تیراختور گؤرونتولری‌نین سئچگینی: بالاجا یانداش

ياواش ياواش تيراختورون سوروملولاري يؤنه‌تيجي(مربي) و ياخشي اويونچولاري گتيرمك‌ده اؤزلريندن عجيبه غريبه چيخار گؤستريب بيزيم خياليميزي راحات ائديرلر. تاخيمين كئيفيتي ياخشي اولسا يانداش‌دا ايستاديوما گليب آلقيشلاماق ايچين داها ماراقلي اولار و اؤز گؤره‌وين ايسه اونوتماز. البته سوروملولار بير باشقا چيخاري‌دا اؤزلريندن گؤسترمه‌لي‌دير. اؤز فيكيرلرين بئله وئريبلر اويونچو سئچمه‌يه‌كي تيراختورون تبريزده ايلك اوچ اويوندا تاماشاچي‌نين محروم اولماغي‌ني اونودوبلار. بير اعتراض مكتوبونو يازماغا نه وار كي!؟

اويونلار بير آي‌دير قورتاريب و ساغليقلا(!)، گلن فصل ده اوچ اويوندان محروم اولموشوق. بونا گؤره ده سهند ايستاديوموندان، بو گؤرونتويه تاي باخمالي گؤرونتولر هله - هله ياييلماياجاق. تانري بئله يانداشلاري تيراختور و آزربايجان ايچين ساخلاسين:

ي.س:
بو خانيم قيزين گؤرونتوسو، مني يولداشلارين دئديگي بيري‌ خاطيره‌سی‌نين يادينا سالدي. او دئييردي كي:

بيلدير تصادوفي اولاراق ايستيقلال كلوبونون تورك باشقاني، حاجي فتوللازاده‌ني بیر یئر ده گؤردوم. اونا دئديم:
"بو قدر استقلالا-زادا يئتيشيرسيز، بير آز دا تيراختور فيكرينده اولون‌ دا".
آما حاجي‌دا جاواب وئردي:
"ايستيقلال-پيروزي‌نین فرقلری وار. بونلار مردمي تاخيملارديلار آخي."!

اولابیلر حاجی فتوللانین باخیشیندا ایسه، بو بالاجا تاماشاچی‌یا تای اون‌مینلر اوشاق، یوخسا دلی قانلی، گنج و قوجا تیراختور یانداشی، خالق ايچين‌دن چيخماييبلار؛ و آزادی ایستادیوموندا تیراختورچولارا قوناق اولان زورناچی‌لار، "مردم" آراسیندان قاینامیشلار!

گونون گؤرونتولری: آسیا یولو باغلانسادا، بو بایراقلار یاتمایاجاق

ائو ده اوتوزماق، آنجاق قوناندا اوتماق سوره‌جی بیر ده باش وئردی! بو دؤنه حریف سیپاهان کیمی گوجلو دئییلدی! و بئله اولدو کی هامی آسیا رویاسیندان واز گئچیب دئییردی : "آسیا گلمه‌ییمیز اولمادی! سیاست قویمادی!! بیر سایی‌دا دئییردی فیلانکس‌لر قویمادی"!
واللا دوغروسو بودور بیزیم ده انتظاریمیز چوخ‌دور! سککیز ایل قویمادیلار گلک اوستون لیگه؛ یئتیشمه‌میش آسیایا گئتمک و قهرمانلیق اددعامیز وار! البته بیزیم حاقلی‌ییق، آنجاق تیراختورون باشینا گه‌لن اویونلاری بیربیری‌سی‌نین یانینا دوزه‌‌نده، منطیقی سونوج بودور کی آسیا گئتمک چوخ یاغ آپاراجاق دوستلار!

البته ایکی ایل بوندان اؤنجه‌ده، تیراختورون اوستون لیگه گلمه‌یی ایمکانسیز نظره گلیردی؛ آنجاق گلدی. داش دیغیرلادانلار بو سونوجا یئتیشمیشدیرلر سانکی اؤز صلاحلارینا دیر تیراختور گلسین! ایندی ده سانکی صلاح بو دور تیراختور آسیایا گئتمه‌سین؛ آنجاق چونکو ایمکانی وار مصلحتلر ده‌ییشیلسین(!) تیراختورچولار هئچ زامان گرک سارسیلماییب و اومولادرینی الدن وئرمه‌یه‌لر! آرزی‌گیل بیزدن کوسسه‌لر و بونو بیز بیلسک‌ده، بیز هه‌مه‌شه ال اله وئرمه‌لی‌ییک!

قاییداق قوم صباسی(دئمک حاکیملرین صبا یئلی!) و تیراختورون یاریشی‌نا. اویونون سونوندا کی عدالتسیزلیگه گؤره تاماشاچی‌لارین بیر سایی‌سی دوروب اوتوراجاقلاری سیندیردیلار و تونازلادیلار مئیدانا! نه یاخشی بیر شمسیه(چتر) آپارمیشدیم. ایندی ده 24 ساعات دان چوخ او زاماندان گئچیب؛ البته من گؤرمه‌دیم بیری‌سی ژورنالیستلرین ماشینینا داش آتسین، آنجاق تیلویزیون یاخشی فورصت تاپیب تیراختور یانداشلاری‌نین "توحش"وندن دانیشسین! تیلویزیونون "دوربین خبرساز" وئرلیشینده بیری‌سی تورکجه دئیینیر دئییر: "داش باشیزا! بئله آسیایا ایستیردیز گئده‌سیز."! داش آتیب صندلی‌ سیندیرانلار چوخ یانلیش ایش گؤروبلر؛ آنجاق تیراختورا قارشی اولان وئرلیش‌ده، یانداشلارا داش باش دئیه‌ن ژورنالیستین، بویو بوتونلوکله یئره گیرمه‌لی‌دیر!
باشقا طرف‌دن تیراختورون، مدیرعاملی دوروب یانداشلارا اهانت ائدیب: "شور یانیندا؛ شوعور دا لازیم دیر"‍ دوغرودان بئله سؤزو دئمه‌ک حددن آرتیق اوز ایسته‌ییر! مه‌گر سیپاهانا اوتوزاندا یوز مین نفر گلنده بو شوعورسوزلار دئییلدیلر گلمیشدیلر؟!
ائهئی...! یاخشی‌دیر بوش وئرک...

سالدیغیم گؤرنتولر آراسیندا آشاغی دا کی گؤرونتونو سئودیم. هر 100 اویوندا بیر-ایکی دؤنه اوچان صندلی‌‌لری گؤرمک اولار آنجاق تیراختورو ایسته‌مه‌یه‌نلر، هه‌مه‌شه اه‌سن بایراقلاری و یایلیقلاری گؤرمک ایسته‌مه‌ییر و تکجه اوچان صندلی‌لردن دانیشیرلار:

بوتون گؤرونتولرین قالانین دا، بو لینک‌ده گؤره بیلرسینیز:

ویدئو دا، بو لینک‌ده دیر:

ی.س (یایاندان سونرا):

آلتی آی بوندان اؤنجه تیراختور-صبانین گئدیش یاریشی قوم‌دا اویناندی. اوردا ایسه تیراختور ائو صاحیبی ایدی. او زامان بوندان راحاتسیز اولدوق کی تیراختور نه‌دن صبانی اوتابیلمه‌دی حالبوکی تاماشاچیلاری یوزده دوخسان بئشی تیراختورو آلقیشلادیلار. ایندی ایسه دئییرم یوز رحمت او اویونون سونوجونا! هم ان آزی بیر امتیاز آلدیق، هم‌ده قوملو تورکلره گؤره دانیشدیق، هم‌ده هئچ بیر اوتوراجاق-موتوراجاق سینمادی... تکجه منیم بلگه‌لریم(مدارک) ایتدی!

بورانی اوخویون: گونون گؤروتلری : قوم تیراختورچولاری

گونون گؤروتلری: قزوینیم، زنجانیم، گؤزل آزربایجانیم

قزوینه ساری یولا دوشنده، قزوین‌ ایچین اویغون بیر شوعار دئمک فیکرینده ایدیک. آنجاق بئینیمیزه بیر شئی یئتیشمه‌دی.
ساغ اولسون قزوین‌ و قزوینین یاخین یوخسا اوزاقلیغیندا یاشایان تیراختور سئونلر. قزوینه کؤچورولموش پئیکان تاخیمی هر اویوندا یانداش‌سیز اولسایدی دا، آنجاق آشاغی لیگه دوشمک خطرینده ایدی و قزوینده اولان پیروزی-استقلال تاخیملارین یانداشلاری‌دا پولسوز گلمیشدیر پئیکان تیراختور آلتیندا قالماسین! بو دا قالسین کی گئنه‌ده بیزدن آز ایدیلر.

