Günün Görüntüləri: Büyü`nü sındıranlar

آزربايجان ايدماني و تيراختورا گؤره بوتون يازيلار بوندان سونرا بو صحيفه‌ده ده، ياييلاجاق‌دير:

https://sites.google.com/site/anayurdumla/tiraxtur_idman/yazilar-1

----------------------------------------------------------------------

گونون گؤرونتولري: طيليسمي سينديرانلار

 

تيراختورون دونن كي تئهران‌دا پئرسپوليس تاخيمي قارشي‌سينداكي، 40 ايلليك طيليسمي سينديرماغي‌ني ايسته‌ميرم بويوك بير بهانه‌ ائديب و ، بيزلري "بيش از حد خوش‌بين" و "غير آينده‌نگر" و "قورخاق" بيلنلري سوچلايام؛ آنجاق سانكي بو بير گئرچك ايميش كي، نئچه باشاري‌سيز اويوندان سونرا، گه‌له‌جه‌‌يي ياخشي گؤرنلر، و مصلحتلري دوغرو دوشونن‌لر "عئيبي يوخ" كيمي سؤزلردن ال چكمه‌يه‌نلر ايميشلر، و يالنيز بير اويونچويا گؤره آزربايجان كيمليگي‌ سيمگه‌سي اولان تيراختورو، اونودوب و اساسي ده‌ييشكليكلر وئرنه مورببي‌يه ‌سالديرمايانلاريميشلار. بو دا سئوينديريجي بير حال دير كي، اميرپاشا دان تكجه داورانيشلارينا گؤره بير آز اله‌شديرميشيك، و تئكنيكي سورونلارا گؤره يوخ(1، 2). و لاپ سئوينديريجي بو دور كي بو باشاري باعيث اولاجاق تيراختور يانداشلاري آراسينداكي دايانيشما(انسجام) و بيرليك آرتسين و يئرسيز قونولارا گؤره تارتيشماسينلار.

هر حال‌دا بو بؤيوك اوغورو موتلو اولسون دئييرم، آنجاق اومودوم وار، يانداشلار تبريزده، حتي گوجسوز تاخيملارين قارشي‌سيندا ياخشي سونوج قازانماماقلارين عيللتلرينه ياخشي فيكيرلشيب، و بو هفته، بؤيوك يارديملاري ايله بو سورونا(مسأله‌يه) سون نوقطه قويالار.

دونن كي اويونونا هامي تيلويزيون‌دا گؤروب؛ و ائشيتديكلريمه گؤره تيراختور تاماشاچيلاري‌ني گينه ياخشي گؤسته‌رمه‌ييبلر. گينه ساغ اولسون سياووش اكبرپور! قول وورماسايدي، بيزيم اورادا اولماغي‌ميزين تكجه سسي بيلينه‌جك ايميش! چكديگيم گؤرونتولرين ويدئولار و  قالان گؤرونتولر ايسه بو آدرئس ده‌ديرلر: http://Perspolis0-1Tiraxtur.4shared.com

سئچيلميش شكيللري ده،‌ آشاغي‌دا گؤره‌بيلرسينيز:

ی .س:

بلدیه‌‌ده تبریز ده ایستیقلالا اودوزوب، دونن کی کئفیمیزی پوزدو! من قالمیشام معطل، ائوده، نه‌یه بونلار بئله اویناییرلاردا؟؟! تاماشاچیلار دا اینصافن یاخشی آلقیشلادیلار. آنجاق یازیقلار اولسون. بو اویونو تیلویزیوندان ریپورت ائدن، آدامین لاپ زهله‌سی‌نی آپاریر! دئییر شهرداری‌ آبیرلی اودوزدو! آ کیشی نه آبیرلی‌سی؟ كئچن هفته، ایستیقلال داور یاردیمی ایله شاهینی اوتدو! ایکینجی‌ لیگده اوینایان کرجین مئهر تاخیمینی‌ دا، اوزاتما زامانیندا اوتدو؛ آنجاق نه جور اولور تبریزه هر گه‌لن، کریز ده یاشاماغینا باخمایاراق، ييرتيجي آسلان اولور آخی!؟ گؤره‌جکسیز تئهران‌دا ائله بو بلدیه، ایستیقلالی بیلدیره تای، دیزه چؤکدوره‌جک؛ شرط باغلاییرام!

سیزین‌ ده حالینیزی بوندان آرتیق توتماق ایسته‌میرم. بلدیه قونوسونو هله‌‌لیک اونوتماق ایچین، گلین دونن آزادی ایستادیومونداکی یاریشی‌نین آلقیشلاماق ویدئولارینا باخاق! یانداشلارین اویون باشلامادان اؤنجه اوخودوقلاری "یاشا تیراختور... عئشقيم تیراختور" چوخ گؤزل ایدی:

http://yasha-tiraxtur.4shared.com

باشقا ویدئو کلیپلر:
http://www.4shared.com/folder/Hlb08jmD/Video-Klipler.html

گونون گؤرونتولری: تایسیز باشاریلار

گئچن جومه، یای سونونون 18جی گونو، تیراختوروچون تاریخی بیر گون اولدو. ایکی یؤنتمدن دئییرم:
- تیراختورون سایی‌سیز یانداشلاری، یئنه‌ده یارادیجیلیق گؤسترمک ایله هامی‌نی شاشیرتدیلار! قیرمیز بایراقلاری‌نی آزادی ایستادیومونون حیصاریندا دالغالاندیردیلار.
- استقلالی اوتماقلا بیرینجی دؤنه اولاراق، سوپئرلیگین زیروه‌سینه چیخدیلار.

البته، باشاریلار و آددیملار بؤیودوکجه، داها آرتیق اینجیمکلره ده دؤزمه‌لی‌ییک سانکی؛ یاریش‌دا گؤردویوم اویون‌چیخارتمالار و چتین‌لیکلر حاقدا، فارسجا یازیمی تیراختورفانس‌دا اوخویابیلرسینیز:
ما عئيبي يوخ مي گوييم؛ شما چرا شرم نمي كنيد؟

بایراقلارین دالغالانماسی، یاریشین سون آنلاریندا کی وورولان قول، و اونون سئوینجینه، آشاغی داکی ویدئو کلیپ‌ده باخا بیلرسینینز:

http://istiqlal2-3Tiraxtur.4shared.com

باشقا گؤرونتولر ده بورایا قویولاجاقدیر:
گؤرونتو توپلوسو

گونون گؤرونتولری: آسیا یولو باغلانسادا، بو بایراقلار یاتمایاجاق

ائو ده اوتوزماق، آنجاق قوناندا اوتماق سوره‌جی بیر ده باش وئردی! بو دؤنه حریف سیپاهان کیمی گوجلو دئییلدی! و بئله اولدو کی هامی آسیا رویاسیندان واز گئچیب دئییردی : "آسیا گلمه‌ییمیز اولمادی! سیاست قویمادی!! بیر سایی‌دا دئییردی فیلانکس‌لر قویمادی"!
واللا دوغروسو بودور بیزیم ده انتظاریمیز چوخ‌دور! سککیز ایل قویمادیلار گلک اوستون لیگه؛ یئتیشمه‌میش آسیایا گئتمک و قهرمانلیق اددعامیز وار! البته بیزیم حاقلی‌ییق، آنجاق تیراختورون باشینا گه‌لن اویونلاری بیربیری‌سی‌نین یانینا دوزه‌‌نده، منطیقی سونوج بودور کی آسیا گئتمک چوخ یاغ آپاراجاق دوستلار!

البته ایکی ایل بوندان اؤنجه‌ده، تیراختورون اوستون لیگه گلمه‌یی ایمکانسیز نظره گلیردی؛ آنجاق گلدی. داش دیغیرلادانلار بو سونوجا یئتیشمیشدیرلر سانکی اؤز صلاحلارینا دیر تیراختور گلسین! ایندی ده سانکی صلاح بو دور تیراختور آسیایا گئتمه‌سین؛ آنجاق چونکو ایمکانی وار مصلحتلر ده‌ییشیلسین(!) تیراختورچولار هئچ زامان گرک سارسیلماییب و اومولادرینی الدن وئرمه‌یه‌لر! آرزی‌گیل بیزدن کوسسه‌لر و بونو بیز بیلسک‌ده، بیز هه‌مه‌شه ال اله وئرمه‌لی‌ییک!

