و ايرانين آرتيق و چوخلو امكلريندن اورايا ايتحاف اولونموشدور. اؤرنك اولاراق، عيزت الله بي، توركجه فيلم گؤرمه يه ن باكي لي ديلداشلاريميزا، ايرانين ايكي دنه اوسكار آلميش فيلمي ني(ساوالان ايله ساراي سينما فيلملري ني) هديه وئرميشدير. دئييلير كي باكي نين تيلويزيونلاري بوتون پروقلاملاريني كسيب و تكجه ساوالان و ساراي فيلملرينه باخيرلار!

البته ائله كي يوخاري دا دئييلدي، ايرانين گونئي آذربايجان ايچين كولتورل محصوللاري نين سايي سي او قدر چوخ اولموشدور كي آد آپارديغيميز باشقان، ايكي دنه فيلمدن علاوه، باشقا هديه لر ده ايسته ييب وئره و دئييب كي سيز غربين ده يه ر سيز و ايچي بوش محصوللارينا چوخ باخيرسينيز! حالبوكي بيز سيزه چوخلو يارديم ائديب و اؤز مؤحتوالي پروقراملاريميزدان سيزه وئره بيلريك.

و البته قوزئي آذربايجانليلار دا او قدر هيجان كئچيرميشلر كي باشقا هديه لردن واز گئچيب دئييبلر : «هله اون - اون بئش ايل چكر بو ايكي فيلمين شورو چيخا! قوي گونئيلي ديلداشلاريميز كيمي بيز ده 20 ايل بونلارا باخاق، سونرا گلين بيزه باشقا برنامه لر و كولتورل محصوللارينيزدان وئرين؛ بونلار هله ليك كيفايت و يئترلي دير!»

ولي اؤز آراميزدير! اورمونون اؤزل و اوچ ديللي كور قوروپو، گئديب باكي دا اوخوسا، قيامت اولار ها!!

اورمونون ونك مئيداني

بيرينجي گئجه

صئدا و سيما، ايسلامي اينقلابينين ايلدؤنومونه گؤره، هر اوستان مركزينه گئديب شنليك تؤرني قورور؛ نئچه گئجه بوندان اؤنجه، اورمودان جانلي چيخيشلاريني ياييرديلار. طبيعي دير كي بئله واختلار، تؤوبه ائتمه دن گؤزومو، جيلله يه م تيلويزيونا و بير توركجه دانيشيق گؤزله يه م!
هاي دؤزدوم! ولي هئچ بير خبر يوخ ايدي! بيلميرم اوستاندار يا اونون تيكينتي(عومراني) يارديمچي سي ايدي، اورمو گؤلونون كؤرپوسونه گؤره، فارسي ني تورك لهجه سي ايله دانيشيردي!‍ ياواش ياواش يوخوم گليردي كي ساققالي، چوخ ادبلي و باشي آشاغي بير جاوان چاغيريلدي سئن اوستونه؛ تئهرانلي آپاريجي دئدي ايسته ميرم سؤزو اوزادام، چونكو بو آغانين موسيقي كور قوروپونون ايفاسي ايران دا ايلك اولاراق يئني و تايسيز بير اؤزلليگي واري دير!
آرخا دا دا ايكي دسته اون-اون بئش نفرليك گنج قيز – اوغلان دورموشدولار و قيزلار دا چادرا يا بورونموشدولر! بورايا قدر كي هئچ اؤزلليك گؤرونموردو!
آپاريجي، كور قوروپون اؤندرينه(رهبرينه) دئدي، اولار دئيه سينيز اؤزلليگينيز نه دير مي؟!
باشي آشاغي اوغلان دا دئدي، بيزيم كور موسيقي قروپون اؤزلليگي بو دور كي اوچ ديله اوخوياجاقدير!
آپاريجي دا هايكوي ايله آلقيشلاييب دئيير، هانسي ديللره؟
بسيجي لرين كانونون دان گلن ادبلي اوغلان دا دئيير: «فارسجا، كوردجه و توركجه»!
آپاريجي دا مثلا شوخلوق ائديب دئدي: « درسته كه اروميه ميدان ونك هم داره(دوغرودور مو، اورمو دا ونك مئيداني وار)!؟»
بورا كي يئتيشدي، من ده بير راحت نفس چكديم! چونكو دئييرم بونون عئيبي يوخ كي مركزلي وطنداشلار ونك مئيداني اورمويا كؤچورتمك ايله، اورمونو نئچه ائتنيكلي آدي ايله قوربانليخ وئريرلر!! نه قدر ياخشي دير كي هله اورمو دا توركجه ديري قاليب، اينشاللا نئچه ايلدن سونرا اردبيل، تبريز ده ده بئله مئيدانلاريميز اولسون!
خولاصه، باشينيزي آغريتماييم! قوروپدا كي قيزلار لا اوغلانلار، فارسجا اوخوماغا باشلاديلار؛ گئرچكدن كي حالسيز ايديلر! سونرا كوردجه ده اوخودولار! كوردجه اوخوياندا، بير ايكي دنه ده كورد گؤستريلدي(گئييملري بونو دئييردي)؛ اورمولو يا تئهرانلي كامئرامن سون درجه ده ديققتلي اولماغيني گؤسترمك ايسته ييردي! ياني يئرسيز دئييل بو كوردجه اوخوماقلار، بو دا دليللر! كوردلرين ريضايت ايله گولومسه مكلري اوزاقدان بيلينيردي. قاباق كي سيرالاردا اوتوران مقامات دا نم نئيه تئز تئز داللارينا باخيرديلار!

كور قوروپو نئچه دقيقه اوخوياندان سونرا، هله توركجه يه نؤوبت يئتيشمه ميشدي. داي ايسته ييرديم تيلويزيونو باغلايام، كي توركجه اوخوماق باشلاندي. ائله بيل، اؤزل اوخوماقلاري بوندا ايميش كي ياني بيز فداكار پئتروس كيمي آداملاريق و اؤز ديليميزي ساخلاميشيق سونا!

بوگون بير قوشاچايلي يولداش دئيير، دونن گئجه تيلويزيونا باخدين مي؟! گؤردونمو اورمولو گنجلرين توركجه اوخوماقلاري، ايكي ايلك ديلين ترسينه، دويغو و غرورلا دولو ايدي؟!... گؤردونمو سالون دا كي اوشاقلار و تاماشاچيلارين آلقيشي چوخالدي و ...