اویون باشلانمامیشدان یونگول بیر یاغیش دا یاغماغا باشلانمیش‌ایدی و منده قورخوردوم اینیشیلین کرج اویونو تیکرار اولسون. آنجاق تیراختور بو گون ائله گوج ایله اوینادی سانکی ایسته‌ییردی بیر داها یئل یاتار توفان یاتار یاتماز تیراختور بایراغی‌‌ شوعاری‌نی اونایلاسین. دئدیگیم کیمی تئهران-قزوین یولوندا نه قدر چالیشدیق قزوینه گؤره بیر اویغون شوعار چیخاردا بیلمه‌میشدیک! آنجاق بو ایشی باشقا یانداشلار گؤرموش ایمیشلر! یانداشلار بو گون دئییردیلر:
قزوینیم، زنجانیم، گؤزل آزربایجانیم (*-ویدئو)

بو باشاری‌لی یاریش‌دان قیرخا یاخین گؤروت و نئچه ویدئو دا چکدیم. هله‌لیک گؤروتلره باخین؛ ویدئولاری دا آللاه قویسا سونرا یایاجاغام*:

تیراختورون بیرینجی و برابرلیک قولوندان سونرا کی سئوینج

بو دا ایستادیومون اؤزل قوناغی: ایسماییل حئیدری/اسماعیل حیدری

یاغیش آلتیندا آلقیش و هیجان

بورا قزوین دئییل! کرجین یاخینلیغی‌دیر. سئوینج بورایاجاق سورولوبدور.

تیراختور - پئیکان یاریشیندان گؤرونتو توپلوسو (آلبوم عکس از بازی تیراختور - پیکان)

* - ی. س(یایاندان سونرا) / ویدئولار:

- بیرنجی بؤلوم
- ایکینجی بؤلوم
- قزوینیم، زنجانیم، گؤزل آزربایجانیم 

تای‌سیز، کسینتی‌سیز، و گرچک آلقیش

آسیایا یئتیشمک ایچین تکجه بئش آددیم قالدی.
چتین آددیملارین بیری‌سی‌ تهران‌دا آتیلدی، و بیر باشقا چتین آددیم ایسه بوگون اصفهانین سیپاهان ییغماسی‌ قارشی‌سیندادیر. آنجاق اومودوموز وار، سهند ایستادیومو بیر داها دولوب، و گوجلو رقیبی سالاجاق تیراختورون خیشی آلتینا.

بئله تایسیز، کسینتی‌سیز، و گرچک آلقیشلار ایله، تیراختور بوتون جیزیق-میزیق و سینیرلاری آشیب، آسیا سهل‌دیر، اؤزونو دونیادا دا تانیتدیراجاق:

Download (WMV file, 2.45MB)

ی.س.(یازی‌دان سونرا) :

اول‌ده بیر گولوم  :)))) ؛ سونرا سؤزومو دئییم:

بو قاققیلداماغین نه‌دنی بو دور کی قرار ایدی سیپاهانی سالاق تیراختورون خیشی آلتینا! آنجاق یئتمیش، سکسن و اولابیلر یوز مین تاماشاچی‌ قارشی‌سیندا گولونج بیر دورومدا اوتوزدوق. بئله بیر اولای دونیادا تایسیز اولابیلر. اولابیلر سیز دئیه‌سینیز بو بیر فوتبول حادثه‌سی دیر و اولار. آنجاق ریجا ائدیرم تیراختورون چوخلو اویونلارینا گئدیب یاخیندان ایزله‌ییب آلقیشلایان بیر آدام قبول ائدین کی گؤزله‌مه‌دن یاخشی سونوجلاردان سونرا گؤزله‌نیلمز و ایمکانسیز بیر سونوجون اله گلمه‌سی "ایستی سویوق" ائتمک دیر. منجه بئله اوتوزمالاردا تاماشاچیلارین بیر بؤلومو دئییرلر "پول" هر حالدا، "یانداش" و "آلقیش"دان اؤنملی‌دیر. تاماشاچیلارین آزالتماغی‌نین لاپ یاخشی یولو بو اولابیلر!
اومودوم وار منیم دوشونجه‌م یانلیش اولسون و تاماشاچی‌لار، هه‌مه‌شه‌ کیمی تیراختورون آرخاسیندا دوروب و اونو داها آرتیق گوج ایله آسیایاجاق ایته‌له‌سینلر.

گونون گؤرونتولری: ســکسنلرین سون آلقیشلاری

کیمسه‌دن سوروشدوم گله‌جه‌سیز یوخسا یوخ، دئدیلر یوخ! حاقلاری ‌دا وار! من‌ده بایرام تعطیللری باشلاناندا حتمن گرک آنایورددا اولام. آنجاق بو دؤنه تیراختورو بایرام بهانه‌سینه تک قویماق اصلن انصاف دئییلدی. تیراختور اوچون، تئهرانین یانداش‌سیز تیمی یانی صنعت نفتینی اوتماق، آسیایا گئده‌بیلمک ایچین چوخ بیر یاخشی فورصت ایدی.
تیراختورون بئله تیملر ایله اویونلاری‌نی سالیرلار تئهرانین لاپ گون چیخان طرفینه! البته تختی ایستادیومو بیز ایچین پیس اولماییب من دئییردیم اورادا گئنه اوتاجاییق. ساغ اولسونلار یانداشلار؛ ایستادیومون ال‌دن اوزاق اولماغینا باخمایاراق چوخ سایی دا گلمیشدیلر:

بوتون ویدئولار و گؤرونتولر: لینک

من ایچه‌ری گئچنده نئچه دقیقه سربازلار منیم تیراختور بایراغیمین "خ" حرفینه ایلیشدیلر. دئییردیلر دئییبلر تراکتور تراختور یازیلسا بایراقلاری توتون آلین! من‌ده های توضیح وئریرم تیراختورون باشقانی(مدیر عاملی) دئییب ایرادی یوخدور! بیری‌سینه اؤز خیدمت کارتیمی گؤستردیم دئدیم منده سیز کیمی عسگر ایدیم! دئدی عئیب یوخ. آلتی دقیقه اویوندا گئچمیشدی اویونا باخا-باخا اؤزومه بیر یئر آختاریردیم کی پیمئنتا قول ووردو. سئوینج‌دن آتیلیب دوشنده سربازلارین بیری‌سی منی ایته‌لمک ایله کئفیمی پوزدو! بیر یئرده شیشیب اوتوراندان، بئش آلتی دقیقه‌دن سونرا بیر قول دا یئدیک! آنجاق آلقیشلامالارین چوخالماسی‌ ایله بیر پئنالتی اله گلدی. آنجاق نصرتی اونو کورلادی. منجه تکجه نصرتی موقصصیر دئییلدی. من بیلمیرم باشقا اویونچولار اونلارین برازیللی مودافیعی کیمی احتمال وئرمه‌ییرلر قاپیچی توپو توتابیلسین. پئنالتی‌نین نئجه کورلاندیغینا آشاغیدا باخین:

باغلانتی

پئنالتی‌دان سونرا اویونچولارین روحیه‌سی آشاغی گلمه‌مک ایچین دئیه‌بیللم کسینتی‌سیز آلقیشلاماق باشلاندی؛ آنجاق یازیقلار اولسون اوتا بیلمه‌دیک. قاییداندا بیر یئرده ماراقلی بیر صحنه گؤردوم. تئهران دوارلاریندا تکجه پئرسپولیس-استقلال آدلاری گؤرنمه‌ییر! تراختور دا وار. بو هم یاخشی دیر هم پیس! یاخشی‌لیغی بونا گؤره‌دیر کی تیراختور اؤزونو بؤیوک بیر تیم کیمی هر یئرده اورتایا قویور و هر یئرده یانداشی واردیر؛ آنجاق پیس‌لیگی بوردادیر کی آدام قورخور تیراختور یانداشلاری‌دا ایستادیوما گئتمک یئرینه، آدینی چکدیگیمیز تیملرین یانداشلاری‌ کیمی تکجه تبلیغ ائده‌لر:

بوتون ویدئولار و گؤرونتولر: لینک

---

بو یازی مین اوچ یوز سـکـسن دوققوزونجو ایلین سون پوستو ایدی. دوخسانینجی ایلی ده قوتلو اولسون دئییرم. اومودوم وار تیراختورون آسیایا گئتمه‌یی بو ایلین یازیندا گرچکلشسین.

گلن ایل‌ده آللاه عؤمور وئرسه و فیلتئرلری سیندیرماق حووصله‌مدن قالسا، قوللوغونوزدا  اولاجاغام. 

Kimliksizlik Yetənəyi

Güney Azərbaycanın hər bir bucağında, biliyurd masalarından tutun istadion oturacaqlarınacaq, Dünyalıq Anadilini Günü qutlayanılan anlarda, internetdə bir şaşırdıcı video gördüm. Məni, və ola bilər, başqa Azərbaycanlı Türkləri şaşırdan işlər təkcə Arif Ğəfurunun doğallıqdan üstün etdiklər və şö`bədələri dəyildir. Bizim yetənəkli Urmulu dildaşımız Türkiyə Türkcəsini çox yaxşı qonuşduqca, Anası ilə Telefon bağlantısında Anadili, yani Azərbaycan Türkcəsində danışmayıb, və başqa Azərbaycanlıların Farsca danışanda bəlli olan bir ərkək ləhcə ilə, Farsca qonuşdu!! Facebookda buna görə çoxlu analizlər və yorumlar yazılır. Ancaq məncə, Arifin nəyə öz anadilində danışmayıb için belə ehtimallar vardır:

- O öz kimliyini itirməsədə, İran sözü ortaya gələndə əl-ayaq itib, və kameralar qarşısında Farsca danışmaq zorunda qalmaq acı bir gərçək sayılır.