قاییداق قوم صباسی(دئمک حاکیملرین صبا یئلی!) و تیراختورون یاریشی‌نا. اویونون سونوندا کی عدالتسیزلیگه گؤره تاماشاچی‌لارین بیر سایی‌سی دوروب اوتوراجاقلاری سیندیردیلار و تونازلادیلار مئیدانا! نه یاخشی بیر شمسیه(چتر) آپارمیشدیم. ایندی ده 24 ساعات دان چوخ او زاماندان گئچیب؛ البته من گؤرمه‌دیم بیری‌سی ژورنالیستلرین ماشینینا داش آتسین، آنجاق تیلویزیون یاخشی فورصت تاپیب تیراختور یانداشلاری‌نین "توحش"وندن دانیشسین! تیلویزیونون "دوربین خبرساز" وئرلیشینده بیری‌سی تورکجه دئیینیر دئییر: "داش باشیزا! بئله آسیایا ایستیردیز گئده‌سیز."! داش آتیب صندلی‌ سیندیرانلار چوخ یانلیش ایش گؤروبلر؛ آنجاق تیراختورا قارشی اولان وئرلیش‌ده، یانداشلارا داش باش دئیه‌ن ژورنالیستین، بویو بوتونلوکله یئره گیرمه‌لی‌دیر!
باشقا طرف‌دن تیراختورون، مدیرعاملی دوروب یانداشلارا اهانت ائدیب: "شور یانیندا؛ شوعور دا لازیم دیر"‍ دوغرودان بئله سؤزو دئمه‌ک حددن آرتیق اوز ایسته‌ییر! مه‌گر سیپاهانا اوتوزاندا یوز مین نفر گلنده بو شوعورسوزلار دئییلدیلر گلمیشدیلر؟!
ائهئی...! یاخشی‌دیر بوش وئرک...

سالدیغیم گؤرنتولر آراسیندا آشاغی دا کی گؤرونتونو سئودیم. هر 100 اویوندا بیر-ایکی دؤنه اوچان صندلی‌‌لری گؤرمک اولار آنجاق تیراختورو ایسته‌مه‌یه‌نلر، هه‌مه‌شه اه‌سن بایراقلاری و یایلیقلاری گؤرمک ایسته‌مه‌ییر و تکجه اوچان صندلی‌لردن دانیشیرلار:

بوتون گؤرونتولرین قالانین دا، بو لینک‌ده گؤره بیلرسینیز:

ویدئو دا، بو لینک‌ده دیر:

ی.س (یایاندان سونرا):

آلتی آی بوندان اؤنجه تیراختور-صبانین گئدیش یاریشی قوم‌دا اویناندی. اوردا ایسه تیراختور ائو صاحیبی ایدی. او زامان بوندان راحاتسیز اولدوق کی تیراختور نه‌دن صبانی اوتابیلمه‌دی حالبوکی تاماشاچیلاری یوزده دوخسان بئشی تیراختورو آلقیشلادیلار. ایندی ایسه دئییرم یوز رحمت او اویونون سونوجونا! هم ان آزی بیر امتیاز آلدیق، هم‌ده قوملو تورکلره گؤره دانیشدیق، هم‌ده هئچ بیر اوتوراجاق-موتوراجاق سینمادی... تکجه منیم بلگه‌لریم(مدارک) ایتدی!

بورانی اوخویون: گونون گؤروتلری : قوم تیراختورچولاری

تای‌سیز، کسینتی‌سیز، و گرچک آلقیش

آسیایا یئتیشمک ایچین تکجه بئش آددیم قالدی.
چتین آددیملارین بیری‌سی‌ تهران‌دا آتیلدی، و بیر باشقا چتین آددیم ایسه بوگون اصفهانین سیپاهان ییغماسی‌ قارشی‌سیندادیر. آنجاق اومودوموز وار، سهند ایستادیومو بیر داها دولوب، و گوجلو رقیبی سالاجاق تیراختورون خیشی آلتینا.

بئله تایسیز، کسینتی‌سیز، و گرچک آلقیشلار ایله، تیراختور بوتون جیزیق-میزیق و سینیرلاری آشیب، آسیا سهل‌دیر، اؤزونو دونیادا دا تانیتدیراجاق:

Download (WMV file, 2.45MB)

ی.س.(یازی‌دان سونرا) :

اول‌ده بیر گولوم  :)))) ؛ سونرا سؤزومو دئییم:

بو قاققیلداماغین نه‌دنی بو دور کی قرار ایدی سیپاهانی سالاق تیراختورون خیشی آلتینا! آنجاق یئتمیش، سکسن و اولابیلر یوز مین تاماشاچی‌ قارشی‌سیندا گولونج بیر دورومدا اوتوزدوق. بئله بیر اولای دونیادا تایسیز اولابیلر. اولابیلر سیز دئیه‌سینیز بو بیر فوتبول حادثه‌سی دیر و اولار. آنجاق ریجا ائدیرم تیراختورون چوخلو اویونلارینا گئدیب یاخیندان ایزله‌ییب آلقیشلایان بیر آدام قبول ائدین کی گؤزله‌مه‌دن یاخشی سونوجلاردان سونرا گؤزله‌نیلمز و ایمکانسیز بیر سونوجون اله گلمه‌سی "ایستی سویوق" ائتمک دیر. منجه بئله اوتوزمالاردا تاماشاچیلارین بیر بؤلومو دئییرلر "پول" هر حالدا، "یانداش" و "آلقیش"دان اؤنملی‌دیر. تاماشاچیلارین آزالتماغی‌نین لاپ یاخشی یولو بو اولابیلر!
اومودوم وار منیم دوشونجه‌م یانلیش اولسون و تاماشاچی‌لار، هه‌مه‌شه‌ کیمی تیراختورون آرخاسیندا دوروب و اونو داها آرتیق گوج ایله آسیایاجاق ایته‌له‌سینلر.

گونون گؤرونتولری: کارلوسون گؤردوکلری

تئزلیکله قضاوت ائتمه‌‌یین! بو یازی‌نین بیرینجی عکسی، ایستیقلال یانداشلاری اوتوران بؤلومه مربوط دئییل. تکجه اونلارین آزلیغی‌نی گؤسته‌رمک ایچین، اوزاقدان بیر-ایکی دنه ده گؤرونتو سالیردیم. البته دئییردیلر بو اویونون نئچه اؤزل قوناغی‌ واردیر. دئییردیم کئشکه هامی‌سی‌نی گؤره‌بیلم. آنجاق کامئرام اوزاقدان چکه‌بیلسه‌یدی ایسه، کارلوس کوییروغوندا(کارلوس کئیروش، سرمربی جدید تیم ملی) یئرینی تاپماق اولمازدی. آنجاق مئهر خبر آگئنتی‌نین گؤرونتوسو و اؤزوم سالدیغیم عکسلری توتوشدوراندان سونرا، بو شکیلده پورتوقاللی مورببی‌لرین اوتوردوغو یئر بللی‌دیر.

گؤردویونوز کیمی کارلوس و اونون یاردیمچی‌لارینی، آپاریبلار اؤزل بؤلمه‌ده(جایگاه ویژه‌ده) اوتوردوبلار ایستیقلالا منسوب اولان آدلیملارین آراسیندا! اؤرنک ایچین ایستیقلالین مئیداوودی آدلی اویونچوسونا دا دئییبلر بیر قارا گؤزلوکده تاخ، بلکی کارلوس سنی میللی تاخیم ایچین به‌يه‌ندی!

آنجاق گؤرونتو هر نه‌یی دئییر. منچستریونایتئد، رئال مادرید، پورتوغال، گونئی آفریقا کیمی کلوبلار و میللی تاخیملاردا مورببی‌ اولان کارلوس، هر نه‌یین کئیفیت و کمیتی‌نی یاخیندان-اوزاقدان بیلیر سانکی! گؤزلری نه مئیدانا باخیر، و نه آرالاریندا اوتوردوقلارینا. تیراختور یانداشلاری‌نین تایسیز آلقیشلار و هایکوی‌لری، کارلوس ایچین، کسینلیکله ماراقلی‌دیر. کارلوس تیراختور تاماشاچیلارین تاماشاچی‌سی اولوبدور.

تیلویزیون گؤسته‌رمه‌‌یه‌ن ویدئولار، کارلوسون اوزاقدان گؤردوکلری‌نین، توپلوسونا بورادا باخابیلرسینیز: لینک (گونجه‌للنمکده‌دیر)؛ تاماشاچیلارین آراسیندا، حؤرمتلی، غئیرتلی، و ائل‌سئون بیر کیشی‌نی ده گؤره‌جکسینیز. البته اؤزل قوناقلاردان ساییلماییر! گلیب اوتورموشدو یوخاری طبقه‌ده. گؤرونتولرین نئچه‌سی آشاغی‌دا:

فوتو آلبوم و ویدئولارین لینکی (گونجه‌للنمکده‌دیر)

سون‌دا آرتیرمالی‌یام، بو اویونون سونوجو و تیراختورون تئهرانین گؤی تاخیمی‌نی تئهراندا ایلک دؤنه اولاراق، دیزه چؤکدورمه‌یی، شرفلی میللتیمیز ایچین، تاریخی و اونودولماز بیر گئجه یاراتدی.
بو باشاری قوتلو اولسون.

