نئچه گون بوندان قاباق، آفريقا ميللتلري ياريشلاريندا(جام ملتهاي آفريقادا)، تونيس و الجزايرين آراسينداكي اويوندا، القصداوي آدلي سالديريجي(فوروارد)، قول ووراندان سونراكي شنليك‌ده، كؤينكيندن بير تيكه كاغيذ چيخارديب كامئرالارا گؤستردي؛ او كاغاذين اوستونده يازيلميشدي "تونس حرة"( تونيس آزاددير)*!
القصدواي كسينليك ايله بو ايشدن سونرا، تونيس‌لي‌لري سئوينديريب و اؤز محبوبيتي‌ني خالقينين يانيندا چوخالتدي. آنجاق او بو ايشه گؤره جزالانيب، و آراجي(داور)دان ساري كارت آلدي. نه‌قدر ده قاضي‌يا دئدي پيس بير ايش گؤرمه‌ديم، يازي‌نين ياخشي بير ساوي وار ايدي، فايداسي اولمادي.
فيفانين ياسالاريندا(قوانينينده)، بئله ايشلر پروپاقاندا(تبليغات) آنلاميندا جزالانمالي‌درلار. حالبوكي فيفا بونو دا بيلير، دونيانين ان يانداشلي ايدماني(لاپ طرفدارلي ورزشي)، ائله بو ايشلره گؤره، گونو گوندن آرتيق سئويلير. بو بير چؤزومسوز(غير قابل حل) پارادوكس دور سانكي!
ايران‌دا تيراختور يانداشلاريندان باشقا، فوتبول سئون آداملارين هره‌سي ايچه‌ري(داخلي) تيملردن سونرا، بير يوخسا نئچه باشقا آدليم خارجي تيمين يانداشي‌ديرلار. استقلال-پيروزي تيملرينه بير عيللت‌دن چيخارديب دئمك اولورسا دا(!)، هئچ كيمسه بيلمير اؤزگه تيملره ائتديكلري يانداشليغين دليلي نه‌دير!؟
بيريسي منچئستئر يونايتئدي سئوير، بيريسي يووئنتوسو، باشقاسي بايئرن مونيخي و بئله بئله يانداشليقلار چوخدور! يا كؤينكلري و رنگلريندن خوشلاري گلير، يوخسا تئكنيكلي اويونچولاريندان! باشاريلار و قهرمانليقلاردا اؤنملي‌ديرلر. بو آدليم و چوخ سئويلن تيملرين بيريسي بارسئلونا دير.
تيراختور بو بير-ايكي ايل‌ده باعيث اولدو چوخلو آداملار، اؤزلليكله توركلرين اؤزلري، بارسئلونانين كاتالونيا ايچينده چوخ يانداشلي اولماغي‌نين نه‌ده‌ني‌ني(علتي‌ني) باشا دوشسونلر. من اؤزوم ائله بيليرديم بو بيلگي‌سيزليك تكجه ايرانا اؤزل ايميش، و تكجه ايران يايينلاريندا، بارسئلونا كيمي كلوبون كيمليك و هويت سورونونا گؤره، فوتبولدان اوستون اولماغي‌نين اوستو، بيلر-بيلمز باسديريلير. آنجاق ته‌زه‌ليك‌ده بيلميشم ائله آوروپا دا ايسه، بئله بير بيلگي‌سيزليك وار ايميش و حتي بارسئلونانين اصلي رقيبي‌نين مورببي‌سي، ياني پورتوغاللي خوزه مورينيو، بوتون اويونلار و شبئه‌لري چيخاردان سونرا، ته‌زه بيليب كي بارسئلوناني نه‌دن ديزه چؤكدورمك اولماز. و سون‌دا اعتراف ائديب كي بارسئلونانين باشاري‌سي‌نين سيرري، پئپ قووارديولا كيمي بير مورببي‌نين اوشاقليقدان بارسا كلوبونون ياراتديغي كولتورون ائتكي‌سينده بؤيويوب يئتيشمه‌سي(تربيت اولماسي)دير.
دئمك اولار آوروپا دا ايسه، بارساني باشا دوشمك چتين بير ايش‌دير؛ يا گرك بير كاتالان اولاسان، يوخسا رئالين باش مورببي‌سي. البته بو احتمال‌دا واركي آورپادا دا بارسئلونانين فوتبولدان اوستون اؤزلليكلري، يايينلاردا گؤسته‌ريلمير و بو يوفانين سياستلري ايله باغلي اولابيلر.
يئتيشيريك آزربايجان و تيراختور قونوسونا.
دئمك اولار تيراختور، تيراختور اويونچولاري‌ني، و اؤزلليكله تيراختور يانداشلاري‌ني دا، آزربايجانلي‌لاردان باشقا، هئچ كيمسه باشا دوشمور كي هئچ، باشا دوشمه‌ك ده ايسته‌مه‌يير. بو آجي بير گرچك‌دير. ياسال (قانوني) بهانه‌لرده آرادا اولماسا، گؤز گؤتورمه‌مك، پاخيلليق، و غرض‌لره گؤره، بيزيم حاققيميزدا چوخلو ظولوملر اولور. بونا گؤره چوخ اؤرنك(مثال) واردير. همه‌شه‌ده بورجلو چيخيريق!
تيراختور فوتبول تنديري‌ني قيزديرير، ايستاديوما چاتماق نه قدر چتين اولسادا تاماشاچي رئكوردونو سينديرير، آسيا قهرمانليق ياريشلارينا سهميه آلاندا قوناق قاباغينا قويولور، و ... آنجاق نهايت‌ده توركلره ايهانت اولور و سون‌دا تيراختور جزالانير. يانداشلار بهانه وئرمه‌يه‌نده ايسه، ياپيشيرلار آچار(كليدي) اويونچوموزون ياخاسيندان! كرار يانليش اولاراق اخراج اولونور، و او دا هيجانلانيب عكس العمل گؤسته‌رير. سونرا دا باجاريق‌سيز آراجي(قاضي) و تماروض ائدن اويونچو جزالانمادان، كرار بئش اويون محروم اولونور. بوتون جزالانميش اويونچولار باغيشلانسالاردا، كرارين باغيشلانماسي، دراكولالارا** آغير گليب، و باشقا بير تيراختورا قارشي پروپاقاندا باشلانير و ...
بو آرادا بير شئي چوخ سئوينديرجي‌دير، و او دا بيزيم گون گونه منطيق ايله داورانماق(رفتار) پروسه‌ميزين داها يوكسلمه‌سي‌دير. سانكي بيز دونيادا كي اوخشار اولايلارا باخيب، و اؤز تحمل و دؤزوموموزو داها چوخالديريق. دوزدور ايران‌داكي فوتبولدان اوستون ايشلره، فوتبولدان اوستونده باسقي‌لار(فشارلار) گلير، آنجاق گله‌جك هدفلري گؤز اؤنونه آلاندا، بوتون چتين‌ليك‌لري اوسته‌له‌مك قولاي اولور. بئله اوزاق گؤرنليك (دور انديشي) ايله، تيراختورون آرخاسيندا گوج ايله دوروب، آسيا زيروه‌لرينه چيخماغي باشارمالي‌ييق.
آيدين كسائي
قيش سونو 1389
آلت‌يازي:* - صحف تونس تشيد بتأهل منتخب بلادها لنهائي كأس افريقيا للمحليين( 3gypt.com )
** - كرار جاسيمين قاباغيندا كي دراكولالار ( Traxtorchi.ir, AnaYurdum )