- Show TVnin "Yetenek Sizsiniz" verlişindəki aparıcılar da ARİF yox, bəlki AREFdən, onun Anadilində qonuşmamasının nədənini soruşmadılar. Ola bilər onlar da bilirlər Anadili unudub başqa dildə danışmaq hətta Türk bir ölkədə isə üstün bir yetənək sayılır! Əlbəttə belə açıqlamaq da olar: Arif öz anadilini Fars dilli tanıtdırmaq ilə, istəyib özünü daha yetənəkli bilindirib, yoxsa bir Azərbaycan Türkünün Türkiyə Türkcəsində danışmaq elə də çətin iş dəyil.

- Yuxarıdakı sözlər yanlış yoxsa şuxluq olsalar, Arifin işinin nədəni nə olabilər? Azərbaycan Türkcəsində danışmaq Türkiyə də, Əfqanistan Farscasının İran Farslarına gülünc olduğu kimi, utandırıcı olursa, biz gərək öz fatihəmizi oxuyaq! Əlbəttə biz bir sıra gərçəklərə göz yummamalıyıq; yoxsa bu arada çox şeyləri əldən verəcəyik. Biz də öz dilimizi, Türkiyənin etdiyi kimi, yeni nəsilləriçin bir az incələyib incəltməliyik.

بلديه‌نين شاختاداكي يارديمي

- تيراختور و پاس ياريشينا چوخ كؤنلوم وار ايدي ايلك دؤنه همدانا گئدم! آنجاق بوتون هاوا اؤن‌گؤرو(پيش‌بيني)لره گؤره، موسابيقه گئجه‌سي قار ياغيب و سونرا كي شاختاسي‌نين دده يانديرماغي دا بللي ايدي. بير ياندان‌دا كمالوند دئميشدي احتمالي وار ياريش لغو اولا. بو احتماللاري بير-بيرينه ضرب ائدنده گؤروردون گئتمه‌يين فايداسي يوخدور! منده قالديم و البته شانس گتيرديك تيراختور قوناق ائوينده بير امتياز قازاندي. البته  تيراختور همدان‌دا گرك قوناق اولمايا؛ اكسيكليك بيزلردن دير! هر زامان شاختاني ديزه چؤكدورسوك، همدان‌دا ايسه تيراختور ائو صاحيبليگي ائده‌بيلر.خبرلره گؤره تيراختورو 40 - 50 نفر و پاسي 200 نفر آلقيشلاييرميش.

- هر بير تيراختورون اوشاق يانداشيندان دا سوروشسانيز، ياخشي آچيقلايار كي بلديه‌نين(شهرداري‌نين) كيرمان ميسي‌ني اوتماق، تيراختورون ميسي اوتماق دئمك‌دير(بلديه، تكجه ميسي يوخ، باشقا تيملري‌ده اوتمالي‌دير). و بئله بير نه‌ده‌نه گؤره، سهند ايستاديومونا تيراختورچولار ايله دولماق بكله‌نيردي. آنجاق تبريزين شاختاسي(تبريز آغيزي ايله شه‌خده!) سانكي همدان شاختاسيندان‌ دا پيس كسيرميش، و تكجه 2000 نفر ايستاديوما گئديبلر.
البته خبرلره گؤره، اويون باشلانا قدر مئيدان‌دا قار وار ايميش و ياريم ساعات چكيب قارلاري كوروسونلر. تاماشاچي اوتوراجاقلاريندا دا دونموش قار وار ايميش، و تاماشاچيلار قار-بوز ايچينده گليب ايسته‌ييرميشلر آلقيشلاماقلا اؤزلريني قيزيشديرسينلار. آنجاق بلديه‌نين برازيللي ائدواردوسو تئزليكله بير قول ووروب بلديه‌ني قاباغا سالماغي، يقينكي تاماشاچيلارين آرتيق اوشومكلرينين قاباغيني آليب.‌

- بلديه ايكينجي ياري‌دا بير قول يئييب، آنجاق تبريزلي گنج "رسول عليزاده" ايكي دقيقه‌‌دن چوخ قويماييب گئچه و بلديه‌نين اوتماق ظفر قولونو ووروب. بو اوتماقلا هم بلديه دؤرد سيرا گئتدي يوخاري و هم ميس تيراختوردان دالا دوشدو. رسول عليزاده‌نين قولونون اؤنمي بوردادير.

- بو بير قول و بلديه‌نين اوتماغي،  ايستاديوملاردان قاچقين دوشه‌ن بلديه‌چي‌لرين بير داها قاييتماغينا بير نه‌دن اولوب، باعيث اولاجاق اونلار هم اؤز جدول‌ده‌كي دوروملاري‌ني دوزه‌تسينلر و هم‌ده تيراختورو آسيايا گئتمك يولوندا يارديم ائتسينلر.
رسول عليزاده‌نين قولونون اؤنمي چوخدور؛ آنجاق بير سايي سانكي چوخدان ايميش تكجه بو قولو گودورموشلر.  تيراختور 4 دنه آرديجيل اوتماغيندان سونراكي همدان‌داكي موساوي ائتمه‌يي‌ني بؤيوك فاجيعه گؤسته‌ريب، و بير-ايكي ساعات ايچينده "تحليلي(!)" مقاله يازيب دئييبلر: "گؤردونوز بلديه‌نين بومي(يئرلي) اويونچولاري نه كئيفيته صاحيب ايميشلر؛ حالبوكي غئير بومي ترشيز و اكرامي هئچ سانتر باشارميرلار؟"!
البته لازيم دئييل بيري‌سي اونلارا  دئسين آخي ائله بو اكرامي اؤزو توركدور كي!! بلكه بونون دئمه‌يي لازيم دير سيز كي ايستاديومدا دويغو و هه‌يه‌جانلا آلقيشلاميرسينيز؟ سيز يازماق حاليندا احساسات ايله دانيشماغينيز دوز ايش دئييل. آناليز ائدنده، سايي، آمار، سونوجلارين ثباتي، استقامت، آخيم و سوره‌جه(رونده)ده دقت ائدرلر.
تراختور ليگ‌ده ان گوجلو دفاعي واردير، حالبوكي بلديه‌نين ساوونما(دفاع) باخيميندان لاپ چوخ قول يئيه‌ن تيملردن ساييلير و اؤزونو بو ياريم فصل ايسته‌يير دوزه‌تسين. سؤزسوز گه‌له‌جكلري آيدين‌دير؛ بيز ده اونلاري ليگده يوخاري سيرالارا گئتمك ايچين آلقيشلامالي‌ليق آنجاق تيراختورون تجروبه قازانميش اويونچولاري‌ني، بلديه اويونچولاري ايله، قارشي‌ قارشي‌يا قويماق كسينليكله هر ايكي تاخيما ضربه وورابيلر.
انتقاد و اله‌شديرمه همشه اولمالي‌دير، آما ايندي‌كي دورومدا دوز ايش دئييل. يقين كي بلديه و هر هانكي تيملرده پارلايان آزربايجانلي اويونلارين تيراختورا گلمه‌يي هامي‌نين ديله‌يي‌دير، آنجاق بئله ايستكلر گئت-گل و انتقالات زاماني اورتايا قويولمالي‌دير.
بونوندا دئمه‌يي لازيم دئييل كي كرار جاسيم، آندرانيك و كياني كيمي اولدوزلار تيراختورون اولوسلار آراسي آدليم اولماغيندا داها فايدالي‌ديرلار.

گونون گؤروتلري و يوروملاري*: ياشاسين تورك آسلان

علي دايي ايلك دؤنه تبريزده كريم باقيري‌ ايله بيرليكده، غئيرتسيز ائشيديب گيجه‌له‌ندن سونرا دئييردي:
گليب كريم باقيري‌يا و منه دئييرديلر بئغئيرت! كريم باقيري‌نين هاراسي بئغيئيرت‌دير؟ بو قدر آزربايجان فوتبولونا خيدمت ائديب.