گونون گؤرونتولری: دوخسانلارین ایلک آلقیشلاری

یاز بایرامیندا آزربایجاندا اولدوغو یئرده تیراختور‌ یاریشی‌نا گئتمه‌یه‌سن، گئرچک بیر نامردلیک اولابیلر. باشقا طرفدن اهوازین فولادی‌نی اوتماغین چوخ اؤنملی اولماسی ایچین دوروب یولا دوشدوک تبریزه ساری.
بو اویون دئیه‌بیلرم تیراختورون آوروپالی‌لار دئمیشکن، لاپ "دراماتیک" اویونلاری‌نین بیری‌سی ایدی. یانداشلار "تیراختور حمله ائله، بیز آسیا ایستیریک" شوعارین دئیه‌نده، قول یئدیک! قوناق تیمین قاباغا دوشمه‌سی ذوب آهنی یادا سالیردی! تیراختور نه قدر حمله ائدیردی، قول وورابیلمه‌ییردیلر.
90جی دقیقه ده ایشیقلار یاناندا، منده قارا گؤزلویومو ده‌ییشدیم. دئدیم بلکی هر نه، منیم پیس باخیش‌لی گؤزلویومه گؤره‌دیر!

اوتماق‌دان باشقا هئچ سونوجا راضی اولمایان تیراختورچولار، سون ثانیه‌لرده کی وورولان قولدان سونرا بئله آتیلیب دوشوردولر کی گل گؤره‌سن. من اؤزوم هئچ بیلمیردیم نئیله‌یه‌م. قاییداندا یولون یاریسیندا آیاغیمین آغری‌سی باشلاناندا ته‌زه یادیما دوشدو کی آیاغیمی سفئه‌له‌ییب چالمیشام صندلی‌یه! گئنه ساغ اولسون کت تویوخلاری! یومورتالاری‌‌نین ساری‌سی آیاغیمین سانجی‌سی‌نی تکجه بیر گئجه‌ده دوزه‌لتدی.

اویون آراسیندا، آزربایجان رقص موسیقی‌سی سسلندیردیلر. تاماشاچیلاردا بایرام گونو بیر قول دالی اولماغی تئز اونودوب دوردولار اویناماغا! آنجاق او سس کسیلیب بیری‌سی باشلادی فارسجا زورخانا اوخماغینا! میللت‌ده اؤز اعتراضی‌نی بیلدیردی. اوخویان دا باشلادی تورکجه حئیدربابا یا قاتیشیق بیر اوخشاما دئمه‌یه! کلیپی‌نه بورادا باخین: ویدئو

---

او گوندن بیر یئددیجه(هفته) گئچیر. تبریز تیلویزیونو "تلاش" آدلی وئرلیش‌ده، شرقی آزربایجانین 89جو ایلده‌کی ایدمانین عملکرد(ائیلم)، کارایی‌(ایشلم) و ثمربخشی‌‌سیندن(ثمر وئرمک) دانیشیرلار(نه یاخشی فارسجا دیلی‌نی بیلمک نئعمتی‌نی آللاه بیزه باغیشلاییب، یوخسا بونلارین یئرینه نه دئیه‌جه‌یدیک؟!). عملکرددن زاتدان دانیشدیق تیراختورون فولاد قاباغینداکی او قدر سالدیرماسی و تکجه بیر قول وورماغی یادیما دوشدو. آشاغی‌دا گؤردویونوز گؤرنتوده یاریش سونوجو و باشقا سایی‌لاری‌نی گؤرورسونوز:

فوتو آلبوم (گؤرونتولر توپلوسو)

تیراختور 19 کورنئر، 10 شوت، 13 سانتر و 6 قول دورومدان تکجه بیر قول اله گتیردی؛ آنجاق اهوازین فولادی ایسه تکجه 2 کورنئر، 2 شوت، و 7 دنه سانتر ائله‌دی و ایکی قول دوروموندان بیر قول اله گتیردی. بو ساییلار آیدینجا دئییرلر کی بو اللی-آلتمیش مین یانداشی‌دا قویسونوز قیراغا تیراختورون سالدیری‌لاری ثمرسیزدیر. ان چوخ آلقیشلانان اویونچو، یانی علیزاده‌ ده گرک چوخ سیرتیلمایا کی من تیراختورو نیجات وئردیم! یوزون کورلایاندان سونرا بونودا سن آللاه بونودا وورمایایدین.


ایکینجی آلقیش علی دایی‌‌ ایچین

علی دایی اؤتن ایل او قدر اویون چیخارتدی کی بو تئزلیکده اونلاری یویابیلمز! آنجاق بیر شاشدیریجی اینانیلماز ایش گؤروب!
علی دایی تاشکندده، بونیودکور آدلی تیم ایله موسابیقه‌‌‌سی‌نین یایین توپلانتی‌سیندا، اؤزبک ژورنالیستلرین جاوابیندا تورکجه جاواب قایتاریرمیش! بو دا خبرین گؤرونتوسو:

اؤز آرامیزدی علی دایی تیراختور یانداشلاریندان ائتکی‌له‌نیبدیر. تیراختورچولاری "یاشاسین آزربایجان" و "تورکلرین افتخاری: تیراختور" کیمی سؤزلری دئمه‌یه گؤره قینایان دایی، ائله‌بیل اؤزو گیزلینده گئدیب "اورتاق تورکجه" یا دا اؤزبک تورکجه‌سی‌نی اؤیره‌نیب و اؤزبکلر ایله دانیشیب گولور قول بویون اولوب! بیز بو قدر ایددیعا ایله اؤزبک تورکجه‌سی‌نی یاخشی باشا دوشمه‌ییریک. علی دایی گؤزله‌سین پـ.ـان تـورک آدلانماسین!

گونون گؤرونتولری: ســکسنلرین سون آلقیشلاری

کیمسه‌دن سوروشدوم گله‌جه‌سیز یوخسا یوخ، دئدیلر یوخ! حاقلاری ‌دا وار! من‌ده بایرام تعطیللری باشلاناندا حتمن گرک آنایورددا اولام. آنجاق بو دؤنه تیراختورو بایرام بهانه‌سینه تک قویماق اصلن انصاف دئییلدی. تیراختور اوچون، تئهرانین یانداش‌سیز تیمی یانی صنعت نفتینی اوتماق، آسیایا گئده‌بیلمک ایچین چوخ بیر یاخشی فورصت ایدی.
تیراختورون بئله تیملر ایله اویونلاری‌نی سالیرلار تئهرانین لاپ گون چیخان طرفینه! البته تختی ایستادیومو بیز ایچین پیس اولماییب من دئییردیم اورادا گئنه اوتاجاییق. ساغ اولسونلار یانداشلار؛ ایستادیومون ال‌دن اوزاق اولماغینا باخمایاراق چوخ سایی دا گلمیشدیلر:

بوتون ویدئولار و گؤرونتولر: لینک

من ایچه‌ری گئچنده نئچه دقیقه سربازلار منیم تیراختور بایراغیمین "خ" حرفینه ایلیشدیلر. دئییردیلر دئییبلر تراکتور تراختور یازیلسا بایراقلاری توتون آلین! من‌ده های توضیح وئریرم تیراختورون باشقانی(مدیر عاملی) دئییب ایرادی یوخدور! بیری‌سینه اؤز خیدمت کارتیمی گؤستردیم دئدیم منده سیز کیمی عسگر ایدیم! دئدی عئیب یوخ. آلتی دقیقه اویوندا گئچمیشدی اویونا باخا-باخا اؤزومه بیر یئر آختاریردیم کی پیمئنتا قول ووردو. سئوینج‌دن آتیلیب دوشنده سربازلارین بیری‌سی منی ایته‌لمک ایله کئفیمی پوزدو! بیر یئرده شیشیب اوتوراندان، بئش آلتی دقیقه‌دن سونرا بیر قول دا یئدیک! آنجاق آلقیشلامالارین چوخالماسی‌ ایله بیر پئنالتی اله گلدی. آنجاق نصرتی اونو کورلادی. منجه تکجه نصرتی موقصصیر دئییلدی. من بیلمیرم باشقا اویونچولار اونلارین برازیللی مودافیعی کیمی احتمال وئرمه‌ییرلر قاپیچی توپو توتابیلسین. پئنالتی‌نین نئجه کورلاندیغینا آشاغیدا باخین:

باغلانتی

پئنالتی‌دان سونرا اویونچولارین روحیه‌سی آشاغی گلمه‌مک ایچین دئیه‌بیللم کسینتی‌سیز آلقیشلاماق باشلاندی؛ آنجاق یازیقلار اولسون اوتا بیلمه‌دیک. قاییداندا بیر یئرده ماراقلی بیر صحنه گؤردوم. تئهران دوارلاریندا تکجه پئرسپولیس-استقلال آدلاری گؤرنمه‌ییر! تراختور دا وار. بو هم یاخشی دیر هم پیس! یاخشی‌لیغی بونا گؤره‌دیر کی تیراختور اؤزونو بؤیوک بیر تیم کیمی هر یئرده اورتایا قویور و هر یئرده یانداشی واردیر؛ آنجاق پیس‌لیگی بوردادیر کی آدام قورخور تیراختور یانداشلاری‌دا ایستادیوما گئتمک یئرینه، آدینی چکدیگیمیز تیملرین یانداشلاری‌ کیمی تکجه تبلیغ ائده‌لر:

بوتون ویدئولار و گؤرونتولر: لینک

---

بو یازی مین اوچ یوز سـکـسن دوققوزونجو ایلین سون پوستو ایدی. دوخسانینجی ایلی ده قوتلو اولسون دئییرم. اومودوم وار تیراختورون آسیایا گئتمه‌یی بو ایلین یازیندا گرچکلشسین.

