گئچن يئدديجه(هفته) تئهرانين اولوسلارآراسي كيتاب سرگي(نمايشگاه بين المللي كتاب تهران) سينه گئتميشديم دئديم ياخشي فورصت دير آذربايجان و توركييه اوتقلارينا دا باش وروم، گؤروم اورهان پاموكون يازديغي كيتابلاردان آلابيلره م يا يوخ. آذربايجان اوتاغيندا گؤردوم بير او تايلي يازار اوتوروب و بو تايلي لار اونون يازديغي كيتابلاردان آليب و اونا ايمضالاديرلار. گؤردوم ميزين اوستونه بالاجا ايل سايار قويوب و او بالاجا ايل سايارلارين اوستونده 7-8 دنه حئيدر علي يئو گؤروتو ورولوب. 3-4 دنه ياديگارليق ايچين گؤتوروب او تقويملره باخا باخا يولا دوشدوم. بئش آلتي آدديم اوزاقلاشماميشديم كي گؤردوم ايل سايارلارين اوستونده يازيب 2008 ايلي! تئز دؤنوب گلديم او يازارا دئديم، بونلار كي بيلديرين ديرلر! دئديم ايندي دئيه جك باغيشلايين تله سمه يه گؤره حاضيرلايامماديق، آنجاق او دئدي بو تقويملري حئيدر علي يئو دوغومونون سـكسن بئشينجي ايل دؤنومونه گؤره يايدلار! من ده دئديم اولمازدي سكسن آلتينجي ايل دؤنوم اوچون ده وورايديلار؟ او دا دئدي يوخ بو ايل كي بو ايل سكسن بئشينجي ايل دئييل! ... من ده ساغ اول دئديم، اؤز اؤزومه دئديم بونلار ايچين ده، سانكي، بختيار واهابزاده نين سؤزو ترسينه، دونيا فيرلانمير!
يولا دوشدوم، توركييه غورفه سيني تاپابيلميرديم، هاي فيرلانيرديم كي چين غورفه سيني گؤردوم! قاپي پنجره لي اليفباسي ايله اولان كيتابلارين يانيندا، تانيش اليفبا ايسه گؤزومه ده يدي! من ايچين تعججوبلو ايدي. اويغور توركجه سينه اولان كيتابلارين سايي سي آز دئييلدي. نئچه سيني ورقله ديم، كيتاب قيمتلريني ده اوستونده 'يوآن'ـجا وورموشدولار. دئديم ساغ اول چين! خبرلر ده ائشيديريك دوغو توركوستان دا توركلر باسقي آلتيندا ديرلار، آنجاق ائله بيل بونلار دا بيز دن قاباق ديرلار و چين غورفه سي دولودور توركجه كيتابا. ياشاسين چين دئييب، اوزاقلاشديم.
داي آياقدان دوشوردوم كي توركييه سرگي سيني تاپديم. بير آز كيتابلارا باخديم. غورفه سوروملولاري ايرانلي ايديلر، فارسجا سوردوم آلماق ايچين اورهان پاموكون يازديغي كيتابلاردان ايستيرم. دئديلر ساتيش ايچين فيلان غورفه باش وور، اولابيلر ايندي يه دك ساتمالي كيتاب قورتارسين.
گئديب اوراني تاپديم. بير قيرخ ياشلي كيشي اورادا اوتموشدو و توركييه بايراغي دا داليندان آسلانميش ايدي. فارسجا سوردوم، گؤردوم تئز بيريني آختارماغا باشلادي! بيلديم كي توركييه لي دير و تئز كانالي دئييشديم، ايسته ديم ايلك دفه آنادولو توركجه سينده دانيشام، كي بير آز تته پته يه دوشدوم(بيري دئميردي سن ائله آذربايجان توركجه سينه دانيش او باشا دوشر!). او دا چوخ ياواش و اوجا سس ايله دئدي كي:
« اورهان پاموك كيتابلاري بيتدي! شو آندا ساده جه، چوجوكلار ايچين كيتاب واردير! ».
راحاتسيز اولدوم، آمما گولومسه ييب من ده سؤيله ديم:
«افندي من كي چوجوك دئييليم، ساغ اول!».
او دا دئدي گوله گوله، و من ائوه ساري يولا دوشدوم.
ائوه ساري گلنده اؤزوم ايله فيكر ائليرديم، ايران دا نئچه نفر واردير كي يوكسك سوييه ده تورك ديلينه يازيلميش كيتابي اوخوسون؟ ساوادسيز توركلريك و ائله بيزلره چوجوك كيتابي يئترلي دير!