او باشقا يالان سؤزلر ده دئدي، آما اونون آزربايجان فوتبولونا بو قدر خيدمت ائتمك سؤزونو آدام بيلميردي نئجه اله‌شديرسين؟ اولابيلر علي دايي‌ و كريم باقيري‌نين آزربايجانلي اولماقلاري بوتون آزربايجانلي گنجلره روحيه وئردي، آنجاق آزربايجانين فوتبولو ان آزي 15 ايل دالا قالماغي‌ني فوتبول‌دان باش چيخارتمايان هركيمسه گؤره‌بيلير و دئيير نه خيدمتي؟! اردبيل‌ده علي دايي آدلي ايستاديوم تيكيلمه‌سيده دؤولت سرمايه‌سيندن قايناقلانير و اولابيلر بو دا چوخ عئيبلي ايدي دونيانين ان چوخ ميللي قول وورانين اؤز شهرينده بير آبيرلي ايستاديوم اولماسين! اولابيلر علي‌دايي‌نين آزربايجان اؤزلليكله اردبيلين فوتبولونا ائتديگي خيدمتي، كريم انصاري‌فرد كيمي بير يئته‌نه‌يي(استعدادي) تاپيب آدليم ائتمك ايدي (يالان دوزونو بيلميرم). آنجاق منجه بئله ايش آزربايجانين فوتبولونا قوللوق ائتمك يوخ، بلكه ائله بير گنجه شخصي يارديم ائتمك دير. بو ايشي او زمان خيدمت آدلانديرماق اولاركي آزربايجاندا ياشاماق حاد و اساسي بير چتينليك اورتادا اولسون. اؤرنك(مثال) ايچين ائله‌بيل جنگ زامانيندا آبادانا حمله اولوب و آبادانين جنگي موهاجيرلري اويان - بويان‌دا آوارا اولاندا بير تئهراندا ياشايان آبادانلي اونلارا تئهراندا كؤمك ائليه "پيشرفت" ائتسينلر! البته يازيقلار اولسون توركلرين سؤنموش اولدوزلاري هله فيكر ائديرلر پارلاماق تكجه تئهران‌دا مومكون اولابيلر. آنجاق تانري‌يا شوكورلر اولسون كي آزربايجان خالقي اويانيب و تيراختورو بير دوروما گتيريب حتي تورك اولمايان اويونچولار دا ايلك دؤنه يا ايكينجي‌ دؤنه ايشيقلانديريب پارلادير: ايلك دؤنه پارلايانلارين اؤرنه‌يي كرار جاسيم، محمدحسن ابراهيمي، مئهدي كياني، و مرتضي اسدي و بير داها پارلايانلارين آراسيندا دا عليزاده‌ني آدلانديرماق اولار.

كريم انصاري‌فردين نئجه دوشونمه‌ييندن خبريميز يوخدور. او بير استثنايي قول وورماقلا اؤز گله‌جه‌يي‌ني آوروپادا گؤسته‌ردي و بو چوخ سئوينديرجي‌ اولاجاق؛ آما حئييف اولسون كي آدام اؤزونو بير گنج اولدوزون يئرينه قوياندا گؤرور آوروپا كلوبلاريندا اويناماق تيراختوردا اويناماقدان چوخ قازانجلي‌دير! آنجاق اونون قول وورماغي و آدي‌نين ديللره دوشمه‌سي توركلره چوخ خئييرلي اولدو. چونكو ايندي‌كي ميللي ييغمادا بللي بير تورك اويونچو تاپماق اولماييردي و باشقا ياندان، اويونچولاري داشييان اوتوبوسون اوستونده "فارس شاهزاده‌لري" يازيلميشدي و تيلويزيونداكي آپاريجيلاردا هاي بو شوعاري تبليغ ائديرديلر. ايكينجي كريم و ايكينجي دايي، ائله پارلادي كي، هم گونون گؤروتو و هم‌ده گونون يوروملاري، شاهزاده‌لر اونودولماسي و بير تورك آسلاني‌نين سالديرماسينا گؤره ايدي:

بو ده بيز يايمايان گونون يوروملاري:

ي. س:

يوخاري‌دا يوروملارا يوروم وئرمك لازيم دئييل! آما بير يورومدا يازيليب :"واللاه آزربايجان بؤيوك فارس تورپاقلارينين‌دير! لوطفن گرگينليك ياراتمايين"!
اينتئرنئتين ياخشيليغي بودور كي ائله يوروملايانلار  جاواب وئريب دئمك اولار: سن اؤزون گرگينليك ياراتماسان، كيمسه گرگيننليگ ياراتماز! سن نئجه اردبيل، اورمو، رنگان و تبريزي وئريرسن شيراز اوستانداري‌سينا!؟

* - يوروم: نظر
گؤروت: عكس

کریم نه‌دن یاریش کیشی‌سی اولمادی؟

ایران و قوزئی کوره یاریشیندا اردبیللی گنج، کریم انصاری‌فرد، ایکی قول ووردو بیری‌سی قبول اولمادی.ایران اونون قولو ایله اوتوب صعودی ایندی‌دن گرچکلشدی. آنجاق اویون سونوندا "Man of the Match" (یاریشین اولدوزو) سئچیلمه‌دی! و اونون یئرینه ایرانین بیر قوروچو اویونچوسو، او لقبه لاییق گؤروندو! بو عجیب اولایین نه‌دنی اولابیلر بو دور:

- کریم انصاری‌فرد ساوالان اتکلرینده بئجه‌رمیش و پارلاییب آدلیم اولماق آردیندا اولان سون درجه‌ده چالیشان بیر جاوان دیر! او نه شاهزاده‌دیر و نه پارس. 

اومودوموز وار گله‌جک‌ده، کریم انصاری‌فرد ده علی دایی کیمی، شاه یوخسا سولطان اولماق، یولوندا آددیم آتماسین و اؤز کیملیگینی اونودماسین. اونا آزربایجانلی بیر وطنداشی کیمی، ان بؤیوک  و ان تايسيز باشاریلار دیله‌ییرم.

---

Why was not 'Karim Ansarifard' be chosen as Man of the Match Iran vs. North Korea in 2011 AFC Asian Cup?

Answer:

- Because he is an aspiring diligent young soccer player from Savalan slopes in Azerbaijan. He is not Prince nor Persian (Referring to inappropriate slogan for Iranian National Soccer team)!
He will be second Ali Daei but with a big difference. He actually is able to characterize himself with his own personality. He has the opportunity of not forgetting his identity!

Best wishes for Karim.

گونون گؤروتو: تيراختورون اونودولماز يانداشي

كئچميش يازيدا كي "ي.س(يازيدان سونرا)" بؤلومونو، "گونون گؤروتو" باشليقلي باشقا بير پوستدا، يايماق ايسته‌ديم. بو دؤنه، گونون گؤروتو اوزوجودور:

تيراختورون اونودولماز يانداشي

تیراختور یانداشلاری سایتیندا گؤردوم، دونن آخشامین اوزونتولو اولاییندا بیر تیراختورچو دا اوچاق ايچينده ایمیش و آللاهین رحمتینه گئدیب. دوزدور ایندی آزربایجاندا بیری‌سینی تاپماق اولماز تیراختور یانداشی اولماسین، آنجاق "علی خدابخش" سانکی اؤنجه‌دن ایسته‌ییرمیش بو گؤرونتوسو ایله، تیراختورون ان اونودولماز یانداشی اولسون:

آللاه اونا و اوچاق قضاسینا گؤره باشقا بو دونیادان کؤچنلره رحمت ائله‌ییب و تانیشلارینا دؤزوم وئرسین.

---

ي.س: 
سون بيلگي‌لره گؤره "علي خدابخش" شريف تئكنولو‍ژي بيلي‌يوردونون(دانشگاه صنعتي شريف) اؤيرنجي‌سي ايميش...

آياز اولدوز تانيما ده‌رنه‌يي

آدام هردن بئله ايشلر ايله اوز-اوزه گلير بيلمير نئجه آچيقلاسين! اولدوزلارا ماراق گؤسته‌رمه‌ييمدن داها چوخ، "آياز" آدي مني چكدي تبريزين "آياز اولدوزلار درنه‌يي‌نين(انجمن نجوم آياز)" سايتينا. بو درنه‌ك و سايتين قوروجولارينين بير توركجه آد سئچمه‌لري اونلارين اؤز كيمليكلريني ده‌يه‌رلنديرمه‌لريني گؤسته‌ريب، آدامي سئوينديرير گرچكدن. آما گئديب سايتا باخديم گؤردوم  "نئيشابور"لولارين الي ايله قورولموش پارس ديللي (فارسجا دا يوخ ها!!) وئبگاهلارين (سايتلار دا يوخ ها!!) فئستيواليندا ا ئله بو سايت بيرينجي اولوبدور. ياني "آياز" فارسجا ديللي نوجوم بيليمي دوشه‌رگه‌لرين ايچينده ان ياخشي سايت تانينميشدير.  گؤره‌سن بير زامان گله‌جك  آزربايجانليلار دا مثلن بوجنورد، قوچان يا دا كلاتدا توركجه يازيلان بير سايتا "ان ياخشي توركجه اولدوز بيليمي سايتي" اؤدولو وئره‌لر؟! البته بو دا پئشكئش! آدام قورخور آياز سايتين يئيه‌سينه تبريزده بيري دئسين اوتمانميسان توركجه سئچيبسن اولدوزلار كيمي اؤنملي بيليمه؟!

دوزدور اورادا "اولماز تورک آدلی «آیاز» پارسی زبانلیق جایزه‌سینی اؤتوروب اولدوزلارا گؤره تورکجه‌ده یازا؟" يورومونو قويدوم، آنجاق من او سايتا، ايراندا بيرينجي اولدوزلار بيليمي سايتينين بيرينجي‌ليگيني الده ائتمك باشاريسيني، موتلو اولسون دئييرم.  نئچه ديلده يازماق بير سايتين گوجونو گؤسته‌رر،  آنجاق اؤز ديليميزده يازماق ان واجيب ايش و ياخشي‌دير. اوخوجونون آز اولماغيدا اؤنملي دئييل؛ يازي اولسا اوخوجولاردا تاپيلارلار!