گلن ایل‌ده آللاه عؤمور وئرسه و فیلتئرلری سیندیرماق حووصله‌مدن قالسا، قوللوغونوزدا  اولاجاغام. 

بونا دئيه‌رلر روحيه - 2

يادينيزدا اولسا اوچ آي بوندان اؤنجه بونا دئيه‌رلر روحيه باشليق‌لي، يازي‌سي ايله آزربايجان فوتبول‌سوئرلرين لاپ غئيرتلي و ان كؤنول گوجولو يانداشلاريندان دانيشديم. او زامان بلديه تكجه 100-150 يانداشلا استقلالين قاباغيندا دوردو و بير موساوي آلدي. او اويوندان سونرا بلديه تيراختورون بير باشقا رقيبي ياني، كيرمانين ميسي‌ني ده اوتدو.
دونن آخشام‌دا بلديه گلميشدي تئهرانا. بير موساوي آلسايدي دا تيراختوروچون‌دا بؤيوك بير ايش گؤره‌جه‌يدي. . آنجاق سون اويونلاردا اوچ ياريشي آرديجيل اولاراق اوتوزوب، سيپاهانا دا ائوده يئنيلدي. بلديه‌نين ائنيش يوقوشلو يولو هامي‌ني گيجه‌لديب! من دئييرديم بو دؤنه، اولابيلر همن روحيه‌لي يانداشلار گلمه‌سينلر! آما سئوينديريجي اولاي، تاماشاچي‌لار سايي‌‌سي‌نين نئچه قات يوكسك اولماسي ايدي! بو دؤنه گلنلرين روحيه‌سي، سايي‌لاري كيمي نئچه كره يوكسك ايدي.
اويونون سونوجو دا چوخ ياخشي اولدو؛ بو دا قالسين كي آراجي(داور) بلديه‌نين ايكي قولونو آفسايد توتدو و بلديه‌نين سالديريجي‌لاري‌دا ديققت‌سيزليگه گؤره ايكي دنه تك-تكه دوروملاري الدن وئرديلر. اومودوموز وار بوگون‌ده تبريزده، بو بؤيوك فورصتدن استفاده ائله‌ييب، تيراختور كيرمانين ميسين اودوب، اؤزونه آسيايا لاپ ياخينلاتسين.

گؤرونتو آز سالابيلديم. نئچه سي‌ني آشاغي‌دا گؤرون. بير نئچه‌ دقيقه‌ليك ويدئونو دا سونرا آپلود ائده‌جه‌يه‌م:

پيروزي 0 - 0 تراختور ب (بلديه) !!!

---

بوتون گؤرونتولرين آلبومو

آشيق غافار: ياشاسين تيراختور تيمي

خاطيريزده اولسا (اؤزوم اونوتموشدوم سيز هارادان يادينيزدا اولاجاق آخي!؟) ياز ايلكينده "بئشينجي آشيقلار بايرامي، تيراختور و دلي‌لر" يازيسيندا دئميشديم آشيق غافار ابراهيمي‌نين "ياشاسين تيراختور تيمي" چيخيش‌ني يايام. البته فيلمي‌ني يولداشيميز گؤتورموشدو و نئچه آي چكدي فايلين اوندان آليب كانوئرت اله‌ييب يونگوللـه‌ديب، اينتئرنئته قويماق ايچين اويغونلاشديرام! بيز توركلرده كي ماشالله هامي‌ميز "واكنش سريعـ‌"ـيك، بو ايش 8 آي چكدي! البته داش‌قاپي‌نين "آشیق‌لارین یارادیجیلیغی" يازي‌سي ياييلماسايدي منيم آلزايمئريم دايانماياجاغيدي! سيزي، آشيق قافارلا ايلگي‌لي اولان پاراگرافي اوخويوب و سونرا كليپه باخماغا دعوت ائديرم:

ائله بو "بايرام" سؤزجويو فيكيرينده ايديم كي گؤردوم آشيق غافار چيخيشي‌ني باشلاييب، دئيير:
"آدام گؤرنده كي تبريزده، تيرختور تيمي يوز اللي‌مين نفري بير يئره ييغير، دئيير كئشگه هامي‌ميز توپجو(فوتباليست) اولارديق! ايكي دنه ايفا واريم كي بيري‌سي‌ني تيرختورون افتخارينا اوخوياجاغام." و هامي آلقيشلادي. من ده يولداشا دئديم تيرختور اوچون اوخويان‌دا حتمن فيلم گؤتور. قرار دير فيلمي اوندان آلام و بورا قويام سيز ده باخاسينيز.

Ashiq-Qafar-Yashasin-Tiraxtur.4shared.com: wmv file: 10 MB

Ashiq-Qafar-Yashasin-Tiraxtur-7MB.4shared.com: wmv file: 7MB

خان‌ننه‌ميزين تايي تاپيلماز

سايين يولداشيم مئهدي بؤيوك آتاسي‌نين بو دونيادان كؤچمه‌سينه گؤره بير اوزونتولو يازي قويوب بولاغينا، شهريارين خان‌ننه‌ شئعرينه‌ ايسه اشاره ائديب. من‌ده مئهدي‌يه باش ساغليغي دئييرم. آلله اونون بؤيوك آتاسينا رحمت ائله‌ييب و مئهدي‌نين حؤرمتلي عاييله‌سينه‌ده صبر وئرسين.

فيكر ائليرم بوندان اؤنجه‌ده شهريارين دويغوسال شئعرلرينين تايسيزليغينا گؤره يازميشام(شهريارين آناسي و گرچك شاعير). خان‌ننه شئعري بوتون آزربايجانلي‌لارين اورتاق دويغوسودور. من ائله‌ده احساس‌لي آدام دئييلم، آدام اؤزونو شاعير يئرينه قويوب گؤز ياشي تؤكور. شهريارين اوركلنمه‌يي‌ني گؤروب دينله‌مه‌يي كي‌ مني لاپ اوزور:

ي.س: شهريارين اؤز ديلي‌ايله "خان‌ننه" شئعري يوتيوب‌‌دا: باغلانتي
يوتيوبا گئده‌بيلمه‌سينيز كانوئرت اولونموش فايلي‌ني، بورادان دانلود ائدين: باغلانتي
كانوئرت اولونموش فايل سيلينسه، يوتيوب آدرئسي‌ني كوپي ائله‌يين بورادا كانوئرت ائله‌يين: clipconverter.com

بونا دئیه‌رلر روحیه‌

جومه‌نین ایکیندی چاغی(ناهاردان سونراسی)، باشیم بو قیریق بیلگی‌سایارلا قاریشمیش ایدی تبریز ده چکدیگیم گؤروتلری ائدیت ائدیردیم. جی‌مئیل صفحه‌سی بیر بوجاق دا آچیق ایدی گؤردوم ایکی اوچ ایل بوندان اؤنجه سون گؤروشدویوم دوستلارین بیری‌سی ایسته‌ییر چت ائده منیمله. بیر آز کئف احوال‌دان سونرا دئدی: "نه خبر؟ من جومه‌‌لرده گلیرم ایشه"!
من ده دئدیم: "په هووو...!! کیشی بو بولانیق هاوا دا اضافه‌کارداسان؟ سن تعطیل گونو ایشه گئدیرسن آما من‌ده ایش گونو گئدیرم توپا باخام"! سونرا دئدیم سن ده ایش - پولو اؤتور هر دن گل گئدک ایستادیوما خوش گئچیر آداما بیر آز آدام اؤزونو بوشالدیر!
دئدی هن گؤرک واخت ائله‌سم گه‌له‌رم.
دئدیم بوگونکو بلدیه ‌اویونو قالدی صاباحا، گه‌له بیلسن گل. بونلار اویونلاری پیس زامانا سالیرلار آز آدام گئتسین!
او بیر جاواب وئردی پئشمان اولدوم اونو دعوت ائتمک‌دن! دئدی: "به تورک‌لر کی دونن تبریز تؤکولوب گلمیشدیلر ایستادیوما..."
گؤردوم کؤنلو یوخدو و بالا بالا ایسته‌ییر ده‌ببه‌‌له‌یه! اؤزومله دئدیم واللا حالیم یوخدور بو عزیز یولداشا دا ایکی ساعات چوخ ساده و آچیق شئی‌لر اوستونده دانیشام. دئدیم ائله قوی باشی "تخصص"‌ی ایله قاتیشیق اولسون و گئنل(عمومی) قونولارا فیکیر وئرمه‌سین؛ بلکه اؤرنک ایچین اقتصادی سورونلاریمیزی دا بئله یولداشلار چؤزدولر.

نئچه دفه آزربایجان ییغمالاری‌ني آلقیشلاماق ایچین قدیم یولداشلاری چاغیرمیشدیم؛ بیر هدفیم‌ده اونلارلا هر دن بیر یئر ده بولوشماق ایدی! گؤروردوم بیر سایی‌ آرواد-اوشاغا گؤره(بو دا قالسين كي ايستاديوم‌دا ائشيديلن سؤزلرين ايكي‌سي دقيقن اوشاقلار و عاييله‌لرين گله‌جه‌يي‌نه گؤره‌دير)، بیر سایی‌ ایشه گؤره، بیر سایی‌ یاخشی سونوج آلابیلمه‌مه‌یه گؤره، بیر سایی ایستادیوم آتموسفئری‌نی به‌یه‌نمه‌مه‌یه گؤره(سانكي كوچه-خياوان‌دا اصلن يامان ائشيتميرلر!)، و بئله بئله نه‌دنلره گؤره دئییردیلر کؤنلوموز ایسته‌ییر گله‌ک آنجاق هه‌له گؤرک نه‌ اولور. من‌ده بو سونوجا یئتیشدیم کیشی سن بیر الی‌بوش و کئفی‌ساز(!) بابا؛ نه‌یه اونا بونا دئییرسن آخی؛ بیری‌نین کونولو اولماسادا گلیب اورادا سوسقون اوتوراجاق، یاخشی سونوج‌دا اله گلمه‌سه دای بیر ده اورالارا دولانمایاجاق. بوگون بلدیه-استقلال یاریشیندا بیلدیم دوز سونوجا چاتمیشام سانکی. بیلدیگینیز کیمی بلدیه تیمی‌نی گئدیب آلقیشلاماق دوغرودان "کؤنول گوجو" (روحیه) ایسته‌ییر. هر آدامین ایشی دئییل. ایسته‌میرم دئیه‌م من اؤزوم بئله روحیه‌یه صاحیبم، منیم گئتمه‌ییم بیر آز نوستالژی‌دان‌دیر و تیم اوتوزاندا آز-چوخ راحاتسیز اولورام؛ آنجاق بوگون اوچ-دؤرد مین ایستیقلال‌ یانداشی قارشی‌سیندا سایی‌سی چتین‌لیک ایله یوزه چاتان بلدیه‌نی آلقیشلایانلار کسینلیک ایله بیر تایسیز کؤنول گوجونه صاحیب‌دیرلر. منجه هر کیمسه اؤزونه گووه‌نه‌بیلمیر و دئمه‌لی "اعتماد به نفس"ی آزالیب بئله آداملاری یاخین‌دان گؤرمه‌لی‌دیر. من اؤزوم بئله زامانلار روحيه‌م شارژ اولور. منجه بئله آداملاري توپلومسال بيليم آداملاري و پسيخولوقلار(روانشناسلار) باشقا آداملارا اؤرنك اولاراق تانيتديرمالي‌ديرلار. خالقين شن ياشاميندا و گله‌جه‌يه اومود ايله باخماق‌دا بؤيوك يارديم گؤسته‌ره‌بيلرلر. يازيقلار اولسون بونلارلا ياخشي سايقي‌دا گؤسته‌ريلمير و البته بونلار پيس داورانيشلاري گؤره-گؤره گئنه اوزدن گئدن دئييللر. منجه بو اؤزلليگه صاحيب اولماق ايچين يولداشلارا اصرار ائتمك دوزگون ايش دئييل؛ بئله بير كولتورون گئنيش ياييلماغي ايللر بويو زامان ايسته‌يير.
بونلار لاپ ياخشي بیلیرلر بلدیه تیمی‌ اوتوزاندا پیس اوتوزور! اؤتن هفته اهواز دا اون دقیقه‌ ايچينده اوچون یئدی. ائله بو ایستیقلال‌دان تبریز‌ده 50 مین یانداش قارشی‌سیندا 3-2 اوتوزدو. یانی بو ییغمانین ایپینه اودون ییغماق اولماز. آنجاق گئنه‌ده گلمیشدیلر اورک‌دن آلقیشلاییردیلار. گئدیب دوردوم آلقیشلایان ایکی دسته‌نین آراسیندا. اینانین بو یوز نفرین سسی‌، اوچ دؤرد مین ایستیقلال یانداشیندان گورولتولو ایدی. بلدیه بوگون ایستقلالی یوز یانداشلا  آز قالیردی اوتسون. بئله اولموشدو موساوی سونوجونا گؤره دئییردیلر "عئیبی یوخ"! حالبوکی ائو صاحیبلیگی ائدن جدولین ایکینجی تیمی، یانی ایستیقلال ییغماسی ایدی. اؤتن ایل تیراختور اللی مین تاماشاچی ایله ایستیقلال ایله ایکی-ایکی ائتمیشدی!

سون‌دا بونو دا دئییم کی بلدیه‌‌ و تیراختور گئدیش اویونلاری‌نین اؤجونو آلدیلار. من‌جه بلدیه‌نین موساوی ائتمه‌یی تیراختورون ائوده اوتماغیندان داها ده‌یه‌رلی اولماسادا، اؤنمی اوندان آز دئییل. بلدیه‌ قویمادی ایستیقلال‌ تیراختوردان داها اوزاقلاشا.
بلدیه - استقلال یاریشیندان نئچه گؤرونتونو گؤرمک ایچین بورایا کلیک ائدین. بو دا شهرداری‌نی کسینتی‌سیز آلقیشلایانلاردان بیر ویدئو:

باغلانتي (لينك)

ي.س: يالان ورزشي

اين قسمت را فارسي مي نويسم:
اين هم دروغ "خبر ورزشي" در روز روشن!
هوا آلوده بود ولي نه اينقدر كه صداي تشويق بيش از صد نفر هوادار شهرداري را كه غرش آن بيش تر از دو سه هزار طرفدار استقلال بود، نشنويد. ضمنا حتي اگر كسي از يك تيم ميهمان ته جدولي حمايت نكند نبايد  تعجب كرد؛ آنچه مايه تعجب است آن است كه تيم به اصطلاح پرهوادار استقلال در آستانه صعود به رتبه اول(كه با سدي محكم به اسم شهرداري مواجه شد!) نمي تواند در  ابرشهر تهران بيش از دو-سه هزار نفر به ورزشگاه بكشاند.
ضمنا در بازي رفت شهرداري با استقلال كه در مرداد ماه برگزار شد و متاسفانه شهرداري در خانه باخت(به دليل كم تجربگي و اشتباهات داوري)، نزديك به پنجاه هزار نفر در تبريز شهرداري را تشويق مي كردند. خدا را شكر كه براي اين مورد هم چند تا عكس و فيلم موجود است: لينك!

ي.س.2: 
"فوتباليستلر" درگي‌سي بير يوروم(كامئنت) ايله، بو يازي‌ني يايماغا گؤره اجازه ايسته‌ميشدي. من‌ده دئديم من‌ايچين افتخارذير! دئيه‌سن بوگون(قيشين بيرينجي گونو) ياييبلار. "بونا دئيه‌رلر روحيه"‌ني ده ياپيشديريبلار چيلغين يانداشلاري داشييان بير وانئتين قاباغينا. حتمن سيز ده آلين؛ بو درگي‌لر ده توركجه يازيلارين سايي‌سي چوخالمالي‌دير:

تراختور بوتون آزربايجانين‌دير

تبریزین سهند ایستادیومونا گیرمک ایچین کارت آلماق منیم کی ذوب‌آهن اویونونا گئده‌نده ده‌ده‌می یاندیرمیشدی. و ائله‌بیل گئت‌گئده بؤیوک بیر چتینلیگه چئویریلیر و تاماشچیلارینم آزالماغینا بیر نه‌دن اولموشدور. دئییلیر بو تبریزین ائلئکترونیک کند اولماغی ایچین دیر!! من بیلمیرم بو نئجه مئکانیزه ائتمک دیرکی دئییرلر هر کیمسه کارتین شارژ ائلیر، بیر دنه ده A4 کاغاذ پرینت آلیب قویوب قولتوغونا گلسین. آخی قرار دیرسا کاغاذ پرینت آلینا اؤزونوزو سارییب‌سیز یوخسا خالقی!؟ ایستادیوم قاپی‌سیندا بیر دفه‌لیک ائله بالاجا بیلیتلردن ساتیندا! آرتیق کاغاذ دا کورلانماز.