اوستو اؤرتولو آناديليميز

بير آي اولار اوتاي‌دا باش اورتو و حيجابا گؤره اولان اعتراض‌لار قونوسوندا ايران يايينلاريندا خبرلر گؤسته‌ريلير و يازيلير. اوردا تپكي گؤسته‌رنلرين ايسته‌يي اوخوللار و بيلي‌يوردلاردا باش اورتونون ياساقلانماسي‌ني قالديرماق‌دير. من بيلميرم اورادا بو قونو دا تپكي ائدنلرين سايي‌سي يوزده نئچه اولابيلر؛ آنجاق بو آيدين‌دير هر كيمسه حاقلي‌دير نئجه ايسته‌يير گئيينسين. حاقلي اولماق‌دا آز يوخسا چوخ اولماغا باغلي‌دئييل. آزربايجان حوكومتي اؤز خالقي‌نين ايستكلرينه باش اه‌يمه‌لي‌دير.
آما ايران‌ ايچينده مئديالارين ده‌يقه باشي بو قونويا توخونماغي بير آز عجيب نظره گلير. اوتايداكيلار كي فارسجا بيلميرلر بو خبرلره قولاق آسالار! اولابيلر پاييزين سونوندا ايران آزربايجانلي‌لاري‌نين قولاغينا بير شئي‌لر‌ چاتديرماق‌دير! آما گونئي‌لي توركلره حيجاب نه قدر ده اؤنملي اولسادا، كيمليك قونوسودا اؤنملي‌دير. اونلار آرازين قوزئيينده كي ديلداشلاري‌نين كولتورل دورومونو ياخشي گؤرورلر و البته بو تايين اوخوللارينداكي دورومو دا گؤزدن قاچيرتماييرلار. اينسانين بئيني بئله گرچكلري موقايسه ائتمك ايچين‌ يارانميشدير! اونلار گؤرورلر بوتون قيز اوشاقلار و اؤيره‌نجيلر مدرسه‌لره اؤرتوك و حيجابلي گئديرلر. آنجاق بورادا تكجه ساچلار و بدن اؤرتولمور. بورادا آناديلي‌ده اوخوللاردا اؤرتولوب و ياساقلانير. بورادا آناياسا يا گؤره، آناديلين اوخونماسي مدرسه‌لرده  آزاد اولسا، هئچ مدرسه مودورو يا اؤيرتمه‌ني آزاد دئييل بير مدرسه‌ده توركجه درس‌ليكلر قورسون! بو ايشين هاراسي ايسلامي ايش‌دير؟
قوران‌دا دئمه‌ييب ديلينيزي‌ده گيزله‌تمه‌لي‌سيز! آما دئييب : "انا خلقناکم من ذکر و انثی و جعلناکم شعوباً و قبائل لتعارفوا ان اکرمکم عندالله اتقیکم". كسينليكله ائللر آراسيندا كي تانيشمادا، آللاه يارادان "آناديلي"‌ني اوستو اؤرتولو ساخلاماق قورآنين قارشي‌سيندا دورماق‌دير.

گونون گؤروتلری: تیراختور سئون دمیریولچولار

دوز دور تختی ایستادیومونا گئتمک چتین‌دیر؛ اوزاقلیغینا گؤره تاماشاچیلارین سایی‌سی آزالیر و اورادا آز-چوخ آدامی اینجیدیرلر، آما... آما اورانین یاخشی‌لیغی بودور کی بو ایلین لیگینده، هر ایکی دؤنه تیراختور یاریشی قازانیب. احتمالن ایستادیومون آدی  همدان تورکو اولان آدلیم قهرمان گولشچی‌ ایله ایلیشگی‌لی اولماغا گؤره اولسون!! بوغاز-موغازدا دا کی کار قالمادی؛ آما تیراختورون ملوانا اوتوزماغین کسینلیک ایله اونودوب ائوه دؤندوک.
بیر ماراقلی اولای دا بو ایدی دمیر یولونو آلقیشلاماق ایچین تئهرانین گونئی بؤلگه‌لریندن گتیریلمیش راهنمایی یوخسول اوشاقلار، اویون‌دان سونرا "یاشاسین تیراختور" دئییردیلر و چوخو دا تورکجه دانیشماق باشاریردیلار. اؤزلری تیراختور بایراغینی الیمدن قاپیب گؤرونتولر ده اولماق ایسته‌ییردیلر. بو دؤنه کامئرالارا یول وئریلیردی، آما گؤرونتو سالماق چتین ایدی. بئشینی سئچیب قالان گؤروتلر و کلیپلره بورادا باخابیلرسینیز.
بیرینجی گؤرونتو آتالاری ایله گلن اوچ بالاجا باجی قارداشلاردیرلار:

منجه عیراقلی اؤیونچوموز "کرار جاسیم" آزربایجان‌دا ان محبوب و ان چوخ سئویلن آدام دیر. او محروم اولا-اولا شیددت ایله آلقیشلانیردی. نئچه ثانیه‌دن سونرا یانداشلارین ایچینده یئریه‌بیلمیردی

تیراختور یانداشلاری‌نین ماشینلاری‌نین پلاک سایی‌سی تئهران، و اطراف بؤلگه‌لردن ایدیلر:

بوتون گؤروتلری گؤرمک ایچین کلیک ائدین

بونا دئیه‌رلر روحیه‌

جومه‌نین ایکیندی چاغی(ناهاردان سونراسی)، باشیم بو قیریق بیلگی‌سایارلا قاریشمیش ایدی تبریز ده چکدیگیم گؤروتلری ائدیت ائدیردیم. جی‌مئیل صفحه‌سی بیر بوجاق دا آچیق ایدی گؤردوم ایکی اوچ ایل بوندان اؤنجه سون گؤروشدویوم دوستلارین بیری‌سی ایسته‌ییر چت ائده منیمله. بیر آز کئف احوال‌دان سونرا دئدی: "نه خبر؟ من جومه‌‌لرده گلیرم ایشه"!
من ده دئدیم: "په هووو...!! کیشی بو بولانیق هاوا دا اضافه‌کارداسان؟ سن تعطیل گونو ایشه گئدیرسن آما من‌ده ایش گونو گئدیرم توپا باخام"! سونرا دئدیم سن ده ایش - پولو اؤتور هر دن گل گئدک ایستادیوما خوش گئچیر آداما بیر آز آدام اؤزونو بوشالدیر!
دئدی هن گؤرک واخت ائله‌سم گه‌له‌رم.
دئدیم بوگونکو بلدیه ‌اویونو قالدی صاباحا، گه‌له بیلسن گل. بونلار اویونلاری پیس زامانا سالیرلار آز آدام گئتسین!
او بیر جاواب وئردی پئشمان اولدوم اونو دعوت ائتمک‌دن! دئدی: "به تورک‌لر کی دونن تبریز تؤکولوب گلمیشدیلر ایستادیوما..."
گؤردوم کؤنلو یوخدو و بالا بالا ایسته‌ییر ده‌ببه‌‌له‌یه! اؤزومله دئدیم واللا حالیم یوخدور بو عزیز یولداشا دا ایکی ساعات چوخ ساده و آچیق شئی‌لر اوستونده دانیشام. دئدیم ائله قوی باشی "تخصص"‌ی ایله قاتیشیق اولسون و گئنل(عمومی) قونولارا فیکیر وئرمه‌سین؛ بلکه اؤرنک ایچین اقتصادی سورونلاریمیزی دا بئله یولداشلار چؤزدولر.

نئچه دفه آزربایجان ییغمالاری‌ني آلقیشلاماق ایچین قدیم یولداشلاری چاغیرمیشدیم؛ بیر هدفیم‌ده اونلارلا هر دن بیر یئر ده بولوشماق ایدی! گؤروردوم بیر سایی‌ آرواد-اوشاغا گؤره(بو دا قالسين كي ايستاديوم‌دا ائشيديلن سؤزلرين ايكي‌سي دقيقن اوشاقلار و عاييله‌لرين گله‌جه‌يي‌نه گؤره‌دير)، بیر سایی‌ ایشه گؤره، بیر سایی‌ یاخشی سونوج آلابیلمه‌مه‌یه گؤره، بیر سایی ایستادیوم آتموسفئری‌نی به‌یه‌نمه‌مه‌یه گؤره(سانكي كوچه-خياوان‌دا اصلن يامان ائشيتميرلر!)، و بئله بئله نه‌دنلره گؤره دئییردیلر کؤنلوموز ایسته‌ییر گله‌ک آنجاق هه‌له گؤرک نه‌ اولور. من‌ده بو سونوجا یئتیشدیم کیشی سن بیر الی‌بوش و کئفی‌ساز(!) بابا؛ نه‌یه اونا بونا دئییرسن آخی؛ بیری‌نین کونولو اولماسادا گلیب اورادا سوسقون اوتوراجاق، یاخشی سونوج‌دا اله گلمه‌سه دای بیر ده اورالارا دولانمایاجاق. بوگون بلدیه-استقلال یاریشیندا بیلدیم دوز سونوجا چاتمیشام سانکی. بیلدیگینیز کیمی بلدیه تیمی‌نی گئدیب آلقیشلاماق دوغرودان "کؤنول گوجو" (روحیه) ایسته‌ییر. هر آدامین ایشی دئییل. ایسته‌میرم دئیه‌م من اؤزوم بئله روحیه‌یه صاحیبم، منیم گئتمه‌ییم بیر آز نوستالژی‌دان‌دیر و تیم اوتوزاندا آز-چوخ راحاتسیز اولورام؛ آنجاق بوگون اوچ-دؤرد مین ایستیقلال‌ یانداشی قارشی‌سیندا سایی‌سی چتین‌لیک ایله یوزه چاتان بلدیه‌نی آلقیشلایانلار کسینلیک ایله بیر تایسیز کؤنول گوجونه صاحیب‌دیرلر. منجه هر کیمسه اؤزونه گووه‌نه‌بیلمیر و دئمه‌لی "اعتماد به نفس"ی آزالیب بئله آداملاری یاخین‌دان گؤرمه‌لی‌دیر. من اؤزوم بئله زامانلار روحيه‌م شارژ اولور. منجه بئله آداملاري توپلومسال بيليم آداملاري و پسيخولوقلار(روانشناسلار) باشقا آداملارا اؤرنك اولاراق تانيتديرمالي‌ديرلار. خالقين شن ياشاميندا و گله‌جه‌يه اومود ايله باخماق‌دا بؤيوك يارديم گؤسته‌ره‌بيلرلر. يازيقلار اولسون بونلارلا ياخشي سايقي‌دا گؤسته‌ريلمير و البته بونلار پيس داورانيشلاري گؤره-گؤره گئنه اوزدن گئدن دئييللر. منجه بو اؤزلليگه صاحيب اولماق ايچين يولداشلارا اصرار ائتمك دوزگون ايش دئييل؛ بئله بير كولتورون گئنيش ياييلماغي ايللر بويو زامان ايسته‌يير.
بونلار لاپ ياخشي بیلیرلر بلدیه تیمی‌ اوتوزاندا پیس اوتوزور! اؤتن هفته اهواز دا اون دقیقه‌ ايچينده اوچون یئدی. ائله بو ایستیقلال‌دان تبریز‌ده 50 مین یانداش قارشی‌سیندا 3-2 اوتوزدو. یانی بو ییغمانین ایپینه اودون ییغماق اولماز. آنجاق گئنه‌ده گلمیشدیلر اورک‌دن آلقیشلاییردیلار. گئدیب دوردوم آلقیشلایان ایکی دسته‌نین آراسیندا. اینانین بو یوز نفرین سسی‌، اوچ دؤرد مین ایستیقلال یانداشیندان گورولتولو ایدی. بلدیه بوگون ایستقلالی یوز یانداشلا  آز قالیردی اوتسون. بئله اولموشدو موساوی سونوجونا گؤره دئییردیلر "عئیبی یوخ"! حالبوکی ائو صاحیبلیگی ائدن جدولین ایکینجی تیمی، یانی ایستیقلال ییغماسی ایدی. اؤتن ایل تیراختور اللی مین تاماشاچی ایله ایستیقلال ایله ایکی-ایکی ائتمیشدی!

سون‌دا بونو دا دئییم کی بلدیه‌‌ و تیراختور گئدیش اویونلاری‌نین اؤجونو آلدیلار. من‌جه بلدیه‌نین موساوی ائتمه‌یی تیراختورون ائوده اوتماغیندان داها ده‌یه‌رلی اولماسادا، اؤنمی اوندان آز دئییل. بلدیه‌ قویمادی ایستیقلال‌ تیراختوردان داها اوزاقلاشا.
بلدیه - استقلال یاریشیندان نئچه گؤرونتونو گؤرمک ایچین بورایا کلیک ائدین. بو دا شهرداری‌نی کسینتی‌سیز آلقیشلایانلاردان بیر ویدئو:

باغلانتي (لينك)

ي.س: يالان ورزشي

اين قسمت را فارسي مي نويسم:
اين هم دروغ "خبر ورزشي" در روز روشن!
هوا آلوده بود ولي نه اينقدر كه صداي تشويق بيش از صد نفر هوادار شهرداري را كه غرش آن بيش تر از دو سه هزار طرفدار استقلال بود، نشنويد. ضمنا حتي اگر كسي از يك تيم ميهمان ته جدولي حمايت نكند نبايد  تعجب كرد؛ آنچه مايه تعجب است آن است كه تيم به اصطلاح پرهوادار استقلال در آستانه صعود به رتبه اول(كه با سدي محكم به اسم شهرداري مواجه شد!) نمي تواند در  ابرشهر تهران بيش از دو-سه هزار نفر به ورزشگاه بكشاند.
ضمنا در بازي رفت شهرداري با استقلال كه در مرداد ماه برگزار شد و متاسفانه شهرداري در خانه باخت(به دليل كم تجربگي و اشتباهات داوري)، نزديك به پنجاه هزار نفر در تبريز شهرداري را تشويق مي كردند. خدا را شكر كه براي اين مورد هم چند تا عكس و فيلم موجود است: لينك!

ي.س.2: 
"فوتباليستلر" درگي‌سي بير يوروم(كامئنت) ايله، بو يازي‌ني يايماغا گؤره اجازه ايسته‌ميشدي. من‌ده دئديم من‌ايچين افتخارذير! دئيه‌سن بوگون(قيشين بيرينجي گونو) ياييبلار. "بونا دئيه‌رلر روحيه"‌ني ده ياپيشديريبلار چيلغين يانداشلاري داشييان بير وانئتين قاباغينا. حتمن سيز ده آلين؛ بو درگي‌لر ده توركجه يازيلارين سايي‌سي چوخالمالي‌دير:

گونون گؤروتلری: شن یانداشلار

تیراختورون دونن کی یاریشیندا اوچ طیلیسیم سیندی؛ بیری‌‌سی تیراختورون پیروزو تیمی‌نی 17 ایل اوتابیلمه‌مه‌یی ایدی. تیراختور او قدر گوجلو اوینادی و یانداشلار دا او قدر گوجلو و کسینتی سیز آلقیشلادیلار کی آراجی‌‌نین(داورین) یاردیمی ایسه پیروزونون دردینه ده‌یمه‌دی.
ایکینجی طیلیسیم ده منیم آیاغیمین سهند ایستادیومونا دوشمه‌مه‌سی ایدی! عربلرین اوچه دئمه‌یی یانلیش ایمیش؛ دؤرده دئمکلری من ایچین دوز ایمیش سانکی!
اوچونجو سینان طیلیسیم ده یانداشلارین بیر یانلیش احساسی ایشلریندن قایناقلاندی. کرار جاسیم یئتمیش جونت گؤزون قاباغیندا هه‌یه‌جانلانیب و یانلیش بیر ایش ایله اخراج اولماغی ائله ده عئیبی یوخدور، آنجاق بیر سیرا یانداشلارین صندلی سیندیریب مئیدان قیراغینا آتماسی چوخ پیس ایش ایدی. بئله بیر ایش ایلک دؤنه ایدی تبریز ده گؤروندو. بیز همشه و هر دوروم‌دا گرک باشقالارلا فرق ائدک.

هر حال‌دا اویونون سونوجو ده‌یه‌رلی ایدی و پیروزودان یاخشی بیر اؤج(انتقام) آلیندی. جماعات دا ایستادیوم‌دان شنلیک ایله ائشیگه چیخاندا. سالدیغیم گؤروتلردن دؤردونو سئچیب آشاغی‌دا قویورام. قالانین سونرا بورایا آپلود اولاجاقلار. بلدیه‌نین اویونو کنسئل اولماسا گئدیرم آزادی ایستادیومونا. بلدیه‌یه‌ده اوغورلار دیله‌ییرم. استقلال ایله چتین بیر یاریشی واردیر.

تیراختورون پیروزونو اوتاندان سونرا شنلیک ایله قاییدان تاماشاچیلار:

گؤروتلرین بوتون توپلوسو(بوتون عکسلر)

گونون گؤروتو: اصيل يانداش

تئهرانين هاواسيندان قاچميشديم خالخالا. گئنه بئينيمه وورموشدو گئدم تبريزه. آنجاق تجروبه گؤسته‌ريب منيم آياغيم سهند ايستاديومونا دوشمور كي دوشمور. دئديم گئتمه‌ييم، تيراختور اوتسون! راديو دان اويونو ايزله‌ييرديم. قيزيل اوزن ده‌ره‌لرينين بوروق بوروق ائنيشلرينده بيرينجي ياري قول‌سوز قورتاردي. آنجاق قيزيل اوزنين بوروق بوروق يوققوشلاريني چيخاندا تيراختور اوچونو ووردو بيريني ده يئدي! شانسيم گتيردي هله او يول تكميل اولوب شولوقلاشماييب، يوخسا تيراختور ان آزي بير يانداشي‌ني الدن وئره‌جك‌ايدي!!