بو یئددیجه(هفته)نین دوخسان وئرلیشینده بونا گؤره نئچه دانیشیق گؤرسه‌تدیلر. بو دانیشیقلارین ایچینده بیر گنج اوغلان چوخ هوشلو باشلی و ده‌یه‌رلی دانیشدی. دئدی بو کارت باعیث اولور باشقا بؤلگه‌لردن گله‌بیلمه‌یه‌لر حالبوکی تیراختور ایله بلدیه بوتون آزربایجانین تیملری دیر. بو کارتی ییغیشیدیرمالی‌سیز! دالیسیجا دا باشقا بیر یانداش یاوا و یئرسیز دانیشدی. او دئییردی بو کارتی ییغیشدیرماسالار من دای ایستادیوما گلمه‌یه‌جه‌یه‌م!! بیری اونا و اونا تایلارا دئسین، بو ایشلر اونوچون‌دور تاماشاچی آزالسین‌دا؛ ائله دوخسانچیلار بونو ایستیرلر دا! اومودوم وار هامی ایلک ده دانیشان اوغلان کیمی همه‌شه بئله دانیشماقلارا حاضیر اولسونلار.

تیراختور اف.سی. سایتینین مولتی مئدیاسی دئدیگیمیز دانیشمالاری‌نین فیلمی‌نی‌ یوکله‌میشدیر. من اؤز باخیشیملا لاپ اؤنملی بؤلومونو کسیب آلت یازی‌دا قویدوم:

باغلانتی(لینک)

ائوین آباد سلیم

خالقین بئله نوحه‌لره احتیاجی وار؛ نه قدر گؤز یاشی دا تؤکولسه آز دیر. هئچ آچیقلاما دا گرکلی دئییل. یاشاسین سلیم؛ ائوین‌ده آباد سلیم:

سلیمین آنادیلینه گؤره نوحه‌سی: چوخ سئویرم آنادیلیمده دانیشام

بورادان MP3 سی‌نی یئندیره‌بیلرسینیز.

گونون سسي: تئز گل

سايين يولداشلارين بيري‌سي رحمتليك "حاج قوربان سولئيماني"يا گؤره دوزه‌لميش بير بلگه‌سل(موستند) فيلمي منه وئردي. اونا باخيب درين ائتكي‌لنديم. بيلديگينيز كيمي خوراسان توركلري‌نين موسيقي دونياسينداكي نابيغه‌لري ياشامي‌نين سون آنلاريندا اؤز دوغما يوردو، قوچانين آلوار كندينده ايدي. دئديگيم فيلم‌ده ائله او كند ده دوزه‌لميش‌دير. حاج قوربان دئيير:

"ايكي‌تئلي (دوتاري) آتام‌دان اؤيره‌نميشم، او اوستا دئييلدي آنجاق اونلار سينه سينه‌يه بيربيرلريندن اؤيرنميشلر؛ قديم‌كي‌لر دئييرلر بير كيشي ياشاميندا اوچ شئيي اولمالي‌دير: بير آت، بير توفنگ، و بير دنه ده ياخشي دوتار!"

البته چاغداش دؤنم‌ده آت و توفنگ لازيم دئييللر و ياشامين گركجه‌لري باشقا شئي‌لر اولوبلار. ياشامين چتين‌ليكلري‌ده او قدر چوخ اولوب كي سس، يير و يا موسيقي‌ دونياسي‌دا ده‌ييشليب‌دير و موسيقي‌ده خالق آراسيندا سئويلمه‌يي داها آرتيق اوزمانليق و داها آرتيق چاليشماق ايسته‌يير. آزربايجان موسيقي‌سي‌ده اوتاي‌دا قورومسال و عئلمي و ياتيريم آرخاسيندا اولاراق گئنيشلنسه‌ده، بوتاي‌دا موسيقي‌ قوروپلاري چوخ چتينليك ايله چاليشيرلار. موسيقي جان يانديرانلار دا ديليميزه جان يانديرانلارين تايي‌ديرلار. يقين كي بئله بير ايش سئوگي‌سيز اولماز.

فئيس‌بوك‌دا باريش قوروپون‌دان گؤزل بير چيخيش گؤردوم "تئز گل" آديندا. چوخ گؤزل اوخويوبلار. من ائله موسيقي‌دن باشيم چيخماز آنجاق او قدر سئوديم كي ياراتديقلاري اثري بورادا سيزينله پايلاشماق ايسته‌ديم. منجه تايسيز سس‌بيرليگي‌ ايله بئله "كور" اوخوماق بو دوروم‌دا آياق اوستونده آلقيشلانمالي‌دير.

اوينار گؤروتو(ويدئونو) بورادا گؤره بيلرسينيز. Mp3 فايلي دا بورادان يئنديرين.

گونون گؤروتو: تيراختور اويونچولاري‌نين آزربايجان رقصي

تيراختور و بلديه اويونلاري اوست اوسته گلمك ايچين بيلميرديم نئيله‌يه‌م! شهرداري‌يا، پيروزي اويونوندان سونرا كي اولايلارا گؤره گؤره داها آرتيق يارديم گؤسترمه‌يين لازم اولماغي‌ني دوشونوردم. آخيردا گؤردوم گئديرم كرجه‌ ساري! كرج و تئهرانين لاپ او قالين قه‌ييم توركلريندن اوچ يا دؤرد يوز نفر، گلميشديلر بلديه‌نين آلقيشلاماغينا. بونا گؤره دئييرم كي بلديه‌ني آلقيشلاماق، گئرچك‌دن روحيه، اورك، و فوتبول‌دان اوستون دويغولارا صاحيب اولماق ايسته‌يير. هر حالدا ياشاسين بلديه! مايلي كوهنين بيلديركي تيراختورو اوتماقلارينين اؤجونو آلدي؛ تيراختورون اوچ-بيره اوتماق سونوجو دا سئوينجي ايكي قات ائتميشدي. سئوينج ايله ايستاديوم‌دان چيخديق(*.ی. س.).

گئجه ايدمان خبرلرينده تيراختورون بيرينجي قولونو كرار جاسيم ووراندن سونرا باشقا اويونچولار ايله گئتديلر كورنئر بايراغينين يانيندا دوزولدولر. آما بيلمه‌ديم جريان نه ايميش؛ ايندي يولداشلاردان ائشيديرم كي ايراقلي عرب جاسيم كرار، برازيللي پيمئنتا، كيرمانلي عليزاده ، شيرازلي محمد حسن ابراهيمي ، و باشقا اويونچولار تاماشاچيلار قارشي‌سيندا لزگي و يا آزربايجان رقصي ائديبلر. ائله‌بيل ، ياواش ياواش تيراختورون اولوسلار آراسي اويونچولاري‌دا يانداشلارين كولتورل ائتگي‌سي آلتيندا، اولورلار آزربايجانين كولتورل تمثيلچي‌لري!
ياشاسينلار.

ايرنا دا ياييلميش بو گؤروتو ايدمان گونده‌ليكلري ده ياييبلار:

بو دا اويناماغين سونو، و قول وورماغا داوام وئرمك ايچين ياريشا دؤنمك:

ی. س:
تراکتور اف.سی. سایتی، قول‌لار و حساس لحظه‌لردن بیر اوچ ده‌یقه‌لیک فیلم یاییب. ایچینده دئدیگیمیز اویناماق‌دا وار! من‌ده تکجه‌ قوللار و اویناماق آنلارینا لزگی اویناماق موسیقی‌سیندن بیر پارچا آرتیردیم؛ آشاغی دا باخابیلرسینیز(داها کئیفییتلی گؤرمک ایچین بورادان دانلود ائتمه‌لی‌سینیز):

* ) ی. س:

کئچن آی تئهرانین تختی ایستادیوموندا تیراختور - ایستیل آذین اویونوندا تاماشاچیلارا دیجیتال کامئرا اؤزلری ایله ایچه‌ری آپارماق ایچین ایزین وئریلمه‌مه‌یه گؤره(دادلی سونوج)، تئهران دا کامئرا دولاندیرماق‌دان گؤزوم قورخوب! بو دؤنه کامئرا آپارمادیم. آما موبایل ایله نئچه دنه گؤروت و اوینار گؤروت (ویدئو) چکدیم؛ کئیفیت‌سیز دیرلر آما باخماغینا ده‌یرلر.
گؤرمک ایچین سول‌دا کی عکسین اوستونه کلیک ائدین.