دونن كي اويونون گؤرونتولرين ايچينده بو گؤرونتونو چوخ سئوديم! يانداشلارين هامي‌سي‌نين حاواسي اويان بوياندا تكجه بو بالاجا يانداشدان سونرا! گله‌جك‌ده بؤيوك بير آناليزور اولاجاق:

گون گؤروتلري: بلديه‌نين يئني پارلاماسي

دونن بلديه‌نين بيرينجي ياري‌سي سونا چاتاندا ته‌زه بيلديم اويون ائله دونن ايميش. قاچا قاچا اؤزومو ائوه يئتيرديم! گئنه تبريز كانالي پارازيت ايله توتوردو! بئش ثانيه توتوردو بئش ثانيه يوخ! او بئش ثانيه‌لرين بيري‌سينده بلديه ايكي قول وورودو!! دئديم ياشا! بو ديرخشان نه دوزه‌لديب بو تيمي! قول ووراندان سونرا او بوي‌دا ايستاديومون گون توتان يئرينده اوشويه‌ن بير ايكي مين يانداشين بدنلري قيزيش‌دي سانكي! ايستاديوم پوليسلري‌ني ده هر دن گؤستريردي. سايي‌لاري يانداشدان چوخ اولماسايدي آز دا اولمازدي!

بلديه و بلديه‌ني آلقيشلايانلار دئمك هم پارلاديلار هم پاتلاتديلار! بو دؤنه سونوجو سونا قدر قورويوب اوچ صيفيرلا اوتدولار. اؤز آراميزدا بلديه آز قالير تيراختورو دالدان يئتيره! تيراختور دا كرج‌ده بلديه‌ اوتموش تاخيمي اوتماسا، بيلميرم نه سؤز دئمك اولار! بلديه 200-300 آزربايجانلي يانداشين آلقيشي ايله پيس زامانيندا سايپاني اوتدو ، كسينليكله تيراختورو آلقيشلايانين سايي‌سي اؤتن ايل كيمي ده اولماسا آزي اون مين گله‌جه‌ك!

بو دا گونون گؤروتلري ايرنا سايتيندان:

بو ده‌يه‌رلي يانداشلارين هئچ ايشينه ايراد چيخارتماق اولماز، آنجاق كئشكه "تئهران بونو اونوتما، تبريز سنين سرورين" سؤزونو دئمه‌يديلر؛ گرچك بئله دئييل!

بو پوليس عسكري دئيه‌سن بلديه‌نين پارلاييب پاتلاتماغي‌ني گؤروب گؤره‌وي‌ني اونودوب تكجه اويونو ديققت ايله ايزله‌يير! چونكو توپلانميش‌ سيراسيندان چيخيب تك باشينا ياريش مئيدانينا باخير. بو اوتورماق يئرلري‌نين بوم بوش اولماسي‌ و پوليسين اوردا چكيشديرمه‌يي ايسه باشقا بير آنلام داشي‌يير!

تراختور بوتون آزربايجانين‌دير

تبریزین سهند ایستادیومونا گیرمک ایچین کارت آلماق منیم کی ذوب‌آهن اویونونا گئده‌نده ده‌ده‌می یاندیرمیشدی. و ائله‌بیل گئت‌گئده بؤیوک بیر چتینلیگه چئویریلیر و تاماشچیلارینم آزالماغینا بیر نه‌دن اولموشدور. دئییلیر بو تبریزین ائلئکترونیک کند اولماغی ایچین دیر!! من بیلمیرم بو نئجه مئکانیزه ائتمک دیرکی دئییرلر هر کیمسه کارتین شارژ ائلیر، بیر دنه ده A4 کاغاذ پرینت آلیب قویوب قولتوغونا گلسین. آخی قرار دیرسا کاغاذ پرینت آلینا اؤزونوزو سارییب‌سیز یوخسا خالقی!؟ ایستادیوم قاپی‌سیندا بیر دفه‌لیک ائله بالاجا بیلیتلردن ساتیندا! آرتیق کاغاذ دا کورلانماز.

بو یئددیجه(هفته)نین دوخسان وئرلیشینده بونا گؤره نئچه دانیشیق گؤرسه‌تدیلر. بو دانیشیقلارین ایچینده بیر گنج اوغلان چوخ هوشلو باشلی و ده‌یه‌رلی دانیشدی. دئدی بو کارت باعیث اولور باشقا بؤلگه‌لردن گله‌بیلمه‌یه‌لر حالبوکی تیراختور ایله بلدیه بوتون آزربایجانین تیملری دیر. بو کارتی ییغیشیدیرمالی‌سیز! دالیسیجا دا باشقا بیر یانداش یاوا و یئرسیز دانیشدی. او دئییردی بو کارتی ییغیشدیرماسالار من دای ایستادیوما گلمه‌یه‌جه‌یه‌م!! بیری اونا و اونا تایلارا دئسین، بو ایشلر اونوچون‌دور تاماشاچی آزالسین‌دا؛ ائله دوخسانچیلار بونو ایستیرلر دا! اومودوم وار هامی ایلک ده دانیشان اوغلان کیمی همه‌شه بئله دانیشماقلارا حاضیر اولسونلار.

تیراختور اف.سی. سایتینین مولتی مئدیاسی دئدیگیمیز دانیشمالاری‌نین فیلمی‌نی‌ یوکله‌میشدیر. من اؤز باخیشیملا لاپ اؤنملی بؤلومونو کسیب آلت یازی‌دا قویدوم:

باغلانتی(لینک)

الويداع آناديلي

ايگيرمي ايل اولاردي تبريز تيلويزيونونا باخمازديم. اوشاقليق‌دا جومه گونلري تبريز ناهاردان قاباق هر دن توركجه كارتون وئرردي! سونرا بيلديم كي او كارتونلار باكي‌دان ياييلميش روسي چيزگي فيلملر ايميش. گينه آدام دئيير يوز رحمت او زامانلارا! هر دن تيلويزيون‌دا اوشاق اؤز آناديلينده "جيب جيب جوجه‌لريم" گؤرورموش! ايندي ايسه تيراختور اويونلاري‌ني گؤرمك باعيث اولوب گينه‌ده تبريز تيلويزيونونا گؤزلري آيدين اولاق! اردبيل كانالي "گئجه‌لر" وئرنده، تبريز ده "سهنديه" وئرير! يازيقلار اولسون كي بوندان اؤنجه سهنديه دئيه‌نده شهريارين ياراتديغي شاهكار ياديما دوشه‌نده، ايندي ده بو سهنديه‌نين اتي آجي و دوزسوز آپاريجي‌سي ياديما دشور! البته انصاف‌دان دا چيخماياق ائله ده پيس دئييل آذربايجانين گنج ياراديجي و سئچگينلري‌ني گتيرير دانيشديرير. آنجاق نئچه گئجه بوندان قاباق زهله‌مي آپاردي! بير گنج قادين گتيرميشديلر ساغلامليق آراشديريجي‌سي ايدي؛ آنجاق تبريزلي نوخبه‌ميز توركجه دانيشابيلميردي و آپاريجي اونلا فارسجا دانيشيردي. من بيلميرم بئله آدامين هاراسينا نوخبه و سئچگين دئمك اولار؟

سئچگين‌لر سؤزو اولدو 1382 جي ايلين يازيندا كي تئهرانين بهمن كولتور ساراييندا آزربايجان سئچگينلر فئستيوالي ياديما دوشدو. او زامان علي دايي و كريم باقيري ده ايدمان دا سئچيلميشديلر، آنجاق باشقا سئچگينلرين يانيندا اوتورماق افتخاري وئرمه‌ديلر. او زامانلار ايدي كي ياواش ياواش، اولدوزلاريميزين ايشيقلاري آزاليردي. و هامي بو اولدوزلارين سؤندورولمه‌سي‌ني تبريزين سهند ايستاديوموندا گؤردو...

بير باشقا نوخبه‌لر و سئچگين‌لر ده وارديلار كيمليك‌ و وارليقلارينا ساري دؤنورلر، آنجاق تئز تئز اونلارين يادينا سالماسين آلزايمئر توتانلار، يوخسا اويوشدوروجويا دادانانلار كيمي يول‌دان آزيب، و 180 درجه‌‌لي ترسينه دانيشيرلار. بونون نه‌ده‌ني قاييدير يانليش دوزه‌نكلي اؤيره‌تيمه (سيستم غلط آموزشي) يا دا بئيين يووان و آسيميله ائدن اؤيره‌تيم سيستئمينه. نه‌قدر ده ياراديجي و ذكالي آداملاردا اولسالاردا، دوشونجه‌لري بير سايي قاليب‌دن ائشيگه چيخابيلمير. بير اؤرنك دئييم؛ بو گون گوز ايلكي دير؛ مئهر آيي‌نين بيرينجي گونو. هر كيمسه آزربايجان دا بير آز بو وارليق و كيمليك قونوسوندا بيلگي‌سي اولورسا تئز آناديلي‌نين ياساقلانماغي يادينا دوشر؛ آنجاق بير يولداشيميز مئهر آيي‌نين بيرينجي گونونو قوتلو اولسون دئييب هئچ، داليسيجا زرتوشتي‌لره ده مئهرگان گونونو خاطيرلادديب و تبريك ائديب!