دئه قارداش، دئه! حاققين دير

تبريزده علي‌دايي و باقيري‌نين قولاقلاري بورماق گله‌جك ايچين نه‌قدر ده ياخشي و فايدالي اولسادا ، قيسسا زامان ايچين بير آز ضررلي اولدو. فئدراسيون‌دا كي‌لار ايستاديوما گئدنلري آغير جزالانديرماق ايچين، ايندي‌يه‌دك بير يئته‌رلي بهانه تاپابيلمه‌ميشديلر؛ آما سانكي بيزيم آتالار سؤزونو ائشيتميديلر:" آغاجي ايچيندن يئيه‌ر قورد!" و جانيميزا قورد سالماق ايسته‌ديلر. آزربايجاني‌ دا ايچيندن يئيه‌ر مانقورد!

باشقا يئرلرده لاپ پيس يامانلايانلاري جزالانديرماسالار دا؛ مانقورد اولدوزلاري گتيريب ائله‌ديلر اؤز ميكروفونلاري! او دا آغزيندان گله‌ني آزربايجانا دئدي. سونرا دا ايكي نيشان ووردولار. توركلرين لاپ تانينميش آدامي ايستاديوم‌دا كي سؤزلري و دئمك "ايستكلري" اله‌شديريدي و هم‌ده كي فوتبول سئون آما كيمليك‌چي ايستاديوما گيرنلرين قاباغيني آلماق ايچين پلانلار تؤكولدو. و سون‌دا خبرلر ده گلدي بلديه(شهرداري) نين ائو اويونلاري ايچين تكجه 1500 نفر اونايلانميش و يانداشليق كارتي آلان آداملار ايستاديوما گئده‌بيلرلر! اولابيلر بو اويونو تيراختورون باشينا دا گتيره‌لر، آنجاق تاماشچيلار تكجه و تكجه گرك يامان و حتي هويلاماغي ده قيراغا قويمالي‌ديرلار. منجه دايي و باقيري‌نين هويلانماغي اولدوقجا يئترلي ايدي و بوتون مانقوردلارين حيساب لاري اللرينه گلدي. هامي‌نين دا بئيني وار و هر نه‌يي دوشونور.

بو اولايلار گؤستردي كي يانداشلارين تكجه و تكجه اؤز تيملري‌ني آلقيشلاماق، ياشاسين آزربايجان دئمك، و كيمليك‌ هارايلامالاري آزربايجانين وار اولماغيني ايسته‌مه‌يه‌نلري ركيك يامانلاماق‌دان دا پيس ايميش؛ آما آچيقجا، موستقيم و بيلاواسيطه جزالانماق بهانه‌سي اله وئرميرميش. بيزيم آراميزدا اولان هيجانا خاطير هردن يامان دئيه‌نلر بونو باشا دوشمه‌لي‌ديرلر؛ اونلار گرك بونو بيله‌لر كي ساده‌جه وارليغيميز و كيمليگيميز قونوسوندا سؤزلريميزي دونيايا چاتديرماق اولدوقجا يئترلي‌دير و كيفايت ائدر. بيزه وئريلن يامانلاردا تكجه بيزي يامان وئرمه‌يه ساري تحريك ائتمك و يؤنه‌تمك‌ ايچين‌دير. ائشيتديگيميز يامانلاري اؤتورمه‌لي‌ييك. تيراختورون گوجله قاباغا گئديب و بوتون يئرلري شوخوم وورماسي‌ قارشيسيندا اولان موقاويمت، طبيعي و دوغال‌دير. بونلار تيراختورون بؤيوك ته‌كه‌رلريينين آلتيندا كي سورتوشمه و اصطكاكلارديرلار!

تبريز ده تيراختور - ذوب آهن اويونوندا كي گؤتوردويوم نئچه دقيقه‌ليك فيلملره باخيرديم. بيري‌سي بير داها مني ماراقلانديردي. ايستاديومون او ياني "تورك ديلينده مدرسه" دئيه‌‌نده بيزيم طرف‌‌‌دن "اولمالي‌دير هر كسه" يانيتين سسي گوجسوز ايدي. يانيميزدا كي تاماشچيلارين بيري‌سي هامي‌يا اوجا سس ايله‌ده يوخ، بلكه هيجانلا دئييردي: "دئه قارداش! دئه! حققين‌دي!". البته بونون سسي‌ني تكجه اون-اون بئش نفر ائشيتدي، آما مينلر نفرين سسي بيردن گوجلندي! يقين كي بونا تاي آداملار ايستاديوم كي هئچ، خالق آراسينين هر يئرينده حضورلاري اولاجاق‌دير و دايي‌نين سؤزلرينه ده‌يه‌ر وئرمه‌دن اؤز يانينداكيلارا دئيه‌جكلر:

"دئه قارداش، دئه! حققين‌دي..."

ويدئونون باغلانتي‌سي

سونوج اؤنملی دئییل

ایلک ده آدام دئییردی بوندان پیس اولماز! ائو یئیه سی اولدوقدا ســکسن مین یانداشین گورولتولو آلقیش قاباغیندا اوتوزماق دان چتین ایش اولمازدی. البته دئییرلر شیددتلی آلقیشلاماق هر دن ترسینه سونوجلانار؛ و اولابیلر تیراختورون سهند ده اوتوزماسی ائله بیر گئرچه یی گؤسترمک ایچین ایدی!
هر حال دا توتساق بئله عجیبه اوتوزماقلاریندا یانداشلارین سووتماسیندان اؤترو بیر توطئه دا اولابیلر، بیز هئچ زامان روحیه میزی ال دن وئرمه مه لی ییک. بو ایشین چتین اولدوغونا و بیر سایی نین دا شاخسئی گئتمه سینه باخمایاراق(!)، ساغ اولسون بو یولداشلار کی بیرینجی اؤنمین یاریش سونوجوندا اولمادیغینی، مئیدانین ائشیگینده شنلیک و رقص ایله گؤستریب، اؤنملی اله گتیردیگیمیزین نه اولدوغونو بیلدیریب و بیز کیمی اوزاق دان گئدنلری شن و شاد یولا سالدیلار:

Link

بو دا تیراختور ایله اصفهانین ذوب آهنی یاریشیندان، گؤرونتو و کلیپ توپلوسو:
Görüntü toplusu Tirəxtur ilə Zobahən yarışından, Səhənd istadiomu - Sep.10,2010


ي. س:
آي آللاه بيز بو مريض و غرض‌لي سايتلارين اليندن نئيله‌يه‌ك؟ نئچه گوندن سونرا يوخاري‌دا شنليك ويدئوسونو iranianuk سايتيندا قويوبلار. آنجاق بو باشليقلا: "رقص آذربايجاني قبل(!!؟) از بازي فوتبال تراكتورسازي و ذوب آهن (باغلانتي)". گؤزوموزون قارشي‌سيندا يالان يازيرلار. ايشيق گونو آلتيندا يالان دانيشماق و قوندارماق ايله خبر يايماق بونلارين تك ايشي دير. فيكر ائليرم  ويدئونو يوتيوب دا قويان ديلداش‌دا ايسه آزجا قصور وار ايميش كي فارسجا آچيقلاما وئرمه‌ييب بو رقص اويون‌دان و اوتوزمادان سونرا دير. باشليق بئله اولمالي‌ ايدي: 
"رقص آذربايجاني بعد از بازي فوتبال تراختور و ذوب آهن با وجود باخت خانگي تراكتورسازي".


ي. س. 2:
كليپي يوتيوبا ‌قويان يولداشا بير قيسسا يوروم گؤنده‌رن‌دن سونرا، تئزليكله باشليغي اصلاح ائديب. اللري آغريماسين:

YouTube : "رقص آذربايجاني بعد از بازي فوتبال تراختور و ذوب آهن با وجود باخت خانگي تراكتورسازي".

تیراختورچولار ایرقچی‌لاری هت‌ریک ائتدیلر

فوتبول اویونلاریندان سونراکی مشق‌چی‌لرین(مربی‌لرین) موصاحیبه‌لرینه باخسانیز، گؤروبسونوز کی اوتوزان ییغمالار عصبی بیر دوروم‌دا یئرین اه‌یری‌ اولماغی‌نی، تاماشاچیلارین یامان دئمه‌یی‌نی، قاضی‌نین قارشی‌ ییغمایا یانداش اولماغی‌نی و باشقا ایلگی‌سیزدلیل‌لری اوتوزماق نه‌ده‌نی بیلیب و چوخلو موغالیطه ائدرلر.