بونلارين آناديللري ايله ويداعلاشمالاري بيزيم ويداعلاشماغيميزين تايي‌دئييل سانكي. البته چون هامي آزاد دير نه ايسته‌يير دئسين، آنجاق من‌ باش ساغليغي‌ دئييرم:
"آناديليميز ايله ويداعلاشماق گونو تسليت"!

*يئني نسيل اله‌شديرير

من تانيش ياشلي‌لار و قوجالارلا دانيشاندا، چوخ ايسته‌رم اونلارين اوشاقليق و جاوانليق خاطيره‌لريندن و او دؤنملرين توپلوم ياشاميندان بيلگي‌لر اله گتيرم. آنجاق دونيانين بيرينجي و ايكينجي ساواشيندا بؤيويه‌ن ياشلي‌لار او قدر يازيقليق‌دا بؤيوموشلر كي آدام اصلن ايسته‌مير اونلارلا چاغداش زامانلارداكي كيمليك سورونونا دانيشسين. اونلارا آدام حاق وئرير كه نه‌دن ائله بؤيويوب و يئتيشميشلر. ساغلامليغين چوخ پيس اولماغي، آجليق، قحط، بيلگي و ساوادين آزليغي او زامانكي دونياليق ساواشيندا، خالقي مجبور ائديرميش نئچه آغاجليق‌دان اوزاقلاري‌ني گؤرمه‌سينلر. ايران‌دا نفت گليري پايلاشيليب و آسيميلاسيون ايله بيرليك‌ده، ياشام كئيفيتي‌نين ياخشي‌لاشماسي، او نسيلين فيكري قاليبيني آذربايجان مدنيتي‌ني دالا قالميش، آنجاق باشقا بير كولتوره گيرمك ايله ياشامين يوكسك سطحه يئتيشمه‌سينده فورمالاشديريردي. بونلارين يوز ده دوخساني بئله دوشونورلر؛ وارلي‌لاري، يوخسوللاري، ساوادسيزلاري، ساوادلي‌لاري، و حتي بيلي‌يورد اوستادلاري‌دا. بير قوجا قادين 1325 گوزونده كي خالخال-كيوي كيمي بالاجا بير يئر ده موحاكيمه‌سيز اؤلدورولموش آداملارين جسدلريندن قالاقلانماسيندان دانيشير و بونو اوشاقليغينين ان دهشتلي گؤردوغو بيلير، آنجاق دئيير هر حال‌دا ياخشي اولدو، نئچه ايل‌دن سونرا اؤلكه‌نين دورومو دوزه‌لدي. بير باشقا قوجا ساوادلي كيشي ده وار قارداشي‌نين او زامان گنجليك‌ده قوزئيه قاچماسيندان پيس خاطيره‌سي واردير و ايندي گؤره‌نده بير گنج آدام اولوسال ايستكلردن دانيشير دئيير بو تعصصوبلري اؤتورون! بيري‌سي ده واردير دئيير آللاه رحمت ائله‌سين رضاشاهي گلدي قاتار و يول چكدي! ... بونلارين بير سايي‌سي سونرالار سياست ايچينه گيرديلر باش باخانليغا قدر گئتديلر. آنجاق نئجه دوشونمكلري ايچينده وارليق و كيمليك سورونو گؤرونمه‌دي و سانكي گؤرونمه‌يه‌جك! آنجاق ايستيثنالار دا وار ايديلر، آما سيخينتي‌يا گؤروب خطر دوياندا، قاليب اولونموش كيمليك‌دن ده دانيشيرديلار. آنجاق آرتيق دانيشاندا آرازا گئديب اوزمك باشارماييب، بوغولوردولار. خبر و بيلگي پايلاشماغين گئنيش دوروم‌دا اولان دئييلدي.

زامان گئچيردي و ايكي باشقا نسيل‌ده گلدي. بونلار آنا آتالاريندان اؤيره‌نيرديلر كي باشاري‌لي اولماق اوچون گرك وارليق و كيمليك و كولتورون‌دن واز گئچه‌سن. اوشاغي‌نا آناديلي اؤيره‌تمه‌يه‌سن. كارمند اولسون انتقال آلاسان تئهرانا. اكينچي اولسون وار يوخونو ساتاسان گئده‌سن تئهرانا توكانچي اولاسان و بئله بئله ياشاماق اوسلوبو. بونلارين ايچينده هر جوره آدام و هر جوره ايشچي گؤرمك اولور. هامي‌سي بئله‌ديرلر. فيلم دوزه‌لدن، اويونچو، آرتيست، حتي آشيق و موسيقي‌چي!، ايدمانچي، فوتبولچو، اؤيره‌تمن، آراشديريجي، يازار، نقاش، خياط، چؤركچي، و ....! دوغوم ايللريني بؤلسوك بونلار 1330 دان ديرلار 1350 جي ايله‌دك. نئچه ايل‌ده اويان بويان اولابيلر. بونلارين ايچينده قادينلار چوخ چاليشيرلار لهجه‌سيز دانيشسينلار. كيشي‌لري ده انقلاب و ساواش زامانيندا اولماق ايچين، خطر احساس ائليرلر قاييتسينلار آتا-آنا بابالاري زامانينا و گئديب اللريندن گلني‌ده گؤرورلر.

زامان داها ايره‌لي گئدير. ايكي نسيل‌ده گلير. بو ايكي نسيلي رسمي حالت‌ده باشقا بير كولتور ده بؤيوتمك آتا آنالارا گركلي بير ايش كيمي بيلينير. تيلويزيونلار دا هر يئر ده وارديلار و آتا آنالارا يول گؤستريرلر. آنجاق بو نسيل بيلگي‌لرين او يان بو ياندان داها آرتيق گلمه‌سي ايچين داها حد دن آرتيق بيلگي‌لر اله گتيريرلر. 1370 دن 1385 ايللرينه دك بوتون قاليبلري سينديرب و ايپلري قيرديلار. بيلي‌يوردلاردان چاي آخدي خالقين ايچينه. چايلار چوخلو يئرلري سووارديلار. سون نسيل داها بيليجي دير، موحافظه كار دا دئييل. سؤزو آچيق دئمك‌دن قورخوسو يوخ‌دور. اولابيلر قديمكي‌لر بونو دوز داورانيش بيلمه‌سينلر، آنجاق يئني نسيل بو يولا اينامي وار سانكي. رحم ائله‌مير. ايسته‌يير هامي واكسيناسيون اولسونلار. علي دايي‌نين قولاغي‌ني بورور ونگيلله‌دير، كريم باقيري‌يه دئيير هوش باشيني بير يئره‌ييغ هئچ زامان بؤيودنلري‌ني اونوتما! رحيم شهرياري‌يا دئيير نه‌دن اؤزونو بير گئجه‌ده ايتيريب، بي‌بي‌سي تاپشيريغي‌ني اوخودون؟ كمال تبريزي، تهمينه ميلاني و جعفر پناهي‌يا دئيير گؤرونتولرينيز اؤز پايي‌نيز اولسون! دوكتور حسن احمدي و دوكتور انوري و باشقا بيليم آداملارينا دئيير اولمازدي اؤز ديليميزه ده بير آدديم گؤتوره‌يدينيز و ... .

بو اله‌شديري‌لر(تنقيدلر) اولابيلر يئني نسيللرين گئچن نسيللري سورغو آلتينا چكيب، موحاكيمه ائتمك آنلامي‌نا گلسين. آنجاق بئله دئييل. بو ايشلر موحاكيمه دئييل. اؤج آلماق(انتقام)، ايهانت، ساتاشماق و اؤجه‌شمك ده دئييللر. يوخاري دا واكسنياسيون دئمه‌يي بير ده وورغولاييرام. يازيقلار اولسون كي بئله يئته‌نكلي‌لر اينجي‌‌ييرلر. تقصيرلري يوخدور. ائله يئتيشميشلر. پيس كودلار ايله. يئني نسيللر بئله بؤيومه‌مك ايچين يولو ده‌ييشمك ايچين اؤزوموزه پارلامايان اولدوزلاريميزا آلقيشلاماق يئرينه اوياري وئرمك مجبوريتينده ديرلر. يوخسا يئني نسيلين باشينا گله‌جك‌ده لاپ پيس اويون دا گله‌بيلر. يئني نسيلي بو ايشلري گؤرمه‌لي‌دير.

---

* - اله‌شديرمك تنقيد و انتقاد ائتمك آنلاميندا.
بو پوستو يازماغين نه‌دني داش‌قاپي‌نين "تانین‌دیقدا هویلانیر" يازي‌سي‌ني اوخوماق ايدي. اولابيلر ائله‌ده ايليشگي‌لي اولماسينلار!