تیراختور اویونلاریندا دا چیمن‌ اوستوندن باشقا، بؤیوک بیر یاریش‌‌دا واردیر و او تیراختورچولار ایله شوونیستلرین یاریشلاری‌‌دیر! بو یاریشین سونوجونو تعصصوب‌سوز دئمک بیر آز چتین ایدی. چونکو تیراختورو به‌یه‌نمه‌یه‌نلر، گئرچکلری قبول ائتمیردیلر. آنجاق منجه بو یاریش‌دا شوونیستلر دلیک-دلیک و یا "هت‌ریک" اولوبلار! یانی اوچ فول‌دان چوخ یئییبلر! اینانمیرسینیز، شوونیستلر ییغماسی‌نین بیر مورببی‌سی‌نین حیرصلی و منطیق‌سیز و گولدوروجو سؤزلرینه قولاق آسین! بیزیم بؤیوک شانسیمیز بودور ایرقچیلارین مشق‌چی‌لری مانقال باشیندان ییغمالاری‌نی یؤنه‌لدیر! موشیری‌نین بوتون سؤزلری گولدوروجو دور، آنجاق لاپ اعلا سؤزلری‌نی بو کلیپ‌ده گؤره‌بیلرسینیز:

باغلانتي

بهرام موشیری‌نین قیزیل ایله یازیلمالی سؤزلری:

- یه گرگی رو هم نمیدونم سمبل خودشون کردن در قبچاق چیکار می کرده...
- ما ترکیم! آغا برو تاریخ مملکتت رو بخون (که ببینی ما گفتیم فارسی!)
- اندیشه هاشون تهوع آوره...
- تا جایی که ما دیدیم بزرگاشون جاهلند...
- پنج سال یکی بیاد همین آمریکا شهروند اینجا میشه تو هنوز بعد هزار سال شهروند ایران نشدی 
- این یه درد اجتماعی شده...

موشیری‌‌ تکجه بیر سؤزو دوز دئییر! و او دا آینیشتاینین سؤزودور کی اؤزونه قاییدیر:

دونیا دا ایکی شئیین سونو بللی دئییل: بیری اینسانلارین حیماقتی، و ایکینجی‌سی کهکیشانلارین سونو! البته ایکینجی‌سی‌نه گؤره شک واردیر!

اوزاق‌دان دا، ياخين‌دان دا ياپيشدي

تيراختور سايتلارينين بيري‌سينده دونن‌كي اوتماغا گؤره دئييب: "تاماشچي سسي‌نين اولماديغينا گؤره ، بو اوتماق ياپيشمير"! آما دونن بيز بلديه ني ائكباتاندا آلقيشلاديق و اوچ دنه ده يئديك آنجاق اوزاقلاردان گلن خبرلره گؤره تاماشاچيلار شنليك ائديرديلر! نفت و بلديه اويونچولاري دا بيلميرديلر بو واختسيز شنليكلرين نه‌دني نه دير؟! البته بير دنه چوخ گؤزل قول وورولدو و ان آز گتيرديگيم شانس بو ايدي كي فيلمي‌ني چه‌كه‌بيلديم! بلديه موسللم قوللاري وورابيلمه‌يه‌نده من حيرصله‌نيب دال با دال اونا باخيرديم! گئرچك‌دن گؤزل قول ايدي:

باشقا كليپ‌لر

ايكي دئمه‌لي و دانيشمالي سؤز:

1- دونن كي اويون‌دا 150-200 بلديه‌چي وار ايديلر آما گينه ده توركلر تئهران‌دا ائو صاحيبليغي ائتديلر! هله نفتچي تاماشچيلارين ايچينده ده تورك وار ايدي و ياشاسين آذربايجان دئيه‌نده اونلاردا قاتيليرديلار. اويون آراجي‌سي طرفسيزليك ايله قاضي‌ليق ائده‌بيلمه‌دي و اونلارا شكلي بير پئنالتي توتاراق، بلديه‌نين ايكي پئنالتي‌سيندان واز گئچدي. بونلار باعيث اولدو  تاماشاچيلار قاضي‌ني هويلاسينلار. تاماشاچيلارين چوخو يامانلاياندا بير نفر ده اوجا سس ايله باغيريرديلار يامانلامين. بو دوز ايش دئييل. آما باشقا يانداشلار دئييرديلر فارسلار يامانلاييرلار، بيز ده گرك يامانلاياق! آما او دا اوز دن گئتميردي سانكي ايسته‌ييردي ساواشسين؛ ايتي لحن ايله دئيير يامانلاماق آذربايجانليلارا ياراشماز! منجه اونون داعوا آهنگلي سؤز دئمه‌يي بير نه‌ده‌ن ايدي هامي اونون سؤزونه قولاق آسماييب و اله سالسينلار! من ده اونا آجيقلانماغا گؤره اوزگونم. منجه او حاقلي ايدي، آنجاق او دا اؤز ايسته‌يي‌ني پيس دئييردي.

2- بو گؤروت‌ده نفتچي‌لرين توركلره خوش گلدين دئمه‌كلري دير! دوز دور لاپ پيس يئر ده اوتورتموشدولار بيزي، آنجاق ياواش ياواش توركجه خوش گلدين يازماق بير دب اولور! محروم اولوب هر نه‌دن ياساقلانماشيق، حالوا حالوا دئيه‌ك آغزيميز شيرين اولسون.

هوشو باش‌دان قاچيردان بلگه‌سل

من بلگه‌سل(مستند) فيلملري هر قونو دا اولورسا اولسون چوخ سئوه‌رم. البته اولابيلر فيلم‌ده يالان‌ ايستينادلاردا اولسون؛ بو قاليب باخيجي‌نين ديققتي و اونون تعصصوبسوز دويغولانماماق، و منطيق اوزو ايله اولاي‌لاري بير بيرلرينه تارازلانديرماسينا. موستند فيلملرين ان‌اؤنملي ده‌يه‌ري بودور كي باخيجي‌نين خوشونا گلديكلرينه فيكير وئرمه‌ييب و اونا تكجه گئرچه‌يي اولدوغو حال‌دا تانيتديرسين. اولابيلر آجي گئرچكلر ده اورتايا قويولوب و باخيجي‌نين كئفي‌ني پوزسون. يوخسا فيلم بلگه‌سل بلكي "تخيلي" اولوب و اوزاقدان باخانلاري گولدوره‌جك.

بو سؤزلري يازماغين نه‌ده‌ني اليمه چاتميش بير ايمئيل ايدي. اونو ايرانين قوندارما تاريخينه وورولموش ديلداشلارين بيري‌سي يوللاميشدي. يقين كي سيز ده بئله توركلر ايله سؤزونوز اولوب. آنجاق اونلار ايرانين قوندارما تاريخي‌ني گؤي‌لردن گلميش "وحي" كيمي سؤزسوز و ده‌ييشيلمز بيليرلر. ايمئيلين باشليغي "ايران ايلايي‌نين بير داها دوزه‌تمه‌سي (فيلم بازسازي تاريخ ايران)" ايدي و اونون ايچينده "ايران، يئددي اوزلو مدنييت (Iran, Seven faces of civilization)" بير ساعاتليق موستند آدلي فيلمي‌نه باغلانتي وئريلميشدي. ايلك ايمئيل گؤنده‌رن فارسجا بير آچيقلاما دا بئله يازميشدي:

این فیلم باز سازی تاریخ ایران به گونه ای فشرده(!) و آنقدر زیباست که هوش از سر می برد(؟!) و آنقدر مستند که می توان با آسودگی خیال(!) آن را دید و از آن اموخت برای بهبود حال و ساختن آینده.

چئويري:  بو ايران ايلايي‌نين بير داها دوزه‌تمه فيلمي، ائله سيخيلميش دوروم‌دا و ائله گؤزل‌دير كي هوشو باش‌دان قاچيردير، و ائله بلگه‌سل دير كي دينجليك ايله اونا باخيب، و اون‌دان ايندي و گله‌جه‌يي دوزه‌تمك ايچين اؤيره‌نمك اولار!

من ايسه بو فيلمين ايلغيم، توهم و خوليا اولدوغوندان بيلگي‌سي اولان كيمي، بئله يانيت وئرديم:
بير بلگه‌سل و تاريخي فيلم ائله اولمالي‌دير كي هوشو باش‌دان قاچيرتماق يئرينه، يوخونو باش‌دان قاچيرتسين و آدام اونا دينج و آسوده خيال ايله باخا بيلمه‌سين!